1. Xú kaʼnii eʼyáá dí tsíñún guyamíjná xa̱bu̱ dí mbiʼi xúgi̱ rá.

NÁA Biblia naʼthí rí náa iwáá mbiʼi xa̱bu̱ ‹xaʼndún kuyamijná› (2 Tim. 3:1, 3). Nduʼyáá dí nambánuu dí mbiʼi xúgi̱. Mbá xkri̱da, mbaʼin wéñuʼ xa̱bu̱ bi̱ mbá guʼwíin nuniñamijnáa ga̱jma̱a̱ e̱ji̱n nakumu̱ún dí tsíñún gúñún. Asndu bi̱ kúwá náa ikháá má guʼwá tséñún xó má kaʼñún o asndu nuni dí xóo tseniʼnumijná. “Xabuanii tsériyaʼ mbiʼi makuwá gajmiún e̱jñún ga̱jma̱a̱ nuriyaaʼ itháan mbiʼi majmúún computadora, tableta, teléfono o mutsiin”, mbáa bi̱ naxná consejo xóo makuwíin náa mbá guʼwi̱i̱n naʼthí. “Maski má kúwá ikhaa náa guʼwá mu tseniʼnumujná májánʼ”.

2, 3. a) Xó ma naʼthí náa Romanos 12:10, tsíin gáʼyoo maʼndulú kuʼñúún rá. b) Ndiéjunʼ guʼnigajmaa náa artículo rígi̱ rá.

² Tsíyulú manindxúlú xóo xa̱bu̱ numbaaʼ bi̱ tsíñún kuyamijná (Rom. 12:2). Dí phú gíʼmaa muʼni, ndayóoʼ dí maʼndulú kuʼñúún a̱ngiu̱lú, raʼkháa i̱ndó bi̱ kúwi̱i̱n náa guʼwúlú (atraxnuu Romanos 12:10). * Mú ndiéjunʼ eyoo gaʼthúun dí maʼndaaʼ xtayáá mbáa rá. Nindxu̱u̱ mbá ajngáa dí nagájnuriyoʼ náa bi̱ nambajxu̱u̱n itháan májánʼ o bi̱ nandún kuyamijná xóo náa mbá guʼwi̱i̱n. Xúʼko̱ ma kayuuʼ gíʼmaa maʼndulú kuʼñúún a̱ngiu̱lú ma̱ngaa. Índo̱ nusngájma dí nandulú  kuʼñúún nuyambáá mu makuwáanʼ mbá jnduʼ náa xuajñún Jeobá (Miq. 2:12).

³ Mu mambáyulú maʼndulú kuʼyamijná, guʼyáá dí ma̱ndoo majmañulúʼ náa Biblia.

4. Xú kaʼnii embáyulú dí naʼthí Santiago 5:11 mu mangajulú dí nandoo kaʼyulú Jeobá rá.

⁴ Náa Biblia nasngájma cualidad dí mitsaanʼ rí gíʼdoo Jeobá. Mbá xkri̱da naʼthí rí “Jeobá nandoo kaʼñún xúgínʼ” (1 Juan 4:8). Índo̱ nuʼdxawiinlú rúʼko̱, naʼni dí maʼndulú kuʼyáá. Ma̱ngaa naʼthí dí Jeobá “gíʼdoo ngajua” (atxaxnuu Santiago 5:11). * ¡Dí nandoo gaʼthún: Dí Jeobá ra̱ʼkhá tháán nandoo kaʼyulú wéñuʼ!

5. Xú káʼnii esngájmá Jeobá dí nagawiinʼ a̱jkiu̱u̱n ga̱jma̱a̱ xú kaʼnii guʼyaridáá xá.

⁵ Náa Santiago 5:11 naʼthí, rí Jeobá nandoo kaʼyulú ma̱ngaa nagáwiinʼ a̱jkiu̱u̱n kaʼyulú nindxu̱u̱ imbo̱ʼ cualidad mitsaanʼ dí nanigulúʼ (Éx. 34:6). Mbá dí xó Jeobá nasngájma dí nagáwiinʼ a̱jkiu̱u̱n kaʼyulú nindxu̱u̱, índo̱ naʼni mbáa a̱jkiu̱u̱n kaʼyulú índo̱ najngawánʼ (Sal. 51:1). Náa Biblia naʼthí dí nagáwiinʼ a̱jkiu̱u̱n nindxu̱u̱ itháan, ki xó maʼni mba̱a̱ a̱jkiu̱u̱n. Dí nagáwiinʼ a̱jkiu̱u̱n mbáa, nindxu̱u̱ mbá dí nagájnuu asndu náa awúunʼ a̱jkiu̱u̱n índo̱ ndaʼyoo dí mbáa namínuuʼ ga̱jma̱a̱ naxkajxi̱i̱ mambáyúu. Jeobá ra̱ʼkhá tháán nandoo mambáyulú dí asndu tsembríguii ga̱jma̱a̱ mbáa a̱ʼgu̱ bi̱ gíʼdaa ada̱ (Isa. 49:15). Índo̱ kuwáanʼ náa awúu̱n gaʼkhu, Jeobá nagáwiinʼ a̱jkiu̱u̱n ga̱jma̱a̱ nambáyulúʼ (Sal. 37:39; 1 Cor. 10:13). Ma̱ndoo musngajmá dí nagáwiinʼ a̱jkiu̱lú eni a̱ngiu̱lú índo̱ nuʼni mbáa a̱jkiu̱lú kuʼñúún ga̱jma̱a̱ tsiyejxíi sia̱nʼ (Efes. 4:32). Mbá dí xóo ma̱ndoo musngajmá dí nagáwiinʼ a̱jkiu̱lú nindxu̱u̱ dí mumbañún a̱ngiu̱lú náa mbiʼi mingíjyúuʼ. Dí nandulú kuʼñúún a̱ngiu̱lú naxkajxán rí magaʼwíínʼ a̱jkiu̱lú kuʼñúún eʼwíinʼ nusngajmá dí nduʼyaridáá Jeobá, mbáa bi̱ gíʼdoo wéñuʼ numuu ga̱jma̱a̱ nandoo kaʼyulú (Efes. 5:1).

6. Xú káʼnii nisngájma Jonatán ga̱jma̱a̱ David rí nindúún kuyamijná rá.

⁶ Náa Biblia naʼthí ga̱jma̱a̱ numún tikhun xa̱bu̱ bi̱ nisngajmá dí nindúún kuyamijná. Mbá xkri̱da, ikhaa ninindxu̱u̱ Jonatán ga̱jma̱a̱ David. Náa Biblia naʼthí: “Jonatán nimbáxu̱u̱ májánʼ ga̱jma̱a̱ David, ma̱ngaa Jonatán nigíʼdu̱u̱ nindoo kaʼyoo xó má eyoo kaʼyaminaʼ ikhaa” (1 Sam. 18:1). David nixtiʼyáaʼ mu mariʼkuriya̱a̱ rey Saúl. Nda̱wa̱á Saúl nixígúu kaʼyoo David ga̱jma̱a̱ nigíʼ maxíyáa. Mú Jonatán na̱nguá nimbáyúu anu̱u̱ mu maxíyáa David. Dí phú niʼni, nimbanumijná ga̱jma̱a̱ David dí mambajxu̱u̱n má xúʼko̱ ma̱ngaa mumbayumijná (1 Sam. 20:42).

7. Ndiéjunʼ dí ma̱ndoo marikhoo Jonatán ga̱jma̱a̱ David mu xambajxu̱u̱n rá.

⁷ Dí xóo nimbajxu̱u̱ Jonatán ga̱jma̱a̱ David naʼniulú tsiánguá numuu dí rígá mbaʼa numuu dí maʼni dí xambajxu̱u̱n. Mbá xkri̱da, Jonatán 30 tsiguuʼ itháan nikhi̱i̱ ki xóo David. Jonatán ma̱ndoo maʼthí dí xambajxu̱u̱ ga̱jma̱a̱ dxámá bugi̱ numuu dí na̱nguá embriguíi ga̱jma̱a̱ ma̱ngaa dí tséjmañuuʼ. Mú Jonatán na̱nguá ndiʼyoo David xó mbáa bi̱ na̱nguá gíʼdoo numuu.

8. Xú káʼnii eʼyáá dí Jonatán nimbajxu̱u̱ májánʼ ga̱jma̱a̱ David rá.

⁸ Jonatán ma̱ndoo makiʼnáa kaʼyoo David. Numuu dí nindxu̱u̱ a̱ʼdióo rey Saul, ikhaa ma̱ndoo manda̱ʼa̱ dí ikhaa kaʼyoo maʼtáñajunʼ. (1 Sam. 20:31) Mú Jonatán ninindxu̱u̱ xa̱bu̱ wabaaʼ, ninindxu̱u̱ jmbii náa Jeobá. Ikha jngó ikhaa nimbáyúu Jeobá numuu dí ikhaa ndiʼyoo dí niraʼwíí David mu mani̱ndxu̱u̱ rey. Ma̱ngaa ninindxu̱u̱ jmbii náa David, asndu índo̱ Saúl nikiʼnáa kaʼyoo David (1 Sam. 20:32-34).

9. Lá Jonatán ndiʼyoo David xó mbáa bi̱ sia̱nʼ ga̱jma̱a̱ ráʼ. Arathá.

⁹ Jonatán nindoo kaʼyoo wéñuʼ David, na̱nguá ndiʼyoo xóo xa̱bu̱ sia̱nʼ ga̱jma̱a̱. Jonatán najmañuu najmuu májánʼ xkamidaʼ ga̱jma̱a̱ tsémiñuu maxmínaʼ. Ikhaa ga̱jma̱a̱ anu̱u̱ Saúl, nijmaʼniún dí ‹itháanʼ wiphiin ki xóo mbiyúuʼ› ga̱jma̱a̱ “itháan mixkujiin ki xóo mbáa león” (2 Sam. 1:22, 23). Jonatán ma̱ndoo maʼni mbamína ga̱jma̱a̱ numuu dí támiñuu maʼni. Mu ikhaa na̱nguá niʼni mbríguminaʼ ga̱jma̱a̱ ni má tayejxiiʼ sia̱nʼ. Dí phú niʼni Jonatán nindoo kaʼyoo wéñuʼ David numuu rí tsémiñuu ga̱jma̱a̱ dí nandoo kaʼyoo Jeobá. Nda̱wa̱á dí nixiyáa Goliat Jonatán nigíʼdu̱u̱ nindoo kaʼyoo xó má endooʼ kaʼyaminaʼ ikhaa. Xú káʼnii gándoo gusngájma dí nandulú kuʼñúún a̱ngiu̱lú rá.

10. Ndiéjunʼ eyoo gáʼthúu̱n ajngáa ‹gaʼndulú kuʼyamijná ga̱jma̱a̱ xúgíʼ a̱jkiu̱lú› rá.

¹⁰ Náa Biblia naʼthúlú dí ‹gaʼndulú kuʼyamijná ga̱jma̱a̱ xúgíʼ a̱jkiu̱lú› (1 Ped. 1:22). Jeobá naxnúlú mbá májánʼ xkri̱da. Ra̱ʼkhá tháán nandoo kaʼyulú, dí á mu naguajunlú jmbu náa ikhaa nimbá xáʼngo̱o̱ garikhoo dí nandoo kaʼyulú (Rom. 8:38, 39). Náa ajngáa griego ‹xúgíʼ a̱jkiu̱lú› nandoo gaʼthúun dí índo̱ mbáa naʼni tsiakimínáʼ masngájma dí nandoo kaʼñún a̱ngui̱i̱n. Náa Biblia naʼthí dí índo̱ eʼwíinʼ nuni dí makiʼnáanʼ giʼmaanʼ rí ‹maʼngo̱o̱ a̱jkhiu̱lú má xúʼko̱ kuʼyamijná ga̱jma̱a̱ ngajua, gúʼni xó má eʼngo̱o̱ mu makuwáanʼ mbá nduʼ náa espíritu dí naʼni makuwán tsímáá› (Efe. 4:1-3). Á mu nuʼnimíjná “makuwáanʼ tsímáa” gajmiulú a̱ngiu̱lú xúʼko̱ xuʼyáá náa dí najngawiinʼ, ga̱jma̱a̱ guʼni tsiakimijna mbuʼñún  a̱ngiu̱lú xó má eʼñún Jeobá (1 Sam. 16:7; Sal. 130:3).

11. Ndíjkha dí maʼniulú gakhii maʼndulú kuʼñúún a̱ngiu̱lú nguáná rá.

¹¹ Maʼniulú gakhii maʼndulú kuʼñúún a̱ngiu̱lú á mu nduʼyáá náa najngawi̱i̱n. Rúʼko̱ dí niguaʼnii tikhun a̱ngiu̱lú nákhá siglo timbá. Mbá xkri̱da, mbáa dí ikhaa ninindxu̱u̱ Evodia ga̱jma̱a̱ Síntique, ikhiin na̱nguá má niʼñúún gakhii ‹muñejunʼ mbóo gajmiún Pablo índo̱ ikhaa niʼtaraʼa›. Mú rígá mbá dí niʼniún gakhii ikhaa nindxu̱u̱ dí mambajxu̱u̱n. Ikha jngó Pablo niʼthúún “gundxa’wamijná ikhaa má xóo Tátá” (Filip. 4:2, 3).

12. Ndiéjunʼ guʼni mu maʼndulú kuʼñúún a̱ngiu̱lú rá.

¹² Ndiéjunʼ guʼni mu maʼndulú kuʼñúún a̱ngiu̱lú rá. Índo̱ nuniʼniunlú májánʼ a̱ngiu̱lú tséʼniulú gakhii mikruʼulú kuʼñúún ga̱jma̱a̱ dí maʼndulú kuʼñúún. Ma̱ndoo mambajxulú gajmiúlú bi̱ itháan guanii o bi̱ itháan gíʼthaa ki xó ikháanʼ. Garmáʼáan a̱jkiu̱lú dí 30 tsiguʼ itháan nikhi̱i̱ Jonatán ki xóo David; maski má xúʼko̱ ikhaa nimbájxu̱u̱ májánʼ ga̱jma̱a̱. Lá ma̱ndoo mambajxulú gajmiúlú mbáa bi̱ itháan nikhi̱i̱ o bi̱ giʼthaá náa congregación ndrígúlú ráʼ. Á mu nuʼni xúʼko̱ nusngájma dí ‹nandulú kuʼñúún xúgíinʼ a̱ngiu̱lú› (1 Ped. 2:17).

13. Ndíjkha maʼni dí xáʼndulú kuʼñúún xúgíinʼ a̱ngiu̱lú náa congregación rá.

¹³ Rí maʼndulú kuʼñúún káaʼ nguáthi̱i̱n a̱ngiu̱lú, lá nandoo gaʼthúun rúʼko̱ dí xúgínʼ nandulú kuʼñúún náa congregación ráʼ. Na̱nguá, xándoo marigá rúʼko̱. Na̱nguá má nindxu̱u̱ raʼkhí dí maʼndulú kuʼñúún káaʼ nguáthi̱i̱n a̱ngiu̱lú. Jesús niʼthí rí xúgíinʼ apóstoles ndrígóo ni̱ndxu̱ún ‹bi̱ nambaxúu gajmíin›, mu mixtiʼkhu xóo nindoo kaʼyoo Juan (Juan 13:23; 15:15; 20:2). Maski má xúʼko̱ na̱nguá nisngájma dí nindoo kaʼyoo itháan. Mbáa xkri̱da, índo̱ Juan ga̱jma̱a̱ ndxájuu Santiago ninda̱ʼa̱a̱ dí maguaʼdáá mbá ñajunʼ kiejunʼ náa Reino ndrígóo Dios, Jesús niʼthúún: ‹Dí mutrigáanʼla náa ñawun mujunʼ o ñawun xti̱yu̱ʼ rakáʼyoʼ maxnala ikhúúnʼ› (Mar. 10:35-40). Á mu  nduʼyaridáá Jesús, ragíʼmaa musngájma dí nandulú kuʼñúún itháan bi̱ nambájxu̱u̱ gajmiúlú ki xóo eʼwíinʼ (Sant. 2:3, 4). Á mu nuʼni xúʼko̱, maʼni dí muʼni wajin a̱ngiu̱lú, mbá dí ragíʼmaa marigá náa congregación (Judas 17-19).

14. Xó má naʼthí náa Filipenses 2:3, ndiéjunʼ gambáyulú mu xúʼni mbrígumijná gajmiú a̱ngiu̱lú rá.

¹⁴ Índo̱ nusngájma dí nandulú kuʼñúún xúgíinʼ a̱ngiu̱lú xúʼko̱ na̱nguá esngájma dí ikháanʼ guáʼdáá itháan numulú ki xóo eʼwíinʼ. Garmáʼáan a̱jkiu̱lú dí Jonatán na̱nguá nikiʼnáa kaʼyoo David, ga̱jma̱a̱ na̱nguá niʼniminaʼ marígú kaʼyúuʼ ñajunʼ dí David kaʼyoo. Xúgiáanʼ ma̱ndoo mbuʼyaridáá xkridoo Jonatán. Xúʼyáá mbáa ndxájulú xó mbáa bi̱ nuʼnimíjna̱ gajmiúlú mu mbuʼyáá tsáa ejmañuu itháan, guʼni xó má niʼthí Pablo, “ganindxulú xa̱bu̱ guabaaʼ guyáa rí eʼwíinʼ itháan guaʼdáá numun ki xóo ikháanʼlá” (atraxnuu Filipenses 2:3). * Guʼyáá rí xúgíinʼ a̱ngiu̱lú bi̱ kúwá náa congregación rígá mbá dí najmañún. Á mu ni̱ndxu̱lú xa̱bu̱ guabaaʼ xúʼko̱ nduʼyáá náa dí májánʼ dí nuni a̱ngiu̱lú ga̱jma̱a̱ xúʼko̱ nambáyulúʼ xkri̱da ndrígún (1 Cor. 12:21- 25).

15. Ndiéjunʼ ejmañaaʼ dí nigíʼnuu Tania ga̱jma̱a̱ bi̱ kúwá náa goʼwóo rá.

¹⁵ Xúgiáanʼ naguaʼnii mbá gaʼkhu dí na̱nguá guáʼthi̱i̱n, mu Jeobá najmiuu a̱ngiu̱lú mu muni̱i̱ a̱jkiu̱lú ga̱jma̱a̱ mumbayulúʼ. Guʼyáá dí niguaʼnii mbá guʼwíin, nda̱wa̱á dí nikúwi̱i̱n náa mbá asamblea internacional rí ndiyá edxu̱u̱ “Ngajua nditháan xámbáa” dí nirígá mbiʼi sábado náa Estados Unidos nákha  tsiguʼ 2019. Índo̱ kúwá raguwán ga̱jma̱a̱ carriun náa hotel dí niguanún. Tania naʼthí bi̱ gíʼdiin ajtsíin e̱ji̱i̱n, “i̱mba̱ carro nixnúu carriuxu, gajkhun má nimbáa tagawun wéñuʼ, mu niguajtaxu náa carriuxu ga̱jma̱a̱ niguanuxu náa kamba̱a̱. Ikhú mbáa ndxájulú niʼthúxu matu̱ʼu̱xu̱ náa carriúu, ninindxu̱u̱ mbáa ndxájulú bi̱ nixtáa ma̱ngaa náa asamblea. Ma̱ngaa niguajunʼ imbá witsiin a̱ngiu̱lú bi̱ nikúwá náa asamblea bi̱ naguwáʼ náa Suecia a̱ngiu̱lú nidaraʼánxu xa̱ʼ ga̱jma̱a̱ dí rúʼko̱ dí phú ndiyuxu. Nitu̱u̱nxu dí májánʼ má gakuwanxu, mu na̱nguá niniñunxu, niguanúu ga̱jma̱a̱ nindxuxu asndu índo̱ ni̱ʼkha̱nú ambulancia, ga̱jma̱a̱ ndiyáá májánʼ dí nda̱a̱ dí gaʼyuxu. Ndiya̱a̱, xú káʼnii Jeobá nimbáyuxu ga̱jma̱a̱ nindoo kaʼyuxu, dí niguaʼnii rígi̱ niʼni dí maʼnduxu kuñún itháan a̱ngiu̱xu ga̱jma̱a̱ Jeobá”. Lá narmáʼáan a̱jkia̱a̱nʼ índo̱ nimbáyáa mbáa ndxájulú rá.

16. Ndíjkha rí gíʼdoo numuu dí musngájma dí nandulú kuʼyamijná rá.

¹⁶ Á mu nandulú kuʼñúún a̱ngiu̱lú, rúʼko̱ gaʼni rí muʼni̱i̱ a̱jkiu̱ún índo̱ ndañún ga̱jma̱a̱ maʼni dí makuwáanʼ mbá nduʼ náa awúu̱n xuajñún Jeobá. Ma̱ngaa gusngajmá dí ni̱ndxu̱lú xa̱bi̱i̱ Jesús, rúʼko̱ gaʼni dí eʼwíinʼ mangiin maʼndún mudxawíín itháan dí nuʼtáraʼa ga̱jma̱a̱ muxná gamajkhu “anu̱lú bi̱ nagáwiinʼ a̱jkiu̱u̱n” ga̱jma̱a̱ Jeobá bi̱ naʼni̱i̱ a̱jkiu̱lú (2 Cor. 1:3). ¡Ikha jngó xúgiáanʼ guʼnimíjna ga̱jma̱a̱ gusngajmá dí nandulú kuʼyamijná!