1. Xó má naʼthí náa Mateo 24:9, náá numuu dí tséʼniulú tsiánguá rí numbaaʼ nawiyuʼ kaʼyulú rá.

JEOBÁ niʼniáanʼlu mu maʼndulú kuʼñúún eʼwíinʼ, ga̱jma̱a̱ rí maʼndún kuyulúʼ. Ikha jngóo índo̱ mbáa nawiyuuʼ kaʼyulú nakumulú rí nagawúnlú ga̱jma̱a̱ namíñulú. Mbá xkri̱da mbáa ndxájulú a̱ʼgu̱ bi̱ mbiʼyuu Georgina bi̱ xtáa náa Europa naʼthí: “Índo̱ nigúʼdoo 14 tsiguʼ ru̱dúʼ niwiyu̱u̱ʼ kaʼyoʼ numuu rí na̱ni̱ ñajuunʼ Jeobá. Niku̱mu̱ʼ rí nánguá endún gúyóʼ ga̱jma̱a̱ ni̱ni̱ a̱jma̱ a̱jkiu̱nʼ rí ikhúún na̱nguá ni̱ndxu̱ʼ mbáa májáanʼ xa̱bu̱.” * Mbáa ndxájulú bi̱ mbiʼyuu Danilo naʼthí: “Índo̱ soldado nixpamidiu̱u̱n, nitha wéñuʼ numuu rí nindxu̱ʼ xa̱bi̱i̱ Jeobá, ra̱ʼkhá tháán nimíñúʼ ga̱jma̱a̱ nini mba̱yo̱o̱ rí nándáa numuʼ”. Gajkhun má nagawúnlu índo̱ naguaʼnii xúʼko̱, mú xáʼniulu tsiánguá numuu rí Jesús niʼthí rí xa̱bu̱ xáʼndun gúyulú (atraxnuu Mateo 24:9). *

2, 3. Náá numuu rí nawiñunʼ kuyulú xá.

² Numbaaʼ rígi̱ nawiñunʼ kaʼñún xa̱bi̱i̱ Jesús. Náá numuu rá. Jesús má niʼthí, “ikháán rañájuala náa numbaaʼ” (Juan 15:17-19). Índo̱ ikháanʼ nduʼyamajkhún Xa̱bu̱ Ñajunʼ bi̱ kúwá náa numbaaʼ rígi̱, tsesmbatígulúʼ náa inún ga̱jma̱a̱ náa tsinaʼ rí namajniiʼ ga̱jma̱a̱. Mbawíí Jeobá nduʼyamajkuíí, ga̱jma̱a̱ nuʼthá rí mbáwíi ikhaa kaʼyoo maʼtá ñajunʼ náa numbaaʼ, mbá rí Gixa̱a̱ ga̱jma̱a̱ bi̱ “naguwáʼ” náa ikháá tsíñún gúyá (Gén. 3:1-5, 15). Nuʼtáraʼa ga̱jma̱a̱ numuu Xa̱bu̱ Ñajunʼ ndrígóo Dios dí ikhaa maʼnimbánuu xkujndu ndrígu̱ún xa̱bu̱ numbaaʼ ga̱jma̱a̱ ikhaa maʼni gámbíin xúgíinʼ bi̱ tsíñún gúyá (Dan. 2:44; Apoc. 19:19-21). Rígi̱ nindxu̱u̱  ajngáa májánʼ náa xa̱bu̱ míjíinʼ mú ra̱májánʼ eyáá bi̱ nindxúu̱n ra̱míjíinʼ (Sal. 37:10, 11).

³ Ma̱ngaa nawiñunʼ kuyulúʼ numuu rí kuwáanʼ ruʼnimbulú rí naʼthí náa Biblia. Ikha rí nuxkamaa ikhí tsímbríguíi kayuʼ ga̱jma̱a̱ xóo nuni xa̱bu̱ numbaaʼ. Mbá xkri̱da, mbaʼin xa̱bu̱ rí mbiʼi xúgi̱ nuthi rí májánʼ nindxu̱u̱ rí matani aʼkhá gajmiáanʼ eʼwíinʼ, ikháá ma xóo nuni̱ bi̱ nikúwá náa Sodoma ga̱jma̱a̱ Gomorra, ikha jngóo Dios niʼni gámbáa (Jud. 7). Ga̱jma̱a̱ numuu rí nuʼnimbulú rí na̱ʼkha̱ náa Biblia, ikha jngóo tséʼni aʼkhá rígi̱ ga̱jma̱a̱ xa̱bu̱ nutsijmáanʼlú ma̱ngaa nutulúʼ rí nda̱a̱ rí eyulú marigá (1 Ped. 4:3, 4).

4. Xú káʼnii cualidad nambáyulúʼ índo̱ xa̱bu̱ nawiñunʼ kuyulúʼ rá.

⁴ Ndiéjunʼ cualidad gambáyulú mu maʼngulú, índo̱ xa̱bu̱ nawiñunʼ kuyulúʼ o nutawéñulú rá. Rí maguaʼdaa mbá fe gujkhuʼ náa Jeobá rí ikhaa má gañewunlúʼ. Fe nindxu̱u̱ xóo mbá rí mañewu̱nlú “ikhaa ma̱ndoo maʼni gámbáa xúgíʼ dí ra̱májánʼ rí nakunguanʼ bi̱ Xkawiiʼ” (Efes. 6:16). Ma̱ngaa ndayúlú rí maguaʼdáá ngajua. Náá numuu rá. Numuu rí ngajua “tsekásga̱ñu̱u̱n nacha̱” xúgíʼ naʼngo̱o̱ a̱jkiu̱u̱n, xúgíʼ naʼngo̱o̱ naraʼnuu (1 Cor. 13:4-7, 13). Rí xúgi̱ mbuʼyáá rí nandulú kuʼyáá Jeobá rí nandulú kuʼñúún a̱ngiu̱lú ga̱jma̱a̱ rí nandulú kuʼñúún bi̱ tsíñún gúyulú mambáyulúʼ mu maʼngulú índo̱ gawiñu̱u̱n kuyulúʼ.

5. Xú káʼnii nixnúu tsiakii Jesús rí nandoo kaʼyoo Anu̱u̱ rá.

⁵ Mbruʼun rí xóo tsexiyáa bi̱ tsíñún gúyáá Jesús, ikhaa niʼthúún xa̱bi̱i̱ bi̱ niguájun jmbu: “Nandoʼ ka̱yo̱o̱ Anu̱ʼ, xó má Anu̱ʼ niʼtáñajunʼ mani, xúʼko̱ má eni” (Juan 14:31). Rí Jesús nindoo kaʼyoo Jeobá rúʼko̱ nixnúu tsiakii mu maʼngo̱o̱ náa xúgíʼ rí nimínuuʼ. Xúʼko̱ má mangáanʼlu rí nandulú kuʼyáá Jeobá ma̱ndoo mambáyulúʼ.

6. Xó má naʼthí náa Romanos 5:3-5, xkáʼnii ku̱mu̱ún xa̱bi̱i̱ Jeobá índo̱ naʼngu̱u̱n rí tsiñun gúñún xa̱bu̱ rá.

⁶ Rí nimbáñun xa̱bi̱i̱ Dios bi̱ nikúwá nákha wájyúuʼ mu maʼngu̱u̱n rí nijuixkúún, nindxu̱u̱ rí nindúún kuyáá ikhaa. Mbá xkri̱da índo̱ Xa̱bu̱ Ñajunʼ judío nitañajúúnʼ apóstoles rí muniña̱a̱ʼ rutaraʼa, rí nandúún kuyáá Dios rúʼko̱ nixkajxi̱i̱n rí “munimbu̱ún kuyááʼ Dios xóo mbá xa̱bu̱ ñajunʼ raʼkháa xa̱bu̱” (Hech. 5:29; 1 Juan 5:3). Ga̱jma̱a̱ ikháá má ngajua rúʼko̱, naxnúún tsiakii a̱ngiu̱lú rí mbiʼi xúgi̱, mbaʼin rí ikhiin naguájun jmbu índo̱ Xa̱bu̱ Ñajunʼ nuni gíníi. Ga̱jma̱a̱ ikháanʼlu rí mbiʼi xúgi̱ índo̱ Xa̱bu̱ Ñajunʼ bi̱ kúwá náa numbaaʼ rígi̱ tsíñún gúyulú ikháán tséjma̱a̱n a̱jkiu̱lú nduʼyáá rí nindxu̱u̱ mbá ñajunʼ kiejunʼ rí nu̱ʼni̱ (Hech. 5:41; atraxnuu Romanos 5:3-5). *

7. Xú káʼnii gíʼmaa mu̱ʼni̱ índo̱ bi̱ kúwá náa guʼwúlú tsíñún gúyulú rí nuʼni ñajuunʼ Jeobá rá.

⁷ Mbáa xkujndu rí itháán gakhii rí kuwáanʼ ruraʼníí nindxu̱u̱ rí tsíñún gúyulú bi̱ kúwá náa guʼwúlú. Mbáa índo̱ ikháanʼ nigíʼdi̱i̱ ninigulúʼ rí gajkhun, mbáa bi̱ kuʼñúún nikumu̱ún rí ikháanʼ niguma nduwa̱ánʼ. O eʼwíinʼ ma̱ndoo makumún rí nijnga̱a̱ edxu̱lúʼ (atayáá ma̱ngaa Marcos 3:21). Ma̱ngaa ma̱ndoo asndu muni̱ gínáanʼlu. Índo̱ narígá xígi̱, ragíʼmaa maʼniulú tsiánguá. Jesús má niʼthí náa Mateo 10:36: “Bi̱ xáʼndúún guyáá xa̱bu̱ ni̱ndxu̱ún má bi̱ kúwá náa goʼwóo”. Ikha jngóo, tseʼniuu asndu xkáʼnii má gúniulú bi̱ kuʼñúún, ikháanʼ xuʼñúún xóo bi̱ sia̱nʼ gajmiulúʼ. Rí gíʼmaa muʼni, xóo má ejkha̱ ragaja̱a̱ rí nandulú kuʼyáá Jeobá, xúʼko̱ má gíʼmaa maʼga̱ ragaja̱a̱ rí nandulú kuʼñúún xa̱bu̱ ma̱ngaa (Mat. 22:37-39). Ikha jngóo ikháanʼlu nditháan xanújngurámulú xtángoo ga̱jma̱a̱ ikha dí na̱ʼkha̱ náa Biblia, i̱ndó mu mu̱ʼni̱ rí mbáa xa̱bu̱ú maxtáa gagi.

8, 9. Ndiéjunʼ nimbáyúu ndxájulú Georgina mu mawiji̱ jmbu rá.

 ⁸ Georgina bi̱ niʼthá náa kutriga̱ 1, niʼngo̱o̱ niwi̱ji̱ jmbu maski ajndu gakhii wéñuʼ nimínuuʼ rí táʼndoo gáʼyoo ru̱dúu̱. Georgina naʼthí: “Ikhúún gajmuʼ ru̱dúʼ nigíʼdixu ninigajmaa Biblia gajmiúxu xa̱bi̱i̱ Jeobá. Mú, majun igu̱nʼ nda̱wa̱á, índo̱ ikhúún nindoʼ maʼga̱ reunión, ru̱dúʼ niriʼkuminaaʼ mbá kayuʼ. Ni̱jkhánú ndi̱yo̱o̱ dí nambájxu̱u̱ gajmíi̱nʼ apóstata ga̱jma̱a̱ nijmuu mbaʼa rí mindu̱wa̱ʼ mu ikhúún manimbo̱ʼ. Ma̱ngaa niʼthá wéñuʼ, nixúmúu tasiu̱u̱n edxu̱ʼ, nixngau̱nʼ ga̱jma̱a̱ nixídíí i̱yu̱ʼ. Nda̱wa̱á, índo̱ ndi̱ya̱ 15 tsiguʼ, nijngún iyááʼ. Ru̱dúʼ nigíʼ marikhoʼ mu xáni ñajuunʼ Jeobá, ikha jngóo nikuʼmún maʼgá gaxtáa náa guʼwá dí rígá mitsínguánʼ náa kúwi̱i̱n wa̱ʼxa̱ʼ bi̱ najmún droga ga̱jma̱a̱ nuradíin xa̱bu̱. Ra̱ʼkhá tháán gakhii nindxu̱u̱ índo̱ mbáa bi̱ gíʼmaa maʼndoo kaʼyaaʼ ga̱jma̱a̱ mañewa̱a̱n ikhaa phú tsíyoo gáʼyaaʼ”.

⁹ Xú káʼnii niʼngo̱o̱ Georgina náa xkujndu gakhii rígi̱ rá. Ikhaa naʼthí: “Mbiʼi dí ru̱dúʼ nánguá nindoo gáʼyoʼ, ikhúún niguámboʼ má niguxnuu kañiʼ Biblia. Dí xúgi̱ ni̱jkhánú ndi̱yo̱o̱ rí nixkamaa rí gajkhun ga̱jma̱a̱ niku̱mu̱ʼ dí xtáá mijngii náa Jeobá. Nángi eʼni etajkháanʼ ga̱jma̱a̱ ikhaa niʼdxaunʼ. Índo̱ nixtáá náa guʼwá rúʼko̱, mbáa ndxájulú niʼthúnʼ maʼgá náa goʼwóo ga̱jma̱a̱ ikhí ninigajmaxu Biblia mbóó. Ga̱jma̱a̱ náa guʼwá nagimbáanʼ a̱ngiu̱lú nixnuʼ tsiakii nini mba̱yo̱o̱ rí ni̱ndxu̱ún a̱ngui̱nʼ. Ikhúún mínuʼ ni̱jkhánú ndi̱yo̱o̱ dí Jeobá gíʼdoo itháán tsiakii ki xóo bi̱ tsíñún gúyulú. Tséʼniuu asndu tsíin ni̱ndxu̱ún.”

10. Náá numuu rí ma̱ndoo makumulú kuʼyáá Jeobá rá.

¹⁰ Apóstol Pablo niʼnirámáʼ “rí nimbá xáʼngo̱o̱ gatsíngulú náa ngajua ndrígóo Dios dí rígá náa Cristo Jesús tatiulú” (Rom. 8:38, 39). Maski ajndu mumíníiʼ mbáxngaa, Jeobá maxtáa má xúʼko̱ ga̱jma̱á ni̱ndxu̱lú mu maʼni̱i̱ a̱jkiu̱lú ga̱jma̱a̱ maxnúlú tsiakii. Ga̱jma̱a̱ xóo má eʼyáá náa experiencia ndrígóo ndxájulú Georgina, Jeobá ma̱ndoo majmiuu a̱ngiu̱lú mu mambáyulú.

11. Xú káʼnii embáyulú ngajua dí niʼthí Cristo náa Juan 15:12, 13 rá. Atagíʼ mbá xkri̱da.

¹¹ Nákha mbruʼun rí xóo tsikháñúu Jesús niʼni marmáʼáan a̱jkiu̱ún xa̱bi̱i̱ rí gíʼmaa maʼndún kuyamijná (atraxnuu Juan 15:12, 13). * Ndiʼyoo  rí makuwá mbá kambájxu̱u̱n mambáñún índo̱ xáʼndun gúñún. Guʼyáá xkri̱da ndrígóo congregación Tesalónica. Asndu nákha nigi̱ʼi̱, a̱ngiu̱lú nijuixkúún. Mú a̱ngiu̱lú buʼko̱ niguánu ninindxu̱ún mbá májánʼ xkri̱da, rí nindúún kuyamijná (1 Tes. 1:3, 6, 7). Pablo nixnúún tsiakii ga̱jma̱a̱ niʼthúún rí maʼndún kuyamijná, índo̱ niʼthúún: “Gaʼndala kuyamíjna̱ xóo itháan” (1 Tes. 4:9, 10). Rí nindúún kuyamijná nixkajxi̱i̱n mumbañún eʼwíinʼ bi̱ kúwá ngíná ga̱jma̱a̱ bi̱ nikáguabiinʼ (1 Tes. 5:14). Ninimbánii ikha dí nixnúún Pablo, numuu dí náa ragajma carta dí niʼnirámáʼ Pablo mbá tsiguʼ nda̱wa̱á. Ikhaa niʼthúún: “Ga̱ʼga̱ ragaja̱a̱ má xúʼko̱ ngajua rí kuaʼdamijnala” (2 Tes. 1:3-5). Rí nindúún kuyamijná nimbáñun mu maʼngu̱u̱n muraʼníí xkujndu dí mingíjyúuʼ ga̱jma̱a̱ rí nijuixkúún.

12. Índo̱ nirígá guerra, xú káʼnii a̱ngiu̱lú bi̱ kúwá náa mbá país nisngajma rí nandún kuyamíjna̱ rá.

¹² Guʼyáá xú káʼnii nigíʼnuu Danilo ga̱jma̱a̱ a̱ʼgiu̱u̱ bi̱ niʼthá náa kutriga̱ 1. Índo̱ xa̱bu̱ xuajñuu nikúwá runi̱ guerra, ikhiin nigún má xúʼko̱ reunión, nitaraʼa asndu xú káʼnii má nindoo ga̱jma̱a̱ nixnúún ganitsu eʼwíinʼ a̱ngiu̱lú. Mbóoʼ mbiʼi Danilo nirugua̱a̱ soldado, ikhaa naʼthí: “Nindoʼoʼ rí maniʼñúunʼ ranindxu̱ʼ xa̱bi̱i̱ Jeobá”. Índo̱ taʼndoʼ gániʼñuuʼ, ikhú nixpamidiu̱u̱n ga̱jma̱a̱ nirmidajmún ajua̱nʼ, nirmidá náa mijngii edxu̱ʼ, mú índo̱ inuu magúun nithu̱nʼ rí matangi̱ín mutsijmaa a̱ʼgiu̱ʼ, mú a̱ngiu̱lú mbá nacha̱ nixudu̱u̱nʼ náa mbá tren mu maʼgá náa i̱mba̱ xuajin. Nditháan xámbumuʼ ngajua rí nisngajma a̱ngiu̱lú buʼko̱, ga̱jma̱a̱ índo̱ nijkuánuxu náa i̱mba̱ xuajin, a̱ngiu̱lú bi̱ kúwá ikhí nixnuxu ganitsu ga̱jma̱a̱ nimba̱yúʼ mu maxkamaa mbá ñajunʼ, ma̱ngaa náa maxtáá. Ga̱jma̱a̱ ikháanʼxu nindoo nimbáñun eʼwíinʼ a̱ngiu̱lú bi̱ nagáñun náa narígá guerra. Experiencia xóo rígi̱ nasngájma rí á mu nandulú kuʼyamijná bi̱ ni̱ndxu̱lú cristianos nayambáá mu maʼngulú índo̱ tsíñún gúyulú.

13. Xú káʼnii embáyulú xi̱ʼ kaʼwu mu mu̱ʼni̱ má xúʼko̱ ñajuunʼ Jeobá maski ajndu tsíñún gúyulú xa̱bu̱ rá.

¹³ Jesús niʼthúún xa̱bi̱i̱ rí maʼndún kuñún bi̱ tsíñún gúñún (Mat. 5:44, 45). Lá ragákhíi mu̱ʼni̱ rígi̱ ráʼ. Na̱nguá, gakhii nindxu̱u̱. Mú, maʼngulú mu̱ʼni̱ rígi̱ á mu nambáyulu xi̱ʼ kaʼwu ndrígóo Dios. Tikhu rí najma̱a̱ náa xi̱ʼ kaʼwu ndrígóo Dios nindxu̱u̱: Ngajua, rí maʼngo̱o̱ a̱jkiu̱lú, rí mu̱ʼni̱ májánʼ, rí manindxu̱lú mbáa xa̱bu̱ májáanʼ ga̱jma̱a̱ rí muñewa̱a̱n rí mu̱ʼni̱  (Gál. 5:22, 23). Cualidad rígi̱ nambáyulú maʼngulú índo̱ tsíñún gúyulú. Mbaʼin xa̱bu̱ bi̱ nakiʼníin kuyulú nákha ginii niriʼkhu̱u̱ xóo nindxu̱ún, numuu rí guʼñu̱ún, ajmbiu̱ún, e̱jñu̱ún o bi̱ kúwíin mijngii gajmiún nusngajma cualidad rígi̱. Mbaʼin rí ikhiin xúgi̱ ni̱ndxu̱ún a̱ngiu̱lú. Ikha jngóo á mu nakuma̱a̱ʼ rí naʼniaaʼ gakhii maʼndaaʼ xtañún bi̱ nakiʼníin kuyaaʼ, numuu rí natani ñajuunʼ Jeobá, aratákáñíi mu maxnáaʼ tsiakii (Luc. 11:13). Ga̱jma̱a̱ atayáá gajkhun rí kambo̱o̱ Dios nindxu̱u̱: Rí itháan májánʼ (Prov. 3:5-7).

14, 15. Xkáʼnii nimbáyúu Yasmín dí na̱ʼkha̱ náa Romanos 12:17-21, mu xákiʼnáa kaʼyoo ajmbio̱o̱ xá.

¹⁴ Guʼyáá xkri̱da ndrígóo Yasmín bi̱ xtáa náa Oriente Medio. Índo̱ ikhaa ni̱jkha̱nú ninindxu̱u̱ xa̱bi̱i̱ Jeobá, ajmbio̱o̱ nikumu̱u̱ rí a̱ʼgiu̱u̱ niguma nduwaaʼ ga̱jma̱a̱ nigíʼ marikhoo mu xáʼni ñajuunʼ Dios, nindxa̱wájmaa ga̱jma̱a̱ niʼthún bi̱ kaʼñún, xúʼko̱ má bi̱ kayá edxu̱u̱ náa ndxajkun ga̱jma̱a̱ mbáa xa̱bu̱ xawan, rí muthán rí ikhaa naʼniwájíinʼ bi̱ kúwá náa goʼwóo. Ajmbio̱o̱ asndu nindxa̱ʼwájmíin a̱ngiu̱lú índo̱ kúwá náa reunión, Yasmín nambiyaʼ má xúʼko̱ numuu rí naʼni gínáa wéñuʼ.

¹⁵ A̱ngiu̱lú nini̱ rí maʼni̱i̱ a̱jkiu̱u̱n Yasmín. Ga̱jma̱a̱ bi̱ kuya̱ edxu̱u̱ nixnáá tsiakii ga̱jma̱a̱ nitháán rí magíʼ maʼnimbánuu rí na̱ʼkha̱ náa Romanos 12:17 asndu 21 (atraxnuu). * Yasmín naʼthí: “Ninindxu̱u̱ gakhii ma̱ni̱ rí naʼthí náa Biblia, mú nindo̱ʼo̱o̱ Jeobá rí mambáyúʼ ga̱jma̱a̱ ni̱ni̱ xúgíʼ xó má eʼngo̱o̱. Ikha jngóo índo̱ ajmbio̱ʼ nasnguta̱ʼa̱ ku̱ba̱ʼ náa cocina, ikhúún nanikaʼwi̱i̱, índo̱ nindxa̱ʼwájmún, wabaʼ niriʼñuu ga̱jma̱a̱ índo̱ ikhaa nindoo káñuu, ikhúún niñewu̱u̱n.”

16, 17. Ndiéjunʼ gándoo gájmañaaʼ náa xkridoo Yasmín rá.

¹⁶ Yasmín ni̱jkha̱nú nixtáa májánʼ numuu rí nindoo kaʼyoo ajmbio̱o̱, ikhaa naʼthí: “A̱jmbio̱ʼ nigíʼdu̱u̱ nikumu̱u̱ kaʼyoʼ itháan, numuu rí ndiʼyoo rí tséninduwaʼ, nigíʼdu̱u̱ niʼdxawunʼ ga̱jma̱a̱ gamajkhu índo̱ nutamíjnaxu ga̱jma̱a̱ numuu religión, ga̱jma̱a̱ niʼni marigáa rí tsímáá náa guʼwáá ga̱jma̱a̱ rí xúgi̱ naʼthúnʼ rí májánʼ gáʼgá náa reunión. Rí xúgi̱ kuwáanʼxu itháan májánʼ ga̱jma̱a̱ kuwáanʼxu tsímáá, gúʼthu̱u̱n rí a̱jmbio̱ʼ maʼga̱nú manigu̱u̱ʼ rí gajkhun ga̱jma̱a̱ rí maʼni ñajuunʼ Jeobá ga̱jma̱á ni̱ndxu̱ʼ”.

 ¹⁷ Xkridoo Yasmín nasngájma rí ngajua, “xúgíʼ naʼngo̱o̱ a̱jkiu̱u̱n,” “xúgíʼ naʼngo̱o̱ nagiʼthu̱u̱n,” “xúgíʼ naʼngo̱o̱ naraʼnuu” (1 Cor. 13:4, 7). Rí tsíñún gúyulú xa̱bu̱, gakhii nindxu̱u̱, ga̱jma̱a̱ ma̱ndoo maʼnigawúnlu. Mú ngajua rí kuaʼdáálu itháan gíʼdoo tsiakii, naʼngo̱o̱ naʼni rí muriʼkumijnáá xa̱bu̱, ga̱jma̱a̱ naʼni gagi̱i̱ a̱jkiu̱u̱n Jeobá. Maski ajndu xa̱bu̱ xáʼndún gúyulú, ikháanʼ ma̱ndoo makuwáánʼlu má xúʼko̱ gagi. Xú káʼnii gándoo gárígá rígi̱ rá.

18. Náá numuu rí ma̱ndoo maraxtaa gagi índo̱ tsíñún gúyáaʼ xá.

¹⁸ Jesús niʼthí: “Gagi kuwáanʼla índo̱ ga̱jma̱a̱ numuu A̱ʼdióo Xa̱biya̱ xa̱bu̱ xáʼndún gúyala” (Luc. 6:22). Ikháanʼ na̱nguá eraʼwíílu rí xa̱bu̱ xáʼndúún gúyulú, ga̱jma̱a̱ na̱nguá enigulú rí maguma gínáanʼ. Mú, náá numuu rí ma̱ndoo makuwáanʼlu gagi índo̱ tsíñún gúyulú xá. Guʼyáá ajtsú enii rígi̱. Timbá, índo̱ naʼngulú nu̱ʼni̱ rí maʼdxuu Dios (1 Ped. 4:13, 14). Ragajma, fe ndrígúlú naʼni itháan gújkhúʼ (1 Ped. 1:7). Ragajtsú, mundrígúlú mbá rí itháan gíʼdoo numuu. Rí makuwáánʼlu kámuu (Rom. 2:6, 7).

19. Náá numuu rí nikúwá gagi apóstoles nda̱wa̱á rí nixpajtiin xá.

¹⁹ Nguáthá mba̱yu̱u̱ʼ nda̱wa̱á rí Jesús nigabi̱i̱, apóstoles ndiyáá gagi rí Jesús niʼthí. Nda̱wa̱á rí niguámbu̱u̱n nixpajtíin ga̱jma̱a̱ nithúún rí muniña̱a̱ʼ rutaraʼa, nidxún wéñuʼ. Náá numuu rá. Numuu rí Dios ndiʼyoo rí kaʼñún maguma májtíinʼ ga̱jma̱a̱ numuu mbiʼyuu Jesús (Hech. 5:40-42). Itháan má niʼngo̱o̱ rí nindúún kuyáá maestriu̱ún ki xóo rí táʼndún gúñún xa̱bu̱. Ga̱jma̱a̱ nisngajma ngajua rí guáʼdáá índo̱ túniña̱a̱ʼ rutaraʼa ajngáa rí májánʼ. Mbaʼin a̱ngiu̱lú rí mbiʼi xúgi̱ kúwá runi̱ má xúʼko̱ ñajuunʼ Jeobá maski má mbaʼa rí nuguáʼníí. Ikhiin nduyáá rí Jeobá nditháan xámbumuu ñajunʼ rí ikhiin nuni̱ ga̱jma̱a̱ rí nandún kuyáá mbiʼyuu (Heb. 6:10).

20. Ndiéjunʼ gúʼyáá náa i̱mba̱ artículo rá.

²⁰ Nákha kuwáanʼlu xóó náa numbaaʼ rígi̱, xa̱bu̱ xáʼndúún gúyulú má (Juan 15:19). Mú tséyooʼ rí mamiñúlú. Náa imbo̱o̱ʼ artículo mbuʼyáá, rí Jeobá naxnún tsiakii ga̱jma̱a̱ nañewu̱u̱n xa̱bi̱i̱ bi̱ naguájun jmbu (2 Tes. 3:3). Ikha jngóo, gaʼndúlu kuʼyáá má xúʼko̱ Jeobá, gaʼndulu kuʼñúún a̱ngiu̱lú ga̱jma̱a̱ asndu bi̱ tsíñún gúyulú. Índo̱ ikháanʼ nuʼnimbáníí consejo rígi̱, nakuwáanʼlu mbá jnduʼ, ga̱jma̱a̱ nakúwáanʼ má xúʼko̱ gújkhúʼ nuxnáá gamajkhu Jeobá, ga̱jma̱a̱ nusngajmá rí ngajua gíʼdoo itháan tsiakii ki xóo rí tsíñún gúyulú.