MBÁ MIʼCHA̱ miércoles 24 ñajunʼ gu̱nʼ enero tsiguʼ 2018, nijuixná mbá anuncio kiejunʼ náa Betel dí rígá náa Estados Unidos ga̱jma̱a̱ Canadá: Nijuixtiyááʼ ndxájulú Kenneth Cook, ada̱, mu mani̱ndxu̱u̱ Cuerpo Gobernante ndrígu̱ún bi̱ nuʼtáraʼa numuu Jeobá.

Ndxájulú Cook nigumaa náa xuajen Pensilvania (Estados Unidos). Náa escuela ni’ninuʼ rí gajkhun nákha inuu marámuuʼ secundaria ga̱jma̱a̱ nijngúun iyááʼ nákha 7 ñajunʼ gu̱nʼ junio tsiguʼ 1980. Nigíʼdu̱u̱ niʼni káxi̱ ñajunʼ Jeobá xóo precursor regular nákha 1 ñajunʼ gu̱nʼ septiembre tsiguʼ 1982. A̱jma̱ tsiguʼ nda̱wa̱á, nitháán mayambáá náa Betel. Nigíʼdu̱u̱ rañajunʼ náa Wallkill (Nueva York) nákha 12 ñajunʼ gu̱nʼ octubre tsiguʼ 1984.

Nákha mbá skíñúʼ witsu tsiguuʼ, ndxájulú Cook niyambáá náa mbaʼa ñajunʼ, xóo náa imprenta rí nagájnuu i̱yi̱i̱ʼ ga̱jma̱a̱ náa Oficina ndrígóo Betel. Nákha tsiguʼ 1996, ndiyáa mbáa ndxájulú a̱ʼgu̱ bi̱ mbiʼyuu Jamie, bi̱ nigíʼdu̱u̱ niyambáá ga̱jma̱a̱ náa Wallkill. Nákha ñajunʼ gu̱nʼ diciembre tsiguʼ 2009, ni̱jkha̱ kiʼyáa náa Escuela dí rígá náa Patterson ga̱jma̱a̱ ikhí nikháná mu mañajunʼ náa Comite ndrígóo Redacción. Nákha abril tsiguʼ 2016, nda̱wa̱á rí nitangi̱i̱n náa Wallkill, a̱ngiu̱lú Cook nixuʼmiin nigún náa Brooklyn. Ga̱jma̱a̱ mbá witsu igu̱nʼ nda̱wa̱á, nigún náa Guʼwá nuxi̱ʼ dí naxná ikha náa xúgíʼ tsu̱du̱u̱ numbaaʼ, dí rígá náa xuajen Warwick. Nákha enero tsiguʼ 2017, nijuixnáá ñajunʼ rí mambáyúu Cuerpo Gobernante mu mañajunʼ náa Comité ndrígóo Redacción xóo muʼthá bi̱ nurawíi i̱yi̱i̱ʼ.