Nakujmaa rí na̱nguá. Gixa̱a̱ táʼthúu̱n Eva rí á mu na̱ʼkhu̱ xndúu ixi̱ rí Dios niʼthúu̱n maxíkhu̱, rí makhañúu xóo xa̱bu̱ nindxu̱u̱ mú imbá tapha̱a̱ maxtáa ndaʼya (rí mbiʼi xúgi̱ najmaʼnuuʼ xóo tsiawuu xa̱bu̱). Gixa̱a̱ nijmiuu a̱bu̱nʼ mu maʼthúu̱n rí nditháan xákhañuu. Ga̱jma̱a̱ ajngáa rúʼko̱ niʼthúu̱n rí maxtáa má xúʼko̱ ga̱jma̱a̱ itháan májánʼ náa tsu̱du̱u̱ Ku̱ba̱ʼ á mu xáʼtañajuunʼ Dios (Gén. 2:17; 3:3-5).

Á mu rí nduwaʼ ga̱jma̱a̱ numuu rí índo̱ nakháñun xa̱bu̱ nagúu̱n i̱mba̱ níʼkhá táku̱mu̱u̱ náa Edén, náá nikumu̱u̱ xúʼko̱ rá. Xándoo mbuʼyáá náá phú nikumu̱u̱. Nduʼyáá kaʼwu dí religión rí nduwaʼ niguámbáa índo̱ nixnúu Ruʼwambiʼ nákha mbiʼi rí nixtáa Noé. Numuu rí i̱ndó Noé gajmíi̱n bi̱ kúwá náa goʼwóo nikáwíin, bi̱ ninindxu̱ún xa̱bi̱i̱ Dios, ga̱jma̱a̱ xúgíʼ kiʼsngáa rí nduwaʼ niguámbáa.

Ikha jngó, kiʼsngáa rí nduwaʼ dí rígá xúgi̱ ga̱jma̱a̱ numuu rí índo̱ xa̱bu̱ nakháñuu najkha̱a̱ i̱mba̱ níʼkhá nikumu̱u̱ nda̱wa̱á rí nixnúu Ruʼwambiʼ. Índo̱ Dios niʼnijnga̱a̱ ajngáa náa Babel ga̱jma̱a̱ xa̱bu̱ nigún gákuwá ‹náa xúgíʼ tsu̱du̱u̱ʼ ku̱ba̱ʼ›, ikha jngó rúʼko̱ niʼni rí xa̱bu̱ makumu̱ún rí naguáa̱n i̱mba̱ ni̱ʼkha̱ (Gén. 11:8, 9). Ikha jngó, tséʼyáá nguáná phú nikumu̱u̱ kiʼsngáa rí minduwaʼ rígi̱. Mú dí nduʼyáá gajkhun rí Gixa̱a̱ bi̱ nindxu̱u̱ “anu̱u̱ náa minduwaʼ”, niʼni ga̱jma̱a̱ asndu nidxu̱u̱ índo̱ ndiʼyoo rí nduwaʼ rígi̱ nigandráʼaa náa xúgíʼ tsu̱du̱u̱ ku̱ba̱ʼ (Juan 8:44).