1. Xó má rey David, xú káʼnii graxe̱ nuni tikhun cristianos rá.

XÚGIÁÁNʼ nandulú makuwáánʼ tsímáá ga̱jma̱a̱ dí xaxmiéjunlú. Nimbáa tsíniguuʼ dí magiʼdoo xkujndu, mú ngíná nindxu̱u̱ dí xúgiáanlú nuraʼníí. Mbáa kúwá tikhun cristiano bi̱ nakumu̱ún xó má rey David, índo̱ niʼthúu̱n Jeobá: “Asndu nguáná gátumuu dí najmúʼ wéñuʼ, dí naxmiéjunʼ, dí a̱jkiu̱nʼ xtáa ngíná wéñuʼ mámbá mbiʼi rá.” (Sal. 13:2.)

2. Ndiéjunʼ guʼyáá náa artículo rígi̱ rá.

² Maski ajndu xándoo muʼni nditháan dí xaxmiéjunlú, mú rígá tikhu dí ma̱ndoo muʼni. Náa artículo rígi̱, mugíʼdi̱i̱ mbuʼyáá tikhu dí naʼni maxmiéjunlú. Nda̱wa̱á mbuʼyáá mbá majun consejo dí ma̱ndoo mambáyulúʼ mu xaxmiéjunlú wéñuʼ índo̱ nuraʼníí xkujndu.

3. Ndiéjunʼ rí naʼni maxmiéjunlú, lá maʼngo̱o̱ muʼni dí xárígá ráʼ.

³ Rígá mbaʼa rí naʼni maxmiéjunlú ga̱jma̱a̱ xándoo muʼni dí xárígá. Mbá xkri̱da, xándoo murikháá dí xátuxu̱u̱ numuu ganitsu, xtíin ga̱jma̱a̱ guʼwá náa kuwáánʼ mámbá tsiguʼ. Ma̱ngaa xándoo muʼni rí a̱ngiu̱lú bi̱ náa nuñajunʼ o náa nuʼnigajmaa rí muxutsudáan muʼni aʼkhá o di xkawiʼ. Ga̱jma̱a̱ xándoo muʼni gámbáa xúgíʼ dí raʼkhí dí narígá náa kuwáanʼlu. Xúgíʼ rígi̱ nakujmaa náa numbaaʼ, numuu rí mbaʼin xa̱bu̱ na̱nguá enimbánii ikha ndrígóo Biblia. Gixa̱a̱ bi̱ naʼtáñajunʼ náa numbaaʼ rígi̱, ndaʼyoo rí tikhun xa̱bu̱ xúni̱ ñajuunʼ Jeobá numuu rí ‹naxmiéjúnʼ ga̱jma̱a̱ numuu dí rígá náa  numbaaʼ rígi̱› (Mat. 13:22; 1 Juan 5:19). Ikha jngó náa numbaaʼ rí kuwáánʼ rígá wéñuʼ xkujndu dí naʼni maxmiéjúnʼ xa̱bu̱.

4. Xú káʼnii ekumulú índo̱ rígá mbaʼa rí naʼni maxmiéjunlú rá.

⁴ Índo̱ rígá mbaʼa dí naʼni maxmiéjunlú, asndu nakumulú dí nánguá maʼngulú itháan. Mbá xkri̱da, mbáa naxmiéjunlú dí na̱nguá eʼdaaʼ mba̱a̱ mbújkha̱a̱ mu muʼtsi rí ndayúlú, o maʼndoo káñulú rí asndu xándoo muñajunʼ o rí mandátigulú ñajunʼ. Ma̱ngaa mbáa naxmiéjunlú rí xáguajun jmbu náa Dios índo̱ nundriga̱ tsáʼkhá inulu. Ga̱jma̱a̱ mbáa naxmiéjunlú xóo gúʼni, índo̱ Gixa̱a̱ gaʼni rí xa̱bu̱ bi̱ gáxná ikhúún muni gínáa xuajñuu Dios. Mbáa nuraximíjnalu: “Lá raʼkhí dí maxmiéjunʼ ga̱jma̱a̱ numuu rígi̱ ráʼ.”

5. Ndiéjunʼ nindoo gáʼthí Jesús índo̱ niʼthí “guniʼñáá raxmiéʼjuanla” rá.

⁵ Jesús niʼthúún xa̱bi̱i̱: “Xáxmiéjuanla wéñuʼ” (Mat. 6:25). Lá nindoo gáʼthí rí nimbá chíʼgíʼ xáʼyóoʼ maxmiéjunlú rá. Na̱nguá. Tikhun xa̱bi̱i̱ Jeobá bi̱ niguájun jmbu nákha wajyúúʼ nixmiéjunʼ wéñuʼ, mú Jeobá nindoo kaʼñún má xúʼko̱ (1 Rey. 19:4; Sal. 6:3). * Jesús niʼthí ajngáa rígi̱, mu xaxmiéjunlú wéñuʼ índo̱ gúraʼníí xkujndu, mu xúʼko̱ muʼni májánʼ ñajuunʼ Dios. Mú, ndiéjunʼ gándoo muʼni índo̱ naxmiéjunlú wéñuʼ rá. (Atayáá kúgumaʼá “ Xóo gándoo matani”.)

6. Xó má naʼthí náa Filipenses 4:6, 7, ndiéjunʼ gambáyuluʼ mu xaxmiéjunlú wéñuʼ rá.

⁶ 1) Nángi eʼni gáratajkáanʼ. Maʼni a̱jkia̱a̱nʼ á mu naratakháñii Jeobá, índo̱ naraʼdáá xkujndu dí naʼni maxmiéjuanʼ (1 Ped. 5:7). Xúʼko̱ maraʼdáá “tsímáá rí na̱ʼkha̱ náa Dios, rí itháan gíʼdoo tsiakii” (atraxnuu Filipenses 4:6, 7). * Jeobá naxnúlú xi̱ʼ kaʼwu ndrígóo dí gíʼdoo wéñuʼ tsiakii mu xaxmiéjunlú wéñuʼ (Gál. 5:22).

7. Índo̱ guʼtájkáan, xú káʼnii gíʼmaa muʼni rá.

⁷ Índo̱ gáratakháñii Jeobá, aratháán xúgíʼ dí gíwanʼ náa a̱jkia̱a̱nʼ. Arathá mbájmbu, aratháán ndiéjunʼ xkujndu xtaʼdáá ga̱jma̱a̱ xóo eʼni makumaaʼ. Á mu rígá xóo mambanúu, aratháán maxnáa ku̱ma̱ mu ma̱ta̱ya̱a̱ xóo gátani ga̱jma̱a̱ atanda̱ʼa̱a̱ tsiakii mu mambáyaʼ matanimbánii. Á mu nda̱a̱ dí matani mu mambanúu, atanda̱ʼa̱a̱ Jeobá mambáyaʼ mu xaxmiéjuanʼ wéñuʼ. Á mu na̱nguá eriʼñaaʼ nacha̱, xákanajkhaa. Jeobá nandoo dí muʼthá mbájmbu ga̱jma̱a̱ rí muʼthán má xúʼko̱ (Luc. 11:8-10).

8. Ndiéjunʼ ma̱ngaa gíʼmaa muʼthá índo̱ nuʼtájkáan rá.

⁸ Índo̱ gáratha̱a̱n Jeobá xóo ku̱ma̱a̱, májánʼ gáʼni dí matatsaʼwamínáʼ náa xúgíʼ májánʼ dí xtaʼdáá mu maraxna̱a̱ núma̱aʼ maski ajndu xtaʼdáá xkujndu. Marigá mbiʼi dí mbáa maʼniaaʼ mingíjyúuʼ mataxkamaa ajngáa dí kaʼyoo marata xóo ku̱ma̱ʼ. Mú garmáʼáan a̱jkia̱a̱nʼ dí Jeobá ma̱ndoo mariʼña̱a̱ maski ajndu i̱ndó naratá: “¡Atambáyuʼ, mbá péñu!” (2 Crón. 18:31; Rom. 8:26).

9. Ndiéjunʼ gúʼni mu xámiñulu rá.

⁹ 2) Xákumaaʼ xtayami̱na̱ʼ ikháán, gakumaaʼ xtayáá Jeobá. Nákha siglo migiñuʼ, tsiguʼ ginii, xa̱bu̱ bi̱ nikúwá náa Judá nimíñúún wéñuʼ rí bi̱ asirio matu̱ʼu̱u̱n náa xuajñún  ga̱jma̱a̱ muni rí mani̱ndxu̱ún yumbáá, ikha jngó nithúún bi̱ kúwá náa Egipto mumbañún (Is. 30:1, 2). Mú, Jeobá niʼthúún má wapháá rí á mu nuni xúʼko̱ xagájnuu májánʼ (Is. 30:7, 12, 13). Jeobá nijmiuu Isaías mu maʼthúu̱n xuajñuu, ndiéjunʼ dí gíʼmaa muni mu xámiñún. Isaías niʼthí: “Maguaʼdáá tsiakii á mu naguáʼthi̱i̱n ga̱jma̱a̱ nakumalaʼ” kuya̱a̱ Jeobá (Is. 30:15b).

10. Arathá tikhu náa ma̱ndoo musngajmá rí nakumulú kuʼyáá Jeobá.

¹⁰ Guʼyáá tikhu náa ma̱ndoo musngajmá rí nakumulú kuʼyáá Jeobá. Atatsaʼwáminaʼ rí nuxnaraʼaʼ mbá ñajunʼ náa muni numaaʼ mitsídánʼ, mú marígú kaʼyaʼ wéñuʼ mbiʼi rí matani ñajuunʼ Dios. O mbáa bi̱ natiejunʼ ga̱jma̱a̱ nasngájma dí nandoo kaʼyaʼ mú na̱nguá nindxu̱u̱ xa̱bi̱i̱ Dios bi̱ nijngún má iyááʼ. O mbáa bi̱ xtaa gajmaaʼ bi̱ nandaaʼ xtayáá wéñuʼ naʼtháanʼ rígi̱: Á “matani dí nandoo ikhúún o dí nandoo Dios ndrígáaʼ”. Dí matraʼníí xkujndu xóo rígi̱ nindxu̱u̱ mingíjyúuʼ, mú náa mámbá xkujndu rígi̱ Jeobá naxnulu ikha dí ndayúlú (Mat. 6:33; 10:37). Mú, lá makumulúʼ kuʼyáá ikhaa ga̱jma̱a̱ muʼnimbánii ikha ndrígóo xáʼ.

11. Xkáʼnii xkri̱da ndrígóo Biblia ma̱ndoo muʼnigajmaa mu xaxmiéjunlú índo̱ nánguá muniñulú muʼni ñajuunʼ Dios rá.

¹¹ 3) Atayáá ndiéjunʼ eʼsngáaʼ xkri̱da dí nirígá nákha wajyúúʼ. Náa Biblia nuxkamaa mbaʼa xkri̱da rí májánʼ ga̱jma̱a̱ dí ra̱májánʼ náa nasngájma rí gíʼdoo numuu rí xaxmiéjunlú wéñuʼ ga̱jma̱a̱ makumulúʼ kuʼyáá Jeobá. Índo̱ gátanigajmaa xkri̱da rí májánʼ, atayáá ndiéjunʼ rí nimbañúún xa̱bi̱i̱ Dios mu xaxmiéjunʼ wéñuʼ índo̱ na̱nguá nindúún gúñún. Mbá xkri̱da índo̱ Tribunal rí itháan gíʼdoo numuu ndrígu̱ún judío niʼthúún apóstoles rí nánguá mutaraʼa itháan, ikhiin támiñún ga̱jma̱a̱ nithi: “Gíʼmaa munimbuxu ku̱ya̱a̱ Dios xóo Xa̱bu̱ Ñajunʼ raʼkháa náa xa̱bu̱” (Hech. 5:29). Támiñún, maski ajndu nijuixnún. Náa numuu rá. Numuu rí ndiyáá dí Jeobá xtáa ga̱jma̱a̱ ni̱ndxu̱ún ga̱jma̱a̱ rí ikhaa nandoo kaʼñún, ikha jngó ikhiin nitaraʼa má xúʼko̱ ajngáa rí májánʼ (Hech. 5:40-42). Xúʼko̱ má kayuuʼ niʼni Esteban ma̱ngaa índo̱ inu muxi̱ya̱a̱, ninindxu̱u̱ má xúʼko̱ mbá xa̱bu̱ wabaaʼ ga̱jma̱a̱ tákiʼnáa rí asndu nikujmaa náa ‹inuu rí nindoo gáyáa xóo mbáa ángel› (Hech. 6:12-15). Náá numuu rá. Numuu rí ndiʼyoo gajkhun dí Jeobá nindoo kaʼyoo.

12. Xó ma eʼthí 1 Pedro 3:14 ga̱jma̱a̱ 4:14, ndíjkha rí ma̱ndoo makuwáánʼ gagi índo̱ gúni gínálu xá.

¹² Apóstoles ndiyáá kaʼwu rí Jeobá nixtáa ga̱jma̱á ni̱ndxu̱ún numuu rí nixnúún tsiakii muni milagro (Hech. 5:12-16; 6:8). Maski ajndu rí mbiʼi xúgi̱ tséʼni milagro, mú náa Ajngá rawuunʼ Jeobá naʼthúlú rí ikhaa ma̱ndoo kaʼyulú ga̱jma̱a̱ maxnúlú xi̱ʼ ndrígóo a mu mumíniiʼlú ga̱jma̱a̱ numuu rí naguajún jmbu (atraxnuu 1 Pedro 3:14; * 4:14). * Ikha jngó xáʼyóoʼ mundxaʼwamíjna̱ wéñuʼ, ndiéjunʼ guʼni nda̱wa̱á índo̱ gúni gínáaʼlu, itháan májánʼ rí mbuʼyáá ndiéjunʼ gándoo guʼni xúgi̱ mu makumulúʼ kuʼyáá itháan Jeobá rí ikhaa má gambáyulú ga̱jma̱a̱ maʼni káwáanʼ. Xó má discípulos, gíʼmaa marmáʼáan a̱jkiu̱lú dí nikudaminaʼ Jesús: “Maxnála tikhu ajngáa ga̱jma̱a̱ mbá ku̱ma̱ rí maʼni rí xúgínʼ xa̱bu̱ sia̱nʼ xúthi dí raʼkhí ethala”. Ma̱ngaa nduʼyáá gajkhun rígi̱: “A mú naʼngala  makáwáanʼlá” (Luc. 21:12-19). Xámbumulú rí Jeobá narmáʼáan a̱jkiu̱u̱n asndu rí itháan chíʼgíʼ rí niʼni mbáa xa̱bi̱i̱ bi̱ nikháñun jmbu náa ikhaa ga̱jma̱a̱ rí maʼnigabi̱i̱ nda̱wa̱á.

13. Xú kaʼnii gándoo gambáyulú xkridún dí ra̱májánʼ bi̱ tákumu̱ún kuyáá Jeobá ga̱jma̱a̱ nixmiéjunʼ rá.

¹³ Ma̱ngaa ma̱ndoo mambáyulú xkri̱da dí ra̱májánʼ ndrígu̱ún bi̱ tákumu̱ún kuyáá Jeobá ga̱jma̱a̱ nixmiéjunʼ wéñuʼ. Xkri̱da ndrígu̱ún gambáyulú mú xúʼni xó má nini ikhiin. Mbá xkri̱da índo̱ nigíʼdu̱u̱ niʼtáñajunʼ rey Asá náa Judá, nikumu̱u̱ kaʼyoo Jeobá índo̱ nixmínaʼ gajmíi̱n mbaʼin wéñuʼ soldado ga̱jma̱a̱ ikhaa nimbáyúu maʼngo̱o̱ (2 Crón. 14:9-12). Mú, ndiéjunʼ niʼni nda̱wa̱á índo̱ ndiyóoʼ maxmínaʼ gajmíi̱n bi̱ mbá nguéjmi̱i̱n soldado ndrígóo rey Baasá bi̱ niʼtáñajunʼ náa Israel xá. Táʼni xó má niʼni nákha ginii dí maʼthúu̱n Jeobá mambáyúu, ikhaa niʼni numún sirios mu mumbayíí (2 Crón. 16:1-3). Ga̱jma̱a̱ táʼthúu̱n Jeobá rí mambáyúu índo̱ gítháanʼ makhañún ga̱jma̱a̱ numuu nandii rí ndiyóo (2 Crón. 16:12).

14. Ndiéjunʼ gándoo gajmañulú náa rí nikiéʼkúun Asá rá.

¹⁴ Nákha ginii Asá naʼthúu̱n Jeobá mu mambáyúu, índo̱ nagiʼdoo xkujndu. Mú nda̱wa̱á niniñuʼ raʼthúu̱n Jeobá mu mambáyúu ga̱jma̱a̱ niʼni xó má nindoo ikhaa. Asá nikumu̱u̱ rí ninindxu̱u̱ mbá májánʼ awan índo̱ niʼthún bi̱ sirios mumbayíí mu maxmínaʼ gajmíi̱n bi̱ kúwá Israel. Mú awan dí niriyaʼ na̱nguá nijmaa. Jeobá nijmiuu mbáa gaʼyee mu maʼthúu̱n: “Numuu rí nitambáyaminaʼ náa rey Siria ga̱jma̱a̱ tatambáyiminaʼ náa Jeobá Dios ndrígáʼ, ikha jngó soldado ndrígóo rey Siria nigañún náa ñawáanʼ” (2 Crón. 16:7). Xúʼko̱ má mangáanʼ xáʼyóoʼ makumulúʼ rí magajnúu xúgíʼ májánʼ á mu nuʼni xó má eyulú ikháanʼ, mbaʼyoo mbuʼyáʼ rí mambayúlú Jeobá náa Ajngá rawuunʼ. Mbáa marigá mbiʼi rí mbaʼyoo muraʼwíi mbá nacha̱ rí muʼni, maski ajndu xúʼko̱, á mu nakumulú kuʼyáá Jeobá magajnúu májánʼ rí muʼni.

15. Ndiéjunʼ gándoo muʼni índo̱ kuwáánʼ ruraxnuu Biblia rá.

¹⁵ 4) Gagida̱ʼ edxa̱a̱ʼ versículo ndrígóo Biblia. Índo̱ gátra̱xnuu Biblia náa naʼthí rí xaxmiéjuanʼ wéñuʼ ga̱jma̱a̱ rí gakumaaʼ xtayáá Jeobá rúʼko̱ gáxnáa tsiakii, atagíminaʼ magida̱ʼ edxa̱ʼ tikhu versículo dí gíʼdoo numuu. Mbáa mambáyaʼ matraxnuu xígu o mataniraʼmáʼ mu matangáanʼ matraxnuu mbu̱júu̱. Jeobá niʼthúu̱n Josué rí maguxnuu libro náa kiʼniraʼmáʼ Xtángoo ga̱jma̱a̱ mandxaʼwáminaʼ dí gaguxnuu mbiʼí mbruʼun mu xúʼko̱ maʼni xó má kaʼyoo. Numuu dí rúʼko̱ gambáyúu mu xámiñuu maxná ikhúún xa̱bi̱i̱ Dios (Jos. 1:8, 9). Náa Ajngá rawuunʼ Dios nuxkamaa mbaʼa rí mambáyulú mu xaxmiéjunlú índo̱ nuraʼníí mbá rí naʼni mamiñulúʼ o dí naʼni maxmiéjunlú (Sal. 27:1-3; Prov. 3:25, 26).

16. Xkáʼnii ejmuu náa nagimbáanʼ Jeobá mambáyulúʼ rí xáxmiéjunlú wéñuʼ ga̱jma̱a̱ rí makumulúʼ kuʼyáá ikhaa xá.

¹⁶ 5) Aratamíjná gajmiáanʼ a̱ngiu̱lú. Jeobá najmiuu mu xaxmiéjunlú wéñuʼ ga̱jma̱a̱ rí makumulúʼ kuʼyáá ikhaa. Náa nagimbáanʼ nambáyulúʼ dí najuiʼsngáá ikhí ga̱jma̱a̱ comentario dí nuxna a̱ngiu̱lú ma̱ngaa índo̱ nuʼtámíjná gajmiúlú (Heb. 10:24, 25). Ma̱ngaa mambáyulúʼ wéñuʼ rí muʼthán xóo ekumulúʼ mbáa bi̱ nambáxulúʼ gajmiúlú náa congregación. “Mbá ajngá rí májánʼ” dí naʼthí mbáa bi̱ nambáxulúʼ gajmiúlú mambáyulúʼ ga̱jma̱a̱ xaxmiéjunlú wéñuʼ (Prov. 12:25).

17. Xó má eʼthí Hebreos 6:19, ndiéjunʼ gambáyulú makuwáánʼ májánʼ maski ajndu nuraʼníí xkujndu rá.

 ¹⁷ 6) Atatsaʼwáminaʼ má xúʼko̱ dí kuaʼti̱i̱n nda̱wa̱á. Rí kuaʼti̱i̱n maʼni Reino nindxu̱u̱ “xóo mbá ancla náa ikháanlú”, rí naʼni makuwáánʼ májánʼ maski ajndu narígá xkujndu ga̱jma̱a̱ mbaʼa rí naʼni maxmiéjunlú (atraxnuu Hebreos 6:19). * Atatsaʼwáminaʼ náa nakudaminaʼ Jeobá rí nda̱wa̱á, xúgíʼ rí naʼni maxmiéjunlú manidxu̱u̱ dí ninújngoo (Is. 65:17). Atatsaʼwáminaʼ náa numbaaʼ nuxi̱ʼ, náa marigá rí tsímáá ga̱jma̱a̱ ni xárígá dí raʼkhí (Miq. 4:4). I̱mba̱ rí xóo ma̱ndoo matatsaʼwamínáʼ má xúʼko̱ rí marigá nda̱wa̱á nindxu̱u̱ dí muʼthúún eʼwíinʼ xa̱bu̱ ga̱jma̱a̱ numuu ikhaa. Ikha jngó atani xó má eʼngo̱o̱ náa naratáraʼa ga̱jma̱a̱ náa narasngúún xa̱bu̱. Á mu natani xúʼko̱ ma̱ndoo ‹maʼni káxi̱ a̱jkia̱a̱nʼ náa rí marigá nda̱wa̱á› (Heb. 6:11).

18. Ndiéjunʼ garigá nda̱wa̱á, mú ndiéjunʼ gambáyulú maʼngulú muraʼníí rá.

¹⁸ Índo̱ na̱jkha̱ rajngiyuu itháan mambáa dí raʼkhí náa numbaaʼ rígi̱, itháan guguaʼdáá xkujndu, itháan gaxmiéjunlú ga̱jma̱a̱ itháan gámíñúlú. Mú texto rí kaʼyoo tsiguʼ 2021 naʼni marmáʼáan a̱jkiu̱lú rí makumulúʼ kuʼyáá Jeobá, raʼkháa náa tsiakii ndrígúlú ikháanʼ gáʼni rí maʼngulú muraʼníí xkujndu ga̱jma̱a̱ rí xaxmiéjunlú wéñuʼ. Xúgíʼ tsiguʼ rígi̱, xúgiáanʼ gusngajmá ga̱jma̱a̱ rí nuʼni rí kuaʼdáá fe náa rí nikudaminaʼ Jeobá: “Maguaʼdáá tsiakii á mu naguaʼthi̱i̱n ga̱jma̱a̱ nakumalaʼ kuyoʼ” (Is. 30:15).