Dí na̱ʼkha̱ raʼthí náa Deuteronomio 22:25-27 tséʼkha̱ raʼthí rí xa̱biya̱ gíʼdoo aʼkhúun numuu dí rúʼko̱ nikujmaa má kaʼwu. Náa xtángoo rígi̱ naʼthí dí a̱ʼgu̱ ragíʼdoo aʼkhúun. Guʼyáá rí na̱ʼkha̱ raʼthí.

Náa versículos rí ndiʼyáá naʼthí ga̱jma̱a̱ numuu xa̱biya̱ bi̱ naguguaa dxáʼgú “náa xuajen” mu mabóoʼ ga̱jma̱a̱ bi̱ inu manujúnʼ. Numuu rí wa̱ʼxa̱ʼ bi̱ inuu munuju̱nʼ nduñún xóo ninuju̱nʼ má, ikha jngó xa̱biya̱ gíʼdoo aʼkhún numuu rí nibóo̱ʼ ga̱jma̱a̱, mú a̱ʼgu̱ rá. “Tadxaʼwá índo̱ nigutuwiin xa̱bu̱ náa xuajen”. Á mu nindxa̱ʼwá gajkhun rí bi̱ mudxawíin mumbayíí. Mú na̱nguá nindxa̱ʼwá, ikhaa ma̱ngaa nikudaminaʼ aʼkhá. Ikha jngó nájmi̱i̱n guáʼdáá aʼkhún (Deut. 22:23, 24).

Ma̱ngaa náa Xtángoo naʼthí rí mixtiʼkhu kayuuʼ: “Mú, á mu xa̱biya̱ naxkamaa náa xanáá dxáʼgú bi̱ ndiʼkhún manujúnʼ ga̱jma̱a̱ naguguaa ga̱jma̱a̱ tsiakii mu mabóoʼ ga̱jma̱a̱, ikhú i̱ndó mbaʼyoo makhañúu xa̱biya̱; dxáʼgú xúni̱la nimbá. Ikhaa takudaminaʼ nimbá aʼkhá rí mbaʼyóoʼ makhañúu. Rígi̱ nindxu̱u̱ ikháá xóo índo̱ mbáa xa̱bu̱ naxnúu ndxájuu ga̱jma̱a̱ naxíyáa. Numuu rí ikhaa nixkamaa náa xanáá ga̱jma̱a̱ dxáʼgú nindxa̱ʼwá, mú nimbáa táʼdxun mu mambáyúu” (Deut. 22:25-27).

Índo̱ narígá rígi̱, bi̱ nunimbánii xkujndu nunimbu̱u̱n rí naʼthí dxáʼgú, numuu rí ikhaa “nindxa̱ʼwá, mú nimbáa táʼdxun mu mambáyúu”. Ikha jngó ikhaa takudaminaʼ aʼkhá. Mbáwíi xa̱biya̱ gíʼdoo aʼkhún numuu dí nitsíjmaa ga̱jma̱a̱ nikudaminaʼ aʼkhá numuu rí ‹niguguaa ga̱jma̱a̱ tsiakii›.

Ikha jngó, maski ajndu náa xtángoo rígi̱ naʼthí rí dxáʼgú ragíʼdoo aʼkhúun, nakujmaa kaʼwu dí xa̱biya̱ gíʼdoo aʼkhúun numuu rí nitsíjmaa ga̱jma̱a̱ nikudaminaʼ aʼkhá. Ma̱ndoo makuwáanʼ gajkhun rí bi̱ nunimbánii xkujndu, mbuyáʼ itháan ga̱jma̱a̱ numuu xóo phú nirígá ma̱ngaa muni xó ma Dios nixná ikha mbaʼa nuthu (Éx. 20:14; Deut. 13:14; 17:4).