ARTÍCULO RÍ MUʼNIGAJMAA 47
Xátatsínguminaʼ náa Jeobá
“Ikhúún, oh, Jeobá, naku̱mu̱ʼ kayaaʼ” (SAL. 31:14).
AJMÚÚ 122 ¡Gaguajún jmbu, guñajunʼ má xúʼko̱!
RÍ MUʼNIGAJMAA a
1. Xú káʼnii e’yáá dí Jeobá nandoo makuwáanʼlu mijngii náa ikhaa xá.
JEOBÁ naʼthúlú dí muʼgua kanuu náa ikhaa (Sant. 4:8). Ikhaa nandoo dí mani̱ndxu̱u̱ Dios ndrígúlú, Anu̱lú ga̱jma̱a̱ bi̱ nambájxu̱u̱ gajmiúlú. Ikhaa nariʼña̱a̱ dí nuʼtákáñii ga̱jma̱a̱ nambáyulú índo̱ nuraʼníí xkujndu. Najmuu xuajñuu mu maʼsngulúʼ ma̱ngaa mu mañewu̱nlú. Ndiéjunʼ gíʼmaa muʼnilú mu makuwáanʼ mijngii náa ikhaa xá.
2. Xú kaʼnii gándoo makuwáanʼlu mijngii náa Jeobá rá.
2 Ma̱ndoo makuwáanʼlu mijngii náa Jeobá á mu nuʼtákáñii, nuraxnulú Ajngá rawuunʼ ga̱jma̱a̱ mundxa̱ʼwa̱míjna̱ dí naʼthí ikhí. Rúʼko̱ gaʼni dí makumulú dí ikhaa nandoo kaʼyulú ga̱jma̱a̱ muxnáa numaaʼ. Ma̱ngaa maʼndulú muʼnimbulú kuʼyáá ga̱jma̱a̱ rí muʼni mba̱a̱ xó má ikhaa kaʼyoo (Apoc. 4:11). Índo̱ itháán guniʼníiʼ, itháán gákumulú kuʼyáá ikháá ga̱jma̱a̱ xuajñuu dí nigíʼ mu mañewu̱nlú.
3. a) Xú kaʼnii eʼni Gixa̱a̱ mu maʼni tsíngulú náa Jeobá rá. b) Ndiéjunʼ eyóoʼ muʼni mu nditháan xániñulú Dios ga̱jma̱a̱ xuajñuu rá. (Salmo 31:13, 14.)
3 Gixa̱a̱ naʼni dí matsíngúlú náa Jeobá. Mú itháan índo̱ nuguaʼdáálú xkujndu. Xú káʼnii eʼni xá. Ikhaa naʼni makáguabáanʼ mu ní xákumulú kuʼyáá Jeobá ga̱jma̱a̱ xuajñuu. Mú, maʼngulú muʼni gajmiúlú. Á mu dí kuaʼdáálú mbá fe gujkhuʼ ga̱jma̱a̱ nakumulú kuʼyáá kájxi̱ Jeobá, nditháan xuniʼñáá ikhaa ní má xuajñuu (atraxnuu Salmo 31:13, 14). b
4. Ndiéjunʼ guʼthá náa artículo rígi̱ rá.
4 Náa artículo rígi̱, muʼthá mbá ajtsú enii dí narígá náa gamíi maʼni dí ní xákumulú kuʼyáá Jeobá ga̱jma̱a̱ xuajñuu. Xú káʼnii gándoo dí mbá najtsú enii rígi̱ maʼni dí matsíngúlú náa Dios rá. Xú káʼni gándoo muʼnilú mu xájngutíguáánʼ náa tsáʼkhá dí Gixa̱a̱ nagrui̱ga̱ rá.
ÍNDO̱ NURAʼNÍÍLÚ XKUJNDU
5. Xú káʼnii gáʼni dí xkujndu maʼni dí ní xákumulú kuʼyáá Jeobá ga̱jma̱a̱ xuajñuu rá.
5 Mbáa nguáná bi̱ kúwi̱i̱n náa guʼwúlú ní xáʼndúún gúyulú o mandátigulú ñajunʼ. Xú káʼni gándoo gáʼni rígi̱ rí ní xákumulú kuʼyáá xuajñuu ga̱jma̱a̱ matsíngulú náa Jeobá xá. Mbáa índo̱ xkujndu ndajyúuʼ itháán mbáa maku̱mu̱lú dí nándáa dí muʼni ga̱jma̱a̱ majmulú. Ikhú Gixa̱a̱ nandoo dí makumulu dí Jeobá tsíyoo kaʼyulú. Nandoo dí mugíʼdi̱i̱ murajximíjná dí Jeobá ga̱jma̱a̱ xuajñuu kuaʼdáá aʼkhúún dí kuwáánʼ ranújngulú. Xúʼko̱ kayuuʼ nigíʼníí tikhuun israelitas, bi̱ nikúwi̱i̱n náa Egipto. Nákha ginii nikumu̱ún dí Jeobá niraʼwíi Moisés ga̱jma̱a̱ Aarón mu maʼni káwíin náa ñawúúnʼ xa̱bu̱ egipcio (Éx. 4:29-31). Mú, índo̱ faraón niʼni gíníi itháán nithi̱ dí Moisés ga̱jma̱a̱ Aarón guáʼdáá aʼkhúún, nithúún: Ikháanʼla nini̱ dí faraón gajmíi̱n xa̱bi̱i̱ makiʼníin kuyuxu dí asndu nixnúu xó mbá espada mú xúʼko̱ muradiáanʼxu” (Éx. 5:19-21). ¡Ra̱ʼkhá tháán gíná nindxu̱u̱ rí nini̱ tsudu̱ún xa̱bi̱i̱ Dios bi̱ niguájun jmbu bigi̱! Á mu dí ikháán mbayuuʼ má tsiguʼ xtáá ratraʼníí xkujndu, xú káʼnii gátani̱ mu makumaaʼ xtayáá má xúʼko̱ Jeobá ga̱jma̱a̱ náa xuajñuu rá.
6. Ndiéjunʼ ejmañulú náa xkridoo Habacuc rá. (Habacuc 3:17-19.)
6 Aratháán ga̱jma̱a̱ xúgíʼ a̱jkia̱a̱nʼ Jeobá ma̱ngaa atambáyuminaʼ náa ikhaa. Profeta Habacuc niraʼnuu mbaʼa xkujndu. Ni̱jkha̱nú mbá mbiʼi dí ikhaa niʼni a̱jma̱ a̱jkiu̱u̱n á mu dí Jeobá naxmiéjuunʼ kaʼyoo. Ikha jngóo niʼthúu̱n xúgíʼ dí ikhaa naku̱mu̱u̱. Niʼthúu̱n: “Oh Jeobá asndu nguáná gíʼmaa mandxa̱ʼwa̱ mu matambáyuʼ rá. […] Ndíjkha rí nitatsíñánʼ marigá tsingíná rá.” (Hab. 1:2, 3.) Jeobá niriʼña̱a̱ dí niʼtájkháan Habacuc (Hab. 2:2, 3). Nda̱wa̱á índo̱ Habacuc nidxaʼwáminaʼ xú káʼnii Jeobá niʼni kríyaaʼ xuajñuu. Habacuc nixtáa gagi mbu̱júu̱. Nijkhánú ndiʼyoo gajkhun dí Jeobá naxmiéjuunʼ kaʼyoo ga̱jma̱a̱ rí ikhaa mambáyúu mu maʼngo̱o̱ maraʼnuu asndu xkáʼníí má xkujndu (atraxnuu Habacuc 3:17-19). c Ndiéjunʼ ejmañulú rá. Dí índo̱ kuwáanʼlu náa awúu̱n xkujndu, gúʼtakáñíí Jeobá, guʼtháán xú káʼnii kumulú ga̱jma̱a̱ gumbayúmíjná náa ikhaa. Xúʼko̱, guʼyáálu gajkhun dí Jeobá maxnúlú tsiakii mu maʼngulú. Índo̱ guʼyáá xú káʼnii ikhaa embáyulú, fe ndrígúlú maʼni itháán gujkhuʼ.
7. Ndiéjunʼ dí niʼthúu̱n mbáa bi̱ kaʼyoo Shirley, ga̱jma̱a̱ ndiéjunʼ nimbáyúu mu maku̱mu̱u̱ kaʼyoo má xúʼko̱ Jeobá xá.
7 Xátani̱ jngarigaminaʼ dí matani̱ ñajuunʼ Dios. Rúʼko̱ dí nimbáyúu mbáa ndxájulú bi̱ mbiʼyuu Shirley bi̱ xtáa Papúa Nueva Guinea índo̱ nigiʼdoo xkujndu. d Ikhiin mingíníi nguáná naʼniún gakhii maguaʼdáá ganitsu rí mu̱phu̱. Mbáa bi̱ kaʼyoo ni’ni dí ní xákumu̱u̱ kaʼyoo Jeobá índo̱ niʼthúu̱n: Ikháán rathá dí espíritu santo ndrígóo Dios nambáyaaʼ. Mú, náá rígá rúʼko̱ xúgi̱ rá. Ikháanʼla gínáanʼla má xúʼko̱. I̱ndó nandáti̱ga̱a̱ʼ mbiʼi índo̱ nadxuʼ gárataráʼa. Shirley naʼthí dí ni̱jkha̱nú mbiʼi dí nirajximínáʼ á mu dí Jeobá xóó narmáʼáan a̱jkiu̱u̱n kaʼyoo gajmíi̱n familia ndrígóo. Ikhaa naʼthí: “Mbá nacha̱ nitakáñuu Jeobá, ni̱thu̱u̱n xúgíʼ dí naʼni maxmiéjunʼ. Niguxnuu má xúʼko̱ Biblia ga̱jma̱a̱ i̱yu̱lúʼ ma̱ngaa na̱nguá niniʼñúuʼ dí mataraʼa ga̱jma̱a̱ dí maʼgá reunión”. Shirley ni̱jkha̱nú ndiʼyoo dí Jeobá xtáa rañewu̱u̱n familia ndrígóo numuu rí kuáʼdáá ma dí naʼphu̱ ga̱jma̱a̱ kúwi̱i̱n gagi. Ikhaa naʼthí: “Ndi̱yo̱o̱ xú káʼnii Jeobá niriʼña̱a̱n dí nitajkháan” (1 Tim. 6:6-8). Á mu ikháán natani̱ má xúʼko̱ ñajuunʼ Dios, nda̱a̱ nimbá dí maʼni matsinguaanʼ náa Jeobá asndu má xkujndu.
ÍNDO̱ NUNI̱ GÍNÍIN A̱NGIU̱LÚ BI̱ GUAʼDÁÁ ÑAJUNʼ NÁA XUAJÑUU DIOS
8. Ndiéjunʼ rí ma̱ndoo maguáʼníí a̱ngiu̱lú bi̱ guaʼdáá ñajunʼ náa xuajñuu Dios rá.
8 Náa xúgíʼ rí nandoo nuʼtámíjná ga̱jma̱a̱ xóo náa Internet, xa̱bu̱ bi̱ nakiʼníin nuthi nduwaʼ ga̱jma̱a̱ numulú o nuxuda̱nʼ mbá rí minduwaʼ ga̱jma̱a̱ numún a̱ngiu̱lú bi̱ guáʼdáá ñajunʼ náa xuajñuu Jeobá (Sal. 31:13). Tikhun a̱ngiu̱lú nixudiinʼ náa guʼwá ejua̱a̱nʼ ga̱jma̱a̱ nuthúún rí nuni̱ gíníi eʼwíinʼ. Xúʼko̱ má kayuuʼ niguáʼníí a̱ngiu̱lú nákha timbá siglo. Apóstol Pablo nini tsu̱di̱i̱ ga̱jma̱a̱ nixuda̱a̱ʼ náa guʼwá ejua̱a̱nʼ. Ndiéjunʼ nini a̱ngiu̱lú bi̱ nikúwi̱i̱n nákha ikhú rá.
9. Xú káʼnii nini tikhuun cristianos índo̱ apóstol Pablo nixuda̱a̱ʼ náa guʼwá ejua̱a̱nʼ xá.
9 Índo̱ apóstol Pablo nixuda̱a̱ʼ náa guʼwá ejua̱a̱nʼ náa Roma, tikhuun cristianos niniña̱a̱nʼ (2 Tim. 1:8, 15). Lá ga̱jma̱a̱ numuu dí nitiñu̱u̱n numuu dí Pablo ndiyáá xóo mbáa xa̱bu̱ bi̱ naʼni gíníi eʼwíinʼ ráʼ. (2 Tim. 2:8, 9.) O nimíñúún numuu rí mangiin gamíi maxtugui̱i̱n dxe̱ʼ. Tséʼñuu má asndu xú káʼnii, Pablo nixtáa ngíná wéñuuʼ numuu dí niraʼnuu mbaʼa xkujndu rí asndu nigíʼ makhañúu ga̱jma̱a̱ numún ikhiin (Hech. 20:18-21; 2 Cor. 1:8). Nditháan xúʼni xó má nini̱ cristianos buʼko̱ bi̱ niniñaaʼ Pablo índo̱ ikhaa ndiyóoʼ. Ndiéjunʼ gáʼyóoʼ marmáʼáan a̱jkiu̱lú índo̱ gúni gíníi a̱ngiu̱lú bi̱ guáʼdáá ñajunʼ náa xuajñuu Dios rá.
10. Ndiéjunʼ gáʼyóoʼ marmáʼáan a̱jkiu̱lú índo̱ gúni gíníi a̱ngiu̱lú bi̱ guáʼdáá ñajunʼ náa xuajñuu Dios, ga̱jma̱a̱ náá numuu rá.
10 Garmáʼáan a̱jkia̱a̱nʼ náa numuu dí maguma gínáán ga̱jma̱a̱ tsáá eʼni marigá rígi̱. Náa 2 Timoteo 3:12 naʼthí: “Xúgíinʼ bi̱ nandún makuwá ruyamajkuíí Dios gajmiún Cristo Jesús, mangiin mumíniiʼ”. Ikha jngóo xáʼniulu tsiánguá dí a̱ngiu̱lú bi̱ guáʼdáá mbá ñajunʼ náa xuajñuu Dios nindxu̱ún bi̱ phú maʼni gíníi Gixa̱a̱. Numuu dí ikhaa nandoo dí a̱ngiu̱lú buʼko̱ xáguajun jmbu náa Jeobá ga̱jma̱a̱ rí ikháanʼ mamiñúlú (1 Ped. 5:8).
Maski ajndu Pablo kraʼaa náa guʼwá ejua̱a̱nʼ. Onesíforo támiñuu nimbáyúu náa ndiyóoʼ. Xúʼko̱ má dí mbiʼi xúgi̱ ma̱ngaa, a̱ngiu̱lú numbañún a̱ngiu̱ún bi̱ nagún guʼwá ejua̱a̱nʼ, xóo má nakujmaa náa xtiʼkhuu dí kama gi̱i̱. (Atayáá kutriga̱ 11 ga̱jma̱a̱ 12).
11. Ndiéjunʼ ejmañulú náa xkridoo Onesíforo rá. (2 Timoteo 1:16-18.)
11 Atambáñúún má xúʼko̱ a̱ngiu̱lú bi̱ guáʼdáá ñajunʼ náa xuajñuu Dios (atraxnuu 2 Timoteo 1:16-18). Nákha siglo timbá, nixtáa mbáa cristiano bi̱ nimbáyúu Pablo índo̱ nixtáa náa guʼwá ejua̱a̱nʼ. Ikhaa nindxu̱u̱ Onesíforo. Pablo niʼthí dí ikhaa: “Tátiyu̱u̱ʼ ga̱jma̱a̱ numuʼ rí xtáá náa guʼwá e̱jua̱nʼ kaxtoʼóʼ ga̱jma̱a̱ cadena”. Onesíforo niʼni xúgíʼ xó má eʼngo̱o̱ mu maxkamaa Pablo, índo̱ nixkamaa nimbáyúu náa dí ndiyóoʼ. ¡Niʼni gínáminaʼ ga̱jma̱a̱ numuu ikhaa! Ndiéjunʼ eʼsngúlú rá. Dí xámiñulu gúní eʼwíinʼ mu mumbaʼñún a̱ngiu̱lú bi̱ naguma gíníi. Atani̱ xúgíʼ xó má eʼnga̱a̱ʼ mu maratambáñún (Prov. 17:17). Ndayóoʼ dí maʼndulú kuʼñúún ga̱jma̱a̱ mumbaʼñún.
12. Ndiéjunʼ ejmañulú náá xkridún a̱ngiu̱lú Rusia rá.
12 Atatsaʼwáminaʼ ndiéjunʼ eni̱ a̱ngiu̱lú Rusia índo̱ nduyáá dí nuxudi̱i̱nʼ náa guʼwá ejua̱a̱nʼ a̱ngiu̱ún. Índo̱ tikhuin dí ikhiin nagún mu muni̱ mbáníí ga̱jma̱a̱ numún, mbaʼin a̱ngiu̱lú nagún náa guʼwá ñajunʼ mu mumbañún. Ndiéjunʼ eʼsngúlú rígi̱ rá. Á mu nuni̱ tsu̱du̱ún, nurugui̱i̱n o nuni̱ gíníi a̱ngiu̱lú bi̱ guáʼdáá ñajunʼ náa xuajñuu Dios, xámiñaaʼ. Aratájkáan ga̱jma̱a̱ numún, atie̱wu̱u̱n bi̱ kúwá náa goʼwóo ga̱jma̱a̱ atayáʼ xóo gándoo matambáñún (Hech. 12:5; 2 Cor. 1:10, 11).
ÍNDO̱ NUTSÍJMÁANʼ
13. Xkáʼnii gándoo dí mutsíjmááʼlú maʼni dí ní xákumulú kuʼyáá Jeobá ga̱jma̱a̱ xuajñuu rá.
13 Mbáa tikhuun bi̱ kuʼñúún o eʼwíinʼ xa̱bu̱ bi̱ tsénigajmaa xóo bi̱ najkuááʼ gajmiúlú escuela o bi̱ nuñajunʼ gajmiúlú mutsijmaʼlú numuu dí nuʼtáraʼa o nuʼnimíjna munimbulú xtángoo dí Jeobá naxnúlú (1 Ped. 4:4). Mbáa muthulú: “Naniguʼ xó xa̱bu̱ nindxa̱a̱ʼ mú religión ndrígáaʼ nindxu̱u̱ wayuu ga̱jma̱a̱ ra̱ʼkhá tháán gakhii eni̱ ikhí”. Mbáa tikhuun muthi wéñulú ga̱jma̱a̱ xóo eʼñúnlú bi̱ nigájnuu expulsado: “Xkáʼnii rathá dí nandaaʼ xtañún xa̱bu̱ xúʼko̱ rúʼ.” Índo̱ nudxawíín ajngáa xóo rígi̱ gamíi maʼni a̱jma̱ a̱jkiu̱lú ga̱jma̱a̱ murajximíjna̱: “Lá Jeobá gíʼthu̱u̱n mani wéñuʼ mbá dí ikhúún xáʼngo̱ʼ rá. Lá gakhii wéñuʼ nindxu̱u̱ dí maraxtaa náa xuajñuu xáʼ.” Á mu ikháán naku̱ma̱a̱ʼ xígi̱ káʼnii, ndiéjunʼ gátani̱ mu xátani tsínguminaʼ náa xuajñuu xá.
Job táʼnimbo̱o̱ nduwaʼ dí nitháán bi̱ nimbáxu̱u̱ gajmíi̱n bi̱ nitsijmaa. Niʼni mbóó a̱jkiu̱u̱n má xúʼko̱ náa Jeobá. (Atayáá kutriga̱ 14).
14. Ndiéjunʼ gúʼni á mu eʼwíinʼ nutsíjmááʼlu numuu dí nuʼnimbulú xtángoo ndrígóo Jeobá rá. (Salmo 119:50-52.)
14 Gúraʼwíí munimbulú xtángoo ndrígóo Jeobá. Job niʼnimbo̱o̱ má xúʼko̱ xtángoo dí Jeobá nixnúu maski ajndu eʼwíinʼ nitsijmaa. Mbáa bi̱ nimbáxu̱u̱ ga̱jma̱a̱ niʼni maʼga̱nú mbaʼyoo dí Dios tsixmiéjuunʼ á mu rí nunimbaníí xtángoo ndrígóo (Job 4:17, 18; 22:3). Mú Job na̱nguá niʼnimbo̱o̱ nduwaʼ rúʼko̱. Ikhaa ndiʼyoo kaʼwu dí mambáyúu ikha dí Jeobá nagrui̱ga̱ náa naʼthí ndiéjunʼ nindxu̱u̱ dí májánʼ ga̱jma̱a̱ dí ra̱májánʼ, ikha jngóo niraʼwíí maʼnimbánuu má xúʼko̱, tániñuuʼ muraʼwi̱i̱ eʼwíinʼ dí ikhaa gáʼni (Job 27:5, 6). Ndiéjunʼ eʼsngúlú rá. Xátatsiʼñáʼ dí ga̱jma̱a̱ numuu dí nutsijmáán eʼwíinʼ maʼni a̱jma̱ a̱jkia̱a̱nʼ xtayáá xtángoo ndrígóo Jeobá. Atatsaʼwáminaʼ xú káʼni niraxtaa ikháán índo̱ nitraʼwíí rí matatsi̱mba̱a̱ʼ dí ikhaa niʼtáñajuaanʼ. Lá ragájkhun dí niraxtaa má xúʼko̱ májánʼ ráʼ. Atraʼwíí manimbaaʼ má xúʼko̱ ikha dí Dios nagrui̱ga̱. Rúʼko̱ gámbáyáaʼ dí maski ajndu eʼwíinʼ xa̱bu̱ gútsijmáán nimbáa xáʼngo̱o̱ gáʼni dí matani̱ tsínguminaʼ náa xuajñuu Jeobá (atraxnuu Salmo 119:50-52). e
15. Náá numuu dí Brizit ndiyóoʼ maʼngo̱o̱ dí nitsijmaa xá.
15 Guʼyáá ndiéjunʼ nigíʼnuu Brizit mbá ndxájulú bi̱ na̱ʼkha̱ náa India. Numuu dí ninindxu̱u̱ Testigo ndiyóoʼ maʼngo̱o̱ náa mbaʼa dí nitsijmaa bi̱ kaʼñúún. Nijngún iyááʼ nákha 1997, nda̱wa̱á ajmbio̱o̱ bi̱ na̱nguá má nindxu̱u̱ Testigo, nindáti̱go̱o̱ ñajunʼ dí gíʼdoo. Ikha jngóo ikhaa gajmíi̱n e̱ji̱i̱n niraʼwíí dí magún gakúwi̱i̱n gajmiún xabuaniún ajmbio̱o̱ náa imbríʼká xuajen. Mú Brizit nigiʼdoo má xúʼko̱ xkujndu numuu dí ikhí ma̱ngaa ajmbio̱o̱ na̱nguá nigiʼdoo ñajunʼ, ikhaa ndiyóoʼ mañajunʼ kañiʼ semana mu xúʼko̱ maxnúún dí ndañún bi̱ kúwá náa goʼwóo. Mbá 350 kilómetros (220 millas) xúʼko̱ tsínguáʼ guanuu náa salón dí kúwi̱i̱n. Phú gíná wéñuʼ, dí bi̱ kúwá náa goʼwóo ajmbio̱o̱ táʼndún gúyáá numuu dí nindxu̱u̱ Testigo, ni̱ʼni̱ itháán gakhii xkujndu rígi̱ ikha jngóo Brizit gajmíi̱n e̱ji̱i̱n ndiyóoʼ magajnúu magún gakúwi̱i̱n imbríʼkhá xuajen. Ikhú nigíʼnuu mbóoʼ dí tági̱ʼthu̱u̱n, nikháñuu ajmbio̱o̱. Nda̱wa̱á mbáa wáxioo bi̱ gíʼdoo 12 tsiguuʼ ma̱ngaa nikháñúu ga̱jma̱a̱ numuu cáncer, bi̱ kaʼñúún Brizit nitháán dí ikhaa gíʼdoo aʼkhúun ga̱jma̱a̱ numuu xúgíʼ dí nirígá, nitháán dí á mu na̱nguá ninindxu̱u̱ Testigo de Jeobá xagíʼnuu xúgíʼ rúʼko̱. Mú ikhaa nikumu̱u̱ kaʼyoo má xúʼko̱ Jeobá ga̱jma̱a̱ tániñuuʼ xuajñuu.
16. Ndiéjunʼ nigruigúu Brizit numuu dí tániñuuʼ Jeobá ga̱jma̱a̱ xuajñuu rá.
16 Numuu dí Brizit xtáa tsínguáʼ náa dí kúwi̱i̱n a̱ngiu̱lú, ikha jngóo mbá circuito nixnúu tsiakii mu maʼtáraʼa má xúʼko̱ náa mijngii xtáa ga̱jma̱a̱ niʼthúu̱n dí maʼni reunión náa goʼwóo. Índo̱ niʼdxawuun rígi̱ ikhaa nikumu̱u̱ dí maʼniuu gakhii. Mú ikhaa niʼni dí niʼthúu̱n circuito ga̱jma̱a̱ nigíʼdu̱u̱ niʼni reunión náa goʼwóo ma̱ngaa niʼnigajmaa gajmíi̱n e̱ji̱i̱n. Ndiéjunʼ nirígá ga̱jma̱a̱ numuu xúgíʼ rígi̱ rá. Niʼsngúún mbaʼin xa̱bu̱ ga̱jma̱a̱ Biblia ma̱ngaa mbaʼin dí ikhiin nijngún iyááʼ. Nákha 2005 ninindxu̱u̱ precursora regular. Numuu dí nikumu̱u̱ kaʼyoo má xúʼko̱ Jeobá ga̱jma̱a̱ xuajñuu, nigruigúu dí májánʼ. E̱ji̱i̱n xúgi̱ kúwi̱i̱n runi ñajuunʼ Jeobá ma̱ngaa rígá a̱jma̱ congregación náa xuajen dí mijngii xtáa. Brizit ndiʼyoo kaʼwu dí Jeobá nixnúu tsiakii mu maʼngo̱o̱ maraʼnuu xúgíʼ xkujndu ga̱jma̱a̱ dí nitha̱ wéñííʼ bi̱ kúwá náa goʼwóo.
GAʼNI MBÓÓ A̱JKIU̱LÚ NÁA JEOBÁ GA̱JMA̱A̱ NÁA XUAJÑUU
17. Ndiéjunʼ gíʼmaa muraʼwíí muʼni rá.
17 Gixa̱a̱ nandoo mundxaʼwamíjna̱ dí Jeobá niniñulú índo̱ kuwáanʼ ruraʼníí ga̱ʼkhu̱ ga̱jma̱a̱ naʼniulú itháán gakhii muʼnimbaníí má xúʼko̱ dí naʼthí xuajñuu. Mú ikháanʼlu nuniʼnúuʼ má májánʼ dí ikhaa najmuu mu maʼni nduwáanʼlú (2 Cor. 2:11). Guʼni ga̱ʼdu̱u̱nʼ xúgíʼ nduwaʼ rúʼko̱ ga̱jma̱a̱ guʼni mbóó a̱jkiu̱lú má xúʼko̱ náa Jeobá ma̱ngaa náa xuajñuu. Garmáʼáan a̱jkiu̱lú dí Jeobá nditháan xániñulú (Sal. 28:7). ¡Nimbá xúniʼñáánʼ dí maʼni tsíngulú náa Jeobá! (Rom. 8:35-39).
18. Ndiéjunʼ guʼyáá náá imbo̱ʼ artículo rá.
18 Náa artículo rígi̱ ndiʼyáá tikhu dí maʼniulú gakhii makumulú kuʼyáá má xúʼko̱ Jeobá ga̱jma̱a̱ náa xuajñuu. Mú náa awúu̱n congregación ma̱ngaa ma̱ndoo marigá dí maʼniulú gakhii. Xú káʼnii gándoo gáʼngulú gúraʼníí rá. Ikhaa rúʼko̱ mbuʼyáá náa imbo̱ʼ artículo.
AJMÚÚ 118 “Araxnúxu itháán fe”
a Á mu nandulú maguajún jmbu ga̱jma̱a̱ maʼngulú náa iwáá mbiʼi rígi̱ ndayóoʼ makumulú kuʼyáá Jeobá ga̱jma̱a̱ xuajñuu. Gixa̱a̱ nandoo dí xákumulú kuʼyáá Jeobá. Ikha jngóo náa artículo rígi̱ muʼthá mbá ajtsú numuu dí ikhaa najmuu mu matsíngúlú náa Jeobá ma̱ngaa mbuʼyáá xóo gúʼni mu ikhaa xáʼngo̱o̱ gáʼni rajaanʼ.
b Salmo 31:13, 14: “Nidxa̱wu̱n mbaʼa dí raʼkhí; rí gamíi rígá náa ikhúún. Índo̱ nugimbumijnáá mu maguwáʼ náa ikhúún, nandún guxi̱ñuu. Mú ikhúún Jeobá naku̱mu̱ʼ kayaaʼ ikháán. Natha: Ikháán nindxa̱a̱ʼ Dios ndrígóʼ.”
c Habacuc 3:17-19: “Maski ajndu ixu̱u̱ higo xáxná riʼyu̱u̱, ga̱jma̱a̱ xárígá xndúu náa ixu̱u̱ uva; maski ajndu xárígá aceituna, ga̱jma̱a̱ mbaaʼ xájma̱a̱ ganitsu; ga̱jma̱a̱ mugu̱ xakuwa náa gúláa, mangiin xede̱ xakuwa náa gúláa; maski ajndu xúʼko̱, maʼdxuʼ wéñuʼ núma̱a̱ má Jeobá, maxtáá gagi núma̱a̱ má Dios bi̱ naʼni kríñuunʼ. Tátá Jeobá bi̱ naʼtáñajunʼ xúgíʼ numbaaʼ nindxu̱u̱ bi̱ naxnúʼ tsiakii; ikhaa gáʼni̱i̱ dí rajkúʼ mani̱ndxu̱u̱ xóo rajkúu mbáa aña̱ʼ ga̱jma̱a̱ maʼni rí magadúun náa mitsídaanʼ”.
d Nixtiʼkhuu mbiʼñún tikhun
e Salmo 119:50-52: “Rígi̱ naʼni̱i̱ a̱jkiu̱nʼ índo̱ namínuuʼ, numuu rí ajngáa naʼni rí maxtáá má xúʼko̱. Maski ajndu bi̱ nuni mbaʼumíjna̱ nutsijmúún mu xáʼngu̱u̱n, ikhúún tséni tsínguminaʼ náa xtángoo ndrígáaʼ. Narmáʼáan a̱jkiu̱nʼ xóo nitaniuu bi̱ túnimbu̱ún nákha wajyúuʼ, oh Jeobá ga̱jma̱a̱ rúʼko̱ naʼni̱i̱ a̱jkiu̱nʼ”.