1, 2. Ndiéjunʼ niʼthúún ángel gu̱ʼu̱ bi̱ nigún náa iñá wa̱jinʼ rí nijngua̱a̱n Jesús, ga̱jma̱a̱ ndiéjunʼ rí niʼthúún Jesús xá.

NAJTSIRIGA mbiʼi 16 ñajunʼ gu̱nʼ nisán tsiguʼ 33. Gíná a̱jkiu̱ún mbá nguéjmi̱i̱n gu̱ʼu̱ nagún náa rí nijuaʼdi̱i̱ Táta Jesús rí naʼni má 36 horas. Nagún mu muxtajmáá ri̱ʼi̱ rí ndataun ga̱jma̱a̱ aceite rí ndataun náa xuyuuʼ Jesús. Índo̱ niguánú náa riejuun iñá wa̱jinʼ, tsiánguá niʼniún índo̱ ndiyáá rí mijchú ga̱jma̱a̱ ndáwa̱a̱ tsáa kraʼaa. Mbáa ángel naʼthúún rí Jesús nitujxi̱i̱ má náa majñu̱únʼ wa̱jinʼ ga̱jma̱a̱ niʼthún: “Ikhaa na̱jkha̱ inala náa kamba̱a̱ rí na̱jkha̱ Galilea; ikhí gúya̱a̱la” (Mat. 28:1-7; Luc. 23:56; 24:10).

² Índo̱ gu̱ʼu̱ kúwá ragu̱u̱n, ikhú Jesús nikuʼmaminaʼ náa ikhiin ga̱jma̱a̱ niʼthún: “Gaʼguaaʼ, gu̱thu̱u̱n a̱ngui̱nʼ rí magún náa Galilea; ikhí gúyóʼ” (Mat. 28:10). Mbáa rígá mbá rí gíʼdoo wéñuʼ numuu maʼthúún xa̱bi̱i̱, numuu rí timbá rí nandoo maʼni índo̱ nigabi̱i̱ nindxu̱u̱ rí magimbíin xa̱bi̱i̱.

3, 4. Ndíjkha rí ma̱ndoo muʼthá rí kiʼtáñajunʼ dí na̱ʼkha̱ náa Mateo 28:19, 20 raʼkháa i̱ndó apóstoles nijuiʼtañájúúnʼ rá. (Atayáá xtiʼkhu rí na̱ʼkha̱ náa timbá ináa.)

³ (Atraxnuu Mateo 28:16-20). * Náa rí nigímbíin xa̱bi̱i̱ Jesús, niʼthún dí nindxu̱u̱ ñajunʼ rí gíʼdoo wéñuʼ numuu  muni nákha siglo timbá, nindxu̱u̱ ikháá má ñajunʼ rí nu̱ʼni̱ mbiʼi xúgi̱. Niʼthún: “Ikha jngó, guʼgua ga̱jma̱a̱ gusngún xa̱bu̱ bi̱ kúwá náa xúgíʼ xuajin. [...] Gusngúnla mu munimbu̱u̱n mbá xúgíʼ rí ikhúúnʼ nitañajuanla”.

⁴ Jesús nandoo rí xúgínʼ xa̱bi̱i̱ mutaraʼa. Kiʼtáñajunʼ rígi̱ raʼkháa i̱ndó bi̱ mbá gu̱wa̱ʼ i̱mbi̱i̱n apostoles bi̱ niguájun jmbu nijuiʼthúún rí muni. Xú káʼnii eʼyáá rá. Numuu dí raʼkháa i̱ndó apóstoles nigún náa kúbá ndrígóo Galilea índo̱ Jesús niʼthún xa̱bi̱i̱ rí musngúún eʼwíinʼ xa̱bu̱. Garmáʼáan a̱jkiu̱lú rí ángel niʼthún gu̱ʼu̱ rí ikhiin mbuyáá Jesús náa Galilea. Ikha jngó mbáa ikhú ma̱ngaa nikúwá gu̱ʼu̱ bi̱ niguájun jmbu. Ma̱ngaa apostol Pablo niʼthí rí Jesús “nikujmaa náa inún itháan rí 500 a̱ngiu̱lú” (1 Cor. 15:6). Náá mínaʼ rá.

5. Xóo eʼyáá rí 1 Corintios 15:6 naʼthí ga̱jma̱a̱ numuu reunión dí nirígá náa Galilea na̱ʼkha̱ raʼthí náa Mateo capítulo 28 rá.

⁵ Guaʼdáá mbá májánʼ numuu, mu muʼnimbulúʼ rí Pablo nindxa̱ʼwáminaʼ ga̱jma̱a̱ numuu rí nigímbíin náa Galilea dí na̱ʼkha̱ raʼthí náa capítulo 28 ndrígóo Mateo. Ndiéjunʼ nindxu̱u̱ rá. Timbá, rí mbaʼin xa̱bi̱i̱ Jesús ninindxu̱ún galileos. Ikha jngó, ikhí nindxu̱u̱ mbá náa ma̱ndoo mbu̱wi̱i̱n mbaʼin xa̱bu̱, mani̱ndxu̱u̱ mbá náa Kúbá ndrígóo Galilea raʼkháa náa mbóoʼ guʼwá xúʼkhiínʼ dí rígá náa Jerusalén. Raga̱jma̱, Jesús nigímbíin má 11 apóstoles ndrígóo índo̱ ni̱ga̱bi̱i̱. Á mu rí ikhaa nindoo dí i̱ndó apóstoles ndrígóo mutaraʼa ga̱jma̱a̱ musngúún xa̱bu̱, mbáa núkhu má náa Jerusalen niʼthúún, raʼkháa rí magimbíin ikhiin ga̱jma̱a̱ gu̱ʼu̱ ma̱ngaa eʼwíinʼ xa̱bu̱ náa Galilea (Luc. 24:33, 36).

6. Xú káʼnii esngájma Mateo 28:20 kiʼtañajunʼ rí miʼsngúún xa̱bu̱ xtáa rambánuu rí mbiʼi xúgi̱, ga̱jma̱a̱ xú káʼnii erígá rá.

⁶ Guʼyáá rí maʼni ajtsú dí gíʼdoo numuu, náa dí Jesús na̱nguá niʼthún i̱ndó káaʼ gu̱wi̱nʼ i̱mba̱ xa̱bi̱i̱ rí muʼsngúún eʼwíinʼ xa̱bu̱. Xú káʼnii eʼyáá rá. Numuu dí rígi̱ rí niʼthún iwáá kayuu xa̱bi̱i̱ Jesús: “Maxtáá ga̱jma̱á nindxa̱laʼ asndu índo̱ gátumuu mbiʼi rí mambáa rí xtáa rarígá náa numbaaʼ” (Mat. 28:20). Xó má niʼthí Jesús, ñajunʼ rí miʼsngúún xa̱bu̱ xtáa raguma kájxi, nduʼyáá kaʼwu rígi̱ numuu rí mámbá tsiguʼ najngún iyááʼ itháán rí 300,000 xa̱bu̱ mu mani̱ndxu̱ún xa̱bi̱i̱ Jeobá.

7. Ndiéjunʼ guʼyáá xúgi̱ ga̱jma̱a̱ náá numuu rá.

⁷ Mbaʼin bi̱ nunigajmaa Biblia najngún iyááʼ. Mú kúwi̱i̱n tikhun bi̱ nuni a̱jma̱ a̱jkiún mu mani̱ndxu̱ún xa̱bi̱i̱ Cristo. Nanigu̱u̱nʼ rí najuiʼsngúún mú tségíʼ rí majngún iyááʼ. Nduʼyáá gajkhun rí bi̱ nusngáa ga̱jma̱a̱ numuu Biblia nandún rí bi̱ nusngúún mugíʼ munimbánii rí najmañún ga̱jma̱a̱ rí mani̱ndxu̱ún xa̱bi̱i̱ Cristo. Náa artículo rígi̱, mbuʼyáá xú káʼnii gúʼni̱ mu mu̱ʼgua̱nú asndu náa a̱jkiún bi̱ nuʼsngúún ga̱jma̱a̱ rí mambáñún mu mambajxu̱u̱n májánʼ gajmiún Dios. Ndíjkha rí gíʼdoo numuu mbuʼyáá rígi̱ rá. Numuu rí ma̱ndoo maʼga̱nú mbá mbiʼi rí mbuʼyáá á mu mu̱ʼgua̱ ruʼsngáá o nánguá mbáa xa̱bu̱.

8. Náá numuu rí ma̱ndoo maʼniulú mingíjyúuʼ muʼguanú náa a̱jkiu̱u̱n bi̱ nuʼsngáá rá.

⁸ Jeobá nandoo rí xa̱bu̱ muni ñajuunʼ ga̱jma̱a̱ ngajua. Ikha jngó dí nuʼgímijna̱ mumbáñún bi̱ nuʼsngúún rí makru̱ʼu̱u̱n dí Jeobá naxmiéjuunʼ ga̱jma̱a̱ nandoo kaʼyoo mámbáa rí ikhiin. Nandulú rí mbuyáá Jeobá xóo mbáa “Anún e̱jín dxuáʼa ga̱jma̱a̱ bi̱ nañewu̱u̱n gu̱ʼú xuáʼa” (Salm. 68:5). Índo̱ bi̱ nuʼsngúún naguánu nduyáá rí Jeobá nandoo kaʼñún  wéñuʼ, mbáa rúʼko̱ gaxkajxiin rí maʼndún kuyáá itháan. Mú kúwi̱i̱n bi̱ naʼniún mingíjyúuʼ mbuyáá Jeobá xóo mbáa Anún bi̱ nandoo kaʼñún, numuu rí anún bi̱ ninimbaji̱i̱n na̱nguá nindúún kuñún (2 Tim. 3:1, 3). Ikha jngó guʼsngúún cualidad dí mitsaanʼ ndrígóo Dios índo̱ nuʼsngúún ga̱jma̱a̱ numuu Biblia. Gumbáñuun bi̱ nuʼsngúún rí makru̱ʼu̱u̱n rí Dios bi̱ májánʼ a̱jkiu̱u̱n nandoo rí makuwi̱i̱n kámuu mbiʼi ga̱jma̱a̱ rí ikhaa xtáa xawii mu mambáñún muxkamaa. Ndiéjunʼ itháan gándoo mu̱ʼni̱ rá.

9, 10. Xú káʼnii libro gándoo majmuluʼ índo̱ gúʼsngáa ga̱jma̱a̱ náá numuu rá.

⁹ Gajmulú libro, Ndiéjunʼ eʼsngúlúʼ Biblia rá. Ga̱jma̱a̱ Guni rí Dios ma̱ndoo kaʼyala. Libro rígi̱ niguma mu mambáyulúʼ maʼguanú asndu náa a̱jkiu̱u̱n bi̱ nuʼsngáá. Mbá xkri̱da, náa capítulo 1 ndrígóo libro Rí eʼsngúlúʼ nariʼña̱a̱ graxe̱ rígi̱: Lá naxmiéjuunʼ Dios e̱ʼni̱, o nindxu̱u̱ mbáa Dios ra̱májáanʼ dxe̱ʼ. Xú káʼnii eku̱mu̱u̱ Dios índo̱ ndaʼyoo rí numíniiʼ rá. Ga̱jma̱a̱, lá ma̱ndoo mambajxáaʼ ga̱jma̱a̱ʼ Jeobá ráʼ. Libro Dios ma̱ndoo kaʼyala  mambáyúu bi̱ nuʼsngáá mikro̱ʼo̱o̱, á mu nagíʼ naʼnimbánuu ikha rí na̱ʼkha̱ náa Biblia maxtáa itháan májánʼ ga̱jma̱a̱ mambaxúu májánʼ ga̱jma̱a̱ Jeobá. Maski má niʼsngúún eʼwíinʼ ga̱jma̱a̱ libro rígi̱, ndayóoʼ muniratamijná májánʼ mu muʼsngáá mámbáa, gundxaʼwamíjna̱ rí mixtiʼkhu rí eyóoʼ mámbáa xa̱bu̱ bi̱ nuʼsngáá.

¹⁰ Á mu rí bi̱ nuʼsngáá nandoo majmañuu ga̱jma̱a̱ numuu mbá rí na̱nguá kuaʼdáá náa caja ndrígóo herramientas mu muʼsngáa. Á mu xúʼko̱, ma̱ndoo muʼthán rí ma̱ndoo maguxnuu mbáwíi i̱yi̱ʼ rúʼko̱ ga̱jma̱a̱ muʼnigajmaa má xúʼko̱ gajmiúlú libro dí niʼthá má.

11. Nguáná gándoo mugíʼdilú muʼtájkáan gajmiúlú bi̱ nuʼsngáá ga̱jma̱a̱ xú káʼnii gándoo gugíʼdi̱i̱ muʼthán ga̱jma̱a̱ numuu rúʼko̱ xá.

¹¹ Guʼtájkáan índo̱ gugíʼdi̱i̱ muʼsngáa. Xóo phú gíʼmaa, nguáná rí phú gíʼmaa matagíʼdi̱i̱ maratajkáan, índo̱ gátagíʼdi̱i̱ marasngáa ga̱jma̱a̱ Biblia o índo̱ gámbáaʼ dxe̱ʼ. Wapha má gíʼmaa, xmáná má rí natagíʼdi̱i̱ marasngáá mbáa xa̱bu̱. Gíʼmaa rí mumbáyii bi̱ nuʼsngáá mu mbaʼyoo rí i̱ndó ga̱jma̱a̱ xi̱ʼ kaʼwu ma̱ndoo mikru̱ʼu̱lú dí naʼthí náa Ajngá rawunʼ Dios. Tikhun bi̱ nuʼsngáa ga̱jma̱a̱ numuu Biblia nuraxnuu Santiago 1:5 mu muthi ga̱jma̱a̱ numuu rí mutajkáan, náa naʼthí: “Á mu rí mbáa dí ikháanʼla ndayóoʼ majmañuu xóó itháan, gando̱ʼo̱o̱ má xúʼko̱ Dios,”. Nda̱wa̱á nuraxi̱i̱ bi̱ nusngáá: “Xú káʼnii ma̱ndoo munda̱ʼa̱a̱ ku̱ma̱ Dios rá.” Mbáa ikhaa má gáʼthulúʼ rí índo̱ nuʼtajkháan.

12. Xóo gájmulúʼ Salmo 139:2-4 mu mumbáyii maʼtájkháan májánʼ bi̱ nuʼsngáá rá.

¹² Guʼsngáá maʼtájkáan bi̱ nuʼsngáá. Guʼthán rí Jeobá naʼdxaun índo̱ nuʼtajkháan ga̱jma̱a̱ xúgíʼ a̱jkiu̱lú. Guʼthán rí ma̱ndoo muʼthán Jeobá xúgíʼ rí nakumulúʼ ga̱jma̱a̱ ma̱ndoo muʼthán xúgíʼ rí nimbáa xúʼthán. Ga̱jma̱a̱ rí Jeobá ndaʼyoo má xú káʼnii endxa̱ʼwa̱mijna̱lú (atraxnuu Salmo 139:2-4). * Ma̱ngaa ma̱ndoo muʼthán rí ma̱ndo̱ʼo̱o̱ Dios mu mambáyúu mariʼkhuu xóo endxa̱ʼóo edxu̱u̱ ga̱jma̱a̱ rí maʼngo̱o̱ maniñuuʼ dí nixtáa raʼni. Mbá xkri̱da, gundxaʼwamíjna̱ rí mbáa bi̱ naʼnigajmaa̱ Biblia mba̱yu̱u̱ʼ má, nanigu̱u̱ʼ xóó maʼga̱ ndxa̱a̱ dí nuni i̱ʼwáʼ religión. Ndaʼyoo má dí raʼkhí nindxu̱u̱, mú nanigu̱u̱ʼ tikhu dí narígá ikhí. Guʼthán rí Jeobá ndaʼyoo májánʼ xóo naku̱mu̱u̱ ga̱jma̱a̱ rí gando̱ʼo̱o̱ mu maʼndoo kaʼyoo i̱ndó dí ikhaa nanigu̱u̱ʼ (Sal. 97:10).

13. a) Náá numuu rí wapha gíʼmaa muʼthán mu maʼga̱ reunión bi̱ nuʼsngáá rá. b) Ndiéjunʼ rí ma̱ndoo mu̱ʼni̱, mu bi̱ nuʼsngáá xátiyuuʼ índo̱ gáʼga náa Guʼwá Nagimbáanʼ rá.

¹³ Wapha gúʼthán maʼga̱ reunión bi̱ nuʼsngáá. Náá numuu rá. Numuu rí gáʼdxau̱n ga̱jma̱a̱ rí gáʼyoo náa reunión ma̱ndoo maʼga̱nú asndu náa a̱jkiu̱u̱n ma̱ngaa mambáyúu mu mambajxúu májánʼ ga̱jma̱a̱ Dios. Ikha jngó gusngajmáá video rí naʼthí Ga̱jma̱a̱ Káʼnii erígá náa Guʼwá nagimbáanʼ rá. Ga̱jma̱a̱ guʼthán rí maʼga̱ náa Guʼwá Nagimbáanʼ. Guʼthán rí manújngulúʼ ruʼyaa á mu nandoo. Ma̱ngaa májánʼ gáʼni rí dí muʼthúún eʼwíinʼ publicador mu mu̱ʼgua̱ gajmiúlú índo̱ guʼgua̱ ruʼsngáá mu xúʼko̱ maʼga̱ raguʼuun kaʼñún bi̱ kúwá náa Guʼwá Nagimbáanʼ ga̱jma̱a̱ xúʼko̱ xatiyúu índo̱ gáʼga reunión.

14. Ndiéjunʼ gáxkaxii bi̱ nuʼsngáá mu mambajxúu itháan ga̱jma̱a̱ Dios rá.

¹⁴ Nandulú rí bi̱ nuʼsngáá mambajxúu májánʼ ga̱jma̱a̱ Dios (Efes. 4:13). Índo̱ mbáa nagruigú rí miʼsngáá ga̱jma̱a̱ numuu Biblia, mbáa naʼni numuu rí nandoo maxkamaa  mbá rí mambáyúu. Mú índo̱ gáʼndoo kaʼyoo itháan Jeobá, mbá mandxaʼwáminaʼ xóo gáʼni mu mambáñún eʼwíinʼ, xóo bi̱ kúwi̱i̱n náa Guʼwá Nagimbáanʼ (Mat. 22:37-39). Ma̱ngaa, guʼyáʼ xú kaʼnii muʼthán rí mitsaanʼ nindxu̱u̱ rí murajkuáa mbújkha̱a̱ náa caja mu maguma ñajuunʼ Dios.

15. Xú káʼnii gándoo gumbáyii bi̱ nuʼsngáá mu majmañuu maraʼnuu májánʼ xkujndu rá.

¹⁵ Gumbáyii bi̱ nuʼsngáá mu maʼngo̱o̱ maraʼnuu xkujndu. Gu̱ʼgíʼ mbá xkri̱da. Mbáa bi̱ nuʼsngáá bi̱ nindxu̱u̱ má publicador bi̱ xóó tséjngúun iyááʼ naʼthulú rí mbáa ndxájulú náa congregación niʼthúun mbá ajngáa rí niʼni gawúunʼ. Xú káʼnii gúʼni̱ rá. Itháan máján’ rí mu’tháán rí na’thí náa Biblia ki xóo rí mu’thá numáá ndxájulú. Ma̱ndoo muʼthán dí rígá a̱jma̱ rí ma̱ndoo maraʼwíí maʼni: Dí maʼni mba̱a̱ a̱jkiu̱u̱n kaʼyoo ndxájulú o á mu tsíyoo gámbumuu rí niʼthúun ndxájulú ma̱ndoo maʼtamíjná ga̱jma̱a̱ májánʼ mu xúʼko̱ mambajxi̱i̱ ga̱jma̱a̱ ndxájulú (atayáá ma̱ngaa Mateo 18:15). Gumbáyii bi̱ nuʼsngáá mu xúʼko̱ mbaʼyoo xóo gáʼthi. Guʼsngáá mu mbaʼyoo xóo majmuu aplicación JW Library^®, Ikha rí munigajmaa xa̱bi̱i̱ Jeobá, ga̱jma̱a̱ xóo gáto̱ʼo̱o̱ náa jw.org^® mu xúʼko̱ mbaʼyoo xóo gáʼnimbánuu xkujndu. Á mu xtáa xawii mu maraʼnuu xkujndu nákha xóó tséjngúun iyááʼ itháan májánʼ gámbájxu̱u̱ gajmii a̱ngiu̱lú nda̱wa̱á.

16. Ndiéjunʼ gándoo gájmañuluʼ rí mu̱ʼgua̱ gajmiúlú eʼwíinʼ angiu̱lú náa nuʼsngáa rá.

¹⁶ Guʼtáán imba̱a̱ ndxájulú mu mu̱ʼgua̱ ruʼsngáá ga̱jma̱a̱ guʼgua̱ gajmiúlú circuito índo̱ na̱ʼkha̱ náa congregación. Ndíjkha rá. Xó má rí nijmañulu náa kutriga̱ 13, mbá numuu nindxu̱u̱ rí eʼwíinʼ a̱ngiu̱lú ma̱ndoo mumbayíí náa tikhu rí ikháanʼ tséʼngulú. Gundxaʼwamíjna̱ rí bi̱ nuʼsngáá niʼniminaʼ maniñuuʼ ratsikhá ndíí mbaʼa nuthu, mú tséʼngo̱o̱ gániñuuʼ. Á mu xúʼko̱ erígá, gúʼthán mu̱ʼgua̱ gajmiúlú mbáa ndxájulú bi̱ niʼngo̱o̱ niniñuuʼ ratsikhá ndíí maski ajndu niʼñuu gakhi̱i̱. Mbáa ikhaa ma̱ndoo mambáyúu ga̱jma̱a̱ maxnúu májánʼ xtágabu bi̱ nuʼsngáá. Á mu natiyulú gúʼsngáá náa inuu mbáa ndxájulú bi̱ najmañuu itháan, ma̱ndoo muʼthán ikhaa mu maʼsngóo. Asndu náá má kuwáánʼ, ma̱ndoo majmañulúʼ xóo esngáa eʼwíinʼ. Garmáʼáan a̱jkiu̱lú rí phú nandulú nindxu̱u̱ rí bi̱ nuʼsngáá mambajxúu májánʼ ga̱jma̱a̱ Dios.

17, 18. Ndiéjunʼ gíʼmaa mbuʼyáá á mu mu̱ʼgua̱ ruʼsngáá má xúʼko̱ o na̱nguá mbáa xa̱bu̱ rá.

¹⁷ Á mu bi̱ nuʼsngáá tséʼni tsiʼyóo, ndayóoʼ mbuʼyáá á mu mu̱ʼgua̱ ruʼsngáá má xúʼko̱. Mbá rí gíʼmaa mbuʼyáá nindxu̱u̱ rí nguáthá eʼngo̱o̱ xa̱bu̱. Tikhun naʼniún mingíjyúuʼ majmañún mú eʼwíinʼ na̱nguá. Ikha jngó guraximíjna̱: “Lá nagíʼ naʼnimbánuu dí xtáa rajmañuu maski ajndu nikhi̱i̱ má xáʼ. Lá nagíʼ má naʼni dí xtáa rajmañuu xáʼ”. (Mat. 28:20.) Maski ajndu bi̱ nuʼsngáá mañuu ejkha̱ rajmañuu, gíʼmaa mbuʼyáá rí nágíʼ nariʼkuminaʼ.

 ¹⁸ Mú, ndiéjunʼ gúʼni̱ á mu bi̱ nuʼsngáá tsémajkhuu rí xtáa rajmañuu o ndaʼyoo rí nda̱a̱ numuu rá. Gundxaʼwamíjna̱ ga̱jma̱a̱ numuu rígi̱. Á mu rí bi̱ nuʼsngáá niguámbóo má libro Rí eʼsngúlúʼ o mbáa asndu nigíʼdu̱u̱ má ga̱jma̱a̱ libro Dios ma̱ndoo kaʼyala, mú xóó tséjkha̱ nimbá reunión, ni má conmemoración. Ma̱ngaa, naʼthí rí xáʼnigajmaa índo̱ rígá mbá ñajunʼ rí na̱nguá má gíʼdoo wéñuʼ numuu. Á mu xúʼko̱ eʼni, mbaʼyóoʼ rí muʼtámíjná gajmiúlú ikhaa. *

19. Ndiéjunʼ ma̱ndoo muʼtháán mbáa bi̱ tsémajkhuu rí xtáa rajmañuu, ga̱jma̱a̱ ndiéjunʼ dí gíʼmaa mbuʼyáá rá.

¹⁹ Ma̱ndoo mugíʼdi̱i̱ muʼni̱i̱ graxe̱ rígi̱: “Ndiéjunʼ ku̱ma̱a̱ʼ ikháán rí naʼñaaʼ mingíjyúuʼ mu manindxa̱a̱ʼ xa̱bi̱i̱ Jeobá rá”. Á mu mbáa bi̱ nuʼsngáá mba̱yu̱u̱ʼ má xtáa raʼnigajma̱a̱ Biblia ga̱jma̱a̱ naʼtulúʼ dí nanigu̱u̱ʼ majmañuu itháan dí na̱ʼkha̱ raʼthí náa Biblia, mú xánindxu̱u̱ xa̱bi̱i̱ Jeobá, lá gíʼdoo numuu dí mu̱ʼgua̱ ruʼsngáá má xúʼko̱ xáʼ. I̱mba̱ numuu nindxu̱u̱, mbáa maʼthúlú náá numuu dí tségíʼ maʼni dí xtáa rajmañuu. Mbá xkri̱da, mbáa naku̱mu̱u̱ rí nditháan xájmaa mu maʼtáraʼa mámbá guʼwá. Índo̱ nduʼyáá xú káʼnii eku̱mu̱u̱ xáʼniulu mingíjyúuʼ mumbayíí.

20. Xú káʼnii embáyuluʼ Hechos 13:48 mu mbuʼyáá á mu mu̱ʼgua̱ ruʼsngáá má xúʼko̱ mbáa o nánguá rá.

²⁰ Phú ngíná nguáná índo̱ tikhun bi̱ nunigajmaa Biblia ni̱ndxu̱ún xóo israelitas bi̱ nikúwi̱i̱n nákha̱ mbiʼi dí nixtáa Ezequiel. Jeobá niʼthúu̱n gaʼyee bigi̱ ga̱jma̱a̱ numún ikhiin: “¡Atayáá! Ikháán nindxa̱a̱ʼ náa ikhiin xóo mbá ajmúú ndrígóo ngajua rí niguma ga̱jma̱a̱ mbá aʼwá mitsaanʼ ga̱jma̱a̱ rí ki̱ʼdi̱i̱ ga̱jma̱a̱ mbá ajua̱nʼ rí gíʼdoo cuerda. Mudxawíín ajngáaʼ, mú nimbáa xáʼnimbánuu” (Ezeq. 33:32). Nguáná maʼniulú mingíjyúuʼ muʼthán mbáa xa̱bu̱ rí muniʼñáaʼ ruʼsngáá ga̱jma̱a̱ numuu Biblia, mú nándáa “mbiʼi” ( 1 Cor. 7:29). Ikha jngó, itháán májánʼ gáʼni rí mbuʼñíinʼ ‹bi̱ nandún makuwá kámuu› mu muʼsngúún ki xóo rí mu̱ʼgua̱ ruʼsngáá má xúʼko̱ bi̱ tségíʼ maʼni dí xtáa rajmañuu (atraxnuu Hechos 13:48). *

21. Náá guáʼyaa nindxu̱u̱ texto rí kaʼyoo tsiguʼ 2020, ga̱jma̱a̱ náá numuu rí nindxu̱u̱ mbá rí mambáyulúʼ rá.

²¹ Náa mbá kañiʼ tsiguʼ 2020, texto rí kaʼyoo mambáyulú mu mu̱ʼni̱ itháan májánʼ náa muʼsngáa. Na̱ʼkha̱ tikhu ajngáa dí Jesús niʼthí náa rí nigímbíin xa̱bi̱i̱ náa kúbá ndrígóo Galilea “Ikha jngó, guʼgua ga̱jma̱a̱ gusngún xa̱bu̱ [...]. Guxuʼmíinʼ iyááʼ”  (Mat. 28:19).