ARTÍCULO RÍ MUʼNIGAJMAA 10
Rí nandulú kuʼyáá Jeobá na̱jkha̱ kaguáanʼ majngúlú iyááʼ
“Dí erikooʼ mu xájngúnʼ iyááʼ rá.” (HECH. 8:36).
AJMÚÚ 37 Mani ñajuunʼ Jeobá ga̱jma̱a̱ xúgíʼ a̱jkiu̱nʼ
RÍ MUʼNIGAJMAA *
1, 2. Xó má naʼthí náa Hechos 8:27-31, 35-38, náá numuu nijngún iyááʼ Xa̱bu̱ Ñajunʼ bi̱ na̱ʼkha̱ náa etíope rá.
LÁ NANDAAʼ majnguánʼ iyááʼ ga̱jma̱a̱ manindxa̱ʼ xa̱bi̱i̱ Cristo rá. Ngajua ga̱jma̱a̱ rí nixnáa núma̱aʼ nixkajxi̱i̱n mbaʼin xa̱bu̱ mu majngún iyááʼ. Atatsáʼwaminaʼ ga̱jma̱a̱ numuu Xa̱bu̱ Ñajunʼ bi̱ nimbáyúu reina bi̱ xtáa náa Etiopía.
2 Índo̱ xa̱bu̱ bigi̱ ni̱jkha̱nú nikro̱ʼo̱o̱ rí naʼthí náa Escrituras rí gíʼmaa majngúun iyááʼ, núkhu má nijngúun iyááʼ (atraxnuu Hechos 8:27-31, * 35-38). * Náá numuu rá. Nakujmaa kaʼwu rí ningajo̱o̱ kaʼyoo Ajngá rawunʼ Dios, índo̱ nixtáa ra̱jkha̱ náa carriu̱u̱ ni̱jkha̱ raguxnuu dí na̱ʼkha̱ raʼthí náa libro ndrígóo Isaías. Ga̱jma̱a̱ índo̱ Felipe niʼthúu̱n rí Jesús niʼni ga̱jma̱a̱ numuu ikhaa, ra̱ʼkhá tháán nidxuu. Ma̱ngaa nduʼyáá má rí ikhaa nindoo kaʼyoo Jeobá, numuu rí xtáa ratanga̱a̱ náa Jerusalén náa ni̱jkha̱ gáʼyamajkhuu. Xó má eʼyáá rí núkhu niniñuuʼ religión ndrígóo náa rí nixtáa nákha ginii ga̱jma̱a̱ rí xúgi̱ xtáa náa xuajñuu Dios bi̱ gajkhun. Ga̱jma̱a̱ numuu ikháá má rí nandoo kaʼyoo Jeobá nixkajxi̱i̱ mu maʼni imbo̱o̱ʼ ñajunʼ rí itháan gíʼdoo wéñuʼ numuu, ikhaa nindxu̱u̱ rí majngúun iyááʼ ga̱jma̱a̱ rí mani̱ndxu̱u̱ xa̱bi̱i̱ Cristo (Mat. 28:19).
3. Ndiéjunʼ rí ma̱ndoo marikho̱o̱ mbáa mu xájngúu̱n iyááʼ rá. (Atayáá kúgumaʼá “ Xú káʼnii kujmaa a̱jkia̱a̱nʼ rá.”)
3 Rí nandaaʼ xtayáá Jeobá rúʼko̱ gáxkajxi̱i̱n mu majnguánʼ iyááʼ. Mú rígá i̱ʼwáʼ rí maʼndaaʼ xtayáá dí marikáaʼ mu xájnguáanʼ iyááʼ. Xóo muʼthá, mbáa ikháán itháán nandaaʼ xtañún bi̱ kúwá náa guʼwáaʼ ga̱jma̱a̱ bi̱ nambájxa̱a̱ʼ gajmiáanʼ bi̱ na̱nguá ni̱ndxu̱ún xa̱bi̱i̱ Jeobá, namíña̱a̱ʼ numuu rí á mu ikháán najnguánʼ iyááʼ naxáʼndun gúyáaʼ (Mat. 10:37). O mbáa ikháán natani má xúʼko̱ tikhu rí Dios nawiyuuʼ kaʼyoo ga̱jma̱a̱ naʼniaaʼ gakhi̱i̱ mu matatsiʼñáaʼ (Sal. 97:10). O mbáa ikháán índo̱ niga̱ja̱a̱n niguʼwa̱a̱nʼ nitani̱ tikhu ndxa̱a̱ rí na̱ʼkha̱ náa religión rí nduwaʼ ga̱jma̱a̱ naʼni marmáʼáan a̱jkia̱a̱nʼ, ikha jngó naʼniaaʼ mingíjyúuʼ matatsiʼñáaʼ ratani̱ ndxa̱a̱ rúʼko̱ rí tsíni̱gu̱u̱ʼ Jeobá (1 Cor. 10:20, 21). Mú ikháán má kaʼyaaʼ matraʼwíí ndiéjunʼ gátani ga̱jma̱a̱ tsáá gaʼndaaʼ xtayáá itháan.
NGAJUA RÍ ITHÁAN GÍʼDOO NUMUU
4. Ndiéjunʼ rí phú gáxkajxi̱i̱n manguáanʼ iyááʼ rá.
4 Gajkhun má dí rígá tikhu rí ikháán nandaaʼ xtayáá ga̱jma̱a̱ nangajua̱a̱ʼ, ga̱jma̱a̱ májánʼ má nindxu̱u̱ rí matani xúʼko̱ kaʼnii. Mbá xkri̱da, mbáa nákha xóó tsétanigajmaa gajmiáanʼ xa̱bi̱i̱ Jeobá, natatsimba̱a̱ʼ má rí naʼthí náa Biblia. Ma̱ngaa mbáa nandaaʼ má xtayáá Jesús. Ga̱jma̱a̱ xúgi̱ rí natatsiniúnʼ xa̱bi̱i̱ Jeobá, mbáa nambájxa̱a̱ʼ itháan gajmiáanʼ. Mú raʼkháa rúʼko̱ gáʼniaaʼ dí maraxnaxíminaʼ náa Jeobá ga̱jma̱a̱ rí maʼndaaʼ majnguáanʼ iyááʼ. Rí phú gáxkajxi̱i̱n mu manguáanʼ iyááʼ nindxu̱u̱ rí nandaaʼ xtayáá Dios. Índo̱ gáʼndaaʼ xtayáá itháan, nimbá ga̱jma̱a̱ nimbáa xáʼngo̱o̱ gárikhaaʼ rí matani ñajuunʼ. Ikha jngó ngajua rí kuaʼdáá náa Jeobá raʼkháa i̱ndó maxkajxi̱i̱n mu manguáanʼ iyááʼ, rí phú naʼni nambáyulú mu makuwáánʼ má xúʼko̱ ru̱ʼni̱ ñajuunʼ Dios.
5. Xú káʼnii graxe̱ gúriʼña̱a̱ rá.
5 Jesús niʼthí rí ndayóoʼ maʼndulú kuʼyáá Jeobá ga̱jma̱a̱ xúgíʼ a̱jkiu̱lú, xúgíʼ nimiulu, xúgíʼ ku̱ma̱ ndrígúlú, ga̱jma̱a̱ xúgíʼ tsiakii ndrígúlú (Mar. 12:30). Xú káʼnii gándoo maʼndaaʼ xtayáá ga̱jma̱a̱ matayamajkuíí xúʼko̱ kaʼnii xá. Guʼyáá náa ngajua rí gíʼdáanʼ (1 Juan 4:19). Ga̱jma̱a̱ índo̱ gúʼyáá ngajua rígi̱ rí gíʼdoo wéñuʼ numuu rí gíʼdáanʼlu, ndiéjunʼ i̱ʼwáʼ gátani ga̱jma̱a̱ xú káʼnii gákuma̱a̱ʼ rá. * Guʼyáá.
6. Xó má naʼthí náa Romanos 1:20, xú káʼnii gándoo gájmañaaʼ ga̱jma̱a̱ numuu Jeobá rá.
6 Gajmañaaʼ ga̱jma̱a̱ numuu Jeobá índo̱ gáta̱ya̱a̱ rí niʼniwíi (atraxnuu Romanos 1:20; * Apoc. 4:11). Atatsaʼwáminaʼ ga̱jma̱a̱ numuu xóo niguma plantas ga̱jma̱a̱ xujkhúʼ. Atayáʼ ma̱ta̱ya̱a̱ xóo mitsaanʼ niguma xuyuuʼ xa̱bu̱ (Sal. 139:14). Atatsaʼwáminaʼ náa xúgíʼ tsiakii rí Jeobá nixnúu a̱jkha̱ʼ ma̱ngaa rí ikhaa nindxu̱u̱ mbáwíi náa rí millón a̱ʼgua̱a̱n (Is. 40:26). * Índo̱ gátani rígi̱, xúʼko̱ gátaya̱a̱ rí nandaaʼ xtayáá naʼni itháan mba̱a̱. Índo̱ gákrua̱ʼa̱a̱ʼ rí Jeobá ndaʼyoo wéñuʼ ga̱jma̱a̱ gíʼdoo tsiakii raʼkháá xóo midxuʼnú mambajxáaʼ ga̱jma̱a̱ʼ. Rí maʼndaaʼ xtayáá ga̱jma̱a̱ xúgíʼ a̱jkia̱nʼ, ndayóoʼ rí majmañaaʼ itháán ga̱jma̱a̱ numuu ikhaa.
7. Mu maʼndaaʼ xtayáá Jeobá ga̱jma̱a̱ xúgíʼ a̱jkia̱nʼ ndiéjunʼ rí gáʼyóoʼ ma̱ta̱ya̱a̱ rá.
7 Gíʼdoo numuu ma̱ta̱ya̱a̱ rí gajkhun Jeobá naxmiéjunʼ kaʼyaaʼ. Lá naʼniaaʼ gakhi̱i̱ matatsimbaaʼ rí bi̱ niʼni mekhu ga̱jma̱a̱ ku̱ba̱ʼ ndaʼyoo rí ikháán xtaa ga̱jma̱a̱ rí xtaʼdáá numaaʼ ráʼ. Á mu xúʼko̱, garmáʼáan a̱jkia̱nʼ rí Jeobá ‹na̱nguá xtáa mitsínguánʼ náa ikháán› (Hech. 17:26-28). Xó má David niʼthúu̱n Salomón, rí Dios “ndaʼyoo májánʼ xúgíʼ a̱jkiu̱lú”. Ikhaa naʼthí, á mu ikháán nataya̱a̱ʼ ikhaa maniñamínaʼ rí mataxkamaa (1 Crón. 28:9). Xtaa ratanigajmaa Biblia numuu rí Jeobá ni̱ʼkha̱ kañán, xó má naʼthí náa Jeremías 31:3. Índo̱ gáʼga rajmañaaʼ itháan ga̱jma̱a̱ numuu Jeobá, rí niʼni ga̱jma̱á numaaʼ, itháan gáʼndaaʼ xtayáá.
8. Xú káʼnii gándoo gátasngajmá rí naraxna̱a̱ núma̱aʼ Jeobá ga̱jma̱a̱ numuu rí nandoo kaʼyaaʼ rá.
8 Rí muʼtákáñii Jeobá nindxu̱u̱ mbá rí xóo ma̱ndoo musngajmáá rí nandulú kuʼyáá. Rí maratha̱a̱n rí naʼni maxmiéjuanʼ ga̱jma̱a̱ rí maraxna̱a̱ núma̱aʼ ga̱jma̱a̱ numuu xúgíʼ rí naʼni ga̱jma̱á numaaʼ maʼni rí mbaja̱a̱ ngajua rí xtaʼdáá náa ikhaa. Ga̱jma̱a̱ índo̱ gáta̱ya̱a̱ rí nariʼña̱a̱ rí naratákáñii mambajxáaʼ ga̱jma̱a̱ʼ itháan (Sal. 116:1). Ma̱ta̱ya̱a̱ rí Dios nakro̱ʼo̱o̱ kaʼyaaʼ. Mu maxuʼmámíjná itháan mijngii náa Jeobá, ndayóoʼ makru̱ʼu̱lú xóo endxa̱ʼwáminaʼ ga̱jma̱a̱ rí nagiʼthu̱u̱n rí mu̱ʼni̱. I̱ndó mbuʼyáá rígi̱ á mu nuʼnigajmaa Ajngá rawuunʼ.
Rí matanigajmaa̱ Biblia nindxu̱u̱ itháán májánʼ xóo ma̱ndoo mi̱dxu̱ʼ kanuu náa Dios ga̱jma̱a̱ rí ma̱ta̱ya̱a̱ rí nandoo ga̱jma̱á ni̱ndxu̱lú. (Atayáá kutriga̱ 9). *
9. Xú káʼnii gándoo gátasngajmá rí nangajua̱ʼ Biblia rá.
9 Gajmañaaʼ mangajua̱ʼ xtayáá Ajngá rawunʼ Dios. I̱ndó náa Biblia na̱ʼkha̱ raʼthí rí gajkhun ga̱jma̱a̱ numuu Jeobá ma̱ngaa xóo nandoo rí maraxtaa. Xú káʼnii gándoo gátasngajmá rí nangajua̱ʼ rá. Ikhaa nindxu̱u̱ rí matraxnuu xúgíʼ mbiʼi, ga̱jma̱a̱ mataniratamínaʼ rí majmañaaʼ ga̱jma̱a̱ numuu Biblia ma̱ngaa rí mataʼgíʼ matani rí ejmañaaʼ (Sal. 119:97, 99; Juan 17:17). Lá xtaʼdáá mbá awan mu matraxnuu xúgíʼ mbiʼi ga̱jma̱a̱ lá natani ráʼ.
10. Náá numuu rí Biblia nindxu̱u̱ mixtiʼkhu ki xó i̱ʼwáʼ libro rá.
10 Biblia nindxu̱u̱ mbá libro rí mixtiʼkhu kayuuʼ ki xóo i̱ʼwáʼ libro, numuu dí i̱ndó ikhí na̱ʼkha̱ raʼthí ga̱jma̱a̱ numún xa̱bu̱ bi̱ phú ndiyáá ga̱jma̱a̱ idún Jesús. Káaʼ i̱ndó libro rúʼko̱ naʼthí rí gajkhun rí niʼni ga̱jma̱á numaaʼ. Índo̱ gájmaña̱a̱ʼ rí Jesús niʼni ga̱jma̱a̱ rí niʼthí, maʼndaaʼ mambajxáaʼ ga̱jma̱a̱ʼ.
11. Ndiéjunʼ gámbayáa mu maʼndaaʼ xtayáá itháan Jeobá rá.
11 Gajmañaaʼ maʼndaaʼ xtayáá Jesús, ga̱jma̱a̱ gáʼndaaʼ xtayáá itháan Jeobá. Narígá rígi̱ numuu rí Jesús nasngájma xóo nindxu̱u̱ Anu̱u̱ (Juan 14:9). Índo̱ gájmañaaʼ itháan ga̱jma̱a̱ numuu Jesús, itháan gájmañaaʼ ga̱jma̱a̱ numuu Jeobá, ga̱jma̱a̱ xúʼko̱ maʼndaaʼ xtayáá itháan. Atatsaʼwáminaʼ, índo̱ Jesús nisngájma rí nigáwiinʼ a̱jkiu̱u̱n kaʼñún xa̱bu̱ bi̱ tsíñún gúñún, xóo xa̱bu̱ ginii, bi̱ nandoo kañun ga̱jma̱a̱ bi̱ nánguá guáʼdáá tsiakii. Atatsaʼwáminaʼ ma̱ngaa náa xtágabu májánʼ rí naxnáaʼ ga̱jma̱a̱ xú káʼnii embáyaaʼ índo̱ natagíʼ natanimbánii (Mat. 5:1-11; 7:24-27).
12. Índo̱ gájmañaaʼ ga̱jma̱a̱ numuu Jesús, ndiéjunʼ rí gáxkajxi̱i̱n matani rá.
12 Índo̱ gátatsaʼwamínaʼ náa tsigijñaʼ rí nixnajxi̱ Jesús mu ma̱ndoo majngudi̱i̱ aʼkhúlú, maʼndaaʼ xtayáá itháan (Mat. 20:28). Índo̱ gákrua̱ʼa̱a̱ʼ rí ikhaa nixtáa xawii mu makhañúu ga̱jma̱á numaaʼ, mbáa mata̱nga̱a̱ a̱jkia̱a̱nʼ rí nitani̱ nákha ginii ga̱jma̱a̱ maratha̱a̱n Jeobá rí maʼni mba̱a̱ a̱jkiu̱u̱n kaʼyaaʼ (Hech. 3:19, 20; 1 Juan 1:9). Índo̱ gáʼndaaʼ xtayáá itháan Jeobá ga̱jma̱a̱ Jesús, itháán gáʼndaaʼ maraxtaa gajmiáanʼ bi̱ nakumu̱ún xúʼko̱ kaʼnii.
13. Ndiéjunʼ rí nixnáaʼ Jeobá rá.
13 Gajmañaaʼ maʼndaaʼ xtañún bi̱ kúwá náa goʼwóo Jeobá. Mbáa bi̱ xtañún bi̱ na̱nguá ni̱ndxu̱ún xa̱bi̱i̱ Jeobá ga̱jma̱a̱ bi̱ nimbájxa̱a̱ʼ gajmiáanʼ nákha ginii, tsíkru̱ʼu̱u̱n náá numuu rí nandaaʼ maraxnaxíminaʼ mu matani káxi̱ ñajuunʼ Dios, ga̱jma̱a̱ mbáa asndu makhíʼníin kuyaaʼ. Mú Jeobá má gámbáyáaʼ, maxnáaʼ maraxtaa gajmiáanʼ bi̱ nuni ñajuunʼ ikhaa. Á mu ikháán naraxtaa mijngii náa ikhiin, ra̱ʼkhá tháán gaʼndún kuyaaʼ ma̱ngaa índo̱ gáʼya̱a̱ʼ ikhiin mumbayaaʼ (Mar. 10:29, 30; Heb. 10:24, 25). Mbáa maʼga̱nú mbooʼ mbiʼi rí bi̱ xtañún mangiin maguánu muni ñajuunʼ Jeobá ga̱jma̱a̱ makuwíin xó má nandoo ikhaa (1 Ped. 2:12).
14. Xó má naʼthí náa 1 Juan 5:3, ndiéjunʼ rí nidxuʼnú nitayáá ga̱jma̱a̱ numuu xtángoo ndrígóo Jeobá rá.
14 Gajmañaaʼ mangajua̱ʼ ga̱jma̱a̱ matatsimba̱a̱ʼ xtángoo ndrígóo Dios. Mbáa ikháán nákha xóó tsétatsiniiʼ Jeobá, natani xó má nandaaʼ, mú xúgi̱ natayáá rí xtángoo ndrígóo Jeobá nindxu̱u̱ itháan májánʼ (Sal. 1:1-3; atraxnuu 1 Juan 5:3). * Atatsaʼwáminaʼ xtágabu rí na̱ʼkha̱ náa Biblia rí na̱jkha̱ inún xa̱bekha ga̱jma̱a̱ gu̱ʼu̱, xabuanii ga̱jma̱a̱ e̱ji̱n (Efes. 5:22–6:4). Lá natayáá rí bi̱ kúwá náa guʼwáaʼ, nakúwá itháán májánʼ índo̱ nugíʼ nunimbánii ráʼ. Lá naraxtáa itháan májánʼ xúgi̱ rí natanimbánii xtágabu ga̱jma̱a̱ numuu rí matraʼwíin májánʼ bi̱ mambajxa̱a̱ʼ gajmiáanʼ ráʼ. Lá naraxtáa itháán gagi ráʼ. (Prov. 13:20; 1 Cor. 15:33.) Mbáa marata̱ dí xúʼko̱ nindxu̱u̱.
15. Ndiéjunʼ gátani á mu tsítayáá xóo gátaʼgíʼ matanimbánii ikha rí na̱ʼkha̱ náa Biblia rá.
15 Mbáa nguáná tsítayáá xóo gátaʼgíʼ matanimbánii ikha rí na̱ʼkha̱ náa Biblia dí xtaa rajmañaaʼ. Ikha jngó Jeobá najmuu xuajñuu mu maʼtulú rí na̱ʼkha̱ náa Biblia mu mambáyaaʼ ma̱ta̱ya̱a̱ ndiéjunʼ nindxu̱u̱ rí májánʼ ga̱jma̱a̱ dí ra̱májánʼ (Heb. 5:13, 14). Índo̱ gátra̱xnuu ma̱ngaa rí matanigajmaa̱, ma̱ta̱ya̱a̱ rí mambáyaaʼ índo̱ gátraʼníí xkujndu, ga̱jma̱a̱ maʼndaaʼ maraxtaa náa xuajñuu Jeobá.
16. Xú káʼnii nigíʼ xuajñuu Jeobá rá.
16 Gajmañaaʼ maʼndaaʼ xtayáá ga̱jma̱a̱ matambáyii xuajñuu Dios. Jeobá nigruiga̱ congregación, ga̱jma̱a̱ A̱ʼdióo bi̱ nindxu̱u̱ Jesús nayéjkha̱ edxu̱u̱ náa ikhí (Efes. 1:22; 5:23). Ga̱jma̱a̱ Jesús nigruigi̱i̱n mbá chimbaʼin bi̱ kaxtaʼwíin mu muyégún edxu̱u̱ náa ñajunʼ rí ikhaa nandoo maguma rí mbiʼi xúgi̱. Cristianos bugi̱, bi̱ Jesús nixná mbiʼñún “ñumba tsi jmbi, tsi majan indxaʼhuaminaʼ”, nduyáá gajkhun rí ndayóoʼ muxnáaʼ ikha ga̱jma̱a̱ muñewa̱a̱n xóo nambájxa̱a̱ʼ ga̱jma̱a̱ʼ Dios (Mat. 24:45-47). Mbá rí xóo nañawunlú ñumba tsi jmbi rí nagruigi̱i̱n bi̱ kuya̱ edxu̱u̱ bi̱ najmañún náa congregación (Is. 32:1, 2; Heb. 13:17; 1 Ped. 5:2, 3). Ikhiin kúwi̱i̱n xawii mu mumbayáaʼ, muni̱i̱ a̱jkia̱a̱nʼ ga̱jma̱a̱ mumbayáa mambajxa̱a̱ʼ itháan ga̱jma̱a̱ʼ Jeobá. Mú rí itháán gíʼdoo wéñuʼ numuu rí matani ikháán nindxu̱u̱ rí marasngúún eʼwíinʼ xa̱bu̱ ga̱jma̱a̱ numuu Jeobá (Efes. 4:11-13).
17. Xó má naʼthí náa Romanos 10:10, 13, 14, náá numuu rí nuʼthúún xa̱bu̱ ga̱jma̱a̱ numuu Jeobá rá.
17 Atambáñuun eʼwíinʼ mu maʼndún kuyáá Jeobá. Jesús niʼthún xa̱bi̱i̱ rí musngúún eʼwíinʼ xa̱bu̱ ga̱jma̱a̱ numuu Dios (Mat. 28:19, 20). Gíʼmáánʼ rí muʼnimbulúʼ kiʼtáñajunʼ rúʼko̱. Á mu na̱jkha̱ randaaʼ xtayáá itháan Jeobá, makuma̱a̱ʼ xóo nikumu̱u̱ apóstol Pedro ga̱jma̱a̱ Juan, bi̱ nithi: “Xándoo muniʼñáʼxu mutha rí ndi̱ya̱a̱ ga̱jma̱a̱ rí nidxawiinxu” (Hech. 4:20). Maski ajndu chíʼgíiʼ rí gátani naʼni rí maraxtaa gagi, xóo matambáñun eʼwíinʼ mu maʼndún kuyáá Jeobá. Lá ma̱ndoo matatsaʼwamínáʼ dí ra̱ʼkhá tháán gagi nixtáa Felipe índo̱ nimbáyúu Etíope mu majmañuu rí gajkhun dí naʼthí náa escritura ga̱jma̱a̱ rí manjngúu̱n iyááʼ ráʼ. Índo̱ gátayaridáá xóo niʼni Felipe ga̱jma̱a̱ matatsimba̱a̱ʼ kiʼtáñajunʼ ndrígóo Jesús dí marataráʼa, xúʼko̱ gatasngajmá rí nandaaʼ ma̱nindxa̱a̱ʼ xa̱bi̱i̱ Jeobá (atraxnuu Romanos 10:10, * 13, 14). * Mbáa matani ikháá má graxe̱ xóo rí niʼni etíope: “Ndiéjunʼ narikhoʼ mu majngún iyááʼ rá.” (Hech. 8:36).
18. Ndiéjunʼ gúʼyáá náa imbo̱o̱ʼ artículo rá.
18 Índo̱ gátraʼwíí rí majnguáanʼ iyááʼ, nitraʼwíí matani mbá rí gíʼdoo wéñuʼ numuu náa vida ndrígá. Numuu rí na̱nguá nindxu̱u̱ mbá gitsíin, ikha jngó ndayóoʼ matatsaʼwa̱a̱ májánʼ edxa̱ʼ rí phú eyoo gáʼthúu̱n. Mú, ndiéjunʼ eya̱a̱ʼ ma̱ta̱ya̱a̱ ga̱jma̱a̱ numuu rí majnguáanʼ iyááʼ rá. Ndiéjunʼ gíʼmaa matani nákha xóó tséjnguáanʼ iyááʼ ga̱jma̱a̱ nda̱wa̱á rí nijnguáanʼ má rá. Rígi̱ mbuʼyáá náa imbo̱o̱ʼ artículo.
AJMÚÚ 2 Ikháán mbiʼyaaʼ Jeobá
^ párr. 5 Tikhun xa̱bu̱ bi̱ nandún kuyáá Jeobá na̱nguá eyáá á mu kúwi̱i̱n xawii mu majngún iyááʼ ga̱jma̱a̱ rí mani̱ndxu̱ún xa̱bi̱i̱ Jeobá. Á mu xúʼko̱ kuma̱a̱ʼ mangáán, artículo rígi̱ maʼni marmáʼáan a̱jkia̱a̱nʼ rí ma̱ndoo matani mu majnguáanʼ iyááʼ.
^ párr. 2 Hechos 8:27-31: “Ikha jngó, ikhaa niʼnirataminaʼ ga̱jma̱a̱ ni̱jkha̱. Ikhú nixkamaa mbáa eunuco etíope, mbáa xa̱biya̱ bi̱ gíʼdoo numuu bi̱ naʼni ñajuunʼ Candace, reina ndrígu̱ún etíopes ga̱jma̱a̱ ikhaa kajkuáa ñawúunʼ xúgíʼ rí gíʼdoo numuu. Ikhaa ni̱jkha̱ Jerusalén mu mbaʼyamajkhuu Dios, índo̱ xtáa ratanga̱a̱. Grígu náa carriu̱u̱ naguxnuu xígu dí niʼnirámáʼ gaʼyee Isaías. Ikhú xi̱ʼ niʼthúu̱n Felipe: “Ayuʼ, ataxuʼmaminaʼ náa carro rúʼko̱”. Felipe nigáyúu náa níjniúu ga̱jma̱a̱ niʼdxaun rí ikhaa xtáa raguxnuu xígu rí niʼnirámaʼ gaʼyee Isaías. Ikhú niraxu̱u̱: “Gajkhun nakruaʼaʼ rí xtaa raraxnuu ráʼ.” Ikhaa niriʼñuu: “Xú káʼnii gándoo gákroʼoʼ á mu nda̱wa̱a̱ tsáa eʼsngóʼ rá.” Ikhú niʼtákáñuu Felipe mu matsimuu magiʼi ga̱jma̱a̱.”
^ párr. 2 Hechos 8:35-38: “Felipe nigíʼdu̱u̱ niʼthí ga̱jma̱a̱ rí na̱ʼkha̱ náa Escrituras rígi̱, niʼthúu̱n ajngáa rí májánʼ ga̱jma̱a̱ numuu Jesús. Índo̱ kuwa ragún kamba̱a̱, niguáʼnu náa kajnu̱ʼ iyaʼ, ga̱jma̱a̱ eunuco niʼthí: “¡Atayáá! Gi̱i̱ rígá iyaʼ. Dí erikhooʼ mu xájngúnʼ iyááʼ ráʼ.” Ikhú niʼthí rí mutsiji carro, xó má Felipe ga̱jma̱a̱ eunuco nijngún náa iyaʼ. Ikhú Felipe nikumánʼ iyááʼ.”
^ párr. 5 Numuu rí mixtiʼkuii mámbáa xa̱bu̱, ikha jngó mbáa mixtiʼkhu xóo gáʼnimbánuu mámbáa rí naʼthí náa artículo rígi̱.
^ párr. 6 Romanos 1:20: “Numuu dí xóo nindxu̱u̱ tsékujmaa, tsiakii ndrígóo nditháan tsetumuu ga̱jma̱a̱ dí ikhaa nindxu̱u̱ Dios, nakujmaa kaʼwu asndu nákhi nigíʼdu̱u̱ niʼni numbaaʼ, numuu dí nakujmaa náa xúgíʼ rí niguma, ikha jngó nimbáa xándoo maʼthí dí na̱nguá.”
^ párr. 6 Mataxkamaa xóó itháan xkri̱da náa folleto ¿Es la vida obra de un Creador? ga̱jma̱a̱ El origen de la vida. Cinco cuestiones dignas de análisis.
^ párr. 14 1 Juan 5:3: “Numuu dí rígi̱ eyoo gáʼthi rí maʼndulú kuʼyáá Dios: Rí muʼnimbulúʼ rí naʼtáñajunʼ; ga̱jma̱a̱ rí naʼtáñajunʼ na̱nguá mikiwun muʼda.”
^ párr. 17 Romanos 10:10: “Numuu dí ga̱jma̱a̱ a̱jkiu̱lú nasngájma fe rí na̱jkha̱ kaguáanʼ náa rí jmbu, mú ga̱jma̱a̱ rawunlú nuʼthá náa inún mbaʼin rí na̱jkha̱ kagui̱i̱n mu makáwíin.”
^ párr. 17 Romanos 10:13, 14: “Numuu rí xúgínʼ bi̱ nugríga̱a̱ mbiʼyuu Jeobá makáwíin. Mú, xú káʼnii gúgriga̱a̱ mbáa á mu raguáʼdáá fe náa ikhaa xá. Xú káʼnii guguaʼdáá fe náa ikhaa á mu tudxawíín nditháan ga̱jma̱a̱ numuu xá. Xú káʼnii gudxawíín á mu nda̱wa̱a̱ tsáa gaʼtaruʼun xá.”
^ párr. 67 NAʼTHÍ NUMUU XTIʼKHU: Mbáa ndxájulú a̱ʼgu̱ bi̱ xtáa ra̱ʼtsi naxnúu mbá tratado mbáa dxáʼgú.
