1-3. Ndíjkha rí ndiyóoʼ muniñaaʼ asignación ndrígu̱ún tikhuun bi̱ kúwá runi káxi̱ ñajuunʼ Dios rá.

ROBERT ga̱jma̱a̱ Mary Jo narmáʼáan a̱jkiu̱ún xóo nikúwá ruñajuunʼ mbá skíñúʼ i̱mba̱ tsiguʼ xóo misioneros, aniún niʼniún nandii. Ikhiin nuthi: “Nidxuxu rí muñewu̱u̱n. Mú niʼniuxu gákhii muniʼñáaʼ náa nikúwáanʼxu ruñajuunʼ numuu rí niguʼunʼxu makuwáanʼ ikhí ga̱jma̱a̱ ninindxu̱u̱ guʼwúxu”.

² Imba̱a̱ matrimonio, William ga̱jma̱a̱ Terrie, nuthi: “Índo̱ ndiya̱a̱xu rí ni xándoo gatangaánʼxu náa asignación ndrígúxu̱ ga̱jma̱a̱ numuu nandii rí kuaʼdááxu, ikhú nimbiyaʼxu. Ikhú ni̱jkha̱ raguámbáa dí raʼkháa tháán ninduxu muyambáá náa i̱ʼwáʼ país”.

³ Alexéi naʼthí: “Ndiyaxu rí bi̱ nakiʼníin nindúún rí murugua̱a̱ sucursal náa xtáá rañajuunʼ. Maski má ndi̱yo̱o̱ rí nindúún muni, raʼkháa tháán nigawúnʼ índo̱ niʼngu̱u̱n nirugua̱a̱ ga̱jma̱a̱ ikhú Niniʼñánʼxu ruñajuunʼ náa Betel”.

4. Xkáʼnii graxe̱ gúriʼña̱a̱ náa artículo rígi̱ rá.

⁴ Raʼkháa i̱ndó a̱ngiu̱lú bugi̱ ndiyóoʼ maguʼwún náa i̱mba̱ nuxi̱ʼ xóo makuwá. Ikháá má kayuuʼ niguáʼníí mbaʼin betelitas ga̱jma̱a̱ eʼwíínʼ bi̱ kúwá ruñajuunʼ káxi̱. * Gajkhun má rí a̱ngiu̱lú bugi̱ niʼniún gákhii wéñuʼ muniñaaʼ ñajuunʼ rí niguʼwún wéñuʼ kuyáá. Dí gándoo gambáñun xá. Xú káʼnii gándoo gúmbaʼñún xá. Xóo gáxti̱ʼña̱a̱ graxe̱ rígi̱ mambáyulúʼ wéñuʼ á mu naxtiʼkhuu xóo kúwáanʼ.

5. Xú káʼnii gáʼni makuwáanʼ á mu naxtiʼkhuu asignación ndrígúlú rá.

⁵ Asndu xkáʼníí má ñajuunʼ rí kúwáanʼ ru̱ʼni̱, náa Betel o náa  i̱ʼwáʼ. Xúgiáanʼ naguʼwunlú kuʼñúún a̱ngiu̱lú ga̱jma̱a̱ náa kuwáanʼ. Ikha jngó, á mu ndayóoʼ rí muniʼñáanʼ ga̱jma̱a̱ mbá numuu, najmáa a̱jkiu̱lú. Nduʼñíinʼ a̱ngiu̱lú bi̱ nuniʼñúnʼ ga̱jma̱a̱ naxmiéjunlú eni, itháan á mu nuniʼñáanʼ ga̱jma̱a̱ numuu rí xa̱bu̱ nánguá eniñanʼ maguma ñajuunʼ ndrígúlú (Mat. 10:23; 2 Cor. 11:28, 29). Ma̱ngaa naʼniulú gákhii rí mugíʼdi̱i̱ muʼni i̱mba̱ nuxi̱ʼ rí nánguá eguʼwúnlú muʼni, itháan á mu natangáanʼ náa xuajñulú. Rúʼko̱ rí nigíʼnuu Robert ga̱jma̱a̱ Mary Jo ikhiin nuthi: “Nánguá eguʼwunxu xóo nikuwáanʼ nákha ginii ga̱jma̱a̱ asndu tsiánguá eʼñuxu rí mutaraʼa náa ajngúxuʼ. Xóo raʼkháa ikháanʼ gakuwáanʼ ikhí kumuxu”. Mbáa ma̱ngaa, maʼniulú gákhii makánulu mbújkha̱a̱. Mbáa maʼniulú tsiánguá ga̱jma̱a̱ asndu majmáa a̱jkiu̱lú. Dí gándoo gámbáyulú á mu naguáʼníí rígi̱ rá.

6. Xú káʼnii gakuwáanʼlú mijngii náa Jeobá rá.

⁶ Makuwáanʼlu mijngii náa Jeobá (Sant. 4:8). Xkáʼnii gúʼni rá. Gakumulú kuʼyáá ikhaa, numuu rí ikhaa nindxu̱u̱ “bi̱ naʼdxawun índo̱ nugríga̱a̱” (Sal. 65:2). Ga̱jma̱a̱ náa Salmo 62:8 naʼthí: “Náa inuu ikhaa guxnaxí a̱jkia̱la”. Jeobá ma̱ndoo maʼni itháán rí xóo ikháanʼ nunda̱ʼa̱a̱ o xóo rí ikháanʼ nakumulú (Efes. 3:20). Ikhaa raʼkháa i̱ndó maʼnimbánuu rí nunda̱ʼa̱a̱ índo̱ nuʼtákáñii mu maʼnimbánuu xkujndu ndrígúlú, ikhaa ma̱ndoo maʼni mbá rí asndu ikháanʼ tséguaʼthi̱i̱n, mbá rí ikháanʼlu nditháan tsékumulú rí maʼni.

7. a) Dí gámbáyulú makuwáanʼ mmijngii náa Jeobá rá. b) Xó má naʼthí náa Hebreos 6:10-12, dí gárígá á mu tséniʼñánʼ ru̱ʼni̱ ñajuunʼ Jeobá rá.

⁷ Ma̱ngaa mambáyulúʼ makuwáanʼ mijngii náa Jeobá rí muraxnuu tsejtsi mbiʼi Biblia ga̱jma̱a̱ mundxaʼwamíjna̱ rí nuraxnuu. Mbáa bi̱ ninindxu̱u̱ misionero naʼthí: “Ndayóoʼ rí xáguanúu rí muʼnigajmaa mbá guʼwáanʼ ga̱jma̱a̱ rí muʼniratamijná rí mbiʼyáá náa reunión, xó má e̱ʼni̱ nákha nikuwáanʼlú náa asignación rí niniʼñáʼ”. Ma̱ngaa, nditháan xúniʼñáanʼ ragájnulu ruʼtáraʼa náa congregación nuxi̱ʼ rí kuwáanʼlu. Jeobá nditháan tsémbumuu kaʼñúún bi̱ naguájun jmbu maski má nánguá eʼngu̱u̱n gúni xóo nákha ginii (atraxnuu Hebreos 6:10-12). *

8. Xú káʼnii embáyulú rí naʼthí náa 1 Juan 2:15-17 mu xugua̱ʼdáálu wéñuʼ rá.

 ⁸ Xugua̱ʼdáálu wéñuʼ. Xúniʼñáanʼ rí maxmiéjunlú maguaʼdáá dí rígá náa numbaaʼ ndrígóo Gixa̱a̱ maríya kaʼyulú mbiʼi mu xúʼni̱ ñajuunʼ Dios (Mat. 13:22). Xúʼdxawíín rí gúthi bi̱ nambáxulúʼ gajmiúlú, bi̱ kuʼñúún u eʼwíínʼ xa̱bu̱. Bi̱ ikhiin nduyáá rí májánʼ xtágabu exnulú índo̱ nuthulú rí mbuʼyááʼ rí maguaʼdáá mbújkha̱a̱ náa numbaaʼ rígi̱ (atraxnuu 1 Juan 2:15-17). * Gakumulú kuʼyáá Jeobá, ikhaa nakudaminaʼ maxnúlú náa “mbiʼi rí gáʼyulúʼ”, rí majmañulu ga̱jma̱a̱ numuu ikhaa, rí xájmulú wéñuʼ ga̱jma̱a̱ rí gáʼyulú mu makuwáanʼ ga̱jma̱a̱ (Heb. 4:16; 13:5, 6).

9. Xó má naʼthí náa Proverbios 22:3, 7, ndíjkha rí májánʼ nindxu̱u̱ rí xúʼni̱ mbaʼ muʼníí gidxóó ga̱jma̱a̱ dí gándoo mambáyulúʼ mu muraʼwíí májánʼ rí muʼni rá.

⁹ Xúʼni̱ mbaʼ muʼníí gidxóó (atraxnuu Proverbios 22:3, 7). * Rí mi̱dxu̱ʼ xtáaʼ rí xtaʼdáá mitsídánʼ gajnúu, ragákhíi má magiʼmáán. Ikha jngó xúraʼwíi gidxóó rí tséyulú má wéñuʼ. Índo̱ rígá mbá rí naʼni makuwáanʼlu xígi̱ kaʼnii, májánʼ gáʼni rí ‹guʼtajkáan ga̱jma̱a̱ guʼtakáñii› Jeobá mu mambayúlú muraʼwíí májánʼ rí muʼni. Ikhaa maʼni rí makuwáanʼ tsímáá ga̱jma̱a̱ mañewu̱u̱n rí nundxaʼwamíjna̱ ga̱jma̱a̱ mañewu̱u̱n a̱jkiu̱lú, ma̱ngaa mambáyulúʼ mundxaʼwamíjna̱ ga̱jma̱a̱ tsumáá (Filip. 4:6, 7; 1, Ped. 5:7).

10. Dí gámbáyulú mu muxkamiin bi̱ mambaxú gajmiúlú rá.

¹⁰ Mambaxáaʼ májánʼ gajmiáanʼ bi̱ nambáxaaʼ gajmiáanʼ ga̱jma̱a̱ bi̱ xtañún. Guʼthúún bi̱ nambáxulúʼ gajmiúlú rí kúwáanʼ raguáʼníí ga̱jma̱a̱ rí ekumulú, mú itháan bi̱ niguáʼníí ikháá má kayuuʼ. Rúʼko̱ gáʼni rí xájmulú wéñuʼ (Ecl. 4:9, 10). Maski ajndu kuáʼdíin bi̱ nimbáxulúʼ gajmiúlú nákha ginii, ndayóoʼ mbuʼñíinʼ eʼwíínʼ bi̱ mambaxú gajmiúlú. Guʼthúún nguáthá mba̱a̱ rí Jeobá niʼni tsajkurámáanʼlu mu xúʼko̱ mbuyáá rí gagi kuwáanʼ rí nuʼni ñajuunʼ ikhaa. Maski má tikhuun a̱ngiu̱lú xákru̱ʼu̱u̱n gagi rí naʼni maraxtaa índo̱ natani káxi̱ ñajuunʼ Dios, xkri̱da rí ikháanʼ nuʼgíʼ gambáñun ga̱jma̱a̱ maʼni rí maʼndún mambaxúún ga̱jma̱á ni̱ndxu̱lú. Mú tsumáá gúʼni mu xúʼthá wéñuʼ ga̱jma̱a̱ numuu rí ikháanʼ ni̱ʼni̱ ga̱jma̱a̱ xúʼthún rí xambáñun.

11. Xkáʼnii gándoo gakuwáanʼ gagi má xúʼko̱ gajmiúlú bi̱ ndiʼyáa rá.

¹¹ Á mu rí ndiyóoʼ muniʼñáaʼ asignación ndrígúlú ga̱jma̱a̱ numuu rí naʼniuu nandii bi̱ ndiʼyáa, xúʼthán rí ikhaa gíʼdoo aʼkhúún. Ga̱jma̱a̱ á mu  ikháanʼ naʼniulú nandii, xákumulú rí kuaʼdáá aʼkhúlúʼ ga̱jma̱a̱ xundxa̱ʼwa̱míjna̱ rí ni̱ʼni̱ nduwaaʼ bi̱ ndiʼyáa. Garmáʼáan a̱jkiu̱lú rí ni̱ndxu̱lú ‹mbóó xuwiʼ› ga̱jma̱a̱ rí nixuʼdámíjnalú náa Jeobá rí muñewumíjnalu (Mat. 19:5, 6). Ma̱ngaa á mu nuniʼñáanʼ asignación ndrígúlú ga̱jma̱a̱ numuu rí nda̱a̱ tsu̱ma̱ ni̱jkuá ewáan ada̱. Guʼtháán aʼdiúlú rí nduʼyáá dí itháan gíʼdoo numuu ikhaa ki xóo asignación ndrígúlú. Nángi eʼni gúʼtháán rí nduʼyáá rí ikhaa nindxu̱u̱ mbá regalo rí na̱ʼkha̱ náa Jeobá (Sal. 127:3-5). Ma̱ngaa guʼtháán dí ra̱ʼkhá tháán mitsaanʼ nikuwáanʼ nákha ni̱ʼni̱ káxi̱ ñajuunʼ Jeobá, rúʼko̱ gámbáyúu mu maxkajxi̱i̱ a̱jkiu̱u̱n mu maʼni káxi̱ ñajuunʼ Jeobá ma̱ngaa, xó má ni̱ʼni̱ ikháanʼlu.

12. a) Xkáʼnii gándoo gumbáñun bi̱ nuni káxi̱ ñajuunʼ Jeobá mu xúniñaaʼ ñajuunʼ rí kúwá runi rá. b) Dí gándoo gúʼni mu xáʼniún gákhii náa i̱mba̱ nuxi̱ʼ asignación ndrígu̱ún xá.

¹² Rígá mbaʼa congregación, ga̱jma̱a̱ tikhuun a̱ngiu̱lú numbañún bi̱ nuni káxi̱ ñajuunʼ Dios, nuni xó má eʼngo̱o̱ mu nda̱a̱ rí gáʼñúnʼ náa asignación ndrígu̱ún. Mbá xkri̱da, nuxnún tsiakii mu xúniñaaʼ asignación ndrígu̱ún, numbañún ga̱jma̱a̱ mbújkha̱a̱ o i̱ʼwáʼ rí ndañúunʼ, o nuñewu̱u̱n bi̱ kúwá náa guʼwún. Kaʼyoo rí mixníín núma̱aʼ ga̱jma̱a̱ numuu xúgíʼ tsiakii rí nuni (Gál. 6:2). Dí gándoo muʼni á mu náa congregación ndrígúlú ni̱ʼkha̱nú mbáa ndxájulú bi̱ naʼni káxi̱ ñajuunʼ Jeobá. Xúndxaʼwamíjna̱ rí niniñuuʼ asignación ndrígóo numuu rí táʼni tsiʼyóo ñajuunʼ o niʼni mbá dí ra̱májánʼ. * Rí phú gíʼmaa muʼni. Muriʼguíi májánʼ ga̱jma̱a̱ guʼtháán rí májánʼ ñajuunʼ rí niʼni, maski má rí xúgi̱ nánguá eʼngo̱o̱ gáʼni wéñuʼ xóo nákha ginii.  Guʼnimíjna muniʼniiʼ. Gajmañulú xúgíʼ rí najmañuu, rí naʼngo̱o̱ naʼni ga̱jma̱a̱ xú káʼnii nixtáa.

13. Xú káʼnii gándoo gumbayíí mbáa ndxájulú bi̱ nakhánáa i̱mba̱ nuxi̱ʼ asignación rá.

¹³ Mbáa nákha eʼkhanú ndxájulú mbaʼyóoʼ mbuʼyááʼ guʼwá náa maxtáa, xú kaʼnii carru gándoo majngruigo̱o̱ ga̱jma̱a̱, ñajuunʼ u i̱ʼwáʼ rí gáʼyóoʼ. Ma̱ngaa mbáa mbaʼyóoʼ muʼtháán xú káʼnii gándoo maʼni numa náa Xa̱bu̱ Ñajunʼ ga̱jma̱a̱ i̱ʼwáʼ rí gáʼyóoʼ. Mú itháán ndayóoʼ rí makru̱ʼu̱lú kuʼyáá, raʼkháa rí muʼni majmáa a̱jkiu̱u̱n. Mbáa gíʼdoo mbóo nandii u bi̱ kaʼyoo naʼniuu nandii o mbáa xtáa ngíná numuu rí niʼnimbáti̱ga̱a̱ mbáa bi̱ nandoo kaʼyoo. * Ga̱jma̱a̱ maski ajndu tséʼthi, mbáa najmuu numuu rí ndañíinʼ bi̱ nambáxu̱u̱ gajmii. Rí mandxaʼwáminaʼ mixtiʼkhu na̱jkha̱ kayóo mba̱yu̱u̱ʼ mbiʼi. Ikha jngó gíʼmáánʼ maʼngo̱o̱ a̱jkiu̱lú kuʼyáá.

14. Xú káʼnii nimbáyíí mbáa ndxájulú publicadores mu magu̱ʼu̱u̱n náa i̱mba̱ nuxi̱ʼ xuajen rí ni̱jkha̱ gaxtáa rá.

¹⁴ Mbiʼi rúʼko̱ mbaʼyóoʼ rí mumbáñún ga̱jma̱a̱ xóo gúʼniúun mambáñún mu maguʼwún náa i̱mba̱ nuxi̱ʼ xóo makuwíin. Mbáa ndxájulú a̱ʼgu̱ bi̱ nixtáa rayambáá mba̱yu̱u̱ʼ tsiguʼ náa i̱mba̱ país naʼthí: “Náa asignación rí nixtáá, kañiʼ mbiʼi esngún xa̱bu̱ ga̱jma̱a̱ numuu Biblia. Mú rí xúgi̱ naʼniuʼ gákhii maguxnuu mbóó texto o masngajmá mbá video naa nataráʼa. Mú a̱ngiu̱lú bi̱ kúwi̱i̱n náa congregación rí xtáá nuthu̱nʼ maʼgá gajmínʼ gáni revisita ga̱jma̱a̱ estudio ndrígu̱ún. Índo̱ ndi̱yo̱o̱ rí publicadores bugi̱ nadxún ga̱jma̱a̱ tsémiñún. Guáʼdiin bi̱ nusngúún bi̱ nunimíjna̱ nunimbaníí rí ejmañún, rúʼko̱ nixnúʼ tsiakii. Nijmañuʼ xóo magíʼdu̱u̱ mathu̱u̱n xa̱bu̱ bi̱ kúwá náa i̱mba̱ nuxi̱ʼ xuajen rí xtáá. Núma̱a̱ má xúgíʼ rúʼko̱ niʼni rí maxtáá gagi mbu̱júu̱ʼ”.

15. Xú káʼnii gándoo gakuwáanʼ gagi náa i̱mba̱ nuxi̱ʼ asignación ndrígúlú rá.

¹⁵ Ma̱ndoo makuwáanʼ gagi náa i̱mba̱ nuxi̱ʼ asignación ndrígúlú. Xundxa̱ʼwa̱míjna̱ rí nánguá ejmáanʼ á mu naxtiʼkhuu asignación ndrígúlú. Guʼgímijna mbuʼyáá xú káʼnii Jeobá embáyulú ga̱jma̱a̱ xúniʼñáanʼ ruʼtáraʼa. Guʼyaridúún a̱ngiu̱lú bi̱ nikúwá nákha siglo timbá, ikhiin táʼniuu  asndu náa nikúwá, ‹nigún rutaraʼa ajngáa rí májánʼ asndu náá› (Hech. 8:1, 4). Á mu nuʼtáraʼa má xúʼko̱, muxkamaa rí májánʼ. Mbá xkri̱da, mbá nguáthi̱i̱n precursores nijuaxkawíin náa mbá país ga̱jma̱a̱ nigún gákuwi̱i̱n náa i̱mba̱ país náa nuthi ajngún náa ndayóoʼ rí mixtiembáá. Nguáthá igu̱nʼ, nitri̱ga̱ nuxi̱ʼ grupo rí nacha̱ egaja̱a̱.

16. Dí gámbáyulú mu maguʼunlú náa i̱mba̱ nuxi̱ʼ asignación rá.

¹⁶ Nehemías niʼthún judíos rí gagi dí na̱ʼkha̱ náa Jeobá naxnúu tsiakii (Neh. 8:10). Tséʼniuu má á mu niguʼunlu náa nikuwáanʼ ruyambáá, gagi rí kuaʼdáá xánindxu̱u̱ ga̱jma̱a̱ numuu rúʼko̱, nindxu̱u̱ numuu rí nambáxulúʼ májánʼ gajmiúlú Jeobá. Ikha jngó, guʼni má xúʼko̱ ñajuunʼ Dios ga̱jma̱a̱ guʼyáá rí ikhaa má gáxnulú ku̱ma̱, ikha ga̱jma̱a̱ xúgíʼ rí gáʼyulú. Garmáʼáan a̱jkiu̱lú rí niʼni maguʼunlú náa asignación rí nikuwáanʼlu nindxu̱u̱ numuu rí nindulúʼ mumbáñún xa̱bu̱. Jeobá má gambáyulú maguʼunlú ma̱ngaa náa i̱mba̱ nuxi̱ʼ asignación á mu nuʼni ikháá má xóo ni̱ʼni̱ ikhí (Ecl. 7:10).

17. Dí gáʼyóoʼ mbuʼyáá náa asignación rí kuwáanʼlu mbiʼi xúgi̱ rá.

¹⁷ Gíʼmaa mbuʼyáá rí nuʼni ñajuunʼ Jeobá nindxu̱u̱ kámuu, mú asignación rí kuaʼdáálu xúgi̱ nindxu̱u̱ mbáxngáá. Náa Ku̱ba̱ʼ nuxi̱ʼ. Gajkhun má rí nuʼni ñajuunʼ Jeobá rí mbiʼi xúgi̱ xánindxu̱u̱ ikháá. Alexéi, bi̱ niʼthá ga̱jma̱a̱ numuu náa nagi̱ʼdu̱u̱ artículo rígi̱, ndaʼyoo rí xóo xtáa xúgi̱ naʼnirataa xóo maxtáa nda̱wa̱á. Naʼthí: “Ndi̱yo̱o̱ má rí Jeobá gajkhun xtáa ga̱jma̱a̱ gajkhun rí maʼni̱i̱ mitsaanʼ Ku̱ba̱ʼ, mú nikumuʼ rí xóó nda̱a̱ mijngii. Rí xúgi̱, nda̱yo̱o̱ rí Jeobá xtáa mijngii náa ikhúúnʼ ga̱jma̱a̱ naku̱mu̱ʼ rí xóo xtáá má náa Ku̱ba̱ʼ mitsaanʼ” (Hech. 2:25). Tséʼniuu asndu xkáʼníí má asignación rí kuaʼdáálu, guʼni má xúʼko̱ ñajuunʼ Jeobá. Ikhaa nditháan xániñulu; ikhaa mambayulú mu makuwáanʼ tsímáá ru̱ʼni̱ ñajuunʼ, guʼni asndu xó má eʼngo̱o̱ ga̱jma̱a̱ asndu náá má kuwáanʼ (Is. 41:13).