1. Ndiéjunʼ dí nuguáʼthíi̱nlu ga̱jma̱a̱ ndiéjunʼ dí nduʼyáá gajkhun rá.

 TSÉʼNIULÚ ma tsiánguá dí tikhuin xa̱bu̱ tsíñún gudxawíín dí nuʼtáraʼa, numuu dí nda̱wa̱á xa̱bu̱ muniulúʼ itháan gakhii (Dan. 11:44; 2 Tim. 3:12; Apoc. 16:21). Mú, nduʼyáá gajkhun dí Jeobá ma gámbáyulú. Xú káʼnii eʼyáá rá. Numuu dí ikhaa nimbañúún má xúʼko̱ xa̱bi̱i̱ mu munimbaníí ñajunʼ dí ikhaa nixnúún, maski ajndu gakhii nikumu̱ún ikhiin. Mu mbuʼyáá dí gajkhun nirígá rígi̱, guʼyáá tikhu dí nigíʼnuu profeta Ezequiel ikhaa niʼtaruʼúún judíos bi̱ nijkha kiʼdiin náa Babilonia.

2. a) Xkáʼnii nindxu̱ún Judíos bi̱ maʼgá gáʼtáruʼúún Ezequiel niʼthí Jeobá rá. (Ezequiel 2:3-6.) b) Ndiéjunʼ guʼyáá náa artículo rígi̱ rá.

² Xkáʼnii nindxu̱ún xa̱bu̱ bi̱ maʼgá gáʼtáruʼúún Ezequiel rá. Jeobá niʼthí dí judíos buʼko̱ “tsénimbu̱ún”, “xkujdiin” ga̱jma̱a̱ “tsédxuun mbá kayuuʼ”. Ra̱ʼkhá tháán ra̱míjíinʼ xóo tsúwáʼ ga̱jma̱a̱ ra̱ʼkhá xkawiinʼ xóo xi̱yúʼ. Ikha jngóo Jeobá niʼthúu̱n Ezequiel mbaʼa nuthu: “Xámiñaaʼ” (atraxnuu Ezequiel 2:3-6). b Timbá dí nimbáyúu Ezequiel mu majmaa ma’nimbánuu ñajunʼ dí nikhánáá ikhaa nindxu̱u̱ dí Jeobá nikungua̱a̱nʼ, ragajma, espíritu santo nixnúu tsiakii, ragajtsú, niguxnuu ajngá rawuunʼ Dios. Xú káʼnii nimbáyúu ajtsú enii rígi̱ xá. Xú embáyulú mangáán rí mbiʼi xúgi̱ rá.

3. Náa guaʼyaa ajngáa nixnúu tsiakii Ezequiel ga̱jma̱a̱ xkáʼnii nisngájmuu Jeobá dí ikhaa xtáa mambáyúu xá.

³ Jeobá niʼthúu̱n Ezequiel: “Nakuʼmáá” (Ezeq. 2:3, 4). Rúʼko̱ nixnúu wéñuuʼ tsiakii. Narmáʼáan a̱jkiu̱u̱n dí nijmuu ikhaa kayuuʼ ma ajngáa rígi̱ índo̱ niraʼwíí Moisés ga̱jma̱a̱ Isaías mu mani̱ndxu̱ún Profeta ndrígióo (Éx. 3:10; Is. 6:8). Ezequiel ndiʼyoo dí profeta bigi̱ nimbañúún mu munimbáníí dí niʼthúún maski ajndu gakhii nindxu̱u̱. Índo̱ Dios niʼthúu̱n a̱jma̱ nuthu “Nakuʼmáá”, ndiʼyoo kaʼwu dí ikhaa maxtáa mambáyúu. Ma̱ngaa náa libro ndrígóo Ezequiel nuxkamaa mbaʼa aʼphu̱ ajngáa: ‹Nigruigú ajngóo Jeobá› (Ezeq. 14:2). Ga̱jma̱a̱ mbaʼa aʼphu̱ nuxkamaa náa naʼthí: ‹Nigruígú mbu̱júu̱ ajngóo Jeobá› (Ezeq. 6:1). Xígi̱ káʼnii profeta bigi̱ ndiʼyoo kaʼwu dí Jeobá nindxu̱u̱ bi̱ nikunguaanʼ. Numuu dí anu̱u̱ ninindxu̱u̱ ndxajkun, mbáa ikhaa niʼsngóo dí Jeobá naʼthúún má xúʼko̱ profeta ndrígióo dí maxtáa ga̱jma̱a̱ nindxu̱ún mu mambáñún. Xígi̱ kaʼnii niʼthúún Isaac, Jacob ga̱jma̱a̱ Jeremías: “Ikhúúnʼ xtáá ga̱jma̱á ni̱ndxa̱ʼ” (Gén. 26:24; 28:15; Jer. 1:8).

4. Xkáʼnii nindxu̱u̱ ajngáa dí nixnáa tsiakii Ezequiel rá.

⁴ Xú káʼnii guriʼña̱a̱ israelitas ajngáa dí gáʼthúún xá. Jeobá niʼthúún Ezequiel: ‹Bi̱ kúwi̱i̱n náa Israel xáʼndúún gúdxawaanʼ numuu dí tsíñún gúdxawunʼ ikhúún› (Ezeq. 3:7). Dí xáʼndúún gudxawíín dí gáʼthí profeta bigi̱ nindxu̱u̱ asndu xóo Jeobá tsíñún gúndriguii. Ajngáa rígi̱ niʼni maʼnii a̱jkiu̱u̱n Ezequiel, mu xúʼko̱ xákumu̱u̱ dí nindxu̱u̱ mbáa profeta ra̱májáanʼ. Ma̱ngaa Jeobá niʼthúu̱n dí índo̱ gambánuu ajngáa dí gaʼthí, judíos buʼko̱ “maguanu mbuyáá rí nixtáa mbáa profeta náa majñúnʼ ikhiin” Ezeq. 2:5; 33:33). Ajngáa rígi̱ niʼni dí maxnúu tsiakii Ezequiel mu xúʼko̱ maʼnimbánuu ñajunʼ dí nikhánáá.

5. Náá numuu dí naxnáaʼlú tsiakii ajngáa dí naʼthí Isaías 44:8 rá.

⁵ Xúʼko̱ má mangáanʼlu nakhanááʼlu tsiakii mbuʼyáá dí Jeobá nindxu̱u̱ bi̱ nakuʼmáánʼlu. Ikhaa nindxu̱u̱ bi̱ niraʼwáánlú mu manindxu̱lú testigiu̱u̱ (Is. 43:10). Xó má niʼthúu̱n Jeobá Ezequiel “Xámiñaaʼ”, ikhaa naʼthúlú mangáánʼ “Xáguáʼáanʼla”. Náá numuu dí xáʼyóoʼ mamiñúlúʼ gúni̱ bi̱ xáʼndúún gudxawunlú rá. Numuu dí ikhaa kayuuʼ xó má Ezequiel, Jeobá nindxu̱u̱ bi̱ nakuʼmáánʼlu ma̱ngaa ikhaa xtáa mambáyúlú (atraxnuu Isaías 44:8). c

6. a) Xú káʼnii esngájmulú Jeobá dí xtáa mambáyúlú rá. b) Ndiéjunʼ eʼni maʼni̱i̱ a̱jkiu̱lú ga̱jma̱a̱ naʼni muʼda̱a̱lu tsiakii rá.

⁶ Jeobá nasngájmulú dí ikhaa xtaa mambáyulú mbá xkri̱da, nákha xóó tséthí “Ikháanʼ ñajuanla testigiu’” ikhaa niʼthí: ‹Índo̱ ganújngaaʼ náa iyaʼ, ikhúúnʼ maxtáá ga̱jma̱á ni̱ndxa̱ʼ; ga̱jma̱a̱ náa mañu xáguʼwi̱i̱n. Á mu xtaa ranújngaaʼ náa mbá aguʼ, xákháán, ni má riʼyu̱u̱ aguʼ xátsikháán› (Is. 43:2). Nguáná, índo̱ na̱jkua̱lú gúʼtáráʼa nuraʼníí dí naʼniulú mingíjyúuʼ dí asndu nindxu̱u̱ xóo mañu ma̱ngaa nuraʼníí tsáʼkhá rí asndu nindxu̱u̱ xóo aguʼ. Mú Jeobá ma nambáyulú muʼtáraʼa má xúʼko̱ (Is. 41:13). Naguaʼníí ikháá kayuuʼ xó má nigíʼnuu Ezequiel mbaʼiin xa̱bu̱ tsíñún gudxawíín ajngáa dí najkua kuʼyúlú. Mú, raʼkháa rúʼko̱ e̱yo̱o̱ gáʼthí dí na̱nguá ni̱ndxu̱lú mbáa májáanʼ xa̱bi̱i̱ Dios. Naʼni̱i̱ a̱jkiu̱lú ga̱jma̱a̱ naʼni̱i̱ muʼda̱a̱lu tsiakii mbuʼyáá dí Jeobá nadxu̱u̱ á mu dí nuʼtáraʼa má xúʼko̱. Apóstol Pablo niʼthí: “Mámbáa xa̱bu̱ magruigúu rí mada̱a̱ʼ xó má ñajunʼ rí niʼni” (1 Cor. 3:8; 4:1, 2). Mbáa ndxájulú bi̱ mbayuuʼ tsiguʼ má nindxu̱u̱ precursora niʼthí: “Ra̱ʼkhá tháán nadxuʼ mba̱yo̱o̱ dí Jeobá naʼni tsajkurámuuʼ tsiakii dí nuʼnilú”.

7. Xú káʼnii nikumu̱u̱ Ezequiel mámbá índo̱ nagi̱ʼi̱ nandxa̱ʼwáminaʼ náa visión dí ndiʼyoo xá. (Atayáá xtiʼkhu rí na̱ʼkha̱ náa timbá ináa.)

⁷ Ezequiel ni̱jkha̱nú ndiʼyoo nguáthá mba̱a̱ tsiakii gíʼdoo espíritu santo ndrígóo Dios. Náa visión rúʼko̱ ndiʼyoo xú káʼnii tsiakii rúʼko̱ rígá náa ángeles ga̱jma̱a̱ náa mbá carro dí rígá mekhuíí (Ezeq. 1:20, 21). Ikhaa mínaʼ niʼthí dí nigíʼnuu: ‹Índo̱ ndi̱yo̱o̱, nismbáti̱go̱ʼ›. Ra̱ʼkhá tháán mitsaanʼ ndiʼyoo dí asndu nigíʼ inuu mbayííʼ (Ezeq. 1:28). Mbáa mámbá índo̱ nagi̱ʼi̱ nandxa̱ʼwáminaʼ náa visión rúʼko̱, ni̱jkha̱nú ndiʼyoo dí tsiakii ndrígóo Dios ma gámbáyúu mu majmaa maʼtáraʼa.

8, 9. a) Ndiéjunʼ niʼtáñajuunʼ Jeobá Ezequiel rá. b) Ndiéjunʼ itháan niʼni Jeobá mu maxnúu tsiakii Ezequiel rá.

⁸ Jeobá niʼtáñajuunʼ Ezequiel: “A̱ʼdióo xa̱biya̱, atujxa̱a̱ʼ mu muʼtamíjná”. Kiʼtáñajunʼ rúʼko̱ ga̱jma̱a̱ espritu santo nixnúu tsiakii mu xúʼko̱ matujxi̱i̱. Ikhaa niʼnirámáʼ: “Ikhú xi̱ʼ nito̱ʼo̱o̱ náa ikhúún, niʼniún dí magújun” (Ezeq. 2:1, 2). Náa xúgíʼ mbiʼi dí ikhaa niʼtáráʼa, ‹ñawúunʼ Jeobá›, xóo muʼthá, espíritu santo nixnúu ikha (Ezeq. 3:22; 8:1; 33:22; 37:1; 40:1). Espíritu rúʼko̱ nixnúu tsiakii Ezequiel mu maʼga̱ gáʼtáruʼúún judíos ‹bi̱ tségíʼ edxu̱ún ga̱jma̱a̱ tsédxuun mbá kayuuʼ› (Ezeq. 3:7). Jeobá niʼthún: ‹Nini̱ dí maʼni gujkhuʼ inaaʼ xó má gujkhuʼ inún ga̱jma̱a̱ xkídaaʼ (o xuaaʼ) maʼni gujkhuʼ xó má xkídúnʼ ikhiin›. Ni̱ni̱ dí xkídaaʼ mani̱ndxu̱u̱ xóo mbá diamante, maʼni itháán gujkhuʼ xóo pedernal. Xámiñaaʼ ga̱jma̱a̱ xaguáʼáán gáʼni inún (Ezeq. 3:8, 9). Nindxu̱u̱ xóo asndu Jeobá niʼthún: “Xátatsiʼñáminaʼ makáguabáánʼ ga̱jma̱a̱ numuu dí tsédxuun mbá kayuuʼ. Ikhúún mani dí maʼni xkuijín”.

⁹ Ikhú espíritu santo ndrígóo Dios nijkha  kayáa náa gíʼmaa maʼtáraʼa. Ikhaa niʼnirámáʼ: ‹Ñawúunʼ Jeobá rígá náa ikhúún›. Profeta bigi̱ ndijyúuʼ mbá semana mu makro̱ʼo̱o̱ májánʼ xú káʼnii nindxu̱u̱ ajngáa dí gíʼmaa maʼthí (Ezeq. 3:14, 15). Nda̱wa̱á Jeobá niʼthúu̱n maʼga̱ náa mbá xkua̱, ikhí espíritu santo nito̱ʼo̱o̱ náa ikhaa (Ezeq. 3:23, 24). A̱ʼkhu̱ dí Ezequiel nixtáa xawii magíʼdu̱u̱ maʼtáraʼa.

10. Ndiéjunʼ eyulú mu ma̱ndoo muʼtáraʼa ga̱jma̱a̱ ndíjkha rá.

¹⁰ Ndiéjunʼ eyulú mu ma̱ndoo muʼtáraʼa rá. Mú muriʼña̱a̱ graxe̱ rígi̱ gundxa̱ʼwámi̱jna̱ ga̱jma̱a̱ numuu Ezequiel. Nákha ikhaa xóó tségíʼdu̱u̱ maʼtáraʼa, espíritu santo nixnúu tsiakii dí ndiyóoʼ. Xóo má Ezequiel, ndayúlú mangáánʼ espíritu santo mu muʼtáraʼa. Náá numuu nuʼthálu rígi̱ rá. Numuu dí Gixa̱a̱ naʼni xóo ma eʼngo̱o̱ mu maguijithu̱u̱n dí nuʼtáraʼa (Apoc. 12:17). Mbáa ikháanʼ ma̱ndoo makumulú dí Gixa̱a̱ nindxu̱u̱ xóo mbáa bi̱ sia̱nʼ gajmiúlú bi̱ ra̱ʼkhá tháán xkujííʼ. Mú índo̱ nuʼtáraʼa ikháanʼ naʼngulú ma̱ngaa, xúʼko̱ nusngajmáá dí tsémiñúlú eʼni xúgíʼ dí Gixa̱a̱ naʼni mu mamiñúlúʼ (Apoc. 12:9-11). Dí ma̱ndoo muʼtáraʼa maski ajndu nuni̱ gínáanʼlu nasngájma dí espíritu santo naxnúlú tsiakii ma̱ngaa dí Jeobá naniguuʼ dí kuwáanʼ ruʼnilú (Mat. 5:10-12; 1 Ped. 4:14).

11. Xkáʼnii embáyulú espíritu santo ga̱jma̱a̱ ndiéjunʼ gíʼmaa muʼni mu mundrígúlú má xúʼko̱ rá.

¹¹ Dí Jeobá niʼni maʼni gujkhuʼ inuu ga̱jma̱a̱ xkídoo Ezequiel naʼni mbuʼyáálú dí espíritu santo ma̱ndoo mambáyulú náa xkujndu dí guraʼníí índo̱ guʼtáraʼa (2 Cor. 4:7-9). Ndiéjunʼ gíʼmaa muʼni mu mundrígúlú má xúʼko̱ espíritu santo ndrígóo Dios rá. Munda̱ʼa̱a̱lú má xúʼko̱ índo̱ guʼtákáñíí ga̱jma̱a̱ dí mbuʼyáá gajkhun rí Jeobá naʼdxa̱wunlú. Jesús niʼthúún xa̱bi̱i̱: “Gunda̱ʼa̱ má xúʼko̱”, “guʼyáʼ má xúʼko̱” ga̱jma̱a̱ “gudi̱i̱ má xúʼko̱ xkrugua”. Ndiéjunʼ gáʼni Jeobá rá. Ikhaa “maxnúún espíritu santo bi̱ gúnda̱ʼa̱a̱” (Luc. 11:9, 13; Hech. 1:14; 2:4).

12. Xó má eʼthí Ezequiel 2:9-3:3, náá ni̱ʼkha̱ rollo ga̱jma̱a̱ ndiéjunʼ eʼthí rá.

¹² Maski ajndu Ezequiel nikhánáá tsiakii niʼni  espíritu santo, mu ma̱ngaa niguxnuu má xúʼko̱ ajngá rawuunʼ Dios. Náa mbá visión, ikhaa ndiʼyoo ñawúunʼ mbáa bi̱ kayá mbá rollo (atraxnuu Ezequiel 2:9-3:3). d Náá ni̱ʼkha̱ rollo rá. Ndiéjunʼ eʼthí rá. Ga̱jma̱a̱ xú káʼnii nimbáyúu Ezequiel rúʼko̱ rá. Rollo ni̱ʼkha̱ náa trono ndrígóo Jeobá. Mbáa Dios nijmiuu mbáa bi̱ a̱jkhui̱i̱n ángeles bi̱ Ezequiel ndiʼñún mu maxnáxu̱u̱ rollo (Ezeq. 1:8; 10:7, 20). Rollo na̱ʼkha̱ raʼthí ajngóo Dios dí maʼtariyáʼ Ezequiel dí mugiʼníí xa̱bu̱ bi̱ tsénimbu̱ún kayuuʼ bi̱ nijkha kiʼdiin náa Babilonia (Ezeq. 2:7). Ajngáa rígi̱ kiʼnirámáʼ inuu ga̱jma̱a̱ kidxuuʼ rollo.

13. a) Ndiéjunʼ niʼthúu̱n Jeobá Ezequiel maʼni ga̱jma̱a̱ rollo rá. b) Náá numuu dí taun rá.

¹³ Jeobá niʼthún profeta ndrígóo: “Atsu rollo […] gagíʼmááʼ gáʼni ikhaa”. Ndiéjunʼ e̱yo̱o̱ gáʼthúu̱n visión rígi̱ rá. Dí Ezequiel ndayóoʼ makro̱ʼo̱o̱ májánʼ ajngáa dí gíʼmaa maʼtáriyaʼ. Ikhaa ndayóoʼ mbaʼyoo dí gajkhun nindxu̱u̱ ajngáa rígi̱ mu xúʼko̱ maxkajxi̱i̱ maʼtáraʼa. Ikhú nirígá mbá dí tagíʼthu̱u̱n. Ezequiel ni̱jkha̱nú ndiʼyoo dí rollo “ra̱ʼkhá tháán taun xóo yááʼ” (Ezeq. 3:3). Náá numuu rá. numuu dí ikhaa ndiʼyoo dí ra̱ʼkhá tháán mitsaanʼ nindxu̱u̱ dí maʼtáriyaʼ ajngóo Jeobá (Sal. 19:8-11). Ra̱ʼkhá tháán nixnáa numaaʼ Jeobá numuu dí niraʼwíi mani̱ndxu̱u̱ profeta ndrígióo.

14. Ndiéjunʼ nimbáyúu Ezequiel mu maxtáa xawii maʼnimbánuu ñajunʼ dí nikhánáá rá.

¹⁴ Nda̱wa̱á, Jeobá niʼthún Ezequiel: ‹Atadxuun ga̱jma̱a̱ atagíʼ edxa̱a̱ʼ xúgíʼ ajngáa dí natha̱a̱nʼ› (Ezeq. 3:10). Jeobá xtáa raʼthúu̱n dí maʼni marmáʼáan a̱jkiu̱u̱n ajngáa dí kiʼnirámáʼ náa rollo ga̱jma̱a̱ mandxaʼwáminaʼ dí na̱ʼkha̱ raʼthí ikhí. Rúʼko̱ gámbáyúu mu maʼni itháán gujkhuʼ fe ndrígóo Ezequiel ma̱ngaa dí makro̱ʼo̱o̱ kaʼwu ajngáa dí maʼthúún xa̱bu̱ (Ezeq. 3:11). Nda̱wa̱á dí ni̱jkha̱nú nikro̱ʼo̱o̱ májánʼ ajngáa dí niʼthúu̱n Dios, Ezequiel nixtáa xawii mu magíʼdu̱u̱ maʼtáraʼa ga̱jma̱a̱ maʼnimbánuu ñajunʼ dí nikhánáá (atayáá ma̱ngaa Salmo 19:14).

15. Ndiéjunʼ gíʼmaa makru̱ʼu̱lú májánʼ mu xúʼko̱ xúniʼñáánʼ ruʼtáraʼa rá.

¹⁵ Mú xúniʼñáánʼ ruʼtáraʼa ndayóoʼ muraxnuu má xúʼko̱ ajngá rawunʼ Dios. Ndayóoʼ makru̱ʼu̱lú májánʼ xúgíʼ dí Jeobá naʼthúlú. Dí mbiʼi xúgi̱ najmuu Biblia ma maʼthúlú. Ndiéjunʼ gíʼmaa muʼni mu mbuʼyáá á mu dí Ajngáa rawuunʼ Dios nambáyulú mu mundxaʼwamíjná, ga̱jma̱a̱ makumulú ma̱ngaa muʼni xó má na̱ʼkha̱ raʼthí ikhí rá.

16. a) Dí gándoo gúʼni ga̱jma̱a̱ Ajngá rawuunʼ Dios rá. b) Ndiéjunʼ gándoo gámbáyulú mu majmáán rá.

¹⁶ Índo̱ nuphiʼtsu ga̱jma̱a̱ índo̱ naʼnu̱u̱ dí naʼphu̱lu rúʼko̱ nambáyúu xuyulúʼ. Fe ndrígúlú ma̱ngaa naʼni gujkhuʼ índo̱ nuraxnuu Ajngá rawuunʼ Dios ga̱jma̱a̱ nundxaʼwamíjná dí naʼthí ikhí. Ikhaa rígi̱ dí Jeobá nindoo maʼsngúlú náa visión ndrígóo rollo. Ikhaa nandoo dí “magiʼmulu” ga̱jma̱a̱ Ajngá rawuunʼ, dí makru̱ʼu̱lú ajngóo. Majmáanʼ muʼni rígi̱ á mu nuʼtajkháan, nuraxnuu ga̱jma̱a̱ nundxaʼwamíjná dí naʼthí ikhí. Ginii nuʼtajkháan mu muʼniratháá a̱jkiu̱lú mu xúʼko̱ makru̱ʼu̱lú dí nandxa̱ʼwáminaʼ Dios. Nda̱wa̱á dí nuraxnulú mbá chíʼgíiʼ dí naʼthí náa Biblia nuguajúnlu mu mundxa̱ʼwa̱míjna̱ ga̱jma̱a̱ tsumáá náa niraxnuu. Ndiéjunʼ garigá á mu nuʼni xúʼko̱ rá. Índo̱ itháán endxaʼwamíjna̱ náa niraxnuu, itháán májánʼ gákru̱ʼu̱lú dí naʼthúlú náa Ajngá rawuunʼ Dios.

17. Ndíjkha gíʼdoo wéñuʼ numuu mundxaʼwamíjna̱ dí nuraxnuu náa Biblia rá.

 ¹⁷ Náá numuu dí gíʼdoo wéñuʼ numuu muraxnuu Biblia ga̱jma̱a̱ mundxaʼwamíjna̱ dí naʼthí ikhí rá. Numuu dí rúʼko̱ gáxnulú tsiakii dí ndayúlú mu muʼthá ga̱jma̱a̱ numuu Reino xúgi̱ ga̱jma̱a̱ nda̱wa̱á dí nánguá má tígo̱o̱ mbayuuʼ dí ikháanʼ muʼthá ajngáa dí maguáʼníí xa̱bu̱. Ma̱ngaa índo̱ nundxaʼwamíjná xúgíʼ cualidad mitsaanʼ dí Jeobá gíʼdoo, nambáyulú mu mambaxúlúʼ má xúʼko̱ gajmiúlú. Xúgíʼ rígi̱ naʼni mbuʼyáá dí nindxu̱u̱ xóo mbá dí taun ga̱jma̱a̱ mitsaanʼ: Naʼni marigá dí tsímáá náa a̱jkiu̱lú ga̱jma̱a̱ makuwáanʼlu gagi (Sal. 119:103).

18. Ndiéjunʼ dí maguanu mbuyáá xa̱bu̱ bi̱ nuʼtáruʼúún ga̱jma̱a̱ ndíjkha rá.

¹⁸ Maski ajndu ikháanʼ na̱nguá ni̱ndxu̱lú mbáa profeta xóo má Ezequiel, mú kuáʼdáá Ajngá rawuunʼ Jeobá. Ga̱jma̱a̱ nuʼthá má xúʼko̱ numuu Jeobá asndu índo̱ ikhaa gáʼthí dí ní xúʼtáraʼa itháán. Índo̱ gáʼga̱nú mbiʼi rúʼko̱ xa̱bu̱ bi̱ kúwi̱i̱n náa nuʼtáraʼa xúthi dí tajuiʼthúún numuu dí Dios naniñuuʼ dí muʼtáruʼúún xa̱bu̱ buʼko̱ (Ezeq. 3:19; 18:23). Ma̱ngaa maguánú mbuʼyáá dí ajngáa dí niʼtáraʼaʼ ni̱ʼkha̱ náa Dios.

19. Náá mínaʼ gákhánúlú tsiakii mu xákanajkulú muʼtáraʼa má xúʼko̱ rá.

¹⁹ Náá mínaʼ gákhánúlú tsiakii mu xákanajkulú muʼtáraʼa má xúʼko̱ rá. Guáʼdáá ajtsú enii dí nimbáyúu Ezequiel. Nuʼtáraʼa má xúʼko̱ numuu dí nduʼyáá dí Jeobá nindxu̱u̱ bi̱ nikuʼmáán, numuu dí espíritu santo naxnúlú tsiakii ma̱ngaa dí muraxnuu Ajngá rawuunʼ Dios. Numuu dí Jeobá xtáa mambáyulú ikha jngóo xákanajkulú muʼtáraʼa má xúʼko̱ “asndu índo̱ gátumuu mbiʼi” (Mat. 24:13).