1, 2. a) Ndíjkha dí ragíʼmaa maʼniulú tsiánguá rí maʼga̱nú mbá mbiʼi dí xúniñulú muʼtáraʼa xá. b) Ndiéjunʼ guʼnigajmaa náa artículo rígi̱ rá.

NÁKHA tsíguʼ 2018, itháan rí mbá 223,000 publicadores kuwa náa mbá xuajen rí nánguá eniñu̱u̱ʼ mutaraʼa. Rígi̱ tséʼniulú tsiánguá, xó má ndiʼyáá náa artículo rí ninújngoo ikháanʼ bi̱ ni̱ndxu̱lú cristianos gajkhun majuixkulú (2 Tim. 3:12). Tséʼniuu má náa kuwaanʼ, maʼga̱nú mbá mbiʼi rí Xa̱bu̱ Ñajunʼ xúniñulúʼ muʼni ñajuunʼ Jeobá.

² Á mú Xa̱bu̱ Ñajunʼ nánguá eniñulú muʼtáraʼa, mbáa muʼguanú muʼnimíjna̱ graxe̱ xóo rígi̱: “Dí majuixkulú nandoo gáʼthúu̱n rí Jeobá nánguá eñawulúʼ ráʼ. Lá mambáa rí nduʼyamajkuíí Jeobá ráʼ. Lá mbaʼyóoʼ maʼgá i̱mba̱ xuajen náa ma̱ndoo mani ñajuunʼ Jeobá ráʼ.” Náa artículo rígi̱, muriʼña̱a̱ graxe̱ rígi̱. Ma̱ngaa mbuʼyáá xú gándoo gúʼni mú xúniʼñáánʼ ru̱ʼni̱ ñajuunʼ Jeobá índo̱ gajuixkúlú ga̱jma̱a̱ xú káʼnii tsáʼkhá gáʼyoo muʼni gaʼduunʼ.

3. Xó má eʼthí náa 2 Corintios 11:23-27, ndiéjunʼ nigíʼnuu apóstol Pablo ga̱jma̱a̱ ndiéjunʼ eʼsngúlúʼ xkridoo xá.

³ Á mú nánguá niñulú muʼtáraʼa, mbáa ma̱ndoo mundxaʼwamíjna̱ rí Dios nánguá ñawunlúʼ. Mú ragájkhun rúʼko̱. Gundxa̱ʼwa̱míjna̱ ga̱jma̱a̱ numuu apóstol Pablo. Nikujmaa kaʼwu rí Jeobá nixtáa má xúʼko̱ ga̱jma̱a̱ ikhaa. Niʼnirámáʼ mbá 14 cartas rí na̱ʼkha̱ náa Escrituras Griegas Cristianas ga̱jma̱a̱ ninindxu̱u̱ apóstol. Maski ajndu xúʼko̱ ikhaa nimínuuʼ wéñuʼ (atraxnuu  2 Corintios 11:23-27). * Xkri̱da ndrígóo naʼsngúlú rí Jeobá naniñuuʼ rí xa̱bi̱i̱ bi̱ guájun jmbu majuixkhún.

4. Ndíjkha rí nawiyuuʼ kaʼyulú numbaaʼ rá.

⁴ Jesús niʼthí náá numuu rí ndayóoʼ muguaʼthi̱i̱n rí majuixkulú. Niʼthí rí ikháanʼ mawi̱ñu̱u̱nʼ kuyulúʼ numuu rí nánguá nindxulú náa numbaaʼ rígi̱ (Juan 15:18, 19). Rí majuixkulú tsíyoo gaʼthí rí Jeobá nánguá xtáa ga̱jma̱á nindxulú. Na̱nguá, rúʼko̱ gasngájma rí kuwáanʼ ru̱ʼni̱ rí jmbu.

5. Lá maʼngu̱u̱n xa̱bu̱ numbaaʼ muni gámbáa rí nduʼyamajkuíí Jeobá ráʼ. Arathá mbá xkri̱da.

⁵ Xa̱bu̱ numbaaʼ xáʼngu̱u̱n gúni gámbáa dí nduʼyamajkuíí Dios bi̱ gíʼdoo xúgíʼ tsiakii. Mbaʼin xa̱bu̱ bi̱ tsíñún guyáá Jeobá nigíʼ muni rígi̱, mú táʼngu̱u̱n. Gundxaʼwamíjna̱ dí nirígá nákha Segunda Guerra Mundial. Náa mbaʼa xuajen, Xa̱bu̱ Ñajunʼ nixkúún xa̱bi̱i̱ Dios ga̱jma̱a̱ nini gíníi. Raʼkháa i̱ndó nazis túniñu̱u̱nʼ mutaraʼa a̱ngiu̱lú, ma̱ngaa Xa̱bu̱ Ñajunʼ Australia ga̱jma̱a̱ Canadá ga̱jma̱a̱ i̱ʼwáʼ. Maski ajndu xúʼko̱ nirígá, mú Jeobá niʼni tsajkurámiinʼ a̱ngiu̱lú. Nákha tsíguʼ 1939, índo̱ nigi̱ʼdu̱u̱ guerra, náa xúgíʼ numbaaʼ káaʼ mbá 72,475 publicadores kuwa ikhú. Índo̱ niguámbá guerra, tsíguʼ 1945, nikuwa mbá 156,299 publicadores itháan mbaʼin ki xóo nákha ginii.

6. Ndiéjunʼ rí májánʼ ma̱ndoo marigá índo̱ nuxkulú xá. Arathá mbá xkri̱da.

⁶ Ragíʼmaa mamiñúlú, dí majuixkulú ma̱ndoo maxkajxa̱ánʼ mu’ni itháan ñajuunʼ Jeobá. Guʼyáá mbá xkri̱da ndrígu̱ún a̱jmi̱i̱n a̱ngiu̱lú bi̱ guáʼdaa mbá ada̱ chíʼgíiʼ bi̱ kuwa náa mbá xuajen rí Xa̱bu̱ Ñajunʼ tsiniñúnʼ mutaraʼa. A̱ngiu̱lú bugi̱ túniñanʼ rí gamíi maʼni miñúún, ikhiin nigi̱ʼdi̱i̱ ninindxu̱ún precursores regulares. Ga̱jma̱a̱ numuu rúʼko̱, a̱ʼgiu̱u̱ ndxájulú niniñuuʼ mbá ñajunʼ náa na̱da̱ʼ mbáa mbújkha̱a̱. Ndxájulú xa̱biya̱ niʼthí rí ga̱jma̱a̱ numuu dí Xa̱bu̱ Ñajunʼ tséniñaaʼ rí xa̱bi̱i̱ Jeobá mutaraʼa,  rúʼko̱ naʼni rí xa̱bu̱ maʼndún mbuyáá itháan ga̱jma̱a̱ numún xa̱bi̱i̱ Jeobá. Xúʼko̱ táʼniuu mingíjyúuʼ maʼsngúún eʼwíínʼ xa̱bu̱. Ma̱ngaa rígi̱ nimbáñun eʼwíínʼ. Mbáa ndxájulú bi̱ kayá edxu̱u̱ bi̱ xtáa náa xuajen má rúʼko̱ niʼthí rí mbaʼin bi̱ niniña̱a̱ʼ runi ñajuunʼ Jeobá nigíʼdi̱i̱ nigún mbu̱júu̱ʼ reunión ga̱jma̱a̱ nagájnún gútaraʼa.

7. a) Ndiéjunʼ ejmañulú náa Levítico 26:36, 37 rá. b) Dí gátani ikháán á mu tsíniñaʼ marataráʼa xá.

⁷ Índo̱ xa̱bu̱ sia̱nʼ xúniñaʼ muʼtáraʼa, muni xúgíʼ xó má eʼngo̱o̱ mu munimiñúlú. Muthi mbaʼa nduwaʼ, muxuʼmii xa̱bu̱ mu mbuyáaʼ dí rígá náa guʼwúlú, magún kudáanʼ ga̱jma̱a̱ tsiakii náa Xa̱bu̱ Ñajunʼ o asndu muxudaanʼlú guʼwá e̱jua̱nʼ tikhuanʼ rí ikháanʼlu. Makumu̱ún rí muxudiinʼ a̱ngiu̱lú náa guʼwá e̱jua̱nʼ rúʼko̱ gáʼni rí mamiñúlú. Á mu nuniʼñánʼ dí rúʼko̱ maʼnimíñúlú, mani̱ndxu̱u̱ xóo ikháanʼ má gúʼni rí xándoo muʼtáraʼa. Mú tsíyulú manindxu̱lúʼ xóo xa̱bu̱ bi̱ naʼthí ga̱jma̱a̱ numún náa Levítico 26:36, 37 (atraxnu). * Xúniʼñáʼ rí gamíi maʼni rí xúʼni̱ ñajuunʼ Jeobá. Gakumulú kuʼyáá ga̱jma̱a̱ xúgíʼ a̱jkiu̱lú, xúniʼñámíjná rí mamiñúlú (Is. 28:16). Gunda̱ʼa̱a̱ má xúʼko̱ Jeobá rí maxnúlú ikha. Numuu rí nduʼyáá dí Xa̱bu̱ Ñajunʼ bi̱ guaʼdáá itháan tsiakii xáʼngu̱u̱n guni rí muniʼñáʼ ru̱ʼni̱ ñajuunʼ Dios (Heb. 13:6).

8, 9. a) Ndiéjunʼ gíʼmaa maʼni mámbáa xa̱bu̱ o bi̱ kayá edxu̱u̱ náa mbá guʼwíin rá. b) Ndiéjunʼ gambáyulú muraʼwíí rí muʼni rá.

⁸ Índo̱ gúxkulú, mbáa asndu muraximíjna̱ á mu ma̱ndoo muʼguá gúʼni ñajuunʼ Jeobá i̱mba̱ xuajen. Mámbáa kaʼyoo maraʼwíí dí maʼni. A̱ngiu̱lú ma̱ndoo mumbayulúʼ ga̱jma̱a̱ xkri̱da xóo nini cristianos bi̱ nikuwa nákha siglo timbá índo̱ nijuixkúún. Nda̱wa̱á rí nixiyáa Esteban, discípulos bi̱ kuwa náa Jerusalén nigún gakuwa náa mbaʼa xuajen, xóo Judea ga̱jma̱a̱ Samaria, asndu nigún náa Fenicia, Chipre ga̱jma̱a̱ Antioquía (Mat. 10:23; Hech. 8:1; 11:19). Mú tikhuun ndiyáá xkri̱da ndrígóo Pablo rí ikha niguanúu náa xuajen dí nixkúún a̱ngiu̱lú. Maski ajndu xúʼko̱, ikhaa niguanúu mu maʼtáraʼa ga̱jma̱a̱ mambáñun a̱ngiu̱lú bi̱ najuixkúún (Hech. 14:19-23).

⁹ Ndiéjunʼ ejmañulú náa xkri̱da rígi̱ rá. Mámbáa bi̱ kayá edxu̱u̱ náa mbá guʼwíin kaʼyoo maraʼwíí dí maʼni. Mu maʼni rígi̱, ginii gíʼmaa maʼtákañúun Jeobá ga̱jma̱a̱ mbaʼyoo xú káʼnii kuwa bi̱ kúwi̱i̱n náa go̱ʼo̱o̱, ga̱jma̱a̱ mbaʼyoo á mu májánʼ gáʼni rí maʼga i̱mba̱ níʼkhá. Rígi̱, mámbáa cristiano ‹kaʼyoo maraʼwíí rí maʼni›. (Gál. 6:5). Ragíʼmaa muʼtánumáá mbáa ndxájulú á mu naraʼwíí mbá rí maʼni.

10. Xú káʼnii ikha gáxnulú sucursal ga̱jma̱a̱ bi̱ kuya̱ edxu̱u̱ náa congregación rá.

¹⁰ Xú káʼnii gándoo guʼyamajkuíí má xúʼko̱ Jeobá índo̱ gúxkulú xá. Sucursal maxnún ikha a̱ngiu̱lú bi̱ kuya̱ edxu̱u̱ náa congregación ga̱jma̱a̱ xú káʼnii gúni mu mundrígú ganitsu espiritual, xóo marigá reunión ga̱jma̱a̱ xóo muʼtáraʼa. Mú ndiéjunʼ garigá á mu sucursal nánguá xóo maʼtámíjná gajmíi̱n bi̱ kuya̱ edxu̱u̱ rá. Ikhú, a̱ngiu̱lú bi̱ kuya̱ edxu̱u̱ muxnulú ikha rí na̱ʼkha̱ náa Biblia ga̱jma̱a̱ náa i̱yi̱i̱ʼ ndrígúlú, xóo gúʼni mu xúniʼñáʼ ru̱ʼni̱ ñajuunʼ Dios (Mat. 28:19, 20; Hech. 5:29; Heb. 10:24, 25).

11. Náá numuu nduʼyáá májánʼ rí maguaʼdáá má xúʼko̱ ganitsu rí na̱ʼkha̱ náa Dios, ga̱jma̱a̱ ndiéjunʼ gíʼmaa muʼni mu muñewa̱a̱n rá.

 ¹¹ Jeobá niʼthí rí xa̱bi̱i̱ maguaʼdáá ma xúʼko̱ ganitsu rí na̱ʼkha̱ náa ikhaa (Is. 65:13, 14; Luc. 12:42-44). Ikha jngó nduʼyáá gajkhun rí xuajñuu maʼni xó má eʼngo̱o̱ mu muxnulú rí gáʼyulú mu muguajún jmbu. Mú mangáanʼ rígá rí ndayóoʼ muʼni. Índo̱ gájuixkulú, guʼyáʼ náa ma̱ndoo murkaʼwu Biblia ga̱jma̱a̱ i̱ʼwáʼ i̱yi̱i̱ʼ ndrígúlú, mu xa̱bu̱ xáʼngu̱u̱n gúxkamaa. Guguaʼdáá ngu̱ʼwa̱, xúguaʼdáá pa̱jnu̱ rí gíʼdoo wéñuʼ numuu, i̱yi̱i̱ʼ o formato digital ndrígúlú. Xúgiáanʼ gíʼmaa muʼni rígi̱, numuu rí i̱ndó xúʼko̱ ma̱ndoo muguajún jmbu.

12. Xú káʼnii awan gándoo murawíi a̱ngiu̱lú bi̱ kuya̱ edxu̱u̱ rí xóo marigá reunión rá.

¹² Mú ndiéjunʼ gárígá ga̱jma̱a̱ reunión dí naguaʼdáá rá. A̱ngiu̱lú bi̱ kuya̱ edxu̱u̱ muriyaʼ awan rí maguaʼdáá reunión mu xa̱bu̱ xúyáá. Mbáa mutulú rí ngujmáánʼ gúʼgua̱ mámbá reunión, ma̱ngaa mbáa nángi eʼni gáxtiʼkhu̱u̱ hora ga̱jma̱a̱ náa minaʼ maguaʼdáá. Mú ndiéjunʼ gándoo muʼni mu muñeumíjna̱ rá. Índo̱ gúʼgua̱ náa reunión mañúú gúʼthá xúʼko̱ má índo̱ gagajnáʼ, mbáa xtíñúlú rí maguʼunlú mani̱ndxu̱u̱ asndu xú kaʼníí mu xa̱bu̱ xúyáá rí na̱jkua̱lú reunión.

13. Ndiéjunʼ ejmañulú rí xóo nini a̱ngiu̱lú náa Unión Soviética rá.

¹³ Ndiéjunʼ gárígá ga̱jma̱a̱ numuu rí muʼtáraʼa rá. Mixtiʼkhu ganindxu̱u̱ mámbá xuajen. Mú, ikháanʼ nandulú kuʼyáá wéñuʼ Jeobá ga̱jma̱a̱ nandulú muʼthá má xúʼko̱ ga̱jma̱a̱ numuu Reino ndrígóo, ikha jngó mbuʼyáá xú káʼnii gándoo muʼtáraʼa (Luc. 8:1; Hech. 4:29). Emily Baran nindxu̱u̱ mbáa bi̱ naʼnigajmaa̱ ga̱jma̱a̱ numuu rí nirígá, ikhaa naʼthí xóo nitaraʼa xa̱bi̱i̱ Jeobá náa Unión Soviética: “Índo̱ Xa̱bu̱ Ñajunʼ nithúún rí ni xúthún itháan eʼwíínʼ ga̱jma̱a̱ numuu fe ndrígu̱ún, ikhú ikhiin nigíʼdi̱i̱ nitarúʼún xa̱bu̱ bi̱ kuwa mijngii gajmiún, bi̱ nuñajunʼ gajmiún ga̱jma̱a̱ bi̱ nambáxu̱u̱n gajmiún. Ga̱jma̱a̱ numuu rígi̱ nigún kudiin náa muñejunʼ gákhíi wéñuʼ, mú ikhiin nigíʼdi̱i̱ nitarúʼún eʼwíínʼ presos bi̱ kuwa ikhí”. A̱ngiu̱lú bi̱ nikuwa náa Unión Soviética túniña̱a̱ʼ rutaraʼa maski ajndu nijuixkúún ga̱jma̱a̱ niguma gíníi wéñuʼ. Xúʼko̱ má gíʼmaa muʼni mangáanʼ á mu tséniñulú muʼtáraʼa náa xuajen kuwáanʼ.

14. Xú káʼnii tsáʼkhá guʼni gáʼdu̱u̱nʼ á mu nuʼnimbulúʼ rí naʼthí náa Salmo 39:1 rá.

¹⁴ Tsu̱ma̱a̱ gúʼni ga̱jma̱a̱ rí nuʼthúún eʼwíínʼ. Mbiʼi rí gájuixkulú, gíʼmaa mbuʼyáá náa ‹mbiʼi rí xúʼthá› (Ecl. 3:7). Gíʼmaa muñewa̱a̱n mu xúʼthá mbiʼñún a̱ngiu̱lú, náa nagimbáanʼ, xóo nuʼtáraʼa, xú kaʼnii endrígúlú ganitsu espiritual. Rígi̱ xáʼyóoʼ muʼthúún Xa̱bu̱ Ñajunʼ, ni xáʼyóoʼ muʼtháán mbáa bi̱ nambáxulúʼ gajmiúlú o bi̱ kuñún bi̱ kúwi̱i̱n náa xuajñulú o náa  eʼwáʼ xuajen. Á mu nuʼni, gamíi rí a̱ngiu̱lú maxtugui̱i̱n (atraxnuu Salmo 39:1). *

15. Ndiéjunʼ gáʼni Gixa̱a̱ ga̱jma̱a̱ xú káʼnii gándoo guñeumíjna̱ náa tsáʼkhá ndrígóo xá.

¹⁵ Xúʼni̱ wajimíjná ga̱jma̱a̱ numuu xkujndu. Gixa̱a̱ ndaʼyoo májánʼ rí náa mbá guʼwá rí xa̱bu̱ nuni wajimíjná xáʼngu̱u̱n gákuwá mba̱yu̱ʼ (Mar. 3:24, 25). Ikha jngó, ma’ni má xúʼko̱ rí muʼni wajimíjná. Ikhaa nandoo rí ikháanʼ maguiyulúʼ kuʼyamijná kaníkháanʼ raʼkháa rí maguiyulúʼ kuʼyáá ikhaa.

16. Xú káʼnii májánʼ xkri̱da nigíʼ ndxájulú Gertrud Poetzinger rá.

¹⁶ Asndu cristianos bi̱ mba̱yu̱ʼ má kuwa runi ñajuunʼ Jeobá ndayóoʼ muñeumíjna̱ náa tsáʼkhá rígi̱. Guʼyáá rí niʼni Gertrud Poetzinger ga̱jma̱a̱ Elfriede Löhr. A̱jmi̱i̱n a̱ngiu̱lú gu̱ʼu̱ bugi̱ ninindxu̱ún bi̱ kaxtaʼwíin, índo̱ nikuwa náa campo de concentración nazi gajmiún eʼwíínʼ a̱ngiu̱lú gu̱ʼu̱. Gertrud nigíʼdu̱u̱ nikiʼnáa kaʼyoo Elfriede numuu rí discurso dí naxná naʼni rí muda̱a̱ tsiakii a̱ngiu̱lú bi̱ kuwa ikhí. Mbiʼi nda̱wa̱á ikhaa nitiyu̱u̱ʼ ga̱jma̱a̱ niʼtákáñuu Jeobá rí mambáyúu. Ikhaa niʼnirámáʼ: “Gíʼmaa majmañulúʼ mbuʼyáá rí eʼwíínʼ najmiin muni itháan májánʼ ñajunʼ ki xóo ikháanʼ”. Xú káʼnii niʼni, mu maríyaaʼ tsíxígú náa a̱jkiu̱u̱n xá. Ikhaa nigíminaʼ mbaʼyoo xóo xa̱bu̱ nindxu̱u̱ Elfriede. Xúʼko̱ nindoo nitanga̱a̱ nimbáxu̱u̱ ga̱jma̱a̱. Najmiin nikáwíin náa campo de concentración ga̱jma̱a̱ nini má xúʼko̱ ñajuunʼ Jeobá náa xúgíʼ mbiʼi rí nikuwa náa mbayííʼ gi̱i̱. Á mu nuʼni míjna makuwáanʼ mbóó jnduʼ gajmiúlú a̱ngiu̱lú maski ajndu ni̱ndxu̱ún mixtiʼkuiin, rúʼko̱ gáʼni rí xúʼni̱ wajimíjná (Col. 3:13, 14).

17. Náá numuu rí gíʼmaa muʼnimbulúʼ má xúʼko̱ ikha rí gákánúlú rá.

¹⁷ Guʼnimbulúʼ má xúʼko̱ ikha rí gundrígú. Á mu nuʼni xóo ethi a̱ngiu̱lú bi̱ kuya̱ edxu̱u̱, maʼni rí xaguaʼdáá xkujndu (1 Ped. 5:5). Guʼyáá mbá xkri̱da. Náa mbá xuajen rí Xa̱bu̱ Ñajunʼ tséniñaaʼ miʼtáraʼa, a̱ngiu̱lú nijuiʼthún rí xúniñaʼ i̱yi̱i̱ʼ náa nutaraʼa. Mú mbáa precursor nikumu̱u̱ rí maʼni ikhaa nindxu̱u̱ itháan májánʼ ki xóo rí nithi a̱ngiu̱lú. Ndiéjunʼ nirígá rá. Mbá mbiʼi, índo̱ ikhaa xtáa raʼtáraʼa, policía nini̱i̱ mbaʼa graxe̱ ikhaa gajmíi̱n eʼwíínʼ a̱ngiu̱lú. Ma̱ngaa policía, nigún kidxu̱únʼ ga̱jma̱a̱ nindrígúu i̱yi̱i̱ʼ rí a̱ngiu̱lú niniñaaʼ. Ndiéjunʼ eʼsngúlúʼ xkri̱da rígi̱ rá. Rí gíʼmaa muʼnimbulúʼ ikha rí gúxna a̱ngiu̱lú bi̱ kuya̱ edxu̱u̱, maski ajndu nakumulú rí ikháán majmáanʼ muʼni itháan májánʼ. Jeobá maʼni tsajkurámáanʼlu má xúʼko̱ á mu nuʼnimbulúʼ kuʼñúún a̱ngiu̱lú  bi̱ ikhaa nigruigi̱i̱n mu muxnulú ikha (Heb. 13:7, 17).

18. Náá numuu rí xáʼyóoʼ mudri̱ga̱ ikha rí tséyóoʼ ráʼ.

¹⁸ Xúdri̱ga̱ ikha rí tséyóoʼ. Á mu bi̱ kuya̱ edxu̱u̱ nuni rígi̱, muni rí eʼwíínʼ xákuwa májánʼ. Ndxájulú Juraj Kaminský niʼthí ndiéjunʼ nirígá índo̱ nixkúún a̱ngiu̱lú náa Checoslovaquia: “Índo̱ tikhun a̱ngiu̱lú bi̱ kuya̱ edxu̱u̱ nixtugui̱i̱n, eʼwíínʼ bi̱ kuya̱ edxu̱u̱ náa congregación ga̱jma̱a̱ circuitos nigíʼdi̱i̱ nini mbá i̱yi̱i̱ʼ náa naʼthí ndiéjunʼ rí gíʼmaa muni ga̱jma̱a̱ ndiéjunʼ dí ragíʼmaa muni publicadores”. Jeobá táxnúlú ñajunʼ rí muraʼwíí rí muni eʼwíínʼ. Bi̱ nagrui̱ga̱ ikha, tsiñawu̱u̱n a̱ngiu̱lú, naʼni rí ikhaa maʼtáñajuunʼ fe ndrígu̱ún (2 Cor. 1:24).

19. Xó má eʼthí náa 2 Crónicas 32:7, 8, náá numuu rí xáʼyóoʼ mamiñúlú maski ajndu Gixa̱a̱ maʼni xó má eʼngo̱o̱ mu maʼnimíñúlú rá.

¹⁹ Gixa̱a̱ bi̱ sia̱nʼ gajmiúlú, maxkhúún má xúʼko̱ xa̱bi̱i̱ Jeobá bi̱ guájun jmbu (1 Ped. 5:8; Rev. 2:10). Ikhaa ga̱jma̱a̱ xa̱bi̱i̱ munimíjna̱ má xúʼko̱ rí xúniñulúʼ muʼni ñajunʼ ndrígúlú. Mú nda̱a̱ mbá numuu rí mamiñúlú (Deut. 7:21). Jeobá maxtáa má xúʼko̱ ga̱jma̱á ni̱ndxu̱lú ga̱jma̱a̱ ikhaa má gámbáyúlú maski ajndu muxkulú (atraxnuu 2 Crónicas 32:7, 8). *

20. Ndiéjunʼ gátani ikháán rá.

²⁰ Guʼyaridúún a̱ngiu̱lú bi̱ nikuwa nákha siglo timbá, ikhiin nithúún Xa̱bu̱ Ñajunʼ: “Á mu májánʼ náa inuu Dios mundxawiinxu rí gúthala ikháanʼ raʼkháa náa Dios, gútha ikháanʼ xóo maʼni. Mú ikháanʼxu, xándoo muniʼñáʼxu mutha rí ndi̱ya̱a̱ ga̱jma̱a̱ rí nidxawiinxu” (Hech. 4:19, 20).