1. Ndíjkha rí bi̱ ni̱ndxu̱lú xa̱bi̱i̱ Jeobá kuwáánʼ gagi ga̱jma̱a̱ nadxuu a̱jkiu̱lú rá.

¡KUWÁÁNʼ gagi ga̱jma̱a̱ nadxuu a̱jkiu̱lú numuu rí ni̱ndxu̱lú xa̱bi̱i̱ Jeobá! Najkua kuʼyúlú mbiʼyuu ga̱jma̱a̱ nusngajmá rí ni̱ndxu̱lú Xa̱bi̱i̱ índo̱ nuʼtáraʼa ga̱jma̱a̱ nuʼsngúún xa̱bu̱ numuu ikhaa. Nadxulú índo̱ numbáyíí mbáa ‹bi̱ nasngájma rí nandoo maxtáa kámuu mbiʼi› mu manidxu̱u̱ xa̱bi̱i̱ (Hech. 13:48). Nakumulú xóo Jesús índo̱ “espíritu santo niʼni rí maʼdxuu wéñuuʼ” nda̱wa̱á rí xa̱bi̱i̱ nitangiín náa nigún gutaráʼa ga̱jma̱a̱ nitháán xúgíʼ dí májánʼ nirígá (Luc. 10:1, 17, 21).

2. Xú káʼnii esngajmá rí nduʼyáá dí gíʼdoo wéñuʼ numuu muʼtáraʼa rá.

² Ikháanʼlu nduʼyáá rí gíʼdoo wéñuʼ numuu muʼtáraʼa. Apóstol Pablo nixnúu consejo rígi̱ Timoteo: “Atiejxi̱i̱ tsumáá wéñuuʼ rí natani̱ ga̱jma̱a̱ dí narasngáa”. Ga̱jma̱a̱ niʼthí xóó: “Xúʼko̱ matanikríyaminaʼ ikháán ga̱jma̱a̱ bi̱ nudxawaanʼ” (1 Tim. 4:16). Ajngáa rígi̱ nasngájma dí gamíi makhañún xa̱bu̱. Nuyejxi̱i̱ tsumáá wéñuʼ dí nuʼni, numuu dí ikháanʼ nuʼtáraʼa ga̱jma̱a̱ numuu Reino ndrígóo Dios. Nandulú rí xúgíʼ dí gúʼni̱ maʼni rí maʼga̱ gamajkhu náa Jeobá ma̱ngaa mu masngájma dí nuʼnimbulú náa ajngáa májánʼ rí na̱jkua̱ kuʼyúlú (Filip. 1:27). Ga̱jma̱a̱ nuyejxi̱i̱ tsumáá wéñuʼ dí nuʼsngáa índo̱ nuʼniratamijná májánʼ mu muʼtáraʼa ma̱ngaa nunda̱ʼa̱a̱ Jeobá rí mambáyulú índo̱ nuʼthúún eʼwíinʼ xa̱bu̱ ga̱jma̱a̱ numuu ikhaa.

3. Xóo eriʼña xa̱bu̱ índo̱ nuʼtáruʼún rá. Ga̱jma̱a̱ ndiéjunʼ nigíʼnuu mbáa ndxájulú rá.

³ Maski ajndu nuʼni xó má eʼngo̱o̱ náa nuʼtáraʼa, mú mbáa kúwá tikhun xa̱bu̱ náa nuʼtáraʼa bi̱ na̱nguá edxawíín májánʼ o nditháan tsénigu̱u̱nʼ mudxawíín. Gundxaʼwamíjna̱ xóo ndiʼyoo ndxájulú Georg Lindal, bi̱ niʼtáráʼa mbáwíi náa xúgíʼ Islandia nákhá 1929 asndu 1947. Niniñuuʼ mbaʼa wéñuuʼ i̱yi̱i̱ʼ náa ñawúúnʼ xa̱bu̱, mú nimbáa tánindxu̱u̱ xa̱bi̱i̱ Jeobá. Ikhaa niʼnirámáʼ: “Tikhuun nitanumáá dí gajkhun, mú mbaʼiin na̱nguá ethi  á mu májánʼ o raʼkhí”. Nda̱wa̱á nigún tikhuun misioneros bi̱ nirámúúʼ náa Galaad mu muñambáá náa miʼtáraʼa, mú xa̱bu̱ nda̱a̱ dí nini̱. Nda̱wa̱á dí nijngoo mi̱jna̱ gu̱wa̱ʼ tsiguʼ, ndiʼkhún nixnajximi̱jna̱ náa Jeobá ga̱jma̱a̱ nijngún iyááʼ tikhuunʼ xa̱bu̱. *

4. Xú káʼnii eʼni makumulúʼ índo̱ xa̱bu̱ tsíñún gudxawíín dí nuʼtáraʼa rá.

⁴ Índo̱ xa̱bu̱ tsíñún gudxawíín dí nuʼtáraʼa, naʼni makuwáánʼ ngíná. Mbáa makumulú xó má Pablo, bi̱ niʼthí: “Xtáá ngíná wéñuʼ ga̱jma̱a̱ rí na̱ʼkhu̱ má xúʼko̱ a̱jkiu̱nʼ” numuu rí bi̱ judíos ninigaʼduunʼ mudriguíi Jesús xóo Mesías bi̱ nijuiʼthá ma̱ʼkha̱ (Rom. 9:1-3). Á mu nuʼsngáá mbáa xa̱bu̱ ga̱jma̱a̱ numuu Biblia, mú nditháan tséʼniminaʼ maski ajndu ikháanʼlu nuʼni mbá tsiakii ma̱ngaa nuʼtajkháan ga̱jma̱a̱ nda̱wa̱á, ndayóoʼ muniʼñááʼ ruʼsngáá xáʼ. O á mu tumbáyíí nimbáa maʼga̱nú majngúun iyááʼ rá. Gíʼmaa makumulúʼ rí kuaʼdáá aʼkhúlú ga̱jma̱a̱ mundxaʼwamíjna̱ dí Jeobá na̱nguá eʼni tsajkurámuuʼ ñajunʼ dí nuʼni ráʼ. Náa artículo rígi̱ muriʼña̱a̱ a̱jma̱ graxe̱: Xú káʼnii eʼyáá dí ñajunʼ dí niʼni nindxu̱u̱ májánʼ rá. Ga̱jma̱a̱ ndiéjunʼ dí gíʼmaa mundxaʼwamíjná dí kaʼnii ma̱ndoo muʼni rá.

5. Índo̱ nuʼni ñajuunʼ Jeobá, ndíjkha dí na̱nguá egájnuu xúgíʼ májánʼ xó má nikumulú rá.

⁵ Índo̱ náa Biblia naʼthí ga̱jma̱a̱ numún xa̱bu̱ bi̱ nuni̱ ñajuunʼ Dios naʼthí: “Xúgíʼ rí gáʼni magajnúu májánʼ” (Sal. 1:3). Mú raʼkháa rúʼko̱ eyoo gáʼthí dí xúgíʼ dí gúʼni̱ ga̱jma̱a̱ numuu Jeobá magajnúu xó má eyulú ikháanʼ. Ga̱jma̱a̱ numuu dí xúgiáanʼ ni̱ndxu̱lú xa̱bu̱ aʼkhá naʼni dí ‹maguaʼdáá wéñuuʼ xkujndu› (Job 14:1). Ma̱ngaa nguáná xa̱bu̱ sia̱nʼ naʼngu̱u̱n nurikháá dí muʼtáraʼa xó má eyulú (1 Cor. 16:9; 1 Tes. 2:18). Á mu xúʼko̱, xú káʼnii eʼyoo Jeobá á mu májánʼ ñajunʼ e̱ʼni̱ rá. Guʼyáá tikhuu ikha dí na̱ʼkha̱ náa Biblia rí mambáyulú muriʼña̱a̱ graxe̱ rígi̱.

6. Xú káʼni eʼyoo Jeobá á mu májánʼ ñajunʼ eʼni rá.

⁶ Jeobá ndaʼyoo tsiakii dí nuʼni ga̱jma̱a̱ dí naʼngulú. Ikhaa ndaʼyoo dí májánʼ ñajunʼ eʼni índo̱ nuʼni xó má eʼngo̱o̱ ga̱jma̱a̱ índo̱ nusngajmá ngajua náa ñajunʼ dí nuʼni, tséʼniuu má xóo eriʼña̱a̱ xa̱bu̱. Pablo niʼnirámáʼ: “Dios nindxu̱u̱ jmbii ga̱jma̱a̱ tsémbumuu kaʼyoo ñajunʼ rí nuni̱la, ma̱ngaa ngajua rí nusngajmá ga̱jma̱a̱ numuu mbiʼyuu, índo̱ nimbáñún bi̱ ikhaa niraʼwíin ga̱jma̱a̱ rí numbáñulá má xúʼko̱” (Heb. 6:10). Jeobá tsémbumuu tsiakii dí nuʼni ga̱jma̱a̱ ngajua dí nusngajmá, tséʼniuu á mu tségájnuu májánʼ ñajunʼ rí nuʼni. Ikhú ma̱ndoo muʼthá ajngáa dí Pablo niʼthún cristianos bi̱ kúwá náa Corinto: “Ñajunʼ ndrígála na̱nguá nindxu̱u̱ ndíí náa Tátá” (1 Cor. 15:58). Xúʼko̱ má nindxu̱u̱ maski ajndu tárígá xóo nikumulú.

7. Ndiéjunʼ ejmañuluʼ dí niʼthí apóstol Pablo ga̱jma̱a̱ numuu ñajunʼ dí niʼni rá.

⁷ Apóstol Pablo ninindxu̱u̱ mbáa misionero bi̱ ra̱ʼkhá tháán mitsaanʼ niñajunʼ ga̱jma̱a̱  niʼni marigá mbaʼa congregación náa mixtiʼkhu xuajin. Maski ajndu xúʼko̱, índo̱ tikhuunʼ cristianos bi̱ nikumu̱ún dí itháan najmiin ki xóo Pablo nitanumáá ga̱jma̱a̱ nithi dí na̱nguá nindxu̱u̱ mbáa bi̱ naʼsngáa májánʼ, ikhaa na̱nguá niʼthí nguáthi̱i̱n xa̱bu̱ nimbáñún majngún iyááʼ, índo̱ niʼtambáyuminaʼ niʼthí: “Niñajunʼ itháan” (2 Cor. 11:23). Guʼyaridáá Pablo ga̱jma̱a̱ garmáʼáan a̱jkiu̱lú dí Jeobá ndaʼyoo dí itháan gíʼdoo numuu tsiakii dí nuʼni ga̱jma̱a̱ dí naʼngulú.

8. Ndiéjunʼ gíʼmaa marmáʼáan a̱jkiu̱lú ga̱jma̱a̱ numuu ñajunʼ dí nuʼni̱ rá.

⁸ Ñajunʼ dí nuʼni̱ nanigu̱u̱ʼ Jeobá. Mbá miʼtsú Jesús nikungui̱i̱n mbá 70 xa̱bi̱i̱ mutaraʼa ajngáa rí májánʼ ga̱jma̱a̱ numuu Reino. Índo̱ niguámbu̱u̱n, náa Biblia naʼthí dí “nadxún nitangiín”. Ndíjkha rí nidxún wéñuuʼ xá. Ikhiin nithi: “Asndu xa̱bu̱ wéñiiʼ ninimbu̱ún kuyuxu índo̱ nijmuxu mbiʼyaaʼ”. Mú Jesús nixprígún ga̱jma̱a̱ ajngáa rígi̱: “Xáʼdxala numuu rí xa̱bu̱ wéñiiʼ nunimbu̱ún ku̱ya̱la. Gaʼdxalá numuu rí mbiʼyala nigumarámáʼ mekhuíí” (Luc. 10:17-20). Jesús ni̱jkha̱nú má ndiʼyoo dí raʼkháa xúgíʼ mbiʼi mbuyáá dí mitsaanʼ náa nutaraʼa. Ma̱ngaa tséʼyáá nguáthi̱i̱n xa̱bu̱ bi̱ nidxawíín dí nitaraʼa xa̱bi̱i̱ Jesús niguánú ninindxu̱ún cristianos. Xa̱bi̱i̱ Jesús raʼkháa i̱ndó nidxún numuu dí xa̱bu̱ nidxawíín, ma̱ngaa nidxún numuu dí Jeobá ninigu̱u̱ʼ tsiakii dí nini.

9. Xó má naʼthí náa Gálatas 6:7-9, ndiéjunʼ gárígá á mu tséniʼñááʼ rutaraʼa rá.

⁹ Á mu tseniʼñáʼ rutaraʼa, makhánulúʼ makuwáánʼ kámuu mbiʼi. Índo̱ nuríyaʼ xúgíʼ tsiakii muʼdu ga̱jma̱a̱ muñejuíín tsígáʼ dí gajkhun ma̱ngaa guʼyáá ndiéjunʼ “rí nandoo espíritu santo” numuu rí nuniʼñááʼ dí espíritu santo mambáyulú náa kuwáánʼ. “Á mu tségáanʼlú”, Jeobá nakudaminaʼ dí maxnúlú makuwáánʼ kámuu mbiʼi, maski ajndu na̱nguá eʼngo̱o̱ mumbayíí mbáa bi̱ maʼga̱nú majngúun iyááʼ (atraxnuu Gálatas 6:7-9). *

10. Ndiéjunʼ lá eʼni dí mudxawíín o xúdxawíín xa̱bu̱ ajngáa dí na̱jkua̱ kuʼyúlú rá.

¹⁰ Rí gíwanʼ náa a̱jkiu̱ún xa̱bu̱ naʼni dí mudxawíín o xúdxawíín. Jesús niʼthí dí gajkhun xúʼko̱ nindxu̱u̱ índo̱ niʼthí mbá xkri̱da ga̱jma̱a̱ numuu mbáa bi̱ naʼdu. Náa historia rúʼko̱ naʼthí dí mbáa xa̱bu̱ naʼdu tsígáʼ náa mixtiʼkhu ku̱ba̱ʼ, mú i̱ndó nixná xndúu dí nijngutígú náa ku̱ba̱ʼ májánʼ (Luc. 8:5-8). Jesús niʼthí dí mixtiʼkhu ku̱ba̱ʼ rúʼko̱ nandoo gáʼthúu̱n a̱jkiu̱ún xa̱bu̱ dí mixtiʼkhu xóo eriʼña̱a̱ índo̱ nudxawíín “ajngá rawuunʼ Dios” (Luc. 8:11-15). Xó má egíʼnuu xa̱bu̱ bi̱ naʼdu, ikháanʼlu ma̱ngaa tséʼyáá xóo gárígá náa ñajunʼ dí nuʼni numuu dí mixtiʼkhu dí gíwanʼ náa a̱jkiu̱ún xa̱bu̱ bi̱ nudxawíín. Ikháanʼ i̱ndó kaʼyulú muʼdu tsígáʼ, xó muʼthá dí muʼsngáa numuu Reino. Xó má niʼthí apóstol Pablo, “xa̱bu̱ magruigúu rí mada̱a̱ʼ xó má ñajunʼ rí niʼni”, raʼkháa xóo nigájnuu ñajunʼ dí niʼni (1 Cor. 3:8).

11. Ndíjkha nuʼthá dí ñajunʼ dí niʼni Noé xóo bi̱ “niʼtáraʼa rí májánʼ” nigájnuu májánʼ rá. (Atayáá xtiʼkhu rí na̱ʼkha̱ náa timbá ináa.)

¹¹ Náa xúgíʼ tsiguʼ dí nanújngoo, mbaʼiin xa̱bi̱i̱ Jeobá nutaruʼúún xa̱bu̱, mú ikhiin tsédxawíín. Mbá xkri̱da Noé “niʼtáraʼa dí nindxu̱u̱ jmbu” mbayuuʼ tsiguʼ (2 Ped. 2:5). Gajkhun má dí ikhaa nindoo rí xa̱bu̱ mudxawíín, mú Jeobá na̱nguá nixnúu mbaʼyoo dí xúʼko̱ gárígá. Índo̱ nixnúu ikha maʼni arca niʼthúu̱n: ‹Gíʼmaa mata̱ʼa̱ʼ náa arca ikháán ga̱jma̱a̱ʼ a̱ʼgia̱a̱ʼ gajmiáanʼ ejña̱a̱nʼ ga̱jma̱a̱ gujkiáanʼ› (Gén. 6:18). Índo̱ niʼthúu̱n nguáthá mba̱a̱ arca gáʼni, mbáa Noé ni̱jkha̱nú  má ndiʼyoo dí raʼkháa mbaʼin gudxawíín (Gén. 6:15). Xúʼko̱ má gajkhun nirígá. Nimbáa xa̱bu̱ bi̱ nixtáa nákha ikhú na̱nguá nidxawuun dí niʼtáraʼa (Gén. 7:7). Lá nidxaʼwáminaʼ Jeobá dí Noé tájmaa ráʼ. Na̱nguá, nditháan tandxaʼwáminaʼ xúʼko̱. Ikhaa ndiʼyoo dí ñajunʼ rí niʼni Noé ninindxu̱u̱ májánʼ wéñuʼ numuu rí niʼni kuduun xúgíʼ xóo niʼtáñajuunʼ maʼni (Gén. 6:22).

12. Ndiéjunʼ niʼni Jeremías mu manigu̱u̱ʼ maʼtáraʼa maski ajndu xa̱bu̱ nikiʼníin ga̱jma̱a̱ taʼndúún gudxawíín rá.

¹² Profeta Jeremías ma̱ngaa niʼtáráʼa mbayuuʼ tsiguʼ maski ajndu xa̱bu̱ nikiʼníin ga̱jma̱a̱ taʼndúún gudxawíín. Rí nikiʼníin kuyáá ga̱jma̱a̱ rí nitsijmaa niʼni makáwábaaʼ wéñuuʼ rí asndu nikumu̱u̱ maniñuuʼ ñajunʼ ndrígóo (Jer. 20:8, 9). Mú tákanájkoo, ndiéjunʼ nimbáyúu manigu̱u̱ʼ maʼtáraʼa má xúʼko̱ ga̱jma̱a̱ rí xándxaʼwáminaʼ dí raʼkhí xá. Rí nirmáʼáan a̱jkiu̱u̱n a̱jma̱ dí gíʼdoo wéñuuʼ numuu. Timbá, ajngáa ndrígóo Dios rí naʼthúún xa̱bu̱ ma̱ndoo maʼni rí ‹makuwáʼ májánʼ nda̱wa̱á› (Jer. 29:11). Raga̱jma̱, rí Jeobá niríya̱a̱ʼ ikhaa mu maʼthúún xa̱bu̱ ga̱jma̱a̱ numuu mbiʼyuu (Jer. 15:16). Ikháanʼlu ma̱ngaa na̱jkua̱ kuʼyúlú ajngáa rí maʼni̱i̱ a̱jkiu̱ún xa̱bu̱ náa numbaaʼ mikrína rígi̱ ga̱jma̱a̱ na̱jkua̱ kuʼyúlú mbiʼyuu Jeobá numuu rí ni̱ndxu̱lú Xa̱bi̱i̱. Índo̱ narmáʼáan a̱jkiu̱lú ga̱jma̱a̱ a̱jma̱ dí gíʼdoo numuu rígi̱, nanigulúʼ itháan náa nuʼtáraʼa tséʼniuu á mu nudxawíín o tsédxawíín xa̱bu̱.

13. Ndiejunʼ eʼsngúlúʼ xkri̱da dí niʼthí Jesús dí naʼthí náa Marcos 4:26-29 rá.

¹³ Ndajyúuʼ mu mbáa maʼga̱nú mambaxúu májánʼ ga̱jma̱a̱ Dios. Jesús nijmuu xkri̱da ndrígóo xa̱bu̱ bi̱ naʼgu mu maʼsngáa dí xúʼko̱ nindxu̱u̱ (atraxnuu Marcos 4:26-29). * Xa̱bu̱ bi̱ naʼdu ndiʼyoo mañu mañúú tsiakii dí niʼni mu majma̱a̱ dí niʼdu ga̱jma̱a̱ nda̱a̱ nimbá dí ma̱ndoo maʼni mu makráʼa̱a̱nʼ itháan nacha̱ tsígáʼ. Xúʼko̱ má kayuuʼ, mbáa manújngoo mbayuuʼ mbiʼi mu mbuʼyaá dí bi̱ nuʼsngáá nagíʼ naʼnimbánuu dí nijmañuu numuu rí mañu mañúú ejkha̱ rakroʼo̱o̱. Xó má xa̱bu̱ bi̱ naʼdu xándoo maʼni rí makráʼáan nacha̱ xó má eyoo ikhaa dí niʼdu, ikháanʼlu ma̱ngaa xándoo muʼni dí xa̱bu̱ bi̱ nuʼsngáá majmañuu nacha̱ xó má eyulú ikháanʼ. Ikha jngóo xákawabáanʼ ni má xákanájkhulú á mu nduʼyáá rí ndajyúuʼ itháan ki xóo nikumulú. Tséʼniuu á mu nuʼdu o nuʼsngúún xa̱bu̱ ndayóoʼ rí maʼngo̱o̱ a̱jkiu̱lú (Sant. 5:7, 8).

14. Xkáʼni xkri̱da nasngájma dí ndajyúuʼ mbayu̱u̱ʼ mu xa̱bu̱ maguánú mudxawíín rá.

¹⁴ Náa tikhuu xuajin nanújngoo mba̱yu̱u̱ʼ tsiguʼ dí nimbáa na̱nguá enigu̱u̱ʼ maʼdxawuun ajngáa dí na̱jkua̱ kuʼyúlú. Guʼyáá experiencia ndrígóo Gladys ga̱jma̱a̱ Ruby Allen, a̱jmi̱i̱n a̱ngiu̱lú wa̱ʼxa̱ʼ kaníkhiin bi̱ naguwáʼ náa Canadá. Nákha 1959, nixuʼmiin xóo precursoras regular náa mbá xuajen dí rígá náa Quebec. * Xa̱bu̱ namíñúún eni̱ dxajkuun ga̱jma̱a̱ rí xóo gúthi xa̱bu̱, ikha jngóo na̱nguá enigu̱u̱nʼ mudxawíín. Gladys naʼthí dí narmáʼáan a̱jkiu̱u̱n: “Nitaráʼaxu náa mámbá guʼwá mbá migiñuʼ hora mámbá mbiʼi dí a̱jma̱ tsiguʼ mú nimbáa tánigu̱u̱ʼ maʼdxawunxu. Xa̱bu̱ nuruguáa ventana ndrígu̱ún índo̱ nduyuxu̱. Mú tákanájkhuxu”. Nda̱wa̱á niriʼkhu̱u̱ xóo ninindxu̱ún xa̱bu̱ ga̱jma̱a̱ ninigu̱u̱nʼ mudxawíín. Rí xúgi̱ ikhí rígá ajtsú congregación (Is. 60:22).

15. Ndiéjunʼ eʼsngúlú dí naʼthí 1 Corintios 3:6, 7 ga̱jma̱a̱ numuu dí muʼsngúún xa̱bu̱ rá.

¹⁵ Rí muʼsngúún xa̱bu̱ nindxu̱u̱ mbá ñajunʼ rí nuʼni mbá kambáxulú. Nuthi dí ndayóoʼ rí xúgíinʼ bi̱ kúwá náa mbá congregación muñambáá mu mbáa maʼga̱nú majngúun iyááʼ  (atraxnuu 1 Corintios 3:6, 7). * Mbá xkri̱da, mbáa publicador naniñuuʼ mbá tratado o mbá revista náa ñawúunʼ mbáa xa̱bu̱ bi̱ ninigu̱u̱ʼ maʼdxaun. Ikhú ndxájulú buʼko̱ na̱jkha̱nú ndaʼyoo dí xáwaphaa mata̱nga̱a̱ gáʼyoo xa̱bu̱, ikha jngóo naʼthúu̱n i̱mba̱a̱ publicador mambáyúu. Publicador bugi̱ nagíʼdu̱u̱ naʼsngóo ga̱jma̱a̱ numuu Biblia ma̱ngaa naʼthúún eʼwíinʼ a̱ngiu̱lú maʼga̱ gajmíi̱n ikhú mámbáa dí ikhaa mixtiʼkhu enii xóo exnúu tsiakii bi̱ najuiʼsngáá. Mámbáa publicador bi̱ naniníiʼ bi̱ najuiʼsngáá nambáyúu mu maxtíjyooʼ tsígáʼ dí gajkhun. Xúʼko̱ nambanúu dí niʼthí Jesús, rí bi̱ naʼdu ga̱jma̱a̱ bi̱ nagu̱u̱ dí nijma̱a̱ ma̱ndoo maʼdxúún numuu rí nájmiin niñambáá rí xa̱bu̱ maʼga̱nú maniniiʼ Dios (Juan 4:35-38).

16. Maski má nánguá xtaʼdáá tsiakii o nandoo kañáanʼ, ndíjkha rí ma̱ndoo maʼdxaaʼ índo̱ naratáraʼa rá.

¹⁶ Á mu ikháán nánguá xóo marataráʼa ga̱jma̱a̱ marasngúún xa̱bu̱ xó má nákha ginii numuu rí nánguá xtaʼdáá tsiakii ga̱jma̱a̱ nandoo kañáanʼ. Maski ajndu xúʼko̱, ma̱ndoo maʼdxuu a̱jkia̱a̱nʼ ga̱jma̱a̱ numuu rí nandoo natani̱ náa najuiʼdu. Guʼyáá ndiéjunʼ nirígá índo̱ rey David gajmíi̱n xa̱bi̱i̱ niʼngu̱u̱n niradíin xa̱bu̱ amalequitas ga̱jma̱a̱ niʼngu̱u̱n nini káwíin bi̱ kúwá náa guʼwún ga̱jma̱a̱ xúgíʼ dí nini kuʼwáʼ. A̱jma̱ ciento xa̱bu̱ niʼni néʼngu̱u̱n wéñuuʼ rí asndu nánguá niʼngu̱u̱n gágún guxmijná, ikha jngóo niguanún muñewa̱a̱n dí kuda̱. Nda̱wa̱á dí nigún guxmijná, David niʼthí dí xúgíʼ dí nindrigúu muxpiʼtamijná muda̱a̱ mbríguu xúgíinʼ (1 Sam. 30:21-25). Xúʼko̱ má kayuuʼ rígá mbiʼi xúgi̱ ga̱jma̱a̱ numuu ñajunʼ dí nuʼni náa nuʼsngúún xa̱bu̱ náa xúgíʼ numbaaʼ. Xúgiáánʼ bi̱ nuʼni ñajuunʼ Jeobá ga̱jma̱a̱ xúgíʼ a̱jkiu̱lú, asndu mangáanʼ nadxulu índo̱ nduʼyáá rí mbáa xa̱bu̱ nanigu̱u̱ʼ maʼnigajmaa Biblia mu xúʼko̱ maxkamaa kamba̱a̱ dí maʼga̱ kayáa maxtáa kámuu.

17. Ndíjkha rí ma̱ndoo muxnáa núma̱aʼ Jeobá rá.

¹⁷ Nuxnáa núma̱aʼ Jeobá numuu rí ndaʼyoo dí gíʼdoo numuu ñajunʼ dí nuʼni̱. Ikhaa ndaʼyoo dí ikháanʼlu xándoo muʼni dí magajnúu xúgíʼ xóo eyulú, mú ndaʼyoo tsiakii dí nuʼni ga̱jma̱a̱ ngajua dí nusngajmá, ikha jngóo naʼni tsájkurámáanʼlu ga̱jma̱a̱ numuu rúʼko̱. Ma̱ngaa naʼsngúlú makuwáánʼ gagi ga̱jma̱a̱ numuu rí nandoo nuʼni náa majmañún xa̱bu̱ dí gajkhun (Juan 14:12). Xáʼni a̱jma̱ a̱jkiu̱lú, guʼyáá gajkhun dí Dios maʼndoo kaʼyulú á mu tsékanájkhulú.