ARTÍCULO RÍ MUʼNIGAJMAA 19
Ngajua ga̱jma̱a̱ rí jmbu náa dí ra̱májánʼ
“Numuu rí ikháán nindxa̱a̱ʼ mbáa Dios bi̱ tsíyoo gáʼyoo dí ra̱májánʼ; nimbá mbiʼi xándoo maxtáa náa ikháán bi̱ naʼni dí raʼkhí” (SAL. 5:4).
AJMÚÚ 142 Guguaʼthi̱i̱n rí wíji̱ makánulu
RÍ MUʼNIGAJMAA *
1-3. a) Xó má naʼthí náa Salmo 5:4-6, xú káʼnii eʼyoo Jeobá dí ra̱májánʼ rá. b) Náá numuu nuʼthá rí “xtángoo ndrígóo Cristo” tsíyoo gáʼyoo nditháan rí nutsijmiin e̱ji̱n rá.
JEOBÁ nawiyuuʼ kaʼyoo xúgíʼ enii dí ra̱májánʼ (atraxnuu Salmo 5:4-6). * Ikha jngó, tsíyoo gáʼyoo mbá kayuuʼ rí nutsijmiin e̱ji̱n, nindxu̱u̱ mbá dí ra̱májánʼ kayuuʼ ga̱jma̱a̱ mixkawiʼ wéñuʼ. Xó má ikhaa, ikháanʼ bi̱ ni̱ndxu̱lú xa̱bi̱i̱ nawiyuluʼ kuʼyáá rí nutsijmiin e̱ji̱n ga̱jma̱a̱ tséniʼñááʼ dí marigá náa congregación (Rom. 12:9; Heb. 12:15, 16).
2 Rí nutsijmiin e̱ji̱n, mbájkhu má tsíyoo gáʼyoo nditháan “xtángoo ndrígóo Cristo” (Gál. 6:2). Náá numuu nuʼthá rígi̱ rá. Xó má ndiʼyáá náa artículo rí ninújngoo, dí xtángoo ndrígóo Cristo nigájnuu náa ngajua ga̱jma̱a̱ naʼni marigá rí jmbu. Ikháanʼ bi̱ ni̱ndxu̱lú xa̱bi̱i̱ Jesús, nuʼnimbulúʼ xtángoo rúʼko̱, nuʼni rí e̱ji̱n makuwá májánʼ ga̱jma̱a̱ makumún rí nandulú kuʼñúún. Mú, índo̱ mbáa natsíjmaa ada̱, naʼni i̱ndó rí nandoo ikhaa ga̱jma̱a̱ naʼni rí ada̱ ní xáxtáa májánʼ ga̱jma̱a̱ maku̱mu̱u̱ rí nimbáa tsíyoo gáʼyoo.
3 Phú migíná, rí nutsijmiin e̱ji̱n rígá asndu náá, ma̱ngaa rígi̱ naguáʼníí bi̱ ni̱ndxu̱ún cristianos. Náá numuu rá. Numuu rí mbiʼi rí kuwáanʼ, kuwa wéñuʼ ‹xa̱bu̱ xkawiinʼ ga̱jma̱a̱ bi̱ nuni nduwaʼ›, tikhun rí ikhiin nunimi̱jna̱ matu̱ʼu̱u̱n náa congregación (2 Tim. 3:13). Ma̱ngaa, tikhun bi̱ nuthi rí kuwa náa congregación niniñaaʼ rí nagijxu̱u̱n wéñuʼ maʼga kagui̱i̱n mutsijmiin e̱ji̱n. Xúgi̱ mbuʼyáá náá numuu dí rígi̱ nindxu̱u̱ mbá aʼkhá xkawiʼ wéñuʼ. Nda̱wa̱á, mbuʼyáá ndiéjunʼ eni bi̱ kuya̱ edxu̱u̱ índo̱ mbáa nakudaminaʼ aʼkhá, xóo rí nutsijmiin e̱ji̱n ga̱jma̱a̱ xú kaʼnii xabuanii ma̱ndoo muñewu̱u̱n e̱jñún. *
MBÁ AʼKHÁ MBA̱A̱ WÉÑUʼ
4, 5. Ndíjkha rí nindxu̱u̱ mbá aʼkhá mba̱a̱ rí nutsijmiin e̱ji̱n xá.
4 Bi̱ naguáʼníí rígi̱, numíniiʼ mba̱yu̱ʼ tsiguʼ. Raʼkháa i̱ndó ikhiin numíniiʼ, ma̱ngaa: Bi̱ kuwa náa guʼwún ga̱jma̱a̱ a̱ngiu̱lú bi̱ kuwa náa congregación. Rí nutsijmiin e̱ji̱n nindxu̱u̱ mbá aʼkhá rí xkawiʼ wéñuʼ.
5 Nindxu̱u̱ mbá aʼkhá rí naʼni mamínuʼ bi̱ nagíʼnuu. * Rí mataniu̱u̱n dí raʼkhí eʼwíínʼ nindxu̱u̱ mbá aʼkhá. Ikhaa rúʼko̱ rí guʼyáá náa imbo̱ʼ artículo, bi̱ natsíjmaa mbá ada̱, naʼni rí ada̱ maxtáa gíná wéñuʼ ga̱jma̱a̱ naʼni rí maku̱mu̱u̱ rí nimbáa tsíyoo gáʼyoo. Gíʼmaa muñewu̱u̱n e̱ji̱n náa rí mixkawiʼ wéñuʼ rígi̱. Ma̱ngaa gíʼmaa rí muʼni̱i̱ a̱jkiu̱ún ga̱jma̱a̱ mumbaʼñún bi̱ niguáʼníí rígi̱ (1 Tes. 5:14).
6, 7. Náá numuu rí nutsijmiin e̱ji̱n nindxu̱u̱ mbá aʼkhá náa congregación ga̱jma̱a̱ náa Xa̱bu̱ Ñajunʼ rá.
6 Mbá aʼkhá rí naʼni gachúu congregación. Mbáa cristianos bi̱ natsíjmaa mbáa ada̱ naʼni gachúu mbiʼyuu congregación (Mat. 5:16; 1 Ped. 2:12). Phú raʼkhí kayuuʼ nindxu̱u̱ rí mbáwíi xa̱bu̱ bi̱ naʼni dí raʼkhí, maríyaʼ gamajkhún mbaʼin a̱ngiu̱lú bi̱ ‹guájun jmbu› (Jud. 3). Xuniʼñáán maxtáa náa ikháanʼ mbáa bi̱ naʼni dí raʼkhí ga̱jma̱a̱ bi̱ tsítanga̱a̱ a̱jkiu̱u̱n ma̱ngaa naríyaʼ gamajkuu congregación.
7 Mbá aʼkhá rí nanújnguramuuʼ xtángoo ndrígu̱ún Xa̱bu̱ Ñajunʼ. Cristianos gíʼmiin “munimbánii rí nuthi Xa̱bu̱ Ñajunʼ” (Rom. 13:1). Nduʼyamajkuíí rí nuthi Xa̱bu̱ Ñajunʼ índo̱ nuʼnimbulúʼ xtángoo ndrígóo xuajen. Á mu mbáa bi̱ xtáa náa congregación nanújnguramuuʼ xtángoo, xóo muʼthá rí natsíjmaa mbáa ada̱, xtáa rakudaminaʼ aʼkhá náa Xa̱bu̱ Ñajunʼ (atayáá ma̱ngaa Hechos 25:8). Maski má bi̱ kuya̱ edxu̱u̱ na̱nguá kaʼñúún muni rí mambanúu xtángoo rígi̱, mú tsímbayíí bi̱ natsíjmaa mbáa ada̱ á mu na̱jkha̱ guʼwá e̱jua̱nʼ ga̱jma̱a̱ numuu rí niʼni (Rom. 13:4). Bi̱ naʼni aʼkhá naʼni numa̱a̱ rí naʼni (Gál. 6:7).
8. Xú káʼnii eʼyoo Dios índo̱ mbáa xa̱bu̱ naʼniuu mbá dí raʼkhí imba̱a̱ rá.
8 Nindxu̱u̱ mbá aʼkhá náa iduu Jeobá (Sal. 51:4). Índo̱ mbáa xa̱bu̱ naʼniuu dí raʼkhí imba̱a̱, nakudaminaʼ aʼkhá náa Dios. Mbá xkri̱da, náa xtángoo rí Jeobá nixnúún xa̱bu̱ Israel. Ikhí naʼthí rí índo̱ mbáa naʼni kúwáʼ o nagiʼmaa gidxóó náa inúu ndxájuu ‹tsegui̱ji̱ jmbu náa inuu Jeobá› (Lev. 6:2-4). Xúʼko̱ má nindxu̱u̱ índo̱ mbáa bi̱ xtáa náa congregación natsíjmaa mbáa ada̱, naʼni rí ní xáxtáa májánʼ ada̱, ga̱jma̱a̱ nakudaminaʼ aʼkhá náa inuu Dios ma̱ngaa naʼni gachúu mbiʼyuu. Ikhaa rúʼko̱ numuu rí ikháanʼ mangáanʼ nduʼyáá rí nutsijmiin e̱ji̱n nindxu̱u̱ mbá aʼkhá rí xkawiʼ wéñuʼ náa Dios ga̱jma̱a̱ rí tsíyulú guʼyáá mbá kayuuʼ.
9. Xú káʼnii ku̱ma̱ rí nagájnuu náa Biblia rí xuajñu Jeobá naʼni mbuʼyáá ga̱jma̱a̱ náá numuu rá.
9 Mbayuuʼ tsiguʼ xuajñu Jeobá naʼni mbuʼyáá ku̱ma̱ rí nagájnuu náa Biblia ga̱jma̱a̱ numuu rí nutsijmiin e̱ji̱n. Mbá xkri̱da, revista Bi̱ nayejngoo ga̱jma̱a̱ ¡Awaxunʼ! na̱ʼkha̱ artículo rí ma̱ndoo mambáñún bi̱ numíniiʼ ga̱jma̱a̱ numuu rí nitsijmiin, xú kaʼnii eʼwíínʼ ma̱ndoo mumbañún, ga̱jma̱a̱ xú káʼnii xabuanii ma̱ndoo muñewu̱u̱n e̱jñún. Ma̱ngaa bi̱ kuya̱ edxu̱u̱ nindrigú ikha rí na̱ʼkha̱ náá Biblia mu mbuyáá ndiéjunʼ gúni índo̱ mbáa nakudaminaʼ aʼkhá xóo rígi̱. Xuajñu Jeobá ndaʼyoo tsumáá wéñuʼ ikha rí nakhánun bi̱ kuya̱ edxu̱u̱ mu mbuyáá xóo munimbánii xkujndu xóo rígi̱. Rígi̱ naʼni rí mambanúu xkujndu xó má na̱nda̱ʼa̱ náa xtángoo ndrígóo Cristo.
XÓO NARÍGÁ ÍNDO̱ MBÁA NAKUDAMINAʼ MBÁ AʼKHÁ MBA̱A̱
10-12. a) Índo̱ bi̱ kuya̱ edxu̱u̱ nunimbánii ga̱jma̱a̱ numuu mbá aʼkhá mba̱a̱, ndiéjunʼ eni ga̱jma̱a̱ ndiéjunʼ rí maxmiéjúúnʼ itháán xá. b) Xó má naʼthí náa Santiago 5:14, 15, ndiéjunʼ rí nugíʼ nuni bi̱ kuya̱ edxu̱u̱ rá.
10 Índo̱ mbáa nakudaminaʼ mbá aʼkhá mba̱a̱, bi̱ kuya̱ edxu̱u̱ bi̱ nunimbánii xkujndu rígi̱, nduyáá májánʼ dí gíʼmaa munimbánii xtángoo ndrígóo Cristo, gíʼmaa muniu̱u̱ rí májánʼ mugiu̱u̱ Dios. Gajkhun má dí índo̱ narígá xúgi̱ kaʼnii, mbaʼa rí naʼni maxmiéjúnʼ. Rí itháán naʼni maxmiéjúúnʼ, nindxu̱u̱ rí xáguma gachíí mbiʼyuu Dios (Lev. 22:31, 32; Mat. 6:9). Ma̱ngaa naxmiéjúúnʼ rí muñewu̱u̱n a̱ngiu̱lú ma̱ngaa rí mumbañún dí mumbaxúun má xúʼko̱ gajmiún Dios ga̱jma̱a̱ rí mumbañún bi̱ nimíniiʼ náa aʼkhá xóo rígi̱.
11 Ma̱ngaa, bi̱ kuya̱ edxu̱u̱ nunimíjna̱ rí mumbayíí bi̱ nikudaminaʼ aʼkhá ga̱jma̱a̱ rí mata̱nga̱a̱ mambaxúu ga̱jma̱a̱ Dios (atraxnuu Santiago 5:14, 15). * Mbáa cristiano bi̱ naniñaminaʼ maʼni mbá aʼkhá rí mba̱a̱, xa̱bu̱ bugi̱ nánguá xtáa májánʼ náa inuu Dios. Rígi̱ nandoo gáʼthúu̱n rí nánguá embáxu̱u̱ májánʼ ga̱jma̱a̱ Jeobá. * Bi̱ kuya̱ edxu̱u̱ ni̱ndxu̱ún xóo bi̱ nuni thana, munimíjna̱ muni thanáá bi̱ nandoo kháñuu, xóo muʼthá, bi̱ nikudaminaʼ aʼkhá. Xtágabu rí makhánúu dí nagájnuu náa Biblia ma̱ndoo mambáyúu mu mata̱nga̱a̱ mambaxúu ga̱jma̱a̱ Dios. I̱ndó ma̱ndoo marigá rígi̱, á mu bi̱ nikudaminaʼ aʼkhá gajkhun rí natanga̱a̱ a̱jkiu̱u̱n (Hech. 3:19; 2 Cor. 2:5-10).
12 Ñajunʼ rí guáʼdáá bi̱ kuya̱ edxu̱u̱ nindxu̱u̱ mitsúʼkháan. Gajkhun rí naxmiéjúúnʼ kuñún mugu̱ bi̱ nikaniúún muñewu̱u̱n (1 Ped. 5:1-3). Nandún rí a̱ngiu̱lú makuwíin májánʼ náa congregación. Ikha jngó mbá nacha̱ nunimbánii mbá xkujndu xóo rí nutsijmiin e̱ji̱n. Ndiéjunʼ eni xá. Guʼyáá graxe̱ dí na̱ʼkha̱ náa nagi̱ʼdu̱u̱ kutriga̱ 13, 15 ga̱jma̱a̱ 17.
13, 14. Lá nunimbu̱u̱n bi̱ kuya̱ edxu̱u̱ xtángoo rí muxruigui̱i̱n náa Xa̱bu̱ Ñajunʼ bi̱ nutsijmiin e̱ji̱n ráʼ. Arathá.
13 Lá nunimbu̱u̱n bi̱ kuya̱ edxu̱u̱ xtángoo rí muxruigui̱i̱n náa Xa̱bu̱ Ñajunʼ bi̱ nutsijmiin e̱ji̱n ráʼ. Xúʼko̱. Náa xuajen dí rígá xtángoo rígi̱, bi̱ kuya̱ edxu̱u̱ nunimbu̱ún (Rom. 13:1). Ga̱jma̱a̱ rígi̱ tsenujngurámúunʼ xtángoo ndrígóo Dios (Hech. 5:28, 29). Ikha jngó, índo̱ bi̱ kuya̱ edxu̱u̱ nudxawíín rí nirígá mbá aʼkhá rí xígi̱ kaʼnii, mbá nacha̱ nutaraʼa náa sucursal mu mbuyáá itháán xú kaʼnii munimbánii xtángoo rígi̱ dí muxruigui̱i̱n bi̱ nutsijmiin e̱ji̱n.
14 Bi̱ kuya̱ edxu̱u̱ nutháán bi̱ nigíʼnuu rígi̱, aniuu o asndu tsáá má, rí ma̱ndoo muxruiga náa inún Xa̱bu̱ Ñajunʼ ga̱jma̱a̱ numuu rígi̱. Ndiéjunʼ gárígá, á mu bi̱ niʼni rígi̱ xtáa náa congregación ga̱jma̱a̱ nikujmaa pa̱jnu̱ rá. Lá gíʼmaa maku̱mu̱u̱ bi̱ makruiga̱ rí maʼnigachúu mbiʼyuu Dios ráʼ. Na̱nguá. Bi̱ niʼni gachúu mbiʼyuu Dios nindxu̱u̱ bi̱ niʼni aʼkhá.
15, 16. a) Xó má eʼthí náa 1 Timoteo 5:19, ndíjkha rí ndaʼyóoʼ makuwa a̱jmi̱i̱n bi̱ ndiyáá rí nirígá mu bi̱ kuya̱ edxu̱u̱ ma̱ndoo mundrigi̱i̱n comité judicial rá. b) Ndiéjunʼ eni bi̱ kuya̱ edxu̱u̱ índo̱ nuxrui̱ga̱a̱ mbáa bi̱ xtáa náa congregación rí nitsíjmaa mbáa ada̱ rá.
15 Náa congregación, náá numuu rí ndayóoʼ a̱jmi̱i̱n bi̱ ndiyáá, mu bi̱ kuya̱ edxu̱u̱ mbuyáá xóo phú nindxu̱u̱ xkujndu rá. Numuu rí xúʼko̱ eʼthí náá Biblia. Rígi̱ nindxu̱u̱ mbá awan rí maguma xó má gíʼmaa. Índo̱ bi̱ niʼni aʼkhá tséyá aʼkhúun, ndayóoʼ a̱jmi̱i̱n bi̱ ndiyáá mu bi̱ kuya̱ edxu̱u̱ ma̱ndoo mbuyáá xóo phú nindxu̱u̱ xkujndu (Deut. 19:15; Mat. 18:16; atraxnuu 1 Timoteo 5:19). * Lá rígi̱ eyoo gaʼthí rí ndayóoʼ a̱jmi̱i̱n bi̱ ndiyáá mu ma̱ndoo muxruiga̱ náa inún Xa̱bu̱ Ñajunʼ ráʼ. Na̱nguá. Tséyóoʼ má rígi̱ índo̱ bi̱ kuya̱ edxu̱u̱ o imba̱a̱ xa̱bu̱ nandoo makruiga̱ náa Xa̱bu̱ Ñajunʼ ga̱jma̱a̱ numuu aʼkhá xóo rígi̱.
16 Índo̱ naxruiga̱a̱ mbáa bi̱ xtáa náa congregación ga̱jma̱a̱ numuu rí nitsíjmaa ada̱, bi̱ kuya̱ edxu̱u̱ a̱jma̱ enii rí nuni. Timbá, nunimbánii xtángoo rí muxruiga̱a̱ bi̱ niʼni aʼkhá. Ga̱jma̱a̱ nda̱wa̱á nuni xó má rí naʼthí náa Biblia, mu mbuyáá dí phú nirígá ga̱jma̱a̱ á mu mbaʼyóoʼ mutrigi̱i̱n comité judicial. Á mu xa̱bu̱ tséyá aʼkhún, bi̱ kuya̱ edxu̱u̱ nudxawíín rí nuthi bi̱ ndiyáá dí nirígá. Nudrigi̱i̱n comité judicial á mu kuwa a̱jmi̱i̱n bi̱ ndiyáá ga̱jma̱a̱ nuthi rí gajkhun nindxu̱u̱ dí nirígá: Bi̱ nakruiga̱ ga̱jma̱a̱ imba̱a̱ bi̱ naʼthí rí gajkhun ndiʼyoo dí nirígá. * Á mu káaʼ mbáwíi bi̱ ndiʼyoo xtáa, raʼkháa rígi̱ eyoo gáʼthúu̱n rí bi̱ nikruiga̱ xtáa raʼni nduwaʼ. Maski ajndu kuwa a̱jmi̱i̱n bi̱ ndiyáá, mú, tséʼngu̱u̱n guʼyáá kaʼwu á mu gajkhun nirígá, mu á mu bi̱ kuya̱ edxu̱u̱ natsumu̱ún rí nirígá mbá aʼkhá mba̱a̱ wéñuʼ. Ikhiin munimíjna̱ mumbañún má xúʼko̱ bi̱ numíniiʼ ga̱jma̱a̱ nuñewa̱n congregación mu xa̱bu̱ buʼko̱ ní xátanga̱a̱ maʼni dí raʼkhí (Hech. 20:28).
17, 18. Arathá ndiéjunʼ ñajunʼ eʼni comité judicial.
17 Ndiéjunʼ ñajunʼ eʼni comité judicial rá. A̱ngiu̱lú bi̱ kuya̱ edxu̱u̱ bi̱ nuthúún rí mani̱ndxu̱ún comité, ikhiin nduyáá á mu xa̱bu̱ bi̱ nikudaminaʼ aʼkhá kaʼnii xóó maxtáa náa congregación o nánguá. Ajngáa judicial tsíyoo gaʼthí rí ikhiin kaʼñún muthi á mu Xa̱bu̱ Ñajunʼ maxnúu castigo o na̱nguá bi̱ ninujnguramúunʼ xtángoo. Bi̱ kuya̱ edxu̱u̱ nuniña̱a̱ʼ rí Xa̱bu̱ Ñajunʼ munimbaníí xkujndu (Rom. 13:2-4; Tito 3:1).
18 Ñajunʼ rí guáʼdáá bi̱ kuya̱ edxu̱u̱ bi̱ nanindxu̱ún comité judicial nindxu̱u̱ ga̱jma̱a̱ numuu Dios. Najmún Biblia, mu mbuyáá á mu xa̱bu̱ bi̱ nikudaminaʼ aʼkhá natanga̱a̱ a̱jkiu̱u̱n o na̱nguá. Á mu xí na̱nguá, nuxkriya̱a̱ʼ ga̱jma̱a̱ nanújngoo anuncio náa congregación rí xa̱bu̱ bugi̱ nánguá nindxu̱u̱ xa̱bi̱i̱ Jeobá (1 Cor. 5:11-13). Mú, á mu gajkhun rí natanga̱a̱ a̱jkiu̱u̱n, ma̱ndoo má xóó maxtáa náa congregación. Mú, bi̱ kuya̱ edxu̱u̱ mutháán rí xándoo magruigú mbá ñajunʼ. Numuu rí naxmiéjúúnʼ kuñún e̱ji̱n. Ikha jngó, muthún nguʼwáá bi̱ guáʼdiin e̱ji̱n rí muñewu̱u̱n e̱jñún náa xa̱bu̱ buʼko̱. Índo̱ gúni rígi̱ xúthi tsíin ninindxu̱ún e̱ji̱n bi̱ nitsijmiin.
XÚ KÁʼNII XABUANII GÁNDOO MUÑEWU̱U̱N E̱JÑÚN
Xabuanii nuñewu̱u̱n e̱jñún mu xútsijmiin índo̱ nuthúún xú kaʼnii nindxu̱u̱ rí nubúunʼ xa̱bu̱ á mu guanii má. Mu muni rígi̱ najmún i̱yi̱i̱ʼ rí naxná xuajñu Dios. (Atayáá kutriga̱ 19 asndu 22).
19-22. Xú kaʼnii gándoo guñewu̱u̱n e̱jñún xabuanii rá. (Atayáá xtiʼkhu rí timbá ináa).
19 Xabuanii ndayóoʼ rí muñewu̱u̱n e̱jñún náa gamíi rígi̱. * Xabuanii, e̱jña̱la ‹nindxu̱ún bi̱ Jeobá nixniála› (Sal. 127:3). Ñajunʼ ndrígála nindxu̱u̱ rí muñewa̱a̱n dí Jeobá nixnala. Ndiéjunʼ gándoo muni̱ mu xútsijmiin e̱jña̱la xá.
20 Timbá, guthu̱u̱n májánʼ rí kuwa xa̱bu̱ bi̱ nutsijmiin e̱ji̱n. Gajmañala mbu̱ya̱a̱ xú kaʼnii eni xa̱bu̱ bi̱ nutsijmiin e̱ji̱n ga̱jma̱a̱ xú kaʼnii eni nduwiinʼ. Gíʼmaa muñewu̱u̱n náa gamíi rígi̱ (Prov. 22:3; 24:3). Xa̱bu̱ bi̱ nutsijmiin e̱ji̱n ni̱ndxu̱ún bi̱ nambáxu̱u̱n gajmiún.
21 A̱jma̱, gutamijná gajmiála má xúʼko̱ e̱jña̱la (Deut. 6:6, 7). Rúʼko̱ nandoo gáʼthún rí mudxawíín rí gúthi (Sant. 1:19). Gajkhun má rí e̱ji̱n xándúún gúthi rí naguáʼníí. Mbáa makumún rí xúnimbu̱ún rí gúthi. O xa̱bu̱ bi̱ nitsijmiin nithúún rí xúthi. Á mu rí natsu̱mala dí raʼkhí xtáa rarígá, guniu̱u̱ graxe̱ ga̱jma̱a̱ májánʼ ma̱ngaa gudxawíín rí gúthi.
22 Ajtsú, guthu̱u̱n e̱jña̱la. Guthu̱u̱n rí ndayóoʼ mbuyáá ga̱jma̱a̱ numuu rí nubúunʼ xa̱bu̱ á mu guanii má. Guthu̱u̱n ndiéjunʼ gúni ga̱jma̱a̱ dí gúthi á mu mbáa naguguin. Gajmala i̱yi̱i̱ʼ rí xuajñu Dios niguwíi náa naʼthí xóo gándoo muñewu̱u̱n e̱ji̱n (atayáá kuguamáʼan “Rí mambáñún xabuanii ga̱jma̱a̱ e̱ji̱n”).
23. Xú kaʼnii eʼyáá rí nutsijmiin e̱ji̱n, ga̱jma̱a̱ xú káʼnii graxe̱ guriʼña̱a̱ náa imbo̱ʼ artículo rá.
23 Ikháanʼ bi̱ ni̱ndxu̱lú xa̱bi̱i̱ Jeobá nduʼyáá rí nutsijmin e̱ji̱n nindxu̱u̱ mbá aʼkhá rí mixkawiʼ wéñuʼ. Náa congregación nunimbu̱u̱n xtángoo ndrígóo Cristo, ikha jngó tsémbayíí náa rí mbaʼyóoʼ mamínu̱u̱ʼ xa̱bu̱ bi̱ nitsijmaa ada̱. Mú, xú káʼnii gándoo gúmbáʼñún bi̱ niminiiʼ ga̱jma̱a̱ numuu rí nitsijmiin xá. Graxe̱ rígi̱ maxtiʼña̱a̱ náa imbo̱ʼ artículo.
AJMÚÚ 103 Bi̱ kuya̱ edxu̱u̱ bi̱ Dios nimínáanʼlu
^ párr. 5 Náa artículo rígi̱, mbuʼyáá xú káʼnii gándoo muʼni mu muñewu̱u̱n e̱ji̱n mu xútsijmiin. Mbuʼyáá ndiéjunʼ gándoo gúní bi̱ kuya̱ edxu̱u̱ mu muñewa̱a̱n congregación ga̱jma̱a̱ xú káʼnii xa̱bu̱ guanii ma̱ndoo muñewu̱u̱n e̱jñún.
^ párr. 1 Salmo 5:4-6: “Numuu rí ikháán nindxa̱a̱ʼ mbáa Dios bi̱ tsíyoo gáʼyoo dí ra̱májánʼ; nimbá mbiʼi xándoo maxtáa náa ikháán bi̱ naʼni dí raʼkhí. Bi̱ nuni mbaʼumíjna̱ xándoo makuwá náa inaaʼ. Nawiya̱a̱ʼ xtañún, xúʼko̱, xúgínʼ bi̱ nuni dí ra̱májánʼ; matani gámbíin bi̱ nuni nduwaʼ. Xa̱bu̱ bi̱ nagudíin a̱ngui̱i̱n ga̱jma̱a̱ bi̱ naʼni nduwaʼ Jeobá nawiyu̱u̱ʼ kaʼyoo.”
^ párr. 3 KU̱MA̱ RÍ GÍʼDOO NUMUU: Rí nutsijmiin e̱ji̱n nindxu̱u̱ rí naʼni mbáa xa̱bu̱ nikhi̱i̱ ga̱jma̱a̱ mbáa ada̱ mu maʼni ma̱jxa̱a̱ rí nagua̱ʼa̱ magamuuʼ mbáa. Rígi̱ nandoo gáʼthúu̱n: Índo̱ mbáa xa̱bu̱ nikhi̱i̱ nagamuuʼ ada̱, najmuu rawuunʼ o nixtun ada̱ o índo̱ nagugua tsáʼkhúun ga̱jma̱a̱ cháʼdúu. Bi̱ itháán naguáʼníí rígi̱ ni̱ndxu̱ún e̱jín wa̱ʼxa̱ʼ, mú ma̱ngaa jiáma. Gajkhun má rí bi̱ itháán nuni rígi̱ ni̱ndxu̱ún xa̱bekha, mú mangiin má gu̱ʼu̱ nuni.
^ párr. 5 KU̱MA̱ RÍ GÍʼDOO NUMUU: Náa artículo rígi̱ ga̱jma̱a̱ náa imbo̱ʼ, índo̱ muʼthá rí bi̱ nimíniiʼ ni̱ndxu̱ún e̱ji̱n bi̱ nitsijmiin nákha majkhinʼ. Nandulú muʼthá rí ikhiin taʼndun magumii rígi̱, mú bi̱ nitsíjmii niniu̱u̱n tsiakii.
^ párr. 11 Santiago 5:14, 15: “Xtáa tsáa naʼniu nandii náa ikháanʼla ráʼ. Gaʼga̱ náa bi̱ kuya̱ edxu̱u̱ náa congregación mu mutajkháan ga̱jma̱a̱ numuu ma̱ngaa muxtajma̱a̱ aceite ga̱jma̱a̱ mbiʼyuu Jeobá. Dí mutajkháan ga̱jma̱a̱ fe magumatanáá bi̱ nakháñu, ikhú Jeobá makuxi̱i̱la. Ma̱ngaa á mu ikhaa nikudaminaʼ aʼkhá, maguma mba̱a̱ a̱jkiún kuyáá.”
^ párr. 11 Rí mbáa nánguá embáxu̱u̱ májánʼ ga̱jma̱a̱ Dios xándoo maʼthí dí ga̱jma̱a̱ numuu rúʼko̱ niʼni aʼkhá. Bi̱ nikudaminaʼ ikhaa má niraʼwíí rí maʼni ga̱jma̱a̱ kaʼyoo maxnáxi̱i̱ cuenta náa Jeobá (Rom. 14:12).
^ párr. 15 1 Timoteo 5:19: “Xataxruíga̱a̱ mbáa xa̱bu̱ nikhi̱i̱, i̱ndó ma̱ndoo á mu kuwa a̱jmi̱i̱n o ajtsíin bi̱ ndiyáá.”
^ párr. 16 Anuu ada̱, bi̱ nañewun o mbáa bi̱ nambáxu̱u̱ májánʼ ga̱jma̱a̱ ma̱ndoo maʼthúún bi̱ kuya̱ edxu̱u̱ rí nirígá. Mu xúʼko̱ ada̱ naxámínuuʼ itháan. Bi̱ kuya̱ edxu̱u̱ tsétáán ada̱ rí maxtáa ikhí índo̱ kuwa rutamíjná gajmiún bi̱ nitsijmaa.
^ párr. 19 Ikhaa má rígi̱ najuiʼthún bi̱ nuñewu̱u̱n e̱ji̱n bi̱ na̱nguá guáʼdiin aniún.
