“LÁ NDAYAMINAʼ rí ni̱ndxu̱ʼ mbáa xa̱bu̱ bi̱ naxnáa núma̱aʼ ráʼ”. Rígi̱ nindxu̱u̱ mbá graxe̱ rí xúgiáanʼ ndayóoʼ muʼnimíjna̱. Náa Biblia naʼthí rí mbiʼi xúgi̱ mbaʼin xa̱bu̱ xúxnáa núma̱aʼ (2 Tim. 3:2). Mbáa gajkhun rí nuniʼnuunʼ xa̱bu̱ bi̱ nakumu̱ún rí kaʼñún rí guáʼdáá ga̱jma̱a̱ rí nundrigú, ma̱ngaa nduyáá rí nánguá ma eyóoʼ muxna̱a̱ núma̱aʼ. Nimbáa tsíyoo gáʼñun xa̱bu̱ bi̱ xúʼko̱ káʼniún.

Mú Jeobá naʼthúún xa̱bi̱i̱ rí “gusngajmá rí nuxna̱a̱ núma̱aʼ” ga̱jma̱a̱ “guxna̱a̱ núma̱aʼ ga̱jma̱a̱ numuu xúgíʼ” (Col. 3:15; 1 Tes. 5:18). Nambáyulúʼ rí muxna̱a̱ núma̱aʼ. Náá numuu rá. Guʼyáá tikhu.

Mbá rí gíʼdoo numuu rí muxna̱a̱ núma̱aʼ nindxu̱u̱ numuu rí naʼni rí makuwáánʼ májánʼ. Xó ma bi̱ naxnáa núma̱aʼ ga̱jma̱a̱ bi̱ nakhánáá najmiin nakúwá májánʼ. Xú káʼnii endoo erígá rígi̱ rá. Gundxa̱ʼwa̱míjnalú rígi̱. Á mu mbáa xtáa xawii mu mambáyulúʼ, nindxu̱u̱ numuu rí ndaʼyoo rí kaʼyulú ga̱jma̱a̱ rí naxmiéjuunʼ kaʼyulú, rúʼko̱ naʼni rí makuwáán májánʼ. Mbáa rúʼko̱ rí nigíʼnuu Rut. Índo̱ Boaz nixnúu rí ndiyóoʼ, mbáa Rut nidxuu wéñuʼ índo̱ ndiʼyoo rí xtáa mbáa bi̱ naxmiéjuunʼ kaʼyoo (Rut 2:10-13).

Mú itháan ndayóoʼ rí muxna̱a̱ núma̱aʼ Dios. Mbaʼa nuthu nindxa̱ʼwa̱míjna̱ ga̱jma̱a̱ numuu rí nixnulu ga̱jma̱a̱ rí naxnulu má xúʼko̱ rí mbiʼi xúgi̱ (Deut. 8:17, 18; Hech. 14:17). Mú, xáʼdxulú i̱ndó ga̱jma̱a̱ numuu rí kááʼ mundxaʼwamíjna̱ rí májánʼ a̱jkiu̱u̱n Dios. Guriʼyáʼ mbiʼi mu mundxa̱ʼwa̱míjnalú xúgíʼ rí májánʼ rí niʼni ga̱jma̱a̱ numulúʼ ma̱ngaa ga̱jma̱a̱ numún bi̱ kuʼñúún. Rúʼko̱ gáʼni rí muxnáalú núma̱aʼ ga̱jma̱a̱ mbuʼyáá gajkhun rí nandoo kaʼyulú ma̱ngaa rí naxmiéjuunʼ kaʼyulúʼ (1 Juan 4:9).

Raʼkháa i̱ndó mundxa̱ʼwa̱míjnalú ga̱jma̱a̱ numuu rí naxnulu Jeobá o dí naʼni tsajkurámáánʼ ma̱ngaa guxnáa núma̱aʼ numuu rí májánʼ a̱jkiu̱u̱n (Sal. 100:4, 5). Nijuiʼtháa rí “maraxna̱a̱ núma̱aʼ nindxu̱u̱ mbá rí gíʼdoo wéñuʼ numuu mu maraxtaa tsímáá”.

I̱mba̱ numuu nindxu̱u̱ dí maraxna̱a̱ núma̱aʼ naʼni rí mambajxáaʼ májánʼ gajmiáanʼ eʼwíinʼ. Xúgiáanʼ ndayúlú rí maʼndún kuyulúʼ. Índo̱ nagájnuu asndu náa a̱jkiu̱lú rí nuxna̱a̱ núma̱aʼ, bi̱ rígá rí niʼni ga̱jma̱á numulúʼ, rúʼko̱ naʼni rí mambajxúlúʼ itháan májánʼ gajmiúlú (Rom. 16:3, 4). Ma̱ngaa xa̱bu̱ bi̱ nuxnáa núma̱aʼ kúwá itháan xawii mu mumbañún eʼwíinʼ. Ga̱jma̱a̱ numuu rí nagumiin rí májánʼ, rúʼko̱ naxkajxi̱i̱n mangiin mu muniu̱u̱n rí májánʼ eʼwíinʼ. Ga̱jma̱a̱ rí mumbáñún eʼwíinʼ naʼni rí makuwáanʼ tsímáá, xó má niʼthí Jesús: “‹Kuwáanʼ itháan gagi á mu nuxná ki xóo rí mundrígú›” (Hech. 20:35).

Robert Emmons, bi̱ niyéjkha̱ edxu̱u̱ náa ndiyáʼ mbuyáá ga̱jma̱a̱ numuu rí maraxna̱a̱ núma̱aʼ náa Universidad náa California, ikhaa niʼthí: “Mu maraxna̱a̱ núma̱aʼ, gíʼmaa matayaa xóo embájxu̱u̱n xa̱bu̱; nguáná rígá rí naʼni mbáa ga̱jma̱á numulúʼ o nguáná má ikháanʼ nu̱ʼni̱ ga̱jma̱a̱ numuu imba̱a̱”. Rígi̱ naʼni mbuʼyáá, rí ndayúlú eʼwíinʼ mu ma̱ndoo makuwáánʼ májánʼ. Mbá xkri̱da, mbáa eʼwíinʼ xa̱bu̱ ma̱ndoo muxnulú ganitsu o muni thanulú (1 Cor. 12:21). Bi̱ nuxna̱a̱ núma̱aʼ naguánu nduyáá rí eʼwíinʼ nuni ga̱jma̱á numún. Á mu xúʼko̱, lá naguʼunlú nuxna̱a̱ núma̱aʼ ráʼ.

I̱mba̱ numuu rí muxna̱a̱ núma̱aʼ nindxu̱u̱ rí nambáyulúʼ mbuʼyáá náá rí májánʼ. Ku̱ma̱ ndrígúlú nindxu̱u̱ xóo rí natsuwooʼ rí naniñuuʼ manújngoo tikhuu ga̱jma̱a̱ i̱ʼwáʼ tséxnúu manújngoo. Xa̱bu̱ bi̱ nuxnáa núma̱aʼ nagu̱ʼún nduyáá itháan náá rí májánʼ ga̱jma̱a̱ tsixmiéjúúnʼ wéñuʼ eʼni xkujndu. Índo̱ nuxnálúʼ núma̱aʼ najkuanú nduʼyáá itháan rí májánʼ, ga̱jma̱a̱ rúʼko̱ naʼni rí itháan gáʼndulú muxna̱a̱ núma̱aʼ. Á mu rí nuʼnilú rígi̱ nambáyulúʼ mu̱ʼni̱ rí niʼthí apóstol Pablo: “Gaʼdxalá má xúʼko̱ náa Tátá” (Filip. 4:4).

Á mu rí nuxna̱a̱lú núma̱aʼ, xúʼyálú náa dí ra̱májánʼ, maʼni gakhi̱i̱ maraxnáa núma̱aʼ ga̱jma̱a̱ ikhú má maxiʼgua̱a̱ʼ, maraxtaa gíná o matiejxi̱i̱ sia̱nʼ. Ma̱ngaa xa̱bu̱ bi̱ nuxna̱a̱ núma̱aʼ na̱nguá eyaʼ rí maguaʼdáá, nakúwi̱i̱n gagi ga̱jma̱a̱ rí kuáʼdáá ma̱ngaa na̱nguá eyaʼ maguaʼdáá itháan (Filip. 4:12).

Nduʼyáá rí bi̱ nindxu̱lú cristianos, Gixa̱a̱ naniguuʼ mbaʼyoo rí xúgíʼ rí kuwáánʼ rugíʼníin maʼni makáguabáánʼ ga̱jma̱a̱ majmúlú. Naniguuʼ mbaʼyoo rí muyejxilú náa dí ra̱májánʼ ga̱jma̱a̱ rí muxiéʼkalú. Ga̱jma̱a̱ rúʼko̱ gáʼni rí xánigulú muʼtáraʼa ajngáa rí májánʼ, ga̱jma̱a̱ á mu nuxnalúʼ núma̱aʼ nusngajmá rí kuaʼdáá rí na̱ʼkha̱ náa xi̱ʼ kaʼwu, mbá xkri̱da, nakuwáanʼlu itháan tsímáá ga̱jma̱a̱ naguaʼdáá itháan fe náa Dios (Gál. 5:22, 23).

Xúgiáanʼ bi̱ ni̱ndxu̱lú xa̱bi̱i̱ Dios mbáa nduʼyáá rí gajkhun nindxu̱u̱ rí nijuiʼthá ga̱jma̱a̱ numuu rí muxna̱a̱ núma̱aʼ. Mú mbáa ma̱ngaa najkuanú nduʼyáá rí tséxnáalú núma̱aʼ ga̱jma̱a̱ dí raʼkháa xúʼko̱ nigumáanʼlu. Mú xáxmiéjunlú. Ma̱ndoo manindxu̱lúʼ mbáa xa̱bu̱ bi̱ naxnáa núma̱aʼ. Ikha jngó guriʼyáʼ mbiʼi mu mundxaʼwamíjna̱ náá rí ga̱jma̱a̱ numuu ma̱ndoo muxna̱a̱ núma̱aʼ, índo̱ nu̱ʼni̱ itháan, magajnúu ikha̱a̱ rí muxnálúʼ núma̱aʼ. Índo̱ gúʼni̱ itháan, nda̱wa̱á magajnúu ikháá rí muxnáa núma̱aʼ. Ma̱ngaa makuwáánʼ gagi ki xóo bi̱ naxmiéjúúnʼ wéñuʼ xóo makuwíin. Gundxaʼwamíjna̱ xúgíʼ rí májánʼ dí naʼni Dios ga̱jma̱a̱ rí nuni eʼwíinʼ mu muxnulú tsiakii, ga̱jma̱a̱ xúgíʼ rí naʼni makuwáanʼlu tsímáá. Asndu ma̱ndoo muʼnirámáʼ a̱jma̱ o ajtsú numuu rí mbá mbiʼi mu muxnáa numaaʼ.

Cientifico niguánu ndiyáá rí maguʼwaanʼ maraxnáa núma̱aʼ nariʼkhuu xóo nañajunʼ ngáñulú, ga̱jma̱a̱ tséʼniulú gakhii mbuyáá náá rí májánʼ. Xa̱bu̱ bi̱ nuxna̱a̱ numaaʼ nakúwíin gagi. Ikha jngó guʼyáá náa rí májánʼ rí kuaʼdáá mu xúʼko̱ makuwáanʼlu gagi ga̱jma̱a̱ guxna̱a̱ numaaʼ. Xákhanájkhulú, gu̱ʼni̱ rí naʼthí náa Biblia: “Guxna̱a̱ núma̱aʼ Jeobá numuu rí ikhaa nindxu̱u̱ májáanʼ”, guxna̱a̱ núma̱aʼ ga̱jma̱a̱ numuu xúgíʼ (1 Crón. 16:34; 1 Tes. 5:18).