Tikhun levitas bi̱ na̱nguá ni̱ndxu̱ún ndxajkun nuyambáá rí ndayóoʼ maguma náa templo, rí xóo mani̱ndxu̱ún policías. Bi̱ kayá edxu̱u̱ náa templo ndaʼyoo ñajunʼ rí nuni. Filón bi̱ naʼnirámáʼ bi̱ nindxu̱u̱ judío niʼthí ndiéjunʼ ñajunʼ eni: “Tikhun naguajunʼ náa níjniúu xkrugua mu muñewa̱a̱n rí xatuʼu̱u̱n xa̱bu̱ ga̱jma̱a̱ eʼwíinʼ kuwa awúu̱n náa inuu santuario mu mbuyáá rí xáto̱ʼo̱o̱ nimbáa bi̱ rakáʼyoo mato̱ʼo̱o̱ ga̱jma̱a̱ xúʼko̱ xáʼni dí raʼkhí náa inuu santuario, eʼwíinʼ nagún mbiʼí mbruʼún náa bájndi kidxuuʼ templo xó má kaʼñún muni, ma̱ngaa nuriʼkumíjná”.

Xa̱bu̱ bugi̱ nuyambáá náa Sanedrín. I̱ndó nguéjmi̱i̱n xa̱bu̱ bugi̱ bi̱ ni̱ndxu̱ún judío bi̱ Xa̱bu̱ Ñajunʼ romano niniñúúnʼ muda̱ ajua̱nʼ.

Xó má eʼthí especialista Joachim Jeremias, “índo̱ inu murugua̱a̱ Jesús niʼthún ajngáa rígi̱, tsejtsi mbiʼi nixtáá nisngáa náa rexo̱o̱ templo, ga̱jma̱a̱ ikháanʼ na̱nguá nirajtuwún” asndu xóo rakáʼnii matanimbaaʼ rí “ikhiin má policía bi̱ kúwíin náa templo nirajtuwíin” (Mat. 26:55). Ikháá má especialista bugi̱ niʼthí rí ikhiin má policías bi̱ kúwíin náa templo bi̱ nigíʼ murugua̱a̱ Jesús nákha ginii (Juan 7:32, 45, 46). Mbiʼi nda̱wa̱á, bi̱ kayá edxu̱u̱ ga̱jma̱a̱ soldados nijuiʼthúún rí magún kudi̱i̱n xa̱bi̱i̱ Jesús náa inu Xa̱bu̱ Ñajunʼ. Mbáa ikhiin má policías bugi̱ bi̱ nixmajtaa Pablo náa rexo̱o̱ templo (Hech. 4:1-3; 5:17-27; 21:27-30).