ARTÍCULO RÍ MUʼNIGAJMAA 42
Gakuwáanʼ má xúʼko̱ náa rí gajkhun
“Gu̱ya̱a̱ á mu xúgíʼ nindxu̱u̱ gajkhun, ga̱jma̱a̱ gurajthunla rí májánʼ” (1 TES. 5:21).
AJMÚÚ 142 Guguaʼthi̱i̱n rí wíji̱ makánulú
RÍ MUʼNIGAJMAA *
1. Ndiéjunʼ endxaʼwamíjna̱ mbaʼin xa̱bu̱ rá.
RÍGÁ mbaʼa wéñuuʼ religión ga̱jma̱a̱ xa̱bu̱ bi̱ nagún ikhí nuthi rí ni̱ndxu̱ún cristianos ma̱ngaa nuthi rí nduyamajkuíí Dios xó má ikhaa nanigu̱u̱ʼ. Ikhaa rúʼko̱ numuu rí mbaʼin xa̱bu̱ naʼniún tsiánguá ga̱jma̱a̱ nuraximíjna̱, lá rígá mbá religión rí gajkhun ráʼ. O Dios nagruigú má xúgíʼ religión dí rígá dxe̱ʼ. Ikháanʼlu ráʼ. Lá nduʼyáá gajkhun rí ikháanʼlu bi̱ ni̱ndxu̱lú xa̱bi̱i̱ Jeobá, nuʼsngáa rí gajkhun ga̱jma̱a̱ rí xóo nduʼyamajkuíí Dios rí mbiʼi xúgi̱ nindxu̱u̱ xóo ikhaa nanigu̱u̱ʼ xáʼ. Guʼyáá rí nasngájma dí rígi̱ nindxu̱u̱ gajkhun.
2. Náá numuu rí apóstol Pablo ni̱jkha̱nú ndiʼyoo rí xtáa rajmañuu nindxu̱u̱ rí gajkhun rá. (1 Tesalonicenses 1:5.)
2 Apóstol Pablo ni̱jkha̱nú ndiʼyoo rí xtáa rajmañuu nindxu̱u̱ rí gajkhun (atraxnuu 1 Tesalonicenses 1:5). * Rígi̱ raʼkháa i̱ndó rí nikumu̱u̱ ikhaa, nindxu̱u̱ numuu dí niʼnigajmaa májánʼ ajngá rawuunʼ Dios. Ikhaa ndiʼyoo rí “Xúgíʼ rí Kiʼnirámáʼ náa i̱yi̱i̱ʼ mitsúʼkháan na̱ʼkha̱ náa Dios” (2 Tim. 3:16). Índo̱ Pablo niʼnigajmaa nixkamaa náa nasngájma rí Jesús nindxu̱u̱ Mesías bi̱ nijuiʼthá ma̱ʼkha̱. Mú xa̱bu̱ ede̱ judíos ninújngurámúúnʼ rígi̱, xa̱bu̱ bugi̱ i̱ndó nuthíí rí nuni̱ ñajuunʼ Dios mú rí nuni̱ tsésgájma rí xúʼko̱ nindxu̱u̱ (Tito 1:16). Mú mixtiʼkhu rí xóo niʼni Pablo, ikhaa táraʼwíí tikhúú rí na̱ʼkha̱ náa ajngá rawuunʼ Dios rí ikhaa maʼnimbo̱o̱, asndu náa a̱jkiu̱u̱n niraʼwíí rí maʼsngáa ga̱jma̱a̱ rí maʼnimbánuu “xúgíʼ rí nandoo Dios” (Hech. 20:27).
3. Mu ma̱ndoo mbuʼyáá rí kuwáanʼ náa rí gajkhun, lá ndayóoʼ maxtiʼña̱a̱ xúgíʼ graxe̱ ndrígúlú ráʼ. (Ma̱ngaa atayáá náa kugumáʼánʼ “ Rí niʼni ga̱jma̱a̱ rí nandxaʼwámínaʼ Jeobá nindxu̱u̱ mba̱a̱ wéñuuʼ”.)
3 Kúwá tikhuunʼ bi̱ nakumu̱ún dí religión rí gajkhun maʼngo̱o̱ mariʼña̱a̱ xúgíʼ enii graxe̱, asndu graxe̱ rí tséxtiʼña̱a̱ mbájmbu náa Biblia. Lá gajkhun nindxu̱u̱ ráʼ. Guʼyáá xkri̱da ndrígóo Pablo, gajkhun má rí ikhaa niʼthúún cristianos “gu̱ya̱a̱ á mu xúgíʼ nindxu̱u̱ gajkhun” mu ma̱ngaa ni̱jkha̱nú ndiʼyoo dí rígá tikhu rí tséʼngo̱o̱ gákro̱ʼo̱o̱ (1 Tes. 5:21). Ikhaa niʼthí rí “na̱nguá kuaʼdáá mbá ku̱ma̱ kájxi̱” ga̱jma̱a̱ nduʼyáá mbá xtiʼkhuu rí tsékujmaa “kaʼwu náa mbá niwanʼ rí nindxu̱u̱ ajua̱nʼ” (1 Cor. 13:9, 12). Pablo na̱nguá ndiʼyoo xúgíʼ, xúʼko̱ má mangáánʼlú. Mú nikro̱ʼo̱o̱ májánʼ kiʼsngáa rí itháán gíʼdoo numuu ga̱jma̱a̱ numuu Jeobá, ku̱ma̱ rúʼko̱ nimbáyúu mbaʼyoo rí xtáa rajmañuu nindxu̱u̱ rí gajkhun.
4. Xú gándoo mu̱ʼni̱ mu xú’ni a̱jma̱ a̱jkiu̱lú rí nixkamaa rí gajkhun ga̱jma̱a̱ ndiéjunʼ guʼyáá náa artículo rígi̱ rá.
4 Xú gándoo mu̱ʼni̱ mu xú’ni a̱jma̱ a̱jkiu̱lú rí nixkamaa rí gajkhun rá. Mbá rí xóo ma̱ndoo muʼni, nindxu̱u̱ rí muʼni mbríguii ga̱jma̱a̱ rí xóo Jesús nisngáa rí gíʼmaa mbuʼyamajkuíí Dios ma̱ngaa rí xú káʼnii eʼyamajkuíí rí mbiʼi xúgi̱ ikháanʼ bi̱ ni̱ndxu̱lú xa̱bi̱i̱ Jeobá. Náa artículo rígi̱, majmañulú rí bi̱ gajkhun ni̱ndxu̱ún cristianos, timbá, tséyamajkhún xándú, ragajma, nduyamajkuíí mbiʼyuu Jeobá, ragajtsú, nandún kuyáá rí gajkhun ga̱jma̱a̱ rí maʼni a̱jkhu̱, nandún kuñún eʼwíinʼ.
TSÉʼYAMAJKHÚN XÁNDÚ
5. Xú káʼnii xkri̱da nisngajma Jesús rí xóo gíʼmaa mbuʼyamajkuíí Dios, ga̱jma̱a̱ xú káʼnii gándoo guʼyaridáá rá.
5 Jesús nindoo kaʼyoo wéñuuʼ Jeobá, nixnúu gamajkhu mbáwíi ikhaa, xó má nákhá nixtáa mekhuíí ga̱jma̱a̱ nákha nixtáa náa tsu̱du̱u̱ Ku̱ba̱ʼ (Luc. 4:8). Ga̱jma̱a̱ nisngúún xa̱bi̱i̱ rí xúʼko̱ ma gíʼmaa muni̱ mangiin. Ikhaa, ni ma xa̱bi̱i̱ tájmun nimbá xtiʼkhu mu muxnáá gamajkhu Dios. Dios nindxu̱u̱ espíritu, ga̱jma̱a̱ nimbá rí naʼni mbáa xa̱bu̱ numbaaʼ xáʼngo̱o̱ gámbríguíi̱ ga̱jma̱a̱ rí xóo mba̱a̱ nindxu̱u̱ ikhaa (Is. 46:5). Lá májánʼ nindxu̱u̱ rí muʼniwíin xándú mú muʼtájkáan inún ráʼ. Náa raga̱jma̱ rí mbá Guwáʼ Kiʼtáñajunʼ, Jeobá niʼthí: “Ragíʼmaa matani̱i̱ mbáa xándú, bi̱ kie̱xu̱u̱ dí rígá mekhuíí ga̱jma̱a̱ dí rígá náa tsu̱du̱u̱ ku̱ba̱ʼ o dí rígá náa awúu̱n iyaʼ. Xátasmbatígáʼ náa inún ikhiin” (Éx. 20:4, 5). Bi̱ nandún muni̱ rí nanigu̱u̱ʼ Dios nugími̱jna̱ nunimbáníí kiʼtáñajunʼ rígi̱.
6. Náá biʼyaa xkri̱da rí nduyaridáá xa̱bi̱i̱ Jeobá rí mbiʼi xúgi̱ rá.
6 Xa̱bu̱ bi̱ nunigajmaa ga̱jma̱a̱ dí xóo nirígá nákhá wajyúuʼ, nuthi rí cristianos bi̱ nikúwá nákhá siglo timbá ndiyamajkuíí mbáwíi Dios. Mbá xkri̱da, mbá libro náa naʼthí ga̱jma̱a̱ numún cristianos bi̱ nikúwá nákhá siglo timbá “nindxaʼwamíjná rí xkawiʼ kayuuʼ” nindxu̱u̱ rí mutsriguii mbáa xándú náa rí nuxnáá gamajkhu Dios (History of the Christian Church). Rí mbiʼi xúgi̱, ikháanʼ bi̱ ni̱ndxu̱lú xa̱bi̱i̱ Jeobá nuʼni ikhaa má kayuuʼ xóo nini cristianos bi̱ nikúwá nákhá siglo timbá. Tséʼtájkáan náa inún xándú ni má náa ángeles ni má náa Jesús. Ni má tséxnáá gamajkhu rí xuajin ndayamajkhuu xóo rí murajxi̱i̱lu bandera o i̱ʼwáʼ. Garigá má dí garigá, ikháanʼ muʼnimbulú má xúʼko̱ ajngáa rí Jesús niʼthí: “I̱ndó Jeobá Dios ndrígáaʼ gátayamajkuíí” (Mat. 4:10).
7. Xú kaʼnii mixtiʼkuiin bi̱ nutaraʼa numuu Jeobá ga̱jma̱a̱ náa i̱ʼwáʼ religión rá.
7 Mbiʼi xúgi̱, mbaʼin nagún kidxu̱únʼ xa̱bu̱ bi̱ najmaʼniúnʼ bi̱ kuya̱ edxu̱u̱ náa tikhu religión, rí asndu nandún muxnún gamajkhu xóo mbáa xándú. Najtíin náa guʼwá ndxajkiúún, nutsi̱ libriu̱ún ga̱jma̱a̱ nuxna mba̱a̱ wéñuuʼ mbújkha̱a̱ mu mumbañún, tikhuunʼ nunimbu̱ún xúgíʼ rí nutún, ¡asndu xúni̱ xúgi̱ kaʼnii á mu nduyáá mínáaʼ Jesús! Mú ikháanʼ bi̱ ni̱ndxu̱lú xa̱bi̱i̱ Jeobá tséjkua kidxuuʼ nimbáa xa̱bu̱ numbaaʼ. Maski ajndu nduʼyamajkhún bi̱ nuxnulú ikha, nuʼnimbulú kiʼsngáa ndrígóo Jesús náa niʼthí: “Xúgiáanʼ ikháanʼ kaníkháanʼla” (Mat. 23:8-10). Tséxnún gamajkhu xa̱bu̱ numbaaʼ, tséʼniuu á mu bi̱ kuya̱ edxu̱u̱ náa mbá religión o xa̱bu̱ ñajunʼ tsémbaʼñún náa rí nuni̱, ikháanʼlu nakuwáanʼ jmbu ga̱jma̱a̱ tséʼni dí rígá náa numbaaʼ. Xúgíʼ rígi̱ naʼni makujmaa rí ni̱ndxu̱lú mixtiʼkuánʼ náa bi̱ nuthíí rí ni̱ndxu̱ún cristianos (Juan 18:36).
NDUʼYAMAJKUÍÍ MBIʼYUU JEOBÁ
Bi̱ gajkhun nindxu̱ún xa̱bi̱i̱ Jesús nadxún rí muthún eʼwíinʼ mbiʼyuuʼ Jeobá. (Atayáá kutriga̱ 8 asndu 10). *
8. Xú káʼnii eʼyáá rí Jeobá nandoo dí muʼni mba̱a̱ mbiʼyuu ga̱jma̱a̱ rí muxnún muniʼnuuʼ xa̱bu̱ numbaaʼ rá.
8 Mbá miʼtsu Jesús niʼtájkáan: “Anu̱ʼ, atani mba̱a̱ mbiʼyaaʼ”. Jeobá niriʼñuu ga̱jma̱a̱ mbá aʼwá asndu mekhuíí náa niʼthúu̱n rí maʼni mba̱a̱ mbiʼyuu (Juan 12:28). Náa xúgíʼ mbiʼi rí Jesús niʼtáráʼa niʼni mba̱a̱ mbiʼyuu Anu̱u̱ (Juan 17:26). Ikha jngóo bi̱ gajkhun ni̱ndxu̱ún cristianos asndu nadxún rí majmúún mbiʼyuu Dios ga̱jma̱a̱ rí muxnún muniʼnuuʼ eʼwíinʼ.
9. Xú kaʼnii nisngajma cristianos bi̱ nikúwá nákhá siglo timbá rí ndiyamajkuíí mbiʼyuu Dios rá.
9 Nákhá siglo timbá nda̱wa̱á rí nigi̱ʼi̱ congregación, Jeobá “ ndiʼñún xa̱bu̱ bi̱ raʼkhíin judíos mu maríya̱ʼ mbá xuajen rí mbayá mbiʼyuu” (Hech. 15:14). Cristianos buʼko̱ ra̱ʼkhá tháán nidxúún rí majmúún mbiʼyuu Dios ga̱jma̱a̱ dí muxnún xa̱bu̱ muniʼnuuʼ. Nijmún mbiʼyuu Dios índo̱ nitaraʼa ga̱jma̱a̱ nijmún índo̱ ninirámáʼ Biblia. * xúʼko̱ nisngajma rí ni̱ndxu̱ún mbá xuajen rí kuya mbiʼyuu Dios (Hech. 2:14, 21).
10. Ndiéjunʼ esngájma dí bi̱ nutaraʼa numuu Jeobá nindxu̱ún mbá xuajin rí najmún mbiʼyuu Dios rá.
10 Lá ikháanʼ nindxu̱lú mbá xuajin rí najmulú mbiʼyuuʼ Jeobá ráʼ. Guʼyáá ndiéjunʼ esngájma. Rí mbiʼi xúgi̱ mbaʼin bi̱ kuya̱ edxu̱u̱ náa tikhuu religión, nuni̱ asndu xó má eʼngu̱u̱n mu murkaʼwu rí Dios gíʼdoo mbiʼyuuʼ. Nini jngudi̱i̱ náa Biblia ndrígu̱ún ga̱jma̱a̱ tsíñún rí majmún náa religión ndrígu̱ún. * Mú i̱ndó ikháanʼ bi̱ ni̱ndxu̱lú xa̱bi̱i̱ Jeobá, nuʼni rí mbiʼyuuʼ Dios maguma mba̱a̱ ga̱jma̱a̱ mbiʼyamajkuíí xó má kaʼyoo. Nda̱a̱ i̱mba̱ religión rí mambáñún xa̱bu̱ muniʼnuuʼ mbiʼyuuʼ Dios xóo e̱ʼni̱ ikháanʼ. Nuʼni tsiakimíjna̱ muʼni xó má kayá mbiʼyulú: Bi̱ nutaraʼa numuu Jeobá (Is. 43:10-12). Nixnáraʼa itháan rí 240 millones Biblia ndrígúlú la Traducción del Nuevo Mundo náa na̱ʼkha̱ mbiʼyuuʼ Jeobá, raʼkháa xóo i̱ʼwáʼ Biblia dí ninijngudi̱i̱ mbiʼyuuʼ Dios. I̱yu̱lúʼ dí nuraʼwíi najuiʼtájuíi itháán rí 1,000 ajngáa náa najmaa mbiʼyuuʼ Jeobá.
NANDULÚʼ KUʼYÁÁ RÍ GAJKHUN
11. Xú káʼnii nisngajma rí nindún kuyáá rí gajkhun cristianos bi̱ nikúwá nákha siglo timbá rá.
11 Jesús nindoo kaʼyoo rí gajkhun, xóo muʼthá, rí gajkhun ga̱jma̱a̱ numuu Dios ma̱ngaa rí nandoo maʼni. Nixtáa xó má nindoo Dios ga̱jma̱a̱ nixnún muniʼnuuʼ eʼwíinʼ rí gajkhun (Juan 18:37). Xúʼko̱ má bi̱ phú gajkhun nindxu̱ún xa̱bi̱i̱ Jesús nandún kuyáá rí gajkhun (Juan 4:23, 24). Ma̱ngaa apóstol Pedro nixná mbiʼñún bi̱ nagún kidxuuʼ Jesús “kamba̱a̱ rí gajkhun” (2 Ped. 2:2). Cristianos bi̱ nikúwá nákha siglo timbá raʼkhá tháán nindún kuyáá rí gajkhun, ikha jngóo nini gaʼduunʼ rí nusngáa náa i̱ʼwáʼ religión, rí xóo naguʼwún nakúwá xa̱bu̱ ga̱jma̱a̱ ku̱ma̱ rí naʼthí dí raʼkhí ga̱jma̱a̱ numuu rí gajkhun (Col. 2:8). Xúʼko̱ má kayuuʼ eni̱ bi̱ phú gajkhun nagún kidxuuʼ Jesús rí mbiʼi xúgi̱, nuni̱ tsiakimíjna̱ majngruigu̱u̱n má xúʼko̱ “náa rí gajkhun” (3 Juan 3, 4). Xú káʼnii eni̱ xá. Rí xóo nunimbu̱ún ga̱jma̱a̱ rí xóo nakúwá nambríguii ga̱jma̱a̱ rí naʼthí náa Ajngá rawuunʼ Jeobá.
12. Ndiéjun’ eni̱ a̱ngiu̱lú bi̱ nuxnúlú ikha índo̱ nduyáá dí rígá mbá rí ndayóoʼ maxtiʼkhu̱u̱ ga̱jma̱a̱ náá numuu eni̱ xá.
12 Bi̱ nutaraʼa numuu Jeobá naguánú nduyáá rí tséʼngu̱u̱n má gákru̱ʼu̱u̱n xúgíʼ rí naʼthí náa Biblia. Nguáná najngawi̱i̱n ga̱jma̱a̱ rí xóo nusngáa kiʼsngáa ndrígóo Biblia ga̱jma̱a̱ awan dí nagájnuu náa nagimbáanʼ. Mú ragíʼmaa maʼniúlú tsiánguá ga̱jma̱a̱ numuu rígi̱, numuu rí náa Biblia naʼthí rí xuajñuu Dios maʼga̱ rakro̱ʼo̱o̱ rí gajkhun mañu mañúú (Col. 1:9, 10). Jeobá maʼga̱ rasngájma má xúʼko̱ rí gajkhun, ikha jngóo ndayóoʼ maʼngo̱o̱ a̱jkiu̱lú muguaʼthi̱in mu muʼguanú makru̱ʼu̱lú májánʼ rí gajkhun (Prov. 4:18). Índo̱ a̱ngiu̱lú bi̱ nuxnulú ikha nduyáá dí rígá mbá rí ndayóoʼ maxtiʼkhu̱u̱ ga̱jma̱a̱ rí xóo nakru̱ʼu̱lú o rí xóo nu̱ʼni̱, tséni a̱jma̱ a̱jkiu̱ún rí muriʼkhu̱u̱la. Mbaʼa religión nuriʼkhu̱u̱ xó má nandún bi̱ nagún ikhí ga̱jma̱a̱ rí xóo manigu̱u̱ʼ numbaaʼ. Mú ikháanʼ bi̱ nindxu̱lú xa̱bi̱i̱ Jeobá nuʼni mu maxuʼmamijná itháán náa Dios ga̱jma̱a̱ mbuʼyamajkuíí xó má Jesús niʼsngáa (Sant. 4:4). Índo̱ rígá mbá dí naxtiʼkhu̱u̱, naxtiʼkhu̱u̱ numuu rí na̱jkhua̱nú nakru̱ʼu̱lú itháán májánʼ rí naʼthí náa Biblia, raʼkháa xóo ku̱ma̱ ndrígu̱ún xa̱bu̱, nuʼni numuu rí nandúlú kuʼyáá rí gajkhun (1 Tes. 2:3, 4).
NANDULÚʼ KUʼÑÚN EʼWÍINʼ
13. Ndiéjunʼ rí itháan nagájnuriyo̱o̱ʼ náa bi̱ gajkhun nindxu̱ún xa̱bi̱i̱ Jesús, ga̱jma̱a̱ xú káʼnii esngajma bi̱ nutaraʼa numuu Jeobá rí mbiʼi xúgi̱ rá.
13 Cristianos bi̱ nikúwá nákha siglo timbá nijmaniún ga̱jma̱a̱ rí xóo májáanʼ xa̱bu̱ ninindxu̱ún, mú rí itháan nigíʼdoo numuu ikhaa nindxu̱u̱ rí nindún kuyamijná. Jesús niʼthí: “Á mu nuni̱la xúgi̱ kaʼnii, xúgíinʼ gúyáá rí ikháanʼ nindxa̱la xa̱bi̱ʼ: Á mu nandala kuyamíjna̱” (Juan 13:34, 35). Rí mbiʼi xúgi̱ bi̱ nutaraʼa numuu Jeobá nandún kuyamijná ga̱jma̱a̱ kúwá mbóó jnduʼ náa mbá xúgíʼ numbaaʼ. Tséʼni̱ xóo eni̱ i̱ʼwáʼ religión, nakuwáánʼ mbá kambáxulú, tséʼniuu xú káʼnii raza ndrígúlú ga̱jma̱a̱ náa eguwa̱ʼ. Nakujmaa ngajua rígi̱ náa nagimbáanʼ ga̱jma̱a̱ náa asambleas. Rígi̱ naʼni mbuʼyáá gajkhun rí i̱ndó ikháanʼ nindxu̱lúʼ bi̱ nduʼyamajkuíí Jeobá xó má ikhaa nandoo.
14. Xó má eʼthí náa Colosenses 3:12-14, nguáná gándoo gúsngajmá rí gajkhun nandúlú kuʼñún eʼwíinʼ rá.
14 Náa Biblia naʼthí: “Gaʼndala kuyamíjna̱ wéñuuʼ” (1 Ped. 4:8). Mbá rí xóo ma̱ndoo musngajmá rí nandúlú kuʼñún eʼwíinʼ nindxu̱u̱ rí muʼni mba̱a̱ a̱jkiu̱lú kuʼñún, ma̱ngaa rí maʼngo̱o̱ a̱jkiu̱lú kuʼñún náa rí nakiéʼkhún. Nduʼyáʼ xú káʼnii muxnún eʼwíinʼ rí kuaʼdáá ga̱jma̱a̱ nundríguíin mbá xúgíinʼ ma̱ngaa asndu bi̱ nini gawúnlú (atraxnuu Colosenses 3:12-14). * Ngajua rígi̱ nasngájmáánʼ rí ikháanʼ gajkhun nindxu̱lúʼ xa̱bi̱i̱ Jesús.
KUAʼDÁÁ “MBÓÓ FE”
15. Ndiéjunʼ i̱mba̱ rí nuʼni dí nambríguii ga̱jma̱a̱ rí xóo nini cristianos bi̱ nikúwá nákha siglo timbá rá.
15 Rígá i̱mba̱ rí xóo nduʼyamajkuíí Dios rí nambríguii ga̱jma̱a̱ rí xóo nini cristianos bi̱ nikúwá nákha siglo timbá. Mbá xkri̱da, náa xuajñuu Dios dí rígá mbiʼi xúgi̱, kúwá superintendentes viajantes, bi̱ kuya̱ edxu̱u̱ ga̱jma̱a̱ siervos ministeriales bi̱ nduyaridáá awan xó má nigíʼ apóstoles bi̱ nikúwá nákha siglo timbá (Filip. 1:1; Tito 1:5). Ikháá má rí nuʼnimbulúʼ ga̱jma̱a̱ rí xóo mubúúnʼ xa̱bu̱ ma̱ngaa rí mudamijná, rí xóo nduʼyamajkuíí eʼdi ga̱jma̱a̱ rí nandulúʼ muñewa̱a̱n congregación náa bi̱ nuxudami̱jna̱ aʼkhá rí mbiiʼ ga̱jma̱a̱ rí tsétanga̱a̱ a̱jkiu̱ún (Hech. 15:28, 29; 1 Cor. 5:11-13; 6:9, 10; Heb. 13:4).
16. Ndiéjunʼ eʼsngúlú Efesios 4:4-6 rá.
16 Jesús niʼthí rí mbaʼin muthi rí nindxu̱ún xa̱bi̱i̱, mú raʼkháa xúgíinʼ gánindxu̱ún (Mat. 7:21-23). Náa Ajngá rawuunʼ Dios nijuiʼtáriyaʼ rí náa iwáá mbiʼi, mbaʼin “muníí rí xóo nusngajma rí nduyamajkuíí Dios” (2 Tim. 3:1, 5). Mú náa Biblia nasngájma kaʼwu rí “mbóó fe rígá” dí Dios nagruigú (atraxnuu Efesios 4:4-6). *
17. Tsíin nindxu̱ún bi̱ nduyaridáá xkridoo Jesús ma̱ngaa kúwá náa religión rí gajkhun mbiʼi xúgi̱ rá.
17 Tsíin nindxu̱ún bi̱ kúwá náa religión gajkhun rí mbiʼi xúgi̱ rá. Nijmañulúʼ má náa xkri̱da dí niniñuuʼ Jesús ga̱jma̱a̱ rí nini̱ cristianos bi̱ nikúwá nákha siglo timbá. Na̱jkua̱nú nduʼyáá kaʼwu rí ikhiin nindxu̱ún: Bi̱ nutaraʼa numuu Jeobá. Rí makuwáánʼlú náa xuajñuu Dios ma̱ngaa rí muʼniʼnuuʼ dí gajkhun ga̱jma̱a̱ numuu Jeobá ga̱jma̱a̱ rí nandoo maʼni nindxu̱u̱ mbá rí mitsaanʼ wéñuuʼ. Ikha jngóo nditháan xágájnuriyulú náa rí gajkhun.
AJMÚÚ 3 Ikháánʼ naraxnúʼ tsiakii, jma̱a̱ natani rí xamíñuʼ
^ párr. 5 Náa artículo rígi̱ mbuʼyáá xkri̱da rí Jesús niniñuuʼ xóo gíʼmaa mbuʼyamajkuíí Dios ga̱jma̱a̱ mbuʼyáá xú kaʼnii ninimbaníí rígi̱ xa̱bi̱i̱ bi̱ nikúwá nákhá siglo timbá. Ma̱ngaa mbuʼyáá tikhu rí nasngájma bi̱ nutaraʼa numuu Jeobá rí mbiʼi xúgi̱ nunimbaníí rígi̱.
^ párr. 2 1 Tesalonicenses 1:5: “Numuu rí noticia rí májánʼ rí nutaráʼaxu táʼkha̱nú náa ikháanʼ i̱ndó xóo ajngáa, ni̱ʼkha̱nú ma̱ngaa ga̱jma̱a̱ tsiakii, ga̱jma̱a̱ xi̱ʼ kaʼwu ma̱ngaa rí gajkhun nindxu̱u̱. Ga̱jma̱a̱ ikháanʼ ndu̱ya̱a̱ xóo xa̱bu̱ nini̱ndxu̱xu náa majñala numuu rí mambáyala má ikháanʼ.”
^ párr. 9 Atayáá rí kugumáʼánʼ “Lá nijmún mbiʼyuu Dios timbíin cristianos ráʼ.” Rí nigájnuu náa La Atalaya (Bi̱ Nayejngoo) 1 ñajunʼ gu̱nʼ julio tsiguʼ 2010, ináa 6.
^ párr. 10 Mbá xkri̱da nákha tsiguʼ 2008, papa Benedicto XVI niʼthí rí mbiʼyuuʼ Dios “ragíʼmaa majmaa ni má majuiʼthá” náa ajmúú, tsajkhuun ga̱jma̱a̱ dí majmún náa religión católica.
^ párr. 14 Colosenses 3:12-14: “Ikháanʼ bi̱ Dios niraʼwáanla, bi̱ kaʼwáanʼ ga̱jma̱a̱ bi̱ nandoo kaʼyala, gusngajmá dí nagáwiinʼ a̱jkia̱la kuyamíjna̱ gu̱ni̱la rí májánʼ, ganindxa̱la xa̱bu̱ guabaaʼ, xákiʼnáanʼla ga̱jma̱a̱ gaʼngo̱o̱ a̱jkia̱la. Gaʼngo̱o̱ a̱jkia̱la ga̱jma̱a̱ gu̱ni̱ mba̱a̱ a̱jkia̱la kuyamíjna̱ má xúʼko̱, maski ajndu mbáa gíʼdoo mbá numuu rí maxiéʼka ga̱jma̱a̱ numuu i̱mba̱a̱. Jeobá niʼni mba̱a̱ a̱jkiu̱u̱n kaʼyala má xúʼko̱, ikha jngóo xúʼko̱ gíʼmáanʼla mu̱ni̱ mangáanʼ. Mú, raʼkháa i̱ndó rígi̱, ma̱ngaa gaʼndala kuyamíjna̱, numuu dí rígi̱ naruwi̱i̱n xa̱bu̱.”
^ párr. 16 Efesios 4:4-6: “Rígá mbóó xuwiʼ ga̱jma̱a̱ rígá mbóó espíritu, xúʼko̱ má, rígá mbóó rí kuaʼti̱i̱nla náa rí nijuatsaʼwála. Mbáwíi Tátá xtáa, mbóó fe rígá ga̱jma̱a̱ mbóó xóo rí najnguála iyááʼ. Náa xúgíinʼ xtáa mbáa Dios, ikhaa nindxu̱u̱ Anu̱ún xúgíinʼ, gíʼdoo tsiakii náa xúgíinʼ, ikhaa ma̱ndoo majmiuu xúgíinʼ ga̱jma̱a̱ tsiakii ndrígóo rígá náa xúgíinʼ.”
^ párr. 66 NAʼTHÍ NUMUU XTIʼKHU: Xuajñuu Jeoba nixnáraʼa Traducción del Nuevo Mundo náa itháan rí 200 ajngáa mu xúʼko̱ xa̱bu̱ muraxnuu náa ajngún mbá Biblia rí na̱ʼkha̱ mbiʼyuuʼ Dios.
