1, 2. a) Náá numuu rí bi̱ ndiʼkhu̱ún nidamijná gíʼmaa makumu̱ún kuyáá Jeobá rá. (Salmo 37:3, 4.) b) Ndiéjunʼ gúʼyáá náa artículo rígi̱ rá.

LÁ NACHALA mudamijnála ráʼ. O ndiʼkhu̱ún nidamijnála cheʼ. Á mu xúʼko̱, mbáa gajkhun rí nandala makuwáanʼla gagi gajmiála xa̱bu̱ bi̱ nandala kuya̱a̱ wéñuʼ. Gajkhun má, náa bi̱ nidamijná marigá wéñuʼ xkujndu ga̱jma̱a̱ mbaʼa rí mbaʼyóoʼ muraʼwíí rí muni̱. Dí gúraʼwíí munila rúʼko̱ gámbáyala mu makuwáanʼ tsímáá. Á mu nakumala kuya̱a̱ Jeobá, rúʼko̱ gámbáyala mu muraʼwi̱i̱ májánʼ rí munila, xóo rí mambajxála májánʼ ga̱jma̱a̱ makuwáanʼla gagi. Á mu tsénimbala ikha ndrígóo Jeobá, rúʼko̱ gáʼni dí muguaʼdáála xkujndu ga̱jma̱a̱ xákúwáanʼla tsímaáá (atraxnuu Salmo 37:3, 4). *

² Maski ajndu artículo rígi̱ na̱jkha̱ inún bi̱ ndiʼkhu̱ún nidamijná, mú ma̱ngaa majuiʼthá ga̱jma̱a̱ numuu xkujndu rí ma̱ndoo muraʼníí xa̱bu̱ gajmii. Ma̱ngaa mbuʼyáá xkri̱da ndrígu̱ún xa̱bekha ga̱jma̱a̱ gu̱ʼu̱ bi̱ niguájun jmbu bi̱ na̱ʼkha̱ raʼthí náa Biblia rí ma̱ndoo maʼsngúlú xú káʼnii gákuwáanʼ ga̱jma̱a̱ náa xa̱bu̱ gajmii. Ma̱ngaa mbuʼyáá ndiéjunʼ gándoo gájmañulú náa xa̱bu̱ gajmii bi̱ kúwá dí mbiʼi xúgi̱.

3, 4. Ndiéjunʼ xkujndu gándoo muraʼníí bi̱ ndiʼkhu̱ún nidamijná rá.

³ Náa tikhu xuajin kúwíin tikhun xa̱bu̱ bi̱ nuthúún bi̱ ndiʼkhu̱ún nudamijná rí gíʼmaa makuwíin xó má naguʼwún kúwá xa̱bu̱ bi̱ kúwi̱i̱n ikhí. Mbá xkri̱da, anu̱ún o bi̱ kuñúún nutsudiin mu muguaʼdiin nacha̱ e̱ji̱n. Tikhun bi̱ nambájxu̱u̱n gajmiún nuthúún rí májánʼ gáʼni rí mutsi̱ mbá guʼwún ga̱jma̱a̱ i̱ʼwáʼ rí ma̱ndoo muguaʼdáá.

⁴ Á mu nunimbu̱ún xa̱bu̱ gajmii rí nuthúún, rúʼko̱ gáʼni rí magiʼmii gidxóó, mu muni̱i̱ gidxóó mbáa mbá nájmi̱i̱n gáʼyooʼ muñajunʼ wéñuʼ. Ikhaa rúʼko̱ gáʼni mu xúguaʼdáá mbiʼi mu munigajmaa ndajkuíin, xóo munigajmaa mbá guʼwíin ga̱jma̱a̱ rí magajnún gútaraʼa. Mbáa nguáná mandátigu̱u̱n reunión ga̱jma̱a̱ numuu rí mbuyáʼ itháan mbújkha̱a̱ o nuni̱ ga̱jma̱a̱ numuu rí xándátigu̱u̱n ñajunʼ rí guáʼdáá. Mbáa rúʼko̱ gáʼni rí xándoo muni̱ itháan ñajuunʼ Jeobá.

5. Ndiéjunʼ ejmañaaʼ náa xkridoo Klaus ga̱jma̱a̱ Marisa rá.

⁵ Rígá mbaʼa xkri̱da náa naʼthí rí mbuʼyáʼ dí rígá náa numbaaʼ naʼni rí xákuwáanʼ tsímáá. Rúʼko̱ rí ndiʼyoo Klaus ga̱jma̱a̱ Marisa. * Índo̱ ikhiin nidamijná nájmi̱i̱n ikhiin ndiyóoʼ muñajunʼ mu muguaʼdáá rí makuwá ga̱jma̱a̱, mú na̱nguá kúwá gagi. Klaus naʼthí: “kuáʼdááxu̱ má xúgíʼ dí makuwáanxu ga̱jma̱a̱, mú na̱nguá kuaʼdááxu awan dí munixu̱ itháan ñajuunʼ Jeobá. Maski ajndu kuaʼdááxu mú rúʼko̱ na̱nguá eʼni makuwáanʼxu gagi”. Mbáa asndu mangáán natayáá rí mataʼyáʼ maraʼdáá wéñuʼ dí rígá náa numbaaʼ rígi̱, tséʼni dí maraxtaa gagi. Xákanájkháaʼ, ma̱ndoo mambáyaaʼ xkri̱dúún eʼwíinʼ. Timbá, guʼyáá ndiéjunʼ gándoo gájmañún xa̱bekha ga̱jma̱a̱ numuu rey Jehosafat.

6. Xó má eʼthí náa Proverbios 3:5, 6, xú káʼnii niʼngo̱o̱ niraʼnuu xkujndu rígi̱ Jehosafat rá.

⁶ Xa̱bekha, lá naʼni néʼnga̱la ñajunʼ rí kuaʼdáála ráʼ. Á mu xúʼko̱, xkri̱da ndrígóo Jehosafat ma̱ndoo mambáyala. Numuu dí ikhaa ninindxu̱u̱ rey, ikhaa kajkuáa ñawúunʼ dí mañewu̱u̱n xúgíinʼ xa̱bu̱ xuajin. Mu maʼnimbánúu ñajunʼ rí kajkuáa ñawúunʼ, niʼni asndu xkáʼníí mu mañewu̱u̱n xa̱bu̱ xuajin. Niʼni xtájtsí náa xuajin Judá ga̱jma̱a̱ nigímbíi mbaʼin soldados itháan rí 1,160,000 (2 Crón. 17:12-19). Mú nda̱wa̱á niraʼníí mbá xkujndu, ikhaa gajmíi̱n bi̱ kúwá náa goʼwóo mangiin xa̱bu̱ xuajin, numuu rí niguwáʼ xa̱bu̱ bi̱ kúwá náa Ammón, Moab ga̱jma̱a̱ bi̱ kúwá náa kúbá Seír mu muradíin (2 Crón. 20:1, 2). Ndiéjunʼ niʼni Jehosafat rá. Ikhaa nindo̱ʼo̱o̱ Jeobá rí mambáyúu ga̱jma̱a̱ rí maxnúu tsiakii, ikhaa niʼnimbánúu consejo rí na̱ʼkha̱ náa  Proverbios 3:5, 6 (atraxnuu). * Rí ikhaa niʼtájkháan na̱ʼkha̱ náa 2 Crónicas 20:5-12, ikhí nasngájma dí ra̱ʼkhá tháán nikumu̱u̱ kaʼyoo Anu̱u̱ bi̱ xtáa mekhuíí. Xkáʼnii niriʼñuu Jeobá xá.

7. Xú káʼnii niriʼña̱a̱ Jeobá rí niʼtájkháan Jehosafat rá.

⁷ Jeobá nijmiuu Jahaziel mu mariʼñuu Jehosafat. Niʼthúu̱n: “Guguajún náa kaʼyala, guguajún wíí ga̱jma̱a̱ gu̱ya̱a̱ xú káʼnii Jeobá gáʼni káwáanʼ” (2 Crón. 20:13-17). ¡Ra̱ʼkhá tháán májánʼ awan nigájnúu náa muxmijná! Ikha rígi̱ ni̱ʼkha̱ náa Jeobá raʼkháa náa xa̱bu̱ numbaaʼ. Á mu naku̱mu̱ún kuyáá kájxi̱ Dios ndrígu̱ún, Jehosafat niʼnimbo̱o̱ numuu rí nikumu̱u̱ kaʼyoo Dios. Índo̱ Jehosafat gajmíi̱n xa̱bu̱ xuajin nigún gúraʼnumijná gajmiún xa̱bu̱ sia̱nʼ ndrígu̱ún, ikhaa nitsuajuun ginuu bi̱ nagún runi̱ ajmúú, Jeobá niʼnigámbíin xa̱bu̱ sia̱nʼ ndrígóo Jehosafat xó má niʼthúu̱n (2 Crón. 20:18-23).

8. Ndiéjunʼ gándoo gájmañún xa̱bekha náa xkridoo Jehosafat rá.

⁸ Ikháanʼla xa̱bekha, ndiéjunʼ gándoo gájmañala náa xkridoo Jehosafat rá. Ikháanʼla kaʼyala muxnu̱u̱n rí ndañúunʼ bi̱ kúwá náa guʼwála. Ikha jngóo gu̱ni̱ tsiakimijnala rí mumbáñún ga̱jma̱a̱ guñewu̱u̱n. Índo̱ gúraʼnííla xkujndu, xúnimbánííla ndajkuáanʼ, gunda̱ʼa̱a̱ Jeobá rí mambáyala. Gutakáñíi Jeobá ga̱jma̱a̱ xúgíʼ a̱jkia̱la, gutajkháan gajmiála guʼyala ma̱ngaa. Gunigajmaa Ajngá rawuunʼ Jeobá mu muxkamaa ikha ma̱ngaa gajmala xúgíʼ i̱yi̱i̱ʼ rí naguwíi náa xuajñuu. Ma̱ngaa guʼgíʼ munimbáníi rí ejmañala. Makuwíin tikhun xa̱bu̱ bi̱ xánigu̱u̱nʼ rí muʼnimbulú dí naʼthí náa Biblia, índo̱ ikháánʼlú gúraʼwíi mbá rí mu̱ʼni̱ mbáa asndu muthulú rí ni̱ndxu̱lú skagu̱nʼ. Mbáa eʼwíinʼ ma̱ndoo muthulú rí itháan májánʼ rí mbuʼyáʼ mbújkha̱a̱, mu xúʼko̱ muñewu̱u̱n bi̱ kúwá náa guʼwúlú ga̱jma̱a̱ i̱ʼwáʼ dí rígá náa numbaaʼ. Garmáʼáan a̱jkia̱la xkridoo Jehosafat, ikhaa nikumu̱u̱ kaʼyoo Jeobá ga̱jma̱a̱ nisngájma rí xóo niʼni. Jeobá na̱nguá niniñuuʼ Jehosafat ga̱jma̱a̱ ikháán mangáán xániñaaʼ (Sal. 37:28; Heb. 13:5). Ndiéjunʼ gándoo gúni̱ xa̱bu̱ gajmii mu makuwá tsímáá rá.

9. Ndiéjunʼ gándoo gúʼthá ga̱jma̱a̱ numuu profeta Isaías ga̱jma̱a̱ a̱ʼgiu̱u̱ rá.

⁹ Isaías ga̱jma̱a̱ a̱ʼgiu̱u̱ nigíʼ ginii muni̱ ñajuunʼ Jeobá. Ikhaa ninindxu̱u̱ profeta ga̱jma̱a̱ a̱ʼgiu̱u̱ nigiʼdoo ikháá má ñajunʼ rúʼko̱, náa Biblia naxnámbiʼyuu “profetisa” (Is. 8:1-4). Xa̱bu̱ gajmii bugi̱ ndiyáá rí itháan gíʼdoo numuu mbuyamajkuíí Jeobá. Xkridoo Isaías ga̱jma̱a̱ a̱ʼgiu̱u̱ nindxu̱ún mbá májánʼ xkri̱da rí ma̱ndoo mbuyaridáá xa̱bu̱ gajmii rí mbiʼi xúgi̱.

10. Náá numuu rí xa̱bu̱ gajmii gíʼmaa munigajmaa profecías rí na̱ʼkha̱ raʼthí náa Biblia mu xúʼko̱ muni̱ itháan ñajuunʼ Jeobá xá.

¹⁰ Xú káʼnii gándoo xa̱bu̱ gajmii mbuyaridáá xkridoo Isaías ga̱jma̱a̱ a̱ʼgiu̱u̱ rá. Rí mugíʼ ginii rí muni̱ ñajuunʼ Jeobá. Mu maʼni gújkhúʼ fe ndrígu̱ún náa Dios ma̱ndoo munigajmaa mbóó ga̱jma̱a̱ numuu profecías rí na̱ʼkha̱ raʼthí náa Biblia ga̱jma̱a̱ mbuyáá xú káʼnii ejkha̱ rambánúu (Tito 1:2). *  Ma̱ndoo mundxaʼwamíjna̱ xú káʼnii gándoo muyambáá mu mambanúu profecía rí niʼtáriyaʼ Jesús, rí najuiʼtáraʼa ajngáa rí májánʼ náa xúgíʼ tsu̱du̱u̱ Ku̱ba̱ʼ nákhá xóó tséʼkha̱ fin (Mat. 24:14). Índo̱ xa̱bu̱ gajmii nduyáá rí gajkhun nambánúu profecías rí na̱ʼkha̱ raʼthí náa Biblia, rúʼko̱ gáxkajxi̱i̱n rí muni̱ itháan ñajuunʼ Jeobá.

11. Ndiéjunʼ nindoo niʼni Priscila ga̱jma̱a̱ Áquila maski ajndu nixtiʼkhuu xóo nikúwá xá.

¹¹ Xa̱bu̱ gajmii bi̱ ndiʼkhu̱ún nidamijná ma̱ndoo mambáñún xkri̱da ndrígóo Priscila ga̱jma̱a̱ Áquila, xa̱bu̱ gajmii bugi̱ nindxu̱ún judíos, mú nákhá ginii nikúwá náa Roma. Índo̱ nidxawíín ajngáa rí májánʼ ga̱jma̱a̱ numuu Jesús, ikhú ikhiin nigi̱ʼdi̱i̱ ninindxu̱ún cristiano. Mbáa ikhiin nikúwá tsímáá ikhí, numuu rí nimbá nda̱a̱ rí ndiñúunʼ, mú tájyuuʼ nixtiʼkhuu xúgíʼ índo̱ xa̱bu̱ ñajunʼ Claudio niʼthí rí xúgíinʼ judíos magajna̱án náa Roma. Ikhiin niniña̱a̱nʼ guʼwún mu magún gúyáʼ i̱mba̱ níʼkhá náa makuwá ga̱jma̱a̱ mbuyaʼ náa mugíʼ mugujua̱ guʼwá xtíin rí ikhiin nuni̱. Lá niniña̱a̱nʼ runi̱ ñajuunʼ Jeobá numuu dí nixtiʼkhuu xóo nikúwá xáʼ. Na̱nguá, numuu rí índo̱ nikúwá náa Corinto, Priscila ga̱jma̱a̱ Áquila nimbayíí Pablo mu muxnún tsiakii a̱ngiu̱lú, nda̱wa̱á nigún náa i̱ʼwáʼ xuajin náa ndayóoʼ miʼtáraʼa (Hech. 18:18-21; Rom. 16:3-5). ¡Ra̱ʼkhá tháán niguáʼdáá rí muni̱ ga̱jma̱a̱ nikúwíi̱n gagi!

12. Náá numuu rí gíʼmaa muraʼwi̱i̱ muni̱ ñajuunʼ Dios bi̱ nidamijná rá.

¹² Xa̱bu̱ gajmii bi̱ kúwá rí mbiʼi xúgi̱ ma̱ndoo mbuyaridáá xkridoo Priscila ga̱jma̱a̱ Áquila rí mugíʼ ginii muni̱ ñajunʼ Reino. Awan rígi̱ ma̱ndoo mutamijná índo̱ nindxu̱ún novio. Índo̱ xa̱bu̱ gajmii nuraʼwi̱i̱ ginii rí muni̱ ñajuunʼ Jeobá ga̱jma̱a̱ nunimi̱jna̱ muxkamaa ikhú nduyáá xú káʼnii Jeobá nambáñún (Ecl. 4:9, 12). Guʼyáá ga̱jma̱a̱ numuu Russell ga̱jma̱a̱ Elizabeth. Russell naʼthí: “Índo̱ nindxu̱xu̱ novio, nitamíjnájxu̱ náá guáʼyaa meta kuaʼdááxu̱”. Elizabeth naʼthí: “Nitamíjnaxu̱ ga̱jma̱a̱ numuu rígi̱,  mu xúʼko̱ índo̱ gúraʼwíí mbá rí munixu̱ nimbá nda̱a̱ dí gárikhuxu̱”. Rí xóo nikúwíi̱n nimbáñún mu xáʼñún mingíjyúuʼ mu magún náa Micronesia náa ndayóoʼ miʼtáraʼa itháan.

13. Xó má naʼthí náa Salmo 28:7, xú káʼnii gákúwíi̱n xa̱bu̱ gajmii á mu nakumu̱ún kuyáá Jeobá rá.

¹³ Xó má Russell ga̱jma̱a̱ Elizabeth, mbaʼin xa̱bu̱ gajmii niraʼwíí dí xúguaʼdáá wéñuʼ mu xúʼko̱ muguaʼdáá itháa mbiʼi mu mutaraʼa ga̱jma̱a̱ musngáa. Á mu xa̱bu̱ gajmii nugíʼ meta rí muni̱ ñajuunʼ Jeobá ga̱jma̱a̱ xúgíʼ a̱jkiu̱ún ma̱ngaa nuni tsiakimijna̱ munimbaníí Jeobá má gáʼni tsajkurámiiʼ wéñuuʼ. Índo̱ gúyáá rí Jeobá nañewu̱u̱n rúʼko̱ gáʼni rí makumu̱ún kuyáá itháan ga̱jma̱a̱ makuwá gagi (atraxnuu Salmo 28:7). *

14. Xó má eʼthí Mateo 6:25, 31-34, xú káʼnii nisngájma Pedro ga̱jma̱a̱ a̱ʼgiu̱u̱ rí nikumu̱ún rí gajkhun ajngáa rígi̱ rá.

¹⁴ Imbo̱o̱ʼ xkri̱da rí ma̱ndoo mbuyaridáá xa̱bu̱ gajmíi̱n, ikhaa nindxu̱u̱ ndrígóo apóstol Pedro ga̱jma̱a̱ a̱ʼgiu̱u̱. Majun igu̱nʼ nda̱wa̱á rí nininiiʼ Jesús, ikhaa ndiyóoʼ rí maraʼwíí rí gíʼdoo wéñuʼ numuu maʼni, índo̱ Jesús niʼthúu̱n Pedro rí maʼga ga̱jma̱a̱ gáʼtáraʼa, ikhaa ndiyóoʼ mbaʼyoo xú káʼnii gámbáñún bi̱ kúwá náa goʼwóo, numuu rí nindxu̱u̱ mbáa xa̱bu̱ bi̱ naguwíin egiʼ (Luc. 5:1-11). ¡Raʼkháa tháán májánʼ rí niraʼwíí maʼni! Numuu rí ni̱jkha̱ ga̱jma̱a̱ Jesús gáʼtáraʼa. Nduʼyáá gajkhun rí a̱ʼgiu̱u̱ nimbáyúu mu maʼnimbánúu, numuu rí náa Biblia naʼthí rí nda̱wa̱á rí Jesús nitujxi̱i̱ ni̱jkha̱ ga̱jma̱a̱ Pedro nguáthá aʼphu̱ wáa (1 Cor. 9:5). Dí májánʼ xkri̱da nigíʼ a̱ʼgiu̱u̱ apóstol Pedro nimbáyúu mu xúʼko̱ maxnún consejo xa̱bu̱ gajmii (1 Ped. 3:1-7). Nakujmaa kaʼwu rí Pedro ga̱jma̱a̱ a̱ʼgiu̱u̱ nikumu̱ún kuyáá Jeobá rí ikhaa má gáxnún rí gáʼñúunʼ á mu nugíʼ nuni̱ ginii ñajuunʼ ikhaa (atraxnuu Mateo 6:25, * 31-34). *

15. Ndiéjunʼ eʼsngáaʼ ikháán rí niʼni Tiago ga̱jma̱a̱ Esther rá.

¹⁵ Á mu ikháanʼla mba̱yu̱u̱ʼ má tsiguʼ rí nidamijnála, xú káʼnii gándoo gúni̱ mu muni̱ itháan ñajunʼ Jeobá rá. Mbá rí ma̱ndoo muni̱ rí mbuyaridáá ndiéjunʼ nini̱ eʼwíinʼ xa̱bu̱ gajmii. Mbá xkri̱da, ma̱ndoo rí muraxnuu serie ndrígóo artículo náa naʼthí: “Nixnajxi̱mijna̱ ga̱jma̱a̱ xúgíʼ a̱jkiu̱ún mu mutaraʼa”. Rúʼko̱ niʼni Tiago ga̱jma̱a̱ Esther, xa̱bu̱ gajmíi̱n bi̱ kúwá náa Brasil. Índo̱ niraxnuu artículo rígi̱ nimbáñún mu mandún magún gúyambáá náa ndayóoʼ miʼtáraʼa itháan. Tiago naʼthí: “Dí muráxnujxu̱ náa naʼthí xú káʼnii Jeobá niñewu̱u̱n xa̱bi̱i̱ rí mbiʼi xúgi̱, rúʼko̱ nixkajxáanʼxu̱ mu mbuya̱a̱xu̱ xú káʼnii Jeobá gáxnujxu̱ ikha ga̱jma̱a̱ mañewu̱nxu”. A̱ngiu̱lú bugi̱ nigún gákúwíi̱n náa Paraguay mu muyambáá náa ajngáa portugués asndu nákhá tsiguʼ 2014. Esther naʼthí: “Mbá texto rí naniguxu̱ mbá nájmanʼ  nindxu̱u̱ Efesios 3:20. Índo̱ kúwáanʼxu ru̱ni̱ ñajuunʼ Jeobá, nduya̱a̱xu̱ xú káʼnii embánúu ajngáa rúʼko̱ mbaʼa nuthu”. I̱yi̱i̱ʼ rí niʼnirámáʼ Pablo mu maʼga náa inún a̱ngiu̱lú bi̱ nikúwíin náa Éfeso gajkhun nambánuu ajngáa rígi̱, ikhí naʼthí rí Jeobá maxnúlú itháan ki xóo rí nunda̱ʼa̱lú.

16. Tsíín gándoo gúmbañún a̱ngiu̱lú bi̱ ndiʼkhu̱ún nidamijná mu muraʼwi̱i̱ mbá rí muni̱ rá.

¹⁶ Xa̱bu̱ bi̱ ndiʼkhu̱ún nidamijná, ma̱ndoo mambáyala xkri̱da ndrígu̱ún a̱ngiu̱lú bi̱ nikumu̱ún kuyáá Jeobá ma̱ngaa a̱ngiu̱lú bi̱ kúwá runi kájxi̱ ñajuunʼ Jeobá mba̱yu̱u̱ʼ tsiguʼ, gundu̱ʼu̱u̱nla consejo á mu kuwáanʼla muraʼwíí mbá rí munila, xúʼko̱ gúsngajmá rí nakumala ku̱ya̱a̱ Jeobá (Prov. 22:17, 19). A̱ngiu̱lú bi̱ kuya̱ edxu̱u̱ ma̱ndoo mumbayala muraʼwi̱i̱ mu munila itháan ñajuunʼ Jeobá ga̱jma̱a̱ munimbáníí.

17. Ndiéjunʼ nigíʼnuu Klaus ga̱jma̱a̱ Marisa, ga̱jma̱a̱ ndiéjunʼ gándoo gájmañulú náa xkri̱da ndrígu̱ún xá.

¹⁷ Nguáná rí nuraʼwíí rí muʼnilú, tségajnuu xóo ikháánʼ eyulú. Xó má ndiʼyáálú xkri̱da ndrígóo Klaus ga̱jma̱a̱ Marisa, bi̱ niʼthá nákhá ginii, ajtsú tsiguʼ ndáwa̱á rí nidamijná, niniña̱a̱nʼ guʼwún mu magún gúyambáá náa naguma sucursal náa Finlandia. Mú nithúún rí xándoo maguanún itháan rí majun igu̱nʼ mu muni̱ ñajunʼ rúʼko̱. Rúʼko̱ niʼni rí makuwá ngíná, mú nda̱wa̱á nijuiʼthúún magún náa majuiʼsngúún ajngáa árabe, rí xúgi̱ kúwíi̱n gagi ruyambáá náa imbo̱o̱ʼ país náa nuthi ajngáa rúʼko̱. Marisa naʼthí: “Nguáná namíñaanʼ matagajnáaʼ náa xuajñaanʼ ga̱jma̱a̱ rí makuma̱a̱nʼ xtayáá i̱ndó Jeobá. Mú nijkhánú ndi̱yo̱o̱ rí ikhaa nimbáyuxu̱ má xúʼko̱. Ga̱jma̱a̱ xóo nikúwáanʼxu rúʼko̱ niʼni rí makumuxu ku̱ya̱a̱ itháan Jeobá”. Gi̱i̱ ejmañulú dí á mu nakumulu kuʼyáá ga̱jma̱a̱ xúgíʼ a̱jkiu̱lú Jeobá ikhaa má gáʼni tsajkurámáanʼlú.

18. Ndiéjunʼ gíʼmaa muni̱ bi̱ nidamijná mu maku̱mu̱ún kuyáá má xúʼko̱ Jeobá rá.

¹⁸ Rí mudamijná xa̱bu̱ nindxu̱u̱ mbá regalo ndrígóo Jeobá, ikhaa nandoo rí makuwá tsímáá (Prov. 5:18; Mat. 19:5, 6). Ikháanʼla bi̱ ndiʼkhu̱ún nidamijnála, gu̱ya̱a̱ xóo kuwáanʼla, lá nuni̱ asndu xó má eʼngo̱o̱ mu musngajmáá Jeobá rí nuxnáala núma̱aʼ ga̱jma̱a̱ numuu regalo rí nixnála ráʼ. Gu̱tha̱a̱n Jeobá, guʼyáʼ ikha ndrígóo ikhaa rí na̱ʼkha̱ náa Ajngá rawuunʼ rí ma̱ndoo mambáyala mu mu̱ni̱ itháan ñajuunʼ asndu náá minaaʼ má kuwáanʼla, ga̱jma̱a̱ guʼgíʼ gunimbáníí consejo rí na̱ʼkha̱ ikhí. Gu̱ya̱a̱ gajkhun á mu nuʼgíʼ nu̱ni̱ ginii ñajuunʼ Jeobá, rúʼko̱ gáʼni rí makuwáanʼla gagi wéñuʼ.