1. Xú káʼnii ñajunʼ nixnúún xabuanii Jeobá rá.

JEOBÁ niʼnii Adán ga̱jma̱a̱ Eva rí maʼndún maguaʼdíin e̱ji̱n. Náa Biblia naʼthí: “E̱ji̱n ni̱ndxu̱ún bi̱ Jeobá nimínáʼ” (Sal. 127:3). Mu makru̱ʼu̱lú ndiéjunʼ eyoo gáʼthúu̱n ajngáa rígi̱, gundxa̱ʼwa̱míjnalú rí mbáa mígiulú naxnajxulú mba̱a̱ wéñuʼ mbújkha̱a̱ mu muñewan. Lá ragájkhun rí maʼdxulú numuu rí mígiulú ndaʼyoo rí ni̱ndxu̱lú mbáa xa̱bu̱ májáanʼ ráʼ. Mú ma̱ngaa maxmiéjunlú xú káʼnii gúñewa̱a̱n mbújkha̱a̱. Jeobá nindxu̱u̱ mbáa bi̱ nambáxulúʼ májánʼ gajmiúlú, nixnúún xabuanii ñajunʼ rí muñewa̱a̱n mbá rí itháan gíʼdoo numuu ki xóo mbújkha̱a̱: Rí makuwá májánʼ ga̱jma̱a̱ rí makuwá tsímáá e̱jñún.

2. Xkáʼnii graxe̱ gáxti̱ʼña̱a̱ náa artículo rígi̱ rá.

² Tsáá kaʼyoo maraʼwíí nguáná ga̱jma̱a̱ á mu muguaʼdíin e̱ji̱n xa̱bu̱ gajmii rá. Ga̱jma̱a̱ dí gándoo muni xabuanii mu e̱jñún makuwá gagi rá. Guʼyáá tikhuu ikha rí na̱ʼkha̱ náa Ajngá rawunʼ Dios rí ma̱ndoo mambáñún xa̱bu̱ gajmii mu muraʼwíi májánʼ rí muni.

3. a) Tsáá gíʼmaa maraʼwíi á mu xa̱bu̱ gajmii muguaʼdiin e̱jñún o na̱nguá rá. b) Xú káʼnii ikha rí na̱ʼkha̱ náa Biblia gíʼmaa marmáʼáan a̱jkiu̱ún bi̱ nambájxu̱u̱n gajmiún ga̱jma̱a̱ bi̱ kuñún bi̱ nidamijná rá.

³ Náa tikhu xuajen, naguáʼthi̱i̱n rí bi̱ ndiʼkhún nidamijná  muguaʼdíin nacha̱ e̱ji̱n. Mbáa bi̱ kúwá náa guʼwún o eʼwíinʼ xa̱bu̱ nutsudiin muni xúʼko̱ mangiin. Mbáa xa̱bi̱i̱ Jeobá bi̱ xtáa náa Asia bi̱ mbiʼyuu Jethro naʼthí: “Náa congregación tikhun a̱ngiu̱lú bi̱ guáʼdiin e̱ji̱n nutsudiin bi̱ na̱nguá guáʼdiin mu muguaʼdíin e̱jñún mu maʼni mbaʼin náa mbá guʼwíin”. Jeffrey, imba̱a̱ ndxájulú bi̱ na̱ʼkha̱ náa Asia, naʼthí: “Tikhun nutún xa̱bu̱ gajmii bi̱ na̱nguá guáʼdiin e̱ji̱n rí nda̱wa̱a̱ tsáa gáñewun índo̱ gáʼnii”. Mú ikhiin má kaʼñún muraʼwíi á mu muguaʼdiin e̱ji̱n o na̱nguá (Gál. 6:5). Gajkhun má rí bi̱ nambáxún gajmiún ga̱jma̱a̱ bi̱ kuwiin náa guʼwún nandún rí bi̱ diʼkhú nidamijná makuwíin gagi, mú ikhiin gíʼmaa mikru̱ʼu̱u̱n rí bi̱ nidamijná kaʼñún muraʼwíi xóo gákuwá (1 Tes. 4:11).

4, 5. a) Xú káʼnii nindxu̱u̱ a̱jma̱ enii rí gíʼmaa mutamijná novios rá. b) Arathá nguáná gíʼmaa mutamijná ga̱jma̱a̱ numuu rígi̱ xá.

⁴ Á mu bi̱ nidamijná nuraʼwíi rí maguaʼdíin e̱ji̱n, gíʼmaa mutamijná ga̱jma̱a̱ numuu a̱jma̱ rí gíʼdoo wéñuʼ numuu: Timbá, nguáná gaguaʼdíin ga̱jma̱a̱ dí maʼni a̱jma̱, nguáthi̱i̱n nandún máguaʼdíin. Mú, nguáná gíʼmaa mutamijná ga̱jma̱a̱ numuu rígi̱ xá. Ga̱jma̱a̱ ndíjkha rí gíʼdoo wéñuʼ numuu rá.

⁵ Májánʼ gáʼni rí bi̱ ni̱ndxu̱ún novios mambanún wapháá nákha xóó tsédamijná á mu muguaʼdíin o xáguaʼdíin e̱jñún, gíʼdoo wéñuʼ numuu rí mambanún májánʼ ga̱jma̱a̱ numuu rígi̱, ma̱ngaa gíʼmaa mbuyáá á mu kúwi̱i̱n má xawii munimbanuu e̱jñún. Tikhun bi̱ ndiʼkhú nidamijná nduyáá rí itháan májánʼ rí muguaʼthi̱i̱n mbá tsiguʼ o a̱jma̱ tsiguʼ mu muguaʼdiin e̱ji̱n, numuu dí rígi̱ mbaʼyóoʼ wéñuʼ mbiʼi. Ikha jngó rí muguaʼthi̱i̱n, naniñuuʼ maguʼún makuwá, ga̱jma̱a̱ rí maʼndún kuyamijná itháan (Efes. 5:33).

6. Ga̱jma̱a̱ xóo mbiʼi rí kuwáanʼ xúgi̱, ndiéjunʼ niraʼwi̱i̱ muni tikhun xa̱bu̱ gajmii rá.

⁶ Eʼwíinʼ a̱ngiu̱lú ndiyaridáá xkridún ajtsíin e̱ji̱i̱n Noé gajmiún guʼñún, ikhiin raʼkháa núkhú niguáʼdiin e̱jñún (Gén. 6:18; 9:18, 19; 10:1; 2 Ped. 2:5). Jesús niʼnimbrígui̱i̱ ga̱jma̱a̱ mbiʼi rí kuwáanʼ xúgi̱ xóo mbiʼi rí nixtáa Noé, ga̱jma̱a̱ nduʼyálú rí mbiʼi xúgi̱ nindxu̱u̱ mbiʼi “gakhi̱i̱ ga̱jma̱a̱ maʼni mingíjyúuʼ makuwáanʼ” (2 Tim. 3:1; Mat. 24:37.) Índo̱ nduyáá xígi̱ kaʼnii tikhun xa̱bu̱ gajmii, nuraʼwii rí xáguaʼdiin e̱ji̱n xúgi̱ mu xúʼko̱ ma̱ndoo muni itháan ñajuunʼ Dios.

7. Xú káʼnii gándoo gámbañún xa̱bu̱ gajmii ikha rí na̱ʼkha̱ náa Lucas 14:28, 29 ga̱jma̱a̱ Proverbios 21:5 rá.

 ⁷ Índo̱ gutamijná á mu maguaʼdíin e̱ji̱n o na̱nguá ga̱jma̱a̱ nguáthi̱i̱n gáguaʼdíin, xa̱bu̱ gajmii bi̱ nundxa̱ʼwa̱a̱ májánʼ edxu̱ún ndayóoʼ mbuyáá “nguáthá mbújkha̱a̱” gámbu̱u̱n (atraxnuu Lucas 14:28, 29). * Xabuanii bi̱ guáʼdiin má e̱jñún nduyáá rí matanimbanii e̱ji̱n ra̱ʼkhá índo̱ naxúmuu mbújkha̱a̱, ma̱ngaa na̱jkha̱ kayóo mbiʼi ga̱jma̱a̱ ndayóoʼ tsiakii. Ikha jngó gíʼdoo wéñuʼ numuu rí xa̱bu̱ gajmii murajximíjna̱ rígi̱: “Lá ndayóoʼ muñejunʼ nájmáanʼ mu mbuʼya rí ndayóoʼ náa guʼwúlú ráʼ. Lá mbrígu̱ú e̱ndxa̱ʼwa̱míjna̱ ga̱jma̱a̱ numuu rí ndayóoʼ ráʼ. Á mu nájmáanʼ guñejunlu, tsáá gáñewu̱u̱n e̱ji̱n rá. Tsáá gúʼyaridáá xóo muni ga̱jma̱a̱ xóo gúndxa̱ʼwa̱míjna̱ rá.” Xa̱bu̱ gajmii bi̱ nurajximíjna̱ rígi̱ nduyáá dí raʼkháa gitsíin nindxu̱u̱ ma̱ngaa nduyáá rí naʼthí náa Proverbios 21:5 (atraxnuu). *

8. a) Ndiéjunʼ rí gíʼmaa mbuyáá wapháá xa̱bu̱ gajmii rá. b) Ndiéjunʼ gáʼni xa̱biya̱ bi̱ nandoo kaʼyoo a̱ʼgiu̱u̱ rá.

⁸ Xó má xa̱bu̱ nikhi̱i̱ ga̱jma̱a̱ a̱ʼgú nikhi̱i̱ ndaʼyóoʼ muríyaʼ mbiʼi ga̱jma̱a̱ tsiakii mu munimbanuu e̱jñún. Á mu dí naguáʼdiin nángi eʼni e̱ji̱n, mbáa maʼniún gakhi̱i̱ muxnáá mámbáa rí ndayóoʼ. Tikhun bi̱ niguáʼnii rígi̱ nuthi rí niʼni néʼngu̱u̱n wéñuʼ. Mbáa a̱ʼgu̱ maʼni néʼngo̱o̱ má xúʼko̱, rí ní xáguaphaa maʼnigajmaa, maʼtájkháan ni má rí magajnúu gáʼtaraʼa. Ga̱jma̱a̱ maʼniuu mingíjyúuʼ maxnatiʼñaminaʼ maʼdxu̱u̱n rí nanújngoo náa reunión ga̱jma̱a̱ rí mambáyúu rí najuiʼthá ikhí. Xa̱biya̱ bi̱ nandoo kaʼyoo a̱ʼgiu̱u̱ maʼni tsiakiminaʼ mambáyúu a̱ʼgiu̱u̱ náa reunión ga̱jma̱a̱ náa goʼwóo. Mbá xkri̱da, maʼni ñajunʼ dí narígá guʼwáá, ga̱jma̱a̱ maʼni minaʼ rí xúgíinʼ makuwá gagi náa nunigajmaa mbá guʼwíin ga̱jma̱a̱ rí magajnúu gáʼtaraʼa gajmíi̱n bi̱ kúwá náa goʼwóo.

9, 10. Ndiéjunʼ rí gíʼdoo wéñuʼ numuu muni xa̱bu̱ guanii bi̱ nandún mumbañún e̱jñún rá.

⁹ Dí gáʼyóoʼ muni xabuanii mu musngúún e̱jñún mu maʼndún kuyáá Jeobá rá. Xú káʼnii gándoo gúñewu̱u̱n náa numbaaʼ xkawiʼ rígi̱ xá. Guʼyáá tikhuu rí ma̱ndoo mayambáá.

¹⁰ Gunda̱ʼa̱a̱ Jeobá mambáyala índo̱ nutajkháan.  Guʼyáá xkri̱da ndrígóo Manóah ga̱jma̱a̱ a̱ʼgiu̱u̱. Índo̱ ikhiin ndiʼyáá rí muguaʼdáá mbáa ada̱, Sansón, nindo̱ʼo̱o̱ Jeobá rí maʼthúu̱n xkáʼnii gáʼni mbája̱a̱.

11. Dí gándoo muni xabuanii mu mbuyaridáá xkri̱da ndrígóo Manóah, xó ma esngájma náa Jueces 13:8 rá.

¹¹ Nihad ga̱jma̱a̱ Alma, bi̱ kúwá náa Bosnia-Herzegovina, ndiyaridáá xkridoo Manóah. Ikhín nuthi: “Xó má niʼni Manóah, ninda̱ʼa̱a̱xu Jeobá rí maʼsngújxu mu manindxuxu míjínʼ xabuanii. Mbaʼa enii xóo niriʼñuxu: Náa Biblia, i̱ʼwáʼ i̱yi̱i̱ʼ náa reunión ga̱jma̱a̱ náa asamblea” (atraxnuu Jueces 13:8). *

12. Xú káʼnii xkri̱da nixnúún e̱ji̱i̱n José ga̱jma̱a̱ María rá.

¹² Gusngún ga̱jma̱a̱ xkri̱da. Xabuanii, rí nu̱thu̱u̱n ejñalá gíʼdoo wéñuʼ numuu. Mú itháan nduyáá rí nunila. Nduʼyáá gajkhun rí José ga̱jma̱a̱ María nigiʼ mbá májánʼ xkri̱da náa e̱jñún, mbáa dí ikhaa ninindxu̱u̱ Jesús. José raʼkháa i̱ndó niñejunʼ mu maxnún rí nda̱ñúnʼ bi̱ kúwá náa goʼwóo, ma̱ngaa nimbáñun rí mbuyamajkuíí Jeobá (Deut. 4:9, 10). ‹Xúgíʼ tsiguʼ› Na̱jkha̱ kagui̱i̱n bi̱ kúwi̱i̱n náa goʼwóo náa Jerusalén mu muniriyaaʼ ndxa̱a̱ Pascua, maski ajndu náa xtángoo tsénda̱ʼa̱ maguma xúʼko̱ (Luc. 2:41, 42). Mbáa tikhun xabuanii nákha ikhú nindxa̱ʼwa̱míjna̱ rí magún xúʼko̱ kaʼnii nindxu̱u̱ gakhi̱i̱, numuu rí mitsínguánʼ ga̱jma̱a̱ minumuu egájnuu. Maski ajndu xúʼko̱ José ningajo̱o̱ wéñuʼ kaʼyoo rí nimbáxuu ga̱jma̱a̱ Dios ga̱jma̱a̱ xúʼko̱ má niʼsngúún muni e̱ji̱i̱n ma̱ngaa. María ma̱ngaa nininuuʼ májánʼ Escritura. Rí niʼthí ga̱jma̱a̱ rí niʼni niʼsngúún e̱ji̱i̱n rí maʼndún kuyáá Ajngá rawunʼ Dios.   

13. Ndiéjunʼ nini xa̱bu̱ gajmii mu mbuyaridáá José ga̱jma̱a̱ María rá.

¹³ Nihad ga̱jma̱a̱ Alma, bi̱ niʼthá náa kutriga̱ 11, ninimíjna mbuyaridáá xkri̱da ndrígóo José ga̱jma̱a̱ María mu xúʼko̱ aʼdiún maʼndoo kaʼyoo ga̱jma̱a̱ maʼni ñajuunʼ Dios. Ikhiin nuthi rí nini: “Ninimijnáxu rí xóo kuwáanʼ majmañuu aʼdiúxu, dí nayambáá índo̱ nunimbánixu ikha rí na̱ʼkha̱ náa Biblia”. Ga̱jma̱a̱ Nihad naʼthí xóó: “Ndayóoʼ muʼnimíjna manindxu̱lúʼ xóo xa̱bu̱ bi̱ nandulú rí mani̱ndxu̱u̱ aʼdiúlú”.

14. Náá numuu rí ndayóoʼ mbuyáá xabuanii tsíín embajxu̱u̱n gajmiún e̱jñún rá.

¹⁴ Gumbáñúún e̱jña̱la mu mbuñíinʼ májánʼ bi̱ mumbajxu̱u̱n gajmiún. Anún ga̱jma̱a̱ rudún e̱ji̱n ndayóoʼ mbuyáá tsíín embájxu̱u̱n gajmiún e̱jñún ga̱jma̱a̱ dí eni. Ma̱ngaa ndayóoʼ mbuyáá tsíín etamijná gajmiún náa teléfono. Numuu rí ma̱ndoo muni ga̱jma̱a̱ mundxaʼwamíjna̱ xóo bi̱ nambájxu̱u̱n gajmiún (1 Cor. 15:33).

15. Dí gándoo gajmañún xabuanii xkri̱da ndrígóo Jessie rá.

¹⁵ Ndiéjunʼ gándoo muni xabuanii á mu tsíkru̱ʼu̱u̱n majmúún computadora o celular rá. Mbáa xa̱bu̱ nikhii bi̱ xtáa náa Filipina mbiʼyuu Jessie naʼthí: “Maski má tsikruʼuxu wéñuʼ majmujxu computadora o celular, mú raʼkháa rúʼko̱ eyoo gáʼthúu̱n rí xúthúun ejñuxu ga̱jma̱a̱ numuu gamii dí rígá á mu tsíjmañún gájmúún”. Táʼthún rí xájmún numuu rí ikhaa tséjmañuu majmuu. Ikhaa naʼthí: “Ni̱thu̱u̱n e̱ji̱nʼ rí celular ma̱ndoo mambáñún majmañún imbo̱o̱ʼ ajngáa, munigajmaa rí manújngoo náa reunión ga̱jma̱a̱ muraxnuu Biblia tsétsí mbiʼi”. Xabuanii, lá niraxnuu ga̱jma̱a̱ ndi̱ya̱a̱ gajmiála ejñalá xtágabu ga̱jma̱a̱ numuu rí mataxúʼmá mensaje ga̱jma̱a̱ xtiʼkhuu rí na̱ʼkha̱ náa sección “Jóvenes”  ndrígóo jw.org^®ráʼ. Ndi̱ya̱a̱ gajmiála video Lá natayáá má xúʼko̱ celular o tableta ndrígáaʼ ráʼ. * Á mu majmaʼ internet atie̱wa̱a̱n xóo majmaʼ. Rígi̱ mambáyaaʼ wéñuʼ mu marasngúún ejña̱a̱nʼ majmúún májánʼ celular o tableta (Prov. 13:20).

16. Ndiéjunʼ nini mbaʼin xabuanii, ga̱jma̱a̱ ndiéjunʼ rí nirígá rá.

¹⁶ Mbaʼin xabuanii nuni xó ma eʼngu̱u̱n mu e̱jñún makuwá gajmiún bi̱ nugíʼ mbá májánʼ xkri̱da rí nuni ñajuunʼ Jeobá. Rúʼko̱ rí niʼni N’Déni ga̱jma̱a̱ Bomine, xa̱bu̱ gajmii bi̱ kúwá náa Costa de Marfil. Nagu̱ʼún nutháán circuito maguiji náa guʼwún. NʼDéni naʼthí: “Rígi̱ rí nimbáyúu wéñuʼ a’diúxu. Ninindxu̱u̱ Precursor, dí xúgi̱ nindxu̱u̱ sustituto ndrígóo circuito”. Xabuanii, lá ma̱ndoo mu̱ni̱ xúʼko̱ mangáanʼ gajmiála ejñalá ráʼ.

17, 18. Nguáná gíʼmaa mugi̱ʼdi̱i̱ musngúún e̱jñún xabuanii rá.

¹⁷ Gugíʼdi̱i̱ musngúún ejñala wapháá. Á mu wapháá esngúún ejñala itháán májánʼ gáʼni (Prov. 22:6). Xúʼko̱ niʼni ru̱dúu̱ Timoteo, Eunice, ga̱jma̱a̱ xíñuuʼ Loida, bi̱ nisngáá ga̱jma̱a̱ numuu Jeobá asndu nákha nixtáa (2 Tim. 1:5; 3:15). Nda̱wa̱á, Timoteo ni̱jkha̱ ga̱jma̱a̱ apóstol Pablo náa niʼtáráʼa.

¹⁸ Eʼwíinʼ xa̱bu̱ gajmii bi̱ kúwi̱i̱n náa Costa de Marfil, Jean-Claude ga̱jma̱a̱ Pesace, nisngúún majuin e̱jñún mu muni ñajuunʼ Jeobá. Ndiéjunʼ nimbáñún xá. Ndiyaridáá xkridoo Eunice ga̱jma̱a̱ Loida. Nithi: “Nigíʼdi̱i̱ nisngúún ejñuxu Ajngá rawunʼ Dios asndu nákha majkhiinʼ” (Deut. 6:6, 7).

19. Ndiéjunʼ eyoo gáʼthúu̱n dí marathu̱u̱n Ajngá rawunʼ Dios ejña̱a̱nʼ rá.

¹⁹ Ndíjkha rí gíʼmaa marathu̱u̱n Ajngá rawunʼ Dios ejña̱a̱n rá. Ajngáa marathu̱u̱n nandoo gáʼthúu̱n rí matangaán marathu̱u̱n mbaʼa nuthu mu magiwa̱nʼ náa ku̱ma̱ ndrígu̱ún. Mu ma̱ndoo muni rígi̱, xabuanii ndayóoʼ rí muríyaʼ mbiʼi mu makuwíin gajmiún e̱jñún. Nguáná, mbá makumu̱ún rí maʼniún gakhi̱i̱ mutangiín mutún kikháá e̱jñún. Mú ma̱ndoo mbuyáá dí rúʼko̱ nindxu̱u̱ mbá rí xóo ma̱ndoo mumbañún e̱jñún mu makru̱ʼu̱u̱n Ajngá rawunʼ Dios ga̱jma̱a̱ munimbu̱u̱n.

20. Arathá xú káʼnii gándoo gátaʼgíʼ matanimbánii dí naʼthí náa Salmo 127:4 índo̱ gátanimbanii ejña̱a̱nʼ.

 ²⁰ Guniʼnúunʼ májánʼ ejñala. Náa Salmo 127 naʼthí rí e̱ji̱in ni̱ndxu̱ún xóo mbá flecha (atraxnuu Salmo 127:4). * Xó má mbá flecha ma̱ndoo mani̱ndxu̱u̱ mixtiʼkhu ajua̱nʼ ga̱jma̱a̱ mixtiʼkhu enii, mámbáa ada̱ mixtiʼkuii nindxu̱u̱. Ikha jngó xabuanii gíʼmaa mbuyáá xú káʼnii musngáá mámbáa aʼdiún. Xa̱bu̱ gajmii bi̱ kúwá xúgi̱ náa Israel niʼngu̱u̱n nini rí a̱jmi̱i̱n e̱jñún muni ñajuunʼ Jeobá, ikhiin nuthi rí nimbáñun: “Nunigajmaa gájmiuxu Biblia mámbáa rí ikhiin”. Gajkhun bi̱ kayá edxu̱u̱ náa mbá guʼwíin mbaʼyóoʼ á mu ndayóoʼ o maʼngoo maʼni rígi̱.

21. Xú káʼnii eriʼña̱a̱ Jeobá rí nutajkháan xabuanii rá.

²¹ Xabuanii mbá nguáná naʼniún gakhi̱i̱ munimbanii e̱jñún, mú e̱ji̱n ni̱ndxu̱ún mbá rí Jeobá nixnúún. Ikhaa xtáa xawii mu mambáñun xabuanii. Naʼdxaun májánʼ rí nutajkháan ga̱jma̱a̱ nariʼñún náa Biblia, náa i̱ʼwáʼ i̱yi̱i̱ʼ ga̱jma̱a̱ xkri̱da ma̱ngaa xtágabu ndrígu̱ún xabuanii bi̱ nduyáá má xóo enii mbáji̱i̱n e̱jñún.

22. Ndiéjunʼ nindxu̱u̱ mbá rí itháán májánʼ dí ma̱ndoo muxnún e̱jñún xabuanii rá.

²² Nuthi rí matanimbanuu e̱ji̱n nindxu̱u̱ xóo matiejunʼ mbá skiñúʼ tsiguʼ ga̱jma̱a̱ numún, maski ajndu xúʼko̱ xuniñaaʼ má ranindxu̱ún xabuanii. Mbá rí itháán májánʼ rí muxnúún e̱jñún nindxu̱u̱ rí maʼndún kuñún, muríyaʼ mbiʼi makuwíin gajmiún ga̱jma̱a̱ musngúún rí naʼthí náa Biblia. Mixtiʼkhu xóo eʼni mámbáa ada̱ ga̱jma̱a̱ rí ejuiʼsngáá. Mú, mbaʼin bi̱ niganuu náa anún bi̱ nandún kuyáá Jeobá nakumu̱ún xóo Joanna Mae, bi̱ na̱ʼkha̱ náa Asia bi̱ naʼthí: “Índo̱ nandxa̱ʼwa̱mínáʼ dí niʼsngóʼ anu̱ʼ ga̱jma̱a̱ ru̱dúʼ, naxni̱ín núma̱aʼ numuu dí nixprigúʼ, ga̱jma̱a̱ niʼsngóʼ maʼndoo kayóo Jeobá. Raʼkháa i̱ndó ninimbáju̱u̱n, rí phú nini dí maxtáá itháan májánʼ” (Prov. 23:24, 25). Mbaʼin xa̱bi̱i̱ Jeobá muthi xúʼko̱ kaʼnii.