1. Ndiéjunʼ niʼni tsixígú náa goʼwóo José rá.

JACOB nindoo kaʼñúún xúgínʼ e̱ji̱i̱n, mú itháan nindoo kaʼyoo José bi̱ gíʼdoo 17 tsiguuʼ. Xú káʼnii nikumu̱ún eʼwíinʼ e̱ji̱i̱n xá. Nixígu̱u̱n kuyáá José ga̱jma̱a̱ nda̱wa̱á niguánu asndu niwiñunʼ kuyáá. Ikhaa nda̱a̱ rí niʼni mu muni̱i̱ xúʼko̱. Maski ajndu xúʼko̱, ikhiin nigujua̱a̱ xóo yumbáá ga̱jma̱a̱ nitháán anún rí mbáa xujkhú xáná niʼkhu̱u̱ a̱ʼdióo bi̱ nandoo kaʼyoo wéñuʼ. Rí tsixígú niʼni rí xákuwíin tsímáá náa mbá guʼwíin ga̱jma̱a̱ nini rí majmáa a̱jkiu̱u̱n anún (Gén. 37:3, 4, 27-34).

2. Xó má naʼthí náa Gálatas 5:19-21, náá numuu rí nindxu̱u̱ mbiiʼ wéñuʼ tsixígú rá.

² Náa Escritura naʼthí rí tsixígú * nindxu̱u̱ mbiiʼ wéñuʼ “rí naʼni xuwiʼ”, rí ma̱ndoo marikhoo mbáa xa̱bu̱ mu xáta̱ʼa̱a̱ náa Reino ndrígóo Dios (atraxnuu Gálatas 5:19-21). * Rí phú narígá, ku̱ma̱ rígi̱ nindxu̱u̱ mbiiʼ wéñuʼ numuu rí ikhí naku̱mu̱u̱ sia̱nʼ, rí magiʼdulú ga̱jma̱a̱ rí makiʼnáánʼ wéñuʼ.

3. Ndiéjunʼ gúʼyáá náa artículo rígi̱ rá.

³ Rí nini a̱ngui̱i̱n José nasngájma rí naʼni gachúu tsixígú rí xóo nambájxu̱u̱n ga̱jma̱a̱ rí xákuwi̱i̱n tsímáá náa mbá guʼwíin. Maski má ikháanʼ xúʼni xóo nini a̱ngui̱i̱n José, mú xámbumulú  rí xúgiáanʼ ni̱ndxu̱lú xa̱bu̱ aʼkhá ga̱jma̱a̱ rí a̱jkiu̱lú ma̱ndoo maʼni nduwánʼ (Jer. 17:9). Ikha jngó rí nguáná naxígulú. Guʼyáá tikhu ikha rí na̱ʼkha̱ náa Biblia rí mambáyulú mu maʼthúlú ga̱jma̱a̱ mbuʼyáá náá numuu rí tsixígú ma̱ndoo mbaja̱a̱ náa a̱jkiu̱lú. Nda̱wa̱á mbuʼyáá xú káʼnii gúʼnimíjna̱ ga̱jma̱a̱ tsixígú ma̱ngaa rí muʼni marígá rí tsímáá.

4. Náá numuu rí nixígúun kuyáá Isaac filisteos rá.

⁴ Ga̱jma̱a̱ numuu rí gíʼdoo mbáa. Isaac ninindxu̱u̱ mbáa xa̱bu̱ bi̱ nigiʼdoo wéñuʼ ga̱jma̱a̱ numuu rúʼko̱ filisteos nixígu̱u̱n kuyáá (Gén. 26:12-14). Rí asndu niguánu nixpa̱ʼa̱a̱n ku̱ba̱ʼ náa pozo rí naʼwa̱a̱n iyaʼ xujkiúu (Gén. 26:15, 16, 27). Tikhun xa̱bu̱ rí mbiʼi xúgi̱ ni̱ndxu̱ún xóo filisteos ga̱jma̱a̱ naxígu̱u̱n kuñún bi̱ guáʼdáá itháan ki xóo ikhiin. Raʼkháa i̱ndó nandún muguaʼdáá rí guáʼdáá eʼwíinʼ,manga̱a̱ nandún rí xáguaʼdáá mbá kayuuʼ.

5. Náá numuu rí nixígúun kuyáá Jesús xa̱bu̱ ede bi̱ nikúwá náa guʼwá dxájkuun rá.

⁵ Ga̱jma̱a̱ numuu rí eʼwíinʼ nandún kuyáá mbáa. Bi̱ kuya̱ edxuu náa guʼwá dxájkuun judíos nixígúun kuyáá Jesús numuu rí xa̱bu̱ nindúún kuyáá (Mat. 7:28, 29). Jesús nindxu̱u̱ bi̱ niʼthí ga̱jma̱a̱ numuu Dios ma̱ngaa niʼsngáa rí gajkhun. Maski má xúʼko̱, bi̱ kuya̱ edxu̱u̱ náa i̱ʼwáʼ religión nithi dí raʼkhí ga̱jma̱a̱ numuu ma̱ngaa nini gachíí mbiʼyuu (Mar. 15:10; Juan 11:47, 48; 12:12, 13, 19). Ndiéjunʼ eʼsngúlú rígi̱ rá. Rí ndayóoʼ muʼnimíjna mu xaxígulú kuʼñún bi̱ nandún kuñún ga̱jma̱a̱ numuu rí ni̱ndxu̱ún mijíin xa̱bu̱. Rí phú gíʼmaa mu’ni, guʼyaridúún (1 Cor. 11:1; 3 Juan 11).

6. Xú káʼnii nisngájma Diótrefes rí ninindxu̱u̱ mbáa bi̱ nixígúu rá.

⁶ Ga̱jma̱a̱ numuu ñajunʼ rí gíʼdoo mbáa náa congregación. Nákha siglo timbá, Diótrefes nixígúu kaʼñún bi̱ niyégun edxuu náa congregación cristiana. Nindoo “‹mani̱ndxu̱u̱ bi̱ phú ikhaa›” náa xúgínʼ a̱ngui̱i̱n, ikha jngó, niʼthí dí raʼkhí ga̱jma̱a̱ numuu apóstol Juan ga̱jma̱a̱ eʼwíinʼ bi̱ nuyégún edxuu (3 Juan 9, 10). Maski má xúʼguanú manindxu̱lúʼ xóo má ikhaa, mú ma̱ndoo maxígulú kuʼyáá mbáa ndxájulú bi̱ nikhánáá mbá ñajunʼ rí ikháanʼ nindulu, itháan á mu nakumuluʼ rí majmáanʼ muʼnilú itháan májánʼ ki xóo ikhaa.

7. Ndiéjunʼ rí ma̱ndoo maʼni tsixígú náa ikháanʼlu rá.

⁷ Rí tsixígú nindxu̱u̱ xóo mbá planta rí mbiiʼ wéñuʼ: Índo̱ naku̱mu̱u̱ rígi̱ náa a̱jkiu̱lú, naʼni gakhi̱i̱ mu muriʼyáaʼ. Naʼni marigá rígi̱ índo̱ nakumuluʼ dí raʼkhí, xóo rí maxiʼyulú, xóo rí mu̱ʼni̱ mbaʼumíjna̱ ga̱jma̱a̱ maxmiéjunlú kuʼyamijná i̱ndó ikháanʼ. Tsixígú ma̱ndoo maʼni rí xáguaʼdáá cualidad rí májánʼ xóo, ngajua, rí magáwíinʼ a̱jkiu̱lú ga̱jma̱a̱ rí manindxu̱lúʼ mbáa xa̱bu̱ májáanʼ. Ndayóoʼ muriʼyáaʼ mbá nacha̱ náa a̱jkiu̱lú índo̱ naku̱mu̱u̱ tsixígú. Xú káʼnii gándoo gúʼni gajmiúlú rá.

8. Ndiéjunʼ gándoo mambáyulúʼ mu maʼngo̱o̱ mu̱ʼni̱ gajmiúlú tsixígú rá.

⁸ Maʼngo̱o̱ mu̱ʼni̱ gajmiúlú tsixígú á mu ni̱ndxu̱lú mbáa xa̱bu̱ guabaaʼ ma̱ngaa á mu nadxulú ga̱jma̱a̱ rí kuaʼdáá. Xúʼko̱ gáʼni rí xuniʼñaa magiwa̱nʼ tsixígú náa a̱jkiu̱lú. Á mu ni̱ndxu̱lú xa̱bu̱ guabaaʼ, xákumulú rí kuaʼdáá itháan numulúʼ ikháanʼ ga̱jma̱a̱ xundxaʼwamíjna̱ rí kaʼyulú itháan gamajkhu ki xóo eʼwíinʼ (Gál. 6:3, 4). Bi̱ nadxuu ga̱jma̱a̱ numuu rí gíʼdoo naxtáa gagi ma̱ngaa tséʼni mbrigumína̱ gajmíi̱n eʼwíinʼ (1 Tim. 6:7, 8). Bi̱ nindxu̱u̱ xa̱bu̱ guabaaʼ nadxuu índo̱ i̱mba̱ xa̱bu̱ nakhánáá mbá rí májánʼ.

9. Xó má naʼthí náa Gálatas 5:16 ga̱jma̱a̱ Filipenses 2: 3, 4, ndiéjunʼ gambáyulú mu̱ʼni̱ xi̱ʼ kaʼwu rá.

⁹ Ndayúlú xi̱ʼ kaʼwu ndrígóo Jeobá mu xája̱a̱  ku̱ma̱ náa a̱jkiu̱lú rí maʼni gacháánʼ, gíʼmaa rí manindxu̱lúʼ xa̱bu̱ guabaaʼ ma̱ngaa gaʼdxúlú ga̱jma̱a̱ rí kuaʼdáá (atraxnuu Gálatas 5:16; * Filipenses 2:3, 4). * Xi̱ʼ kaʼwu ndrígóo Dios nambáyulúʼ mbuʼyáá xóo e̱ndxa̱ʼwa̱míjna̱ itháan mi̱jnu̱ʼ ga̱jma̱a̱ náá numuu. Dios má gambáyulú muriʼkuriyaaʼ rí nundxaʼwamíjná ga̱jma̱a̱ rí nakumulúʼ dí raʼkhí ga̱jma̱a̱ mbá ku̱ma̱ rí mambáyulúʼ (Sal. 26:2; 51:10). Guʼyáá xkri̱da ndrígóo Moisés ga̱jma̱a̱ Pablo bi̱ niʼngu̱u̱n ninimíjna̱ ga̱jma̱a̱ rí tsixígú.

10. Xú káʼnii tsáʼkhá niraʼnuu Moisés rá. (Atayáá xtiʼkhuu rí na̱ʼkha̱ náa timbá ináa.)

¹⁰ Moisés nigiʼdoo mbá ñajunʼ mba̱a̱ náa xuajñuu Dios, mú na̱nguá nikumu̱u̱ rí mbáwíi kaʼyoo magruigú ñajunʼ rúʼko̱. Mbá miʼtsú Jeobá nirígúu mbá chiʼgíi̱ xi̱ʼ kaʼwu ndrígóo náa ikhaa ga̱jma̱a̱ nixnúún bi̱ mbá nguéjmi̱i̱n xabuanii israelitas bi̱ niwíin náa guʼwá xtíin. Nguáthá mbiʼi nda̱wa̱á, niʼdxawun rí tikhun xabuanii bi̱ na̱nguá nigún náa guʼwá xtíin, rí mangiin nindrigú xi̱ʼ kaʼwu ga̱jma̱a̱ nigi̱ʼdi̱i̱ nini xóo gaʼyee. Xú káʼnii nikumu̱u̱ índo̱ Josué niʼthúu̱n rí marikhún xá. Na̱nguá nixígúu kaʼñún xa̱bu̱ buʼko̱ numuu rí Jeobá niraʼwíin, nidxu̱u̱ wéñuʼ rí nindrigú xi̱ʼ kaʼwu mu mutariyaʼ (Núm. 11:24-29). Ndiéjunʼ ejmañulú náa xkridoo Moisés rá.

11. Xú káʼnii gándoo gúyaridáá Moisés bi̱ nuyégúnʼ edxu̱u̱ rá.

¹¹ Gundxaʼwamíjna̱ rí mbáa bi̱ kayá edxu̱u̱ naniguuʼ wéñuʼ ñajunʼ rí gíʼdoo náa congregación, xóo rí manújngoo maxná Bi̱ Nayejngoo náa reunión. Ikhú nundaʼa̱a̱ rí maʼnirathaa imba̱a̱ ndxájulú mu manújngoo maxná náa rí kayóo ikhaa. Á mu nindxu̱u̱ xa̱bu̱ guabaaʼ xó má Moisés, xáku̱mu̱u̱ dí raʼkhí nindxu̱u̱. Rí phú maʼni maʼdxu̱u̱ wéñuʼ.

12. Xú káʼnii esngajma mbaʼin xa̱bi̱i̱ Dios rí ni̱ndxu̱ún xa̱bu̱ guabiinʼ ma̱ngaa rí nakúwi̱i̱n gagi ga̱jma̱a̱ rí guáʼdáá rá.

¹² Guʼyáá i̱mba̱ xkri̱da rí naguaʼnii a̱ngiu̱lú bi̱ guanii. Mba̱yu̱u̱ʼ tsiguʼ, ninindxu̱ún bi̱ kuyá edxu̱u̱ náa nagimbáanʼ bi̱ naríyaʼ awan náa eʼwíinʼ bi̱ kuya̱ edxu̱u̱. Mú índo̱ naʼni 80 tsiguúnʼ nuniñaaʼ ga̱jma̱a̱ gagi ñajunʼ rí nini. A̱ngiu̱lú circuito bi̱ naguánu naʼni 70 tsigúúnʼ nusngajma rí ni̱ndxu̱ún xa̱bu̱ guabiinʼ índo̱ nuniñaaʼ ñajunʼ rígi̱ ga̱jma̱a̱ nundrigú i̱ʼwáʼ ñajunʼ rí i̱mba̱ núthu kayuuʼ. Ga̱jma̱a̱ iwáá tsiguʼ rí ninújngoo, mbaʼin betelitas bi̱ kúwá náa xúgíʼ numbaaʼ nakhanún imba̱ ñajunʼ, mú raʼkháa náa Betel. A̱ngiu̱lú xabe̱kha ga̱jma̱a̱ gu̱ʼu̱ bi̱ guájun jmbu na̱nguá xígúun kuñún a̱ngiu̱lú bi̱ guaʼdáá ñajunʼ rí ikhiin niguaʼdáá nákha ginii.

13. Náá numuu rí ma̱ndoo maxiʼgúu Pablo kaʼñún bi̱ mbá 12 apóstoles rá.

¹³ Apóstol Pablo nindxu̱u̱ i̱mba̱ xkri̱da rí májánʼ, ninindxu̱u̱ mbáa xa̱bu̱ guabaaʼ ma̱ngaa nixtáa gagi ga̱jma̱a̱ rí nigiʼdoo. Na̱nguá niniñúuʼ rí tsixígú magiwa̱nʼ náa a̱jkiu̱u̱n. Niʼni tsiakiminaʼ wéñuʼ náa niʼtáráʼa, mú nisngájma rí ninindxu̱u̱ xa̱bu̱ guabaaʼ índo̱ niʼthí: “Ni̱ndxu̱ʼ bi̱ itháan chíʼgíʼ náa apóstol, ga̱jma̱a̱ rakáʼyoʼ magumbiʼyuuʼ apóstol” (1 Cor. 15:9, 10). Bi̱ mbá 12 apóstol nikúwi̱i̱n gajmiún Jesús náa niʼtáráʼa náa tsu̱du̱u̱ Ku̱ba̱ʼ, xó má Pablo ninindxu̱u̱ cristianos nda̱wa̱á rí nikañúu ga̱jma̱a̱ nigabii Jesús. Maski má nda̱wa̱á nigumbiʼyuu ‹apóstol ndrígu̱ún xa̱bu̱›, mú na̱nguá ninindxu̱u̱ mbáa bi̱ mbá 12 apóstol (Rom. 11:13; Hech.1:21-26). Maski ajndu xúʼko̱, nidxu̱u̱ ga̱jma̱a̱ numuu rí nigiʼdoo ma̱ngaa na̱nguá nixígúu kaʼñún bi̱ mbá 12 xa̱bekha bi̱ nimbájxúun májánʼ gajmiún Jesús.

14. Ndiéjunʼ gúʼni á mu ni̱ndxu̱lú xa̱bu̱ guabaaʼ ma̱ngaa nadxulú ga̱jma̱a̱ rí kuaʼdáá rá.

¹⁴ Á mu ni̱ndxu̱lú xa̱bu̱ guabaaʼ ga̱jma̱a̱  nadxu̱lú ga̱jma̱a̱ rí kuaʼdáá, manindxúlú xóo Pablo ga̱jma̱a̱ mbuʼyamajkuíí ñajunʼ rí Jeobá nixnúún eʼwíinʼ a̱ngiu̱lú (Hech. 21:20-26). Ikhaa nigruigi̱i̱n bi̱ kuya̱ edxu̱u̱ mu muxna ikha náa Guʼwá Nagimbáanʼ. Maski má ni̱ndxu̱ún xa̱bu̱ aʼkhá, Jeobá ndaʼñún rí ni̱ndxu̱ún xóo “regalo” (Efes. 4:8, 11). Índo̱ nduʼyamajkhún ga̱jma̱a̱ nuʼnimbáníí ikha rí nuxna, ni̱ndxu̱lú mbáa bi̱ nambájxúu ga̱jma̱a̱ Jeobá ma̱ngaa kuwáánʼ tsímáá gajmiú a̱ngiu̱lú.

15. Ndiéjunʼ gáʼyooʼ mu̱ʼni̱ ga̱jma̱a̱ tsixígú rá.

¹⁵ Rí tsímáá xándoo marigá náa rígá tsixígú. Ndayóoʼ rí muriʼyáaʼ mbá kayuuʼ rí naʼni gachúu a̱jkiu̱lú ga̱jma̱a̱ xúʼni dí rígi̱ marigá náa eʼwíinʼ. Ndayóo rí mu̱ʼni̱ a̱jma̱ enii rígi̱ dí gíʼdoo wéñuʼ numuu mu xúʼko̱ muʼnimbulúʼ kiʼtáñajuunʼ ri nixná Jeobá “guʼgua̱ kidxuuʼ rí naʼni marigá tsímáá ga̱jma̱a̱ guxnamíjnálu má xúʼko̱ tsiakii” (Rom. 14:19). Ndiéjunʼ gándoo mu̱ʼni̱ mu mumbáñún eʼwíinʼ muni gajmiún tsixígú ga̱jma̱a̱ xú káʼnii gándoo mu̱ʼni̱ mu marigá rí tsímáá rá.

16. Xú káʼnii gándoo gúmbaʼñún eʼwíinʼ mu muni gajmiún tsixígú rá.

¹⁶ Rí xóo nindxu̱lú ga̱jma̱a̱ rí nu̱ʼni̱ rúʼko̱ rí nduyáá eʼwíinʼ. Numbaaʼ rígi̱ nandoo rí “mu̱ʼni̱ mbaʼumíjna̱ ga̱jma̱a̱ rí kuaʼdáá” (1 Juan 2:16). Mú rígi̱ naʼni marigá tsixígú. Xú káʼnii gándoo mu̱ʼni̱ rí eʼwíin xaxígúun rá. Xúʼtá kikháá ga̱jma̱a̱ numuu rí kuaʼdáá o rí nandulú mu̱ʼtsi̱. I̱mba̱, ganindxu̱lú xa̱bu̱ guabaaʼ ma̱ngaa xúʼni mbaʼumíjna̱ ga̱jma̱a̱ numuu ñajunʼ rí kuaʼdáá náa congregación. Rí muʼthá kikháá ga̱jma̱a̱  numuu rígi̱ maʼni rí eʼwíinʼ maxkajxíin rí maxíʼgúun. Mú mixtiʼkhu nindxu̱u̱ rí maxmiéjunlú kuʼñúún eʼwíinʼ ga̱jma̱a̱ nduʼyáá rí májánʼ rí nuni, numbáñún rí makuwíin májánʼ ga̱jma̱a̱ nu̱ʼni̱ marigá rí tsímáá ma̱ngaa rí makuwíin mbá jnduʼ náa congregación.

17. Ndiéjunʼ rí niʼngu̱u̱n nini a̱ngui̱i̱n José ga̱jma̱a̱ náá numuu rá.

¹⁷ Maʼngulú mu̱ʼni̱ gajmiúlú tsixígú. Guʼtá mbu̱júu̱ʼ ga̱jma̱a̱ numún a̱ngui̱i̱n José. Mba̱yu̱u̱ʼ tsiguʼ nda̱wa̱á rí nigujua̱a̱ a̱ngui̱i̱n, nixkama̱a̱ náa Egipto. Mú José táʼthún núkhú tsáá nindxu̱u̱, rí phú niʼni, nigruiga̱ tsáʼkhá náa inún mu mbaʼyoo á mu niriʼkumijnáá. Niʼni mújúunʼ ganitsu mu mu̱phu̱ mbá xúgínʼ ikhiin, mú niʼthí rí giʼtio̱o̱ Benjamín muxnáa itháan mba̱a̱ ki xóo eʼwíinʼ a̱ngui̱i̱n (Gén. 43:33, 34). Mú nikujmaa rí angui̱i̱n nánguá nixígúún. Rí phú nini, nixmiéjúúnʼ kuyáá Benjamín ma̱ngaa Jacob bi̱ nindxu̱u̱ anún (Gén. 44:30-34). Angui̱i̱n José niʼngu̱u̱n nini gajmiún tsixígú, ikha jngó niʼngu̱u̱n nini rí matangi̱ín makuwá tsímáá náa mbá guʼwíin (Gén. 45:4, 15). Xúʼko̱ má kayuuʼ, á mu nuriʼya̱a̱ʼ mbájkhu tsixígú, mu̱ʼni̱ rí marigá tsímáá náa guʼwúlú ga̱jma̱a̱ náa congregación.

18. Xó má naʼthí náa Santiago 3:17, 18, ndiéjunʼ gárígá á mu nu̱ʼni̱ marigá rí tsímáá rá.

¹⁸ Jeobá nandoo rí muʼnimíjna̱ gajmiúlú tsixígú ma̱ngaa rí muʼni marigá dí tsímáá. Mu maʼngo̱o̱ mu̱ʼni̱ rígi̱, ndayóoʼ wéñuʼ tsiakii, xó má ndiʼyáá náa artículo rígi̱, rí maxiʼguáá na̱nguá nindxu̱u̱ mingíjyúuʼ (Sant. 4:5). Ma̱ngaa numuu rí kuwáánʼ náa numbaaʼ dí rígá ku̱ma̱ xkawíʼ rígi̱. Mú á mu ni̱ndxu̱lú mbáa xa̱bu̱ guabaaʼ ga̱jma̱a̱ rí muxnáa númaaʼ, ma̱ngaa rí makuwáánʼ gagi ga̱jma̱a̱ rí kuaʼdáá xúʼko̱ xúniʼñáanʼ rí mbaja̱a̱ tsixígú náa ikháanʼ. Rí phú gíʼmaa mu̱ʼni̱ dí marigá rí tsímáá náa ikháanʼ ga̱jma̱a̱ ganindxu̱lú mbáa májáanʼ xa̱bu̱ xóo má ndiʼyáá náa artículo rígi̱ (atraxnuu Santiago 3:17, 18). *