MBA̱A̱ rí naʼngo̱o̱ naʼni fe. Mbá xkri̱da, Maski ajndu Gixa̱a̱ nandoo maʼnimbátigáan náa iduu Jeobá, mú fe rí kuaʼdáá narikhoo “xúgíʼ dí ra̱májánʼ rí nakunguanʼ xa̱bu̱ wéñiʼ” (Efes. 6:16). Ma̱ngaa, fe gambáyulú muraʼníí xkujndu rí gákhii. Jesús niʼthúún xa̱bi̱i̱: “Á mu fe rí kuáʼdáála nindxu̱u̱ xóo tsígooʼ mostaza, ma̱ndoo mutha̱a̱nlá kúbá rígi̱: ‘Arajxu ayuʼ ñuʼún’, ikhú ikhaa magijxingoo” (Mat. 17:20). Numuu rí fe ma̱ndoo mambayúlú mambaxúlúʼ itháan gajmiúlú Dios, Májánʼ e̱ʼni̱ rí nuraximíjna̱ rígi̱: Dí nindxu̱u̱ fe rá. Xú káʼnii gándoo gusngajmá ga̱jma̱a̱ xúgíʼ a̱jkiu̱lú rí kuaʼdáá fe rá. Xú káʼnii gándoo muʼni itháan gújkhuʼ fe ndrígúlú rá. Ga̱jma̱a̱ náá gándoo maguaʼdáá fe rá. (Rom. 4:3.)

Rí maraʼdáá fe raʼkháa i̱ndó ndayóoʼ ma̱ta̱ya̱a̱ o maku̱ma̱ʼ rí Biblia naʼsngáa rí gajkhun, numuu rí ikhí naʼthí rí asndu xa̱bu̱ wéñiʼ nduyáá rí xtáa Dios ga̱jma̱a̱ asndu naguáʼin eʼni (Sant. 2:19). Ikha jngó, ndiéjunʼ nindxu̱u̱ fe rá.

Índo̱ náa Biblia naʼthí dí nindxu̱u̱ fe, naʼthí dí rígá a̱jma̱ rí eyoo gáʼthúu̱n. Timbá, naʼthí rí “fe nindxu̱u̱ rí nduʼyáá rí marigá ga̱jma̱a̱ kuwaanʼ raguáʼthi̱i̱n”, xóo muʼthá, rí nduʼyáá gajkhun rí wíji̱ marigá (Heb. 11:1a). Á mu kuaʼdáálu fe, nduʼyáá rí xúgíʼ rí naʼthí Jeobá nindxu̱u̱ gajkhun ga̱jma̱a̱ rí maʼga̱nú mambanúu. Mbá xkri̱da, Dios niʼthúún rígi̱ israelitas: “Á mu ikháanʼla majmáanʼ munimbáti̱ga̱ rí ninimbánuu rí mbiʼi ga̱jma̱a̱ rí mbruʼun, mu rí mbiʼi ga̱jma̱a̱ rí mbruʼun xárígá xó má ikhúún niʼgíʼ, xúʼko̱ má majmáanʼ munimbáti̱ga̱ rí nimbánuʼ gajmuʼ xa̱bi̱ʼ David, numuu rí ikhaa xágiʼdaa mbá ada̱ bi̱ maʼtáñajunʼ náa trono ndrígóo xúʼko̱ má levitas, dxájkuun, bi̱ numbayúʼ” (Jer. 33:20, 21). Lá ni̱ʼni̱ a̱jma̱ a̱jkiu̱lú mbá miʼtsú rí magajnúu o xágajnuu a̱jkha̱ʼ o á mu majtsi o xájtsi ráʼ. Á mu nditháan túʼni a̱jma̱ a̱jkiu̱lú ga̱jma̱a̱ numuu rúʼko̱, lá gíʼmáánʼ muʼni a̱jma̱ a̱jkiu̱lú rí bi̱ Niʼni xúgíʼ rúʼko̱ xáʼngo̱o̱ gáʼnimbánuu rí nikudaminaʼ maʼni ráʼ. Gajkhun má rí na̱nguá (Is. 55:10, 11; Mat. 5:18).

Rí maʼni a̱jma̱, fe nindxu̱u̱ “rí gajkhun rígá ma̱ngaa nduʼyáá ndiéjunʼ nindxu̱u̱ maski ajndu tsékujmaa”, rígi̱ nindxu̱u̱ rí “nasngájma kaʼwu” rí tséʼyáá, gajkhun nindxu̱u̱ (Heb. 11:1b; nota). Gundxaʼwamíjna̱ náa mbá xkri̱da. Mbáa ada̱ narajxulú xú kaʼnii eʼyáá rí gajkhun rígá giñánʼ. Maski má nditháan xándoo mbuʼyáá giñánʼ, mú tséʼniulú gákhii mu muʼtháán rí gajkhun rígá, numuu rí nandoo nduʼyá xi̱ʼ, nduʼyáá xóo eʼba̱a̱n inúu ixi̱ índo̱ naxnúu giñánʼ ga̱jma̱a̱ i̱ʼwáʼ rí naʼni giñánʼ. Índo̱ ada̱ naʼnimbo̱o̱ rígi̱, ndaʼyoo dí rígá maski ajndu xándoo mbaʼyoo ga̱jma̱a̱ iduu. Ikháá má kayuuʼ eʼni ga̱jma̱a̱ fe ma̱ngaa (Rom. 1:20).

Rí nuʼni nasngájma rí kuaʼdáá fe nindxu̱u̱, mu ma̱ndoo muguaʼdáá fe ginii ndayóoʼ muguaʼdáá “ku̱ma̱ rí gajkhun” (1 Tim. 2:4). Mú raʼkháa i̱ndó rúʼko̱ eyóoʼ. Apóstol Pablo niʼnirámáʼ rí fe nusngajmá ga̱jma̱a̱ “a̱jkiu̱lú” (Rom.  10:10). Raʼkháa i̱ndó mbuʼyáá rí gajkhun, gíʼmaa mbuʼyáá rí gíʼdoo wéñuʼ numuu. I̱ndó xúʼko̱ ma̱ndoo musngajmá rí kuaʼdáá fe, xóo muʼthá, rí makuwáanʼ xó má eʼthí Ajngá rawunʼ Dios (Sant. 2:20). Bi̱ tséʼyamajkhuu ga̱jma̱a̱ xúgíʼ a̱jkiu̱u̱n rí gajkhun, mbáa asndu xándoo gáʼyoo rí nasngájma rí gajkhun rígá, índo̱ naʼni i̱ndó rí eyoo ikhaa ga̱jma̱a̱ naʼni aʼkhá rí nagua̱ʼa̱ xuyuuʼ (2 Ped. 3:3, 4; Jud. 18). Ikha jngó, raʼkháa xúgíinʼ xa̱bu̱ bi̱ ndiyáá milagro rí niʼni Jesús nákha wajyúuʼ niguáʼdáá fe (Núm. 14:11; Juan 12:37). Xi̱ʼ kaʼwu ndrígóo Dios i̱ndó naʼni maguaʼdáá fe bi̱ nandún kuyáá rí gajkhun ga̱jma̱a̱ nawiñunʼ kuyáá rí minduwaʼ (Gál. 5:22; 2 Tes. 2:10, 11).

Rey David ninindxu̱u̱ mbáa xa̱bi̱i̱ Dios bi̱ nisngájma rí nigiʼdoo fe (Heb. 11:32, 33). Mú raʼkháa xúgíinʼ bi̱ nikúwá náa goʼwóo niguaʼdáá fe xóo ikhaa. Mbá xkri̱da, ndxájuu giʼnii bi̱ mbiʼyuuʼ Eliab, nisngájma rí tágiʼdoo fe índo̱ niríyúu David numuu rí nindoo mbaʼyoo náá numuu rí Goliat nirajmiin israelitas (1 Sam. 17:26-28). Nimbáa tségumaa ga̱jma̱a̱ fe ni má tségruigu̱u̱ náa anu̱u̱. David nigiʼdoo fe numuu rí nimbájxúu ga̱jma̱a̱ Dios.

Náa Salmo capítulo 27, náa (versículo 1) nasngájma xú kaʼnii David ni̱jkha̱nú nigiʼdoo mbá fe gújkhuʼ. Náa (versículos 2 ga̱jma̱a̱ 3) ikhaa nindxa̱ʼwáminaʼ xú kaʼnii nixtáa ga̱jma̱a̱ xú kaʼnii Jeobá niʼniún xa̱bu̱ bi̱ sia̱nʼ gajmíi̱n. Náa (versículo 4) naʼthí rí ikhaa ningajo̱o̱ kaʼyoo wéñuʼ tabernáculo ndrígóo Jeobá. Náa (versículo 6) naʼthí rí ikhí niʼtákáñuu Jeobá gajmíi̱n eʼwíínʼ israelitas. Náa (versículos 7 ga̱jma̱a̱ 8) nasngájmaa rí ndiyáaʼ ikha ndrígóo Jeobá índo̱ niʼtájkáan. Náa (versículo 11) nindo̱ʼo̱o̱ Jeobá rí maʼsngóo mú maʼga náa kambo̱o̱. Ga̱jma̱a̱ náa (versículo 13) naʼthí rí magiʼdoo fe gíʼdoo wéñuʼ numuu náa ikhaa rí asndu niraximínáʼ, xú kaʼnii gáxtáa á mu ragíʼdoo fe.

Ma̱ndoo maguaʼdáá mbá fe xóo rí nigiʼdoo David á mu nduʼyaridáá xóo nikumuu ga̱jma̱a̱ rí niʼni xó má naʼthí náa Salmo capítulo 27. Xú káʼnii fe na̱ʼkha̱ náa ku̱ma̱ rí gajkhun, índo̱ nuʼnigajmaa ajngá rawunʼ ga̱jma̱a̱ índo̱ nuraxnuu i̱ʼwáʼ i̱yi̱i̱ʼ, xáʼniulu gákhii musngajmá rí na̱ʼkha̱ náa xi̱ʼ kaʼwu (Sal. 1:2, 3). Índo̱ gúʼnigajmaa guriʼyáʼ mbiʼi mu mundxaʼwamíjna̱lú, numuu dí rúʼko̱ gáxkaxáanʼ muxnáa núma̱a̱. Índo̱ nandulú kuʼyáá Jeobá itháan eyulú musngajmá fe ndrígúlú, náa muʼtákáñii, rí muʼgualú náa nagimbáanʼ ga̱jma̱a̱ rí muʼthúún eʼwíínʼ rí nagua̱ʼthi̱i̱n marigá nda̱wa̱á (Heb. 10:23-25). Ma̱ngaa nusngajmá fe índo̱ nuʼtájkáan má xúʼko̱ ga̱jma̱a̱ rí tsekanájkulú (Luc. 18:1-8). Ikha jngó xúniʼñáánʼ ruʼtákháñíin Jeobá numuu rí ikhaa naxmiéjuunʼ kaʼyulú (1 Tes. 5:17; 1 Ped. 5:7). Fe naxkajxáanʼlú rí muʼnimbánii  ga̱jma̱a̱ rúʼko̱ mambayúlú maʼni gújkhuʼ fe ndrígúlú (Sant. 2:22).

Mbruʼun nákha inuu makhañúu Jesús niʼthún xa̱bi̱i̱: ‹Guguaʼdáá fe náa Dios, xúʼko̱ má guguaʼdáá fe náa mangúún› (Juan 14:1). Ikha jngó ndayóoʼ maguaʼdáá fe náa Jesús, raʼkháa i̱ndó náa Jeobá. Xú káʼnii gúʼni rá. Guʼyáá ajtsú enii xóo ma̱ndoo muʼni.

Timbá, guʼyáá rí nijuiʼtsiwáanʼ nindxu̱u̱ xóo mbá regalo rí mámbáa dí ikháanʼ nixnulú Dios. Apóstol Pablo niʼthí: “Xtáá ga̱jma̱a̱ numuu fe náa A̱ʼdióo Dios bi̱ nindoo kaʼyoʼ ma̱ngaa nixnáximinaʼ ga̱jma̱a̱ numuʼ” (Gál. 2:20). Índo̱ kuaʼdálú fe náa Jesús, nduʼyáá gajkhun rí nijuiʼtsiwáanʼ, rúʼko̱ naʼni rí Dios ma̱ndoo maʼni mba̱a̱ a̱jkiu̱u̱n kaʼyoo aʼkhúlúʼ, ga̱jma̱a̱ naʼni rí ma̱ndoo makuwáanʼ kámuu mbiʼi, xúgíʼ rígi̱ nasngajma rí Dios nandoo kaʼyulú (Rom. 8:32, 38, 39; Efes. 1:7). Rígi̱ naxnúlú tsiakii mú xundxa̱ʼwa̱míjna̱ dí raʼkhí (2 Tes. 2:16, 17).

Rí maʼni a̱jma̱, guʼtájkáan ga̱jma̱a̱ mbiʼyuu Jesús mu xúʼko̱ mu̱ʼgua̱ kanuu mijngii náa ikhaa. Ga̱jma̱a̱ numuu rí nijuiʼtsiwáanʼ, ma̱ndoo muʼtákáñii Jeobá “mu magaʼwíínʼ a̱jkiu̱u̱n kaʼyulúʼ ga̱jma̱a̱ mu muxkamaa rí májánʼ rí na̱nguá kaʼyulúʼ mundrígú mbiʼi rí gáʼyulúʼ” (Heb. 4:15, 16; 10:19-22). Rí muʼtájkáan nambáyulú mu xúxuʼdamijnalú aʼkhá (Luc. 22:40).

Rí maʼni ajtsú, guʼnimbulúʼ kuʼyáá Jesús. Apóstol Juan niʼnirámáʼ: “Bi̱ gíʼdoo fe náa A̱ʼdióo maxtáa kámuu mbiʼi; bi̱ tséʼnimbo̱o̱ náa A̱ʼdióo xáxtáa, marigá sia̱nʼ ndrígóo Dios náa ikhaa” (Juan 3:36). Guʼyáá rí Juan niʼthí rí tsembánii rí maraʼdáá fe ga̱jma̱a̱ rí xátanimbaaʼ. Ikha jngó, nusngajmá fe náa Jesús índo̱ nuʼnimbulúʼ kuʼyáá. Ga̱jma̱a̱ nuʼnimbulúʼ índo̱ nuʼnimbánii “xtángoo ndrígóo Cristo”, xóo muʼthá, xúgíʼ rí niʼsngáa ga̱jma̱a̱ rí niʼthí muʼni (Gál. 6:2). Ma̱ngaa nuʼnimbulúʼ índo̱ nuʼnimbánii ikha rí naxná “ñumba tsi jmbi, tsi majan indxaʼhuaminaʼ” (Mat. 24:45). A mú nuʼnimbánii rí niʼthí Jesús, maguaʼdáá tsiakii mu maʼngulú náa xúgíʼ gamiéjunʼ rí gúraʼníí (Mat. 7:24, 25).

Mbá miʼtsú, mbáa xa̱biya̱ niʼthúu̱n Jesús: “¡Gúʼdoo fe! ¡Atambáyuʼ náa ndayóoʼ fe!” (Mar. 9:24). Xa̱bu̱ bugi̱ nigiʼdoo fe, mú ninindxu̱u̱ xa̱bu̱ wabaaʼ ga̱jma̱a̱ ni̱jkha̱nú ndiʼyoo rí ndiyóoʼ magiʼdoo itháan. Xó má ikhaa, xúgiáanʼ mangáánʼ ndayúlú fe. Rí xúgi̱ ma̱ndoo muʼni rí maʼni gújkhuʼ fe ndrígúlú. Xó má ndiʼyáá, nuʼni xúgíʼ rígi̱ índo̱ nuraxnuu Ajngá rawunʼ Dios ma̱ngaa rí nundxaʼwamíjná rí nuraxnuu, rúʼko̱ gáʼni rí makumulú kuʼyáá Jeobá ga̱jma̱a̱ rí muxnáa núma̱aʼ. Fe ndrígúlú maʼni itháan gújkhuʼ índo̱ nduʼyamajkuíí gajmiúlú a̱ngiu̱lú, índo̱ nuʼthúún eʼwíínʼ ga̱jma̱a̱ numuu rí naguaʼti̱i̱n nda̱wa̱á ga̱jma̱a̱ rí muʼtákáñii má xúʼko̱. Á mu nuʼni xúgíʼ rígi̱ muguaʼdáálu fe rí mikaʼwu, mba̱a̱ rí maguma tsajkurámáanʼlu nda̱wa̱á. Ga̱jma̱a̱ xúʼko̱ ma̱ndoo kaʼyulú Dios (Jud. 20, 21).