1. Náá numuu rí Jesús nindo̱ʼo̱o̱ Jeobá rí mañewu̱u̱n xa̱bi̱i̱ rá.

NÁA iwáá mbruʼun rí nixtaa xóo xa̱bu̱ numbaaʼ, Jesús nindxa̱ʼwáminaʼ xú káʼnii rí gakhi̱i̱ gáʼyóoʼ muraʼníí xa̱bi̱i̱. Numuu dí ra̱ʼkhá tháán nindoo kaʼñún, ikha jngóo nindo̱ʼo̱o̱ Anu̱u̱ rí ‹mañewu̱u̱n náa xa̱bu̱ xkawi̱i̱ʼ› (Juan 17:14, 15). Jesús ndiʼyoo má rí índo̱ ikhaa gáʼga̱a̱ mekhuíí. Gixa̱a̱ maʼni gíníin má xúʼko̱ bi̱ gáʼndún muni̱ ñajuunʼ Jeobá. Nikujmaa kaʼwu rí xuajñuu Jeobá ndayóoʼ rí maxtiewa̱a̱n.

2. Náá numuu rí gíʼmaa makuwáanʼ gajkhun rí Jeobá mariʼña̱a̱ dí nuʼtájkáan rá.

² Jeobá niriʼña̱a̱ rí niʼtájkáan Jesús numuu rí nandoo kaʼyoo. Á mu mangáánʼ nu̱ʼni̱ xó má eʼngo̱o̱ mu mu̱ʼni̱ rí maʼdxuu Jeobá, ikhaa maʼndoo kaʼyulú. Ga̱jma̱a̱ magíʼ edxu̱u̱ maʼdxawuun índo̱ gúʼtakáñíí rí mambáyulú ga̱jma̱a̱ rí mañewu̱nlú. Xó má eʼni mbáa xa̱bu̱ nikhi̱i̱ bi̱ naxmiéjuunʼ kaʼñún bi̱ kúwá náa goʼwóo. Jeobá mañewu̱u̱n má xúʼko̱ e̱ji̱i̱n, numuu rí á mu tséʼni, maʼchúu mbiʼyuu.

3. Náá numuu rí ndayúlú rí Jeobá mañewu̱nlú rí mbiʼi xúgi̱ rá.

³ Rí mbiʼi xúgi̱, ndayúlú rí Jeobá mañewu̱nlú itháan, numuu rí Gixa̱a̱ nijuaxkrígui̱i̱ náa mekhuíí, ikha jngóo ‹nakásgañuunʼ› (Apoc. 12:12). Niʼngo̱o̱ má niʼni rí tikhun bi̱ nuxkulú maku̱mu̱ún rí kúwá runi̱ “ñajuunʼ Dios rí mitsúʼkháan” (Juan 16:2). Eʼwíinʼ nuni̱ numuu rí tsékumu̱ún kuyáá Dios, nuxkulú numuu rí ni̱ndxu̱lú mixtiʼkuáanʼ ki xóo xa̱bu̱ bi̱ kúwá náa numbaaʼ. Tséʼniuu asndu xú káʼníí má, xáʼyóoʼ rí mamiñulu, náá numuu rá. Numuu rí náa Ajngá rawuunʼ Dios naʼthí: “Tátá nindxu̱u̱ jmbii ga̱jma̱a̱ maxnúlú tsiakii ga̱jma̱a̱ mañewu̱nlú náa xa̱bu̱ xkawi̱i̱ʼ” (2 Tes. 3:3). Xú káʼnii eñewu̱nlú Jeobá rá. Guʼyáá a̱jma̱ enii xú kaʼnii eʼni.

4. Xó má naʼthí náa Efesios 6:13-17, ndiéjunʼ rí naxnúlú Jeobá mu mañewu̱nlú rá.

⁴ Jeobá naxnúlú mbá kájxi̱ rí magu̱ʼwúnlu mu mañewu̱nlú  náa tsáʼkhá rí nagrui̱ga̱ Gixa̱a̱ (atraxnuu Efesios 6:13-17). * Ajua̱nʼ rígi̱ nindxu̱u̱ májánʼ ga̱jma̱a̱ nayambáá. Mú, i̱ndó ma̱ndoo mañewu̱nlú á mu rí najmulú mámbá ajua̱nʼ rúʼko̱ ga̱jma̱a̱ tsériʼyaaʼlú. Ndiéjunʼ eyoo gáʼthúu̱n mámbá ajua̱nʼ rúʼko̱ rá. Guʼyáá xóo nindxu̱u̱.

5. Ndiéjunʼ nindxu̱u̱ cinturón dí gajkhun ga̱jma̱a̱ náá numuu rí gíʼmaa muʼgíʼlú rá.

⁵ Cinturón dí gajkhun. Ikhaa nandoo gáʼthúu̱n rí gajkhun rí na̱ʼkha̱ náa Biblia, náá numuu rí gíʼmaa majmulú cinturón rígi̱ rá. Numuu rí Gixa̱a̱ nindxu̱u̱ “anu̱u̱ náa minduwaʼ” (Juan 8:44). Mba̱yu̱u̱ʼ má tsiguʼ rí ikhaa naʼninduwaʼ, ga̱jma̱a̱ niʼninduwiinʼ mbaʼin xa̱bu̱ bi̱ kúwíin náa “xúgíʼ tsu̱du̱u̱ numbaaʼ” (Apoc. 12:9). Mú, dí gajkhun rí na̱ʼkha̱ náa Biblia ma̱ndoo mambáyulú mu xáguma nduwáánʼ. Xú káʼnii eʼgíʼlú cinturón dí gajkhun rígi̱ rá. Nuʼgíʼlú índo̱ najmañulú rí gajkhun numuu Jeobá. Nduʼyamajkuíí “ga̱jma̱a̱ xi̱ʼ ga̱jma̱a̱ dí gajkhun” ma̱ngaa “nu̱ʼni̱ rí májánʼ náa xúgíʼ” (Juan 4:24; Efes. 4:25; Heb. 13:18).

6. Ndiéjunʼ nindxu̱u̱ ajua̱nʼ rí nañewu̱u̱n a̱jkiu̱lú dí jmbu ga̱jma̱a̱ náá numuu rí gíʼmaa majmulú rá.

⁶ Ajua̱nʼ rí nañewu̱u̱n a̱jkiu̱lú dí jmbu. Nindxu̱u̱ xtángoo ndrígóo Jeobá. Náá numuu rí gíʼmaa majmulú rá. Xó má mbá ajua̱nʼ rí nañewu̱u̱n a̱jkiu̱u̱n mbáa soldado, dí nagiʼma náa tsoxto̱o̱, nañewu̱u̱n mu xágawuunʼ, xúʼko̱ má kayuuʼ, nañewu̱u̱n a̱jkiu̱lú mangáanʼ, xóo ni̱ndxu̱lú awúún, mu xáto̱ʼo̱o̱ ku̱ma̱ dí xóo nuni̱ xa̱bu̱ náa numbaaʼ xkawiʼ rígi̱ (Prov. 4:23). Jeobá nagi̱ʼthu̱u̱n rí maʼndulú kuʼyáá ga̱jma̱a̱ mu̱ʼni̱ ñajuunʼ jma̱a̱ xúgíʼ a̱jkiu̱lú (Mat. 22:36, 37). Ikha jngóo, Gixa̱a̱ nagíminaʼ maʼni rí maʼni a̱jma̱ a̱jkiu̱lú. Dí maʼndulú kuʼyáá dí rígá náa numbaaʼ rígi̱. Dí ikhaa naxnáraʼa, mú Jeobá nawi̱yu̱u̱ʼ kaʼyoo (Sant. 4:4; 1 Juan 2:15, 16). Mú, á mu tséʼngo̱o̱ gájngutíguánʼlu rígi̱. Ikhaa naʼni dí majngutíguánʼ náa i̱ʼwáʼ.

7. Xú káʼnii ejmulú ajua̱nʼ rí nañewu̱u̱n a̱jkiu̱lú dí jmbu rá.

⁷ Nuʼgíʼ ajua̱nʼ rí nañewu̱u̱n a̱jkiu̱lú dí jmbu índo̱ nuʼnimbulú xtángoo ndrígóo Jeobá, náa naʼthúlu dí májánʼ ga̱jma̱a̱ dí ra̱májánʼ xóo makuwáánʼlu (Sal. 97:10). Tikhun maku̱muu̱ún rí xtángoo ndrígóo Jeobá nindxu̱u̱ gakhi̱i̱ wéñuʼ. Mú, á mu muniʼñánʼ ruʼnimbulu ikha rí na̱ʼkha̱ náa Biblia, manindxu̱lú xóo mbáa soldado bi̱ maríya̱a̱ʼ ajua̱nʼ rí nañewu̱u̱n a̱jkiu̱u̱n índo̱ ikhaa xtáa náa nuxmijná. Numuu rí maku̱mu̱u̱ dí ra̱ʼkhá tháán miki̱wu̱n, mú ra̱ʼkhá tháán skagui̱i̱nʼ á mu rí xúʼko̱ gáʼni. Bi̱ nandún kuyáá Jeobá, nduyáá rí xtángoo ndrígóo “na̱nguá nindxu̱u̱ gakhi̱i̱”, nduyáá dí ikhaa rúʼko̱ dí naʼnikáwíin (1 Juan 5:3).

8. Ndiéjunʼ eyoo gáʼthúu̱n dí mataʼgíʼ chada̱ ga̱jma̱a̱ rí makuwáanʼ xawii mu marataráʼa ajngáa rí májánʼ rá.

⁸ Pablo naʼthúlú rí guʼgíʼ chada̱ ga̱jma̱a̱ gakuwáanʼ xawii mu muʼtáraʼa ajngáa rí májánʼ rí naʼni makuwáanʼlu tsímáá. Rígi̱ nandoo gáʼthúu̱n rí gakuwáanʼlu xawii má xúʼko̱ mu muʼtáraʼa ajngáa rí májánʼ ndrígóo Reino. Índo̱ nuʼthúún eʼwíinʼ ga̱jma̱a̱ numuu Biblia, fe ndrígúlú naʼni itháan gújkhúʼ. Ga̱jma̱a̱ ra̱ʼkhá tháán exnúlú tsiakii índo̱ nduʼñún xa̱bi̱i̱ Jeobá bi̱ kúwá náa xúgíʼ tsu̱du̱u̱ numbaaʼ rí nduyáʼ má xúʼko̱ xóo mutaraʼa ajngáa ndrígóo Reino. Nutaraʼa náa nuñajunʼ, náa nunigajmaa, náa naxtangujua, ma̱ngaa índo̱ nagájnún nutaraʼa mámbá guʼwá. Índo̱ nagún gútsi o índo̱ nagún gúñún bi̱ kuñún bi̱ na̱nguá enigajmaa̱ Biblia o índo̱ nuxkamiin bi̱ nuniʼnuunʼ. Asndu índo̱ nánguá eyoo magajnún náa guʼwún ikhiin nduyaʼ xóo mutaraʼa. Mú, á mú namíñulú ga̱jma̱a̱ nuniʼñánʼ ruʼtáraʼa manindxu̱lú xóo mbáa soldado bi̱ naguwíi chádoo índo̱ kúwá ruxmijná ga̱jma̱a̱ xúʼko̱ xájyúuʼ gágawuunʼ rajkhúu  ga̱jma̱a̱ xájyúuʼ gákambiyuuʼ náa nuxmijná ga̱jma̱a̱ na̱nguá majmaa maʼnimbo̱o̱ awan rí nagíʼ bi̱ naʼtáñajunʼ.

9. Náá numuu rí ndayúlú mbuʼyá mbá escudo rí mba̱a̱ ndrígóo fe rá.

⁹ Mbá escudo rí mba̱a̱ ndrígóo fe. Nandoo gáʼthúu̱n fe rí kuaʼdálú náa Jeobá. Rí nuʼnimbulú rí ikhaa maʼnimbánuu rí nikudaminaʼ. Fe rúʼko̱ nambáyulúʼ mu “muʼnigámbáa xúgíʼ rí nakunguanʼ xa̱bu̱ Xkawi̱i̱ʼ”. Ndayóo rí mbuʼyá escudo mu ma̱ndoo mañewu̱nlú náa kiʼsngáa ndrígu̱ún apóstata ga̱jma̱a̱ náa nutsijmáanʼ xa̱bu̱ ma̱ngaa náa rí nutanumulú dí maʼni makáguabáanʼlu. Á mu raguáʼdáá fe, xándoo guʼnimbulúʼ numuu rí kúwá eʼwíinʼ bi̱ nutsudáanʼ dí manújngurámulú xtángoo ndrígóo. Mámbá rí ikháánʼ numbáyíí fe ndrígúlú náa nuñajunʼ o náa nuʼnigajmaa. Nusngajmaa rí kuʼyá májánʼ escudo ejkua (1 Ped. 3:15). Mámbá rí tséndrígú ñajunʼ rí itháán májánʼ rí ma̱ndoo marígú káyúlú mbiʼi rí mu̱ʼni̱ ñajunʼ Dios nusngajmá rí kuʼyá májánʼ escudo (Heb. 13:5, 6). Ga̱jma̱a̱ índo̱ ikháánʼ nu̱ʼni̱ ñajuunʼ Jeobá maski xa̱bu̱ tsíñún gúyulú, escudo rí kuʼyá nañewu̱nlú, xóo muʼthá, fe rí kuaʼdáá (1 Tes. 2:2).

10. Ndiéjunʼ nindxu̱u̱ casco rí naʼnikáwáánʼ ga̱jma̱a̱ xú káʼnii gíʼmaa majmulú rá.

¹⁰ Casco rí naʼnikáwáánʼ. Nindxu̱u̱ rí kua̱ʼthi̱i̱n rí Jeobá naxnúlú, rí maʼnikáwáánʼlú náa nakháñulú ga̱jma̱a̱ maʼninumíin xúgíinʼ bi̱ nuni̱ rí nandoo  Jeobá (1 Tes. 5:8; 1 Tim. 4:10; Tito 1:1, 2). Xó má casco nañewu̱u̱n edxu̱u̱ mbáa soldado, rí kua̱ʼthi̱i̱n makáwáánʼ nañewu̱u̱n rí xóo endxa̱ʼwa̱míjnalú. Xú káʼnii rá. Rí kua̱ʼthi̱i̱n rígi̱ nambáyulú mbuʼyáá rí nikuʼdaminaʼ Dios ga̱jma̱a̱ nambáyulú mu xáxmiéjunlu gáʼni xkujndu rí nuraʼníí. Xú káʼnii ejmulú casco rígi̱ rá. Najmulú índo̱ nundxa̱ʼwáá edxu̱lú xóo endxaʼoo edxu̱u̱ Jeobá. Mbá xkri̱da, ikháanʼ ‹nakumulú kuʼyáá Dios raʼkháa mbújkha̱a̱ rí xájyúuʼ mba̱yu̱u̱ʼ› (Sal. 26:2; 104:34; 1 Tim. 6:17).

11. Ndiéjunʼ nindxu̱u̱ espada dí nindxu̱u̱ xi̱ʼ kaʼwu ga̱jma̱a̱ ndíjkha rí ndayúlú majmulú rá.

¹¹ Espada dí nindxu̱u̱ xi̱ʼ kaʼwu. Nindxu̱u̱ Ajngá rawuunʼ Dios, xóo muʼthá, Biblia. Espada rúʼko̱ gíʼdoo tsiakii mu narujtungáa asndu ndiéjúúnʼ nduwaʼ ga̱jma̱a̱ naʼnikáwíin xa̱bu̱ náa kisngáa nduwaʼ ga̱jma̱a̱ náa rí nuni̱ dí raʼkhí (2 Cor. 10:4, 5; 2 Tim. 3:16, 17; Heb. 4:12). Najmañulú najmulú májánʼ espada rígi̱ índo̱ nuʼnigajmaa ndajkuánʼ, ga̱jma̱a̱ náa xúgíʼ rí najuiʼsngúlú náa xuajñuu Dios (2 Tim. 2:15). Raʼkháa i̱ndó ajua̱nʼ rígi̱ rí naxnúlú Jeobá mu mañewu̱nlú, rígá imbo̱o̱ʼ, guʼyáá ndiéjunʼ nindxu̱u̱

12. Ndiéjunʼ rí itháan ndayúlú ga̱jma̱a̱ náá numuu rá.

¹² Mbáa soldado bi̱ najmañuu naxmínaʼ, ndaʼyoo rí xájmaa mbáwíi mu maʼngo̱o̱. Ndayóoʼ rí mumbayíí a̱ngui̱i̱n. Ikháá má kayuuʼ mangáánʼ, xáʼngulú gúʼni gajmiúlú Gixa̱a̱ gajmíi̱n xa̱bi̱i̱ á mu rí i̱ndó ikháanʼlu. Ndayúlú rí mumbayúlú a̱ngiu̱lú. Jeobá nixniúlu a̱ngiu̱lú bi̱ kúwíin náa mbájndi numbaaʼ mu mumbayúlú (1 Ped. 2:17).

13. Xó má naʼthí Hebreos 10:24 ga̱jma̱a̱ 25, xú káʼnii embáyulú rí mu̱ʼgua̱ reunión rá.

¹³ Mbá rí ma̱ndoo mambáyúlú nindxu̱u̱ rí mu̱ʼgua̱ reunión (atraxnuu Hebreos 10:24, 25). * Índo̱ kuwáanʼlu gíná, reunión ma̱ndoo maxnúlú tsiakii. Mbá xkri̱da, naxnúlú tsiakii comentarios rí nuxna a̱ngiu̱lú, discursos ga̱jma̱a̱ demostración rí nanújngoo rí nagájnúu náa Biblia. Naxnúlú tsiakii mu mu̱ʼni̱ má xúʼko̱ ñajuunʼ Jeobá, ga̱jma̱a̱ rí nuʼtámíjná índo̱ inuu magi̱ʼdu̱u̱ ma̱ngaa índo̱ naguámbá reunión (1 Tes. 5:14). Ma̱ngaa rí mu̱ʼgua̱ reunión naniñulú mumbáñún eʼwíinʼ ga̱jma̱a̱ rígi̱ naʼni rí maʼdxulú wéñuʼ (Hech. 20:35; Rom. 1:11, 12). Mbaʼa rí xóo ma̱ndoo mambáyulú rí mu̱ʼgua̱ reunión, xóo muʼthá, maʼniratáanʼlú mu muʼtáraʼa májánʼ. Mbá xkri̱da, najmañulú mu majmulú májánʼ xúgíʼ i̱yi̱i̱ʼ rí kajti náa caja ndrígóo herramientas mu muʼsngáa. Ikha jngóo atanirataminaʼ májánʼ mu mi̱dxu̱ʼ reunión. Índo̱ narígá reunión, atagíʼ edxa̱ʼ, índo̱ naguámbá, atagíʼ matani rí nijmañaaʼ. Rí matani rígi̱ mambáyaaʼ ‹mani̱ndxa̱a̱ʼ mbáa májáanʼ soldádiu̱u̱ Cristo Jesús› (2 Tim. 2:3).

14. Ndiéjunʼ i̱mba̱ rí ma̱ndoo mambáyulú rá.

¹⁴ Ma̱ngaa kúwá mbaʼin wéñuʼ ángeles bi̱ guáʼdáá tsiakii. Atatsaʼwáminaʼ ndiéjunʼ gáʼngo̱o̱ gáʼni mbáwíi ángel (Is. 37:36). Ga̱jma̱a̱ dí xúgi̱ atatsaʼwáminaʼ ndiéjunʼ gáʼngu̱u̱n gúni̱ ángeles bi̱ mbaʼin wéñuʼ rá. Nimbáa xa̱bu̱ numbaaʼ ni má xa̱bu̱ wéñiʼ xáʼngo̱o̱ gáʼnimbrígumina’ ga̱jma̱a̱ tsiakii rí gíʼdoo Jeobá mu maxmínaʼ. Jeobá nindxu̱u̱ bi̱ gíʼdoo xúgíʼ tsiakii. Ikha jngóo, índo̱ xtáa ga̱jma̱á ni̱ndxu̱lú, ikháanʼ muguaʼdáálu tsiakii ki xóo bi̱ nakiʼníin kuyulú. Tséʼniuu má asndu mbaʼin ikhiin (Juec. 6:16). Gajkhun nindxu̱u̱ rígi̱. Índo̱ gakuma̱a̱ʼ rí namíñánʼ ga̱jma̱a̱ rí naʼthí o dí naʼni bi̱ natiejunʼ ga̱jma̱a̱ʼ, bi̱ natanigajmaa jma̱a̱ náa escuela o mbáa bi̱ xtayáá bi̱ na̱nguá nindxu̱u̱ xa̱bi̱i̱ Jeobá. Garmáʼáan a̱jkia̱nʼ rí na̱nguá xtaa mbáwiin, ikháán xtaa ratanimbaníí ikha rí Jeobá naxnáa’.

15. Xó má naʼthí náa Isaías 54:15, 17, ndíjkha rí nditháan xáʼniwíyuu xuajñuu Dios rá.

¹⁵ Náa numbaaʼ rígi̱ rí naʼtáñajunʼ Gixa̱a̱, rígá  mbaʼa wéñuʼ numuu mu mawiñuunʼ kuyulú. Numuu rí ikháanʼ tséxuʼdámijná náa política, ní má tséjkualú guerra. Nuʼtáriyaʼ mbiʼyuu Dios, ma̱ngaa nuʼthá rí i̱ndó Reino ndrígóo maʼngo̱o̱ ma̱ʼkha̱a̱ kayóo rí tsímáá náa tsu̱du̱u̱ ku̱ba̱ʼ. Ma̱ngaa nuʼnimbulú xtángoo ndrígóo. Nuʼtálu rí Gixa̱a̱ bi̱ naʼtáñajunʼ náa numbaaʼ rígi̱ nindxu̱u̱ xkawi̱i̱ʼ, naʼninduwaʼ ga̱jma̱a̱ nagudíin xa̱bu̱ (Juan 8:44). Ma̱ngaa nuʼthá rí gítháán má tígo̱o̱ mambáa numbaaʼ ndrígóo Gixa̱a̱. Nditháan xáʼngo̱o̱ Gixa̱a̱ gajmíi̱n xa̱bi̱i̱ gúniwíyúlu. Ikháanʼ mu̱ʼni̱ mba̱a̱ má xúʼko̱ Jeobá, majmulú asndu ndiéjúúnʼ má rígá mu mu̱ʼni̱. Maski ajndu Gixa̱a̱ gíʼdoo tsiakii, mú ikhaa xájmaa gáwijitu̱u̱n ñajunʼ rí nuʼtáraʼa mu mudxawíín xúgíinʼ xa̱bu̱ náa mbájndi numbaaʼ. Maʼngulú mu̱ʼni̱ rígi̱ numuu rí Jeobá nañewu̱nlú (atraxnuu Isaías 54:15, * 17). *

16. Xú káʼnii gánikríya̱a̱ʼ xuajñuu Jeobá índo̱ gárígá majphú mba̱a̱ gaʼkhu rá.

¹⁶ Ndiéjunʼ rí gítháán marigá rá. Índo̱ gárígá majphú mba̱a̱ gaʼkhu Jeobá maʼnikáwáanʼlu. Maʼni a̱jma̱ rí ikháanʼ nditháan tséguaʼthi̱i̱n. Timbá, maʼnikáwíin xa̱bi̱i̱ bi̱ naguájun jmbu ‹índo̱ reyes bi̱ kúwá náa tsu̱du̱u̱ ku̱ba̱ʼ› munigámbáa Babilonia xuajin Mba̱a̱, rí naʼtáñajunʼ xúgíʼ religión rí minduwaʼ (Apoc. 17:16-18; 18:2, 4). Rí maʼni a̱jma̱, Jeobá maʼnikríyaaʼ xuajñuu índo̱ maʼnigámbíin xúgíinʼ bi̱ xóó naguanátigu̱u̱n náa numbaaʼ ndrígóo Gixa̱a̱, índo̱ gáʼkha̱ Armagedón (Apoc. 7:9, 10; 16:14, 16).

17. Xú káʼnii gándoo gámbáyulú rí makuwáanʼ mijngii náa Jeobá rá.

¹⁷ Índo̱ kuwáanʼlu mijngii náa Jeobá, Gixa̱a̱ xáʼngo̱o̱ gáʼni gínáanʼlu mba̱yu̱u̱ʼ mbiʼi. Mú, ikhaa nindxu̱u̱ bi̱ mamínuuʼ mbá kámuu (Rom. 16:20). Ikha jngóo, ¡rí xúgi̱ rá! Atagíʼ mbá xúgíʼ ajua̱nʼ rí naxnáaʼ Jeobá ga̱jma̱a̱ nditháan xátrawi̱i̱. Xátaʼgíʼ mataxmínaʼ mbáwiin, atambáñún xúgíinʼ a̱ngia̱nʼ, ga̱jma̱a̱ atanimbaaʼ ikha rí Jeobá naxná. Á mu rí nuni̱la rígi̱, xúni̱ a̱jma̱ a̱jkia̱la rí Anu̱lú bi̱ nandoo kaʼyulú bi̱ xtáa mekhuíí maxnála tsiakii ga̱jma̱a̱ mañewa̱nla (Is. 41:10).