1. Ndiéjunʼ eyoo gáʼthúu̱n rí mundxaʼwámi̱jna̱ májánʼ rá. (2 Timoteo 4:5.)

 MA̱NDOO maraʼnuu tsáʼkhá rí naguajún jmbu náa Jeobá ma̱ngaa náa xuajñuu índo̱ nuraʼníí gaʼkhu. Ndiéjunʼ gámbáyulú mu maʼngulú rá. Rí mundxaʼwamíjna̱ májánʼ, rí makuwáanʼ xawii ga̱jma̱a̱ rí “maguaʼdáá má xúʼko̱ fe” (Atraxnuu 2 Timoteo 4:5). Xú káʼnii gándoo guʼni mu mundxaʼwamíjna̱ náa dí májánʼ rá. Rí xákiʼnáanʼ nacha̱, mundxaʼwamíjna̱ kaʼwu ga̱jma̱a̱ muʼni tsiakimijna mbuʼyáá xóo má ndaʼyoo Jeobá. Á mu nuʼni xúʼko̱ xúndxaʼwamíjna dí raʼkhí.

2. Ndiéjunʼ guʼyáá náa artículo rígi̱ rá.

² Náa artículo rí nijngoo niʼthá mbá ajtsú enii rí mingíjyúuʼ dí nuraʼníí a̱ngiu̱lú náa numbaaʼ rígi̱. Náa artículo rígi̱ muʼthá mbá ajtsú enii mbu̱júu̱ rí ma̱ndoo maʼniulú mingíjyúuʼ dí narígá náa congregación, rí maʼni dí xaguájún jmbu náa Jeobá: Índo̱ nakumulú rí mbáa ndxájulú niʼniulúʼ dí raʼkhí, índo̱ nuxprígulú ga̱jma̱a̱ índo̱ naʼniulú mingíjýuuʼ maguʼwunlú dí naxtiʼkhuu náa xuajñuu Jeobá. Á mu nagíʼnulu xígi̱ kaʼnii, ndiéjunʼ gándoo muʼni mu mundxaʼwamíjna̱ náa rí májánʼ ga̱jma̱a̱ muguajún jmbu náa Jeobá ma̱ngaa náa xuajñuu rá.

3. Xú káʼni eʼni índo̱ nakumulú rí mbáa ndxájulú niʼniulúʼ dí raʼkhí rá.

³ Lá nitatsaʼwáminaʼ mbá miʼtsu rí mbáa ndxájulú bi̱ gíʼdoo ñajunʼ náa xuajñuu Jeobá niʼniaaʼ dí raʼkhí ráʼ. Mbáa ndxájulú buʼko̱ na̱nguá nindoo maʼni gawáanʼ (Rom. 3:23; Sant. 3:2). Mu maski ajndu xúʼko̱ ikháán nigawáanʼ. Mbáa asndu na̱nguá nindaaʼ gínuʼ ga̱jma̱a̱ numuu rí ikhaa niʼniaaʼ o asndu nitraximínáʼ: Á mu dí ndxájulú buʼko̱ niʼniuʼ xígi̱ kaʼnii, lá nindxu̱u̱ xuajñuu  Dios rígi̱ ráʼ. Rúʼko̱ rí nandoo Gixa̱a̱ matatsaʼwamínáʼ (2 Cor. 2:11). Ku̱ma̱ rígi̱ gamíi maʼni rí matsinguáa̱n náa Jeobá ga̱jma̱a̱ náa xuajñuu. Ikha jngóo á mu nakumaaʼ rí mbáa ndxájulú niʼniaʼ dí raʼkhí. Ndiéjunʼ gándoo matani mu matatsaʼwamínáʼ náa rí májánʼ rá.

4. a) Ndiéjunʼ niʼni José mu mandxaʼwáminaʼ rí májánʼ índo̱ nini̱i̱ dí raʼkhí xá. (Génesis 50:19-21.) b) Ndiéjunʼ ejmañulú náa xkridoo xá.

⁴ Xátiejxi̱ sia̱nʼ. Nákha José ninindxu̱u̱ dxámá a̱ngui̱i̱n bi̱ wanii nini dí ra̱májánʼ. Nikiʼníin kuyáá rí asndu tikhun nindúún muxiyáa (Gén. 37:4, 18-22). Ga̱jma̱a̱ rúʼko̱ niʼni rí mugujua̱a̱ xóo ñumbáá. Ga̱jma̱a̱ rúʼko̱ niʼni dí José maraʼnuu mbaʼa xkujndu rí ndijyúuʼ mbá 13 tsiguʼ. Ikhaa ma̱ndoo maʼni a̱jma̱ a̱jkiu̱u̱n rí Jeobá nánguá eyoo kaʼyoo o maraximínaʼ rí á mu Dios niniñuuʼ maraʼnuu xkujndu mingíjyúuʼ rúʼko̱. Ikhaa na̱nguá nixtáa gíná, rí phú niʼni nidxaʼwáminaʼ májánʼ ga̱jma̱a̱ na̱nguá nikiʼnáa. Índo̱ ni̱jkha̱nú mbiʼi rí ma̱ndoo maʼniún a̱ngui̱i̱n xóo má nini ikhaa, na̱nguá niʼniún rí phú niʼni nindoo kaʼñúún ga̱jma̱a̱ niʼni mba̱a̱ a̱jkiu̱u̱n kaʼñún (Gén. 45:4, 5). Ndíjkha niʼni xúʼko̱ xá. Numuu rí niʼngo̱o̱ nidxaʼwáminaʼ májánʼ. Ikhaa nindxaʼwáminaʼ náa xúgíʼ rí nindoo Jeobá raʼkháa náa xkujndu dí xtaa ranújngoo (atraxnuu Génesis 50:19-21). b Ndiéjunʼ eʼsngúlú rígi̱ rá. Á mu mbáa naʼniulú dí raʼkhí, xuyéjxi̱i̱ sianʼ ga̱jma̱a̱ xundxaʼwamíjna̱ dí raʼkhí ga̱jma̱a̱ numuu Jeobá o muʼthá dí ikhaa nimbumuu kaʼyulú. Rí phú gíʼmaa muʼni gundxaʼwamíjna̱ xú káʼnii xtaa rambáyulú mu maʼngulú náa mbiʼi mingíjyúuʼ rúʼko̱. Ma̱ngaa Araxtaa xawii matani mba̱a̱ a̱jkia̱a̱nʼ xtañún eʼwíinʼ garmáʼáan a̱jkia̱a̱nʼ “rí ngajua narugurámuuʼ mbaʼa aʼkhá” (1 Ped. 4:8).

5. Xú káʼnii niʼngo̱o̱ niʼni Miqueas mu mandxaʼwáminaʼ náa rí májánʼ índo̱ nikumu̱u̱ dí nini̱i̱ dí raʼkhí xá.

⁵ Guʼyáá xkridoo mbáa ndxájulú bi̱ mbiʼyuu Miqueas c bi̱ xtáa náa Sudamérica. Mbá miʼtsú ikhaa nikumu̱u̱ rí tikhuun bi̱ kuya̱ edxu̱u̱ nitháán mbájmbu ga̱jma̱a̱ ajngáa gakhii. Ikhaa narmáʼáan a̱jkiu̱u̱n: “Náa xúgíʼ mbiʼi rí nixtáá, rígi̱ dí niʼni maxmiéjunʼ itháán ga̱jma̱a̱ niʼni maxtáá gíná, na̱nguá nijmún gígú, nimbiyaʼ numuu rí na̱nguá eyoo dí ma̱ni̱”. Mu maski ajndu xúʼko̱ Miqueas, nindxa̱ʼwáminaʼ náa dí májánʼ ga̱jma̱a̱ ndiʼyoo awa̱án mu xandxaʼwáminaʼ dí raʼkhí. Mbaʼa nuthu niʼtákáñuu Jeobá rí maxnúu espíritu santo ndrígóo, tsiakii mu maʼngo̱o̱. Ma̱ngaa ndiyáʼ itháán mbaʼyoo náa iyulú. Ndiéjunʼ ejmañulú rá. Á mu naku̱ma̱a̱ʼ rí mbáa ndxájulú niʼniaaʼ dí raʼkhí, xakiʼnáán ga̱jma̱a̱ atie̱wa̱a̱n mu xatatsaʼwamínáʼ dí raʼkhí. Mbáa ndxájulú rígá mbá dí nigíʼnuu mbiʼi rúʼko̱, ikha jngóo niʼthí o niʼniaaʼ xúʼko̱ kaʼnii mbá rí ikháán tsétayáá. Aratháán xúgíʼ rúʼko̱ Jeobá ga̱jma̱a̱ atanda̱ʼa̱a̱ ma̱ta̱ya̱a̱ xóo má eʼyoo ndxájulú buʼko̱. Rúʼko̱ gáʼni rí matatsaʼwáminaʼ rí májánʼ ga̱jma̱a̱ numuu, ma̱ngaa rí xakiʼnán xtayáá (Prov. 19:11). Garmáʼáan a̱jkia̱a̱nʼ rí Jeobá ndaʼyoo rí nagíʼnulu ga̱jma̱a̱ ikhaa maxnáaʼ tsiakii mu maʼnga̱a̱ʼ matraʼníí asndu ndiéjunʼ má (2 Crón. 16:9; Ecl. 5:8).

6. Ndíjkha rí gíʼdoo numuu mbuʼyáá rí naxprígulu Jeobá nindxu̱u̱ xóo nasngájmulú rí nandoo kaʼyulú xá. (Hebreos 12:5, 6, 11.)

⁶ Rí nuxpri̱gúlú ma̱ndoo maʼni gawúnlú. Á mu i̱ndó nduʼyáá náa dí raʼkhí, rúʼko̱ gamíi maʼni mbuʼyáá rí na̱nguá gíʼdoo numuu xóo nuthulu, nindxu̱u̱ raʼkhí o makumulú rí i̱ndó nuriyulú. Ma̱ngaa ma̱ndoo mandátigu̱lú mbá rí gíʼdoo wéñuʼ numuu: Gaxprígú nindxu̱u̱ xóo nasngájma Jeobá rí nandoo kaʼyulú  (atraxnuu Hebreos 12:5, 6, 11). Á mu nuniʼñámíjná maʼngo̱o̱ rí nakumulú dí raʼkhí, rúʼko̱ gáʼnii dí Gixa̱a̱ maʼngo̱o̱ maʼni rajáánlú. Ikhaa nandoo rí xuʼdxawíín índo̱ nuxpri̱gúlú mu rí itháán raʼkhí nindxu̱u̱ rí matsíngulú náa Jeobá ga̱jma̱a̱ náa congregación. Á mu ikháán nixpriguáaʼ, ndiéjunʼ gándoo gámbáyáaʼ mu matatsaʼwamínáʼ rí májánʼ rá.

7. a) Xóo má nakujmaa náa xtiʼkhuu, ndiéjunʼ ñajunʼ nixnájxu̱u̱ Jeobá maʼni Pedro nda̱wa̱á rí nuxpri̱guíí xá. b) Ndiéjunʼ ejmañulú náa xkridoo Pedro rá.

⁷ Atadxawíín índo̱ nuxpri̱guáa ga̱jma̱a̱ atriʼkuminaaʼ náa ndayóoʼ. Mbaʼa nuthu Jesús nixprígúu Pedro náa inún eʼwíinʼ apóstoles (Mar. 8:33; Luc. 22:31-34). ¡Ra̱ʼkhá tháán niti̱yu̱u̱ʼ Pedro! Mu niwi̱ji̱ jmbu má xúʼko̱ náa Jesús, niʼdxawun dí nixprígúu ga̱jma̱a̱ nijmañuu náa nijngawa̱a̱n. Ga̱jma̱a̱ numuu rí niwi̱ji̱ jmbu Jeobá nixnúu mbaʼa ñajunʼ rí maʼni náa congregación (Juan 21:15-17; Hech. 10:24-33; 1 Ped. 1:1). Ndiéjunʼ ejmañulú rá. Rí gíʼdoo wéñuʼ numuu mbuʼyáá náá numuu rí nuxpri̱gúlú raʼkháa dí matiyulú ga̱jma̱a̱ guriʼkumijnáá náa ndayóoʼ. Á mu ikháán natani̱ xúʼko̱, Jeobá majmiuu ga̱jma̱á nindxa̱a̱ʼ ma̱ngaa rí matambáñún a̱ngiu̱lú.

8, 9. Xú káʼnii nikumu̱u̱ Bernardo nákha nixpri̱guíi, ga̱jma̱a̱ ndiéjunʼ nimbáyúu mariʼkhu̱u̱ xóo nandxa̱ʼwáminaʼ xá.

⁸ Guʼyáá rí nigíʼnuu mbá ndxájulú bi̱ mbiʼyuu Bernardo, ikhaa na̱ʼkha̱ náa Mozambique. Ninindxu̱u̱ bi̱ kayá edxu̱u̱, mú ni̱jkha̱nú mbiʼi rí nánguá ninindxu̱u̱. Xú káʼnii nikumu̱u̱ nákha ginii xá. Ikhaa naʼthí: Nigawúnʼ wéñuʼ numuu rí tániguʼ xóo nixpri̱gúʼ. Ikhaa nixmiéjunʼ rí a̱ngiu̱lú bi̱ kúwá náa congregación mundxaʼwamíjna̱ dí raʼkhí ga̱jma̱a̱ numuu. Ikhaa naʼthí xóó: Ndijyúuʼ mba̱yu̱u̱ʼ gu̱nʼ mu mba̱yo̱o̱ xóo phú gíʼmaa ma̱ngaa rí maku̱mu̱ʼ ka̱yo̱o̱ mbu̱júu̱ Jeobá ga̱jma̱a̱ xuajñuu, ndiéjunʼ nimbáyúu xá.

⁹ Bernardo niriʼkhu̱u̱ xóo nandxa̱ʼwáminaʼ, ikhaa naʼthí: “Nákha ninindxu̱ʼ bi̱ kayá edxu̱u̱ najmuʼ Hebreos 12:7, mu mambáñún a̱ngiu̱lú mu mbuyáá náa rí májánʼ dí Jeobá naxprígún. Nirajximínáʼ: Tsíín gúgíʼ munimbánii versículo rígi̱ rá. Xúgíinʼ xa̱bi̱i̱ Jeobá ga̱jma̱a̱ asndu mangúún”. Bernardo niʼniminaʼ xóo itháán mu maku̱mu̱u̱ kaʼyoo Jeobá ga̱jma̱a̱ xuajñuu. Ikhaa niriyaʼ mbiʼi mu maguxnuu Biblia ma̱ngaa rí mandxaʼwáminaʼ rí naʼthí ikhí. Maski ajndu xóó nixmiéjunʼ rí a̱ngiu̱lú mundxaʼwamíjna̱ dí raʼkhí ga̱jma̱a̱ numuu, ikhaa  nagájnuu gáʼtáráʼa gajmíi̱n ga̱jma̱a̱ na̱jkha̱ reunión. Ninújngoo mba̱yu̱u̱ʼ mbiʼi índo̱ ninindxu̱u̱ mbu̱júu̱ bi̱ kayá edxu̱u̱. Á mu ikháán nixpriguáaʼ xóo má Bernardo, atayáá náa rí ma̱ndoo mambáyáaʼ raʼkháa rí mati̱ya̱a̱ʼ ma̱ngaa atagíʼ matriʼkuminaaʼ náa ndayóo (Prov. 8:33; 22:4). d Á mu natani̱ xúgíʼ rígi̱, ma̱ndoo ma̱ta̱ya̱a̱ rí Jeobá maʼni tsajkurámááʼ numuu rí na̱nguá nitani̱ tsínguminaʼ náa ikhaa ga̱jma̱a̱ náa xuajñuu.

10. Ndiéjunʼ rí nixtiʼkhuu náa xuajñuu Jeobá rí niʼni xaguajun jmbu tikhun Israelitas rá.

¹⁰ Gamíi maʼni rí xáguajun jmbu náa Jeobá índo̱ rígá dí naxtiʼkhu̱u̱ náa xuajñuu. Á mu tsiñewumíjna̱, gamíi rí matsingulú náa Jeobá. gundxaʼwámijna rí nirígá nákha wajyúuʼ náa xuajñuu índo̱ ni̱ʼkha̱nú xtángoo ndrígóo Moisés ga̱jma̱a̱ rúʼko̱ niʼniún tsiánguá tikhun israelitas. Numuu rí nákha mbiʼi rúʼko̱, mambáa bi̱ kayá edxu̱u̱ náa mbá guʼwá, ikhiin má nindxu̱ún ndxajkun; nuni altar ga̱jma̱a̱ nuxnajxi̱ tsigijñaʼ náa Jeobá mu xúʼko̱ maʼndoo kaʼñún (Gén. 8:20, 21; 12:7; 26:25; 35:1, 6, 7; Job 1:5). Índo̱ ni̱ʼkha̱nú xtángoo ikhú bi̱ kuya̱ edxu̱u̱ náa mambá guʼwá nánguá niguaʼdáá ñajunʼ rúʼko̱. Jeobá nigruigi̱i̱n bi̱ naguwáʼ náa goʼwóo Aarón mu mani̱ndxu̱ún ndxajkun ga̱jma̱a̱ muxnajxi̱ tsigijñaʼ. Asndu má nákha mbiʼi rúʼko̱, á mu mbáa dxajkun bi̱ na̱nguá e̱ʼkha̱ náa Aarón gíʼmaa rí makhañúu (Lev. 17:3-6, 8, 9). e Lá ga̱jma̱a̱ numuu rúʼko̱ rí Coré, Datán Abiram ga̱jma̱a̱ imbá 250 xa̱bu̱ bi̱ kuya̱ edxu̱u̱ náa xuajen rí nixuximíjna náa Moisés ga̱jma̱a̱ náa Aarón rá. (Núm. 16:1-3.) Na̱nguá eʼyáá á mu xúʼko̱. Tséʼniuu má xú káʼnii, Coré gajmíi̱nʼ xa̱bu̱ bi̱ numbayíí na̱nguá niguájun jmbu náa Jeobá. Ndiéjunʼ gátani ikháán á mu mbá rí nixtiʼkhu̱u̱ náa xuajñuu Jeobá maʼni rí xariéjún jmbu rá.

11. Ndiéjunʼ ejmañulú náa xkridún tikhun cohatitas rá.

¹¹ Atambáyii ga̱jma̱a̱ xúgíʼ a̱jkia̱a̱nʼ índo̱ naxtiʼkhu̱u̱ mbá náa xuajñuu Dios. Índo̱ israelitas nigún náa ku̱ba̱ʼ mijxooʼ, levitas bi̱ naguwáʼ náa goʼwóo Cohat niguaʼdáá mbá ñajunʼ kiejunʼ. Mambá índo̱ natuxu̱u̱n nagún, tikhun cohatitas ginii ikhiin egún kuñu̱u̱ arca rí nimbánuu náa inún xa̱bu̱ (Núm. 3:29, 31; 10:33; Jos. 3:2-4). ¡Mitsaanʼ wéñuʼ ñajunʼ! Mú índo̱ israelitas nitaʼáán má náa ku̱ba̱ʼ rí nijuiʼthá makánún nixtiʼkhuu mbá kayuuʼ. Nánguá eyoo rí magún kuñu̱u̱ arca. Índo̱ nixtáa raʼtáñajunʼ Salomón tikhun cohatitas ninindxu̱ún bi̱ nuni ajmúú, bi̱ nuñewa̱a̱n xkrugua, eʼwíinʼ nuñewa̱a̱n náa nagijxii ganitsu (1 Crón. 6:31-33; 26:1, 24). Náa Biblia na̱nguá eʼthí á mu rí cohatitas nixieʼkhá o nindúún maguaʼdáá ñajunʼ rí maʼni majmaniún numuu rí nákha ginii niguaʼdáá ñajunʼ kiejunʼ. Ndiéjunʼ ejmañulú rá. Guʼni ga̱jma̱a̱ xúgíʼ a̱jkiu̱lú á mu naxtiʼkhu̱u̱ mbá náa xuajñuu Jeobá, tséʼniuu á mu naxtiʼkhu̱u̱ asndu ñajunʼ rí kuáʼdáá. Ganigulú asndu ndiéjunʼ má ñajunʼ rí gákhánúlú. Guʼyáá kaʼwu rígi̱ dí raʼkháa ga̱jma̱a̱ numuu ñajunʼ rí kuáʼdáá maʼni rí maguaʼdáá numulú, Jeobá ndaʼyoo rí itháán gíʼdoo numuu rí muʼnimbulú ki xóo ñajunʼ rí nakhánulú.

12. Xú káʼnii nikumu̱u̱ Zaira índo̱ nigájnáa náa Betel rá.

¹² Guʼyáá xkridoo ndxájulú Zaira bi̱ na̱ʼkha̱ náa Oriente medio. Ikhaa ninigu̱u̱ʼ mañajunʼ wéñuʼ náa Betel náa nixtáa rañajunʼ mbá 23 tsiguʼ. Mú índo̱ nitháán rí magajnáa ga̱jma̱a̱  nigíiʼ xóo precursora especial. Ikhaa naʼthí: “Dí nixtiʼkhuu rúʼko̱ niʼniuʼ wéñuʼ gakhii. Niku̱mu̱ʼ rí na̱nguá ejmúún ga̱jma̱a̱ naraximinaʼ ndiéjunʼ lá raʼkhí ni̱ni̱”. Gíná nindxu̱u̱ rí tikhun a̱ngiu̱lú bi̱ kúwá náa congregación nini̱i̱ rí majmuu itháán: “Numuu rí nitháán á mu nitani̱ rí májánʼ, a̱ngiu̱lú na̱nguá niriñánʼ”. Mba̱yu̱u̱ʼ mbiʼi Zaira nijmúu wéñuʼ rí nambiyaʼ xúgíʼ mbruʼun. Ikhaa naʼthí: “Nditháan na̱nguá nini a̱jma̱ a̱jkiu̱nʼ rí Jeobá na̱nguá eyoo kaʼyoo ni má xuajñuu”. Ndiéjunʼ nimbáyúu mu mandxaʼwáminaʼ rí májánʼ xá.

13. Ndiéjunʼ niʼni Zaira mu maniñuuʼ randxa̱ʼwáminaʼ dí raʼkhí rá.

¹³ Zaina niguxnuu i̱yu̱lúʼ náa naʼthí ga̱jma̱a̱ numuu dí xtáa ragíʼnuu ikhaa, xúʼko̱ niʼni rí niʼngo̱o̱ niniñuuʼ randxa̱ʼwáminaʼ dí raʼkhí. Mbá rí nimbáyúu wéñuʼ ikhaa nindxu̱u̱ La Atalaya rí nigájnuu 1 de febrero de 2001 rí kayá edxu̱u̱: “Usted puede afrontar el desánimo”. Náa artículo rígi̱ naʼthí xkridoo Marcos mbáa bi̱ niʼnirámáʼ Biblia, mbáa ma̱ngaa nikumu̱u̱ xúʼko̱ índo̱ nixtiʼkhu̱u̱ ñajunʼ rí gíʼdoo náa xuajñuu Jeobá. Zaira naʼthí: “Xkridoo Marcos nimbáyuʼ wéñuʼ mu xajmuʼ”. Ikhaa nimbáyuminaʼ náa bi̱ nambájxu̱u̱ gajmíi̱nʼ, na̱nguá niʼni tsínguminaʼ náa a̱ngiu̱lú ga̱jma̱a̱ nánguá nidxaʼwáminaʼ dí xtáa ragíʼnuu. Ni̱jkha̱nú nikro̱ʼo̱o̱ májánʼ rí espíritu ndrígóo Jeobá naxná ikha náa xuajñuu ga̱jma̱a̱ rí a̱ngiu̱lú bi̱ guaʼdáá ñajunʼ naxmiéjunʼ kuyáá. Ikhaa ni̱jkha̱nú ndiʼyoo rí náa xuajñuu Jeobá rí itháán gíʼdoo numuu nindxu̱u̱ ñajunʼ rí ikhaa nandoo maguma.

14. Ndiéjunʼ rí nixtiʼkhuu náa xuajñuu rí ndiyóoʼ maguʼun Vlado ga̱jma̱a̱ ndiéjunʼ nimbáyúu xá.

¹⁴ Vlado bi̱ kayá edxu̱u̱ náa congregación dí rígá náa Eslovenia bi̱ gíʼdoo 73 tsiguuʼ, niʼniuu gakhii índo̱ nigúgua̱a̱ salón ndrígóo ga̱jma̱a̱ niwaa ga̱jma̱a̱ i̱mba̱ congregación. Ikhaa naʼthí: “Na̱nguá eyoo náá numuu rí maguguáa salón, mitsaanʼ wéñuʼ. Nikiʼnún wéñuʼ numuu rí ndiʼkhún nini májáanʼxu. Ikhúún nindxu̱u̱ bi̱ naʼthóo ixi̱ ga̱jma̱a̱ nini tikhu muebles rí majmaa ikhí. Ma̱ngaa índo̱ niwaa ga̱jma̱a̱ i̱mba̱ congregación niʼniaxu tikhu gakhii ikháanʼxu bi̱ waniáanʼxu”. Ndiéjunʼ nimbáyúu mu maʼni ga̱jma̱a̱ xúgíʼ a̱jkiu̱u̱n xá. Ikhaa naʼthí: Rí maguʼwunlú rí naxtiʼkhu̱u̱ náa xuajñuu Jeobá nambáyulú wéñuʼ. Rúʼko̱ naʼni ratháanlú á mu dí  nda̱wa̱á maxtiʼkhuu itháán mba̱a̱”. Lá nigugua congregación ndrígáaʼ o nixtiʼkhu̱u̱ asignación ndrígáaʼ rá. Xájmaa, Jeobá nakro̱ʼo̱o̱ xóo káʼnii xtaa. Á mu ikháán natambáyii ga̱jma̱a̱ xúgíʼ a̱jkia̱a̱nʼ índo̱ naxtiʼkhu̱u̱ ga̱jma̱a̱ nariejún jmbu náa Jeobá ma̱ngaa náa xuajñuu ikháán maguma tsajkurámáanʼ wéñuʼ (Sal. 18:25).

15. Ndiéjunʼ ma̱ndoo muʼni mu mundxaʼwámi̱jna̱ rí májánʼ índo̱ rígá mbá rí maʼniulú mingíjyúuʼ náa congregación rá.

¹⁵ Xúgi̱ rí gítháán ma̱ʼkha̱ fin, xáʼniulu tsiánguá dí marigá tikhu rí maʼniulú gakhii náa congregación ga̱jma̱a̱ rúʼko̱ gamíi maʼni rí xaguajún jmbu náa Jeobá. Ndayóoʼ rí mundxaʼwamíjna̱ májánʼ. Á mu nakumulú rí mbáa ndxájulú niʼniulúʼ dí raʼkhí, xuyejxi̱i̱ sia̱nʼ. Á mu nuxpri̱gúlú xúʼyáá náa i̱ndó rí ma̱jti̱ʼ guʼyáá náa rí ma̱ndoo mambáyulú, guʼdxawíín consejo rí gúxnulú ga̱jma̱a̱ guriʼkumijnáá náa rí ndayóoʼ. Á mu náa xuajñuu Jeobá rígá mbá rí naxtiʼkhu̱u̱ ga̱jma̱a̱ rúʼko̱ naʼni maxtiʼkhuu asndu xóo kuwáanʼ ikháanʼ guʼni ga̱jma̱a̱ xúgíʼ a̱jkiu̱lú ga̱jma̱a̱ guʼnimbu̱lú ikha dí gúxnulú.

16. Ndiéjunʼ gándoo gámbáyáaʼ mu makumaaʼ xtayáá má xúʼko̱ Jeobá ga̱jma̱a̱ xuajñuu rá.

¹⁶ Índo̱ natraʼníí tsáʼkhá rí mariejún jmbu náa Jeobá ma̱ndoo makumaaʼ xtayáá má xúʼko̱ ikhaa ga̱jma̱a̱ xuajñuu. Mu ma̱ndoo matani rígi̱, ndayóoʼ rí matatsaʼwamínáʼ májánʼ xóo muʼthá rí xakiʼnán ga̱jma̱a̱ rí ma̱ta̱ya̱a̱ xóo má Jeobá ndaʼyoo. Atagíminaʼ rí matanigajma̱a̱ ga̱jma̱a̱ numún xa̱bu̱ bi̱ naʼthí náa Biblia bi̱ nikúwi̱i̱n xúʼko̱, ma̱ngaa atayaridúún. Atanda̱ʼa̱a̱ Jeobá rí mambáyáaʼ ma̱ngaa rí xátani tsínguminaʼ náa a̱ngiu̱lú. Garigá má dí gárígá, Gixa̱a̱ nditháan xáʼngo̱o̱ gáʼni tsínguáanʼ náa Jeobá ma̱ngaa náa xuajñuu (Sant. 4:7).