1, 2. a) Xó má rí niʼthí Jesús rí na̱ʼkha̱ náa Mateo 28:18-20, xú káʼnii ñajunʼ rí guáʼdáá muni bi̱ kuwa náa congregación cristianas rá. b) Xú káʼnii graxe̱ guriʼña̱a̱ náa artículo rígi̱ rá.

MBÁA apóstoles nidxún wéñuʼ índo̱ niwi̱i̱n náa mbá inuu kúbá. Jesús niʼthún rí mbuwiin ikhí nda̱wa̱á rí nigabi̱i̱ (Mat. 28:16). Mbáa mbiʼi rúʼko̱ nindxu̱u̱ índo̱ “nisngájmaminaʼ náa inún mbá witsu ciento a̱ngiu̱lú” (1 Cor. 15:6). Náá numuu rí Jesús niʼni rígi̱ rá. Nindxu̱u̱ numuu rí maxnún xa̱bi̱i̱ mbá ñajunʼ rí nagui̱i̱ wéñuʼ: “Guʼgua̱ ga̱jma̱a̱ gusngún xa̱bu̱ bi̱ kuwa náa xúgíʼ xuajin” (atraxnuu Mateo 28:18-20). *

² Bi̱ nidxawíín ajngáa rí Jesús niʼthí ikhiin niguánu ninindxu̱ún bi̱ nikuwa náa congregación nákha siglo timbá. Ñajunʼ rí nikhánún muni nindxu̱u̱ rí mutaruʼun xa̱bu̱, mu xúʼko̱ mani̱ndxu̱ún xa̱bi̱i̱ Cristo. * Rí mbiʼi xúgi̱, náa xúgíʼ numbaaʼ rígá mbaʼa wéñuʼ congregación náa kuwa bi̱ gajkhun ni̱ndxu̱ún cristianos. Ga̱jma̱a̱ ñajunʼ ndrígu̱ún nindxu̱u̱ ikháá má. Náa artículo rígi̱, muriʼña̱a̱ a̱jkhu̱ graxe̱: Ndíjkha rí gíʼdoo wéñuʼ numuu rí muʼsngúún xa̱bu̱ rá. Xú káʼnii nindxu̱u̱ rí marasngúún xa̱bu̱ rá. Lá xúgínʼ cristianos nuruguambáá maguma ñajunʼ rígi̱ ráʼ.  Ga̱jma̱a̱ ndíjkha rí ndayóoʼ maʼngo̱o̱ a̱jkiu̱lú índo̱ gúʼni ñajunʼ rígi̱ rá.

3. Xó má eʼthí náa Juan 14:6 ga̱jma̱a̱ 17:3, ndíjkha rí gíʼdoo wéñuʼ numuu muʼsngúún xa̱bu̱ rá.

³ Ndíjkha rí gíʼdoo wéñuʼ numuu rí muʼsngúún xa̱bu̱ rá. Numuu rí i̱ndó xa̱bu̱ bi̱ nagún kidxuuʼ Cristo ma̱ndoo mambaxúun gajmiún Dios. Ma̱ngaa nambáñun makuwa májánʼ xúgi̱, ga̱jma̱a̱ nda̱wa̱á maguaʼtíi̱n makuwá kámuu mbiʼi (atraxnuu Juan 14:6; * 17:3). * Gajkhun rí Jesús nixnulú mbá ñajunʼ rí gíʼdoo wéñuʼ numuu, mú na̱nguá kuwáanʼ ndajkuáanʼ. Apóstol Pablo niʼthí rí ikhaa ga̱jma̱a̱ eʼwíínʼ cristianos ni̱ndxu̱ún bi̱ “numbáyii Dios” (1 Cor. 3:9). Phú gajkhu, rí Jeobá ga̱jma̱a̱ Cristo nixnulú mbá ñajunʼ rí naguii wéñuʼ ikháán bi̱ ni̱ndxu̱lú xa̱bu̱ aʼkhá.

4. Ndiéjunʼ ejmañuluʼ rí nigíʼnuu Iván ga̱jma̱a̱ Matilde rá.

⁴ Ñajunʼ rí muʼsngúún xa̱bu̱ ma̱ndoo maʼni rí makuwáanʼ gagi. Guʼyáá rí nigíʼnuu Iván ga̱jma̱a̱ Matilde, ni̱ndxu̱ún xa̱bu̱ gajmii bi̱ kuwa náa Colombia. Nitaraʼáá mbáa dxámá bi̱ mbiʼyuu Davier, ga̱jma̱a̱ dxámá buʼko̱ niʼthún: “Nandoʼ mariʼkuminaʼ mú tséjmún”. Davier nindxu̱u̱ mbáa bi̱ najmañuu naxmínaʼ ga̱jma̱a̱ najmuu drogas, naʼga̱a̱n wéñuʼ iyaʼ najnga̱a̱. Ma̱ngaa xtáa ga̱jma̱a̱ novia ndrígóo bi̱ mbiʼyuu Érika. Iván naʼthí: “Nigíʼdi̱i̱ ni̱jkuá gúyaxu náa xuajen rí xtáa, ga̱jma̱a̱ mitsinguánʼ wéñuʼ guanúu. Mbaʼa horas najkuáxu ga̱jma̱a̱ bicicleta náa kamba̱a̱ dí xgaʼchaʼ wéñuʼ. Índo̱ Érika ndiʼyoo xóo Davier nariʼkuminaʼ, ikhú ma̱ngaa nigíʼdu̱u̱ niʼnigajmaa̱ Biblia”. Mbiʼi nda̱wa̱á, dxámá bugi̱ niniñuuʼ drogas, iyaʼ najnga̱a̱ ga̱jma̱a̱ rí naxmínaʼ. Ma̱ngaa ninújngoo náa inuu i̱yi̱i̱ʼ ga̱jma̱a̱ novia ndrígóo. Matilde naʼthí: “Índo̱ Davier ga̱jma̱a̱ Érika nijngún iyááʼ nákha 2016, nirmáʼáan a̱jkiu̱xuʼ rí ikhaa niʼthí: ‹Nandoʼ mariʼkuminaʼ mú tséjmún›. Ikhú nimbiyaʼxuʼ”. Phú gajkhun rí naʼni maʼdxulú wéñuʼ índo̱ numbayíí mbáa mu mani̱ndxu̱u̱ xa̱bi̱i̱ Cristo.

5. Xú káʼnii nindxu̱u̱ timbá rí ndayóoʼ muʼni mu muʼsngúún xa̱bu̱ rá.

⁵ Timbá rí naguma nindxu̱u̱ rí mbuʼñíinʼ bi̱ nandún muniʼniiʼ Jeobá (Mat. 10:11). Nusngajmá rí gajkhun ni̱ndxu̱lú xa̱bi̱i̱ Jeobá á mu nuʼthúún xúgíinʼ xa̱bu̱ bi̱ nuxkamiin. Ga̱jma̱a̱ musngajmá rí gajkhun ni̱ndxu̱lú cristianos bi̱ naʼnimbánuu kiʼtáñajunʼ ndrígóo Jesús á mú nuʼtáraʼa.

6. Ndiéjunʼ gambáyulú mu xa̱bu̱ manigu̱u̱nʼ mudxawíín índo̱ gutaraʼa rá.

⁶ Tikhun xa̱bu̱ nanigu̱u̱nʼ majmañún rí naʼthí náa Biblia. Mu kúwá má tikhun bi̱ ikháán ndayóoʼ muʼthúún má xúʼko̱ mu manigu̱u̱nʼ. Mu xa̱bu̱ maʼndún mudxawíín índo̱ mu̱ʼgua̱ gúʼtaraʼa, ginii ndayóoʼ mbuʼyáá májánʼ rí gúʼthá. Guʼyáʼ mbá tema rí xa̱bu̱ manigu̱u̱ʼ maʼdxaun ga̱jma̱a̱ gundxaʼwamíjna̱ xú káʼnii gándoo gugíʼdi̱i̱ muʼtháán ga̱jma̱a̱ numuu rúʼko̱.

7. a) Xú káʼnii gándoo gugíʼdi̱i̱ muʼtháán mbáa xa̱bu̱ rá. b) Ndíjkha ku̱ma̱a̱ ikháán rí gíʼdoo numuu mudxawíín ga̱jma̱a̱ musngajmá gamajkhu rá.

⁷ Mbá xkri̱da, ma̱ndoo muʼthá xúgi̱ kaʼnii: “Manigu̱ʼ mbayóo ndiéjunʼ rathá ikháán ga̱jma̱a̱ numuu rígi̱. Mbiʼi xúgi̱ asndu náá rígá wéñuʼ xkujndu. Lá naku̱ma̱a̱ʼ ikháán rí ndayóoʼ mbáa xa̱bu̱ ñajunʼ bi̱ maʼtáñajunʼ náa xúgíʼ numbaaʼ mu maʼnimbanúu xkujndu rígi̱ ráʼ.” Nda̱wa̱á, ma̱ndoo muraxnuu ga̱jma̱a̱ muʼthá itháan rí naʼthí náa Daniel 2:44. I̱mba̱, ma̱ngaa  rí ma̱ndoo muʼthá nindxu̱u̱: “Naniguʼ maña̱ʼ mbá graxe̱. Xú káʼnii gándoo muʼnimbáji̱i̱n e̱ji̱n mu maguaʼdáá gamajkhún índo̱ gáʼnii ku̱ma̱a̱ʼ ikháán”. Ikhú, ma̱ndoo muraxnuu Deuteronomio 6:6, 7. Asndu xú káʼnii má rí guraʼwíí muʼtháán xa̱bu̱, mú ginii gundxaʼwamíjna̱ xú kaʼnii xa̱bu̱ bi̱ muʼtháán, xú kaʼnii gámbáyúu rí majmañuu dí naʼthí náa Biblia. Ma̱ngaa gíʼdoo wéñuʼ numuu mudxawíín rí ikhaa naʼthí. Á mu nuʼni xúgi̱ kaʼnii, makru̱ʼu̱lú itháan xú kaʼnii ku̱mu̱u̱ xa̱bu̱ ga̱jma̱a̱ rúʼko̱ gáʼni dí xa̱bu̱ maniguuʼ maʼdxaun.

8. Náá numuu rí ndayóoʼ mutaʼngaánʼ má xúʼko̱ gúʼñúún xa̱bu̱ rá.

⁸ Nákha xóó tsíraʼwíí maʼnigajmaa Biblia mbáa xa̱bu̱, ikháanʼ ndayóoʼ muriyaʼ mbiʼi ga̱jma̱a̱ tsiakii mu matangaánʼ guʼyáá mbaʼa nuthu. Náá numuu rá. Timbá numuu nindxu̱u̱, índo̱ gátangaánʼ guʼyáá xúxkamaa o gíʼdoo wéñuʼ ñajunʼ. Mbáa mbaʼyóoʼ matangáanʼ mbaʼa nuthu mu xa̱bu̱ maguʼuun kaʼyulú ga̱jma̱a̱ magruigú maʼnigajmaa Biblia. Garmáʼáan a̱jkiu̱lú, mu mbá planta mbaja̱a̱ ndayóoʼ muxtijyáʼ má xúʼko̱. Xúʼko̱ má erígá ga̱jma̱a̱ mbáa xa̱bu̱, ma̱ndoo maʼga̱nú maʼndoo kaʼyoo Jeobá ga̱jma̱a̱ Cristo á mu tséniʼñáaʼ ruʼtháán ga̱jma̱a̱ numuu Biblia.

9, 10. Náá numuu nuʼthá rí xúgiáanʼ nuruguambáá mu muxkamiin xa̱bu̱ bi̱ nandún mudxawíín rá.

⁹ Xúgiáanʼ ikháanʼ bi̱ nuʼtáraʼa nuruguambáá mu muxkamiin xa̱bu̱ bi̱ nandún mudxawíín. Ñajunʼ ndrígúlú ma̱ndoo muʼnimbríguíi ga̱jma̱a̱ mbá ñajunʼ náa xa̱bu̱ kuwa ruya̱a̱ʼ mbáa ada̱ bi̱ nindáti̱ga̱a̱. Xú káʼnii rá. Guʼyáá mbá rí gajkhun nirígá. Mbá quinientos xa̱bu̱ niruguambáá mu mbuyáaʼ mbáa ada̱ bi̱ ajtsú tsiguuʼ bi̱ nindáti̱ga̱a̱. Veinte horas nda̱wa̱á rí nindáti̱ga̱a̱ ada̱. Mbáa xa̱bu̱ nixka̱ma̱a̱ náa nijuiʼdu xaxtu. Mú ikhaa táʼthi rí mbáwíi ikhaa niʼngo̱o̱ nixkamaa,  rí phú niʼthí nindxu̱u̱: “Niʼnguxu̱ nixkamaa númaa má rí niruguambáá mbaʼin wéñuʼ xa̱bu̱”.

¹⁰ Mbaʼin xa̱bu̱ nakumu̱ún rí nindátígi̱i̱n xó má ada̱ buʼko̱. Na̱nguá guáʼthi̱i̱n mbá rí marigá nda̱wa̱á, mu nandún rí mixtambañúún (Efes. 2:12). Ikha jngó ikháanʼ ni̱ndxu̱lú itháan rí ocho millones bi̱ kuwáanʼ ruʼñíinʼ xa̱bu̱ buʼko̱. Mbáa ikháanʼ tséʼngulú gúxkamaa mbáa xa̱bu̱ bi̱ nanigu̱u̱ʼ maʼnigajmaa Biblia, mú eʼwíínʼ publicadores naʼngu̱u̱n nuxkamaa náa ikhaa má territorio ndrígúlú. Índo̱ mbáa ndxájulú naxkamaa mbáa xa̱bu̱ bi̱ na̱jkha̱nú nanindxu̱u̱ xa̱bi̱i̱ Cristo, xúgiáanʼ naʼni rí makuwáanʼ gagi.

11. Maski nimbáa tséʼsngáá ga̱jma̱a̱ Biblia, ndiéjunʼ rí ma̱ndoo muʼni mu xa̱bu̱ manigu̱u̱nʼ mani̱ndxu̱ún xa̱bi̱i̱ Cristo rá.

¹¹ Maski ajndu xúgi̱ na̱nguá eʼsngáá mbáa xa̱bu̱ ga̱jma̱a̱ Biblia, mú rígá rí ma̱ndoo muʼni mu xa̱bu̱ maniguuʼ mani̱ndxu̱u̱ xa̱bi̱i̱ Cristo. Mbá xkri̱da, índo̱ na̱ʼkha̱ reunión timbá aʼphu̱, ikháanʼ ma̱ndoo mudriguíi májánʼ mu xúʼko̱ ikhaa xámiñuu o xátiyu̱u̱ʼ. Xúʼko̱ gúmbáʼyíí mbaʼyoo rí ngajua nasngájmááʼ rí ikháanʼ ni̱ndxu̱lú cristianos gajkhun (Juan 13:34, 35). Ma̱ngaa, comentario rí nuxná náa reunión, rúʼko̱ mambáyúu mbaʼyoo rí ma̱ngaa ma̱ndoo maʼthí rí najmañuu ga̱jma̱a̱ rí gíʼmaa maʼni ga̱jma̱a̱ gamajkhu. Ma̱ngaa ma̱ndoo magajnúlu gúʼtáraʼa gajmiúlú mbáa publicador nuxi̱i̱ʼ ga̱jma̱a̱ mumbaʼyíí xóo ma̱ndoo majmuu Biblia índo̱ maʼtámíjná gajmíi̱n xa̱bu̱. Á mu nuʼni rígi̱, kuwáanʼ ruʼsngáá xóo mbaʼyáridoo Cristo (Luc. 10:25-28).

12. Lá ndayóoʼ majmañulúʼ wéñuʼ mu muʼsngúún xa̱bu̱ ráʼ. Arathá mbá xkri̱da.

¹² Xáʼyóoʼ mundxaʼwamíjna̱ rí ndayóoʼ majmañulúʼ wéñuʼ mu muʼsngáá mbáa mu mani̱ndxu̱u̱ xa̱bi̱i̱ Jesús. Xkri̱da ndrígóo Faustina bi̱ xtáa náa Bolivia, ma̱ndoo mambáyulúʼ makru̱ʼu̱lú náá numuu. Índo̱ ikhaa nininiúnʼ xa̱bi̱i̱ Jeobá, tséjmañuu gáguxnuu, mu mañu mañúú ni̱jkha̱ rajmañuu. Rí xúgi̱ ikhaa nijngún má iyááʼ ga̱jma̱a̱ nanigu̱u̱ʼ wéñuʼ maʼtáruʼun xa̱bu̱. Mámbá xmáná naʼsngúún mbá witsiin xa̱bu̱. Maski má Faustina tséjmaa gaguxnuu májánʼ wéñuʼ xóo nuraxnuu bi̱ naʼnigajmaa̱ gajmíi̱n, mu nimbáñúún mbá majuiin xa̱bu̱ majngún iyááʼ (Luc. 10:21).

13. Maski ajndu na̱nguá guaʼdáá mbiʼi, mú xú kaʼnii gaguma tsajkurámáánʼ á mu nuʼtáraʼa má xúʼko̱ rá.

¹³ Mbaʼin cristianos guáʼdáá wéñuʼ ñajunʼ rí kaʼñún munimbánii, maski ajndu raguáʼdáá wéñuʼ mbiʼi mu nuriyaʼ mbiʼi mu musngúún xa̱bu̱ ga̱jma̱a̱ numuu Biblia, mbá ñajunʼ rí naʼni makuwá gagi. Guʼyáá rí nigíʼnuu Melanie. Ikhaa na̱nguá xtáa ga̱jma̱a̱ ajmbio̱o̱ bi̱ gíʼdaa mbáa dxáʼgú bi̱ migiñuʼ tsiguuʼ. Ma̱ngaa nañajunʼ xúgíʼ mbiʼi ga̱jma̱a̱ nañewu̱u̱n anu̱u̱ bi̱ gíʼdoo cáncer. Ikhaa xtáa mbá xuajen mitsínguánʼ wéñuʼ náa Alaska, ga̱jma̱a̱ i̱ndó  ikhaa nindxu̱u̱ xa̱bi̱i̱ Jeobá náa xuajen rúʼko̱. Ikhaa niʼtákáñuu má xúʼko̱ Jeobá rí maxnúu tsiakii mu magajnúu gáʼtaraʼa maski má naʼni gúwán wéñuʼ, numuu rí nandoo maxkamaa mbáa bi̱ maʼsngóo ga̱jma̱a̱ numuu Biblia. Índo̱ ninújngoo mbiʼi nixkamaa Sara, bi̱ nidxu̱u̱ wéñuʼ índo̱ ndiʼyoo rí Dios gíʼdoo mbóʼ mbiʼyuu. Nda̱wa̱á a̱ʼgu̱ bugi̱ nindoo maʼnigajmaa Biblia. Melanie naʼthí: “Wakhíʼ viernes naku̱mu̱ʼ rí naʼni néʼngo̱ʼ wéñuʼ. Mú na̱jkhá gajmuʼ a̱ʼdióʼ gásngáa ga̱jma̱a̱ numuu Biblia, ga̱jma̱a̱ rúʼko̱ nambáyuxu makuwáanʼ májánʼ. Niniguxu̱ʼ mbuʼyáʼ xóo muriʼña̱a̱ graxe̱ ndrígóo Sara, ga̱jma̱a̱ niʼni makuwáanʼxu gagi wéñuʼ índo̱ ndiyaxu xú káʼnii nambáxu̱u̱ itháan ga̱jma̱a̱ Jeobá”. Sara támiñuu índo̱ niraʼnuu gaʼkhu, niniñuuʼ guʼwá ndxájkun náa na̱jkha̱ ga̱jma̱a̱ nijngúun iyááʼ.

14. a) Xú káʼnii embríguii ñajunʼ rí nurugui̱i̱n e̱gi̱ʼ ga̱jma̱a̱ ñajunʼ rí muʼsngúún xa̱bu̱ rá. b) Ndiéjunʼ exkaxánʼ muʼni ajngáa rí niʼthí Pablo náa 2 Timoteo 4:1, 2 rá.

¹⁴ Maski ajndu naʼkhunʼ rí nuʼtáraʼa nda̱a̱ rí eʼngo̱o̱ erígá numuu rí tséxkamiin xa̱bu̱, xúniʼñáʼ rí a̱jkiu̱lú majmáa ga̱jma̱a̱ numuu rígi̱. Garmáʼáan a̱jkiu̱lú rí Jesús niʼni mbríguii ñajunʼ ndrígúlú xóo ñajunʼ rí nurugui̱i̱n e̱gi̱ʼ. Bi̱ nurugui̱i̱n e̱gi̱ʼ ma̱ndoo makuwá mbaʼa horas ru̱ñi̱ʼ e̱gi̱ʼ mu xáʼngu̱u̱n gúru̱gua̱a̱ nimbáa. Rígá mbiʼi rí nagún mbruʼun o miʼcha̱, ma̱ngaa nguáná itháán mitsinguánʼ (Luc. 5:5). Xúʼko̱ má kayuuʼ, tikhun xa̱bi̱i̱ Jeobá naʼngo̱o̱ a̱jkiu̱ún nutaraʼa mbaʼa horas ga̱jma̱a̱ nagún náa mixtiʼkhu xuajen. Nuni rígi̱ mu ma̱ndoo muxkamiin itháan xa̱bu̱ bi̱ mutaruʼun. Bi̱ nuni tsiakii rígi̱ naʼngu̱u̱n nuxkamin xa̱bu̱ bi̱ gajkhun nanigu̱u̱nʼ  mudxawíín ajngáa rí nuʼtáraʼa. Lá ma̱ndoo muʼtáraʼa mbá mbiʼi o náa mbá xuajen rí gajkhun nduʼyáá rí muxkamiin xa̱bu̱ bi̱ nanigu̱u̱nʼ mudxawíín ráʼ. (Atraxnuu 2 Timoteo 4:1, 2.) *

15. Náá numuu rí ndayóoʼ maʼngo̱o̱ a̱jkiu̱lú rí muʼsngúún xa̱bu̱ rá.

¹⁵ Ndíjkha rí ndayóoʼ maʼngo̱o̱ a̱jkiu̱lú índo̱ muʼsngáá mbáa xa̱bu̱ rá. Mbá numuu nindxu̱u̱, raʼkháa i̱ndó ndayóoʼ muʼsngáá xa̱bu̱ mu maninuʼ rí naʼthí náa Biblia. Ndayóoʼ mumbayíí maniniiʼ ga̱jma̱a̱ maʼndoo kaʼyoo Jeobá. Ma̱ngaa mumbayíí mbaʼyoo ndiéjunʼ rí Jesús na̱nda̱ʼa̱ muni xa̱bi̱i̱, gíʼmaa mumbayíí mbaʼyoo ndiéjunʼ rí ndayóoʼ maʼni mu mani̱ndxu̱u̱ mbáa cristiano gajkhun. Mbaʼyóoʼ rí makuwáanʼ má xúʼko̱ gajmiúlú índo̱ ikhaa gáʼnimbánuu ikha rí na̱ʼkha̱ náa Biblia. Tikhun bi̱ nunigajmaa naʼngu̱u̱n nuriʼkumijnáán mbá nacha̱, mu tikhun ndañúunʼ mba̱yu̱ʼ tsiguʼ.

16. Ndiéjunʼ ejmañuluʼ ga̱jma̱a̱ numuu Raúl rá.

¹⁶ Rí nigíʼnuu mbáa misionero náa Perú naʼni mbuʼyáá rí nañambáá wéñuʼ dí maʼngo̱o̱ a̱jkiu̱lú. Ikhaa naʼthí: “Mbáa bi̱ naʼnigajmaa̱ Biblia bi̱ mbiʼyuu Raúl niʼnigájmaa má a̱jma̱ libros. Mú kaʼníí xóó tsériʼkumináanʼ. Phú raʼkhí kayuuʼ xtáa, naʼthí ajngáa tséjmaa ga̱jma̱a̱ e̱ji̱i̱n tséyamajkuíí. Mú, numuu rí tániñuuʼ ra̱jkha̱ reunión, ikha jngó na̱jkhá ra̱yo̱o̱ má xúʼko̱ ikhaa gajmíi̱n bi̱ kuwa náa goʼwóo. Itháan rí ajtsú tsíguʼ dí niniʼniiʼ, ikhú niriʼkumina̱a̱ʼ ga̱jma̱a̱ nijngúun iyááʼ”.

17. Ndiéjunʼ gúʼyáá náa i̱mba̱ artículo rá.

¹⁷ Jesús niʼthúluʼ rí ‹mu̱ʼgua̱ ga̱jma̱a̱ muʼsngúún xa̱bu̱›. Mu munimbánii kiʼtáñajunʼ rígi̱, ndayóoʼ muʼtáruʼun xa̱bu̱ bi̱ nundxa̱ʼwa̱a̱ i̱mba̱ núthu edxu̱ún ki xóo ikháanʼ, asndu xa̱bu̱ bi̱ tsegún nimbá religión o bi̱ nakumu̱ún rí nda̱wa̱a̱ Dios. Náa i̱mba̱ artículo, mbuʼyáá xú kaʼnii gugíʼdi̱i̱ muʼthán ga̱jma̱a̱ numuu Reino mbáa xa̱bu̱ bi̱ xúgi̱ kaʼnii.