Nixtáá náa xuajen Quebec, náa rí kaʼyoo canadá, náa nuthi ajngáa francés. Anu̱ʼ Louis ga̱jma̱a̱ ru̱dúʼ Zélia nindúún kuyoʼ wéñuʼ. Anu̱ʼ ninindxu̱u̱ mbáa xa̱bu̱ bi̱ nanigu̱u̱ʼ wéñuʼ maguxnuu índo̱ xtáa mbáwíi. Ga̱jma̱a̱ ikhúúnʼ nanigu̱ʼ maniraʼmáʼ ga̱jma̱a̱ ra̱ʼkhá tháán niniguʼ rí mani̱ndxu̱ʼ periodista.

Índo̱ nigúʼdoo 12 tsiguʼ, nigún ruyuxu náa guʼuxu Rodolphe Soucy, mbáa bi̱ nañajunʼ ga̱jma̱a̱ anu̱ʼ bi̱ nambájxu wéñuʼ ga̱jma̱a̱. Ni̱ndxu̱ún xa̱bi̱i̱ Jeobá. Ikhúúnʼ na̱nguá e̱yo̱o̱ ga̱jma̱a̱ numún xa̱bi̱i̱ Jeobá, ma̱ngaa tsixmiéjunʼ má eʼni religión ndrígu̱ún. Mú niniguʼ rí ndi̱yo̱o̱ náa ikhiin, numuu rí ni̱ndxu̱ún míjíi̱nʼ xa̱bu̱ ga̱jma̱a̱ najmún Biblia índo̱ nuriʼña̱a̱ graxe̱ ndrígúxu̱. Anu̱ʼ ga̱jma̱a̱ ru̱dúʼ niʼniún tsiánguá, ikha jngó nindrigú rí miʼsngúún ga̱jma̱a̱ numuu Biblia.

Nákha ikhú, ikhúúnʼ na̱jkhá náa escuela dí rígá náa guʼwá dxájkuun. Nguáná natamíjná gajmíʼ a̱ngui̱nʼ dí na̱jkha̱ rajmañuʼ dí naʼthí náa Biblia. Mbá miʼtsú, bi̱ nusngáa, bi̱ ñajúnʼ ndxajkun, niguánu nidxawíín rí natamíjná gajmiʼ a̱ngui̱nʼ. Mbáa rí ikhiin, ikhaa rí mariʼña̱a̱ ga̱jma̱a̱ Biblia rí nitha, niʼni gámún náa inún xúgínʼ rí ikhúúnʼ nakujxímínáʼ náa inún Xa̱bu̱ Ñajunʼ. Maski ajndu nimíñuʼ wéñuʼ, mú nimbáyuʼ numuu rí ni̱jkhánú ndi̱yo̱o̱ rí náa religión rúʼko̱ na̱nguá esngáa rí naʼthí náa Biblia. Ikha jngó ndi̱yo̱o̱ dí raʼkháa ikhí kaʼyoʼ maxtáá. Ga̱jma̱a̱ ni̱thu̱u̱n anu̱ʼ dí mariña̱ánʼ mu maʼgáaʼ náa i̱mba̱ escuela.

Ninigajmaa má xúʼko̱ Biblia, mú mañuu wéñuʼ ni̱jkhá rambájxuʼ gajmúʼ Dios numuu dí ra̱ʼkhá tháán namiñu̱ʼ dí maʼgá gátaráʼa mámbá guʼwá. Numuu rí náa guʼwá dxájkuun nigiʼdoo wéñuʼ  tsiakii ma̱ngaa ndiyaʼ xóo maʼni mu xajuiʼtáraʼa nditháan. Maurice Duplessis, ninindxu̱u̱ timbáa Xa̱bu̱ Ñajunʼ náa Quebec, ga̱jma̱a̱ ninindxu̱u̱ mbáa bi̱ nimbáyúu wéñuʼ náa guʼwá dxájkuun. Ikha jngó nini gíníin ga̱jma̱a̱ ni̱ru̱gui̱i̱n bi̱ ni̱ndxu̱ún xa̱bi̱i̱ Jeobá. Ikha jngó ndiyóoʼ rí xámiñuʼ mu magajnúʼ gátaráʼa nákha mbiʼi rúʼko̱.

Mbáa ndxájulú bi̱ mbiʼyuu John Rae, nimbáyuʼ mu xámiñuʼ, numuu rí ikhaa ni̱jkha̱ náa Escuela dí rígá náa Galaad. Maski ajndu ikhaa najmañuu wéñuʼ, mú nindxu̱u̱ xa̱bu̱ guabaaʼ ga̱jma̱a̱ májánʼ wéñuʼ a̱jkiu̱u̱n. Nguáná nixnuʼ mbájmbu xtágabu, ga̱jma̱a̱ nakujmaa xóo nindxu̱u̱ numuu rí nágíʼ májánʼ xkri̱da. Numuu rí naʼniuu mingíjyúuʼ maʼthí ajngáa francés, ga̱jma̱a̱ ikhúúnʼ nagájnuʼ gajmuʼ tsejtsí mbiʼi gátaráʼa ma̱ngaa nasngóo maʼthí francés. Rí nixtáá má xúʼko̱ gajmuʼ John nixkajxu̱u̱n mu maʼgíʼ mani ñajuunʼ Dios. Nijngúnʼ iyááʼ 26 ñajunʼ gu̱nʼ mayo tsiguʼ 1951, gu̱wa̱ʼ tsiguʼ nda̱wa̱á rí timbá miʼtsú nitamíjná gajmíʼ Testigo.

Náa mbá chíʼgíiʼ congregación rí nikúwáanʼxu náa xuajen rí mbiʼyuuʼ Quebec kúwi̱i̱n itháan mbaʼin precursor. Ga̱jma̱a̱ rí xóo ni̱ndxu̱ún niʼni rí mani̱ndxu̱ʼ precursor mangúún. Nákha mbiʼi rúʼko̱, dí nutaráʼaxu mámbá guʼwá i̱ndó najmuxu Biblia. Numuu rí na̱nguá ejmuxu i̱yi̱i̱ʼ, ndiyóoʼ rí majmuxu májánʼ Biblia. Ikha jngó nini tsiakiminaʼ mu majmañuʼ májánʼ versículo náa rí ma̱ndoo mambáyúu rí gajkhun. Mú mbaʼin xa̱bu̱ tsíñún dí matraxnuu Biblia á mu na̱nguá nirathúún bi̱ kuya̱ edxu̱u̱ náa guʼwá dxájkuun rí mbiʼyuu imprimátur.

Nákha tsiguʼ 1952, niniʼgúnʼ gajmuʼ Simone Patry, mbáa ndxájulú bi̱ xtáa náa xuajen rí mbiʼyuuʼ Quebec. Ni̱jkuáxu náa Montreal, asndu xóó tséʼni mbá tsiguʼ índo̱ nixtáa mbáa guáxiuxu, bi̱ nixna̱ mbiʼí Lise. Maski má ikhúúnʼ niniʼñúuʼ rani̱ndxu̱ʼ precursor nákha xóo tséniʼgúnʼ, a̱ʼgiu̱ʼ Simone ga̱jma̱a̱ ikhúúnʼ na̱nguá ndiʼyáʼxu wéñuʼ rí maguaʼdáá mu xúʼko̱ ma̱ndoo muyambáá itháan náa congregación.

Ninújngoo má gu̱wa̱ʼ tsiguʼ nákha xóó tséʼgíminaʼ rí mani̱ndxu̱u̱ precursor mbu̱júu̱ʼ. Tsiguʼ 1962, ni̱jkhá náa Najuiʼsngúún ga̱jma̱a̱ numuu Reino náa Betel dí rígá náa Canadá, náa najuiʼsgúún bi̱ kuya̱ edxu̱u̱ rí ndajyúuʼ mbágu̱nʼ. Ikhí mbóó cuarto niguanúʼ ga̱jmu̱ʼ ndxájulú bi̱ mbiʼyuu Camille Ouellette. Niʼniuʼ tsiánguá índo̱ ndi̱yo̱o̱ dí ra̱ʼkhá tháán nanigu̱u̱ʼ maʼtáraʼa, maski ajndu gíʼdaa a̱ʼgiu̱u̱ ga̱jma̱a̱ gíʼdiin e̱ji̱i̱n. Nákha ikhú, na̱nguá mbiʼin a̱ngiu̱lú xa̱bekha ga̱jma̱a̱ gu̱ʼu̱ bi̱ kúwá náa  Quebec, maski ajndu guáʼdiin e̱jñún, mú ni̱ndxu̱ún precursor. Ma̱ngaa xúʼko̱ má kayuuʼ xtáa Camille. Mbiʼi rí nikuwáanʼxu mbóó, niʼthúnʼ mu mbayóo májánʼ xóo xtáá. Nguáthá igu̱nʼ, ni̱jkhánú ndi̱yo̱o̱ rí ma̱ndoo matangaán mani̱ndxu̱ʼ mbu̱júu̱ʼ precursor. Tikhun nini a̱jma̱ a̱jkiu̱ún dí rúʼko̱ nindxu̱u̱ mbá rí májánʼ, maski ajndu xúʼko̱ na̱nguá nitanga̱a̱ a̱jkiu̱nʼ, ga̱jma̱a̱ niku̱mu̱ʼ ka̱yo̱o̱ Jeobá rí ga̱jma̱a̱ tsiakii rí gáni náa mataráʼaʼ maʼni tsajkurámúnʼ.

Tsiguʼ 1964, ikhúúnʼ ga̱jmu̱ʼ a̱ʼgiu̱ʼ Simone nituxu rí mani̱ndxu̱xuʼ precursor especial náa Quebec, náa xuajen rí nigumáanʼxu. Ikhí niyambáxu. Nákha mbiʼi rúʼko̱, maski ajndu tséniñu̱xu mutaráʼa, mú nirígá májánʼ ñajunʼ.

Mbá wakhííʼ sábado, nirikho̱ʼ náa xuajen rí mbiʼyuu Sainte-Marie, mbá chíʼgíiʼ xuajen rí naguanúu mijngii náa Quebec. Mbáa policía ni̱jkha̱ kañún náa guajtsaanʼ ga̱jma̱a̱ nikudúúnʼ náa guʼwá e̱jua̱nʼ ga̱jma̱a̱ numuu dí nataráʼa mámbá guʼwá rí asndu na̱nguá nindaʼa̱ permiso. Ga̱jma̱a̱ wakhíʼ má rúʼko̱, nigún kuñu̱u̱n náa Xa̱bu̱ Ñajunʼ bi̱ mbiʼyuu Baillargeon, mbáa xa̱bu̱ bi̱ nakujmaa rí naʼni gamíi. Ga̱jma̱a̱ nirajxuʼ tsáá gáʼgá gajmuʼ náa mambanúu xkujndu. Índo̱ ni̱thu̱u̱n rí Glen How, * mbáa Testigo bi̱ nindxu̱u̱ abogado bi̱ najmaʼniiʼ wéñuʼ, ga̱jma̱a̱ asndu nimiñun niʼthí: “¡Na̱nguá, ikhaa na̱nguá!”. Glen How nijmaʼniiʼ wéñuʼ numuu rí nimbáñun mbaʼin a̱ngiu̱lú. Na̱nguá má mba̱yu̱u̱ʼ niʼni rí Xa̱bu̱ Ñajunʼ niʼthúnʼ rí nánguá má mbaʼyóoʼ maxnaximínaʼ náa inuu juez.

Ga̱jma̱a̱ numuu rí na̱nguá eniñuxu mutaráʼa náa Quebec, ikha jngó, niʼni mingíjyúuʼ mu mbuʼyáʼ náa ma̱ndoo muguaʼdáá reunión. Congregación ndríguxu rí chíʼgíiʼ nixkamaa mbá cuarto nixkamaa, mú naʼni migúwán wéñuʼ. Mu xákramu̱únʼ a̱ngiu̱lú índo̱ ndayáa gu̱nʼ rí naʼni migúwán, a̱ngiu̱lú guáʼdáá mbá estufa rí naʼkhu̱u̱ gasolina. Nákha xóó tségiʼdu̱u̱ reunión nagimbáanʼxu náa rawuunʼ estufa mu mutsigamijnaxu nguáthá hora ga̱jma̱a̱ nuta ajngáa rí maxnuxu̱ tsiakii.

Nindxu̱u̱ mitsaanʼ índo̱ natayáá xóo na̱jkha̱ raʼni itháan mba̱a̱ rí najuiʼtáraʼa náa mba̱yu̱u̱ʼ tsiguʼ. Nákha tsiguʼ ajtsú skíñúʼ, káaʼ nguátháa congregación ma̱jkha̱ʼ rígá náa mbájndi rawuunʼ xuajen Quebec, rí kaʼyoo Côte-Nord ga̱jma̱a̱ Gaspé xuajen dí gíwanʼ náa rawuunʼ iyaʼ. Rí xúgi̱ náa xuajen rúʼko̱, kúwi̱i̱n mbaʼin a̱ngiu̱lú, ga̱jma̱a̱ nagimbíi̱n náa Salón rí mitsaanʼ.

Nákha tsiguʼ 1970 nithuxu rí muyambáá xóo circuito, ga̱jma̱a̱ nákha tsiguʼ 1973 nithuxu rí mani̱ndxu̱xuʼ distrito. Nákha tsiguʼ rúʼko̱, nijmañuʼ wéñuʼ náa xkridún eʼwíinʼ circuito bi̱ najmañún, xóo Laurier Saumur * ga̱jma̱a̱ David Splane. * índo- naguámbá mámbá asamblea ikhúúnʼ gajmúʼ David nutamíjna̱xu mu mani̱ndxu̱xuʼ mbáa bi̱ naʼsngáa májánʼ. Narmáʼáan a̱jkiu̱nʼ rí mbá miʼtsú niʼthúnʼ: “Léonce, niniguʼ wéñuʼ Discurso rí nijuixná iwáá kayuuʼ. Ninindxu̱u̱ májánʼ, mú á mu  ikhúúnʼ nikhánuʼ discurso rúʼko̱, xúgíʼ rí naʼthí ikhí mani̱i̱ i̱mbá gijtsu discurso”. Xáʼniuʼ gakhi̱i̱ rí mata, ikha jngó ndi̱yo̱o̱ rí ndayóoʼ mata májánʼ ga̱jma̱a̱ rí xájyúʼ mba̱yu̱u̱ʼ.

Mbá ñajunʼ rí nuni bi̱ ni̱ndxu̱ún distrito nindxu̱u̱ rí muxnún tsiakii a̱ngiu̱lú circuito. Mú mbaʼin publicador bi̱ kúwá náa Quebec nuniʼniúnʼ, ikha jngó nindúún rí mataraʼa gajmíʼ índo̱ na̱jkhá rañun circuito. Naniguʼ maʼgá gajmíʼ, mú tségajnuu mba̱yu̱u̱ʼ mbiʼi gajmuʼ circuito. Mbá miʼtsú, mbáa circuito niʼthúnʼ ga̱jma̱a̱ ajngáa guabaʼ: “Májánʼ má nindxu̱u̱ rí manújngaaʼ mba̱yu̱u̱ʼ mbiʼi gajmiáanʼ a̱ngiu̱lú, mú xámbumaaʼ rí xmáná rígi̱ nindxu̱u̱ ndrígóʼ ikhúúnʼ. Mangúún ndayóoʼ rí muxnuʼ tsiakii”. Ga̱jma̱a̱ ajngáa guabaʼ rí niʼthúnʼ nimbayúʼ mbayóo ga̱jma̱a̱ awáán.

Índo̱ niʼni tsiguʼ 1976 nigíʼnuu mbá tsingíná rí na̱nguá nigúʼthu̱u̱n. A̱ʼgiu̱ʼ bi̱ nandoʼ ka̱yo̱o̱, Simone, ndiyóo nandii ga̱jma̱a̱ nikháñun. Rí nindoo kaʼyoo Jeobá rúʼko̱ niʼni rí maʼni mitsiʼyáa. Rí nixtáá má xúʼko̱ rani ñajunʼ Dios nimbáyuʼ mu xájmúʼ wéñuʼ ga̱jma̱a̱ numuu rí nda̱wa̱a̱, naxnáa wéñuʼ núma̱a̱ Jeobá rí nindoo kaʼyoʼ ga̱jma̱a̱ rí nimbáyuʼ índo̱ nixtáá mbiʼi mingíjyúuʼ rúʼko̱. Mbiʼi nda̱wa̱á, niʼnigu̱u̱nʼ ga̱jmu̱ʼ i̱mba̱a̱ bi̱ mbiʼyuu Carolyn Elliott, mbáa precursora bi̱ nanigu̱u̱ʼ wéñuʼ maʼtáraʼa bi̱ naʼthí ajngáa inglés bi̱ ni̱jkha̱ náa Quebec mu mayambáá náa najuiʼtáraʼa. Nindxu̱u̱ mbáa a̱ʼgu̱ bi̱ gajkhun naxmiéjuunʼ kaʼñún eʼwíinʼ, mú itháán bi̱ namiñun o bi̱ nanigu̱u̱nʼ makuwíin ndajkuíín. Ninindxu̱u̱ mbáa bi̱ nimbáyuʼ wéñuʼ náa ñajunʼ ndrígóʼ xóo circuito.

Enero tsiguʼ 1978, nithu̱nʼ rí mani̱ndxu̱ʼ mbáa bi̱ maʼsngúún náa Majuiʼsngúún timbá miʼtsú xú káʼnii gíʼmaa muni ñajunʼ ndrígu̱ún Precursor náa Quebec. Ra̱ʼkhá tháán nimíñunʼ numuu rí tséyóo kayuuʼ rí gájuiʼthá xúʼko̱ má bi̱ majuiʼsngúún. Májánʼ rí náa Clase kúwi̱i̱n precursor bi̱ najmañún. Ikha jngó maski ajndu ikhúúnʼ nini̱ndxu̱ʼ bi̱ naʼsngáa, mú nijmañuʼ wéñuʼ náa ikhiin.

Tájyúuʼ má mba̱yu̱u̱ʼ rí tsiguʼ má rúʼko̱, nirígá mbá Asamblea Internacional rí nigumbiʼyuu “Fe  victoriosa” dí nirígá náa Estadio Olímpico ndrígóo Montreal. Ninindxu̱u̱ mbá asamblea mba̱a̱ wéñuʼ rí nimbá miʼtsú tárígá náa Quebec, náa nagimbíi̱n itháan rí a̱jkhu̱ skiñúʼ míí xa̱bu̱. Ga̱jma̱a̱ nigiu̱u̱nʼ náa Departamento náa Nuthi rí Narígá. Nitamíjná gajmíʼ mbaʼin periodista, ga̱jma̱a̱ ra̱ʼkhá tháán nidxuʼ índo̱ ndi̱yo̱o̱ xúgíʼ rí májánʼ rí nithi náa noticias. Nirígá entrevista itháan rí 20 horas náa radio ga̱jma̱a̱ náa tele, ma̱ngaa nigájnuu mbaʼa wéñuʼ i̱yi̱i̱ʼ náa ni̱ʼkha̱ raʼthí ga̱jma̱a̱ numuu rúʼko̱. Mba̱a̱ rí nindoo nirígá ga̱jma̱a̱ numuu rígi̱.

Tsiguʼ 1996, nixtiʼkhu̱u̱ mbá kayuuʼ xóo nixtáá. Asndu nákha nijngúnʼ iyááʼ, nixtáá rayambáá náa Quebec, náa nuthi francés. Mú ikhú nigiu̱u̱nʼ xóo distrito náa nuthi ajngáa inglés ndrígóo Toronto. Niku̱mu̱ʼ rí tséjmañuʼ ga̱jma̱a̱ nimíñuʼ índo̱ nindxaʼwa̱mínáʼ xóo gáxna̱ discurso náa ajngáa inglés rí tséjmún gáthá. Ndiyóoʼ rí matajkáan nángi eʼni ga̱jma̱a̱ maku̱mu̱ʼ ka̱yo̱o̱ Jeobá.

Rí xúgi̱ ma̱ndoo mata rí mitsaanʼ wéñuʼ nixtáá náa Toronto mbá a̱jma̱ tsiguʼ. Carolyn niʼngo̱o̱ wéñuʼ a̱jkiu̱u̱n nimbáyuʼ mu mata inglés, ma̱ngaa a̱ngiu̱lú nimbayúʼ ga̱jma̱a̱ nixnuʼ tsiakii. Mbá nacha̱ nimbájxu gajmiúxu eʼwíinʼ a̱ngiu̱lú.

Mámbá wakhíʼ viernes índo̱ naguámbá asamblea ndrígóo circuito, maski ajndu rígá wéñuʼ ñajunʼ, mú nanigu̱ʼ wéñuʼ maʼgá gátaráʼa mámbá guʼwá. Mbáa tikhun ma̱ndoo murajximíjna̱ náá numuu nagájnuʼ gátaráʼa xmáná dí rígá wéñuʼ ñajunʼ. Mú ni̱jkhánú ndi̱yo̱o̱ rí nimbáyuʼ wéñuʼ xóo ma̱ndoo matamíjná gajmíʼ itháán májánʼ xa̱bu̱. Ga̱jma̱a̱ rí mbiʼi xúgi̱ xtáá gagi índo̱ nagájnuʼ gátaráʼa.

Tsiguʼ 1998, nithu̱nʼ ikhúúnʼ ga̱jmu̱ʼ aʼgiuʼ Carolyn rí muʼguáxu náa Montreal xóo Precursor especial. Ikhí nikuwáanʼxu mba̱yu̱u̱ʼ tsiguʼ, ga̱jma̱a̱ nithu̱nʼ rí maríyáʼ awan náa miʼtáraʼa náa nanújngúún mbaʼin xa̱bu̱ ga̱jma̱a̱ mani i̱ʼwáʼ, xóo natamínaʼ gajmíʼ bi̱ nuxna noticia mu mambáa rí tsíñún gúñún Bi̱ nutaraʼa numuu Jeobá. Xúgi̱ ikhúúnʼ ga̱jmu̱ʼ Carolyn nutaruʼúnxu xa̱bu̱ bi̱ naguwáʼ náa Canadá, nandún wéñuʼ rí majmañún itháan rí naʼthí náa Biblia ga̱jma̱a̱ asndu naniguxu rí musngúún.

Índo̱ nandxaʼwamínaʼ náa mbá ajtsú skiñúʼ migiñuʼ tsiguʼ rí nijngúnʼ iyááʼ, ra̱ʼkhá tháán nadxuʼ. Niʼni rí majmañuʼ maxtáá gagi náa nataráʼa ga̱jma̱a̱ rí nimbáñúún mbaʼin xa̱bu̱ mu muniʼnuuʼ rí gajkhun. Nda̱wa̱á rí guáxioʼ, Lise, ga̱jma̱a̱ ajmbio̱o̱ nini mbaja̱a̱ aʼdiún, ninindxu̱ún precursor regular. Ra̱ʼkhá tháán edxuʼ índo̱ nda̱yo̱o̱ rí Lise nadxuu má xúʼko̱ náa naʼtáraʼa. Ga̱jma̱a̱ naxníin núma̱aʼ wéñuʼ a̱ngiu̱lú bi̱ nixnuʼ tsiakii ga̱jma̱a̱ mbá májánʼ xkri̱da ma̱ngaa xtágabu májánʼ rí nimbáyuʼ mu mambajxúʼ itháan ga̱jmu̱ʼ Dios ma̱ngaa rí manimbánuu ñajunʼ rí nikhánuʼ náa organización. Ni̱jkhánú ndi̱yo̱o̱ rí i̱ndó ma̱ndoo muguajunʼlu jmbu náa ñajunʼ rí nakanulú á mu nakumulú kuʼyáá tsiakii rí na̱ʼkha̱ náa xi̱ʼ kaʼwu ndrígóo Jeobá (Sal. 51:11). Xániʼñuuʼ raxnáa núma̱aʼ ga̱jma̱a̱ numuu ñajunʼ rí nixnuʼ mu mani mba̱a̱ mbiʼyuu (Sal. 54:6).