1, 2. a) Xú káʼnii nimbáyúu Yoshiko ajngáa rí na̱ʼkha̱ náa Isaías 41:10 rá. b) Tsíin mangiin ma̱ndoo mambáñun ajngáa ndrígóo Jeobá rá.

MBÁA ndxájulú a̱ʼgu̱ bi̱ nagumbiʼyuu Yoshiko niʼdxuun mbá ajngáa dí ra̱májánʼ. Doctora ndrígóo niʼthúu̱n rí naguanúu nguáthá igu̱nʼ rí makhañúu. Xú káʼnii nikumu̱u̱ ndxájulú bugi̱ rá. Nacha̱ nirmáʼáan a̱jkiu̱u̱n mbá texto rí naniguʼ wéñuʼ: Isaías 41:10 (atraxnuu). * Ga̱jma̱a̱ xúgíʼ a̱jkiu̱u̱n niʼthúu̱n doctora rí tsímiñuu, numuu rí Jeobá kaguajtun ñawúunʼ. * Versículo rígi̱ nixnúu tsiakii ga̱jma̱a̱ nimbáyúu mu maku̱mu̱u̱ kaʼyoo Jeobá ga̱jma̱a̱ xúgíʼ a̱jkiu̱u̱n. Xúʼko̱ má gáʼni ga̱jma̱á ni̱ndxu̱lú mangáanʼ índo̱ guraʼníí xkujndu gakhi̱i̱. Mu makru̱ʼu̱lú májánʼ xú káʼnii embáyulú mu xámiñulu, guʼyáá ginii náa numuu rí Jeobá nixnúu ajngáa rúʼko̱ Isaías.

² Nákha ginii, Jeobá nixnúu ajngáa rígi̱ Isaías mu maʼni̱i̱ a̱jkiu̱ún judíos bi̱ maʼga̱ kiʼdiin náa Babilonia. Mú ma̱ngaa niʼni rí maguanúu ajngáa rúʼko̱ mu mambáñun xúgínʼ xa̱bi̱i̱ bi̱ nikuwa nákha ikhú (Is. 40:8; Rom. 15:4). Mbiʼi rí kuwáanʼ nindxu̱u̱ “gakhi̱i̱ ga̱jma̱a̱ maʼni mingíjyúuʼ makuwáanʼ”, ikha jngó ndayúlú itháan tsiakii rí na̱ʼkha̱ náa libro ndrígóo Isaías (2  Tim. 3:1).

3. a) Ndiéjunʼ dí naʼthí Jeobá maxnúlúʼ rí na̱ʼkha̱ náa texto rí kaʼyoo tsiguʼ 2019 rá. b) Náa numuu rí ndayúlú rí Jeobá naʼthí maxnúlúʼ rá.

³ Náa artículo rígi̱, mbuʼyáá ajtsú enii rí Jeobá niʼthí maxnúlúʼ mu maʼni gújkhuʼ fe ndrígúlú ga̱jma̱a̱ rí na̱ʼkha̱ náa  Isaías 41:10, texto rí kaʼyoo tsiguʼ 2019. Timbá, Jeobá maxtáa ga̱jma̱á ni̱ndxu̱lú. Raga̱jma̱, ikhaa nindxu̱u̱ Dios ndrígúlú. Ga̱jma̱a̱ rí maʼni ragajtsú, ikhaa mambáyulúʼ. Náa numuu rí ndayúlú rí niʼthí maʼni xá. * Numuu, rí xóo rí nigíʼnuu Yoshiko, xúgiáanʼ kuaʼdáá xkujndu. Ma̱ngaa, nuraʼníí xkujndu dí rígá náa numbaaʼ rígi̱. Mbáa asndu tikhun kuwa rumíniʼ ga̱jma̱a̱ numún Xa̱bu̱ Ñajunʼ.

4. a) Ndiéjunʼ nindxu̱u̱ timbá rí niʼthí Jeobá maʼni rá. (Atayáá náa nota). b) Ndiéjunʼ esngájma Jeobá rí naku̱mu̱u̱ kaʼyulúʼ rá. c) Xú káʼnii embáyaʼ ikháán rí naʼthí Jeobá rá.

⁴ Timbá nindxu̱u̱, rí Jeobá naʼni̱i̱ a̱jkiu̱lú índo̱ naʼthúlúʼ: “Xámiñaʼ, numuu rí ikhúúnʼ xtáá ga̱jma̱ʼ ni̱ndxa̱ʼ”. * Mu masngájma rí xtáa ga̱jma̱á ni̱ndxu̱lú, naxnúlú xúgíʼ ngajua ndrígóo. Guʼyáá xú káʼnii eʼthí rí nandoo kaʼyulú: “Ninindxa̱ʼ májáánʼ náa iduʼ, ikha jngó ma̱ndoo mbuyamajkuaʼ, ga̱jma̱a̱ ikhúúnʼ má nandoʼ ka̱ya̱ʼ” (Is. 43:4). Nda̱a̱ nimbá tsiakii ndrígóo numbaaʼ, nda̱a̱ nimbá rí maʼni rí Jeobá maniñuuʼ randoo kaʼñúnʼ xa̱bi̱i̱. Numuu rí nindxu̱u̱ jmbii (Is. 54:10). Naxnúlú tsiakii índo̱ nduʼyáá rí ikhaa nindxu̱u̱ bi̱ nambáxu̱u̱ gajmiúlú ga̱jma̱a̱ nandoo kaʼyulúʼ. Ikhaa mañewu̱nlú rí mbiʼi xúgi̱ xó má niñewu̱u̱n Abrán (Abrahán) bi̱ nimbáxu̱u̱ ga̱jma̱a̱ nákha wajyúúʼ. Jeobá niʼthúu̱n: “Xámiñaʼ, Abrán. Ikhúúnʼ ni̱ndxu̱ʼ mbá escudo ndrígáʼ” (Gén. 15:1).

5, 6. a) Ndíjkha jngó Jeobá nandoo mambáyulúʼ ga̱jma̱a̱ xkujndu rí kuaʼdáá rá. b) Ndiéjunʼ ejmañuluʼ náa xkri̱da ndrígóo Yoshiko rá.

⁵ Nduʼyáá rí Jeobá nandoo mambáyulúʼ náa xkujndu ndrígúlú, numuu rí naʼthí maʼni: “Á mú xtaa ranújngaaʼ náa iyaʼ, ikhúúnʼ maxtáá ga̱jma̱á ni̱ndxa̱ʼ; ga̱jma̱a̱ náa mañu xáguʼwi̱i̱n. Á mu xtaa ranújngaaʼ náa mbá aguʼ, xákháán, ni má riʼyu̱u̱ aguʼ xátsikháán” (Is. 43:2). Ndiéjunʼ eyoo gáʼthúu̱n ajngáa rígi̱ rá.

⁶ Jeobá na̱nguá ekudaminaʼ rí maʼni gámbáa xúgi̱ xkujndu rí naʼni gínáanʼ, mu xániñuʼ rí gamiéjunʼ rúʼko̱ mumíniiʼ kámuu,  rí nindxu̱u̱ xóo mbá lamáa o xóo mbá aguʼ rí natsikháanʼ. Naʼthúlúʼ rí maxtáa ga̱jma̱á ni̱ndxu̱lú mu mambáyulúʼ muraʼníí xkujndu. Ma̱ngaa mambáyulúʼ rí maguajún jmbu asndu índo̱ gakháñulú (Is. 41:13). Rúʼko̱ rí niʼni ga̱jma̱a̱ Yoshiko, bi̱ niʼthá ga̱jma̱a̱ numuu nákha nigíʼdu̱u̱ artículo. Wáxioo naʼthí: “Niguanúxuʼ tsiánguá índo̱ ndiya̱a̱xu dí rudúxu tsímiñuu. Gajkhun rí Jeobá exnúu tsiakii mu xámiñuu. Mú itháan nákha inu makhañúu, niʼthúún má xúʼko̱ enfermeras mangiin bi̱ kuwa ikhí ga̱jma̱a̱ numuu Jeobá rí maʼni nda̱wa̱á”. Ndiéjunʼ ejmañuluʼ ga̱jma̱a̱ numuu xkri̱da ndrígóo Yoshiko rá. Á mu nakumulú kuʼyáá rí naʼthí maʼni Jeobá rí maxtáa ga̱jma̱á ni̱ndxu̱lú, ma̱ngaa maxnúlúʼ tsiakii mu xámiñulu muraʼníí xkujndu.

7, 8. a) Ndiéjunʼ nindxu̱u̱ rí maʼni raga̱jma̱ dí niʼthí Jeobá maʼni, ga̱jma̱a̱ ndiéjunʼ eyoo gáʼthúu̱n rí maxmiéjunʼlú rá. b) Náa numuu rí Jeobá niʼthún judíos rí xaxmiéjúnʼ rá. c) Ndiéjunʼ niʼthí Jeobá náa Isaías 46:3, 4 mu xámiñuu xa̱bi̱i̱ xá.

⁷ Guʼyáá raga̱jma̱ enii rí Jeobá niʼthí náa Isaías: “Xaxmiéjuanʼ, numuu rí ni̱ndxu̱ʼ Dios ndrígáʼ”. Náa ajngáa rígi̱ nandoo gáʼthúu̱n “rí xátangaán matiexi̱ kidíiʼ ga̱jma̱a̱ numuu gamíi” o “matiexi̱ mbájndi ga̱jma̱a̱ gamíi”.

⁸ Náa numuu rí Jeobá niʼthún judíos bi̱ ni̱jkha̱ kiʼdiin náa Babilonia rí xaxmiéjúnʼ rá. Numuu rí ndaʼyoo rí xa̱bu̱ bi̱ kuwa ikhí maxmiéjúnʼ ga̱jma̱a̱ numuu rí soldado medopersa muni gámbáa Babilonia índo̱ gáʼni ajtsú skíñúʼ gu̱wa̱ʼ tsiguʼ rí maguma káwíin judío. Jeobá majmiuu soldado medopersa mu maʼnikríyaaʼ xuajñu (Is. 41:2-4). Índo̱ babilonios ga̱jma̱a̱ i̱ʼwáʼ xuajen ndiyáá rí naguwáʼ mijngii xa̱bu̱ sia̱nʼ, ninimi̱jna̱ mu xámiñuun índo̱ nitamijná: “Araʼdáá tsiakii”. Ma̱ngaa nini̱i̱ eʼwíínʼ dios mu xúʼko̱ ikhiin magumaa káwíin (Is. 41:5-7). Ikha jngó, Jeobá niʼthún xa̱bi̱i̱ rí xaxmiéjunʼ: ‹Ikháán, oh Israel, [mixtiʼkhuan nindxalá náa i̱ʼwáʼ xuajen,] nindxalá xa̱bi̱ʼ› Ga̱jma̱a̱, mu xaxmiéjunʼ itháan, niʼthún: “Ni̱ndxu̱ʼ Dios ndrígáʼ” (Is. 41:8-10). Índo̱ niʼthí “ni̱ndxu̱ʼ Dios ndrígáʼ”, Jeobá niʼthúún judíos bi̱ guájun jmbu rí támbumuu kaʼñún numuu rí ikhiin ni̱ndxu̱ún má xúʼko̱ xuajñu. Ma̱ngaa niʼthún rí maʼga̱ kagui̱i̱n ga̱jma̱a̱ mambáñun makáwíin. Gajkhun rí ajngóo Jeobá nixnúún tsiakii judíos bi̱ ni̱jkha̱ kiʼdiin náa Babilonia (atraxnuu Isaías 46:3, 4). *

9, 10. Ndíjkha jngó dí ragíʼmaa maxmiéjunʼlú rá. Araxná mbá xkri̱da.

⁹ Rí mbiʼi xúgi̱, xa̱bu̱ ra̱ʼkhá tháán exmiéjunʼ ga̱jma̱a̱ numuu rí xtáa rarígá náa numbaaʼ. Gajkhun, dí rúʼko̱ naʼni maxmiéjunʼlú mangáanʼ. Mú ragíʼmaa maxmiéjunʼlú, numuu rí Jeobá naʼthúlúʼ: “Ni̱ndxu̱ʼ Dios ndrígáʼ”. Ajngáa xóo rígi̱ naʼni̱i̱ a̱jkiu̱lúʼ wéñuʼ. Náa numuu rá.

¹⁰ Guʼyáá mbá xkri̱da. Gundxa̱ʼwámi̱jna̱ rí Juan ga̱jma̱a̱ Bruno nagún náa ikháá má avión. Rí asndu nda̱a̱ tsu̱ma̱ nigíʼdu̱u̱ niʼba̱a̱n gakhi̱i̱ avión. Ikhú, nawáán eʼthí mbáa: “Gudxawíín xúgiáanʼ bi̱ kua̱da̱ʼ gi̱i̱, naʼthálá bi̱ na̱jkha̱ kayóo avión rí kuwáanʼ ranújngulú náa naxnúu wéñuʼ giñánʼ mbiiʼ. Mbá péñu, guruʼwa̱a̱ májánʼ cinturón. Xaxmiéjuanʼla. Nda̱a̱ má dí garigá”. Juan ra̱ʼkhá tháán nimíñuu. Mú nakujmaa rí Bruno tsímiñuu. Ikhú niraxu̱u̱: “Ndíjkha jngó  rí tsímiñaʼ rá.” Bruno nanduʼwá ga̱jma̱a̱ naʼthúu̱n: “Nani núwiinʼ májánʼ bi̱ na̱jkha̱ kayóo avión. Nindxu̱u̱ anu̱ʼ. Atatsíñuʼ matha̱nʼ ga̱jma̱a̱ numuu ikhaa, rí najmañuu maʼga̱ kayóo májánʼ avión ga̱jma̱a̱ ma̱ta̱ya̱a̱ xú káʼnii gáʼni̱i̱ a̱jkia̱nʼ”.

11. Ndiéjunʼ ejmañuluʼ xkri̱da ndrígu̱ún a̱jmi̱i̱n xa̱bu̱ bi̱ nagún náa avión rá.

¹¹ Ndiéjunʼ ejmañuluʼ náa xkri̱da rígi̱ rá. Xó má Bruno, tsímiñuluʼ numuu rí nuniʼnííʼ májánʼ Anu̱lú Jeobá bi̱ xtáa mekhuíí. Nduʼyáá rí ikhaa má gambáyulú manújngulú náa “gamíi” dí rígá náa iwáá mbiʼi xúgi̱ (Is. 35:4). Maski ajndu xúgínʼ xa̱bu̱ namiñun, mú ikháanʼ na̱nguá, numuu rí nakumulú kuʼyáá Jeobá (Is. 30:15). Ga̱jma̱a̱ xó má niʼni Bruno, nuʼtámíjná gajmiúlú xa̱bu̱ rí gíʼdoo numuu rí makumulúʼ kuʼyáa Dios. Ikhiin mangiin ma̱ndoo mbuyáá májánʼ rí maski asndu nuraʼníí xkujndu gakhi̱i̱ wéñuʼ, Jeobá má gambáñun.

12. a) Ndiéjunʼ nindxu̱u̱ rí maʼni ragajtsú rí Jeobá niʼthí maʼni rá. b) Ndiéjunʼ eʼni marmáʼáan a̱jkiu̱lúʼ ajngáa “ñawúunʼ” Jeobá rá.

¹² Mbuʼyáá rí maʼni ajtsú enii rí Jeobá niʼthí maʼni: “Ikhúúnʼ maxnaʼ tsiakii, gajkhun mambáyaʼ”. Isaías niʼthí má nákha ginii rí Jeobá maxnúu tsiakii xuajñu. Niʼthí: “Jeobá bi̱ naʼtáñajunʼ xúgíʼ numbaaʼ ma̱ʼkha̱ xóo mbáa xa̱bu̱ bi̱ gíʼdoo wéñuʼ tsiakii, ga̱jma̱a̱ náa ñawúunʼ ikhaa maxtáa raʼtáñajunʼ” (Is. 40:10). Náa Biblia najmuu ajngáa xóo ñawúunʼ mu masngájma tsiakii rí gíʼdoo. Ikha jngó ajngáa rí niʼthí Isaías naʼni marmáʼáan a̱jkiu̱lú rí Jeobá nindxu̱u̱ mbáa Rey bi̱ gíʼdoo xúgíʼ tsiakii. Nákha wajyúúʼ, Dios nijmuu tsiakii ndrígóo mu maʼni káwíin xa̱bi̱i̱. Rí mbiʼi xúgi̱, naxnún má xúʼko̱ tsiakii ga̱jma̱a̱ nambáñun bi̱ nakumu̱ún kuyáá (Deut. 1:30, 31; Is. 43:10).

13. a) Nguáná gaʼnimbánuu Jeobá rí eʼthí maʼni mu maxnúlúʼ tsiakii ndrígóo xá. b) Ndiéjunʼ exnúlú tsiakii mu makumulúʼ kuʼyáá xá.

 ¹³ Jeobá naʼthí maxnúlúʼ tsiakii ndrígóo, mú itháan índo̱ nuxkulú xa̱bu̱ sia̱nʼ. Náa tikhu xuajen, xa̱bu̱ tsíñún rí majuiʼtáraʼa o tsíñún gúyáá xuajñu Jeobá. Mú tsixmiéjunʼlú nditháan rí xa̱bu̱ muxnulú. Jeobá naxnúlú tsiakii ga̱jma̱a̱ naʼni rí makumulúʼ kuʼyáa. Naʼthí: “Tséʼniuu má ndiéjunʼ nindxu̱u̱ rí gátuxuu ga̱jma̱a̱ numaʼ, xaʼga̱nú marigá” (Is. 54:17). Rí Jeobá naʼthí maʼni, naʼni marmáʼáan a̱jkiu̱lúʼ ajtsú enii rí gíʼdoo wéñuʼ numuu.

14. Náa numuu rí tséʼniulú tsiánguá rí muxkulú xa̱bu̱ bi̱ naguiñunʼ kuyáá Dios rá.

¹⁴ Timbá, nindxu̱u̱ rí maguáʼthi̱i̱n rí xa̱bu̱ maguiñunʼ kuyulúʼ (Mat. 10:22). Jesús niʼthí rí xa̱bi̱i̱ majuixkúún índo̱ gáʼni iwáá mbiʼi (Mat. 24:9; Juan 15:20). Raga̱jma̱, rí niʼtáriyaʼ Isaías naʼthúlúʼ rí xa̱bu̱ sia̱nʼ raʼkháa i̱ndó maguiñunʼ kuyulúʼ, rí asndu majmuu mixtiʼkhu ajua̱nʼ mu muxnulú. Tikhu rí ikhaa nindxu̱u̱, nduwaʼ dí ra̱májánʼ ga̱jma̱a̱ rí majuixkúlú xkawiiʼ wéñuʼ (Mat. 5:11). Jeobá xárikhún xa̱bu̱ sia̱nʼ rí majmúún ajua̱nʼ rígi̱ (Efes. 6:12; Rev. 12:17). Mú ragíʼmaa mamiñúlú. Náa numuu rí na̱nguá rá.

15, 16. a) Ndiéjunʼ nindxu̱u̱ dí ragajtsú enii rí gíʼmaa marmáʼáan a̱jkiu̱lúʼ, ga̱jma̱a̱ xú káʼnii embáyúu rígi̱ náa Isaías 25:4, 5 rá. b) Ndiéjunʼ eʼthí náa Isaías 41:11, 12 rí mugíʼnii nda̱wa̱á xa̱bu̱ bi̱ nakiʼníin kuyulúʼ rá.

¹⁵ Rí maʼni ragajtsú, gíʼmaa marmáʼáan a̱jkiu̱lúʼ rí Jeobá naʼthí rí nimbá ajua̱nʼ ‹xáʼngo̱o̱› gáʼni ga̱jma̱á ni̱ndxu̱lú. Xóo mbá muro rí nañewu̱nlú índo̱ naxnúu giñánʼ mbiʼ, Jeobá xúʼko̱ eñawu̱nlú náa ‹xa̱bu̱ xkawiinʼ bi̱ nuni dí ra̱májánʼ› (atraxnuu Isaías 25:4, 5). * Xa̱bu̱ bi̱ sia̱nʼ nditháan  xáʼngu̱u̱n gúniulú mbá dí ra̱májánʼ (Is. 65:17).

¹⁶ Jeobá maxnúlúʼ má xúʼko̱ tsiakii mu makumulúʼ kuʼyáá itháan, ikhaa naʼthí ndiéjunʼ rí guaʼti̱i̱n xa̱bu̱ “bi̱ nakiʼníin kuyaaʼ” (atraxnuu Isaías 41:11, 12). * Tséʼniuu asndu nguáthá tsiakii guni guerra o muxnulú, xúgínʼ xa̱bu̱ bi̱ tsíñún gúyáá xuajñu Dios maguma gámbíin ga̱jma̱a̱: “maguanu mani̱ndxu̱ún xóo bi̱ takuwa mbá kayuʼ”.

17, 18. a) Ndíjkha jngó nambáyulúʼ rí muraxnuu Biblia mu makumulúʼ kuʼyáá itháan Dios rá. Araxná mbá xkri̱da. b) Náa numuu rí gíʼmaa mundxaʼwáá edxu̱lúʼ náa texto rí kaʼyoo tsiguʼ 2019 rá.

¹⁷ Rí nakumulú kuʼyáá Jeobá naʼni rí muniʼnííʼ itháan májánʼ. I̱ndó rí ma̱ndoo muʼni nindxu̱u̱ rí muraxnuu Biblia ga̱jma̱a̱ tsumáá ma̱ngaa guríyaaʼ mbiʼi mu mundxaʼwamíjná rí kuwáanʼ ruraxnuu. Náa Biblia na̱ʼkha̱ historia rí gajkhun nirígá, ga̱jma̱a̱ nasngájma xú káʼnii Jeobá niñewu̱u̱n xuajñu nákha wajyúúʼ ma̱ngaa naxnúlú tsiakii rí ikhaa má gáñewu̱nlú xúgi̱.

¹⁸ Gundxaʼwamíjna̱ náa xkri̱da rí nijmuu Isaías mu mambáyulúʼ mbuʼyáá xú káʼnii eñawu̱nlú Dios. Naʼni mbríguii ga̱jma̱a̱ mbáa báxtúu bi̱ nañewu̱u̱n mugu̱. Naʼthí: “Magímbíin ga̱jma̱a̱ ñawúunʼ e̱jín múgú; ma̱ngaa maguriʼiin” (Is. 40:11). Índo̱ Jeobá naguráʼáanʼ, nakumulú rí naxtiewu̱nlú. Mu ma̱ndoo mambáyulúʼ mu xámiñulu maski ajndu nuraʼníí xkujndu, ñumba tsi jmbi, tsi majan indxaʼhuaminaʼ niraʼwíí texto rí kaʼyoo tsiguʼ 2019 rí nuxkamaa náa Isaías 41:10: “Xaxmiéjuanʼ, numuu rí ni̱ndxu̱ʼ Dios ndrígáʼ”. Gundxaʼwamíjna̱ náa texto rígi̱. Rí muʼni maxnúlúʼ tsiakii ga̱jma̱a̱ rí makumulúʼ kuʼyáá ikhaa mu muraʼníí xkujndu rí na̱ʼkha̱ marigá.