1, 2. a) Ndiéjunʼ gúʼnigajma̱a̱ náa artículo rígi̱ rá. b) Ndiéjunʼ esngájma rí Jeobá nandoo mambáyulú rá.

 JEOBÁ ma̱ndoo mambáyulú maʼngulú muraʼníí xkujndu ma̱ngaa rí muʼni ñajuunʼ ga̱jma̱a̱ gagi. Náa artículo rígi̱ mbuʼyáá xú káʼnii eʼni ma̱ngaa ndiéjunʼ gáʼyóoʼ muʼni ikháanʼ mu ikhaa mambáyulú. Mú ginii muriʼña̱a̱ graxe̱ rígi̱, “lá gajkhun rí Jeobá nandoo mambáyulú ráʼ.”

² Mu muriʼña̱a̱ graxe̱ rígi̱, guʼyáá ajngáa rí niʼnirámáʼ apóstol Pablo náa i̱yi̱i̱ʼ dí maʼga̱ inún bi̱ Hebreos. Ikhaa niʼthí: “Jeobá nindxu̱u̱ bi̱ nambáyuʼ. Xámiñuʼ, ndiéjunʼ lá gándoo maʼniuʼ mbáa xa̱bu̱ú rá.” (Heb. 13:6.) Náa tikhu diccionario ndrígóo Biblia naʼthí rí ajngáa “bi̱ nambáyúʼ” najuiʼtájui̱i̱ náa versículo rígi̱, xóo mbáa xa̱bu̱ bi̱ na̱jkha̱ ragáyúu mu mambáyúu bi̱ ndayóoʼ. Gundxaʼwamíjna̱ Jeobá xtaa ragáyúu mu mambáyúu mbáa bi̱ xtaa naxmiéjuunʼ. Phú gajkhun dí rígi̱ nasngájma rí Jeobá raʼkháa i̱ndó xtáa xawii mu mambáyúlú, ikhaa naʼni ga̱jma̱a̱ xúgíʼ a̱jkiu̱u̱n. Xtáa Jeobá ga̱jma̱a̱ nindxu̱lú, ikha jngóo maʼngulú muraʼníí xkujndu rí asndu xándatígu̱lú gagi.

3. Xú káʼnii ajtsú enii nambáyulú Jeobá mu maʼngulú ga̱jma̱a̱ rí asndu xándatígulú gagi rá.

³ Xú káʼnii embáyuluʼ Jeobá mu maʼngulú ga̱jma̱a̱ rí makuwáánʼ gagi má xúʼko̱ rá. Náa libro ndrígóo Isaías naxtiʼña̱a̱ graxe̱ rígi̱. Numuu rí mbaʼa profecía dí niʼnirámáʼ profeta Isaías ga̱jma̱a̱ espíritu santo, nambáñúún wéñuʼ xa̱bi̱i̱ Dios rí mbiʼi xúgi̱. Mbaʼa nuthu niʼthí Isaías rí Jeobá najmuu ajngáa dí ragákhíi makrua̱ʼa̱a̱ʼ. Mbá xkri̱da náa capítulo 30 najmuu xkri̱da mitsaanʼ wéñuʼ xú káʼnii Jeobá nambáyúu xuajñuu. Ikhí naʼthí rí Jeobá 1) naʼdxawún májánʼ ga̱jma̱a̱ nariʼña̱a̱ rí nutakháñii, 2) naxnún ikha, 3) naʼni tsajkurámiinʼ xúgi̱ ga̱jma̱a̱ maʼni tsajkurámiinʼ nda̱wa̱á. Guʼyáá mbá ajtsú dí ikhaa mú, mambá guʼgua̱ ruʼyáá.

4. a) Nákha mbiʼi rí nixtáa Isaías, ndiéjunʼ niʼthí Jeobá magíʼnún judíos ga̱jma̱a̱ ndiéjunʼ rí niniñuuʼ mugíʼniin xá. b) Ndiéjunʼ nikudaminaʼ Jeobá maʼni ga̱jma̱a̱ nindxu̱ún judíos bi̱ niguájun jmbu rá. (Isaías 30:18, 19.)

⁴ Náa nagi̱ʼdu̱u̱ capítulo 30 ndrígóo Isaías, Jeobá niʼthúún judíos ‹e̱ji̱n bi̱ tsédxuun› ga̱jma̱a̱ niʼthúún xóo, ‹rí nuni itháán aʼkhá›. Niʼthúún: “Nindxa̱la mbá xuajen bi̱ tséʼnimbo̱o̱ [...] bi̱ tsíñún gudxawíín xtángoo ndrígóo Jeobá” (Is. 30:1, 9). Ga̱jma̱a̱ numuu rí túnimbu̱ún, Isaías niʼthúún rí Jeobá maniñuuʼ rí mumíniiʼ wéñuʼ (Is. 30:5, 17; Jer. 25:8-11). Ga̱jma̱a̱ xúʼko̱ má ni̱jkha̱nú nirígá, numuu rí xa̱bu̱ Babilonia nigún kudiin náa xuajñún. Mú nikúwi̱i̱n tikhun judíos bi̱ niguájun jmbu, ikha jngóo profeta Isaías nigiʼdoo mbá ajngáa rí májánʼ maʼthúún, rí maʼga̱nú mbá mbiʼi rí Jeobá maʼndoo kaʼñún mbu̱júu̱ (atraxnuu Isaías 30:18, 19). b Ajngáa rúʼko̱ nimbánuu, Jeobá niʼni káwíin xa̱bi̱i̱ náa Babilonia, mú na̱nguá niʼni nacha̱. Ajngáa “Jeobá maxtáa xawii mu mambáyala” naʼni makru̱ʼu̱lú dí ndayóoʼ manújngoo mba̱yu̱u̱ʼ mbiʼi mu xúʼko̱ judío bi̱ niguájun jmbu maguma káwíin. Ninújngoo mbá 70 tsiguʼ, índo̱ niniñuuʼ rí tikhuun judíos matangi̱ín náa Jerusalén (Is. 10:21; Jer. 29:10). Índo̱ nitangiín náa xuajñún, rí nimbiyaʼ gínún náa Babilonia rúʼko̱ niʼni̱i̱ rí nimbiyaʼ gagi índo̱ niguwáa̱nʼ náa xuajñún.

5. Ndiéjunʼ eʼthúlú náa Isaías 30:19 rá.

⁵ Rí mbiʼi xúgi̱ ajngáa rígi̱ naxnúlú wéñuʼ tsiakii: “Índo̱ natatsaʼwá rí mixtambáyáaʼ ikhaa phú gajkhun rí magáwíinʼ a̱jkiu̱u̱n kaʼyaaʼ” (Is. 30:19). Isaías naʼthúlú rí Jeobá naʼdxa̱wu̱nlú májánʼ índo̱ nuʼtákáñii ga̱jma̱a̱ ikhaa nariʼñulú nacha̱. Profeta naʼthí xóó: “Mariʼñaa índo̱ gáʼdxawaanʼ”. Ajngáa rígi̱, naʼni marmáʼáan a̱jkiu̱lú rí Jeobá raʼkháa i̱ndó naxtáa xawii mambáñún bi̱ nunda̱ʼa̱a̱ ma̱ngaa rí nandoo maʼni ga̱jma̱a̱ xúgíʼ a̱jkiu̱u̱n. Índo̱ nduʼyáá xúgíʼ, rígi̱ naʼni rí maʼngulú ga̱jma̱a̱ rí makuwáánʼ gagi.

6. Ajngáa rí niʼnirámáʼ Isaías, xú káʼni eʼni mbuʼyáá rí Jeobá naʼdxawuun rí nutajkháan xa̱bi̱i̱ rá.

⁶ Náa versículo rígi̱ ma̱ngaa naʼthúlú rí Jeobá naʼdxawuun májánʼ rí nuʼtákáñii, ndíjkha rí nuʼthalu rígi̱ rá. Numuu rí náa timbá níʼkhóo capítulo 30 ndrígóo Isaías, Jeobá naʼthí “ikháanʼla”, naʼthí ga̱jma̱a̱ numuu mbaʼin numuu dí xtáa raʼthúu̱n xuajñuu. Mú náa versículo 19 naʼthí “ikháán”, naʼthí ga̱jma̱a̱ numuu mbáwíí xa̱bu̱ numuu dí xtáa raʼthúu̱n mambáa xa̱bi̱i̱. Isaías naʼthí: “Ikháán nánguá matambiyaʼ” “ikhaa magáwíinʼ a̱jkiu̱u̱n kaʼyaaʼ” ga̱jma̱a̱ “ikhaa mariʼñaaʼ”. Numuu rí Jeobá nindxu̱u̱ mbáa Anulú bi̱ nandoo kaʼyulú, índo̱ mbáa a̱ʼdióo xtáa gíná ikhaa na̱nguá eʼthúu̱n: “Ndayóoʼ rí maʼni gakhii a̱jkia̱a̱nʼ xóo má ndxájuaaʼ”. Rí phú naʼni naxmiéjuunʼ kaʼyoo mambáa rí ikháanʼ ga̱jma̱a̱ naʼdxawuun rí nuʼtákáñii (Sal. 116:1; Is. 57:15).

7. Xú káʼnii mbríguii rí niʼthí Isaías ma̱ngaa Jesús rí xuniʼñáá ruʼtájkáan rá.

⁷ Índo̱ nuʼtákáñii Dios ndrígulú mbá rí naʼni maxmiéjunlú, mbáa rí ginii naʼni, naxnúlú tsiakii mu maʼngulú muraʼníí xkujndu. Á mu xkujndu na̱nguá endatiga̱a̱ nacha̱ xóo má ikháán nandulú, mbáa mbaʼyoo munda̱ʼa̱a̱ mbaʼa nuthu rí maxnúlú tsiakii mu maʼngulú. Ga̱jma̱a̱ ikhaa má naʼthúlú muʼni. Rígi̱ rí nandoo gaʼthí náa ajngáa dí niʼnirámáʼ Isaías: “Xuniʼñáá rí mbayáaʼ jxu̱u̱ʼ” xóo muʼthá Jeobá (Is. 62:7). Ndiéjunʼ eyoo gáʼthúu̱n rúʼko̱ rá. Rí xuniʼñáá rutajkáan xóo muʼthá xuniʼñáá rí mbayáaʼ jxu̱u̱ʼ Jeobá. Rígi̱ naʼni marmáʼáan a̱jkiu̱lú rí niʼthí Jesús ga̱jma̱a̱ numuu rí muʼtájkáan rí nuxkamaa náa Lucas 11:8-10, 13. Nijmuu mbaʼa xkri̱da, ikhaa niʼthúlú rí “xuniʼñáá ruʼtájkáan  ma̱ngaa rí guʼni gajmáá má xúʼko̱” ga̱jma̱a̱ rí gunda̱ʼa̱a̱ má xúʼko̱ espíritu santo. Ma̱ngaa ma̱ndoo munda̱ʼa̱a̱ Jeobá rí maxnúlú ikha mu muraʼwíí májánʼ rí muʼni.

8. Xú káʼnii nimbánuu ajngáa rí naʼthí náa Isaías 30:20, 21 rá.

⁸ (Atraxnuu Isaías 30:20, 21). c Ejército Babilonia niruguama̱ʼa̱a̱n xuajen Jerusalén mbá tsiguʼ tikhu. Náa mbá xúgíʼ mbiʼi rúʼko̱ judíos nimíniiʼ wéñuʼ ga̱jma̱a̱ ra̱ʼkhá tháán nixmiéjúúnʼ mambá mbiʼi. Xóo má naʼthí náa versículo 20 ga̱jma̱a̱ 21, Jeobá nikudaminaʼ rí maʼni káwíin á mu natanga̱a̱ a̱jkiu̱ún ga̱jma̱a̱ nuriʼkhumijná xóo nuni. Isaías niʼthí rí Jeobá nindxu̱u̱ “Mbáa bi̱ naʼsngáa itháán májánʼ” náa xuajñuu ma̱ngaa nikudaminaʼ rí Jeobá maʼsngúún xóo má ikhaa nandoo. Ajngáa rígi̱ nimbánuu índo̱ judío niguma káwíin náa Babilonia. Jeobá nisngájma rí ikhaa nindxu̱u̱ mbáa bi̱ naʼsngáa itháán májánʼ. Núma̱aʼ má ikha ndrígóo, judíos niʼngo̱o̱ ndiyamajkuíí Jeobá xóo má kaʼyoo. Rí mbiʼi xúgi̱, Jeobá nindxu̱u̱ mbáa bi̱ naʼsngáa itháán májánʼ ga̱jma̱a̱ rúʼko̱ naʼni rí makuwáánʼ gagi.

9. Xú káʼnii exnúlú ikhaa Jeobá rí mbiʼi xúgi̱ rá.

⁹ Mitsaanʼ wéñuʼ nindxu̱u̱ xóo Jeobá naʼsngúlú. Náa versículo rígi̱, Isaías naʼni mbríguáanʼ xóo tikhun e̱ji̱n bi̱ Jeobá naʼsngúún a̱jma̱ numuu. Timbá numuu, Isaías naʼthí: “Ma̱ta̱ya̱a̱ bi̱ naʼsngáaʼ itháán májánʼ ga̱jma̱a̱ idaaʼ”. Náa xkri̱da rígi̱, bi̱ naʼsngáa wíji̱ náa inún e̱ji̱n bi̱ naʼsngúún. Xú káʼnii eʼsngúlú Jeobá rí mbiʼi xúgi̱ rá. Najmuu xuajñuu mu maʼsngulúʼ. Kuwáanʼlu gagi ga̱jma̱a̱ numuu kiʼsngáa kaʼwu rí najmañulú náa reunión, náa asamblea, náa iyulú, náa JW Broadcasting^® ga̱jma̱a̱ náa i̱ʼwáʼ rí nagájnuu náa xuajñuu. Xúgíʼ ikha rí nundrígúlú nambáyulú mu maʼngulú ga̱jma̱a̱ gagi índo̱ kuwáanʼlu náa mbiʼi mingíjyúuʼ.

10. Xú káʼnii eʼdxawíínʼlú aʼwóo Dios náa kidxulú rá.

¹⁰ Isaías naʼthí rí maʼni a̱jma̱ numuu xóo naʼsngúlú Jeobá: “Mínaaʼ ikháán gátadxawiin ajngáa rígi̱ náa kidxaaʼ”. Rí xúgi̱ profeta Isaías naʼthí rí Jeobá nindxu̱u̱ xóo mbáa bi̱ naʼsngáa bi̱ na̱jkha̱ kidxúúnʼ e̱ji̱n bi̱ nuniga̱jma̱a̱ ma̱ngaa naxná ikhúún mu xúʼko̱ mbuyáá náá mínaaʼ gágún. Xú káʼnii eʼdxawíínlú aʼwóo Dios náa kidxulú rí mbiʼi xúgi̱ rá. Dí muraxnulú Biblia, numuu dí ikhí nigumaraʼmáʼ ajngóo Dios ga̱jma̱a̱ xi̱ʼ kaʼwu asndu nákha wajyúuʼ. Índo̱ nuraxnuu ajngóo nindxu̱u̱ asndu xóo nuʼdxawíín aʼwóo Jeobá naʼthúlú náa kidxulú, numuu rí nigumaraʼmáʼ asndu nákha wajyúuʼ (Is. 51:4).

11. Ndiéjunʼ gíʼmaa muʼni mu maʼngulú ga̱jma̱a̱ gagi rá. Ga̱jma̱a̱ náá numuu rá.

 ¹¹ Ndiéjunʼ gíʼmaa muʼni mu mambáyulú asndu xóo má eʼngo̱o̱ ikha rí naxnúlú Jeobá náa xuajñuu ga̱jma̱a̱ náa Ajngóo rá. Isaías niʼthí a̱jma̱ numuu. Timbá nindxu̱u̱ “Rígi̱ nindxu̱u̱ kamba̱a̱” dí maʼni raga̱jma̱ “Gangruiga̱a̱ ikhí” (Is. 30:21). Ikha jngóo raʼkháa i̱ndó ndayóoʼ muniʼnuuʼ kambo̱o̱ ma̱ngaa ndayóoʼ majngruigulú ikhí. Núma̱aʼ má Ajngóo Jeobá ga̱jma̱a̱ xóo naʼtájuíi xuajñuu, najmañulú ndiéjunʼ gíʼthu̱u̱n náa ikháánʼlu ga̱jma̱a̱ rí muʼgíʼ muʼni rí ikhaa naʼsngúlú. Gíʼmaa rí muʼni a̱jma̱ rígi̱ mu xúʼko̱ maʼngulú ga̱jma̱a̱ gagi rí muʼni ñajuunʼ Jeobá. I̱ndó xúʼko̱ ma̱ndoo mbuʼyáá kaʼwu rí ikhaa maʼni tsajkurámáanʼ.

12. Xóo má naʼthí náa Isaías 30:23-26, xú káʼnii gáʼni tsajkurámuuʼ Jeobá xuajñuu rá.

¹² (Atraxnuu Isaías 30:23-26). d Xú káʼnii nimbánuu profecía rígi̱ nákha wajyúuʼ rá. Judíos bi̱ nitangiín náa Israel bi̱ nijkha kiʼdiin náa Babilonia niguma tsajkurámiinʼ wéñuʼ, xóo rí nda̱ñu̱u̱n makuwá ga̱jma̱a̱ ma̱ngaa rí mambajxu̱u̱n gajmiún Dios. Jeobá nixnúún mbaʼa wéñuʼ ganitsu rí nda̱ñu̱u̱n. Mú nirígá mbá rí itháán nigiʼdoo numuu. Xóo má índo̱ nigún ruyamajkuíí xóo má kaʼyoo, ikhaa nixnúún itháán rí mambáñún mambajxu̱u̱n itháán májánʼ gajmiún ikhaa. Numuu rí nákha ginii xuajñuu Dios na̱nguá eguma tsajkurámaaʼ wéñuʼ asndu mbiʼi rí naguwáanʼ judíos. Xóo má naʼthí náa versículo 26, rí Jeobá niʼni tsajkurámiin itháán (Is. 60:2). Núma̱aʼ má rúʼko̱ israelitas nikúwá gagi ga̱jma̱a̱ niguaʼdáá tsiakii mu muni má xúʼko̱ ñajuunʼ. Phú gajkhun rí tsímáá niʼni̱i̱ a̱jkiu̱ún (Is. 65:14).

13. Lá nimbánuu profecía rí mbiʼi xúgi̱ ga̱jma̱a̱ numuu rí xóo phú gíʼmaa mbiʼyamajkuíí Jeobá rá.

¹³ Lá nimbánuu profecía rí mbiʼi xúgi̱ ga̱jma̱a̱ numuu rí xóo phú gíʼmaa mbiʼyamajkuíí Jeobá rá. Xúʼko̱, asndu nákha tsiguʼ 1919, mbaʼin wéñuʼ xa̱bu̱ nigájni̱ín náa Babilonia rí mba̱a̱, náa religión bi̱ nusngáa rí minduwaʼ dí rígá náa numbaaʼ rígi̱. Xúgíinʼ bi̱ nigájni̱ín ikhí niguáán náa mbá rí itháán májánʼ ki xóo náa ku̱ba̱ʼ rí nitaʼáán israelitas: Náa tsímáá rí naxná xuajñuu Dios (Is. 51:3; 66:8). Ndiéjunʼ nindxu̱u̱ rá.

14. Ndiéjunʼ nindxu̱u̱ tsímáá dí rígá náa xuajñuu Dios ga̱jma̱a̱ tsíín kúwi̱i̱n dí mbiʼi xúgi̱ rá. (Atayáá nota.)

 ¹⁴ Asndu nákha tsiguʼ 1919, bi̱ kaxtaʼwíin kúwá gagi runi ñajuunʼ Dios náa xuajñuu. e Índo̱ ni̱jkha̱ ranújngoo tsiguʼ cristianos bi̱ guáʼthi̱i̱n makuwá náa tsu̱du̱u̱ Ku̱ba̱ʼ gi̱i̱, bi̱ nindxu̱ún eʼwíinʼ mugu̱, mangiin nitu̱ʼu̱u̱n náa xuajñuu Dios ga̱jma̱a̱ Jeobá niʼni tsajkurámiin wéñuʼ (Juan 10:16; Is. 25:6; 65:13).

15. Náá rígá tsímáá rí na̱ʼkha̱ náa Dios rá.

¹⁵ Náá rígá tsímáá rí na̱ʼkha̱ náa Dios rí mbiʼi xúgi̱ rá. Numuu rí náa xúgíʼ tsu̱du̱u̱ Ku̱ba̱ʼ kúwi̱i̱n xa̱bi̱i̱ Jeobá ikha jngóo dí tsímáá rígá ikhí. Tséʼniuu má náá mínaaʼ xtaa ma̱ndoo maraxtaa ikhí mangáán á mu natambáyíí ga̱jma̱a̱ xúgíʼ a̱jkia̱a̱nʼ xóo mbiʼyamajkuíí Jeobá.

16. Ndiéjunʼ gáʼyoo muʼni mu mbuʼyáá má xúʼko̱ náa rí májánʼ dí nuni a̱ngiu̱lú rá.

¹⁶ Mbá rí ndayóoʼ muʼni mu makuwáanʼ má xúʼko̱ náa tsímáá rí na̱ʼkha̱ náa xuajñuu Dios rí mbuʼyáá dí gíʼdoo numuu dí nuni a̱ngiu̱lú. Xú káʼnii guʼni rá. Rí mbuʼyáá náa dí májánʼ rí nuni, raʼkháa náa dí najnga̱wi̱i̱n (Juan 17:20, 21). Ndíjkha rí gíʼdoo wéñuʼ numuu muʼni rígi̱ rá. Gundxaʼwamíjna̱ náa xkri̱da rígi̱, náa mbá xaxi̱ rígá mbaʼa wéñuʼ ixi̱. Xúʼko̱ má kayuuʼ náa tsímáá dí rígá náa xuajñuu Dios kúwi̱i̱n mbaʼin wéñuʼ a̱ngiu̱lú bi̱ nindxu̱ún xóo ixi̱ rúʼko̱ (Is. 44:4; 61:3). Xuniʼñáá rí xóo xkawiʼ guájun ixi̱ maʼni rí xúʼyáá dí mitsaanʼ i̱ʼwáʼ dí rígá ikhí. Xóo muʼthá xuniʼñáá rí ga̱jma̱a̱ numuu rí nakieʼkulú o ga̱jma̱a̱ numuu rí najnga̱wi̱i̱n a̱ngiu̱lú maʼni rí xúʼyáá xóo mitsaanʼ embájxu̱u̱n a̱ngiu̱lú náa mbá xúgíʼ numbaaʼ.

17. Ndiéjunʼ gíʼmaa maʼni mambáa dí ikháanʼ mu makuwáánʼ mbá kambáxulú náa congregación rá.

¹⁷ Ndiéjunʼ gándoo maʼni mambáa rí ikháanʼ mu makuwáanʼ mbá kambáxulú rá. Rí muʼni tsiakimijna mu marigá rí tsímáá (Mat. 5:9; Rom. 12:18). Mambá índo̱ nuʼnimíjna rí makuwáánʼ mbá kambáxulú gajmiúlú a̱ngiu̱lú náa congregación, nuʼni rí tsímáá rí na̱ʼkha̱ náa Dios maʼni itháán mitsaanʼ. Nduʼyáá kaʼwu rí Jeobá ni̱ʼkha̱ kagui̱i̱n a̱ngiu̱lú mu xúʼko̱ mbuyamajkuíí ikhaa xóo má kaʼyoo (Juan 6:44). Ikhaa naxtáa gagi índo̱ ndaʼyoo rí nuʼni tsiakimijna  rí makuwáánʼ tsímáá ga̱jma̱a̱ makuwáanʼ mbá kambáxulú gajmiúlú a̱ngiu̱lú, numuu rí ikhaa ndaʼyoo rí guaʼdáá wéñuʼ numún (Is. 26:3; Ageo 2:7).

18. Ndiéjunʼ rí gíʼmaa mundxaʼwámi̱jna̱ má xúʼko̱ ga̱jma̱a̱ náá numuu rá.

¹⁸ Ndiéjunʼ gándoo muʼni mu mambáyulú asndu xóo má eʼngo̱o̱ rí xóo Jeobá naʼni tsajkurámiin xa̱bi̱i̱ rá. Rí mundxaʼwámi̱jna̱ dí nuraxnuu náa Biblia ga̱jma̱a̱ náa i̱yu̱lúʼ. Á mu nuʼnigajma̱a̱ ma̱ngaa nundxaʼwamíjná dí nuraxnuu rúʼko̱ gámbáyulú mu maguaʼdáá cualidad rí maxkajxán rí musngájma rí nandulú kuʼyamíjna̱ kanikáanʼ náa congregación (Rom. 12:10). Rí mundxaʼwamíjna̱ xóo naʼni tsajkurámáánʼ Jeobá rí mbiʼi xúgi̱, naʼni rí mambájxúlú itháán májánʼ gajmiúlú. Ma̱ngaa rí mundxa̱ʼwa̱míjna̱ xóo gáʼni tsajkurámáánʼ nda̱wa̱á, rúʼko̱ gáʼni rí maʼndulú muʼni ñajuunʼ ga̱jma̱a̱ xúgíʼ a̱jkiu̱lú ga̱jma̱a̱ gagi.

19. a) Xóo má naʼthí náa Isaías 30:18, ndiéjunʼ rí nduʼyáá gajkhun rá. b) Ndiéjunʼ gándoo gámbáyulú maʼngulú ga̱jma̱a̱ gagi rá.

¹⁹ Jeobá matuxu̱u̱ mambáyulú índo̱ gáʼni gámbáa dí rígá náa numbaaʼ xkawiʼ rígi̱ (Is. 30:18). Numuu rí ikhaa nindxu̱u̱ mbáa Dios jmbii ga̱jma̱a̱ ikhaa nandoo marigá dí jmbu, rúʼko̱ nandoo nduʼyáá gajkhun numuu rí nánguá maniñuuʼ xóó itháán mbiʼi mu marigá rí nandoo Gixa̱a̱ (Is. 25:9). Xóo má Jeobá ga̱jma̱a̱ ikháanʼlu nuguaʼthi̱i̱n má xúʼko̱ rí maʼga̱nú mbiʼi rí maguma kuwáanʼlu. Nákha xóo tséʼkha̱nú mbiʼi rúʼko̱, nduʼyáá rí gíʼdoo wéñuʼ numuu rí muʼtákáñii má xúʼko̱, muʼnigajma̱a̱ ajngóo ma̱ngaa rí muʼgíʼ muʼni ga̱jma̱a̱ rí mundxa̱ʼwa̱míjna̱ xóo naʼni tsajkurámáanʼ. Á mu nuʼni xúgíʼ rígi̱, Jeobá mambáyulú muʼni ñajuunʼ ga̱jma̱a̱ gagi ma̱ngaa rí maʼngulú má xúʼko̱.