1. Ndiéjunʼ gándoo gúʼthá ga̱jma̱a̱ numún jiámá bi̱ nijngún má iyááʼ rá.

JIÁMÁ, rígá mbaʼa wéñuʼ dí ma̱ndoo munila. Mbaʼáanʼ dí ikháanʼ, gújkiáanʼla ga̱jma̱a̱ kuaʼdáá tsiakii (Prov. 20:29). Ra̱ʼkhá tháán mba̱a̱ dí nuñambáála náa congregación. Mbáa mbaʼáanʼ dí ikháanʼ nandala mani̱ndxa̱la siervo ministerial. Mú mbáa tikhuaanʼ nakumala dí eʼwíinʼ nduyáá rí káʼníí jiámáá kayuuʼ nindxa̱la o xóó nda̱a̱ dí ejmañala, mu mundrígú mbá ñajunʼ rí gíʼdoo numuu. Lá xúʼko̱ ekumala ráʼ. Maski ajndu jiámáá nindxa̱la, mú asndu xúgi̱, rígá rí ma̱ndoo mugíʼdi̱i̱ munila mu a̱ngiu̱lú bi̱ kúwi̱i̱n náa congregación makumún kuyala.

2. Ndiéjunʼ gúʼyáá náa artículo rígi̱ rá.

² Náa artículo rígi̱ mbuʼyáá xú káʼnii nixtáa rey David. Ma̱ngaa mbuʼyáá mbá chíʼgíiʼ xú káʼnii nikúwá a̱jmi̱i̱n reyes náa Judá: Asá ga̱jma̱a̱ Jehosafat. Guʼyáá ndiéjunʼ gakhi̱i̱ dí niraʼníí ikhiin, xú káʼnii nini̱ ga̱jma̱a̱ ndiéjunʼ gándoo gámbañún jiámá náa xkridún ikhiin.

3. Xú káʼnii gándoo gúmbáñún a̱ngiu̱lú xabuanii jiámá rá.

³ Nákha xóó chíʼgíiʼ David, mbaʼa rí nijmañuu niʼni, nijmuu mu mambáñún eʼwíinʼ, nikujmaa kaʼwu dí ninindxu̱u̱ mbáa xa̱bu̱ bi̱ nimbájxu̱u̱ májánʼ ga̱jma̱a̱ Jeobá ma̱ngaa nijmuu rí nijmañuu na̱ʼdu̱u̱ mu mambáyúu rey Saúl, mbáa rey bi̱ Dios nigíiʼ (1 Sam. 16: 16, 23). Ikháá má kayuuʼ, mbaʼin jiámá mbaʼa rí najmañún rí ma̱ndoo mumbañún eʼwíinʼ náa congregación. Mbá xkri̱da, tikhun a̱ngiu̱lú wanii nadxún wéñuʼ índo̱ jiámá nusngúún majmún table o i̱ʼwáʼ ajua̱nʼ mu munigajmaa ndajkhuín  o majmún náa reunión. Ikha jngóo rí najmán natru̱gua̱ ajua̱nʼ ra̱ʼkhá tháán mba̱a̱ dí gándoo matiembáa.

4. Xó má David, ndiéjunʼ gíʼmaa muni̱ jiámá rá. (Atayáá xtiʼkhuu dí na̱ʼkha̱ náa nagi̱ʼdu̱u̱.)

⁴ David nisngájma dí ninindxu̱u̱ mbáa xa̱bu̱ bi̱ naʼnimbánuu ñajunʼ ga̱jma̱a̱ bi̱ kaʼnii maku̱ma̱a̱ʼ xtayáá. Mbá xkri̱da, índo̱ káʼníí chíʼgíiʼ, niniña̱a̱nʼ rí mañewu̱u̱n mugiu̱u̱ anu̱u̱ ga̱jma̱a̱ ikhaa niʼniminaʼ mañewu̱u̱n asndu xó má eʼngo̱o̱ maski ajndu ñajunʼ rígi̱ ninindxu̱u̱ gakhi̱i̱. Mbiʼi nda̱wa̱á niʼthúu̱n rey Saúl: “Xa̱bia̱ʼ nindxu̱u̱ báxtúu ndrígóo anu̱u̱, ga̱jma̱a̱ ni̱ʼkha̱ mbáa león ma̱ngaa mbáa oso, ga̱jma̱a̱ mámbáa ni̱jkha̱ kayáa mbáa mugu̱. Ikhúúnʼ ni̱jkhá raxkoo ga̱jma̱a̱ nixíyáa ga̱jma̱a̱ náa rawúnʼ nini kríyaaʼ mugu̱” (1 Sam. 17:34, 35). David ndiʼyoo dí ikhaa kajkuáa ñawúunʼ dí mañewu̱u̱n mugu̱, ikha jngóo támiñuu rí niʼnikáwiin. Jiámá ma̱ndoo mbuyaridáá índo̱ nunimbaníí asndu xú káʼníí má ñajunʼ dí nakhánún.

5. Xó má naʼthí náa Salmo 25:14, ndiéjunʼ dí gíʼdoo itháan numuu muni̱ jiámá rá.

⁵ Ma̱ngaa David asndu nákha dxámá ninindxu̱u̱, nimbájxu̱u̱ májánʼ ga̱jma̱a̱ Jeobá. Rúʼko̱ rí nigiʼdoo itháan numuu náa ikhaa ki xóo dí támiñuu ga̱jma̱a̱ dí nijmaa ni̱ʼdu̱u̱ arpa. David raʼkháa i̱ndó ndiʼyoo dí Jeobá nindxu̱u̱ Dios ndrígóo ma̱ngaa ndiʼyoo dí nindxu̱u̱ mbáa bi̱ nambájxu̱u̱ májánʼ ga̱jma̱a̱ (atraxnuu Salmo 25:14). * Jiámá, rí itháan gíʼdoo numuu rí ikháanʼ ma̱ndoo muni̱ nindxu̱u̱ dí mambajxála gajmiála Ana̱la bi̱ xtáa mekhuíí. Á mu nunila, rígi̱ gáʼni rí makhánála itháan ñajunʼ náa congregación.

6. Ndiéjunʼ dí nikumu̱ún eʼwíinʼ ga̱jma̱a̱ numuu David rá.

⁶ Mbá dí mingíjyúuʼ dí David niraʼnuu nindxu̱u̱ rí eʼwíinʼ nikumu̱ún rí tséjmaa. Mbá xkri̱da, índo̱ nixnáximinaʼ mu maxmínaʼ ga̱jma̱a̱ Goliat, rey Saúl nigíʼ marikhoo ga̱jma̱a̱ niʼthúu̱n: “Ni̱ndxa̱ʼ mbáa dxámá” (1 Sam. 17:31-33). Nákha wapháá, minaaʼ má ndxájuu niʼthúu̱n rí nda̱a̱ rí ejmaa (1 Sam. 17:26-30). Mú Jeobá na̱nguá ndiʼyoo xúʼko̱ kaʼnii numuu rí nininiiʼ májánʼ. Numuu dí David ndiʼyoo dí Jeobá bi̱ nambájxu̱u̱ ga̱jma̱a̱ maxnúu tsiakii, ikha jngóo niʼngo̱o̱ nixmínaʼ ga̱jma̱a̱ Goliat (1 Sam. 17:45, 48-51).

7. Ndiéjunʼ gándoo gájmañaaʼ náa rí xóo nixtáa David rá.

⁷ Ndiéjunʼ gándoo gájmañaaʼ rí xóo nixtáa David rá. Timbá, rí ndayóoʼ maʼngo̱o̱ a̱jkia̱nʼ.  Mbáa makuwá bi̱ niniʼníínʼ asndu nákha chíʼgíínʼ, ikhiin maʼñún gakhi̱i̱ mbuyáá rí nindxa̱a̱ʼ mbáa dxámá bi̱ na̱jkha̱ rajmaa. Mú gagiwaanʼ a̱jkia̱a̱nʼ rí Jeobá tséʼyoo xóo kiejxa̱a̱ʼ. Ikhaa naniníinʼ májánʼ ga̱jma̱a̱ ndaʼyoo rí majmán matani (1 Sam. 16:7). Ragajma, rí mambajxáaʼ májánʼ ga̱jma̱a̱ʼ ikhaa. David niʼni rígi̱ índo̱ nindxa̱ʼwáminaʼ ga̱jma̱a̱ numuu xúgíʼ dí nigumawíi ma̱ngaa índo̱ nindxa̱ʼwáminaʼ ndiéjunʼ eʼsngóo Jeobá ga̱jma̱a̱ numuu rúʼko̱ (Sal. 8:3, 4; 139:14; Rom. 1:20). Ragajtsú, rí ikháán ma̱ndoo matanda̱ʼa̱a̱ Jeobá rí maxnáaʼ tsiakii. Mbá xkri̱da, á mu a̱ngia̱a̱nʼ náa natanigajmaa nutsijmán numuu rí nindxa̱a̱ʼ xa̱bi̱i̱ Jeobá, atanda̱ʼa̱a̱ Jeobá mambáyaaʼ mu maʼngaaʼ. Ma̱ngaa atagíminaʼ matanimbáníí consejo dí na̱ʼkha̱ náa Biblia, dí na̱ʼkha̱ náa iyulú ma̱ngaa dí na̱ʼkha̱ náa video. Mámbá índo̱ Jeobá nambáyaaʼ, rúʼko̱ gáʼni dí maku̱ma̱a̱ʼ xtayáá itháan, ga̱jma̱a̱ índo̱ eʼwíinʼ gúyáá dí natambayuminaʼ náa Jeobá mangiin makumún kuyaaʼ.

8, 9. a) Ndiéjunʼ nimbáyúu David rí maʼngo̱o̱ a̱jkiu̱u̱n mu magiʼthu̱u̱n asndu índo̱ gáʼtañajunʼ rá. b) Ndiéjunʼ gándoo gámbañún jiámá náa xkridoo David rá.

⁸ Guʼyáá i̱mba̱ xkujndu mingíjyúuʼ dí ndiyóoʼ maraʼnuu David. Nda̱wa̱á rí nijuiʼya̱a̱ʼ mu mani̱ndxu̱u̱ rey, ndiyóoʼ rí magiʼthu̱u̱n mba̱yu̱u̱ʼ tsiguʼ mu magíʼdu̱u̱ maʼtáñajunʼ (1 Sam. 16:13; 2 Sam. 2:3, 4). Ndiéjunʼ nimbáyúu mu maʼngo̱o̱ a̱jkiu̱u̱n magiʼthu̱u̱n xá. Ikhaa táguanúu wíi rí magiʼthu̱u̱n maʼga̱nú mbiʼi, ikhaa nigíminaʼ maʼni náa rí najmaa naʼni. Mbá xkri̱da, índo̱ ikhaa nixtáa raxkaʼwuminaʼ náa mbañúnʼ filisteo, ikhú nixmínaʼ gajmíi̱n bi̱ tsíñún gúyáá Israel. Ga̱jma̱a̱ xúʼko̱ niñewu̱u̱n náa mbri̱ga̱a̱ naʼtáñajunʼ Judá (1 Sam. 27:1-12).

⁹ Ndiéjunʼ gándoo gájmañaaʼ náa xkridoo David rá. Rí gíʼmaa matani ñajunʼ Jeobá ga̱jma̱a̱ rí matambáñún a̱ngiu̱lú. Atatsaʼwáminaʼ xú káʼnii niʼni mbáa ndxájulú bi̱ mbiʼyuu Ricardo. * Nákha ikhaa ninindxu̱u̱ mbáa dxámá ra̱ʼkhá tháán nindoo dí mani̱ndxu̱u̱ precursor regular, mú xóó na̱nguá nixtáa xawii. Ikhaa na̱nguá nijmaa a̱jkiu̱u̱n, dí niʼni, niʼtáraʼa itháan. Ikhaa naʼthí: “Dí xúgi̱ na̱jkhánú ndayóo dí májánʼ ninindxu̱u̱ dí magúʼdoo mbiʼi mu majmañuʼ itháan. Niʼgíminaʼ mu mambáyúu asndu tsáá má xa̱bu̱ bi̱ gáxkamaa ga̱jma̱a̱ rí manirataminaʼ májánʼ mu matanga̱án gáyóo. Ma̱ngaa asndu nigíʼdu̱u̱ nisngóo ga̱jma̱a̱ Biblia. Índo̱ nataráʼa itháan, rúʼko̱ naʼni dí xámíñúʼ”. Rí xúgi̱, Ricardo nindxu̱u̱ siervo ministerial ga̱jma̱a̱ precursor regular.

10. Ndiéjunʼ niʼni David índo̱ ndiyóoʼ maraʼwíí mbá rí gíʼdoo numuu maʼni rá.

¹⁰ Guʼyáá i̱mba̱ dí niʼniuu gakhi̱i̱ David mu maraʼnuu. Mbá miʼtsú índo̱ ikhaa gajmíi̱n xa̱bi̱i̱ kúwá ruxkaʼwumíjná náa inuu Saúl, niniñu̱u̱nʼ bi̱ kúwi̱i̱n náa guʼwún mu magún gúxmijná. Ikhú xa̱bu̱ sia̱nʼ nitu̱ʼu̱u̱n náa guʼwún, nigún kudiin bi̱ kúwii̱n náa guʼwún. David ma̱ndoo maku̱mu̱u̱ kaʼyaminaʼ numuu dí nindxu̱u̱ mbáa bi̱ najmañuu naxmínaʼ, ikha jngóo ma̱ndoo maríyaʼ awan xú káʼnii ma̱ndoo maʼga gáʼni káwíin, mu táʼni rúʼko̱, ikhaa ndiyáʼ ikha ndrígóo Jeobá. Ga̱jma̱a̱ nimbáyuminaʼ náa mbáa ndxajkun bi̱ nigumbiʼyuu Abiatar, ikhaa nirajxu̱u̱: “Lá maʼgá raxkhúún kuʼwáʼ bugi̱ ráʼ.” Jeobá niʼthúu̱n rí maʼga ga̱jma̱a̱ niʼthúu̱n rí maʼngo̱o̱ (1 Sam. 30:7-10). Ndiéjunʼ gándoo gájmañáa ikháán náa rígi̱ rá.

11. Ndiéjunʼ gátani nákha xóó tsétraʼwíí dí matani rá.

¹¹ Atanda̱ʼa̱ consejo nákha xóó tsétraʼwíí rí matani. Aratháán ana̱a̱ʼ ga̱jma̱a̱ ru̱dáa̱ʼ o bi̱ kuya̱ edxu̱u̱. Ikhiin ma̱ndoo muxnáaʼ májánʼ consejo numuu dí Jeobá nigruigi̱i̱n bi̱ kuya̱ edxu̱u̱ ga̱jma̱a̱ ikhaa naku̱mu̱u̱ kaʼñún, ikha jngóo xúʼko̱ má gátani mangáán. Ikhiin ni̱ndxu̱ún xóo “regalo” náa congregación (Efes.  4:8). Á mu natayaridáá fe rí kuáʼdáá ga̱jma̱a̱ natadxawíín consejo rí nuxna majmañaaʼ matraʼwíí májánʼ rí matani. Dí xúgi̱, mbuʼyáá xú káʼnii gándoo gámbáyulú xkridoo rey Asá.

12. Xú káʼnii xa̱bu̱ ninindxu̱u̱ rey Asá índo̱ nigíʼdu̱u̱ niʼtáñajunʼ rá.

¹² Asndu nákha dxámá rey Asá ninindxu̱u̱ mbáa xa̱bu̱ wabaaʼ ga̱jma̱a̱ támiñuu. Mbá xkri̱da índo̱ anu̱u̱ bi̱ nigumbiʼyuu Abías nikháñuu, ikhaa ndiyóo’ rí mariʼkuri̱ya̱a̱’, ikhú nigíʼdu̱u̱ niʼni gámbíin xúgíinʼ xándú. Ma̱ngaa, “niʼthúún bi̱ kúwá náa Judá rí mbuyaaʼ Jeobá, Dios ndrígu̱ún wajinʼ xiʼñúnʼ, ga̱jma̱a̱ dí munimbu̱ún Xtángoo ga̱jma̱a̱ kiʼtáñajunʼ” (2 Crón. 14:1-7). Ga̱jma̱a̱ índo̱ Zérah bi̱ ninindxu̱u̱ etíope nito̱ʼo̱o̱ náa jmbayuuʼ Judá gajmíi̱n mbá millón soldados, Asá nijmañuu rí maʼni ga̱jma̱a̱ nindo̱ʼo̱o̱ rí Jeobá mambáyúu. Niʼthúu̱n: “Oh, Jeobá ikháán natambañúún maski ajndu mbaʼin wéñuʼ o nguéjmi̱i̱n. Jeobá Dios ndrígúxu̱, atambáyuxu numuu rí naku̱mu̱xu kuyaaʼ ikháán”. Ajngáa dí mitsaanʼ rígi̱, nasngájma dí Asá ra̱ʼkhá tháán nigiʼdoo fe náa Jeobá rí ikhaa ma̱ndoo maʼni kríyaaʼ ikhaa ga̱jma̱a̱ xuajñuu. Asá nikumu̱u̱ kaʼyoo Anu̱u̱ bi̱ xtáa mekhuíí, ga̱jma̱a̱ “Jeobá niʼni gámbíin bi̱ etíopes” (2 Crón. 14:8-12).

13. Ndiéjunʼ nigíʼnuu nda̱wa̱á Asá ga̱jma̱a̱ náá numuu rá.

¹³ Dí mataxmínaʼ gajmiáanʼ mbá millón soldados nindxu̱u̱ mingíjyúuʼ. Mú Asá nikumu̱u̱ kaʼyoo Jeobá, ikha jngóo niʼngo̱o̱. Mba̱yu̱u̱ʼ mbiʼi nda̱wa̱á, mbáa rey xkawiiʼ ndrígóo Israel bi̱ mbiʼyuu Baasá niʼnimíñúu rí maxíyáa. Maski ajndu rúʼko̱ tánindxu̱u̱ mbiiʼ wéñuʼ, mú raʼkhí kayuuʼ niʼni Asá rí támbáyuminaʼ náa Jeobá, ikhaa niʼthúu̱n mambáyúu rey Siria. Dí niraʼwíí maʼni rúʼko̱ ni̱ʼkha̱ kagu̱u̱ mbaʼa gamiéjunʼ. Ikha jngóo Jeobá nijmiuu gaʼyee Hananí mu maʼthúu̱n rígi̱: “Numuu rí nitambayuminaʼ náa rey Siria ga̱jma̱a̱ tatambáyuminaʼ náa Jeobá Dios ndrígáaʼ, ikha jngóo soldado ndrígóo rey Siria nigáñun náa ñawáanʼ”. Ga̱jma̱a̱ asndu mbiʼi rúʼko̱ Asá niʼni má xúʼko̱ guerra (2 Crón. 16:7, 9; 1 Rey. 15:32).

14. a) Xú káʼnii gándoo gátasngajmá rí nakuma̱a̱ʼ xtayáá Jeobá rá. b) Xó má naʼthí náa 1 Timoteo 4:12, ndiéjunʼ gáʼnga̱a̱ʼ á mu natani rá.

¹⁴ Ndiéjunʼ gándoo gájmañaaʼ náa xkridoo Asá rá. Dí ndayóoʼ ma̱nindxa̱a̱ʼ má xúʼko̱ xa̱bu̱ guabaaʼ ga̱jma̱a̱ rí makuma̱a̱ʼ xtayáá má xúʼko̱ Jeobá. Índo̱ nijnguáanʼ iyááʼ nitasngájma dí ra̱ʼkhá tháán xtaʼdáá fe náa ikhaa  ga̱jma̱a̱ rí niku̱ma̱a̱ʼ xtayáá. Ga̱jma̱a̱ Jeobá ra̱ʼkhá tháán nidxuu dí nigruiguiín mu maraxtaa náa xuajñuu. ¡Ra̱ʼkhá tháán mitsaanʼ nindxu̱u̱! ikha jngóo dí xúgi̱ ndayóoʼ dí matambáyuminaʼ má xúʼko̱ náa Jeobá. Mbáa makujmaa rí na̱nguá má nindxu̱u̱ gakhii índo̱ gátraʼwíí dí matani. Mú, gíʼdoo wéñuʼ numuu rí makumaaʼ xtayáá Jeobá, tséʼniúu má á mu náa matani gagiminaʼ, náa ñajunʼ o rí nandaaʼ matani náa vida ndrígáaʼ. Xátani xó má na̱ʼkha̱ náa edxa̱a̱ʼ atayáʼ ikha ndrígóo Biblia rí ma̱ndoo mambáyaaʼ ga̱jma̱a̱ atagíʼ matanimbánii (Prov. 3:5, 6). Ga̱jma̱a̱ xígi̱ matani ikháán rí Jeobá maʼdxuu ga̱jma̱a̱ a̱ngiu̱lú maguáʼnu mbuyamajkuaaʼ (atraxnuu 1 Timoteo 4:12). *

15. Xó má naʼthí náa 2 Crónicas 18:1-3 ga̱jma̱a̱ 19:2, ndiéjunʼ dí raʼkhí niʼni rey Jehosafat rá.

¹⁵ Xó má xugiáanʼlu, nindxa̱a̱ʼ xa̱bu̱ aʼkhá ga̱jma̱a̱ nguáná makiéʼkháanʼ mú xátatsiʼñánʼ dí rúʼko̱ marikhaaʼ mu xátani xó má eʼngo̱o̱ ñajuunʼ Jeobá. Atatsaʼwáminaʼ náa xkridoo rey Jehosafat. Ikhaa ra̱ʼkhá tháán mbaʼa cualidad nigiʼdoo. Asndu nákhá nigíʼdúu niʼtáñajunʼ xóo rey “ndiyáaʼ Dios ndrígóo anu̱u̱ ga̱jma̱a̱ niʼnimbo̱o̱ kiʼtáñajunʼ ndrígóo”. Ma̱ngaa nikuʼmiin príncipes bi̱ kúwá náa Judá mu musngúún xa̱bu̱ ga̱jma̱a̱ numuu Jeobá (2 Crón. 17:4, 7). Mú maski má mbóó a̱jkiu̱u̱n niʼni, mú nguáná Jehosafat táraʼwíí rí májánʼ maʼni. Ga̱jma̱a̱ rígi̱ niʼni rí Jeobá makuʼmáa mbáa bi̱ maxprígúu (atraxnuu 2 Crónicas 18:1-3; * 19:2). * Guʼyáá ndiéjunʼ gándoo gájmañaaʼ náa xkridoo.

16. Ndiéjunʼ gándoo gájmañaaʼ náa rí nigíʼnuu Rajeev rá.

¹⁶ Gíʼdoo wéñuʼ numuu rí matandrígú ga̱jma̱a̱ rí mataʼgíʼ matanimbánii consejo dí nuxnaaʼ. Mbaʼin jiámá naʼñún gakhi̱i̱ mbuyáá ñajuunʼ  Jeobá mbá rí xóo gíʼdoo itháan numuu. Mbáa xúʼko̱ má natagíʼníí mangáán. Mú xájmaa a̱jkia̱a̱nʼ. Atatsaʼwáminaʼ dí nigíʼnuu mbáa dxámá bi̱ mbiʼyuu Rajeev. Ikhaa narmáʼáan a̱jkiu̱u̱n nákhá ninindxu̱u̱ dxámá, naʼthí: “Ni̱jkha̱nú mbiʼi rí nánguá e̱yo̱o̱ rí ma̱ni̱. Xó má eni̱ eʼwíinʼ jiámá, rí itháan niniguʼ ninindxu̱u̱ rí mani̱ gagiminaʼ ga̱jma̱a̱ rí matsíin, raʼkháa dí maʼgá reunión o maʼgá gátaraʼa”. Ndiéjunʼ nimbáyúu xá. Ikhaa naʼthí rí mbáa bi̱ kayá edxu̱u̱ nixnúu consejo ga̱jma̱a̱ ajngáa wabaaʼ, naʼthí: “Nimbáyúʼ mu mandxa̱ʼwa̱mínáʼ ikha dí na̱ʼkha̱ raʼthí náa 1 Timoteo 4:8”. Rajeev nigruigú consejo ga̱jma̱a̱ májánʼ ga̱jma̱a̱ nigíminaʼ mbaʼyoo ndiéjunʼ gáʼni. Ikhaa naʼthí: “Ikhú niʼgíminaʼ ma̱ni̱ itháan ñajuunʼ Jeobá”. Ga̱jma̱a̱ ikhaa má naʼthí ndiéjunʼ nirígá: “Nguáthá tsiguʼ nda̱wa̱á dí nigruígú consejo, ninimbánuu mu makhánúʼ mani̱ndxu̱ʼ siervo ministerial”.

17. Xú káʼnii eñún a̱ngiu̱lú xabuanii jiámá bi̱ nuni̱ ñajuunʼ Jeobá rá.

¹⁷ Ikháanʼla bi̱ nindxa̱la jiámá, a̱ngiu̱lú guanii bi̱ kúwá náa congregación nduyáá dí ikháanʼla kuaʼdáá wéñuʼ numala numuu dí nuni ñajuunʼ Jeobá “mbáa kambájxala” gajmiála ikhiin (Sof. 3:9). Ra̱ʼkhá tháán nadxún dí ikháanʼla nuni̱ ga̱jma̱a̱ xúgíʼ a̱jkia̱la ñajunʼ dí nakhánála. Ikha jngóo, nduyamajkuala ga̱jma̱a̱ nakumu̱ún kuyala (1 Juan 2:14).

18. Xó má naʼthí náa Proverbios 27:11, ndiéjunʼ endxaʼwaminaʼ Jeobá ga̱jma̱a̱ numún jiámá bi̱ nuni ñajuunʼ ikhaa xá.

¹⁸ Nditháan xámbumaaʼ rí Jeobá nandoo kaʼyaaʼ ga̱jma̱a̱ rí naku̱mu̱u̱ kaʼyaaʼ. Ikhaa niʼtáriyaʼ dí náa iwáá mbiʼi rígi̱ dí mbaʼin jiámá muxnajximijna muni̱ ñajuunʼ ikhaa (Sal. 110:1-3). Ikhaa ndaʼyoo rí nandaaʼ xtayáá ga̱jma̱a̱ rí maraxna̱a̱ rí itháan májánʼ rí xtaʼdáá. Ikha jngóo, gaʼngo̱o̱ a̱jkia̱a̱nʼ xtañún a̱ngia̱a̱nʼ ga̱jma̱a̱ xúʼko̱ má mangáán índo̱ gátani mbá dí raʼkhí, atadxawíín consejo dí gúxnáaʼ a̱ngiu̱lú ga̱jma̱a̱ dí gúxpriguaaʼ. Garmáʼáan a̱jkia̱a̱nʼ dí rígi̱ na̱ʼkha̱ náa Jeobá (Heb. 12:6). Atani májánʼ ñajunʼ rí gákhánáaʼ. Itháan gíʼdoo numuu dí mataʼgímináʼ matani dí maxtáa gagi Ana̱ʼ bi̱ xtáa mekhuíí (atraxnuu Proverbios 27:11). *