1. Ndiéjunʼ niʼthúún cristianos bi̱ kixtaʼwíín ga̱jma̱a̱ xi̱ʼ kaʼwu apóstol Pablo rá.

“GUNIʼÑÁANʼ rundáwami̱jna̱ náa numbaaʼ rígi̱”, niʼthún apóstol Pablo cristianos bi̱ nikuwa nákha siglo timbá (Rom. 12:2). Náá numuu rí niʼthúún ajngáa rígi̱ xa̱bu̱ bugi̱ bi̱ nuni káxi̱ ñajuunʼ Dios bi̱ kaxtaʼwíin ga̱jma̱a̱ xi̱ʼ kaʼwu rá. (Rom. 1:7.)

2, 3. a) Ndiéjunʼ eʼni Gixa̱a̱ mu ikháanʼ xuʼyamajkuíí Jeobá rá. b) Xú káʼnii gáʼndoo guriʼyáaʼ náa ku̱ma̱ ndrígúlú rí ‹naʼni gakhi̱i̱ magajnáa› rá.

² Pablo nixmiéjuunʼ rí ku̱ma̱ ndrígu̱ún xa̱bu̱ ga̱jma̱a̱ ku̱ma̱ dí rígá náa numbaaʼ ndrígóo Gixa̱a̱ maʼni gachíin a̱ngiu̱lú bi̱ kaxtaʼwíin bugi̱ (Efes. 4:17-19). Rígi̱ ma̱ngaa ma̱ndoo magíʼnuu asndu tsáa rí ikháanʼlu. Gixa̱a̱, bi̱ naʼtáñajunʼ náa numbaaʼ rígi̱, naʼni xúgíʼ xó má eʼngo̱o̱ ga̱jma̱a̱ najmuu mbaʼa tsáʼkhá mu maʼni rí murájñuunʼ náa Jeobá. Mbá rí najmuu nindxu̱u̱ rí mundxaʼwamíjna̱ i̱ndó ga̱jma̱a̱ numulúʼ ikháanʼ. Ma̱ngaa ma̱ndoo majmuu rí muʼni mba̱ʼwu̱míjna̱ ga̱jma̱a̱ numuu xuajñulúʼ, xóo eʼni o nguáthá tsídánʼ escuela nijkualúʼ mu mundxaʼwamíjná xóo ikhaa nandoo.

³ Lá ma̱ndoo muriʼyáaʼlú ku̱ma̱ dí ra̱májánʼ dí ‹naʼni gakhi̱i̱ magajnáa› ráʼ. (2 Cor. 10:4.) Guʼyáá rí niʼthí Pablo: “Numuu rí nuʼni gámbáa rí nundxaʼwamíjná ga̱jma̱a̱ xúgíʼ rí nakuximinaʼ náa ku̱ma̱ ndrígóo Dios; ga̱jma̱a̱ nuʼni rí xúgínʼ muriʼkhu̱u̱ xóo endxaʼwamíjna̱ mu munimbu̱ún kuyáá Cristo” (2 Cor. 10:5). Mú, Jeobá ma̱ndoo mambáyulúʼ mu maʼngulú muʼnimbáti̱ga̱a̱ ku̱ma̱ rí xkawiʼ. Xó má thana naʼni̱i̱ ga̱jma̱a̱ mbá nandii, xúʼko̱ má kayuuʼ Ajngá rawunʼ Dios ma̱ngaa maʼngo̱o̱ maʼni gámbóo ku̱ma̱ ra̱májánʼ dí rígá náa numbaaʼ ndrígóo Gixa̱a̱.

4. Ndiéjunʼ rí ndiyóoʼ muriʼkumijnááʼ nákha niniʼnúuʼ rí gajkhun rá.

⁴ Garmáʼáan a̱jkiu̱lú xúgíʼ rí ndiyóoʼ muriʼkhumijná nákha nindrígú rí gajkhun dí na̱ʼkha̱ náa Dios ga̱jma̱a̱ rí nixuʼdámíjná muʼni ñajuunʼ Jeobá. Mbaʼánʼ ndiyóoʼ muniʼñáʼ ru̱ʼni̱ dí xkawiʼ (1 Cor. 6:9-11). Nuxnáa wéñuʼ numaaʼ Dios rí nimbáyulúʼ muniʼñáaʼ xúgíʼ rúʼko̱.

5. Xú káʼnii a̱jma̱ numuu rí naʼthúlúʼ muʼni Romanos 12:2 rá.

⁵ Ikha jngó, ndayóoʼ muʼni míjna má xúʼko̱. Maski ajndu niniʼñáʼ mbaʼa aʼkhá rí mitsáʼkhúun rí nuʼni nákha xóó tséjngulú iyááʼ, ndayóoʼ muñeumíjna̱ má xúʼko̱ mu xátanga̱ánʼ muʼni rí niʼni nákha ginii. Xú kaʼnii rá. Pablo naʼthí: “Guniʼñáanʼ rundáwami̱jna̱ náa numbaaʼ rígi̱; mú itháan májánʼ, muriʼkhuíí xóo endxa̱ʼwa̱a̱ edxa̱la” (Rom. 12:2). Ikha jngó a̱jma̱ rí gíʼmaa muʼni. Timbá, gíʼmaa muniʼñáʼ rundaʼwamíjna náa numbaaʼ rígi̱. Rí maʼni a̱jma̱, guriʼkui̱i̱ xóo endxa̱ʼwa̱minaluʼ o muʼni nuxi̱i̱ʼ ku̱ma̱ ndrígúlú.

6. Ndiéjunʼ ejmañuluʼ náa xkri̱da rí niʼthí Jesús náa Mateo 12:43-45 rá.

⁶ Índo̱ Pablo niʼthí rí ndayóoʼ muriʼkhumijná nindoo gaʼthí rí ndayóoʼ muriʼkhumijná mbá xúgíʼ xóo ni̱ndxu̱lú raʼkháa i̱ndó muʼtháá. (Atayáá náa kúguamáʼáan “ Atriʼkumina̱a̱ʼ”). Gíʼmaa muriʼkhui̱i̱ xóo endxa̱ʼwa̱míjnalú, rígi̱ nandoo gáʼthúu̱n, rí ndayóoʼ muriʼkhui̱i̱ rí nanigulúʼ muʼni, rí nundxaʼwamíjná ga̱jma̱a̱ rí gíwanʼ asndu awún a̱jkiu̱lú. Ikha jngó xúgiáanʼ ndayóoʼ muʼnimíjna̱ graxe̱ rígi̱: “Ndiéjunʼ rí xtáá rariʼkuminaʼ mu mbayaridoo Cristo rá. Lá mbájníí nindxu̱u̱ ráʼ. O naʼniminaʼ mani̱ndxu̱ʼ mbáa cristiano gajkhun dxe’.” Rígi̱ nindxu̱u̱ mbá rí gíʼdoo wéñuʼ numuu. Náa Mateo 12:43-45, nuxkamaa mbá xkri̱da rí niʼthí Jesús náa naʼthúlúʼ xú káʼnii gíʼmaa  muʼni (atraxnuu). * Índo̱ Jesús niʼthí ajngáa rígi̱, ikhaa nindoo majmañulúʼ mbá gajkhun rí gíʼdoo wéñuʼ numuu: Raʼkháa i̱ndó muʼni gámbáa ku̱ma̱ dí raʼkhí, gíʼmaa mudriʼyáaʼ ku̱ma̱ ndrígóo Dios.

7. Xú káʼnii gándoo gúriʼkui̱i̱ xóo phú ni̱ndxu̱lú rá.

⁷ Lá gajkhun rí maʼngulú muriʼkhui̱i̱ xóo phú ni̱ndxu̱lú ráʼ. Náa Ajngá rawunʼ Dios naʼthí: “Gíʼmaa muriʼkhumijnála ga̱jma̱a̱ tsiakii ndrígóo edxa̱la, ga̱jma̱a̱ gíʼmaa muriʼkhumijnála dí xóo xa̱bu̱ ni̱ndxa̱la rí niguma xó má eyoo Dios rí jmbu ga̱jma̱a̱ rí gajkhun” (Efes. 4:23, 24). Xó má eʼyáá, majma̱ánʼ muriʼkumijnálúʼ, mú maʼniuluʼ miʼskhoo. Raʼkháa i̱ndó mbaʼyóoʼ murikháá dí ra̱májánʼ rí nandulúʼ muʼni. Ndayóoʼ rí muriʼkhui̱i̱ ‹tsiakii rí natsudaa edxu̱lúʼ› o ku̱ma̱ ndrígúlú. Rúʼko̱ nandoo gáʼthún rí muriʼkhui̱i̱ rí nandulúʼ, nanigulúʼ, ga̱jma̱a̱ rí naxkaxáanʼlú muʼni. Mu ma̱ndoo muʼni rígi̱, gíʼdoo rí muʼni tsiakimíjnalúʼ má xúʼko̱.

8, 9. Ndiéjunʼ eʼsngúlúʼ xkri̱da ndrígóo mbáa ndxájulú rá.

⁸ Guʼyáá xkri̱da ndrígóo mbáa ndxájulú bi̱ najmangu̱u̱ʼ nákha ginii ga̱jma̱a̱ ninigu̱u̱ʼ maga̱a̱n iya najnga̱a̱, ma̱ngaa naniguuʼ maxmínaʼ gajmíi̱n xa̱bu̱. Índo̱ ikhaa niriʼkhu̱u̱ xóo nindxu̱u̱ ga̱jma̱a̱ nijngúun iyááʼ, náa xuajen rí xtáa xa̱bu̱ nuthi májánʼ ga̱jma̱a̱ numuu. Mú, tséʼni ma mbayuuʼ rí nijngúun iyááʼ, ndxájulú niraʼnuu mbá rí niʼniuu mingíjyúuʼ: Náa goʼwóo ni̱ʼkha̱ mbáa xa̱bu̱ najnga̱a̱ gaʼthí wéñuuʼ. Nákha ginii, ndxájulú niʼngo̱o̱ a̱jkiu̱u̱n. Mú, ndxájulú nánguá niʼngo̱o̱ itháan índo̱ xa̱bu̱ bugi̱ niʼthá wéñuuʼ mbiʼyuu Jeobá. Ikha jngó nigájnuu gáxnúu. Ndíjkha rí nixnúu xá. Maski ajndu rí niʼnigajmaa̱ nimbáyúu rí xákiʼnáa nacha̱, mú xóó tséʼngo̱o̱ gáriʼkuminaʼ mbá kayuuʼ xóo nindxu̱u̱.

⁹ Maski ajndu xúgi̱ kaʼnii nirígá, ikhaa niʼniminaʼ má xúʼko̱ mu mariʼkhu̱u̱ xóo nindxu̱u̱ (Prov. 24:16). Ma̱ngaa bi̱ kuya̱ edxu̱u̱ nimbayíí mu maʼngo̱o̱ maʼni rígi̱, ga̱jma̱a̱ nda̱wa̱á ndxájulú bugi̱ ni̱jkha̱nú ninindxu̱u̱ mbáa bi̱ kayá edxu̱u̱. Mú, mbu̱júu̱ʼ nirígá xóo má nigíʼnuu nákha ginii, índo̱ ikhaa xtáa náa rexo̱o̱ Guʼwá nagimbáanʼ, ni̱ʼkha̱ mbáa xa̱bu̱ najnga̱a̱ ga̱jma̱a̱ nigíʼ maxnúu imba̱a̱ bi̱ kayá edxu̱u̱. Mú, ndiéjunʼ niʼni ndxájulú rá. Ikhaa nánguá nikiʼnáa ma̱ngaa nijmuu ajngáa wabaʼ mu maʼthúu̱n xa̱bu̱ najnga̱a̱ rí xájmangu̱u̱ʼ ga̱jma̱a̱ ni̱jkha̱a̱ kayáa goʼwóo. Náá numuu niʼni xúʼko̱ xá. Numuu rí niʼngo̱o̱ niriʼkhu̱u̱ mbá kayuuʼ xóo ninindxu̱u̱. Nigua̱jtha̱a̱ mbáa xa̱bu̱ bi̱ tséjmangu̱u̱ʼ ga̱jma̱a̱ mbáa xa̱bu̱ guabaaʼ, rígi̱ niʼni rí maʼga gamajkhu náa Jeobá.

10. Lá ramíʼskhoo nindxu̱u̱ rí muriʼkhu̱u̱ xóo phú ni̱ndxu̱lú ráʼ.

¹⁰ Rígi̱ tséguma mbá nacha̱ kayuuʼ ga̱jma̱a̱ tséguma ikháá. Mbáa mbaʼyóoʼ muʼni tsiakimijna mbayuuʼ tsiguʼ (2 Ped. 1:5). Dí makuwáanʼ nguáthá tsiguʼ náa rí gajkhun xáʼngo̱o̱ rúʼko̱. Gíʼmaa muʼni xó má eʼngo̱o̱ mu muriʼkhu̱u̱ xóo phú ni̱ndxu̱lú. Ndiéjunʼ gambáyulú rá. Guʼyáá tikhu rí gíʼdoo wéñuʼ numuu rí ndayóoʼ muʼni.

11. Xú káʼnii embáyulú rí muʼtájkáan mu muriʼkhu̱u̱ tsiakii rí natsudaa ku̱ma̱ ndrígúlú maʼni dí raʼkhí rá.

¹¹ Timbá rí gíʼmaa muʼni nindxu̱u̱ rí muʼtájkáan. Gíʼmaa munda̱ʼa̱ ikháá má rí ninda̱ʼa̱ bi̱ niʼnirámáʼ salmo índo̱ niʼthí: “Atani magúʼdoo mbóó a̱jkiu̱nʼ rí mikaʼwu, oh Dios, ga̱jma̱a̱ atagíwánʼ náa ikhúúnʼ i̱mba̱ xi̱ʼ rí nuxi̱ʼ ga̱jma̱a̱ rí jmbu” (Sal. 51:10). Gíʼmaa mbuʼyáá rí ndayóoʼ muriʼkhu̱u̱ tsiakii rí natsudaa ku̱ma̱ ndrígúlú maʼni dí raʼkhí ga̱jma̱a̱ munda̱ʼa̱a̱ Jeobá rí mambáyulúʼ. Mú, xú káʼnii eʼyáá rí ikhaa gajkhun mambáyulúʼ xá. Guʼyáá xú kaʼnii niʼthúún xa̱bu̱ israelitas nákha mbiʼi rí nixtáa Ezequiel: “Ga̱jma̱a̱ mani rí maʼni̱i̱ imbóó a̱jkiu̱ún, ga̱jma̱a̱ magíwánʼ mbá xi̱ʼ nuxi̱ʼ náa ikhiin; [...] ga̱jma̱a̱ magíwánʼ mbá a̱jkiu̱ún rí xuwiʼ”, xóo muʼthá, ikha rí Dios maxnún (Ezeq. 11:19). Ajngáa rígi̱ naxnúlú tsiakii. Jeobá nindoo mambáñún xa̱bu̱ israelitas bi̱ nikuwa nákha wajyúuʼ ma̱ngaa rí mbiʼi xúgi̱ ikhaa nandoo mambayúlú.

12, 13. a) Xó má naʼthí Salmo 119:59, ndiéjunʼ rí ndayóoʼ mundxaʼwamíjna̱ rá. b) Xú káʼnii graxe̱ rí ndayóoʼ muʼni míjna rá.

¹² Rí maʼni a̱jma̱, nindxu̱u̱ rí mundxaʼwamíjna̱. Xúgíʼ mbiʼi, gíʼdoo wéñuʼ numuu rí muraxnuu tsumáá wéñuʼ Biblia ga̱jma̱a̱ muriyaʼ mbiʼi mundxaʼwamíjna̱ náa ku̱ma̱ rí ndayóoʼ muriʼkhu̱u̱ (atraxnuu Salmo 119:59; * Heb. 4:12; Sant. 1:25). Guʼni míjna muxkamaa á mu rígá ku̱ma̱ ndrígóo numbaaʼ náa ikháanʼlu. Gíʼmaa mbuʼyáá ndiéjunʼ rí kaʼníí xóó natígulú muʼni ga̱jma̱a̱ guʼni míjna muriʼkhu̱u̱ xóo ni̱ndxu̱lú.

¹³ Mu ma̱ndoo muʼni rígi̱, guʼni míjna graxe̱ rígi̱: “Lá kaʼníí gíwanʼ tsíxígú náa a̱jkiu̱nʼ ráʼ.” (1 Ped. 2:1.) “Lá nanimbamína̱ʼ ga̱jma̱a̱ numuu xuajñuʼ, escuela rí ni̱jkhá o numuu rí gúʼdoo mbújkha̱a̱ ráʼ.” (Prov. 16:5.) “Lá naku̱mu̱ʼ rí gúʼdoo itháán numuʼ ki xóo eʼwíínʼ numuu rí ikhiin na̱nguá guaʼdáá rí ikhúún gúʼdóʼ o numuu rí ni̱ndxu̱ún i̱mba̱ raza xáʼ.” (Sant. 2:2-4.) “Lá naniguʼ rí naxnáraʼa numbaaʼ ndrígóo Gixa̱a̱ ráʼ.” (1 Juan 2:15-17.) “Lá nanigu̱ʼ mba̱yo̱o̱ náa nubúúnʼ xa̱bu̱ ga̱jma̱a̱ náa nuxmíjná xáʼ.” (Sal. 97:10; 101:3; Amós 5:15.) Xóo gúriʼña̱a̱ graxe̱ rígi̱, ikhú guʼyáá ndiéjunʼ dí rígá náa ku̱ma̱ ndrígúlú rí ndayóoʼ muríyaaʼ. Á mu naʼngulú niríyaaʼ mbá ku̱ma̱ rí ‹naʼni gakhi̱i̱ magajnáa›, muʼni rí maxtáa gagi Anu̱lú bi̱ xtáa mekhuíí (Sal. 19:14).

14. Ndíjkha rí gíʼdoo numuu mbuʼñíinʼ májánʼ bi̱ mambáxulúʼ gajmiúlú rá.

¹⁴ Rí maʼni ajtsú nindxu̱u̱, rí muraʼwíin májánʼ bi̱ mambaxúlúʼ gajmiúlú. Tséʼniuu á mu nduʼyáá o na̱nguá, mú xóo nuni bi̱ nambáxu gajmiúlú nuxkajxáánʼ muʼni mangáán xóo rí nuni ikhiin (Prov. 13:20). Náa escuela o náa nuñajunʼ, ikhí kuwáanʼ gajmiúlú xa̱bu̱ bi̱ tsémba̱yulú mundxa̱ʼwa̱a̱ edxu̱lúʼ xóo Jeobá. Mú, náa Guʼwá nagimbáanʼ ma̱ndoo muxkamiin bi̱ gajkhun mumbáxulúʼ májánʼ gajmiúlú, ikhiin muni rí maxkaxáanʼ musngajmá ngajua ga̱jma̱a̱ dí muʼni rí májánʼ (Heb. 10:24, 25).

15, 16. Xú káʼnii eʼni Gixa̱a̱ mu mariʼkhu̱u̱ rí xóo nundxa̱ʼwa̱míjna̱ rá.

¹⁵ Gagi̱wa̱a̱nʼ a̱jkiu̱lú rí Gixa̱a̱ naʼni xó má eʼngo̱o̱ mu mariʼkhu̱u̱ xóo endxaʼwamíjna̱lú. Najmuu xúgíʼ ku̱ma̱ dí rígá mu maʼni gámbáa ku̱ma̱ ndrígóo Ajngá rawunʼ Dios.

 ¹⁶ Gixa̱a̱ najmuu ikháá graxe̱ rí niʼniuu Eva náa ixi̱ ri̱ʼi̱ Edén: “Lá gajkhun rí niʼthí Dios rí...” (Gén. 3:1). Xa̱bu̱ bi̱ kuwa náa numbaaʼ rí ikhaa naʼtáñajuunʼ, nuniulú graxe̱ rí naʼni maʼni a̱jma̱ a̱jkiu̱lú, xóo rígi̱: “Lá gajkhun rí Dios tséniñuuʼ mudamijná kanikhiin xa̱bu̱ ráʼ. Lá gajkhun rí Dios tséniñuʼ muniriya̱a̱ʼ Navidad ga̱jma̱a̱ ndxa̱a̱ rí narámáaʼ tsigúnʼ xáʼ. Lá gajkhun rí Dios tsíyoo rí mata̱ʼa̱a̱ʼ eʼdi ráʼ. Lá gajkhun rí Dios bi̱ nindxu̱u̱ ngajua tsíyoo mambaxúlúʼ gajmiúlú bi̱ nigumiin expulsar ráʼ.”

17. a) Ndiéjunʼ gíʼmaa muʼni á mu mbáa naʼniulú graxe̱ rí naʼni makáguabaaʼ fe ndrígúlú rá. b) Xó má naʼthí Colosenses 2:6, 7, ndiéjunʼ gáguáʼníí á mu nuʼni xúʼko̱ kaʼnii rá.

¹⁷ Gíʼmaa mbuʼyáá rí gajkhun nindxu̱u̱ dí nuʼnimbulúʼ. Numuu rí á mu rígá náa edxu̱lúʼ graxe̱ dí na̱nguá ejmááʼ guriʼña̱a̱, rúʼko̱ ma̱ndoo maʼni makáguabaaʼ fe ndrígúlú. Ikha jngó, ndiéjunʼ rí gíʼmaa muʼni rá. Ajngá rawunʼ Dios naʼthúlúʼ dí gíʼmaa muriʼkhu̱u̱ xóo endxaʼwamíjna̱ mu minááʼ má ikháanʼ gúʼyáá ndiéjunʼ nindxu̱u̱ “dí májánʼ ga̱jma̱a̱ dí naniguuʼ ga̱jma̱a̱ xúgíʼ rí jmbu rí e̱nda̱ʼa̱ Dios” (Rom. 12:2). Rí muʼnigajmaa tsejtsí mbiʼi mambáyulúʼ mbuʼyáá gajkhun rí nijmañulú náa Biblia nindxu̱u̱ gajkhun. Ma̱ngaa, mbuyáá gajkhun rí ikha ndrígóo Jeobá nindxu̱u̱ jmbu. Á mu nuʼni xúʼko̱, manidxu̱lúʼ xóo mbóo ixi̱ rí na̱jkha̱ mijnuʼ ajmu̱u̱ ga̱jma̱a̱ maguajún xa̱ʼ, ‹ga̱jma̱a̱ rí maguaʼdáá mbá fe gújkhuʼ› (atraxnuu Colosenses 2:6, 7). *

18. Ndiéjunʼ gambáyulú muʼni gámbáa ku̱ma̱ dí ra̱májánʼ dí rígá náa numbaaʼ ndrígóo Gixa̱a̱ rá.

¹⁸ Nimbáa xándoo maʼni, mu fe ndrígúlú maʼni gújkhuʼ; ikháanʼ gíʼmaa muʼni míjna mu maguaʼdáá. Ikha jngó, guʼni míjna má xúʼko̱ muriʼkhui̱i̱ tsiakii rí natsudaa ku̱ma̱ ndrígúlú mandxaʼwáminaʼ dí raʼkhí. Guʼtájkáan má xúʼko̱ náa Jeobá ga̱jma̱a̱ gunda̱ʼa̱a̱ xi̱ʼ kaʼwu ndrígóo. Gundxaʼwamíjna̱ náa rí nuraxnuu, guʼyáá má xúʼko̱ xú kaʼnii nindxu̱u̱ rí nundxaʼwamíjná ga̱jma̱a̱ rí nandulú muʼni. Guʼñíinʼ májánʼ bi̱ mambaxú gajmiúlú; guʼni míjna makuwáanʼ má xúʼko̱ gajmiúlú xa̱bu̱ bi̱ mumbayúlú muriʼkhui̱i̱ xóo ni̱ndxu̱lú. Á mu nuʼni xúgíʼ rígi̱, maʼngulú muʼni gámbáa xúgíʼ ku̱ma̱ dí ra̱májánʼ dí rígá náa numbaaʼ ndrígóo Gixa̱a̱ ma̱ngaa maʼngulú muríyaaʼ “rí nundxaʼwamíjná ga̱jma̱a̱ xúgíʼ rí nakuximinaʼ náa ku̱ma̱ ndrígóo Dios” ( 2 Cor. 10:5).