Tikhun cristiano najmún Internet mu mutimijná gajmiún a̱ngiu̱lú ga̱jma̱a̱ eʼwíinʼ bi̱ kuñún, nakujmaa kaʼwu rí a̱ngiu̱lú bi̱ nakru̱ʼu̱u̱n májánʼ nunimbaníí consejo rígi̱: “Xa̱bu̱ bi̱ nandxa̱ʼóo edxu̱u̱ bi̱ ndiʼyoo gamiéjunʼ narkaʼuminaʼ, bi̱ tsíjmañún nagún ga̱jma̱a̱ numíniiʼ” (Prov. 27:12).

Nduʼyáálú rí Jeobá nandoo mañewu̱nlú ikha jngóo, rí tsémbájxulú gajmiúlú xa̱bu̱ bi̱ nuni̱ marigá xkujndu, bi̱ na̱nguá ni̱ndxu̱ún xa̱bi̱i̱ Jeobá o bi̱ na̱nguá esngáa rí gajkhun (Rom. 16:17; 1 Cor. 5:11; 2 Juan 10, 11). Mbáa tikhun nagún náa congregación mú na̱nguá enimbu̱u̱n ikha rí na̱ʼkha̱ náa Biblia (2 Tim. 2:20, 21). Na̱nguá má mingíjyúuʼ nindxu̱u̱ rí muraʼwíin bi̱ mambáxulu gajmiúlú mú mixtiʼkhu nindxu̱u̱ índo̱ najmulú aplicación dí rígá náa Internet mu muxuʼmá mensaje.

Á mu nundxaʼwamíjna̱ matu̱ʼu̱lú náa mbá grupo náa nutamijná mbaʼin xa̱bu̱. Gurajximijnálu, tsíin xa̱bu̱ eyulú mambájxu gajmiúlú. Mbaʼin a̱ngiu̱lú bi̱ nitu̱ʼu̱u̱n náa grupo náa nutamijná mbaʼin xa̱bu̱, naguáʼníí dí raʼkhí. Mú, xú káʼnii gándoo gúñewumíjna̱lú á mu kajchún mbaʼin wéñuʼ xa̱bu̱ rá. Maʼni mingíjyúuʼ mbuʼyáá tsíin nindxúu̱n ga̱jma̱a̱ á mu nambájxu̱u̱n májánʼ gajmiún Dios. Salmo 26:4 naʼthí: “Na̱nguá eʼgúnʼ gajmíʼ xa̱bu̱ bi̱ nuninduwaʼ; ni má tsímbáxu̱ʼ gajmíʼ bi̱ nurkaʼwu xóo ni̱ndxu̱ún.” Itháan májánʼ mu̱ʼni̱ rí muʼthámijna gajmiúlú i̱ndó xa̱bu̱ bi̱ nuniʼnúunʼlú.

Maski má nindxu̱u̱ mboʼ grupo náa na̱nguá má kajchún mbaʼin xa̱bu̱. Ndayóoʼ rí muñeumíjna̱ ga̱jma̱a̱ numuu rí nutamijná ma̱ngaa nguáthá mba̱yu̱u̱ʼ kuwáanʼlu raxuʼmá mensaje, xáʼyooʼ má makumulú rí ndayóoʼ muriʼña̱a̱ tsiakii xúgíʼ mensaje rí na̱ʼkha̱nú maski má ikhiin nuxuʼma má xúʼko̱. Pablo niʼthúu̱n Timoteo rí ndayóoʼ mañeumínáʼ náa xa̱bu̱ bi̱ “nuni̱ [...] xtujtaa ga̱jma̱a̱ nuxuda̱mi̱jna̱ náa dí rakáʼyoo” (1 Tim. 5:13). Xúʼko̱ má ma̱ndoo marigá rí mbiʼi xúgi̱ náa Internet ma̱ngaa.

Cristiano bi̱ nakru̱ʼu̱u̱n májánʼ, ikhiin na̱nguá ethi mangiin índo̱ nuta numamijná eʼwíinʼ o índo̱ nuthi mbá dí rakáʼyoo mbuyáá eʼwíinʼ (Sal. 15:3; Prov. 20:19). Tséxnatiʼñamijná mudxawíín ga̱jma̱a̱ tsétari̱ga̱ mbá dí ragájkhun nirígá (Efes. 4:25). Ikháanʼlu nundrígú ganitsu rí na̱ʼkha̱ náa Jeobá rí gajkhun narígá rí na̱ʼkha̱ náa ináa ndrígúlú jw.org, ga̱jma̱a̱ programa rí nagájnuu mambá gu̱nʼ JW Broadcasting^®.

Mbaʼin a̱ngiu̱lú najmún aplicación dí rígá náa Internet náa nutamijná mu muxnaraʼa rí nagujua̱, mu mutsi o muxnaraʼa mbá ñajunʼ. Mú rígi̱ na̱nguá kuajtuminaʼ ga̱jma̱a̱ rí nduʼyamajkuíí Dios, rígi̱ ni̱ndxu̱u̱ ga̱jma̱a̱ numuu ñajunʼ ga̱jma̱a̱ náa naxtangujua̱. Cristiano bi̱ “na̱nguá nigu̱u̱nʼ muguaʼdáá i̱ndó mbújkha̱a̱” nánguá ejmiún a̱ngiu̱lú mu ma̱ndoo makhánun mbújkha̱a̱ (Heb. 13:5).

Á mú najmulú aplicación rígi̱ mu munda̱ʼa̱lú mbújkha̱a̱ rí mambáñún a̱ngiu̱lú bi̱ ndañúnʼ ga̱jma̱a̱ bi̱ niguáʼníí gamiéjunʼ rá. Numuu rí nandulú kuʼñúún a̱ngiu̱lú, naxmiéjunlú eni̱ ga̱jma̱a̱ nuxnún tsiakii ma̱ngaa rí mumbáñún índo̱ ndañúnʼ (Sant. 2:15, 16). Á mu nuʼnilú náa mbá grupo náa kajchún mbaʼin xa̱bu̱, kuwáanʼ ranújngurámulú ñajunʼ rí kaʼyoo maʼni sucursal o congregación, numuu rí ikhiin kaʼñún muni̱ ñajunʼ rígi̱ (1 Tim. 5:3, 4, 9, 10, 16). Gajkhun má rí nimbáa cristiano tsíyoo maʼni rí eʼwíinʼ mbuyáá rí ikhaa kaʼyoo mañewu̱u̱n a̱ngiu̱lú.

Nandulú rí xúgíʼ rí gúʼni̱ maxnuu gamajkhu Dios (1 Cor. 10:31). Ikha jngóo á mu ndayóoʼ muraʼwíí rí majmuluʼ aplicación o i̱ʼwáʼ ajua̱nʼ mu muxuʼguánʼ mensaje, gíʼmaa mundxaʼwamíjná ndiéjunʼ gamíi marigá ga̱jma̱a̱ mundxaʼwamíjna̱lú májánʼ.