1. Ndiéjunʼ gándoo maʼni rí maxmiéjunlú ga̱jma̱a̱ ndiéjunʼ gándoo maʼniulú rígi̱ rá.

LÁ NIXMIÉJUNLÚ wéñuʼ mbá miʼtsú ráʼ. * Mbáa ga̱jma̱a̱ numuu rí mbáa niʼthí o niʼni rí magawúnlú. O mbáa rí naʼni majmuluʼ nindxu̱u̱ ga̱jma̱a̱ numuu rí ikháanʼlu niʼthá o ni̱ʼni̱. Mbáa nixuʼdamijná mbá aʼkhá ga̱jma̱a̱ naxmiéjunlú rí Jeobá nditháan xáʼni mba̱a̱ a̱jkiu̱u̱n kaʼyulúʼ. Mbáa ma̱ngaa nundxaʼwamíjna̱ rí nakumulú xúʼko̱ nindxu̱u̱ numuu rí na̱nguá kuaʼdáálú fe ga̱jma̱a̱ rí na̱nguá ni̱ndxu̱lú xa̱bu̱ májáanʼ. Mú lá gajkhun rúʼko̱ ráʼ.

2. Xkáʼnii xkri̱da rí na̱ʼkha̱ náa Biblia nasngájma rí maxmiéjuanʼ na̱nguá eyoo gáʼthi rí nda̱yáaʼ fe rá.

² Guʼyáá tikhuu xkri̱da rí na̱ʼkha̱ náa Biblia. Ana, bi ninindxu̱u̱ ru̱dúu̱ gaʼyee Samuel, nigiʼdoo wéñuʼ fe. Maski ajndu xúʼko̱, nixtáa gíná wéñuʼ numuu rí mbáa bi̱ xtáa náa guʼwóo niʼni gínáa (1 Sam. 1:7). Ma̱ngaa apóstol Pablo nigiʼdoo mbá fe gújkhúʼ, mú ‹rí nixmiéjunʼ ga̱jma̱a̱ numuu congregación› niʼni rí maʼni néʼngo̱o̱ (2 Cor. 11:28). Rey David nigiʼdoo mbá fe gújkhúʼ rí asndu Jeobá niʼthí rí nandoo kaʼyoo (Hech. 13:22). Maski ajndu xúʼko̱ ikhaa nikudaminaʼ aʼkhá rí niʼni mamínuuʼ (Sal. 38:4). Xúgínʼ ikhiin Jeobá niʼni rí maʼni̱i̱ a̱jkiu̱ún ga̱jma̱a̱  niʼni rí makuwíin májánʼ. Guʼyáá dí gájmañulú náa xkridúún.

3. Náá numuu rí naʼni maxmiéjunlú dí nuthi eʼwíinʼ xa̱bu̱ rá.

³ Ma̱ndoo maʼni maxmiéjunlú índo̱ mbáa naʼtulúʼ o naʼniulú dí raʼkhí, itháan á mu nindxu̱u̱ mbáa bi̱ nambáxulúʼ gajmiúlú o mbáa bi̱ kuʼyáá. Mbáa naxmiéjunlú ga̱jma̱a̱ numuu rí ní xambáxulú gajmiúlú. Nguáná mbáa maʼtulúʼ rí asndu tséndxaʼwo edxu̱u̱ ga̱jma̱a̱ makumulú rí asndu xóo “narujtáanʼ chídí rí a̱jma̱ inuu” (Prov. 12:18). Mú nguáná mbáa naʼtulúʼ kiejunʼ mu maʼni gawunlú. Rúʼko̱ nigíʼnuu mbáa ndxájulú dxáʼgú. Ikhaa naʼthí: “Naʼni nguáthá tsiguʼ, mbáa bi̱ ikhúúnʼ ndi̱yo̱o̱ rí nambáxuʼ májánʼ ga̱jmu̱ʼ niʼthí dí raʼkhí ga̱jma̱a̱ numuʼ náa Internet. Nigawúnʼ ga̱jma̱a̱ nixtáá ngíná. Na̱nguá nikro̱ʼo̱ʼ náá numuu rí asndu xóo nikudaaʼ mbá chílú náa tsu̱du̱ʼ”. Á mu mbáa bi̱ nambáxulúʼ gajmiúlú o mbáa bi̱ kuʼyáá niʼniulúʼ mbá dí raʼkhí ma̱ndoo majmañulúʼ mbaʼa wéñuʼ dí nigíʼnuu Ana.

4. Ndiéjunʼ xkujndu ndiyóoʼ maʼngo̱o̱ Ana rá.

⁴ Ana ndiyóoʼ maraʼnuu xkujndu gakhi̱i̱. Mba̱yu̱u̱ʼ tsiguʼ tándoo gágiʼdiin e̱ji̱n (1 Sam. 1:2). Israelitas nduyáá ra̱májánʼ kayuuʼ á mu mbáa a̱ʼgu̱ na̱nguá gi̱ʼdiin e̱ji̱n. Ikha jngó Ana nikumu̱u̱ rí nda̱a̱ numuu (Gén. 30:1, 2). Rí niʼni majmúu itháan, nindxu̱u̱ rí ajmbio̱o̱ gíʼdaa imba̱a̱ a̱ʼgu̱ bi̱ mbiʼyuu Peniná, mú ikhaa gíʼdiin e̱ji̱n. Peniná ndiʼyoo Ana xóo mbáa bi̱ sia̱nʼ ga̱jma̱a̱ ‹ma̱ngaa natsijmaa má xúʼko̱ mu majmúu› (1 Sam. 1:6). Nákha ginii Ana nigawuunʼ wéñuʼ ga̱jma̱a̱ numuu rígi̱. Nigawuunʼ wéñuʼ rí asndu ‹nambiyaʼ má xúʼko̱ ga̱jma̱a̱ tsékuiʼtsu›. Ma̱ngaa nixtáa ‹gíná wéñuʼ› (1 Sam. 1:7, 10). Xú káʼnii niʼni̱i̱ a̱jkiu̱u̱n Ana rá.

5. Xú káʼnii nimbáyúu Ana rí niʼtájkháan rá.

⁵ Ana niʼthúu̱n Jeobá ga̱jma̱a̱ xúgíʼ a̱jkiu̱u̱n. Nda̱wa̱á rí niʼtájkáan niʼthúu̱n Elí bi̱ kayá edxu̱u̱ náa ndxajkun rí xtáa ragíʼnuu. Ikha niʼthúu̱n “ayu̱u̱ʼ tsímáá, ga̱jma̱a̱ Dios ndrígóo Israel gáxnáaʼ rí nitanda̱ʼa̱a̱”. Ndiéjunʼ nirígá rá. Ana ‹ni̱jkha̱a̱ ga̱jma̱a̱ nikuiʼtsu, mangaa nánguá nixmiéjuunʼ› (1 Sam. 1:17, 18). Rí niʼtájkáan nimbáyúu mu maʼni̱i̱ a̱jkiu̱u̱n.

6. Ndiéjunʼ eʼsngúlú xkridoo Ana rí xóo niʼtájkháan ga̱jma̱a̱ ajngáa rí na̱ʼkha̱ náa Filipenses 4:6, 7 rá.

⁶ Ma̱ndoo makuwáanʼ tsímáá nuʼtájkáan ma xúʼko̱. Ana mba̱yu̱u̱ʼ níʼtamijnaʼ ga̱jma̱a̱ Anu̱u̱  bi̱ xtáa mekhuíí (1 Sam. 1:12). Ikháanʼ mangáánʼ ma̱ndoo muʼthán mba̱yu̱u̱ʼ rí naʼni maxmiéjunlú, ga̱jma̱a̱ rí naʼni mamiñulúʼ ma̱ngaa rí nijngawa̱ánʼ. Rí muʼtájkáan tséyóoʼ má muʼthá ajngáa rí mitsaanʼ wéñuʼ ga̱jma̱a̱ ni xáʼyóoʼ má mani̱ndxu̱u̱ kiejunʼ. Mbáa asndu mumbiyaʼ índo̱ gúʼtháán Jeobá rí naʼni maxmiéjunlú. Mú Jeobá xáʼni néʼngo̱o̱ rí maʼdxawunlú. Ma̱ngaa rí nuʼtháán rí naʼni maxmiéjunlú, ndayóo marmáʼáan a̱jkiu̱lú xtágabu rí na̱ʼkha̱ náa Filipenses 4:6, 7 (atraxnuu). * Ikhí Pablo niʼthí rí ndayóoʼ muxnáa núma̱a̱ Dios índo̱ nuʼtajkháan. Kuaʼdáá mbaʼa numuu rí muxnáa núma̱aʼ, mbá rí ikhaa nindxu̱u̱ numuu rí niʼni dí makuwáánʼ, rí niʼniwíi, rí nandoo kaʼyulú ga̱jma̱a̱ ra̱ʼkhá tháán mitsaanʼ rí kuaʼti̱i̱nlú nda̱wa̱á. Ndiéjunʼ i̱ʼwáʼ ejmañuluʼ náa xkridoo Ana rá.

7. Ndiéjunʼ rí niʼni má xúʼko̱ Ana ga̱jma̱a̱ ajmbio̱o̱ rá.

⁷ Maski asndu majtiʼ, Ana ni̱jkha̱ má xúʼko̱ ga̱jma̱a̱ ajmbio̱o̱ náa rí nduyamajkuíí Jeobá, náa xuajen Siló (1 Sam. 1:1-5). Náa tabernáculo rúʼko̱, Elí bi̱ kayá edxu̱u̱ náa ndxajkun niʼthúu̱n magiʼthu̱u̱n rí Jeobá maʼdxaun rí niʼtájkáan (1 Sam. 1:9, 17).

8. Arathá xú káʼnii gándoo gámbáyulú reunión.

⁸ Ma̱ndoo makuwáanʼ tsímáá á mu najkhualú má xúʼko̱ reunión. Índo̱ nutajkháan rí nagi̱ʼdu̱u̱ reunión nunda̱ʼa̱a̱ Jeobá xi̱ʼ ndrígóo rí marigá náa ikháanʼlu. Ga̱jma̱a̱ rí tsímáá nindxu̱u̱ mbá rí na̱ʼkha̱ náa xi̱ʼ (Gál. 5:22). Á mu najkualú reunión maski má kúwáanʼ ngíná, nuniʼñánʼ rí Jeobá ga̱jma̱a̱ a̱ngiu̱lú muxnulúʼ tsiakii ga̱jma̱a̱ mumbayulúʼ mu makuwáánʼ tsímáá. Rí muʼtájkáan ga̱jma̱a̱ rí mu̱ʼgua̱ reunión, a̱jma̱ rígi̱ gíʼdoo wéñuʼ numuu rí najmuu Dios mu maʼni̱i̱ a̱jkiu̱lú (Heb. 10:24, 25). Guʼyáá imbo̱o̱ʼ rí gájmañulú náa xkridoo Ana.

9. Ndiéjunʼ rí táxtiʼkhu̱u̱ xóo nixtáa Ana, ga̱jma̱a̱ ndiéjunʼ rí nixtiʼkhuu rá.

⁹ Dí naʼni mamínuʼ Ana na̱nguá nindáti̱ga̱a̱ mbá nacha̱, índo̱ rí niʼtákañuu Dios náa tabernáculo, nikúwá má xúʼko̱ mbóó. Ga̱jma̱a̱ náa Biblia na̱nguá eʼthí á mu Peniná niriʼkuminaʼ. Ikha jngó Ana ndiyóoʼ maʼngo̱o̱ a̱jkiu̱u̱n rí naʼdxaun ajngáa rí naʼni gawúunʼ rí naʼthí Peniná. Maski ajndu xúʼko̱, mú niʼngo̱o̱ a̱jkiu̱u̱n ga̱jma̱a̱ nixtáa gagi. Garmáʼáan a̱jkiu̱lú rí índo̱ niʼthúu̱n Jeobá xúgíʼ rí niʼni maxmiéjuunʼ nánguá nixtáa ngíná. Niniñuuʼ rí ikhaa maʼni̱i̱ a̱jkiu̱u̱n ga̱jma̱a̱ rí maxtáa májánʼ. Nguáthá igu̱nʼ nda̱wa̱á Jeobá niriʼña̱a̱ rí niʼtájkháan ga̱jma̱a̱ ikhaa nigiʼdiin e̱ji̱i̱n (1 Sam. 1:19, 20; 2:21).

10. Ndiéjunʼ eʼsngúlú rí nigíʼnuu Ana rá.

¹⁰ Ma̱ndoo makuwáánʼ tsímáá maski ajndu xámbáa rí naʼni maxmiéjunlú. Tikhu xkujndu marigá má xúʼko̱ maski má nuʼtajkháan ga̱jma̱a̱ na̱jkua̱ má xúʼko̱ reunión. Mú, rí nigíʼnuu Ana naʼsngúlúʼ rí Jeobá nimbáa xáʼngo̱o̱ gárikhoo rí maʼni̱i̱ a̱jkiu̱lú índo̱ naxmiéjunlú. Ikhaa xámbumuu kaʼyulú ga̱jma̱a̱ maʼni tsajkurámáanʼlu numuu rí naguajúnlu jmbu (Heb. 11:6).

11. Ndiéjunʼ rí niʼni maxmiéjuunʼ Pablo rá.

¹¹ Nirígá mbaʼa rí niʼni maxmiéjuunʼ Pablo. Mbá xkri̱da, numuu rí nindoo kaʼñún a̱ngui̱i̱n, xkujndu ndrígu̱ún ikhiin niʼni rí maxmiéjuunʼ ma̱ngaa (2 Cor. 2:4; 11:28). Índo̱ niʼtáráʼa, nikúwíin xa̱bu̱ sia̱nʼ bi̱ nixnáa ga̱jma̱a̱ nixuda̱a̱ʼ guʼwá e̱jua̱nʼ. Imbo̱o̱ʼ ma̱ngaa rí niʼni maxmiéjunʼ nindxu̱u̱ rí ‹tágiʼdoo wéñuʼ›  (Filip. 4:12). Ga̱jma̱a̱ rí asndu ajtsú nuthu niguʼwi̱i̱, ikha jngó, ma̱ndoo makumulúʼ dí ra̱ʼkhá tháán namiñuu rí maʼga ga̱jma̱a̱ barco (2 Cor. 11:23-27). Ndiéjunʼ rí nimbáyúu xá.

12. Ndiéjunʼ nimbáyúu Pablo mu maʼni̱i̱ a̱jkiu̱u̱n rá.

¹² Pablo tániñuuʼ randxaʼwáminaʼ ga̱jma̱a̱ numuu xkujndu rí kúwá raguáʼníí a̱ngui̱i̱n, numuu rí ninindxu̱u̱ xa̱bu̱ guabaaʼ na̱nguá niʼnimbánuu mbáwíi xkujndu. Niʼthún eʼwíinʼ cristianos rí mumbayíí muñewa̱a̱n congregación. Mbá xkri̱da, nixnúún ñajunʼ bi̱ ndiʼyoo rí kaʼnii muni xóo Timoteo ga̱jma̱a̱ Tito. Rí nimbayíí a̱ngiu̱lú bigi̱ niʼni rí Pablo maʼni̱i̱ a̱jkiu̱u̱n (Filip. 2:19, 20; Tito 1:1, 4, 5).

13. Xú káʼnii gándoo gúyaridáá Pablo bi̱ kuya̱ edxu̱u̱ rá.

¹³ Gunda̱ʼa̱ rí mumbayulúʼ. Rí mbiʼi xúgi̱ bi̱ kuya̱ edxu̱u̱ naguáʼníín ikháá má xóo Pablo. Ga̱jma̱a̱ numuu rí nandún kuñún a̱ngiu̱ún índo̱ numíniiʼ ga̱jma̱a̱ xkujndu. Mú mbáa bi̱ kayá edxu̱u̱ xáʼngo̱o̱ gaʼnimbánuu mbáwíi mbá xkujndu. Rí nindxu̱u̱ xa̱bu̱ guabaaʼ gaxkajxi̱i̱ rí maʼthúún eʼwíinʼ a̱ngiu̱lú bi̱ najmañún mu munirati̱i̱n a̱ngiu̱lú jiáma mu mumbañún muñewu̱u̱n mugiu̱u̱ Dios (2 Tim. 2:2).

14. Ndiéjunʼ rí táxmiejuunʼ Pablo ga̱jma̱a̱ ndiéjunʼ gándoo gajmañulú náa xkridoo xá.

¹⁴ Guʼyáá rí ndayúlú rí muni̱i̱ a̱jkiu̱lú. Pablo ninindxu̱u̱ xa̱bu̱ guabaaʼ, ikha jngó ndiyáʼ rí mumbayíí bi̱ nambájxu gajmíi̱n. Gajkhun má rí ikhaa na̱nguá nixmiéjuunʼ rí eʼwíinʼ mbuyáá rí nindxu̱u̱ mbáa xabendi̱i̱ numuu rí a̱ngui̱i̱n nixnáá tsiakii. Náa carta rí nixnúu Filemón niʼthúu̱n: ‹Nadxuʼ ga̱jma̱a̱ niʼni̱i̱ a̱jkiu̱nʼ índo̱ nidxawun ga̱jma̱a̱ numuu ngajua ndrígáaʼ› (Filem. 7). Mbá miʼtsú niʼthí mbiʼñún a̱ngui̱i̱n bi̱ nixnáá tsiakii índo̱ nixtáa gíná (Col. 4:7-11). Á mu ni̱ndxu̱lú xa̱bu̱ guabaaʼ mbuʼyáá rí ndayúlú tsiakii, ga̱jma̱a̱ a̱ngiu̱lú maʼndún rí muxnulú tsiakii.

15. Ndiéjunʼ nimbáyúu Pablo índo̱ nixtáa náa mbiʼi mingíjyúuʼ rá.

¹⁵ Gakumulú kuʼyáá Ajngá rawunʼ Dios. Pablo ndiʼyoo rí na̱ʼkha̱ raʼthí náa Escritura má gámbayúu (Rom. 15:4). Ma̱ngaa ndiʼyoo rí ikhí makánáá ku̱ma̱ mu maʼngo̱o̱ maraʼnuu asndu xkáʼníí má xkujndu (2 Tim. 3:15, 16). Rí maʼni a̱jma̱ nuthu rí nixtáa guʼwá e̱jua̱nʼ náa Roma, ndiʼyoo rí inuu muxiyáa. Ndiéjunʼ niʼni índo̱ nixmiéjuunʼ ga̱jma̱a̱ numuu rígi̱ xá. Niʼthúu̱n Timoteo rí maʼgá gáʼyoo mbá nacha̱ ga̱jma̱a̱ rí maʼga̱ kagu̱u̱ ‹rollo› (2 Tim. 4: 6, 7, 9, 13). Náá numuu rá. Mbáa ga̱jma̱a̱ numuu rí náa rollo rúʼko̱ kiʼniraʼmáʼ rí naʼthí náa Escrituras Hebreas, ikha jngó ma̱ndoo majmuu índo̱ gáʼnigajmaa mbáwíi. Á mu dí ikháanʼlu nu̱ʼni̱ xó má niʼni Pablo, nuʼnigajmaa tsejtsí mbiʼi Biblia, numuu dí rúʼko̱ najmuu Jeobá mu maʼni̱i̱ a̱jkiu̱lú, tséʼniuu asndu xkáʼníí má xkujndu gúraʼnilú.

16. Xú káʼnii nixtáa David índo̱ nikudaminaʼ mbá aʼkhá mbiiʼ rá.

¹⁶ David nixmiéjuunʼ má xúʼko̱ ga̱jma̱a̱ numuu rí niʼni dí raʼkhí. Numuu rí nikudaminaʼ aʼkhá ga̱jma̱a̱ Bat-Seba, ga̱jma̱a̱ niriyaʼ awan xóo muxiyáa ajmbio̱o̱ ga̱jma̱a̱ nindoo markaʼwu múʼúun aʼkhá rígi̱ (2 Sam. 12:9). Índo̱ táʼthi rí niʼni, raʼkháa i̱ndó niʼni gachúu rí nimbájxu̱u̱ ga̱jma̱a̱ Dios niʼni gachúu ku̱ma̱ ndrígóo ga̱jma̱a̱ rí xóo xtáa (Sal. 32:3, 4). Ndiéjunʼ niʼni mu maʼni̱i̱ a̱jkiu̱u̱n ga̱jma̱a̱ numuu aʼkhá rí niʼni xá. Ga̱jma̱a̱ ndiéjunʼ gámbáyulú ikháanʼ á mu nuxuʼdamíjná mbá aʼkhá mbiiʼ wéñuʼ rá.

17. Xú káʼnii esngájma ajngáa rí naʼthí náa Salmo 51:1-4 rí David nitanga̱a̱ a̱jkiu̱u̱n rá.

¹⁷ Gunda̱ʼa̱a̱ Jeobá rí maʼni mba̱a̱ a̱jkiún kaʼyulú. Asndu Ikhú David niʼtákáñuu Jeobá, nitanga̱a̱ a̱jkiu̱u̱n ga̱jma̱a̱ niʼthúu̱n aʼkhá rí niʼni (atraxnuu Salmo 51:1-4). * Rúʼko̱ niʼni rí maxtáa májánʼ (Sal. 32:1, 2, 4, 5). Á mu nixuʼdámijná mbá aʼkhá mbiiʼ wéñuʼ, xúrkaʼwu máʼáanʼlú. Guʼyáá Jeobá ga̱jma̱a̱ gúʼthán rí ni̱ʼni̱. Ikhú makumulú rí nagajta̱a̱ mbá rí miki̱wu̱n wéñuʼ, xóo muʼthá rí naʼni gawuunʼ ku̱ma̱ ndrígúlú. Á mu nandulú rí matanga̱ánʼ mambajxiiʼ gajmiúlú Jeobá, rígá rí ndayóoʼ mu̱ʼni̱.

18. Xú káʼnii nikumu̱u̱ David índo̱ nixprígúu Jeobá rá.

¹⁸ Gundrígú rí nuxprigúlú. Índo̱ Jeobá nikuʼmáa gaʼyee Natán mu maʼthuun David aʼkhá rí niʼni, ikhaa na̱nguá nirkaʼwumúʼúun aʼkhúun ni má na̱nguá ndiʼyoo dí ragíʼdoo numuu. Núkhu ndiʼyoo rí nikudaminaʼ aʼkhá, raʼkháa i̱ndó náa ajmbio̱o̱ Bat-Seba, ma̱ngaa náa Dios. Nigruigú rí nixprígúu Jeobá ga̱jma̱a̱ ikhaa niʼni mba̱a̱ a̱jkiu̱u̱n kaʼyoo (2 Sam. 12:10-14). Á mu nixuʼdámíjna̱ mbá aʼkhá rí  mbiiʼ wéñuʼ, ndayóoʼ rí muʼthúún bi̱ Dios nigruigi̱i̱n mu muñewunlú (Sant. 5:14, 15). Gíʼmaa mbuʼyáá rí niʼnitigulu. Á mu dí nundrígú wapháá rí nuxprigúlú ga̱jma̱a̱ nuʼgíʼ muriʼkumíjná. Xúʼko̱ ma̱ndoo makuwáánʼ gagi ga̱jma̱a̱ tsímáá.

19. Ndiéjunʼ rí ndayóoʼ muʼgímíjna̱ mu̱ʼni̱ rá.

¹⁹ Guʼgími̱jna̱ rí xutangáánʼ mu̱ʼni̱ kikháá aʼkhá. Rey David ndiʼyoo rí ndayóoʼ mambáyúu Jeobá mu xúʼko̱ xátanga̱a̱ maʼni kikháá aʼkhá rúʼko̱ (Sal. 51:7, 10, 12). Índo̱ Jeobá niʼni mba̱a̱ a̱jkiu̱u̱n kaʼyoo, nigíminaʼ maʼni gaʼduunʼ xúgíʼ ku̱ma̱ dí raʼkhí. Rúʼko̱ niʼni rí maxtáa gagi.

20. Xú káʼnii esngajmá rí nuxnáa núma̱aʼ Jeobá numuu rí naʼni mba̱a̱ a̱jkiu̱u̱n kaʼyulú rá.

²⁰ Nusngajmá rí nuxnáa núma̱aʼ Jeobá numuu rí naʼni mba̱a̱ a̱jkiu̱u̱n kaʼyulú índo̱ nuʼtákáñii, ma̱ngaa á mu nundrígú rí naxprígulú ga̱jma̱a̱ nuʼgímijna̱ rí xutangáanʼ mu̱ʼni̱ dí raʼkhí. Índo̱ nuʼni xígi̱ kaʼnii nakuwáanʼlu tsímáá. Rúʼko̱ rí nigíʼnuu ndxájulú bi̱ mbiʼyuu James, bi̱ nikudaminaʼ mbá aʼkhá mbiiʼ. Ikhaa naʼthí: “Índo̱ ni̱thu̱u̱n bi̱ kuya̱ edxu̱u̱ ga̱jma̱a̱ numuu aʼkhá rí ni̱ni̱, ndi̱yo̱o̱ asndu xóo nirigúu mbá rí ki̱wu̱n náa ikhúúnʼ. Ga̱jma̱a̱ xúʼko̱ niku̱mu̱ʼ rí xtáa tsímáá”. Xú káʼnii exnúlú tsiakii índo̱ nduʼyáá rí “Jeobá xtáa mijngii náa xa̱bu̱ bi̱ nagawúnʼ a̱jkiu̱ún” ga̱jma̱a̱ “naʼni káwíin bi̱ nikáguabiinʼ” (Sal. 34:18).

21. Xú káʼnii gándoo gúniʼñamíjná rí Jeobá maʼni̱i̱ a̱jkiu̱lú rá.

²¹ Xúgi̱ rí na̱ʼkha̱ itháan mijngii fin, mbáa maguaʼdáá itháan xkujndu. Índo̱ naxmiéjunlú, xúʼni gajííʼ rí mbuʼyáaʼ rí Jeobá mambáyulúʼ. Guʼnigajmaa tsejtsí mbiʼi Biblia. Gajmañulú xkridoo Ana, Pablo ga̱jma̱a̱ David. Gunda̱ʼa̱a̱ Jeobá mu mambáyulúʼ mbuʼyáá ndiéjunʼ rí naʼni maxmiéjunlú (Sal. 139:23). Guniʼñáanʼ náa ikhaa xkujndu ndrígúlú, itháan náa rí tséjmáán gúʼni̱ gajmiúlú. Á mu nu̱ʼni̱ xígi̱ kaʼnii makumulúʼ xó má nikumu̱u̱ salmista bi̱ niʼni ajmúú náa Jeobá: “Naʼni káwíin bi̱ nikáguabiinʼ” (Sal. 94:19).