1. Ndiéjunʼ nirígá ga̱jma̱a̱ rí niraʼwíí maʼni Adán ga̱jma̱a̱ Eva rá.

TSÁA e̱kuma̱a̱ʼ ikháán rí kaʼyoo maraʼwíí rí nindxu̱u̱ májánʼ ga̱jma̱a̱ dí ra̱májánʼ rá. Índo̱ Adán ga̱jma̱a̱ Eva ni̱ʼphu̱ xndúu ixi̱ rí nijuiʼthún rí xúphu̱, ikhú nisngajma rí na̱nguá ekumún kuyáá Jeobá ga̱jma̱a̱ xtángoo ndrígóo. Nikumu̱ún rí majmiin muraʼwíí rí nindxu̱u̱ májánʼ ga̱jma̱a̱ dí ra̱májánʼ (Gén. 3:22). Mú, ndiéjunʼ nirígá rí xúʼko̱ nini xá. Nitígu̱u̱n rí mambaxúún gajmiún Jeobá ga̱jma̱a̱ rí makuwá kámuu mbiʼi ma̱ngaa rí e̱jñún maguaʼdáá aʼkhá ga̱jma̱a̱ rí makhañún (Rom. 5:12). Rí niraʼwíí muni i̱ndó gaʼkhu ni̱ʼkha̱ kagu̱u̱.

2, 3. a) Ndiéjunʼ niʼni eunuco etíope índo̱ Felipe niʼtároʼoo rá. b) Ndiéjunʼ rí májánʼ edrigú índo̱ najngúlú iyááʼ rá. c) Xú káʼnii graxe̱ guriʼña̱a̱ rá.

² Mixtiʼkhu ninindxu̱u̱ rí niʼni Adán ga̱jma̱a̱ Eva ga̱jma̱a̱ dí niraʼwíí maʼni eunuco etiópe índo̱ Felipe niʼtároʼoo. Xa̱bu̱ bugi̱ nidxuu wéñuʼ índo̱ ndiʼyoo rí Jeobá ga̱jma̱a̱ Jesús nini ga̱jma̱a̱ numuu rí asndu nijngúun iyááʼ ikhú má mbiʼi rúʼko̱ (Hech. 8:34-38). Xúʼko̱ má mangáán, índo̱ nuxnaxímíjná náa Jeobá xó má niʼni xa̱bu̱ etíope rí majngúlú iyááʼ nusngajma kaʼwu rí nuxnáa núma̱aʼ Jeobá ga̱jma̱a̱ Jesús rí nini ga̱jma̱a̱ numulúʼ. Ma̱ngaa nusngajmá rí nakumulú kuʼyáá Jeobá ga̱jma̱a̱ nduʼyáá rí i̱ndó ikhaa kaʼyoo maraʼwíí rí nindxu̱u̱ májánʼ ga̱jma̱a̱ dí ra̱májánʼ.

³ Atatsaʼwáminaʼ ga̱jma̱a̱ mbaʼa rí májánʼ nundrigú índo̱ nuʼni ñajunʼ Jeobá. Ikhaa naʼthí rí maxnúlúʼ dí Adán ga̱jma̱a̱ Eva nitígu̱u̱n, xóo rí makuwáanʼ kámuu mbiʼi. Ga̱jma̱a̱ fe rí guaʼdáá náa Jesús rúʼko̱ nandoo naʼni rí Dios maʼni mba̱a̱ a̱jkiu̱u̱n kaʼyoo aʼkhá ndrígúlú ga̱jma̱a̱ naxnúlú mbá ku̱ma̱  kaʼwu (Mat. 20:28; Hech. 10:43). Ma̱ngaa nandoo nakuwáanʼ náa xuajñu ikhaa, náa kuwa bi̱ ikhaa nandoo kañún ga̱jma̱a̱ bi̱ guáʼthi̱i̱n mbá rí májánʼ nda̱wa̱á (Juan 10:14-16; Rom. 8:20, 21). Xúgíʼ rígi̱ nakujmaa kaʼwu, mu kuwa tikhun bi̱ nuniʼniiʼ Jeobá mú tsíñún guyaridáá eunuco etíope. Mú, ndiéjunʼ rí narikúún mu xájngúún iyááʼ xá. Ga̱jma̱a̱ ndiéjunʼ gándoo gambáñun mu xámíñúún xá.

4, 5. Xú káʼnii xkujndu nigiʼdoo Avery ga̱jma̱a̱ Hannah rá.

⁴ Rí namíñúún. Aniu̱u̱n mbáa dxámá bi̱ mbiʼyuu Avery ni̱ndxu̱ún xa̱bi̱i̱ Jeobá. Anu̱u̱ ikhaa nindxu̱u̱ mbá májaanʼ xa̱bu̱ ga̱jma̱a̱ nañejunʼ májánʼ xóo bi̱ kayá edxu̱u̱ náa congregación. Maski ajndu xúʼko̱ Avery tsíyoo gájngúun iyááʼ. Ikhaa naʼthí: “Naku̱mu̱ʼ rí xáʼngo̱ʼ gánindxu̱ʼ xóo anu̱ʼ”. Ma̱ngaa Avery naku̱mu̱u̱ rí xáʼngo̱o̱ gánimbánuu mbá ñajunʼ á mu nakhánáá. Ikhaa naʼthí: “Namíñunʼ á mu nuthu̱nʼ matajkáan náa inún mbaʼin xa̱bu̱, maxná mbá discurso o maguwíin a̱ngiu̱lú mu magún gutaraʼa”.

⁵ Hannah, bi̱ gíʼdoo 18 tsiguuʼ, ninindxu̱u̱ mbáa ndxáʼgú bi̱ naku̱mu̱u̱ rí nda̱a̱ dí ejma̱a̱. Maski ajndu ndija̱a̱ náa mbá guʼwíin bi̱ ni̱ndxu̱ún xa̱bi̱i̱ Jeobá, ikhaa nikumu̱u̱ rí xáʼngo̱o̱ gánimbánuu xtángoo ndrígóo Dios. Rígá mbiʼi rí naku̱mu̱u̱ rí nda̱a̱ dí ejmaa kayuʼ dí asndu naʼni ngauminaʼ, ga̱jma̱a̱ rígi̱ naʼni rí maxtáa itháan gíná. Ikhaa naʼthí: “Nimbáa tsethuun rí nani. Naku̱mu̱ʼ rí Jeobá xándoo kaʼyoʼ ga̱jma̱a̱ numuu rí nani”.

6. Náa numuu rí tséjngúun iyááʼ Vanessa rá.

⁶ Ga̱jma̱a̱ numún bi̱ nambáxu̱u̱n gajmiún. Vanessa bi̱ gíʼdoo 22 tsiguuʼ, ikhaa naʼthí: “Nigúʼdaa mbáa bi̱ nimbáxuʼ ga̱jmu̱ʼ bi̱ niniʼniiʼ itháán rí mbá gu̱wa̱ʼ tsiguʼ”. Mú, bi̱ nambáxu̱u̱ ga̱jma̱a̱ na̱nguá nindxu̱u̱ xa̱bi̱i̱ Jeobá ga̱jma̱a̱ tsembáyúu mu majngúun iyááʼ ga̱jma̱a̱ rúʼko̱ naʼni rí maxtáa gíná. Ikhaa naʼthí: “Na̱nguá kuʼdiin eʼwíínʼ bi̱ mambaxúʼ gajmíʼ á mu naniʼñúuʼ rambáxuʼ ga̱jmu̱ʼ ikhaa, namiñuʼ rí xáxkamaa imba̱a̱ bi̱ mambáxuʼ ga̱jmu̱ʼ”.

7. Ndiéjunʼ rí nimiñuu Makayla, ga̱jma̱a̱ náá numuu rá.

⁷ Namíñúún rí muxudami̱jna̱ mbá aʼkhá. Makayla kaʼníín gíʼdoo witsu tsiguuʼ índo̱ ndxájuu nigumaa expulsar. Ikhaa ndiʼyoo xú kaʼnii nikuwa aniu̱u̱n ga̱jma̱a̱ rí niʼni ndxájuu. Ikhaa naʼthí: “Nimiñúnʼ majngúnʼ iyááʼ, numuu rí á mu nakuʼdáminaʼ mbá aʼkhá ga̱jma̱a̱ magumún expulsar mani rí muminíiʼ itháán aniu̱ʼ”.

8. Ndiéjunʼ rí niʼni míñuu Miles rá.

 ⁸ Namiñún rí xándúún gúñún. Gúʼyáá ga̱jma̱a̱ numuu mbáa dxámá bi̱ mbiʼyuu Miles. Anu̱u̱ ga̱jma̱a̱ rudúsko̱jo̱o̱ ni̱ndxu̱ún xa̱bi̱i̱ Jeobá, mú ru̱dúu̱ na̱nguá, Miles naʼthí: “Nixtáá ga̱jmu̱ʼ ru̱dúʼ mbá 18 tsiguʼ. Nimíñunʼ mathu̱u̱n rí nandoʼ majngúnʼ iyááʼ. Numuu rí ndi̱yo̱o̱ dí nikiʼnáa wéñuʼ índo̱ anu̱ʼ ninindxu̱u̱ xa̱bi̱i̱ Jeobá. Ga̱jma̱a̱ nimiñuʼ rí maʼni ginún”.

9. Ndiéjunʼ gárígá índo̱ gajmañaaʼ itháán ga̱jma̱a̱ numuu Jeobá rá.

⁹ Rí Adán ga̱jma̱a̱ Eva na̱nguá nindúún kuyáá ga̱jma̱a̱ xúgíʼ a̱jkiu̱ún Jeobá, rúʼko̱ niʼni rí xúni̱ ñajuunʼ ikhaa. Maski ajndu xúʼko̱, Dios niniñuuʼ rí makuwá mba̱yu̱u̱ʼ mbiʼi mu ma̱ndoo maguaʼdiin e̱jñún ga̱jma̱a̱ rí ikhiin guyáá xú kaʼnii gúni mba̱ji̱i̱n. Rí Adán ga̱jma̱a̱ Eva niniñaaʼ runi ñajuunʼ Jeobá, nacha̱ má nikujmaa dí niraʼwíí muʼni tánindxu̱u̱ májánʼ. Aʼdiún giʼnii nixiyáa giʼtio̱o̱ ga̱jma̱a̱ ndawaa xa̱bu̱ numbaaʼ ninindxu̱ún mixkawiinʼ wéñuʼ ma̱ngaa rí i̱ndó nundxaʼwamíjná ga̱jma̱a̱ numún ikhiin (Gén. 4:8; 6:11-13). Mú, Jeobá niriyaʼ mbá awan rí xóo maʼni kaʼwiin e̱ji̱n Adán ga̱jma̱a̱ Eva bi̱ nandún muni ñajuunʼ (Juan 6:38-40, 57, 58). Lá ragájkhun rí Jeobá naʼngo̱o̱ a̱jkiu̱u̱n ga̱jma̱a̱ nandoo kaʼyulúʼ wéñuʼ ráʼ. Índo̱ gídxúʼ rajmañaʼ itháán ga̱jma̱a̱ numuu rígi̱, maʼni rí maʼndaaʼ xtayáá itháán Jeobá ga̱jma̱a̱ rí xátani xóo niʼni Adán ga̱jma̱a̱ Eva, rí phú matani maraxnaxí vida ndrígaaʼ mu matani ñajuunʼ Dios.

10. Náa numuu rí matatsaʼwa̱a̱ edxaaʼ dí na̱ʼkha̱ raʼthí náa Salmo 19:7 ma̱ndoo mambáyáaʼ mu matani ñajuunʼ Jeobá rá.

¹⁰ Gajmañaaʼ má xúʼko̱ ga̱jma̱a̱ numuu Jeobá. Índo̱ itháán gatatsiʼníiʼ itháán gáʼndaʼ matani ñajuunʼ. Avery nimbáyúu wéñuʼ índo̱ ndiʼyoo májánʼ xóo phú naʼthí náa Salmo 19:7 (atraxnuu). * Índo̱ ndiʼyoo xóo embánuu ajngáa rígi̱ náa vida ndrígóo niʼni rí maʼndoo kaʼyoo itháán  Jeobá. Rígi̱ raʼkháa i̱ndó naʼni rí makumulúʼ kuʼyáá itháán Jeobá ma̱ngaa nambáyulúʼ rí muni dí nandoo ikhaa. Hannah ma̱ngaa naʼthí xúgi̱ kaʼnii: “Núma̱aʼ ga̱jma̱a̱ numuu rí ninigajmaa Biblia, niʼni mba̱yo̱o̱ dí índo̱ nani ngawúmina̱ʼ nani gawúunʼ Jeobá ma̱ngaa” (1 Ped. 5:7). Ikhaa niʼniminaʼ mu maʼnimbánuu rí naʼthí náa ajngáa rawuunʼ Dios (Sant. 1:22). Ndiéjunʼ nirígá rá. Ikhaa má naʼthí: “Índo̱ nda̱yo̱o̱ xóo eguma tsakurámúnʼ rí manimbo̱ʼ ka̱yo̱o̱ Jeobá, niʼni rí maʼndo̱ʼ ka̱yo̱o̱ itháán. Rí xúgi̱, naku̱mu̱ʼ ka̱yo̱o̱ itháán rí ikháá má gambayuuʼ índo̱ gáʼyoʼ”. Hannah ningoo niniminaʼ ga̱jma̱a̱ rí xáʼni gawuminaʼ, nixnáximinaʼ náa Jeobá ga̱jma̱a̱ nijngúun iyááʼ.

11. a) Xú káʼnii niʼni Vanessa mu maxkamiin bi̱ mambaxúu gajmíi̱n rá. b) Ndiéjunʼ eʼsngúlúʼ xkri̱da rígi̱ rá.

¹¹ Atraʼwíin májánʼ bi̱ mambaxáaʼ gajmiáanʼ. Vanessa ndiʼyoo rí bi̱ nambáxu̱u̱ ga̱jma̱a̱ tséniñuʼ maʼni ñájuunʼ Jeobá. Ikha jngó niniñuuʼ rambáxu̱u̱ ga̱jma̱a̱. Ma̱ngaa niʼniminaʼ rí mambaxúu gajmíi̱n eʼwíínʼ bi̱ kúwi̱i̱n náa guʼwáaʼ nagimbáanʼ. Ikhaa niʼthí rí xkridoo Noé gajmíi̱n bi̱ kúwi̱i̱n náa goʼwóo nimbáyúu: “Ikhiin nikúwi̱i̱n náa majñúnʼ xa̱bu̱ bi̱ tsíñún kuyáá Jeobá, ikha jngó i̱ndó ikhiin nimbáxu̱u̱n”. Nda̱wa̱á rí nijngúun iyááʼ, ninindxu̱u̱ precursora. Rí xúgi̱ ikhaa naʼthí: “Rígi̱ nimbáyuʼ rí mambaxúʼ gajmii eʼwíínʼ a̱ngiu̱lú bi̱ kuwa náa mixtiʼkhu congregación”. Ikháán mangáán ma̱ndoo mataxkamii bi̱ mambaxáaʼ gajmiáanʼ á mu natani tsiakimínáʼ mu matani ñajunʼ rí Jeobá nixnulú muʼni (Mat. 24:14).

12. Ndiéjunʼ gamíi tágiʼdoo Adán ga̱jma̱a̱ Eva ga̱jma̱a̱ ndiéjunʼ nirígá rá.

¹² Atani gajmaaʼ rí namíñaʼ, mú gamiñáaʼ xtayáá Dios. Mú raʼkháa xúgíʼ gamíi nindxu̱u̱ ra̱májánʼ. Mbá xkri̱da, májánʼ nindxu̱u̱ rí mamiñulúʼ muʼni mbá dí ra̱májánʼ rí tsénigu̱u̱ʼ Jeobá (Sal. 111:10). Á mu Adán ga̱jma̱a̱ Eva niguáʼdáá mbá gamíi rí xúgi̱ kaʼnii, ikhiin muni má xúʼko̱ rí nandoo Dios. Mú índo̱ ikhiin túnimbu̱u̱n ‹nimbaʼtoo idún› xóo muʼthá, ndiyáá kaʼwu rí ni̱ndxu̱ún xa̱bu̱ aʼkhá ga̱jma̱a̱ aʼkhá rúʼko̱  marigá náa e̱jñún ma̱ngaa rí makhañún. Índo̱ ndiyáá xú kaʼnii kuwa ikhú nitiñu̱u̱ʼ numuu rí tsaʼtsiin ikhú ndi̱ya̱ʼ rí muruguáá ga̱jma̱a̱ xuñúnʼ (Gén. 3:7, 21).

13, 14. a) Xó má naʼthí 1 Pedro 3:21, náá numuu dí ragíʼmaa mamiñúlú gáʼni rí makañulúʼ rá. b) Náa numuu rí gíʼmaa maʼndulú kuyáá Jeobá rá.

¹³ Nindxu̱u̱ májánʼ rí mamiñúlú muni mbá rí tsénigu̱u̱ʼ Jeobá. Dí ragíʼmaa mamiñúlú gáni nindxu̱u̱ rí makhañúlúʼ. Náa numuu rá. Numuu rí Dios niʼtsiwáanʼ mu ma̱ndoo makuwaanʼ kámuu mbiʼi. Á mu nuxuʼdámíjná mbá aʼkhá ga̱jma̱a̱ natanga̱a̱ a̱jkiu̱lúʼ, ikhaa maʼni mba̱a̱ a̱jkiu̱u̱n kaʼyulú ga̱jma̱a̱ numuu fe rí guáʼdáá náa tsigijñaʼ rí nixnáxi̱i̱ A̱ʼdióo. Mbá rí xóo ma̱ndoo musngajmá fe rúʼko̱ nindxu̱u̱ rí muxnaxí vida ndrígúlú ga̱jma̱a̱ rí majngúlú iyááʼ (atraxnuu 1 Pedro 3:21). *

¹⁴ Guáʼdáá mbaʼa wéñuʼ numuu mú maʼndulú kuʼyáá Jeobá. Ikháá naxnúlú xúgíʼ rí májánʼ mámbá mbiʼi, naʼsngúlú rí gajkhun ga̱jma̱a̱ numuu ikháá ma̱ngaa dí maʼni nda̱wa̱á (Juan 8:31, 32). Nixnúlú guʼwá nagimbáanʼ mu maxná ikhulú ga̱jma̱a̱ náa mumbaʼyumíjná. Nambáyulúʼ ga̱jma̱a̱ xkujndu rí kuaʼdáá mbiʼi xúgi̱ ma̱ngaa naʼthúlúʼ rí makuwáanʼ májánʼ ga̱jma̱a̱ kámuu mbiʼi nda̱wa̱á (Sal. 68:19; Rev. 21:3, 4). Índo̱ nundxaʼwamíjná náa xúgíʼ rí niʼni numuu rí nandoo kaʼyulúʼ, rúʼko̱ naʼni rí maʼndulú kuʼyáá wéñuʼ ga̱jma̱a̱ namíñulú rí muʼni gawíínʼ. Gamíi rúʼko̱ gíʼmaa maguaʼdáá.

15. Xú káʼnii niʼngo̱o̱ Makayla ga̱jma̱a̱ gamíi rí makudaminaʼ mbá aʼkhá rá.

¹⁵ Makayla niʼngo̱o̱ ga̱jma̱a̱ gamíi rí makudaminaʼ mbá aʼkhá índo̱ nikro̱ʼo̱o̱ rí Jeobá mani mba̱a̱ a̱jkiu̱u̱n kaʼyoo má xúʼko̱. Ikhaa naʼthí: “Nijkánu ndi̱yo̱o̱ rí xúgiáanʼ ñajunlú xa̱bu̱ aʼkhá ga̱jma̱a̱ nakiéʼkulu. Mú ma̱ngaa nikroʼoʼ rí Jeobá nandoo kaʼyulú ga̱jma̱a̱ naʼni mba̱a̱ a̱jkiu̱u̱n kaʼyúlú ga̱jma̱a̱ numuu rí nijuiʼtsiwáanʼ”. Rí nandoo kaʼyoo Jeobá nixkaxi̱i̱ mú maxnáxi̱ vida ndrígóo mú mani ñajuunʼ ga̱jma̱a̱ rí majngúun iyááʼ.

16. Ndiéjunʼ nimbáyúu Miles mu xámiñuu rí xáʼndun kuyáá xá.

¹⁶ Miles, bi̱ nimiñuu dí ru̱dúu̱ xániguʼ rí ikhaa majngúun iyááʼ, niʼthúunʼ circuito mu mambáyúu. Ikhaa niʼthí: “Ikhaa ndija̱a̱ xó má ikhúún, ru̱dúu̱ nánguá nindxu̱u̱ xa̱bi̱i̱ Jeobá. Nimbáyuʼ mandxaʼwáminaʼ dí gáthúu̱n ru̱dúʼ ga̱jma̱a̱ rí ikhúúnʼ niraʼwi̱i̱ majngúnʼ iyááʼ raʼkháa anu̱ʼ natsudún”. Ru̱dúu̱ Miles nikiʼnáa. Nda̱wa̱á ikháá ndiyóoʼ magajnúu náa goʼwóo, mu ma̱ndoo majngúun iyááʼ. Ikhaa naʼthí xóó: “Índo̱ ndi̱yo̱o̱ xúgíʼ rí májánʼ dí Jeobá niʼni ga̱jma̱a̱ numuʼ ma̱ngaa índo̱ nindxa̱ʼwa̱mínáʼ náa rí nixnáximinaʼ Jesús, rúʼko̱ niʼni mba̱yo̱o̱  rí Jeobá ra̱ʼkhá tháán eyoo kaʼyoʼ. Ga̱jma̱a̱ nixkaxu̱u̱n maxnáximinaʼ náa ikhaa ga̱jma̱a̱ majngúnʼ iyááʼ”.

17. Ndiéjunʼ gándoo muʼni xúgiáanʼ rá.

¹⁷ Índo̱ Eva ni̱ʼkhu̱ xndúu ixi̱ rí juaʼan náa ixi̱ ri̱ʼi̱ Edén nisngájma rí táʼndoo gáʼyoo Anu̱u̱. Ga̱jma̱a̱ índo̱ Adán ni̱ʼkhu̱, nisngájma rí táxnáa núma̱aʼ Jeobá ga̱jma̱a̱ xúgíʼ rí niʼni ga̱jma̱a̱ numuu ikhaa. Xúgiáanʼ ma̱ndoo musngajmá rí tsénigulú rí ikhiin niraʼwíí muni. Índo̱ najngúlú iyááʼ nusngajmáá Jeobá rí ikhaa kaʼyoo maraʼwíí rí nindxu̱u̱ májánʼ ga̱jma̱a̱ dí ra̱májánʼ ma̱ngaa nusngajmáá rí nandulú kuʼyáá ga̱jma̱a̱ rí nakumulú kuʼyáá.

18. Ndiéjunʼ gíʼmaa matani, mu ma̱ndoo matani májánʼ ñajuunʼ Jeobá rá.

¹⁸ Nda̱wa̱á rí nijngúlú iyááʼ xúgíʼ mbiʼi ndaʼyóoʼ muʼnimbánii xtángoo ndrígóo Jeobá raʼkháa rí nandulú ikháanʼ. Gajkhun má rí mingíjyúuʼ nindxu̱u̱, mu mbaʼin xa̱bu̱ nuni rígi̱ xúgíʼ tsiguʼ. Ikháán mangáán ma̱ndoo matani xúʼko̱ kaʼnii. Mu majmaán matani, ataniminaʼ makruaʼa̱a̱ májánʼ rí naʼthí náa Biblia, atríyaʼ mbiʼi mu maraxtaa gajmiáanʼ a̱ngiu̱lú ga̱jma̱a̱ arathún ndiéjunʼ rí nijmañaaʼ ga̱jma̱a̱ numuu Jeobá (Heb. 10:24, 25). Índo̱ gátraʼwíí mbá rí matani, ginii atadxawíín xtágabu rí Jeobá naxnáaʼ náa ajngáa rawuunʼ ma̱ngaa rí naxná xuajñu (Is. 30:21). Maraxtaa májánʼ á mu xúʼko̱ gátani (Prov. 16:3, 20).

19. Ndiéjunʼ rí gíʼmaa marmáʼáan a̱jkia̱a̱nʼ má xúʼko̱, ga̱jma̱a̱ náá numuu rá.

¹⁹ Á mu natayáá gajkhun rí ikha ndrígóo Jeobá nambáyaʼ, rúʼko̱ gáʼni rí maʼndaaʼ xtayáá itháán ikhaa, ga̱jma̱a̱ xtángoo ndrígóo. Ikhú xúgíʼ rí Gixa̱a̱ naxnaraʼa xáʼngo̱o̱ gaʼni rí matatsiʼñáʼ ratani̱ ñajunʼ Dios. Índo̱ gáraxtaa mbá míí tsiguʼ náa Ku̱ba̱ʼ mitsaanʼ marmáʼáan a̱jkia̱a̱nʼ mbiʼi rí nijnguáan iyááʼ, ikhú maratha: “Ninindxu̱u̱ mbá rí itháán májánʼ rí niraʼwíí mani”.