1. Xú káʼnii nindxu̱u̱ tikhu graxe̱ dí maʼni murajximíjna̱ nguáná rá.

NAMÍÑAʼ índo̱ natatsaʼwáminaʼ dí maguáʼnii xó má religión dí mindu̱wa̱ʼ índo̱ gáʼni gínáanʼ Gog ndrígóo Magog ga̱jma̱a̱ índo̱ gaʼni guerra dí mbiʼyuu Armagedón ráʼ. Lá nguáná natraximinaʼ á mu maʼngaaʼ mariejún jmbu náa xúgíʼ dí gárígá ikhú ráʼ. Á mu xúʼko̱ mambáyaʼ wéñuʼ ma̱ta̱ya̱a̱ dí niʼthí texto dí kayá edxu̱u̱ artículo rígi̱. Jesús niʼthún xa̱bi̱i̱: “Xáʼni ngíná a̱jkia̱la. Gusngajmá rí guáʼdáá fe” (Juan 14:1). Á mu kuaʼdáá mbá fe gujkhuʼ, maʼngo̱o̱ muraʼníí asndu ndiéjunʼ má gárígá nda̱wa̱á.

2. a) Xú káʼnii gándoo muʼni gujkhuʼ fe ndrígúlú rá. b) Ga̱jma̱a̱ ndiéjunʼ guʼyáá náa artículo rígi̱ rá.

² Mbá rí xóo ma̱ndoo muʼni gujkhuʼ fe ndrígúlú mu muraʼníí dí ga̱ʼkha̱ nda̱wa̱á nindxu̱u̱ dí mbuʼyáá xóo eraʼníí xkujndu rí kuaʼdáá mbiʼi xúgi̱. Xúʼko̱ ma̱ndoo mbuʼyáá náá gándoo muʼni itháan gujkhuʼ fe ndrígúlú. Mámbá índo̱ naʼngulú nuraʼníí xkujndu, fe ndrígúlú naʼni itháan gujkhuʼ. Rúʼko̱ gambáyulú maʼngulú asndu ndiéjunʼ má ga̱ʼkha̱ nda̱wa̱á. Náa artículo rígi̱, mbuʼyáá a̱jkhu̱ xkujndu dí niguáʼniin xa̱bi̱i̱ Jesús náa nikujmaa ndi̱ñu̱ún itháan fe. Ma̱ngaa mbuʼyáá xú káʼnii gáʼngulú xkujndu dí nambríguii ga̱jma̱a̱ rí xóo kuwáánʼ xúgi̱ ga̱jma̱a̱ xú káʼnii eʼni rathánlú dí wíji̱ ma̱ʼkha̱ nda̱wa̱á.

3. Xú káʼnii embáyuluʼ Mateo 6:30, 33 mbuʼyáá á mu ndayúlú itháan fe rá.

³ Mbáa bi̱ kayá edxu̱u̱ náa mbá guʼwá nandoo maxnún ganitsu, xtíin ga̱jma̱a̱ mbá náa ma̱ndoo maxtáa a̱ʼgiu̱u̱ gajmíi̱n e̱ji̱i̱n. Mú nguáná naʼni mingíjyúuʼ rúʼko̱ rí mbiʼi xúgi̱. Kúwá a̱ngiu̱lú bi̱ nindáti̱gu̱u̱n ñajunʼ maski ajndu nuni mbá tsiakii dí mbuʼyáʼ na̱nguá exkamaa. Eʼwíinʼ nunigaʼduunʼ muñajunʼ náa ragíʼmaa mañajunʼ cristiano. Náa xúgíʼ rúʼko̱, ndayóoʼ makumulúʼ kuʼyáá Jeobá dí ikhaa má gáxnulú dí ndayúlú. Jesús niʼsngáa kaʼwu  rúʼko̱ náa mbá discurso rí nixná (atraxnuu Mateo 6:30, * 33). * Á mu nduʼyáá gajkhun dí Jeobá nditháan xániñulu, ma̱ndoo muʼni má xúʼko̱ ginii ñajuunʼ Jeobá mbá rí itháan gíʼdoo numuu. Ga̱jma̱a̱ índo̱ nduʼyáá xú káʼnii Jeobá naxnúlú dí ndayúlú, makumulúʼ dí kuwáánʼ itháan mijngii náa ikhaa ga̱jma̱a̱ fe ndrígúlú maʼni itháan gujkhuʼ.

4, 5. Ndiéjunʼ nimbáñun mbá guʼwíin muraʼníí ga̱jma̱a̱ rí naʼni maxmiéjúnʼ dí makuwá ga̱jma̱a̱ mámbá mbiʼi rá.

⁴ Guʼyáá xóo nigíʼnuu ndxájulú Castro bi̱ xtáa náa Venezuela ga̱jma̱a̱ bi̱ kúwá náa goʼwóo. Ikhiin ndiyáá xú káʼnii Jeobá nimbáñun maguaʼdáá dí nda̱ñúunʼ makuwá ga̱jma̱a̱. Ikhiin niñajunʼ má xúʼko̱ náa mbaaʼ dí guaʼdáá ga̱jma̱a̱ dí najmaa ikhí naʼngo̱o̱ má nudaaʼ dí makuwa ga̱jma̱a̱. Mú mbá mbiʼi xa̱bu̱ xkawiinʼ bi̱ kuda ajua̱nʼ nitu̱ʼu̱u̱n náa mbaaʼ ndrígu̱ún ga̱jma̱a̱ nitsudiinʼ dí magájnáa. Anu̱ún bi̱ mbiʼyuu Miguel, naʼthí: “Rí xúgi̱ káaʼ i̱ndó nandoo makuwáanʼxu ga̱jma̱a̱ dí najma̱a̱ náa mbá chíʼgíʼ ku̱ba̱ʼ dí nikanatíʼñuxu. Dí nani mámbá mbiʼi nindxu̱u̱ dí natakáñuu Jeobá maxnúxu dí makuwáanʼxu ga̱jma̱a̱ mbiʼi rúʼko̱”. Mingíjyúuʼ xóo kúwá a̱ngiu̱lú Castro, mú nakumu̱ún kuyáá káxi̱ Anu̱lú dí ikhaa má gaxnúún dí nda̱ñúunʼ. Ikha jngó tséniñaaʼ magún reunión ni rí mutaraʼa. Ikhiin nugíʼ muni ginii ñajuunʼ Jeobá náa vida ndrígu̱ún ga̱jma̱a̱ Jeobá má nañewu̱u̱n.

⁵ Náa xúgíʼ mbiʼi rúʼko̱, Miguel ga̱jma̱a̱ a̱ʼgiu̱u̱ bi̱ mbiʼyuu Yurai ndiyáá má xúʼko̱ xú káʼnii Jeobá niñewu̱u̱n ikhiin. Nguáná Jeobá najmiuu a̱ngiu̱lú mu maxnúún tikhu dí nda̱ñúunʼ o numbayíí Miguel maxkamaa mbá ñajunʼ. Nguáná a̱ngiu̱lú bi̱ Betel najmiuu mu muñambáá náa narígá gamiéjunʼ nimbañúún ga̱jma̱a̱ dí nda̱ñúunʼ. Dios nditháan tséniñún. Ikha jngó ikhiin niʼni itháan gujkhuʼ fe ndrígu̱ún. Nda̱wa̱á dí aʼdiún bi̱ giʼnii bi̱ mbiʼyuu Yoselin niʼthí xú káʼni Jeobá nimbáñun, niʼthí: “Ra̱ʼkhá tháán nadxuu a̱jkiu̱u̱n índo̱ nda̱yo̱o̱ kaʼwu xóo embáyuʼ Jeobá. Nda̱yo̱o̱ xóo mbáa bi̱ nambájxu gajmuʼ bi̱ nañewu̱nʼ maxtáá má xúʼko̱”. Ga̱jma̱a̱ niʼthí xóó: “Xkujndu dí niraʼníí xóo mbá guʼwáanʼxu naʼni ratháanʼxu muraʼníí dí itháan mingíjyúuʼ dí ga̱ʼkha̱ nda̱wa̱á”.

6. Á mu na̱nguá xtaʼdáá ñajunʼ o nda̱a̱ mbújkha̱a̱ tani, xú káʼni gándoo matani gujkhuʼ fe ndrígáʼ rá.

⁶ Gakhii xtaa á mu nda̱a̱ ñajunʼ o mbújkha̱a̱ tani. Maski ajndu mingíjyúuʼ xtaa, ma̱ndoo matani gujkhuʼ fe ndrígáaʼ mbiʼi rúʼko̱. Aratakháñii Jeobá, atraxnuu ajngáa rí niʼthí Jesús náa Mateo 6:25-34 ga̱jma̱a̱ atatsaʼwáminaʼ dí naʼthí ikhí. Atatsaʼwáminaʼ náa xkri̱da dí rígá mbiʼi xúgi̱ náa nasngájma dí Jeobá nañewu̱u̱n bi̱ nuni má xúʼko̱ ñajuunʼ ikhaa (1 Cor. 15:58). Rúʼko̱, gámbáyaʼ ma̱ta̱ya̱a̱ dí xóo má Jeobá nimbáñun eʼwíinʼ, xúʼko̱ má gámbáyaʼ  mangáán. Ikhaa ndaʼyoo ndiéjunʼ eyaʼ ga̱jma̱a̱ ndaʼyoo xóo gáxnáʼ. Índo̱ gátaya xóo embáyáaʼ Jeobá, rúʼko̱ gáʼni gujkhuʼ fe ndrígáʼ ga̱jma̱a̱ maʼnga̱a̱ʼ matraʼníí xkujndu dí itháan gakhii dí ga̱ʼkha̱ nda̱wa̱á (Hab. 3:17, 18).

7. Xó má naʼthí náa Mateo 8:23-26, xú káʼnii nikujmaa nguáthá mba̱a̱ fe guaʼdáá xa̱bi̱i̱ Jesús índo̱ nixnúu giñánʼ mbiiʼ rá.

⁷ Mbá miʼtsú dí Jesús gajmíi̱n xa̱bi̱i̱ nagún náa barco chíʼgíiʼ, niʼni giñánʼ mbiʼ náa lamáa. Jesús nijmuu mbiʼi rúʼko̱ mambáñún xa̱bi̱i̱ mbuyáá dí nda̱ñúunʼ itháan fe (atraxnuu Mateo 8:23-26). * Giñánʼ nixnúu gakhii wéñuʼ rí iyaʼ rí naʼbaxu̱u̱ najngúun náa barco, mú Jesús tsímáá xtáa raʼgu̱. Xa̱bi̱i̱ nimíñúʼ wéñuʼ ikha jngó nigún guxkajui̱i̱ ga̱jma̱a̱ nitháán dí maʼni káwíin. Mú ga̱jma̱a̱ ajngáa wabaaʼ niʼthún: “Náá ni̱jkha̱ fe ndrígála, náá numuu rí namíñala”. Xa̱bi̱i̱ ndiyóoʼ mbuyáá dí Jeobá majmaa mañewu̱u̱n Jesús ga̱jma̱a̱ bi̱ kúwá ga̱jma̱á nindxu̱u̱. Ndiéjunʼ eʼsngúlúʼ ikháanʼ rá. Dí mbá fe gujkhuʼ nambáyulúʼ muraʼníí mbá giñánʼ gakhii tséʼniuu á mu nindxu̱u̱ giñánʼ gajkhun o xóo mbá xkri̱da.

8, 9. Ndiéjunʼ nigíʼnuu Anel ga̱jma̱a̱ ndiéjunʼ nimbáyúu xá.

⁸ Guʼyáá xú káʼnii niʼni itháan gújkhúʼ fe ndrígóo mbáa ndxájulú bi̱ na̱nguá ninújunʼ mbiʼyuu Anel bi̱ xtáa náa Puerto Rico índo̱ niraʼnuu mbá dí gakhii wéñuʼ. Dí niraʼnuu ikhaa ninindxu̱u̱ mbá giñánʼ mbiʼ gajkhun. Índo̱ niʼni giñánʼ mbiʼ mbiʼyuu María náa Puerto Rico nákha 2017, Anel niguámbáa goʼwóo ga̱jma̱a̱ nánguá nigiʼdoo ñajunʼ. Ikhaa niʼthí: “Nimíñúʼ wéñuʼ nákha niʼni mbiʼi gakhii wéñuʼ rúʼko̱. Mú nijmañuʼ maku̱mu̱ʼ ka̱yo̱o̱ Jeobá índo̱ natakáñuu ma̱ngaa tséniʼñúu rí naxmiéjunʼ wéñuʼ maʼni rí xáni nimbá”.

⁹ Anel naʼthí dí nirígá i̱mba̱ dí nimbáyúu wéñuʼ ikhaa nindxu̱u̱ dí ninimboo. Niʼthí: “Rí manimbánuu ikha dí naxná xuajñuu Jeobá nimbáyuʼ mu xámiñuʼ. Ajngáa dí nixnúxu tsiakii ga̱jma̱a̱ i̱ʼwáʼ dí nixnuxu a̱ngiu̱lú niʼni mba̱yo̱o̱ dí Jeobá nambáyuʼ”. Ga̱jma̱a̱ niʼthí xóó: “Jeobá nixnúʼ dí asndu nditháan tákumuʼ ga̱jma̱a̱ niʼni itháan gujkhuʼ fe ndrígóʼ”.

10. Ndiéjunʼ gándoo matani á mu xtaa ratraʼníí mbá rí xóo nindxu̱u̱ giñánʼ mbiʼ rá.

¹⁰ Lá xtaa ratraʼníí mbá rí nindxu̱u̱ xóo giñánʼ mbiʼ ráʼ. Mbáa natamíniiʼ ga̱jma̱a̱ numuu mbá gamiéjunʼ dí nirígá. O nandoo kháñaaʼ wéñuʼ rí asndu nánguá tayáá dí matani. Mbáa nguáná naxmiéjuanʼ wéñuʼ mú xátatsiʼñáʼ dí rúʼko̱ maʼni rí ní xákumaaʼ xtayáá Jeobá. Aratháán Jeobá dí gíwanʼ náa a̱jkia̱nʼ ga̱jma̱a̱ aratháán xúgíʼ xóo kuma̱a̱ʼ. Índo̱ narmáʼáan a̱jkia̱a̱nʼ xúgíʼ xóo Jeobá nimbáyaʼ nákha ginii matani maʼni gujkhuʼ fe ndrígá (Sal. 77:11, 12). Ma̱ndoo ma̱ta̱ya̱a̱ gajkhun dí  nditháan xániñaaʼ tséʼniuu má nguáthá mbayuuʼ xtaa.

11. Ndíjkha rí gíʼmaa munimbulú dí nuthi bi̱ nuxnulu ikha rá.

¹¹ Ndiéjunʼ i̱mba̱ gámbáyaʼ maʼngaaʼ xkujndu rá. Xó má niʼthí Anel, ikhaa nindxu̱u̱ rí manimbaaʼ. Gajmañaaʼ makumaaʼ xtañún bi̱ Jeobá ga̱jma̱a̱ Jesús naku̱mu̱u̱ kaʼñún. Nguáná bi̱ nixtiñíinʼ muxnulú ikha, mbáa nutulúʼ muʼni mbá dí nakumulú dí ragíʼdoo numuu. Mú garmáʼáan a̱jkia̱a̱nʼ dí Jeobá naʼni tsajkurámááʼ índo̱ nunimbulú. Náa Ajngá rawuunʼ ga̱jma̱a̱ experiencia ndrígu̱ún a̱ngiu̱lú naʼsngúlú dí índo̱ mbáa nanimboo naguma kríyaaʼ (Éx. 14:1-4; 2 Crón. 20:17). Atatsaʼwáminaʼ náa xkri̱da rúʼko̱ mú xúʼko̱ xáʼni a̱jma̱ a̱jkia̱nʼ matanimbánii ikha dí naxná xuajñuu Jeobá rí mbiʼi xúgi̱ ga̱jma̱a̱ nda̱wa̱á (Heb. 13:17). Mú xúʼko̱ xámiñulu índo̱ ga̱ʼkha̱ dí nindxu̱u̱ xóo giñánʼ dí itháan gakhii dí na̱ʼkha̱ rajngiyuuʼ (Prov. 3:25).

12. Xó má eʼthí Lucas 18:1-8, xkáʼnii mbríguii dí maraʼdáá fe jma̱a̱ dí maʼnga̱a̱ʼ matraʼníí mbá dí raʼkhí nuniaʼ xa̱bu̱ rá.

¹² Jesús ni̱jkha̱nú má ndiʼyoo dí xa̱bi̱i̱ mumíniiʼ numuu rí eʼwíinʼ muniu̱u̱n dí raʼkhí. Niʼthí mbá historia dí mambáñun maʼngu̱u̱n, ma̱ndoo muxkamaa náa i̱yi̱i̱ʼ dí niʼnirámáʼ Lucas. Niʼthí ga̱jma̱a̱ numuu mbáa a̱ʼgu̱ xuáʼa̱ bi̱ nángi̱ eʼni eʼthúu̱n mbáa xa̱bu̱ ra̱májáanʼ bi̱ naʼnimbánuu xkujndu mu maʼnimbánuu xkujndu ndrígóo. A̱ʼgu̱ ndaʼyoo má dí á mu ikhaa naʼthí má xúʼko̱, xa̱bu̱ buʼko̱ nda̱wa̱á mambáyúu. Xúʼko̱ má nirígá. Ndiéjunʼ ejmañuluʼ rá. Jeobá nindxu̱u̱ jmbii, ikha jngóo Jesús niʼthí: “Iwáála Dios bi̱ naʼngo̱o̱ a̱jkiu̱u̱n rá. Lá xáʼnimbánuu numún bi̱ ikhaa niraʼwíin, bi̱ nutakáñii mbiʼí mbruʼun [...] xáʼ.” (atraxnuu Lucas 18:1-8.) * Nda̱wa̱á Jesús niʼthí xóó: “Índo̱ gáʼkha̱a̱ A̱ʼdióo Xa̱biya̱, lá maxkamaa mbá fe xóo rúʼko̱ náa tsu̱du̱u̱ ku̱ba̱ʼ xáʼ.” Índo̱ eʼwíinʼ nuniulú dí raʼkhí, gíʼmaa musngajmá rí naʼngo̱o̱ a̱jkiu̱lú ga̱jma̱a̱ rí naʼngo̱o̱ nuraʼthi̱i̱n dí kuaʼdáá mbá fe gujkhuʼ xó má nigiʼdoo a̱ʼgú xuáʼa̱. Índo̱ kuaʼdáá mbá fe xúʼko̱ na̱jkuánu nduʼyáá gajkhun dí Jeobá má gambáyulú asndu náá má mbiʼi. Ma̱ngaa ndayóoʼ makumulúʼ dí gíʼdoo tsiakii dí nutajkháan. Nguáná naxtiʼña̱a̱ asndu xóo nditháan tákumulú dí niʼtájkháan.

13. Xú káʼnii nimbáñun rí miʼtájkáan mbá guʼwíin bi̱ niniu̱u̱n dí raʼkhí xá.

¹³ Guʼyáá experiencia ndrígóo ndxájulú  Vero ga̱jma̱a̱ ajmbio̱o̱ ga̱jma̱a̱ wáxioo bi̱ gíʼdoo 15 tsiguuʼ bi̱ kúwá náa República Democrática ndrígóo Congo. Nájtsíin ndiyóoʼ magajnún ragañun náa xuajñún índo̱ soldado nitu̱ʼu̱u̱n. Mú, náa kamba̱a̱ ndiñún soldado bi̱ túniñu̱u̱ʼ manújngún ga̱jma̱a̱ nithúún dí muradíin. Vero nigíʼdu̱u̱ nimbiyaʼ mú a̱ʼdióo nindoo maʼni̱i̱ a̱jkiu̱u̱n ru̱dúu̱ ikha jngó niʼtájkháan gakhii ga̱jma̱a̱ niʼthí mbiʼyuu Jeobá mbaʼa nuthu. Índo̱ niguámbóo niʼtájkháan, soldado bi̱ kayá edxu̱u̱ niraxu̱u̱: “Dxáʼgú, tsáa niʼsngáa maratajkáan rá.” Ikhú ikhaa niriʼña̱a̱: “Ru̱dúʼ, xó má na̱ʼkha̱ raʼthí náa Mateo 6:9-13”. Ikhú soldado niʼthí: “Dxáʼgú, ayuʼ tsímáá gajmiáanʼ xabuaniaʼ, Jeobá Dios ndrígáʼ gáñewanla”.

14. Ndiéjunʼ gáʼni dí makawábaaʼ fe ndrígúlú, ga̱jma̱a̱ ndiéjunʼ gambáyulú maʼngulú rá.

¹⁴ Experiencia xóo rígi̱ nduʼyáá rí miʼtájkáan gíʼdoo wéñuʼ tsiakii. Mú á mu dí naratájkáan na̱nguá extiʼña̱a̱ nacha̱ o rí xóo nandaaʼ ikháán rá. Xó má niʼni a̱ʼgú xuáʼa̱ bi̱ niʼthí Jesús, aratajkáan má xúʼko̱ mú gakumaaʼ dí Dios ndrígúlú nditháan xániñánʼ ga̱jma̱a̱ dí ikhaa má gáriʼña̱a̱ dí niratháán mbiʼi dí kaʼyoo. Aratakháñii má xúʼko̱ Jeobá dí maxnáa tsiakii ndrígóo (Filip. 4:13). Garmáʼáan a̱jkia̱nʼ dí nánguá má mbayuuʼ tígo̱o̱ rí Jeobá maʼni tsajkurámááʼ wéñuʼ ga̱jma̱a̱ mambumaaʼ xúgíʼ dí nitamíniiʼ. Índo̱ naʼngaʼ natraʼníí xúgíʼ ga̱jma̱a̱ tsiakii ndrígóo Jeobá, maraʼdáá itháan tsiakii matraʼníí dí ga̱ʼkha̱ nda̱wa̱á (1 Ped. 1:6, 7).

15. Xó má naʼthí náa Mateo 17:19, 20, ndiéjunʼ dí ndiyóoʼ maguaʼdáá itháan xa̱bi̱i̱ Jesús rá.

¹⁵ Jesús niʼsngúún xa̱bi̱i̱ dí fe gámbañún muraʼníí xkujndu (atraxnuu Mateo 17:19, 20). * Maski ajndu ikhiin mbaʼa nuthu niʼngu̱u̱n nixkawíin xa̱bu̱ wéñiʼ, mú mbá miʼtsú tájmiin. Náá numuu rá. Jesús niʼthún dí ndi̱ñúnʼ itháan fe. Niʼthún dí á mu guaʼdáá mba̱a̱ fe, maʼngu̱u̱n muni dí asndu kúbá maʼga̱ níjni. Rí mbiʼi xúgi̱, ikháanʼlu ma̱ngaa maʼngulú muraʼníí xkujndu dí nakujmaa dí nimbáa xáʼngo̱o̱ gáraʼnuu.

16. Xú káʼnii nimbáyuʼ fe dí nigiʼdoo Geydi maraʼnuu mbá gaʼkhu rá.

¹⁶ Guʼyáá xkri̱da ndrígóo Geydi mbáa ndxájulú bi̱ xtáa náa Guatemala. Índo̱ kúwá raguwáánʼ náa nigún reunión náa guʼwá nagimbáánʼ, nixiyáa ajmbio̱o̱ mbiʼyuu Edi. Ikhaa niʼthí dí fe nimbáyúu maraʼnuu gaʼkhu rúʼko̱, niʼthí: “Índo̱ natajkáan, na̱thu̱u̱n xúgíʼ Jeobá dí naʼni maxmiéjunʼ xúʼko̱ naʼni maxtáá tsímáá. Nda̱yo̱o̱ xú káʼnii Jeobá najmiuu bi̱ ka̱ñu̱u̱n ga̱jma̱a̱ a̱ngiu̱lú bi̱ kúwá náa congregación mu mañewu̱nʼ. Rí mañajunʼ má xúʼko̱ ga̱jma̱a̱ numuu Jeobá nambáyúʼ dí xágawúnʼ wéñuʼ ga̱jma̱a̱ dí xaxmiéjunʼ wéñuʼ ndiéjunʼ gárígá imbo̱ʼ mbiʼi. Rí xóo nixtáá niʼsngóʼ dí  tséʼniuu má asndu xkáʼnii gaʼkhu dí ga̱ʼkha̱ nda̱wa̱á, ma̱ndoo maraʼnuu numuu dí Jeobá, Jesús ga̱jma̱a̱ xuajñuu gambayuuʼ”.

17. Ndiéjunʼ gándoo muʼni índo̱ nuraʼníí mbá xkujndu mba̱a̱ wéñuʼ rá.

¹⁷ Lá nikháñuu mbáa bi̱ nandaaʼ xtayáá ikháán ráʼ. Atríyaʼ mbiʼi matraxnuu Biblia náa naʼthí ga̱jma̱a̱ numún xa̱bu̱ bi̱ nituxi̱ín mú xúʼko̱ maʼni itháan gujkhuʼ fe ndrígáʼ rí matuxi̱ín xa̱bu̱ nda̱wa̱á. Lá xtaa ngíná wéñuʼ ga̱jma̱a̱ numuu rí mbáa bi̱ xtayáá nijkha̱ expulsado ráʼ. Atanigajmaa mu ma̱ta̱ya̱a̱ gajkhun dí índo̱ Dios naxná xkuíyá nindxu̱u̱ májánʼ. Tséʼniuu má asndu xkáʼnii xkujndu xtaʼdáá, atayáá xóo mbá náa maʼsngáa maraʼdáá itháan gujkhuʼ fe. Aratháán xúgíʼ rí gíwanʼ náa a̱jkia̱nʼ Jeobá. Xídxúʼ kaníí náa kúwá a̱ngia̱nʼ, ataxuʼmaminaʼ mijngii náa kúwá (Prov. 18:1). Maski ajndu ga̱jma̱a̱ xtambiyaʼ, atani má xúʼko̱ ñajunʼ dí mambáyaʼ maʼngaaʼ (Sal. 126:5, 6). Xátatsiʼñáʼ mi̱dxu̱ʼ reunión, marataráʼa ga̱jma̱a̱ matraxnuu Biblia. Ga̱jma̱a̱ atatsaʼwáminaʼ má xúʼko̱ náa xúgíʼ rí mitsaanʼ dí Jeobá nikudaminaʼ maʼni. Índo̱ gátaya xóo embáyaʼ Jeobá ikhú fe ndrígáʼ maʼni itháan gujkhuʼ.

18. Á mu natayáá dí ndayáaʼ xóó fe, ndiéjunʼ gándoo matani rá.

¹⁸ Xájmaa má á mu mbá xkujndu dí niraʼdáá o dí xtaʼdáá xúgi̱ nakujmaa dí ndayáaʼ xóó fe. Atayáá xóo mbá náa mambáyaʼ matani itháan gujkhuʼ fe ndrígáʼ. Atanda̱ʼa̱ xó má nitháán Jesús xa̱bi̱i̱: “Araxnúxu xóó itháan fe” (Luc. 17:5). Atatsaʼwáminaʼ ma̱ngaa náa xkri̱da dí ndiʼyáá náa artículo rígi̱. Xó má Miguel ga̱jma̱a̱ Yurai, garmáʼáan a̱jkia̱a̱nʼ xúgíʼ mbiʼi dí Jeobá nimbáyaʼ. Xó má niʼni a̱ʼdióo Vero ma̱ngaa Anel, aratakháñii Jeobá ga̱jma̱a̱ xúgíʼ a̱jkia̱a̱nʼ itháan índo̱ naraʼdáá xkujndu dí mingíjyúuʼ wéñuʼ. Ga̱jma̱a̱ xó má niʼni Geydi, atatsíñaʼ dí Jeobá mambáyaʼ índo̱ najmiuu bi̱ xtañún o a̱ngiu̱lú mumbayáaʼ. Á mu natatsíñáʼ dí Jeobá mambáyaʼ matraʼníí xkujndu mbiʼi xúgi̱, ma̱ta̱ya̱a̱ gajkhun dí ikhaa má gámbáyaʼ matraʼníí asndu xkáʼnii má xkujndu dí ga̱ʼkha̱ nda̱wa̱á.

19. a) Ndiéjunʼ ni̱jkha̱nú ndiʼyoo gajkhun Jesús rá. b) Ndiéjunʼ gándoo ma̱ta̱ya̱a̱ gajkhun mangáán rá.

¹⁹ Jesús niʼthí índo̱ ndiñu̱ún itháan fe xa̱bi̱i̱, mú ni̱jkha̱nú má ndiʼyoo dí Jeobá má gámbañún muraʼníí xkujndu dí ga̱ʼkha̱ nda̱wa̱á (Juan 14:1; 16:33). Ma̱ngaa ni̱jkha̱nú ndiʼyoo gajkhun dí makuwá mbaʼin wéñuʼ xa̱bu̱ bi̱ ga̱jma̱a̱ numuu fe gujkhuʼ dí guaʼdáá makáwi̱i̱n índo̱ gájngoo majphú mba̱a̱ gaʼkhu (Apoc. 7:9, 14). Lá manindxa̱ʼ mbáa dí ikhiin xáʼ. Numuu dí Jeobá ra̱ʼkhá tháán májánʼ a̱jkiu̱u̱n, maraxtaa ikhí á mu natani maʼni gujkhuʼ fe ndrígá mbiʼi xúgi̱ (Heb. 10:39).