1. Náá numuu rí tikhun cristianos naʼniún gakhi̱i̱ rí mugími̱jna̱ munigajmaa rá.

RÍ MBIʼI xúgi̱ naʼni mingíjyúuʼ rí makuwáanʼ. Mbaʼin a̱ngiu̱lú nuñajunʼ kañíiʼ mbiʼi mu xúʼko̱ ma̱ndoo muxnún rí ndañúunʼ bi̱ kúwi̱i̱n náa guʼwún. Eʼwíínʼ nagún mbaʼa hora náa nuñajuunʼ xúʼko̱ má índo̱ natangi̱ín náa guʼwún. Wakhíʼ a̱ngiu̱lú bugi̱ néʼngu̱u̱n wéñuʼ, mú ndayóoʼ rí mutrigi̱i̱n munigajmaa.

2. Nguáná natríyaʼ mbiʼi matanigajmaa ikháán rá.

² Gajkhun, gíʼmaa rí muriʼyaʼ mbiʼi muʼnigajmaa Ajngá rawunʼ Dios ga̱jma̱a̱ i̱yi̱i̱ʼ rí nagájnuu, mú gíʼmaa munigajmaa tsiʼyulú. Numuu rí i̱ndó xúʼko̱ ma̱ndoo mambaxúlúʼ májánʼ gajmiúlú Jeobá ga̱jma̱a̱ rí makuwáanʼ kámuu mbiʼi (1 Tim. 4:15, 16). Tikhun a̱ngiu̱lú naguáxu̱ún miʼcha̱ mu munigajmaa numuu rí xúgínʼ kaʼníí xóó nunuʼ ga̱jma̱a̱ wíí kri̱ga̱ ma̱ngaa numuu rí tsímáá a̱jkiu̱ún numuu rí ndi̱ya̱a̱ xu̱únʼ. Tikhun nunigajmaa wakhíʼ ga̱jma̱a̱ ndu̱ya̱ʼ náa nda̱a̱ rí maʼni xkájkiún.

3, 4. Ndiéjunʼ rí nixtiʼkhuu náa i̱yi̱i̱ʼ rí nakhánulú ga̱jma̱a̱ náá numuu rá.

³ Xúgiáanʼ nduʼyáá rí gíʼdoo numuu muriyaʼ mbiʼi muʼnigajmaa. Mú, ndiéjunʼ guʼnigajmaa rá. Mbáa nakumulú dí rígá mbaʼa wéñuʼ rí ma̱ndoo muraxnuu, ga̱jma̱a̱ naʼniulú mingíjyúuʼ rí muʼnigajmaa xúgíʼ i̱yi̱i̱ʼ rí nakhánulú. Tikhun naʼngu̱u̱n nduyáá xúgíʼ, mú tikhun naʼniún mingíjyúuʼ. Cuerpo Gobernante ndaʼyoo rígi̱, ikha jngó niraʼwíí rí ni xagájnuu mbaʼa i̱yi̱i̱ʼ xúʼko̱ má náa formato electrónico ma̱ngaa.

⁴ Mbá xkri̱da, nánguá gájnuu Anuario de los testigos de Jehová, numuu rí ma̱ndoo muxkamaa mbaʼa rí naguaʼnii a̱ngiu̱lú rí ma̱ndoo mambáyulúʼ náa ináa ndrígóo Internet, jw.org^®, ma̱ngaa náa JW Broadcasting^® rí nagájnuu  mámbá gu̱nʼ. Ma̱ngaa Bi̱ Nayejngoo ga̱jma̱a̱ ¡Awaxunʼ! rí muxnún xa̱bu̱, káaʼ ajtsú números nagájnuu rí mbá tsiguʼ. Niguma rígi̱ raʼkháa mu maguaʼdáá itháán mbiʼi mu muʼni i̱ʼwáʼ ñajuunʼ, nindxu̱u̱ numuu dí gíʼmaa muʼni “rí itháan gíʼdoo numuu” (Filip. 1:10). Guʼyáá ndiéjunʼ rí itháan gíʼdoo numuu muʼni ga̱jma̱a̱ xóo ma̱ndoo muʼni mu mambáyulúʼ índo̱ nuʼnigajmaa Biblia.

5, 6. Ndiéjunʼ rí gíʼmaa muʼniratamijná májánʼ rá.

⁵ Ndiéjunʼ rí itháán gíʼmaa maxmiéjunlú muʼni rá. Gajkhun má rí gíʼmaa muriyaʼ mbiʼi muʼnigajmaa Ajngá rawunʼ Dios. Rí xúgi̱, náa awan rí najmaa náa congregación rí kaʼyoo migixnuu Biblia, nánguá mbaʼa capítulos. Ikha jngó rígi̱ naʼni dí maguaʼdáá itháán mbiʼi mundxaʼwamíjna̱ náa rí magixnuu ga̱jma̱a̱ mbuʼyááʼ itháán ga̱jma̱a̱ numuu rí na̱ʼkha̱ raʼthí ikhí. Raʼkháa i̱ndó nandulú muraxnuu capítulo rí kaʼyoo, rí phú nandulú nindxu̱u̱ rí naʼthí náa Biblia maʼga̱nú asndu náa a̱jkiu̱lú ga̱jma̱a̱ rí maʼga kaguáanʼ itháán mijngii náa Jeobá (Sal. 19:14).

⁶ Ndiéjunʼ imbo̱ʼ rí gíʼmaa muʼniratamijná májánʼ rá. Ikhaa nindxu̱u̱ i̱yi̱i̱ʼ Bi̱ Nayejngoo, xúʼko̱ má rí najmañulúʼ ga̱jma̱a̱ numuu Biblia náa congregación ga̱jma̱a̱ reunión rí naguaʼdáá náa tapha xmáná. Ma̱ngaa gíʼmaa muraxnuu xúgíʼ números ndrígóo Bi̱ Nayejngoo ga̱jma̱a̱ ¡Awaxunʼ!

7. Lá gíʼmaa makuwáanʼ gíná á mu tséʼngulú gúraxnuu xúgíʼ rí na̱ʼkha̱ náa ináa ndrígóo Internet ga̱jma̱a̱ náa JW Broadcasting ráʼ.

⁷ Mú mbáa ma̱ndoo maʼthí: “Xú káʼnii gándoo gánigajmaa xúgíʼ dí rígá náa Internet ga̱jma̱a̱ náa JW Broadcasting rá. Mbaʼa wéñuʼ nindxu̱u̱...”. Gundxaʼwamíjna̱ náa xkri̱da rígi̱. Náa naxtango̱jo̱o̱ ganitsu, ikhí rígá mbaʼa ganitsu miʼtsí rí wéñuʼ. Mú bi̱ nagún gútsi xáʼngu̱u̱n gúphu̱ xúgíʼ, ikha jngó nguátháá rí nuraʼwi̱i̱ mu̱phu̱. Ikháá má kayuuʼ nindxu̱u̱ i̱yi̱i̱ʼ rí nagájnuu, xákuwáanʼ gíná á mu tséʼngulú guraxnuu xúgíʼ. Guraxnuu ga̱jma̱a̱ guʼyáá asndu náá má e̱ʼngu̱lú. Mú, xú káʼnii nindxu̱u̱ rí muʼnigajmaa ga̱jma̱a̱ xóo gúʼni mu muxkamaa rí mambáyulúʼ rá.

8. a) Ndiéjunʼ rí ma̱ndoo muʼni mu muʼniratamijná Bi̱ Nayejngoo rá. b) Ndiéjunʼ gambáyulú muʼni rígi̱ rá.

⁸ Rí muʼnigajmaa na̱nguá nindxu̱u̱ rí i̱ndó muraxnuu ga̱jma̱a̱ muʼxníí rí extiʼña̱a̱ graxe̱. Nindxu̱u̱ rí majmañulúʼ rí kuwáanʼ ruʼnigajmaa. Guʼyáá xóo ma̱ndoo muʼni rígi̱ índo̱ muʼni ratamíjná Bi̱ Nayejngoo. Timbá rí gíʼmaa muʼni, guʼyáá rí muʼnigajmaa, rí na̱ʼkha̱ náa nagi̱ʼdu̱u̱ artículo. Nda̱wa̱á, guʼyáá xú kaʼnii nindxu̱u̱ título ga̱jma̱a̱ subtítulos ma̱ngaa graxe̱ rí na̱ʼkha̱ náa nagi̱ʼdu̱u̱ artículo. Nda̱wa̱á guraxnuu artículo ga̱jma̱a̱ guʼyáá májánʼ ndiéjunʼ eʼthí. Ikhú gúriʼyaʼ tema ndrígúlú, rígi̱ ma̱ndoo muxkamaa náa nagi̱ʼdu̱u̱ mambá kutriga̱. Naʼthí ndiéjunʼ e̱ʼkha̱ raʼthí náa xúgíʼ kutriga̱. Índo̱ kuwáanʼ ruraxnuu artículo gundxaʼwamíjna̱, xú kaʼnii kuajtuminaʼ kutriga̱ ga̱jma̱a̱ subtítulos ga̱jma̱a̱ rí kayá edxu̱u̱ artículo. Guʼniraʼmáʼ ajngáa dí tsikruʼulúʼ ga̱jma̱a̱ tikhu rí nandulú mbuʼyáá dí eyoo gaʼthí.

9. a) Ndíjkha rí gíʼmaa mbuʼyáá májánʼ rí naʼthí náa textos índo̱ nuʼnigajmaa i̱yi̱i̱ʼ Bi̱ Nayejngoo ga̱jma̱a̱ xú káʼnii gíʼmaa muʼni rá. b) Xó má naʼthí náa Josué 1:8, ndiéjunʼ i̱mba̱ rí gíʼmaa muʼni índo̱ nuraxnuu textos rá.

⁹ Rí muʼnigajmaa i̱yi̱i̱ʼ Bi̱ Nayejngoo nindxu̱u̱ rí muʼnigajmaa Biblia. Ikha jngó,  guʼyáá xúgíʼ texto rí na̱ʼkha̱, mú, itháán náa texto rí mbaʼyóoʼ magixnuu índo̱ guʼnigajmaa náa congregación. Guʼyáá májánʼ rí ajngáa rí naʼthí náa texto nambánii ga̱jma̱a̱ rí naʼthí náa kutriga̱. Ma̱ngaa, guriʼyáʼ mbiʼi mu mundxaʼwamíjna̱ xú káʼnii gúʼgíʼ muʼnimbánii rí naʼthí náa texto (atraxnuu Josué 1:8). *

10. Xó má naʼthí náa Hebreos 5:14, ndíjkha rí xabuanii gíʼmaa musngúún e̱jñún xóo muniratamijná índo̱ nunigajmaa mbá guʼwíin rá.

¹⁰ Rí xúgi̱ muʼthá ga̱jma̱a̱ numuu rí muʼnigajmaa mbá guʼwáanʼ. Gajkhun rí xabuanii nandún rí e̱jñún makuwíin gagi índo̱ nunigajmaa mbá guʼwíin. Ga̱jma̱a̱, maski ajndu xabuanii gíʼmaa maguaʼdáá xawii rí mbuyáá náa munigajmaa mbá guʼwíin, tséyóoʼ má rí xúgíʼ xmáná muni rí maʼni gakhi̱i̱ wéñuʼ. Ma̱ndoo mbuyáá Broadcasting o nguáná ma̱ndoo muni i̱ʼwáʼ, xóo arca ndrígóo Noé. Mú ma̱ngaa gíʼdoo wéñuʼ numuu rí xa̱bu̱ guanii musngúún e̱jñún rí muniratamijná rí mbiʼyáá náa reunión o mbuyááʼ ga̱jma̱a̱ numuu mbá xkujndu dí narígá náa escuela (atraxnuu Hebreos 5:14). * Á mu nuriyaʼ mbiʼi muniratamijná náa guʼwún, rúʼko̱ gáʼni rí mugíʼ edxu̱ún índo̱ gagún reunión o náa asambleas, náa na̱nguá egrigú video mu mbuyáá. Nguáthá mba̱yu̱u̱ʼ gíʼmaa mbajyálá rá. Mixtiʼkhu má ganindxu̱u̱, gíʼmaa mbu̱ya̱a̱ nguáthá mbayuuʼ maʼngu̱u̱n e̱jña̱la.

11. Ndíjkha rí gíʼdoo numuu muʼsngáá xóo maʼnirataminaʼ ga̱jma̱a̱ maʼnigajmaa májánʼ Biblia bi̱ nuʼsngáá rá.

¹¹ Bi̱ nuʼsngúún ga̱jma̱a̱ numuu Biblia ma̱ngaa gíʼmaa rí majmañún muniratamijná. Gajkhun má rí nadxulú índo̱ nuxníí rí extiʼña̱a̱ graxe̱ náa muʼnigajmaa gajmiúlú o rí mbiʼyáá náa reunión. Mú, gíʼmaa muʼsngúún xóo muniratamijná ga̱jma̱a̱ mbuya̱ʼ rí tsékru̱ʼu̱u̱n índo̱ kuwa ndajkuíín. Mu xúʼko̱ índo̱ guraʼníí xkujndu, raʼkháa mbá nacha̱ guthúún a̱ngiu̱lú mu mumbañún, ikhiin má gúyááʼ rí ma̱ndoo mambáñún.

12. Náá numuu rí gíʼmaa muʼnigajmaa rá.

¹² Á mu tsénigulú muʼnigajmaa, mbáa makumulú rí xándoo gajmañulú índo̱  guʼnigajmaa. Mú, ma̱ndoo. Índo̱ gugíʼdi̱i̱ xájyulúʼ wéñuʼ; mú, mañu mañúú guʼgua̱ ruʼnigajmaa itháán mba̱yu̱u̱ʼ. Gundxaʼwamíjna̱ náá numuu rí nuʼnigajmaa. Gajkhun má rí índo̱ nunigajmaa nindxu̱u̱ mu mu̱ʼgua̱ kanuu náa Jeobá. Mú, i̱mba̱ numuu nindxu̱u̱ rí mbuʼyááʼ ga̱jma̱a̱ numuu graxe̱ rí niʼniulúʼ mbáa o mbuʼyááʼ ga̱jma̱a̱ numuu mbá xkujndu rí kuaʼdáá.   

13. a) Xú káʼnii gándoo gáʼni mbáa dxámá mu mambáyúu rí naʼnimbo̱o̱ náa escuela rá. b) Xú káʼnii gúʼgíʼ mu̱ʼni̱ rí naʼthí náa Colosenses 4:6 rá.

¹³ Mbá xkri̱da, lá nindxa̱a̱ʼ mbáa dxámá ga̱jma̱a̱ nadxuʼ escuela ráʼ. mbáa xúgínʼ a̱ngia̱a̱nʼ náa escuela nunimbu̱u̱n rí xa̱bu̱ niguwáʼ náa changunʼ. Lá nanigua̱ʼ maratha rí naʼsngáa náa Biblia, mú natayáá rí tséjmañaaʼ májánʼ. Ikha jngó ndayóoʼ rí mataʼyááʼ itháan ga̱jma̱a̱ numuu rígi̱. Á mu natani rígi̱, a̱jma̱ rí gámbáyáaʼ. Timbá, ma̱ta̱ya̱a̱ itháan gajkhun rí Dios niʼni xúgíʼ dí rígá. A̱jma̱, majmañaaʼ itháán májánʼ maratha rí naʼsngáa náa Biblia (Rom. 1:20; 1 Ped. 3:15). Ginii rí gíʼmaa matani, gíʼmaa matraximínáʼ náá numuu rí a̱ngia̱a̱nʼ nunimbu̱u̱n rí xa̱bu̱ naguwaʼ náa changunʼ. Ga̱jma̱a̱ nda̱wa̱á atayáá ndiéjunʼ eʼthí náa iyulú ga̱jma̱a̱ numuu rígi̱. Ikhú ma̱ta̱ya̱a̱ rí xóo maratha naʼsngáa náa Biblia, na̱nguá má mingíjyúuʼ wéñuʼ. Mbaʼin xa̱bu̱ nakumu̱ún rí naguwaʼ náa changunʼ numuu rí mbáa bi̱ nakumu̱ún kuyáá nithúún rí gajkhun nindxu̱u̱ rígi̱. Mú, índo̱ gajmañaaʼ xóo phú nindxu̱u̱ xáʼniaʼ mingíjyúuʼ matriʼña̱a̱ graxe̱ rí gúniáaʼ (atraxnuu Colosenses 4:6). *

14-16. a) Ndiéjunʼ rí ma̱ndoo muʼni mu makru̱ʼu̱lú májánʼ mbá libro ndrígóo Biblia rí tséniʼnúuʼ májánʼ rá. b) Xú káʼnii embáyulú texto rí ndiʼyáá mu muniʼnuuʼ itháan májánʼ libro ndrígóo Amós rá. (Atayáá kúguamáʼáan “Guniʼnúnʼ májánʼ xa̱bu̱ bi̱ naguwáʼ náa Biblia”.)

¹⁴ Gundxaʼwamíjna̱ rí náa i̱mba̱ reunión mbuʼyáá ga̱jma̱a̱ numuu mbáa gaʼyee, bi̱ na̱nguá eniʼníiʼ májánʼ. Timbá rí gíʼmaa muʼni nindxu̱u̱ rí manigulúʼ mbuʼyáá rí niʼnirámáʼ gaʼyee buʼko̱. Xú káʼnii gándoo gúʼni rá.

¹⁵ Gugíʼdi̱i̱ muraximíjna̱ ndiéjunʼ eʼyáá ga̱jma̱a̱ numuu bi̱ niʼnirámáʼ libro rúʼko̱: Tsáá ninindxu̱u̱, náá nixtáa ga̱jma̱a̱ xú káʼnii ñajunʼ rí nigiʼdoo. Rígi̱ ma̱ndoo mambayúlú makru̱ʼu̱lú náá numuu rí xúʼko̱ nijmuu tikhu ajngáa o xkri̱da rí nijmuu. Índo̱ guraxnuu, guʼnimíjna muxkamaa xú kaʼnii xa̱bu̱ ninindxu̱u̱ bi̱ niʼnirámáʼ.

¹⁶ Nda̱wa̱á guʼyáá nguáná nigumaraʼmáʼ libro. Mu muʼni rúʼko̱, mbaʼyoo mbuʼyáá “Tabla náa na̱ʼkha̱ mbiʼyuu libros ndrígóo Biblia”, rí na̱ʼkha̱ náa nagi̱ʼdu̱u̱ Traducción del Nuevo Mundo de las Santas Escrituras (con referencias). Ma̱ngaa ma̱ndoo mbuʼyáá tabla náa naguwá gaʼyee ga̱jma̱a̱ reyes rí na̱ʼkha̱ náa sección 3 ndrígóo folleto Mambáyulúʼ muʼnigajmaa Ajngá rawunʼ Dios. Á mu libro rí nuʼnigajmaa naʼthí ga̱jma̱a̱ mbáa gaʼyee, májánʼ gáʼni rí mbuyááʼ xú káʼnii xtáa rarígá nákha nigumaraʼmáʼ. Ma̱ndoo mbuyááʼ xú káʼnii dí raʼkhí kuwa runi xa̱bu̱ dí gaʼyee nandoo muriʼkumíjnáá ga̱jma̱a̱ tsíin ni̱ndxu̱ún bi̱ nixtáa gajmíi̱n. Mu ma̱ndoo makru̱ʼu̱lú májánʼ, ma̱ndoo muraxnuu i̱mba̱ libro ndrígóo Biblia. Mbá xkri̱da, mu ma̱ndoo makru̱ʼu̱lú itháán májánʼ mbiʼi rí nixtáa gaʼyee Amós, ma̱ndoo muraxnuu versículos ndrígóo libro 2 Reyes ga̱jma̱a̱ 2 Crónicas rí na̱ʼkha̱  náa referencias marginales ndrígóo Amós 1:1. Ma̱ngaa mambayúlú á mu nuraxnuu libro ndrígóo Oseas, bi̱ ma̱ngaa nixtáa má mbiʼi rí nixtáa Amós. Númaa má ga̱jma̱a̱ numuu xúgíʼ rígi̱, nandoo nakru̱ʼu̱lú itháán májánʼ xú kaʼnii ninindxu̱u̱ mbiʼi rí nixtáa Amós (2 Rey. 14:25-28; 2 Crón. 26:1-15; Os. 1:1-11; Amós 1:1).

17, 18. Arathá, xú káʼnii embáyulú itháán rí muraxnuu kuduun Biblia rá. Gajmaaʼ xkri̱da rí na̱ʼkha̱ náa kutriga̱ o imbo̱ʼ.

¹⁷ Gíʼmáanʼ manigulúʼ rí muraxnuu Biblia. Mbá xkri̱da, gundxaʼwamíjna̱ rí kuwáanʼ ruraxnuu capítulo 12 ndrígóo Zacarías, náa niʼtáriyaʼ xóo nikháñuu Mesías (Zac. 12:10). Índo̱ na̱jkuánu náa versículo 12, ikhí nuraxnuu rí “bi̱ kuwa náa goʼwóo Natán” mumbiyaʼ wéñuʼ índo̱ gakháñuu Mesías. Mu mbuʼyáá májánʼ ga̱jma̱a̱ numuu rígi̱, guraximíjna̱: “Lá kaʼñún Mesías bi̱ kuwa náa goʼwóo Natán ráʼ. Náá gándoo gaxkamaa itháán ga̱jma̱a̱ numuu rígi̱ rá.” Ikhú nduʼyááʼ itháán. Referencia marginal na̱jkha̱ kaguáanʼ náa 2 Samuel 5:14, náa naʼthí rí Natán nindxu̱u̱ mbáa a̱ʼdióo David. I̱mba̱ referencia na̱jkha̱ kaguáanʼ náa Lucas 3:31, ikhí naʼthí rí Jesús na̱ʼkha̱ náa e̱ji̱i̱n Natán numuu rí María na̱ʼkha̱ ikhí (atayáá Bi̱ Nayejngoo gu̱nʼ agosto tsiguʼ 2017, ináa 32, kutriga̱ 4). ¡Phú nagui̱i̱! Nduʼyáá má rí Jesús ma̱ʼkha̱ náa e̱ji̱i̱n David (Mat. 22:42). Mú, David nigiʼdiin itháán rí mbá veinte e̱ji̱i̱n. Índo̱ nduʼyáá rígi̱, tséʼniulú tsiánguá rí Zacarías niʼthí: Goʼwóo Natán mumbiyaʼ ga̱jma̱a̱ numuu rí makhañúu Jesús.

¹⁸ Gundxaʼwamíjna̱ náa i̱mba̱ xkri̱da. Náa timbá capítulo ndrígóo Lucas, ikhí naʼthí rí ángel Gabriel ni̱jkha̱ gáʼyoo María ga̱jma̱a̱ niʼthúu̱n ajngáa rígi̱ ga̱jma̱a̱ numuu ada̱ bi̱ magiʼdaa: “Bugi̱ magiʼdoo numuu  ga̱jma̱a̱ magumbiʼyuu A̱ʼdióo bi̱ phú Mba̱a̱; ga̱jma̱a̱ Jeobá Dios maxnúu xíliu̱u̱ David bi̱ nindxu̱u̱ anu̱u̱, ga̱jma̱a̱ maʼtáñajunʼ náa goʼwóo Jacob asndu kámuu mbiʼi” (Luc. 1:32, 33). Mbáa nundxaʼwamíjná náa timbá ajngáa rí niʼthí ángel, náa naʼthí rí Jesús magumbiʼyuu “A̱ʼdióo bi̱ phú Mba̱a̱”. Mú, ma̱ngaa Gabriel niʼthí rí Jesús mani̱ndxu̱u̱ rey. Ikha jngó ma̱ndoo muraximíjna̱ dí nikro̱ʼo̱o̱ María índo̱ niʼdxaun ajngáa rígi̱. Lá nindxaʼwámína̱ʼ rí Jesús marikuriya̱a̱ʼ Herodes o imba̱a̱ bi̱ gáʼtañajunʼ náa Israel ráʼ. Lá nindxaʼwamínaʼ rí ikhaa mani̱ndxu̱u̱ ru̱dúu̱ rey ga̱jma̱a̱ rí maxtáa náa palacio gajmíi̱n bi̱ kuwa náa goʼwóo xáʼ. Náa Biblia nditháan tséʼthi, á mu niʼniuu graxe̱ rígi̱ Gabriel. Ma̱ngaa tánda̱ʼa̱ rí magiʼdoo mbá ñajuunʼ kiejuunʼ náa Reino, xó má nini a̱jmi̱i̱n xa̱bi̱i̱ Jesús (Mat. 20:20-23). Rígi̱ nasngájma rí María ninindxu̱u̱ mbáa a̱ʼgu̱ guabaaʼ.

19, 20. Xó má naʼthí náa Santiago 1:22-25 ga̱jma̱a̱ 4:8, ndiéjunʼ rí gíʼmaa mbuʼyáá índo̱ muʼnigajmaa rá.

¹⁹ Garmáʼáan a̱jkiu̱lú rí phú nandulú índo̱ nuʼnigajmaa Ajngá rawuunʼ Dios ga̱jma̱a̱ i̱ʼwáʼ i̱yi̱i̱ʼ nindxu̱u̱ mu mu̱ʼgua̱ kanuu náa Jeobá. Mú, ma̱ngaa nandulú mbuʼyáá xú kaʼnii xa̱bu̱ nindxulú ga̱jma̱a̱ ndiéjunʼ gáʼyóóʼ muriʼkhumijná mu muʼni rí nanigu̱u̱ʼ Dios (atraxnuu Santiago 1:22-25; 4:8). * Ikha jngó mámbá rí nutriʼgánʼ muʼnigajmaa gíʼdoo wéñuʼ numuu rí munda̱ʼa̱a̱ Jeobá rí maxnúlúʼ xi̱ʼ kaʼwu ndrígóo. Ma̱ngaa gíʼmaa munda̱ʼa̱a̱ rí mambáyulúʼ mu majmañulúʼ rí muʼnigajmaa ga̱jma̱a̱ rí mbuʼyamijná xú káʼnii eʼyulú ikhaa.

²⁰ Xúgiáanʼ gíʼmaa manindxu̱lúʼ xóo xa̱bi̱i̱ Dios bi̱ naʼthí náa Salmo 1:2, 3: “Ikhaa naniguʼ maʼni xó má eʼthí náa xtángoo ndrígóo Jeobá, ga̱jma̱a̱ mbiʼí mbruʼun nandxaʼwáminaʼ rí niguxnuu. Ga̱jma̱a̱ [...] xúgíʼ rí gáʼni magajnúu májánʼ”.