1, 2. Tsíin gándoo gúmba̱yíí bi̱ naʼnigajmaa Biblia mu maʼga̱nú majngúun iyááʼ rá.

AMY bi̱ xtáa náa Fiyi naʼthí: “Ra̱ʼkhá tháán nanigu̱ʼ rí na̱jkha̱ rajmañuʼ dí naʼthí náa Biblia”, naʼthí xóó: “Ndi̱yo̱o̱ má dí rígi̱ nindxu̱u̱ gajkhun, mú tségíʼ mariʼkumina̱a̱ʼ, dí nimbáyúʼ wéñuʼ ga̱jma̱a̱ rí majngúnʼ iyááʼ nindxu̱u̱ rí mambajxúʼ gajmíʼ a̱ngiu̱lú”. Dí nigíʼnuu Amy naʼsngúlú dí rígá mbá dí gíʼdoo wéñuʼ numuu, rí mu mbáa bi̱ naʼnigajmaa Biblia maʼga̱nú majngúun iyááʼ ndayóoʼ rí mbá xúgíinʼ bi̱ kúwá náa congregación mumba̱yíí.

² Xúgíinʼ publicadores ma̱ndoo muñambáá mu congregación mbaja̱a̱ (Efes. 4:16). Mbáa precursora bi̱ na̱ʼkha̱ náa Vanuatu bi̱ mbiʼyuu Leilani naʼthí, xígi̱ ethi xa̱bu̱: “Ndayóoʼ mbá xúgíinʼ xa̱bu̱ xuajen mu muni̱ mbaja̱a̱ mbáa ada̱”, xúʼko̱ má kayuuʼ nindxu̱u̱ ñajunʼ rí nuʼsngúún xa̱bu̱ ma̱ngaa, ndayóoʼ dí mbá xúgíinʼ bi̱ kúwá náa congregación ma̱ndoo mumbayíí mbáa, mu ikhaa ma̱ndoo maʼga̱nú magruigú rí gajkhun. Índo̱ mbáa ada̱ nda̱ja̱a̱ ndayóoʼ rí mumbayíí bi̱ kúwá náa goʼwóo, bi̱ nambájxu̱u̱ gajmíi̱n ma̱ngaa maestriu̱u̱, xúgíinʼ nuxnáá tsiakii ga̱jma̱a̱ nusngáá ikha rí gíʼdoo numuu, xúʼko̱ má kayuuʼ publicadores, ma̱ndoo mumbayíí mbáa bi̱ naʼnigajmaa Biblia mu ikhaa maʼga̱nú majngúun iyááʼ, muxnáá consejo muxnáá tsiakii ga̱jma̱a̱ mugíʼ mbá májánʼ xkri̱da náa ikhaa (Prov. 15:22).

3. Ndiéjunʼ ejmañulú dí naʼthí Ana, Dorín ga̱jma̱a̱ Leilani rá.

³ Índo̱ nuʼsngáá mbáa ga̱jma̱a̱ Biblia guniʼñámíjná rí eʼwíinʼ mumbayúlú. Guʼyáá dí naʼthí Ana, mbáa precursora especial bi̱ xtáa náa Moldavia: “Mbáa bi̱ naʼnigajmaa Biblia rígá mbaʼa  dí ndayóo’, xáʼngo̱o̱ mbáwíi bi̱ naʼsngóo mambáyúu”. Imba̱a̱ precursor especial bi̱ na̱ʼkha̱ náa país má rúʼko̱ bi̱ mbiʼyuu Dorín naʼthí: “Nguáná tikhun publicadores nutháán dí na̱jkha̱nú asndu náa a̱jkiu̱u̱n, mbá dí ikhúún na̱nguá ni̱ʼkha̱ a̱jkiu̱nʼ mathu̱u̱n”. Leilani naʼthí i̱mba̱ dí gíʼdoo numuu dí májánʼ muʼnilú: “Índo̱ a̱ngiu̱lú nusngajma ngajua náa bi̱ naʼnigajmaa, na̱jkha̱nú ndaʼyoo dí rígi̱ nindxu̱u̱ xuajñuu Jeobá” (Juan 13:35).

4. Ndiéjunʼ gúʼyáá náa artículo rígi̱ rá.

⁴ Dí xúgi̱ mbáa murajximíjnalú: “Xú káʼnii gándoo mambáyúu ikhúún mbáa bi̱ naʼnigajmaa Biblia á mu raʼkháa ikhúún esngóo xá.” Náa artículo rígi̱ mbuʼyáá dí gándoo mu̱ʼni̱ á mu mbáa naʼthúlú mu̱ʼgua̱ gajmiúlú náa naʼsngóo mbáa ga̱jma̱a̱ numuu Biblia ga̱jma̱a̱ índo̱ bi̱ naʼnigajmaa Biblia nagíʼdu̱u̱ na̱jkha̱ reunión. Ma̱ngaa mbuʼyáá xú káʼnii bi̱ kuya̱ edxu̱u̱ ma̱ndoo mumbayíí mbáa bi̱ naʼnigajmaa Biblia mu maʼga̱nú majngúun iyááʼ.

5. Ndiéjunʼ gáʼyóoʼ muʼnilú ikháanʼ índo̱ mbáa gáʼthúlú mu̱ʼgua̱ gajmiúlú náa gáʼsngáa ga̱jma̱a̱ numuu Biblia rá.

⁵ Índo̱ mbáa najuiʼsngáá ga̱jma̱a̱ Biblia. Bi̱ naʼsngóo kaʼyoo itháan rí mambáyúu mu makro̱ʼo̱o̱ májánʼ dí naʼthí náa Biblia. Á mu bi̱ naʼsngóo naʼthúlú mu̱ʼgua̱ gajmiúlú, garmáʼáan a̱jkiu̱lú dí na̱jkua̱ mu mumbáyíí (Ecl. 4:9, 10). Mú ndiéjunʼ gándoo gúʼni̱ mu muʼnimbánii májánʼ ñajunʼ dí kaʼyulú rá.

6. Xú káʼnii gándoo muʼnimbánii dí naʼthí náa Proverbios 20:18 índo̱ na̱jkua̱ gajmiúlú mbáa mu masngáa ga̱jma̱a̱ numuu Biblia rá.

⁶ Guʼniratamíjnalú májánʼ. Timbá, gunda̱ʼa̱a̱ maʼthúlú bi̱ naʼsngáa mu maʼthúlú mbáa chíʼgíiʼ ga̱jma̱a̱ numuu bi̱ naʼsngóo (atraxnuu Proverbios 20:18). * Ma̱ndoo murajxi̱i̱ xú káʼnii xtáa, xú káʼnii i̱yi̱i̱ʼ enigajmaa̱ mu xúʼko̱ makuwáanʼlu xawii índo̱ gúʼgua̱ gajmiúlú. Ma̱ngaa ma̱ndoo murajxi̱i̱ ndiéjunʼ dí ma̱ndoo muʼthá ga̱jma̱a̱ ndiéjunʼ rí xándoo ga̱jma̱a̱ xú káʼnii ma̱ndoo muxnáá tsiakii bi̱ naʼnigajmaa mú xúʼko̱ maʼga̱nú maʼni ñajuunʼ Dios. Gajkhun má dí xáʼthúlú xúgíʼ maestriu̱u̱ mu dí gáʼthúlú ma̱ndoo mambáyulú. Mbáa misionera bi̱ mbiʼyuu Joy naʼthúu̱n rígi̱ bi̱ na̱jkha̱ gajmíi̱n índo̱ na̱jkha̱ gáʼsngáa ga̱jma̱a̱ Biblia. Naʼthí: “Rígi̱ nambáyúu bi̱ na̱jkhá ga̱jmu̱ʼ mu xúʼko̱ maxmiéjuunʼ kaʼyoo xa̱bu̱ ga̱jma̱a̱ xúʼko̱ mbaʼyoo dí gáʼthí índo̱ kuwáanʼ runigajmaa gajmiúxu xa̱bu̱”.

7. Ndíjkha rí gíʼdoo wéñuʼ numuu dí muʼniratamijnálú májánʼ rá.

⁷ Índo̱ na̱jkua̱ gajmiúlú mbáa mu maʼsngáa ga̱jma̱a̱ numuu Biblia, májánʼ gáʼni dí muʼniratamijnálú wapháá (Esd. 7:10). Dorín bi̱ niʼthálú náa kutriga̱ 3, naʼthí: “Na̱xna̱a̱ núma̱aʼ dí  bi̱ na̱jkhá ga̱jmu̱ʼ naʼnirataminaʼ numuu dí xúʼko̱ ma̱ndoo maʼthí dí mambáyúu bi̱ nasngóo”. Ma̱ngaa rígi̱ nanindxu̱u̱ mbá májánʼ xkri̱da náa bi̱ najuiʼsngáá, numuu dí xúʼko̱ ndaʼyoo dí mbá nájmiin niniratamijná májánʼ. Maski má xáʼngo̱o̱ gúʼnigajmaa̱ mi̱jnu̱ʼ mú guʼyáʼ dí itháan gíʼdoo numuu dí na̱ʼkha̱ raʼthí.

8. Ndiéjunʼ gámbáyulú mbuʼyáá ndiéjunʼ phú gúʼthá índo̱ gúʼtajkháan náa nuʼsngáa rá.

⁸ Rí muʼtájkáan gíʼdoo wéñuʼ numuu náa bi̱ naʼnigajmaa Biblia, gundxaʼwámijnalú wapháá ndiéjunʼ gúʼthá á mu naʼthúlú muʼtájkáan bi̱ niʼthúlu mu̱ʼgua̱ gajmiúlú. Mu xúʼko̱ mbuʼyáá dí phú gúʼthá índo̱ muʼtajkáan (Sal. 141:2). Hanae mbáa ndxájulú a̱ʼgu̱ bi̱ xtáa náa Japón naʼthí dí narmáʼáan a̱jkiu̱u̱n má xúʼko̱ dí niʼthí mbáa ndxájulú bi̱ na̱jkha̱ ga̱jma̱a̱ bi̱ naʼsngóo índo̱ niʼtájkháan. Naʼthí: “Ni̱jkhánú ndi̱yo̱o̱ dí nambájxu̱u̱ májánʼ ga̱jma̱a̱ Jeobá, ga̱jma̱a̱ nindoʼ mani̱ndxu̱ʼ xóo ikhaa. Ma̱ngaa índo̱ naríyaʼ mbiʼyuʼ náa naʼtájkháan rúʼko̱ niʼni mba̱yo̱o̱ dí ra̱ʼkhá tháán eñún kuyoʼ”.

9. Xó má naʼthí náa Santiago 1:19, ndiéjunʼ gándoo mu̱ʼni̱ ikháanʼ índo̱ na̱jkua̱ gajmiúlú mbáa mu maʼsngáa ga̱jma̱a̱ numuu Biblia rá.

⁹ Gumbáyíí bi̱ naʼsngáa. Mbáa precursora especial bi̱ xtáa náa Nigeria bi̱ mbiʼyuu Omamuyovbi naʼthí: “Mbáa bi̱ naʼnirataminaʼ májánʼ nagíʼ edxu̱u̱ índo̱ na̱jkha̱ ga̱jma̱a̱ bi̱ maʼsngáa. Ma̱ngaa naʼthí dí mambáyúu bi̱ naʼnigajmaa mú tséʼthí wéñuʼ numuu dí ndaʼyoo rí bi̱ phú kaʼyoo maʼthí nindxu̱u̱ bi̱ naʼsngóo”. Mú nguáná gáʼyóoʼ muʼthá ga̱jma̱a̱ ndiéjunʼ gúʼthá rá. (Prov. 25:11.) Guʼdxawíínlú májánʼ dí naʼthí bi̱ naʼsngáa ga̱jma̱a̱ bi̱ naʼnigajmaa (atraxnuu Santiago 1:19). * I̱ndó xúʼko̱ makuwáanʼlu xawii mumbáyíí náa ndayóoʼ. Gajkhun má dí ndayóoʼ mundxaʼwáá májánʼ edxu̱lú mu xúʼthálú wéñuʼ, ga̱jma̱a̱ xúrujturígú dí naʼthí bi̱ naʼsngáa. Xúʼthálú wéñuʼ, ma̱ndoo majmulú xkri̱da o graxe̱ mu xúʼko̱ mambáyúu mikro̱ʼo̱o̱ májánʼ bi̱ xtáa raʼnigajmaa. Mbáa makumulú dí xájmáanʼlú gúmbayíílu wéñuʼ bi̱ naʼnigajmaa mú guʼtháán rí májánʼ eʼni ga̱jma̱a̱ gaxmiéjunlú kuʼyáá, rúʼko̱ gáʼni dí mambáyúu wéñuʼ.

10. Xú káʼnii gándoo gámbayúu experiencia ndrígúlú bi̱ naʼnigajmaa Biblia rá.

¹⁰ Guʼtháán experiencia ndrígúlú. A mu kaʼnii ma̱ndoo muʼthán mbá chíʼgíiʼ xú káʼnii ikháanʼ nijmañulú dí gajkhun, xú káʼnii niʼngulú niraʼníí gaʼkhu ma̱ngaa xú káʼnii nimbáyulú Jeobá (Sal. 78:4, 7). Mbáa rígi̱ dí phú ndayóoʼ dí ikhaa maʼdxaun. Mbáa rígi̱ gáʼni dí maʼni gújkhúʼ fe ndrígóo ga̱jma̱a̱ dí maxkajxi̱i̱ a̱jkiu̱u̱n dí ikhaa majngúun iyááʼ ga̱jma̱a̱ mambáyúu maʼngo̱o̱ maraʼnuu gamiéjunʼ (1 Ped. 5:9). Mbáa precursor bi̱ xtáa náa Brasil bi̱ mbiʼyuu Gabriel, ikhaa narmáʼáan a̱jkiu̱u̱n dí nimbáyúu índo̱ ikhaa xtáa raʼnigajmaa Biblia naʼthí:  “Experiencias ndrígu̱ún a̱ngiu̱lú nimbáyúu mbaʼyoo dí Jeobá nakro̱ʼo̱o̱ xkujndu ndrígúlú. Á mu dí ikhiin niʼngu̱u̱n niraʼníí ikhúún mangúún maʼngo̱ʼ maraʼnuu”.

11, 12. Náá numuu dí ndayóo’ mundríguiin májánʼ bi̱ nunigajmaa Biblia índo̱ nagún reunión rá.

¹¹ Mu bi̱ naʼnigajmaa Biblia majmañuu ga̱jma̱a̱ dí majngún iyááʼ ndayóoʼ dí maʼga má xúʼko̱ reunión ma̱ngaa magíʼ maʼni dí najmañuu (Heb. 10:24, 25). Mbáa na̱jkha̱ timbá miʼtsú reunión numuu rí bi̱ naʼsngóo niʼthúu̱n rí maʼga mú xúgiáanʼ ma̱ndoo muʼthán dí maʼga má xúʼko̱ reunión. Xú káʼnii gándoo gúʼni rá.

¹² Gundríguíi májánʼ bi̱ naʼnigajmaa Biblia (Rom. 15:7). Á mu nundríguíilú májánʼ bi̱ naʼnigajmaa Biblia índo̱ na̱jkha̱ náa Guʼwá Nagimbáanʼ, mbáa rúʼko̱ gáʼni dí manigu̱u̱ʼ maʼga má xúʼko̱. Gurajxi̱i̱lú májánʼ ga̱jma̱a̱ guʼtháán dí ma̱ndoo maniniiʼ eʼwíinʼ a̱ngiu̱lú, mú xúʼni májthíiʼ. Xúʼthá dí xtáa má tsáa bi̱ naʼsngóo, mbáa xóó tséʼkha̱ maestriu̱u̱ o xtáa raʼni imbo̱o̱ʼ ñajunʼ. Ikha jngóo guʼdxawíín dí gáʼthí ga̱jma̱a̱ gaxmiéjunlú kuʼyáá. Ndiéjunʼ gándoo gárígá ga̱jma̱a̱ xúgíʼ rígi̱ rá. Guʼyáá dí nigíʼnuu Dimitri bi̱ nijngúun iyááʼ xíjkhóó, dí xúgi̱ nindxu̱u̱ má siervo ministerial. Ikhaa narmáʼáan a̱jkiu̱u̱n índo̱ ni̱jkha̱ timbá miʼtsú reunión, naʼthí: “Niguanúʼ rexa̱a̱ ga̱jma̱a̱ niti̱yu̱ʼ. Mbáa ndxájulú ndiʼyoʼ ga̱jma̱a̱ ni̱jkha̱ kañúún asndu awúún. Niʼniuʼ tsiánguá índo̱ xúgíinʼ niguwáʼ ga̱jma̱a̱ nirajxu̱ún. Ra̱ʼkhá tháán nidxuʼ wéñuʼ dí asndu nindoʼ dí xúgíʼ mbiʼi marigá reunión. Numuu dí nimbá miʼtsú tákumuʼ xúʼko̱ kaʼnii”.

13. Ga̱jma̱a̱ rí xóo nuʼnilú xú káʼnii gándoo gámbáyúu bi̱ naʼnigajmaa Biblia rá.

¹³ Guʼgíʼ mbá májánʼ xkri̱da. Dí xóo nuʼnilú ma̱ndoo mambáyúu bi̱ naʼnigajmaa Biblia (Mat. 5:16). Mbáa precursor bi̱ xtáa náa Moldavia bi̱ mbiʼyuu Vitali, naʼthí: “Índo̱ ndi̱yo̱o̱ rí xóo kúwíin, rí xóo nundxa̱ʼwa̱a̱ edxu̱ún ga̱jma̱a̱ rí xóo nuni̱ a̱ngiu̱lú bi̱ kúwá náa congregación, rúʼko̱ niʼniuu mbaʼyoo dí xa̱bi̱i̱ Jeobá ni̱ndxu̱ún religión gajkhun”.

14. Xú káʼnii gándoo gámbáyúu xkri̱da ndrígúlú imba̱a̱ mu majmañuu itháan rá.

¹⁴ Á mu mbáa bi̱ naʼnigajmaa Biblia nandoo majngúun iyááʼ, ndayóoʼ magíʼ maʼni dí xtáa rajmañuu. Gajkhun má dí rígi̱ nindxu̱u̱ gakhi̱i̱. Mú índo̱ gáʼyoo xú káʼnii embáyulú ikháanʼ ikha dí na̱ʼkha̱ náa Biblia índo̱ nuʼgíʼ nu̱ʼni̱, mbáa rúʼko̱ gáxkajxi̱i̱ dí mbaʼyaridoo xkri̱da ndrígúlú (1 Cor. 11:1). Guʼyáá dí nigíʼnuu Hanae, bi̱ niʼthá náa kutriga̱ 8. Naʼthí: “A̱ngiu̱lú kúwá má runi̱ dí ikhúún ndiʼkhún xtáá rajmañuʼ ma̱ni̱ índo̱ ndi̱yo̱o̱ nijmañuʼ maxnúu tsiakii eʼwíinʼ, ma̱ni̱ mba̱a̱ a̱jkiu̱nʼ ka̱ñu̱u̱n ga̱jma̱a̱ rí maʼndoʼ ka̱ñu̱u̱n. Ikhiin guáʼdáá má xúʼko̱ dí májánʼ dí muthi ga̱jma̱a̱ numún eʼwíinʼ. Ikhúún nindoʼ mani̱ndxu̱ʼ xóo ikhiin”.

15. Xó má naʼthí náa Proverbios 27:17, ndíjkha dí ndayóoʼ mambajxú gajmiúlú bi̱ nunigajmaa Biblia índo̱ nagún reunión rá.

 ¹⁵ Gambaxúlú gajmiúlú bi̱ naʼnigajmaa Biblia. Mámbá índo̱ na̱jkha̱ náa reunión, gusngajmáá rí naxmiéjunlú kuʼyáá (Filip. 2:4). Mú xúrajxi̱i̱ dí rakáʼyulú, ma̱ndoo muniʼniiʼ májánʼ índo̱ gúrajxi̱i̱ xú káʼni kúwá bi̱ kúwá náa goʼwóo, xú káʼnii e̱jkha̱ náa nañajunʼ ga̱jma̱a̱ xú káʼnii eʼyoo dí xtáa rajmañuu náa Biblia. Ma̱ndoo muʼthán dí májánʼ xtáa raʼni numuu dí nariʼkuminaaʼ. Xígi̱ gáʼni dí ma̱ndoo mambajxú gajmiúlú ga̱jma̱a̱ rí mumbáyíí rí majmañuu ma̱ngaa rí maʼga̱nú majngúun iyááʼ (atraxnuu Proverbios 27:17). * Hanae, bi̱ xúgi̱ nindxu̱u̱ precursora regular, naʼthí xú káʼni nikumu̱u̱ ikhaa índo̱ nigíʼdu̱u̱ ni̱jkha̱ reunión: “Xó ejkhá rambájxuʼ gajmíʼ bi̱ kúwá náa congregación, rúʼko̱ niʼni dí maʼndoʼ maʼgá itháan reunión. Ga̱jma̱a̱ na̱nguá nindátigoʼ nimbá maski ajndu nguáná néʼngo̱ʼ. Ra̱ʼkhá tháán edxuʼ índo̱ nda̱ñu̱u̱n bi̱ ndiʼkhún embájxuʼ gajmíʼ, ga̱jma̱a̱ rígi̱ nimbáyúʼ mu maniʼñúuʼ rambájxu̱ʼ gajmíʼ xa̱bu̱ bi̱ na̱nguá enigajmaa Biblia. Numuu dí nindoʼ maxtáá itháan mijngii náa Jeobá ga̱jma̱a̱ náa a̱ngiu̱lú, ikha jngóo niʼgíminaʼ majngúnʼ iyááʼ”.

16. Ndiéjunʼ imbo̱o̱ʼ dí ma̱ndoo mu̱ʼni̱ mu bi̱ naʼnigajmaa Biblia maku̱mu̱u̱ dí nindxu̱u̱ ndxájulú rá.

¹⁶ Xó má na̱jkha̱ rajmañuu bi̱ naʼnigajmaa Biblia gu̱ʼni̱ rí maku̱mu̱u̱ dí nindxu̱u̱ mbáa ndxájulú. Mbá rí xóo ma̱ndoo maʼni nindxu̱u̱ rí muʼthán maʼga náa guʼwúlú (Heb. 13:2). Denís, bi̱ xtáa rayambáa náa Moldavia, narmáʼáan a̱jkiu̱u̱n índo̱ ikhaa nigíʼdu̱u̱ raʼnigajmaa Biblia naʼthí: “Mbaʼa nuthu a̱ngiu̱xu nuthunxu muʼguá náa guʼwún ga̱jma̱a̱ rúʼko̱ dí nixnúxu wéñuʼ tsiakii índo̱ nuthi xú káʼnii Jeobá nimbáñún náa vida ndrígu̱ún. Ga̱jma̱a̱ rúʼko̱ nimbáyúxu mbuya̱a̱ dí maʼnduxu má xúʼko̱ mu̱ni̱ ñajuunʼ Jeoba ga̱jma̱a̱ dí rígá mbá dí guáʼthi̱nxu nda̱wa̱á mbá dí májánʼ wéñuʼ”. Índo̱ mbáa bi̱ naʼnigajmaa Biblia nanindxu̱u̱ publicador, ma̱ndoo muʼthán dí magajnúu maʼtáraʼa ga̱jma̱á ni̱ndxu̱lú. Mbáa publicador bi̱ xtáa náa Brasil bi̱ mbiʼyuu Diego naʼthí: “Mbaʼin a̱ngiu̱lú nuthunʼ dí magajnúʼ mataraʼa gajmíʼ rúʼko̱ niʼni dí maniʼniunʼ májánʼ ga̱jma̱a̱ mbaʼa wéñuʼ dí nijmañuʼ náa ikhiin rúʼko̱ niʼni dí maʼgá kanuu itháan mijngii náa Jeobá ga̱jma̱a̱ náa Jesús”.

17. Ndiéjunʼ gándoo muni̱ bi̱ kuya̱ edxu̱u̱ ga̱jma̱a̱ numún bi̱ nunigajmaa rá.

¹⁷ Muri̱ya̱ʼ mbiʼi mu muni̱ndxájkuun gajmiún bi̱ nunigajmaa Biblia. Bi̱ kuya̱ edxu̱u̱ ma̱ndoo musngajma dí gajkhun naxmiéjúnʼ eni̱ bi̱ nunigajmaa Biblia mu xúʼko̱ ikhiin maguánú majngún iyááʼ. Ma̱ndoo muri̱ya̱ʼ mbiʼi muni̱ dxájkuun gajmiún mámbá índo̱ narígá reunión,  ikhiin mbuyáá dí naxmiéjúnʼ kuñún á mu narmáʼáan a̱jkiu̱ún mbiʼñún itháan índo̱ nugíʼdi̱i̱ nuni̱i̱ comentar. Ma̱ndoo muri̱ya̱ʼ mbiʼi mu magún gajmiún mbáa publicador índo̱ gáʼsngáa ga̱jma̱a̱ numuu Biblia. Rígi̱ ma̱ndoo mambáyúu wéñuʼ bi̱ naʼnigajmaa Biblia. Jackie, mbáa precursora bi̱ xtáa náa Nigeria, naʼthí: “Mbaʼin bi̱ nasngúún ga̱jma̱a̱ Biblia naʼniún tsiánguá índo̱ na̱thu̱u̱n dí ndxájulú bi̱ ni̱jkhá ga̱jmu̱ʼ nindxu̱u̱ bi̱ kayá edxu̱u̱. Mbáa bi̱ naʼnigajmaa Biblia niʼthúnʼ: Pastor ndrígióʼ nditháan xáʼni rúʼko̱. Ikhaa i̱ndó maʼga gáʼñúún bi̱ guáʼdáá ga̱jma̱a̱ á mu muninumáá”. Rí xúgi̱, xa̱bu̱ bugi̱ na̱jkha̱ reunión.

18. Xó má naʼthí náa Hechos 20:28, xkáʼnii gándoo gúnimbaníí ñajunʼ dí kajkuáa náa ñawúúnʼ bi̱ kuya̱ edxu̱u̱ rá.

¹⁸ Gunirathiin ga̱jma̱a̱ gu̱xnu̱u̱n tsiakii bi̱ nusngáa. Bi̱ kuya̱ edxu̱u̱, ikháanʼla kuaʼdáá mbá ñajunʼ rí mba̱a̱ wéñuʼ rí mumbáñún publicadores mu xúʼko̱ mutaraʼa ga̱jma̱a̱ musngáa itháan májánʼ (atraxnuu Hechos 20:28). * Á mu mbáa namíñuu rí muʼgua gajmiála mu musngáá mbáa, gutha̱a̱n rí ikháanʼ ma̱ndoo mu̱ni̱. Jackie, bi̱ niʼthá náa kutriga̱ rí ninújngoo, naʼthí: “Nángí eʼni bi̱ kuya̱ edxu̱u̱ nurajxu̱ʼ ga̱jma̱a̱ numún bi̱ nasngúún, índo̱ naʼniuʼ gakhi̱i̱, ikhiin nuxnuʼ tikhu consejos dí ma̱ndoo mambáyúʼ”. Bi̱ kuya̱ edxu̱u̱ ma̱ndoo mumbañún ga̱jma̱a̱ muxnún tsiakii publicadores mu xákanájkúnʼ (1 Tes. 5:11). Jackie naʼthí xóó: “Nani̱gu̱ʼ rí bi̱ kuya̱ edxu̱u̱ nuxnuʼ tsiakii ga̱jma̱a̱ nuthunʼ dí ñajunʼ dí na̱ni̱ gíʼdoo wéñuʼ numuu. Ajngáa dí nuthi nindxu̱u̱ xóo iyaʼ guéʼtsí dí migi̱i̱nʼ índo̱ naʼni mijkha wéñuʼ. Tsiakii dí nuxnuʼ naʼni dí xámiñúʼ ga̱jma̱a̱ dí masngúún má xúʼko̱ xa̱bu̱” (Prov. 25:25).

19. Ndiéjunʼ gáʼni dí maʼdxulu xúgiáanʼ rá.

¹⁹ Maski má á mu xúgi̱, na̱nguá guáʼdiin bi̱ nuʼsngúún ga̱jma̱a̱ numuu Biblia mu ma̱ndoo mumbáñún mu maʼgá rajmañún itháan ga̱jma̱a̱ numuu Dios, xáʼyóoʼ má muʼthá wéñuʼ ma̱ndoo mumbáyíí bi̱ naʼsngáa dí mambáyúu bi̱ xtáa raʼnigajmaa. Gambaxúlú gajmiúlú bi̱ naʼnigajmaa índo̱ na̱jkha̱ náa Guʼwá Nagimbáanʼ ga̱jma̱a̱ guʼgíʼ májánʼ xkri̱da dí mambáyúu ikhaa. Bi̱ kuya̱ edxu̱u̱ ma̱ndoo muxnún tsiakii bi̱ nunigajmaa Biblia ma̱ngaa dí muri̱ya̱ʼ mbiʼi mu̱ni̱ dxájkuun gajmiún ga̱jma̱a̱ dí munirathiin itháan publicadores ga̱jma̱a̱ muthún dí májánʼ kúwá runi̱. Nda̱a̱ imbo̱o̱ʼ dí naʼni maʼdxulu wéñuʼ, xóo índo̱ nduʼyáá dí nimbáyíí mbá chíʼgíiʼ mangáánʼ mbáa, índo̱ na̱jkha̱ raniniiʼ itháan Anu̱lú Jeobá.