1, 2. a) Ndiéjunʼ niʼni Jeobá rí mambáyulúʼ ráʼ. b) Ndiéjunʼ eʼthí náa Isaías 46:10, 11 ga̱jma̱a̱ 55:11 rá.

BIBLIA nagi̱ʼdu̱u̱ ga̱jma̱a̱ ajngáa rígi̱ rí phú gíʼdoo numuu. Naʼthá: “Nákha ginii Dios niʼni mekhu ga̱jma̱a̱ ku̱ba̱ʼ” (Gén. 1:1). Ikháanʼ tséniʼnuʼ xúgíʼ rí niʼni Dios dí rígá náa numbaaʼ. Tséʼyáá wéñuʼ ndiéjunʼ dí rígá rijma̱a̱, xóo aguʼ ga̱jma̱a̱ gravedad (Ecl. 3:11). Mú Jeobá niʼni rí mbuʼyáá ndiéjunʼ rí nandoo maʼni ga̱jma̱á numuu Ku̱ba̱ʼ ma̱ngaa gajmíi̱n xa̱bu̱. Ikhaa niʼnii xa̱bu̱ xó má káʼnii ikhaa ga̱jma̱a̱ nindoo rí makuwá tsímáá náa tsu̱du̱u̱ Ku̱ba̱ʼ (Gén. 1:26). Xa̱bu̱ numbaaʼ mani̱ndxu̱ún e̱ji̱n, ga̱jma̱a̱ ikhaa mani̱ndxu̱u̱ Anu̱ún.

² Náa capítulo ajtsú ndrígóo Génesis naʼthúlúʼ rí nirígá mbá xkujndu dí tániñuʼ mambanúu rí nandoo Dios (Gén. 3:1-7). Mú Jeobá maʼngo̱o̱ maʼnimbánuu xúgi̱ xkujndu. Nimbáa xáʼngo̱o̱ garikhoo rí Jeobá nandoo maʼni (Is. 46:10, 11; 55:11). Nduʼyáá gajkhun rí mbiʼi dí kaʼyoo maʼga̱nú mambanúu rí phú nindoo Jeobá.

3. a) Xú kaʼnii nindxu̱u̱ kiʼsngáa dí nambáyulúʼ mú makru̱ʼu̱lú ajngáa rí kagu̱ náa Biblia rá. b) Náa numuu rí mbuʼyáá kiʼsngáa rígi̱ xúgi̱ rá. c) Xú káʼnii graxe̱ guriʼña̱a̱ rá.

 ³ Ndiʼyáálu má ndiéjunʼ eyoo Dios maʼni náa Ku̱ba̱ʼ gajmíi̱n xa̱bu̱ numbaaʼ. Ma̱ngaa nduʼyáá xú káʼnii rí Jesús nayambáá mú mambanúu rí nandoo Dios. Kiʼsngáa ndrígóo Biblia gíʼdoo wéñuʼ numuu rí mbuʼyáá. Rígi̱ ninindxu̱u̱ timbá rí nijmañulúʼ índo̱ rí nigíʼdu̱u̱ niʼnigajmaalú Ajngá rawunʼ Dios. Lá nandulúʼ mumbáñuun eʼwíínʼ xa̱bu̱ mu majmañún dí gajkhun ráʼ. Gu̱nʼ rígi̱ ma̱ndoo muʼni, numuu rí kuwáanʼ ruʼthúún xa̱bu̱ rí marmáʼáan a̱jkiu̱lú rí nikháñu Cristo (Luc. 22:19, 20). Xí ikhiin naguwaʼ náa mbiʼi kiejunʼ rígi̱, majmañún itháan numuu xúgíʼ rí Dios nandoo maʼni. Ikha jngó xúgi̱ rí ma̱ndoo mundxaʼwamíjna̱ ga̱jma̱a̱ numuu tikhuu graxe̱ rí maxkaxíin maguwáʼ. Náa artículo rígi̱ mbuʼyáálu ajtsú graxe̱ rígi̱: Ndiéjunʼ rí nindoo Dios maʼni náa Ku̱ba̱ʼ gajmíi̱n xa̱bu̱ numbaaʼ rá. Náa numuu tambánuu rí Dios nindoo marigá rá. Ndíjkha rí nigiʼdoo wéñuʼ numuu dí nixnáximinaʼ Jesús mú xúʼko̱ mambanúu rí nandoo Dios rá.

4. Xú káʼnii eni mba̱a̱ Dios ga̱jma̱a̱ xúgíʼ rí niʼni xá.

⁴ Jeobá nindxu̱u̱ bi̱ naʼni xúʼgíʼ rí mitsaan. Xúʼgíʼ rí niʼni phú májánʼ nindxu̱u̱ (Gén. 1:31; Jer. 10:12). Ndiéjunʼ ejmañuluʼ índo̱ nduʼyáá xúgíʼ rí mitsaan ga̱jma̱a̱ xóo niguma rá. Xúgíʼ rí niʼni Jeobá nambáyulúʼ, asndu rí itháan chíʼgíʼ ga̱jma̱a̱ rí itháan mba̱a̱. Lá ragájkhun rí naʼniulú tsiánguá índo̱ nduʼyáá xú káʼnii ñajunʼ célula ndrígóo mbáa xa̱bu̱, índo̱ nduʼyáá mbáa ada̱ bi̱ ndiʼkhún nigumaa o índo̱ nduʼyáa náa rámaaʼ a̱jkha̱ʼ ráʼ. Ikháanʼ ma̱ndoo manigulúʼ xúgíʼ rí mitsaan numuu rí Jeobá niʼniáanʼ xúʼko̱ kaʼnii (atraxnuu Salmo 19:1 * ga̱jma̱a̱ 104:24). *

5. Ndiéjunʼ niʼni Jeobá mu mañajunʼ májánʼ xúgíʼ rí niʼnii rá.

⁵ Tsumáá wéñuʼ, Jeobá nigruiga̱ náa martumuu xúgíʼ rí niʼni. Ikhaa niʼni xtángoo ndrígóo numbaaʼ ga̱jma̱a̱ xtángoo dí naʼthí xóo makuwa xa̱bu̱ mú xúʼko̱ marigá rí májánʼ ga̱jma̱a̱ tsímáá náa numbaaʼ (Sal. 19:7-9). Jeobá nixnúu ñajunʼ xúgíʼ dí rígá numbaaʼ. Mbá xkri̱da, xtángoo ndrígóo gravedad tséniñuʼ rí atmósfera matsíngunʼ náa Ku̱ba̱ʼ ga̱jma̱a̱ naʼtáñajunʼ lamáa ga̱jma̱a̱ naʼni rí maʼbaxu̱u̱ iyaʼ. Á mu nda̱a̱ gravedad, xárígá vida náa Ku̱ba̱ʼ. Xúgíʼ dí rígá numbaaʼ nañajunʼ májánʼ wéñuʼ numuu rí Jeobá niʼni marigá. Rígi̱ nasngájma rí niʼni Ku̱ba̱ʼ ga̱jma̱a̱ niʼnii xa̱bu̱ numbaaʼ ga̱jma̱a̱ mbá numuu. Índo̱ nuʼtáruʼun xa̱bu̱, ma̱ndoo mumbáñuun muniʼniiʼ bi̱ niʼni xúgíʼ dí rígá náa numbaaʼ (Rev. 4:11).

6, 7. Xú káʼnii nindxu̱u̱ tikhu regalos dí Jeobá nixnúu Adán ga̱jma̱a̱ Eva rá.

⁶ Jeobá nindoo rí xa̱bu̱ makuwá kámuu mbiʼi náa tsu̱du̱u̱ Ku̱ba̱ʼ (Gén. 1:28; Sal. 37:29). Numuu rí ikhaa májánʼ a̱jkiu̱u̱n, nixnúu Adán ga̱jma̱a̱ Eva mbaʼa rí phú gíʼdoo numuu (atraxnuu Santiago 1:17). * Mbá xkri̱da, niʼni rí  ma̱ndoo muraʼwíí ndiéjunʼ guni ga̱jma̱a̱ rí mundxaʼwamíjna̱, rí maʼndún kuyamijná ma̱ngaa rí muguaʼdiin bi̱ mambaxúún gajmiún. Jeobá niʼthúu̱n Adán ga̱jma̱a̱ xú káʼnii gáʼni rí májánʼ. Ma̱ngaa, niʼsngóo xóo mañeuminaʼ, ma̱ngaa xóo mañewu̱u̱n ku̱ba̱ʼ ga̱jma̱a̱ xujkhúʼ (Gén. 2:15-17, 19, 20). Jeobá nixnúu Adán ga̱jma̱a̱ Eva rí ma̱ndoo murugua, muyexi, manigu̱nʼ, mudxawíín ga̱jma̱a̱ muñeñún xúgíʼ rí májánʼ dí niʼni maguaʼdáá ikhiin. Mú xúʼko̱ ma̱ndoo makuwa gagi náa ku̱ba̱ʼ mitsaan rí nikhanun. Jeobá ma̱ngaa nixnúún mbaʼa ñajunʼ mitsaan dí muni. Adán ga̱jma̱a̱ Eva xúniñaʼ rajmañún i̱ʼwáʼ rí nuxi̱ʼ mámbá mbiʼi.

⁷ Ndiéjunʼ imbo̱ʼ nindoo Dios marigá rá. Jeobá niʼni rí Adán ga̱jma̱a̱ Eva ma̱ndoo muguaʼdiin e̱ji̱n bi̱ raguáʼdáá aʼkhá. Ga̱jma̱a̱ e̱ji̱n bugi̱ muguaʼdiin e̱jñún. Mú xúʼko̱ majtíin xa̱bu̱ náa tsu̱du̱u̱ Ku̱ba̱ʼ. Dios nandoo dí xa̱bu̱ guanii maʼndún kuñún e̱jñún xó má ikhaa nindoo kaʼyoo Adán ga̱jma̱a̱ Eva bi̱ na̱nguá niguáʼdáá aʼkhá. Dios nixnúún ku̱ba̱ʼ xa̱bu̱, ga̱jma̱a̱ xúgíʼ dí mitsaan ma̱ngaa rí gíʼdoo numuu dí rígá ikhí. Gi̱jyooʼ maʼni guʼwún kámuu mbiʼi (Sal. 115:16).

8. Náa numuu rí Jeobá nixnúu Adán ga̱jma̱a̱ Eva xtángoo dí na̱ʼkhá náa Génesis 2: 16, 17 rá.

⁸ Nákhi mbiʼi rúʼko̱ tárígá xóo Jeobá nindoo. Ndiéjunʼ nirígá rá. Guʼyáá. Jeobá nixnúu Adán ga̱jma̱a̱ Eva mbá xtángoo dí na̱nguá mingíjyúuʼ munimbaníí mu mbuyáá dí rígá náa nartumuu rí muni. Ikhaa niʼthí: “Xúgíʼ xndúu ixi̱ dí rígá náa ku̱ba̱ʼ mitsaan ma̱ndoo miʼtsu asndu magiʼmaʼ. Mú ixi̱ ku̱ma̱ dí májánʼ ga̱jma̱a̱ dí ra̱májánʼ, xándoo miʼtsu, numuu rí índo̱ gíʼtsu xndúu ixi̱ rúʼko̱, gajkhun makañáʼ” (Gén. 2:16, 17). Xtángoo rígi̱ na̱nguá mingíjyúuʼ makru̱ʼu̱u̱n. Ga̱jma̱a̱ xáʼniún gakhi̱i̱ munimbaníí, numuu dí náa ixi̱ ri̱ʼi̱ rígá mbaʼa dí ma̱ndoo mu̱phu̱.

9, 10. a) Ndiéjunʼ niʼni tsu̱du̱u̱ Satanás, Jeobá rá. b) Ndiéjunʼ niraʼwíí maʼni Adán ga̱jma̱a̱ Eva rá. (Atayáá timbá xtiʼkhu.)

⁹ Satanás nijmiuu mbáa a̱bu̱nʼ mú maʼni nduwaʼ Eva ga̱jma̱a̱ maʼni dí xáʼnimbo̱o̱ náa Jeobá (atraxnuu Génesis 3:1-5; * Rev. 12:9). Niʼni makujmaa rí Dios nindxu̱u̱ mixkawiʼ a̱jkiu̱u̱n numuu rí tániñuʼ rí e̱ji̱i̱n mu̱phu̱ “xúgíʼ xndúu ixi̱ dí rígá náa ixi̱ ri̱ʼi̱”. Asndu xóo niʼthí: “Xú káʼnii dí xándoo muni dí ikháanʼ eyalá rá.” Nda̱wa̱á niʼthúu̱n Eva nduwaʼ rígi̱: “Xaʼguanú makhañála”. Ma̱ngaa niʼnirájaaʼ rí xáyooʼ ma munimbu̱u̱n náa Dios. Ma̱ngaa niʼthún: “Numuu rí Dios ndaʼyoo rí índo̱ ikháanʼ guphula xndúu ixi̱ rúʼko̱ mambaʼto idala”. Ga̱jma̱a̱ ajngáa rígi̱ Satanás niʼni tsu̱du̱u̱ Jeobá rí ikhaa táʼndoo rí Adán ga̱jma̱a̱ Eva mu̱phu̱ xndú ixi̱ numuu xúʼko̱ maguaʼdáá mbá ku̱ma̱ kiejunʼ. Nda̱wa̱á kayuʼ, Satanás niʼthí iwáá minduwaʼ rígi̱: “Ga̱jma̱a̱ manindxala xóo Dios, muniʼnuʼ dí májánʼ ga̱jma̱a̱ dí ra̱májánʼ”.

 ¹⁰ Adán ga̱jma̱a̱ Eva ndiyóoʼ dí muraʼwíi á mu munimbu̱ún kuya̱ Dios o a̱bu̱nʼ dxe̱ʼ. Phú gíná, niraʼwíí rí xúnimbuun kuyáá Dios. Niniñaaʼ Jeobá ga̱jma̱a̱ taʼndun mani̱ndxu̱u̱n Anu̱ún. Xúʼko̱ niguájun náa nijniun Satanás. Mbiʼi rúʼko̱ nindáti̱gu̱u̱n rí mambaxúún gajmiún Jeobá (Gén. 3:6-13).

11. Náa numuu rí Jeobá tándoo maʼni mba̱a̱ a̱jkiu̱u̱n aʼkhá ndrígóo Adán ga̱jma̱a̱ Eva rá.

¹¹ Índo̱ Adán ga̱jma̱a̱ Eva túnimbu̱ún xtángoo ndrígóo Dios, niniñaaʼ ranindxu̱ún xa̱bu̱ bi̱ na̱nguá guáʼdáá aʼkhá. Ga̱jma̱a̱ ninindxu̱u̱n xa̱bu̱ sia̱nʼ ndrígóo Dios, numuu rí ikhaa nawiyuuʼ kaʼyoo dí ra̱májánʼ. Náa Biblia naʼthí rí iduu Dios nindxu̱u̱ “kaʼwu” mu mbaʼyoo dí ra̱májánʼ (Hab. 1:13). Á mu Jeobá niʼni mba̱a̱ a̱jkiu̱u̱n kaʼyoo aʼkhá ndrígóo Adán ga̱jma̱a̱ Eva, rúʼko̱ gáʼni gachúu xúgíʼ rí niʼni. Ángeles ga̱jma̱a̱ xa̱bu̱ numbaaʼ muraximíjna̱ a mú gajkhun nindxu̱u̱ dí naʼthí ikhaa. Mú Jeobá nindxu̱u̱ jmbii náa awan ndrígóo ga̱jma̱a̱ ndaʼyamajkuu má xúʼko̱ (Sal. 119:142). Maski ajndu Adán ga̱jma̱a̱ Eva ma̱ndoo muraʼwíí rí muni, mbaʼyóoʼ muraʼníí rí gáʼkha̱ nda̱wa̱á numuu rí túnimbu̱u̱n náa Jeobá. Índo̱ ninújngoo mbiʼi, nikháñun ga̱jma̱a̱ niguajti̱i̱n yujndaʼ (Gén. 3:19).

12. Ndiéjunʼ niguáʼniin e̱ji̱i̱n Adán rá.

¹² Índo̱ Adán ga̱jma̱a̱ Eva ni̱ʼphu̱ xndúu ixi̱, Jeobá nánguá nindoo rí mani̱ndxu̱ún e̱ji̱n. Ikha jngó nixkawíin náa ixi̱ ri̱ʼi̱ Edén ga̱jma̱a̱ nánguá niniñúnʼ matangi̱i̱n (Gén. 3:23, 24). Jeobá niniñuʼ mumíniiʼ ga̱jma̱a̱ numuu dí niraʼwíí muni (atraxnuu Deuteronomio 32:4, 5). * Ga̱jma̱a̱ numuu rígi̱ nánguá nindoo mbuyaridáá xóo nindxu̱u̱ Jeobá. Adán niʼnimbátiga rí mitsaan wéñuʼ xóo maxtáa nda̱wa̱á ga̱jma̱a̱ xóo makuwá e̱ji̱i̱n. I̱ndó niʼni rí maguaʼdáá aʼkhá ga̱jma̱a̱ rí makhañún (Rom. 5:12). Adán nirígú kaʼñúnʼ e̱ji̱i̱n dí ma̱ndoo makuwá kámuu mbiʼi. Adán ga̱jma̱a̱ Eva nánguá nindoo muguaʼdiin e̱jñún bi̱ raguáʼdáá aʼkhá, xúʼko̱ má e̱jñún ma̱ngaa. Asndu nákhi mbiʼi dí Satanás niʼni dí Adán ga̱jma̱a̱ Eva xúnimbu̱ún kuyáá Dios, xúʼko̱ má eʼni asndu xúgi̱, naʼni rí xúgínʼ xa̱bu̱ numbaaʼ muʼni xóo má eyoo ikhaa (Juan 8:44).

13. Ndiéjunʼ dí nandoo Jeobá ga̱jma̱a̱ numún xa̱bu̱ numbaaʼ rá.

¹³ Maski asndu Adán ga̱jma̱a̱ Eva niniñaaʼ Jeobá, ikhaa xóó nindoo kaʼñún xa̱bu̱ numbaaʼ. Dios nindoo rí xa̱bu̱ mambaxúún gajmiún ikhaa ga̱jma̱a̱ táʼndoo rí nimbáa makhañúu (2 Ped. 3:9). Ikha  jngó ikhaa niʼni xúgíʼ rí ndiyóoʼ mu xa̱bu̱ mambaxúún gajmiún ikhaa. Mú xú káʼnii niʼni rígi̱ rí asndu xánujngorámuuʼ xtángoo ndrígóo xá. Guʼyáá.

14. a) Xó má eʼthí Juan 3:16, ndiéjunʼ niʼni Dios mu maʼni káwáanʼ náa aʼkhá ga̱jma̱a̱ dí nakháñulú rá. b) Xú káʼnii graxe̱ gándoo gúʼyáá gajmiúlú xa̱bu̱ rá.

¹⁴ (Atraxnuu Juan 3:16). Mbáa tikuiin xa̱bu̱ bi̱ muʼthúún maguwáʼ náa majmaku̱ma̱a̱ xóo nikháñu Jesús tra̱ʼa̱ edxu̱ún versículo rígi̱. Mú, lá nduyáá xa̱bu̱ rí ga̱jma̱a̱ numuu dí nixnáximinaʼ Cristo ma̱ndoo makuwaanʼ kámuu mbiʼi rá. Ma̱ndoo mumbáñuun xa̱bu̱ makru̱ʼu̱u̱n itháan ga̱jma̱a̱ numuu graxe̱ rígi̱. Nguánáa rá. Índo̱ guʼthúún magún náa majmaku̱ma̱a̱ rí nikháñu Jesús, índo̱ gakuwa ikhí ga̱jma̱a̱ índo̱ gagutangaánʼ guʼñún nda̱wa̱á. Á mu ikhiin nakru̱ʼu̱u̱n májánʼ ndiéjunʼ eyoo gáʼthúu̱n tsigijñaʼ ndrígóo Cristo, maguanúu makru̱ʼu̱u̱n itháan májánʼ nguáthá eyoo kaʼyulú Jeobá ga̱jma̱a̱ dí najmañuu wéñuʼ. Ndiéjunʼ gándoo gúʼthún xa̱bu̱ ga̱jma̱a̱ numuu tsigijñaʼ ndrígóo Cristo rá.

15. Náa numuu Jesús ninindxu̱u̱ mixtiʼkuii ki xóo Adán rá.

¹⁵ Jeobá nixnáa mbáa xa̱bu̱ bi̱ na̱nguá nigiʼdoo aʼkhá mu maʼni káwáanʼ. Xa̱bu̱ buʼko̱ bi̱ nánguá nigiʼdoo aʼkhá ndiyóoʼ mani̱ndxu̱u̱ jmbii náa Jeobá ga̱jma̱a̱ maʼndoo maxnáximinaʼ ga̱jma̱a̱ numún xa̱bu̱ numbaaʼ (Rom. 5:17-19). Ikha jngó Jeobá niríyaaʼ Jesús bi̱ niʼnii ginii. Dios nikunguanʼ A̱ʼdióo mu maxtáa náa tsu̱du̱u̱ Ku̱ba̱ʼ (Juan 1:14). Xúʼko̱ ninindxu̱u̱ Jesús mbáa xa̱bu̱ bi̱ tágiʼdoo aʼkhá, xó má ninindxu̱u̱ Adán nákha ginii. Mú Jesús ninindxu̱u̱ mixtiʼkuii ki xóo Adán. Náa numuu rá.  Numuu rí ikhaa niʼnimbánuu xtángoo rí Dios nindoo maʼnimbánuu mbáa bi̱ tágiʼdoo aʼkhá. Maski asndu Jesús niraʼnuu xkujndu dí itháan mingíjyúuʼ wéñuʼ, niʼnimbo̱o̱ má xúʼko̱ xtángoo ndrígóo Dios.

16. Náa numuu rí nixnáximinaʼ Jesús nigiʼdoo wéñuʼ numuu rá.

¹⁶ Rí nixnáximinaʼ Jesús, nindoo niʼni káwáanʼ náa aʼkhá ga̱jma̱a̱ rí nakháñulú. Ikhaa ninindxu̱u̱ ga̱jma̱a̱ xó má ndiyóoʼ maʼni Adán. Ninindxu̱u̱ mbáa xa̱bu̱ bi̱ tágiʼdoo aʼkhá bi̱ nisngajma rí niwi̱ji̱ jmbu ga̱jma̱a̱ niʼnimbo̱o̱ náa Dios (1 Tim. 2:6). Rí Jesús nixnáximinaʼ niʼni rí xa̱bekha, gu̱ʼu̱ ga̱jma̱a̱ i̱ji̱n makuwa kámuu mbiʼi (Mat. 20:28). Xó má eʼyáá, dí nixnáximinaʼ Jesús nigiʼdoo wéñuʼ numuu mu mambanúu dí nandoo Dios (2 Cor. 1:19, 20).

17. Ndiéjunʼ gándoo marigá ga̱jma̱a̱ tsigijñaʼ ndrígóo Jesús rá.

¹⁷ Jeobá niʼni numuu mba̱a̱ wéñuʼ mú ma̱ndoo makáwáanʼ (1 Ped. 1:19). Ikha ndaʼyoo dí kuaʼdáá numulúʼ ikha jngó niniñuʼ rí A̱ʼdióo makhañúu ga̱jma̱a̱ numulúʼ (1 Juan 4:9, 10). Xóo muʼthá, Jesús niriʼkuriyaaʼ Adán ga̱jma̱a̱ ni̱jkha̱nú ninindxu̱u̱ anu̱lú (1 Cor. 15:45). Ga̱jma̱a̱ numuu tsigijñaʼ ndrígóo Jesús rí ma̱ndoo makuwaanʼ kámuu mbiʼi. Ma̱ngaa ma̱ndoo manindxu̱lúʼ e̱ji̱i̱n Dios. Tsigijñaʼ rígi̱ maʼni rí xaguaʼdáá aʼkhá nda̱wa̱á, ga̱jma̱a̱ xanujngorámuʼ xtángoo ndrígóo índo̱ gagruiguáanʼ xóo e̱ji̱i̱n. Ra̱ʼkhá tháán mitsaan gáʼni̱i̱ índo̱ dí mbá xúgínʼ xa̱bu̱ bi̱ naguajún jmbu náa Dios ní xaguaʼdáá aʼkhá. Ikhú xúgínʼ bi̱ kúwi̱i̱n mekhuíí ga̱jma̱a̱ bi̱ kuwa náa Ku̱ba̱ʼ makuwa mbá kambáxu̱u̱n. Xúgiáanʼ manindxu̱lúʼ e̱ji̱i̱n Dios (Rom. 8:21).

18. Nguáná gáʼga̱nú Jeobá “mani̱ndxu̱u̱ xúgíʼ náa xúgínʼ” rá.

¹⁸ Maski asndu bi̱ ninindxu̱u̱n timbíi̱n anu̱lú túnimbu̱ún kuyáá Jeobá, mú ikhaa nindoo káʼñúnʼ ma xúʼko̱ xa̱bu̱ numbaaʼ. Ikha jngó nixnáá A̱ʼdióo mú maʼni káwáanʼ. Maski asndu ni̱ndxu̱lú xa̱bu̱ aʼkhá, Satanás xándoo maʼni tsúdáanʼ dí xaguajún jmbu náa Jeobá. Ga̱jma̱a̱ numuu dí nikháñun Jesús, Jeobá mambáyulúʼ mú manindxu̱lúʼ mbáa xa̱bu̱ májáánʼ. Phú mitsaan gaʼni índo̱ xúgínʼ bi̱ gudriguíi Jesús ga̱jma̱a̱ bi̱ gaguaʼdáá fe náa ikhaa, makuwá kámuu mbiʼi (Juan 6:40). Anu̱lú Jeobá bi̱ nakroʼoʼ wéñuʼ ga̱jma̱a̱ bi̱ nandoo kaʼyulú maʼni mbanuu dí nandoo ga̱jma̱a̱ mambáñún xa̱bu̱ mu xaguaʼdáá aʼkhá. Ikhú, ikhaa “mani̱ndxu̱u̱ xúgíʼ náa xúgínʼ” (1 Cor. 15:28).

19. a) Ndiéjunʼ guʼni á mu nandulúʼ muxnáa númaa ga̱jma̱a̱ numuu tsigijñaʼ ndrígóo Jesús rá. (Atayáá kúgumaʼá “ Guʼñíínʼ má xúʼko̱ xa̱bu̱ bi̱ kaʼñún mudxuun”.) b) Ndiéjunʼ gúʼyáá náa imbo̱ʼ artículo rá.

¹⁹ A mú nandulúʼ muxnáa núma̱aʼ ga̱jma̱a̱ numuu tsigijñaʼ ndrígóo Jesús, muʼthúún eʼwíínʼ ga̱jma̱a̱ numuu tsigijñaʼ rígi̱ dí gíʼdoo wéñuʼ numuu. Xa̱bu̱ ndayóoʼ mbuʼyáá ga̱jma̱a̱ numuu tsigijñaʼ rígi̱, Jeobá naʼthúún rí makuwa kámuu mbiʼi. Mú dí naguma káwáanʼ raʼkháa i̱ndó maʼni rí makuwaanʼ kámuu mbiʼi. Ma̱ngaa mambánuu minduwaʼ rí Satanás niʼni náa ixi̱ ri̱ʼi̱ Edén. Náa i̱mba̱ artículo mbuʼyáá xú káʼnii gambánuu minduwaʼ rígi̱.