1. Xó má naʼthí náa Mateo 28:18 asndu 20, ndiéjunʼ dí niʼtáñajunlú Jesús rá.

NDA̱WA̱Á dí Jesús ni̱ga̱bi̱i̱, nisngájmaminaʼ náa xa̱bi̱i̱ bi̱ kúwá náa Galilea. Numuu dí gíʼdoo wéñuʼ numuu mbá rí maʼthúún. Ndiéjunʼ nindxu̱u̱ rá. Guraxnuu náa Mateo 28:18 asndu 20. *

2. Ndiéjunʼ guʼtá náa artículo rígi̱ rá.

² Xúgiáanʼ bi̱ nuʼni ñajuunʼ Dios rí mbiʼi xúgi̱ mangáanʼ gíʼmaa muʼnimbánii rí Jesús niʼtáñajunlú rí musngúún eʼwíinʼ. Ikha jngó náa artículo rígi̱ muʼthá ajtsú enii rí ma̱ndoo muʼni rí kajua̱a̱ ga̱jma̱a̱ rí Jesús niʼtáñajunlú. Timbá, gíʼmaa rí musngúún bi̱ ndiʼkhún kúwá rajmañúún Biblia rí mugíʼ munimbánii rí nanigu̱u̱ʼ Dios. Rí maʼni a̱jma̱, xúgíinʼ a̱ngiu̱lú ma̱ndoo mumbañún bi̱ ndiʼkhún kúwá runigajmaa Biblia, mu muni itháán ñajuunʼ Dios. Rí maʼni ajtsú, ma̱ndoo mumbañún bi̱ niniña̱a̱ʼ ragún reunión mu mutaraʼa mbu̱júu̱.

3. Ndiéjunʼ dí phú nindoo Jesús rá.

³ Jesús niʼthí kaʼwu dí gíʼmaa muʼsngúún xa̱bu̱ dí ikhaa niʼtáñajunʼ. Mú, raʼkháa i̱ndó niʼthí: “Gusngúnla dí ikhúún nitañajuanlaʼ”. Dí phú niʼthí: “Gusngúnla munimbu̱u̱n xúgíʼ dí ikhúún nitañajuanla”. Á mu nandulú muʼnimbánii rígi̱, ndayóoʼ dí muʼsngáá bi̱ kúwáanʼ ruʼnigajma̱a̱ gajmiúlú dí gáʼni ma̱ngaa xóo gáʼni. Ndíjkha rá.

4. Arathá, xú káʼnii gándoo guʼsngáa imba̱a̱ mu maʼnimbo̱o̱ dí Cristo niʼtáñajunʼ rá.

⁴ Xú káʼnii gándoo guʼsngáa imba̱a̱ mu maʼnimbo̱o̱ dí Cristo niʼtáñajunʼ rá. Guʼyáá mbá xkri̱da. Índo̱ mbáa xa̱bu̱ naʼsngóo imba̱a̱ mu maʼgá kayóo moto gíʼma maʼthúu̱n dí rígá tikhu rí ndayóoʼ maʼnimbo̱o̱, xóo majmuu casco. Gajkhun rí ginii kayuuʼ naʼsngóo xóo gíʼmaa maʼni. Mu á mu nandoo dí bi̱ naʼsngóo maʼnimbo̱o̱, ndayóoʼ dí mambáyúu, mu xúʼko̱ xáʼga̱ kayóo moto xó má eyóoʼ ikhaa. Gíʼma maʼnimbo̱o̱ kaʼyoo dí rígá náa kamba̱a̱. Ndiéjunʼ dí eyulú muʼthá rá.

5. a) Xó má naʼthí náa Juan 14:15 ga̱jma̱a̱ 1 Juan 2:3, ndiéjunʼ dí gíʼmaa muʼsngáá bi̱ ruʼnigajmaa gajmiúlú Biblia rá. b) Arathá xú káʼni gándoo gúʼni.

⁵ Índo̱ nuʼsngáá mbáa xa̱bu̱ ga̱jma̱a̱ Biblia, nuʼsngáá ndiéjunʼ dí phú nandoo Dios muʼni. Mú raʼkháa i̱ndó rúʼko̱. Gíʼmaa dí muʼsngáá rí magíʼ maʼni dí xtáa rajmañuu (atraxnuu Juan 14:15; * 1 Juan 2:3). * Ga̱jma̱a̱ xkridulu, ma̱ndoo mbaʼyoo xú káʼni gagi maʼnimbánuu ikha dí xtáa rajmañuu náa Biblia xóo náa escuela, náa nañajunʼ o índo̱ maraʼwíí gitsíin. Ma̱ngaa ma̱ndoo muʼthán xú káʼnii ikha ndrígóo Biblia rí nimbáyulúʼ ikháanʼ o índo̱ niraʼwíí mbá rí muʼni. Ma̱ngaa índo̱ guʼtájkáan gajmiúlú ma̱ndoo munda̱ʼa̱ Jeobá rí maxnúu ikha ga̱jma̱a̱ xi̱ʼ kaʼwu ndrígóo (Juan 16:13).

6. Ndiéjunʼ i̱ʼwáʼ dí gíʼmaa muʼni, índo̱ guʼsngáá imba̱a̱ mu maʼnimbo̱o̱ dí niʼtáñajunʼ Jesús rá.

⁶ Ndiéjunʼ i̱ʼwáʼ dí gíʼmaa muʼni, índo̱ guʼsngáá imba̱a̱ mu maʼnimbo̱o̱ dí niʼtáñajunʼ Jesús rá. Ndayóo dí mumbáyii bi̱ nuʼsngáá dí ma̱ngaa maxkajxi̱i̱ maʼsngúún eʼwíinʼ dí xtáa rajmañuu. Tikhun índo̱ káaʼ nundxaʼwa̱mi̱jna̱ dí mutaraʼa, nagíʼdu̱u̱ má naguaʼin. Ikha jngó ndayóoʼ rí maʼngo̱o̱ a̱jkiu̱lú mu mumbañún mikru̱ʼu̱u̱n májánʼ texto ndrígóo Biblia mu xúʼko̱ maguaʼdáá mbá fe gujkhuʼ ga̱jma̱a̱ xúʼko̱ maxkajxi̱i̱n mutaraʼa. Ndiéjunʼ dí ma̱ndoo muʼni mu mumbáyii bi̱ nuʼsngáá rí maxkajxi̱i̱ maʼtáraʼa xá.

7. Xú káʼnii gándoo gumbáyii bi̱ nuʼsngáá mu maxkajxi̱i̱ maʼtáraʼa ma̱ngaa rá.

⁷ Mbáa ma̱ndoo muʼni̱i̱ graxe̱ xóo rígi̱: “Xú káʼnii nijkha rambáyaʼ ikháanʼ Biblia asndu nákha nitaraʼa̱ timbá miʼtsú xá. Lá naku̱ma̱a̱ʼ rí eʼwíinʼ mambáñún mangiin ráʼ. Xú káʼnii gándoo gátambáñun ikhiin xá.” (Prov. 3:27; Mat. 9:37, 38.) Gusgajmáá tratado dí rígá náa caja ndrígóo herramienta ga̱jma̱a̱ guʼtháán ndiéjunʼ rí gánigu̱u̱n mudxawíín bi̱ kaʼñún, mígiu̱u̱ o a̱ngui̱i̱n bi̱ náa nañajunʼ. Guxnáá dí ikhaa niraʼwíí ma̱ngaa guʼnigajma̱a̱ʼ gajmiúlú mu majmañuu maʼtáraʼa májánʼ. Gajkhun má índo̱ gánindxu̱u̱ publicador, makuwáanʼ má xúʼko̱ mu mumbáyii (Ecl. 4:9, 10; Luc. 6:40).

8. Ndíjkha rí gíʼdoo wéñuʼ numuu rí bi̱ nuʼsngáá maʼga̱nú maʼndoo kaʼyoo wéñuʼ Dios ga̱jma̱a̱ eʼwíinʼ xa̱bu̱ rá. (Atayáá ma̱ngaa kúgumaʼá “ Xóo gumbáyii bi̱ nuʼsngáa mu maʼndoo kaʼyoo itháan Dios rá”.)

⁸ Garmáʼáan a̱jkiu̱lú dí Jesús niʼthí dí muʼsngúún eʼwíinʼ xúgíʼ dí ikhaa niʼtáñajunʼ.  Rígi̱ nandoo gáʼthúu̱n dí maʼnimbo̱o̱ a̱jma̱ kiʼtáñajunʼ dí gíʼdoo wéñuʼ numuu, rí maʼndoo kaʼyoo Dios ga̱jma̱a̱ a̱ngui̱i̱n (Mat. 22:37-39). Á mu nuʼsngáá bi̱ nuʼnigajmaa gajmiúlú rí ndayóoʼ maʼnimbo̱o̱ kiʼtáñajunʼ rígi̱, kuwáanʼlu rumbáyii maʼtáraʼa. Gajkhun má rí tikhun namiñun índo̱ nundxa̱ʼwa̱míjna̱ rí ndayóo mutaraʼa, mú ma̱ndoo muʼthúún rí Jeobá má gambáñun mu xamiñún kuñún xa̱bu̱ (Sal. 18:1-3; Prov. 29:25). Náa artículo rígi̱, nákha mbá kúgumaʼá náa naʼthí ga̱jma̱a̱ numuu xú káʼnii gumbáyii bi̱ nuʼsngáá mu maʼndoo kaʼyoo Dios. Ma̱ngaa a̱ngiu̱lú ma̱ndoo mumbayíí ga̱jma̱a̱ rí maʼndún kuyáá. Guʼyáá xú káʼni.

9. Xú káʼnii ejmañuu mbáa xa̱bu̱ maʼga̱ kayóo moto rá.

⁹ Guʼtá mbu̱júu̱ ga̱jma̱a̱ numuu xa̱bu̱ bi̱ xtáa rajmañuu maʼga̱ kayóo moto. Índo̱ xtáa ra̱jkha̱ kayóo moto náa kamba̱a̱, raʼkháa i̱ndó najmañuu dí niʼthúu̱n maestriuu, ma̱ngaa rí ndaʼyoo dí nuni eʼwíinʼ bi̱ nagún kuñuu májánʼ moto. Mbá xkri̱da xóo índo̱ naguájun mu ma̱ndoo manújngún xa̱bu̱ o xujkhú. O mbáa nakruígúu̱ agiu̱u̱ motiu mu xambaʼtuu bi̱ na̱ʼkha̱ inuu. Xóo xkri̱da rígi̱, mbaʼa wéñuʼ rí gíʼdoo numuu ejmañuu.

10. Ndiéjunʼ gambáyuu bi̱ nuʼsngáa mu maʼni itháán ñajunʼ Dios rá.

¹⁰ Xúʼko̱ má kayuuʼ bi̱ ndiʼkhún xtaa raʼnigajma̱a̱ Biblia, raʼkháa i̱ndó najmañuu náa maestriuu bi̱ niʼsngóo, ma̱ngaa náa eʼwíinʼ xa̱bi̱i̱ Jeobá. Ikha jngó rí gíʼdoo wéñuʼ numuu maʼga̱ reunión mu xúʼko̱ maʼga̱ rajmañuu itháan ga̱jma̱a̱ numuu Dios. Rí gaʼdxawun ikhí maʼni rí majmañuu itháan, maʼni gujkhuʼ fe ndrígóo ma̱ngaa mambáyúu mu maʼndoo kaʼyoo itháan Dios (Hech. 15:30-32). Raʼkháa i̱ndó rúʼko̱, maestriu ma̱ndoo maʼthúu̱n dí maʼni ndxajkun gajmii eʼwíinʼ a̱ngiu̱lú bi̱ niguaʼnin ikháá má xóo xtáa ragíʼnuu ikhaa. Ndiéjunʼ rí ma̱ndoo mbaʼyoo bi̱ ndiʼkhún xtaa rajmañuu Biblia náa a̱ngiu̱lú rá. Guʼyáá tikhu.

11. a) A̱ngiu̱lú bi̱ kúwá náa congregación, káʼnii xkri̱da guaʼdáá xá. b) Xú káʼnii gándoo gambayuuʼ rúʼko̱ bi̱ nuʼsngáa rá.

¹¹ Mbáa a̱ʼgú mbáwíi bi̱ xtáa gajmíi̱n e̱ji̱i̱n bi̱ ndiʼkhún xtáa raʼnigajmaa Biblia, ndaʼyoo dí xúʼko̱ má kayuuʼ xtáa mbáa ndxájulú a̱ʼgu̱. Rúʼko̱ nixkajxi̱i̱ ma̱ngaa índo̱ ndaʼyoo dí ndxájulú naʼni tsiakimínáʼ mu ma̱ʼkha̱ gajmíi̱n e̱ji̱i̱n náa reunión. Imba̱a̱ xtáa raʼni tsiakimínáʼ mu maniñuuʼ ratsikhá ndíí, nanuwiin mbáa ndxájulú bi̱ nigíʼnuu xúʼko̱ ma̱ngaa. Ndxájulú naʼthúu̱n dí ikhaa niʼngo̱o̱ niniñuuʼ ga̱jma̱a̱ numuu rí nandoo kaʼyoo Jeobá ikha jngó nixkajxi̱i̱ maʼnimbo̱o̱ ikha dí na̱ʼkha̱ náa Biblia (2 Cor. 7:1; Filip. 4:13). Nda̱wa̱á índo̱ niguámbóo niʼthúu̱n xúgíʼ ga̱jma̱a̱ naʼthúu̱n dí ma̱ngaa maʼngo̱o̱ maniñuuʼ, ikhú ndayáa tsiakii. Ga̱jma̱a̱ imba̱a̱ dxáʼgú bi̱ ndiʼkhún xtáa raʼnigajmaa Biblia ndaʼyoo rí mbáa ndxájulú bi̱ tsiguuʼ xóo má ikhaa xtaa gagi wéñuʼ numuu rí nindxu̱u̱ xa̱bi̱i̱ Jeobá. Ga̱jma̱a̱ rúʼko̱ naxkajxi̱i̱ mbaʼyoo náa numuu rí ndxájulú xtaa gagi wéñuʼ.

12. Náá numuu nuʼthá rí xúgiáanʼ ma̱ndoo mumbáyii bi̱ ndiʼkhún xtáa raʼnigajmaa Biblia rá.

¹² Índo̱ bi̱ ndiʼkhún xtáa raʼnigajmaa Biblia, nanuwiin a̱ngiu̱lú bi̱ naguajún jmbu, ikhú na̱jkha̱nú nakro̱ʼo̱o̱ dí gíʼdoo numuu maʼnimbo̱o̱ dí niʼtáñajunʼ Cristo dí maʼndaaʼ xtayáá Dios ga̱jma̱a̱ a̱ngia̱a̱nʼ (Juan 13:35; 1 Tim. 4:12). Xó má niʼthá nákha ginii, xkri̱da ndrígu̱ún a̱ngiu̱lú ma̱ndoo mambáyúu, índo̱ ndaʼyoo dí xúʼko̱ bi̱ kúwi̱i̱n ragíʼnun mangiin xóo má xtáa ikhaa. Ga̱jma̱a̱ xúʼko̱ na̱jkha̱nú ndaʼyoo dí ma̱ngaa maʼngo̱o̱ mariʼkuminaʼ mu mani̱ndxu̱u̱ xa̱bi̱i̱ Cristo (Deut. 30:11).  Xó má eʼyáá dí xúgiáanʼ ma̱ndoo mumbáyii bi̱ ndiʼkhún xtáa raʼnigajmaa Biblia mu maʼni itháan ñajunʼ Dios (Mat. 5:16). Ikha jngó mambáa gíʼmaa marajximínaʼ: “Ndiéjunʼ xtáá rani̱ ikhúún mu maxnu̱u̱n tsiakii bi̱ ndiʼkhún eguwáʼ reunión rá.”

13, 14. Xú káʼnii niʼniún Jesús xa̱bi̱i̱ índo̱ kúwi̱i̱n ngíná rá.

¹³ Nandulú rí mumbáñuun bi̱ niniña̱a̱ʼ nagún reunión mu matangi̱i̱n mutaraʼa mbu̱júu̱ xó má niʼtáñajunʼ Cristo. Mu mbuʼyáá xú káʼnii guʼni, garmáʼáan a̱jkiu̱lú xóo niʼniún xa̱bi̱i̱ Jesús índo̱ kúwi̱i̱n ngíná.

¹⁴ Nánguá má mbayuuʼ mbiʼi tígo̱o̱ dí muxiyáa Jesús ga̱jma̱a̱ mambóo ñajunʼ ndrígóo náa tsu̱du̱u̱ ku̱ba̱ʼ, xa̱bi̱i̱ niniña̱a̱ʼ ga̱jma̱a̱ nigáñun (Mar. 14:50; Juan 16:32). Xú káʼnii niʼniún Jesús mbiʼi rúʼko̱ índo̱ nijmún xá. Guʼyáá xóo niʼthúún índo̱ ikhaa ni̱ga̱bi̱i̱. Nikunguinʼ discípulas ndrígóo mu muthún eʼwíinʼ xa̱bi̱i̱ dí ikhaa ni̱ga̱bi̱i̱. Niʼthúún: “Xámiñalaʼ. Gaʼguaaʼ, gu̱thu̱u̱n a̱ngui̱nʼ” (Mat. 28:10a). Maski ajndu ikhiin niniña̱a̱ʼ, mú gi̱i̱ nduʼyáá dí ikhaa na̱nguá niʼniún xúʼko̱, niʼthún má xúʼko̱ dí ni̱ndxu̱ún “a̱ngui̱i̱n”. Jesús ndiʼyáridoo Jeobá dí ikhaa nagáwiinʼ a̱jkiu̱u̱n ga̱jma̱a̱ rí xtáa xawii maʼni mba̱a̱ a̱jkiu̱u̱n (2 Rey. 13:23).

15. Xú káʼnii ekumulúʼ kuʼñúún tikhun bi̱ nuniña̱a̱ʼ rutaraʼa rá.

¹⁵ Naxmiéjunlú kuʼñúún bi̱ niniña̱a̱ʼ rutaraʼa. Numuu rí xóó ni̱ndxu̱ún a̱ngiu̱lú ga̱jma̱a̱ rí nandulú kuʼñúún. Ga̱jma̱a̱ tsimbumulúʼ rí mangiin nini tsiakimijna muni ñajuunʼ Jeobá, mbáa asndu mbayuuʼ tsiguʼ (Heb. 6:10). Ikha jngó nduʼñíinʼlú (Luc. 15:4-7). Xú káʼnii gándoo guʼyaridáá Jesús, mu musngajmá rí naxmiéjunlú kuʼñúún xá.

16. Ndiéjunʼ dí ma̱ndoo muʼthúún bi̱ niniña̱a̱ʼ nagún reunión rá.

¹⁶ Muʼthúún ga̱jma̱a̱ májánʼ rí maguwaʼ reunión. Rúʼko̱ dí niʼni Jesús gajmiin xa̱bi̱i̱ índo̱ ndiʼyoo dí kúwá ngíná niʼthún rí muwíín (Mat. 28:10b; 1 Cor. 15:6). Ikháanʼlu ma̱ngaa ma̱ndoo muʼthúún bi̱ niniña̱a̱ʼ ragún reunión mu magún mbu̱júu̱. Gajkhun má, mbaʼyoo muʼthúún mbaʼa nuthu, asndu índo̱ ikhiin gaʼndún magún mbu̱júu̱ reunión. Índo̱ Jesús ndiʼyoo dí xa̱bi̱i̱ nindrigú ga̱jma̱a̱ gamajkhu dí muwíín, ra̱ʼkhá tháán nidxuu. Á mu nuʼni xúʼko̱ mangáanʼ, maʼdxulu xó má nidxuu ikhaa (Mat. 28:16; atayáá ma̱ngaa Lucas 15:6).

17. Ndiéjunʼ gíʼmaa muʼni á mu bi̱ niniñuuʼ ra̱ʼkha̱ reunión najkha̱a̱ mbu̱júu̱ rá.

¹⁷ Guyaráʼalu. Índo̱ Jesús ndiʼñíinʼ xa̱bi̱i̱, nijkha kanuu ga̱jma̱a̱ niʼtámíjná gajmíi̱n mu maʼdxúún (Mat. 28:18). Ndiéjunʼ guʼni ikháanʼ índo̱ guʼyáá na̱ʼkha̱a̱ reunión bi̱ niniñuuʼ ra̱jkha̱ rá. Guʼgua̱ kanuu, guʼtháán rí májánʼ niʼni dí ni̱ʼkha̱ ga̱jma̱a̱ guyaráʼalú. Mbáa índo̱ guʼyálú xúʼyáá xóo muʼthán, mú tséyóoʼ má wéñuʼ, gútháán rí nadxulú dí na̱ʼkha̱a̱ mbu̱júu̱ ga̱jma̱a̱ xúʼni majti̱i̱.

18. Xú káʼnii gándoo guʼxnúún tsiakii ga̱jma̱a̱ rí makumulúʼ kuʼñúún bi̱ niniña̱a̱ reunión rá.

¹⁸ Guʼxnúún tsiakii ga̱jma̱a̱ rí makumulúʼ kuʼñúún. Índo̱ xa̱bi̱i̱ Jesús nidxawíín rí ndayóo mutaruʼúún xúgíinʼ xa̱bu̱, mbáa nimiñuu. Mú Jesús niʼnii a̱jkiu̱ún índo̱ niʼthúún: “Maxtáá ga̱jma̱á nindxa̱la xúgíʼ mbiʼi” (Mat. 28:20). Dí niʼthúún nixnúún tsiakii numuu rí na̱nguá má nijngoo mbayuuʼ ikhiin nigi̱ʼdi̱i̱ ‹nisngáa ga̱jma̱a̱ nitaraʼa ajngáa rí májánʼ› xúgíʼ mbiʼi (Hech. 5:42). A̱ngiu̱lú bi̱ niniña̱a̱ʼ ragún reunión ndañún tsiakii ga̱jma̱a̱ rí makumulúʼ kuʼñúún. Mbáa mamiñún índo̱ gundxaʼwamíjna̱ rí mutaraʼa mbu̱júu̱. Mú, ma̱ndoo muʼni a̱jkiu̱ún ga̱jma̱a̱ guʼthúún  rí xútaraʼa ndajkuíin guʼthúún rí mu̱ʼgua̱ gajmiúlú índo̱ gágajnún mutaraʼa. Mbáa muxna̱ʼlú wéñuʼ núma̱aʼ ga̱jma̱a̱ numuu rí mumbañún. Á mu nduʼñún ga̱jma̱a̱ nuʼniu̱u̱n xó má eʼwíinʼ a̱ngiu̱lú, ikhú xúgíinʼ a̱ngiu̱lú maʼdxúún numuu rí natanga̱a̱ mbu̱júu̱.

19. Ndiéjunʼ rí phú nandulúʼ ga̱jma̱a̱ náá numuu rá.

¹⁹ Asndu índo̱ gámbáa xúgíʼ dí tséjmaa dí rígá náa numbaaʼ, ikhú muniʼñáaʼ ruʼsngáa (Mat. 28:20; atayáá glosario, “mambáa rí xtáa rarígá náa numbaaʼ”). Lá maʼngulú muʼnimbánii ñajunʼ dí nixnulu Jesús rá. ¡Kuwáanʼlúʼ xawii mu muʼni! Asndu gagi najmulú mbiʼi ndrígúlú, mbújkhu̱lú ga̱jma̱a̱ tsiakii ndrígúlú mu mbuʼñíinʼ xa̱bu̱ bi̱ ‹nandún makuwá kámuu› (Hech. 13:48). Ga̱jma̱a̱ xúʼko̱ nduʼyaridáá xkridoo Jesús índo̱ niʼthí: “Ganitsu ndrígóʼ nindxu̱u̱ rí mani rí nandoo bi̱ nikungunʼ ga̱jma̱a̱ rí mani gáxu̱u̱ ñajunʼ ndrígóo” (Juan 4:34; 17:4). Rí phú nandulú nindxu̱u̱ dí muʼni gájxi̱i̱ ñajunʼ dí nikhánulú (Juan 20:21). Nandulú rí xúgíinʼ a̱ngiu̱lú asndu bi̱ niniña̱a̱ʼ ragún reunión, muñajunʼ má xúʼko̱ ga̱jma̱á ni̱ndxu̱lú asndu índo̱ gámbáa dí tséjmaa dí rígáa náa numbaaʼ (Mat. 24:13).

20. Xó má naʼthí náa Filipenses 4:13, ndíjkha rí mangulú muʼni gájxi̱i̱ ñajunʼ dí niʼtuluʼ Jesús rá.

²⁰ Gajkhun má, ñajunʼ dí nixnúlú Jesús muʼni nindxu̱u̱ gakhii. Mú na̱nguá kuwaanʼ ndajkuáanʼ, ikhaa niʼthí dí maxtáa mu mambáyulú. Nuʼnimbulú kiʼtáñajunʼ rígi̱, índo̱ nuʼsngúún xa̱bu̱ ga̱jma̱a̱ xúʼko̱ ni̱ndxu̱lú xó mbáa bi̱ “nambáyúu Dios” ma̱ngaa ‹Cristo xtáa ga̱jma̱á nindxu̱lú› (1 Cor. 3:9; 2 Cor. 2:17). Ikha jngó maʼngulú muʼni gájxi̱i̱ ñajunʼ dí nikhánulú. Nindxu̱u̱ mbá ñajunʼ mitsaanʼ wéñuʼ rí kuaʼdáálu mu muʼnimbánii ga̱jma̱a̱ rí mumbañún eʼwíinʼ muni xúʼko̱ mangiin (atraxnuu Filipenses 4:13). *