1. a) Ndiéjunʼ gíʼmaa muraʼwíí muni jiáma nda̱wa̱á rá. b) Náa numuu dí ragíʼmaa mamiñún xá. (Atayáá timbá xtiʼkhu.)

DXÁMÁ, ikháánʼ mangáán natayáá májánʼ rí nákha xóó tserajtun kamba̱a̱ mi̱dxu̱ʼ ginii ndayóoʼ matríyaʼ awan náa gídxúʼ. Vida nindxu̱u̱ xóo mbá náa mi̱dxu̱ʼ, ga̱jma̱a̱ índo̱ matríyaʼ awan náa mi̱dxu̱ʼ nindxu̱u̱ xóo índo̱ ni̱ndxa̱ʼ dxámá. Gajkhun má rí índo̱ matríyaʼ awan naʼni mingíjyúuʼ. Mbáa dxáʼgú bi̱ mbiʼyuu Heather naʼthí: “Namiñuʼ índo̱ nandxa̱ʼwa̱mínáʼ ndiéjunʼ gáni mbá xúgíʼ mbiʼi rí gáxtáá”. Á mu xúʼko̱ má ku̱ma̱ʼ mangáán, garmáʼáan a̱jkia̱nʼ rí eʼthí Jeobá: “Xatiexi asndu náa, numuu dí ni̱ndxu̱ʼ Dios ndrígáʼ. Gajkhun dí ikhúúnʼ mani gakhi̱i̱ a̱jkia̱nʼ. Phú gajkhun dí ikhúúnʼ mambáyaʼ” (Is. 41:10).

2. Náa numuu natayáá rí Jeobá nandoo maraxtaa gagi nda̱wa̱á rá.

² Jeobá nambáyaʼ matríyaʼ májánʼ awan rí xóo maraxtaa nda̱wa̱á (Ecl. 12:1; Mat. 6:20). Ikhaa nandoo maraxtaa gagi. Ma̱ndoo ma̱ta̱ya̱a̱ rúʼko̱ índo̱ natiexi, natadxawíín ga̱jma̱a̱ índo̱ nanigua̱ʼ xúgíʼ rí mitsaan rí niʼni wíi. Atatsaʼwáminaʼ rí ikhaa ma̱ngaa nañewu̱nlú ga̱jma̱a̱ naʼsngúlú májánʼ xóo makuwáanʼ. Atayáá rí eʼthún bi̱ nunigaʼduunʼ xtágabu ndrígóo: “Niraʼwíí rí ikhúúnʼ tsínigu̱ʼ”. Ga̱jma̱a̱ xóó naʼthí: “¡Gu̱ya̱a̱! Xa̱bi̱ʼ maʼdxúún, mú ikháanʼ mati̱ya̱la. ¡Gu̱ya̱a̱! Xa̱bi̱ʼ maʼdxúún wéñuʼ ga̱jma̱a̱ rí májánʼ a̱jkiu̱ún” (Is. 65:12-14). Índo̱ nuraʼwíí muʼni rí májánʼ, nuʼni mba̱a̱ Jeobá (Prov. 27:11).

3. Ndiéjunʼ enda̱ʼa̱ʼ matani Jeobá rá.

³ Ndiéjunʼ eʼtháanʼ matani Jeobá rá. Atatsaʼwáminaʼ ga̱jma̱a̱ numuu rígi̱. Ikhaa niʼni wíin xujkhúʼ mu makuwa gagi rí muphiʼtsu, muwa̱a̱n iyaʼ ga̱jma̱a̱ muguaʼdiin e̱jñún. Mú ikháanʼ niʼniáanʼ mu makuwáanʼ tsímáá ga̱jma̱a̱ rí gíʼdoo itháan numuu, xóo rí muniʼnííʼ ga̱jma̱a̱ muʼni ñajunʼ ndrígóo má xúʼko̱ (Sal. 128:1; Mat. 5:3). Náa Biblia naʼthí rí bi̱ Niʼniáanʼ nindxu̱u̱ ‹Dios bi̱ nandoo kaʼyalu› ga̱jma̱a̱ “Dios gagi”, ma̱ngaa niʼnii xa̱bu̱ numbaaʼ “xó má kaʼnii ikhaa” (2 Cor. 13:11; 1 Tim. 1:11; Gén. 1:27). Ikha jngó maraxtaa tsímáá á mu natayaridáá Dios. Náa Ajngóo naʼthí: “Ihua gagui xta tsi naxna raʼka xo ri majana” (Hech. 20:35). Lá nitagíʼnii xúʼko̱ mbá miʼtsú ráʼ. Rígi̱ na̱nguá nindxu̱u̱ mingíjyúuʼ muni xa̱bu̱. Mú Jeobá nandoo rí awan rí gatríyaʼ masngájma rí nandaʼ xtayáá ikhaa ga̱jma̱a̱ rí nandaʼ xtañún a̱ngia̱nʼ (atraxnuu Mateo 22:36-39).

4, 5. Náa numuu nixtáa gagi Jesús rá.

⁴ Jesucristo nindxu̱u̱ mbá xkri̱da jmbu ma̱ta̱ya̱a̱ ikháánʼ. Índo̱ ninindxu̱u̱ ada̱, niʼtsíin ga̱jma̱a̱ niʼni gagiminaʼ. Xó má eʼthí náa Ajngóo Dios, rígá “mbiʼi rí mundu̱ʼwa̱” ga̱jma̱a̱ “mbiʼi rí makixáanʼ” (Ecl. 3:4). Mú Jesús ma̱ngaa niʼnigajmaa Escrituras ga̱jma̱a̱ xúʼko̱ ni̱jkha̱nú nimbáxu̱u̱ ga̱jma̱a̱ Anu̱u̱. Índo̱ ikhaa nigiʼdoo 12 tsiguuʼ, bi̱ nusngáa náa templo “pu-nimakun niʼni ri pu-majan idxu, jame ri nariʼña” ga̱jma̱a̱ numuu xúgíʼ rí na̱ʼkha̱ náa Dios (Luc. 2:42, 46, 47).

⁵ Índo̱ ni̱jkha̱ rakhi̱i̱, Jesús nixtáa gagi numuu rí niʼni rí nindoo Dios. Mbá xkri̱da, Anu̱u̱ nindoo rí maʼthúún “xabo tsi guini ajnga ri majan” ga̱jma̱a̱ “ri mafrigun xabo tsi tsifrigun” (Luc. 4:18). Náa Salmo 40:8 nasngájma xú káʼnii nikumu̱u̱ Jesús: “Dios ndrígóʼ, nanigu̱ʼ wéñuʼ mani rí nandaʼ ikháánʼ”. Ikhaa naniguʼ maʼsngúún xa̱bu̱ ga̱jma̱a̱ numuu Anu̱u̱ bi̱ xtáa mekhuíí (atraxnuu Lucas 10:21). Mbá miʼtsú, niʼsngóo mbáa a̱ʼgu̱ xú káʼnii mbaʼyamajkuu Dios. Nda̱wa̱á niʼthún xa̱bi̱i̱: “Ri meʼkoloʼ, ruʼkue ñajun ri manembanuloʼ xo ri nando tsi nijungun, ri mamboʼloʼ meneloʼ ñajunʼ” (Juan 4:31-34). Rí nindoo kaʼyoo Dios ga̱jma̱a̱ eʼwíínʼ niʼni rí maxtáa gagi. Xúʼko̱ mangáán ma̱ndoo maʼni rí maraxtaa gagi.

6. Náa numuu rí májánʼ gáʼni rí maratha̱a̱n mbáa cristiano bi̱ najmañuu itháan awan rí natríyaʼ matani rá.

⁶ Mbaʼin cristianos ninindxu̱ún precursores índo̱ ninindxu̱ún jiáma, ga̱jma̱a̱ rígi̱ niʼni rí makuwá tsímáá. Náa numuu rí tserathúún tikhun rí ikhiin awan ndrígá rá. Proverbios 15:22 naʼthí rí nagájnuu májánʼ awan á mu natraxu̱u̱n eʼwíínʼ xa̱bu̱. A̱ngiu̱lú bugi̱ muta̱nʼ rí matani káxi̱ ñajunʼ Dios maʼni majmañaaʼ ma̱ngaa mambáyaʼ náa xúgíʼ vida ndrígáʼ. Jesús nijmañuu mbaʼa wéñuʼ náa Anu̱u̱ nákhi nixtáa mekhuíí. Mú nijmañuu má xúʼko̱ índo̱ niʼtáraʼa náa tsu̱du̱u̱ Ku̱ba̱ʼ. Mbá xkri̱da, ndiʼyoo rí naʼni maxtáa gagi índo̱ naʼtáruʼun ajngáa rí májánʼ xa̱bu̱ ga̱jma̱a̱ dí rígi̱ naʼni rí maʼga̱nú asndu náa a̱jkiu̱ún, ma̱ngaa rí mawiji̱ jmbu índo̱ naraʼnuu tsáʼkhá (atraxnuu Isaías 50:4; * Heb. 5:8; 12:2). Náa numuu maʼni rí maraxtaa tsímáá ikháánʼ rí matani káxi̱ ñajunʼ Dios rá. Guʼyáá.

7. Náa numuu rí mbaʼin jiáma nanigu̱nʼ musngúún xa̱bu̱ rá.

⁷ Jesús niʼthí rí bi̱ ni̱ndxu̱lú cristianos gíʼmaa mu̱ʼgua̱ ga̱jma̱a̱ muʼsngúún xa̱bu̱ ga̱jma̱a̱ numuu rí gajkhun (Mat. 28:19, 20). Á mu natatsaʼwáminaʼ matani ñajunʼ rígi̱, maraxtaa gagi wéñuʼ ga̱jma̱a̱ matayamajkuíí Dios. Gajkhun má, xó má eʼyáá rí narígá ga̱jma̱a̱ i̱ʼwáʼ, ndayóoʼ mbiʼi mu mi̱dxu̱ʼnú  majmañaaʼ. Atayáá xóo eʼthí mbáa ndxájulú bi̱ mbiʼyuu Timothy, bi̱ ninindxu̱u̱ precursor índo̱ nindxu̱u̱ dxámá: “Naniguʼ mani káxi̱ ñajunʼ Jeobá numuu rí xúʼko̱ nandoo nasngajmúu rí nandoʼ ka̱yo̱o̱. Nákha ginii, tájmuu masngóo nimbáa ga̱jma̱a̱ numuu Biblia. Mú nda̱wa̱á ni̱jkhá i̱mba̱ níʼkhá, asndu xóó tséʼni mbá gu̱nʼ rí nigíʼdu̱u̱ má nisngúún mbaʼin xa̱bu̱ ga̱jma̱a̱ numuu Biblia. Mbáa bi̱ nisngóo nigíʼdu̱u̱ ni̱jkha̱ náa Guʼwá nagimbáanʼ. Nda̱wa̱á ni̱jkhá a̱jma̱ igu̱nʼ Náa Najuiʼsngúún ga̱jma̱a̱ Biblia Xa̱bekha bi̱ xóó Tsínigunʼ, * ga̱jma̱a̱ nixuʼmún maʼgá i̱mba̱ níʼkhá. Ikhí nigíʼdu̱u̱ nisngúún a̱jkhu̱u̱n xa̱bu̱ ga̱jma̱a̱ numuu Biblia. Naniguʼ wéñuʼ masngúún rí gajkhun xa̱bu̱ numuu rí nandoo nda̱yo̱o̱ xú káʼnii xi̱ʼ kaʼwu naʼni rí mariʼkhu̱u̱ xóo kuwa xa̱bu̱” (1 Tes. 2:19).

8. Ndiéjunʼ eni tikhun jiáma mu musngúún itháan xa̱bu̱ rá.

⁸ Tikhun jiáma ga̱jma̱a̱ wa̱ʼxa̱ʼ nijmañún i̱mba̱ ajngáa. Mbá xkri̱da, mbáa ndxájulú bi̱ xtáa náa Estados Unidos bi̱ mbiʼyuu Jacob niʼnirámáʼ: “Índo̱ nigúʼdoo juwan tsiguʼ, mbaʼin a̱ngui̱nʼ bi̱ ninigajmaa gajmíi̱nʼ náa escuela naguwáʼ náa Vietnam. Nindoʼ mathu̱u̱n ga̱jma̱a̱ numuu Jeobá, ikha jngó nda̱wa̱á nigíʼ majmañuʼ ajngún. Nijmañuʼ índo̱ ni̱jkhá ra̱yo̱o̱ revista Bi̱ Nayejngoo inglés ga̱jma̱a̱ rí vietnamita. Ma̱ngaa nimbáxuʼ gajmíi̱nʼ a̱ngiu̱lú bi̱ kuwa náa congregación vietnamita rí gíiʼ mijngii goʼwóoʼ. Índo̱ nigúʼdoo 18 tsiguʼ ninindxu̱ʼ precursor. Nda̱wa̱á ni̱jkhá Náa Najuiʼsngúún ga̱jma̱a̱ Biblia Xa̱bekha bi̱ xóó Tsínigunʼ. Gi̱jyooʼ niʼniratúún mu mani xúgíʼ ñajunʼ dí rígá náa grupo vietnamita náa xtáá, náa ni̱ndxu̱ʼ precursor ga̱jma̱a̱ náa xtáá mbáwun xóo bi̱ kayá edxu̱u̱. Mbaʼin vietnamitas naʼniún tsiánguá rí nijmañuʼ ajngún. Nuthu̱nʼ rí maʼgá náa guʼwún, ga̱jma̱a̱ mbaʼa nuthu nagíʼdu̱u̱ nasngúún ga̱jma̱a̱ numuu Biblia. Tikhun nijngún má iyááʼ” (atayáá ga̱jma̱a̱ Hechos 2:7, 8).

9. Ndiéjunʼ ejmañaʼ índo̱ narasngúún xa̱bu̱ rá.

⁹ Rí marasngúún xa̱bu̱ mbaʼa rí ejmañaʼ. Mbá xkri̱da, maʼsngáaʼ matiajunʼ májánʼ, rí maratha májánʼ, rí xámiñaʼ ga̱jma̱a̱ rí marathu̱u̱n xa̱bu̱ mbá rí xáʼni gawúnʼ (Prov. 21:5; 2 Tim. 2:24, nota). Mú ma̱ngaa ñajunʼ rígi̱ naʼni maraxtaa tsímáá numuu rí nambáyaʼ ma̱ta̱ya̱a̱ itháan májánʼ rí naʼthí náa Biblia ga̱jma̱a̱ numuu rí natanimbaaʼ. Ma̱ngaa najmañaʼ matiejunʼ itháan ga̱jma̱ʼ Jeobá (1 Cor. 3:9).

10. Náa numuu rí ma̱ndoo maraxtaa tsímáá rí marasngúún xa̱bu̱ maski ajndu nimbáa xa̱bu̱ tsíyoo gáʼdxuun náa xtaa rá.

¹⁰ Ga̱jma̱a̱ á mu xtaa náa nimbáa tséʼdxuun ajngáa rí májánʼ rá. Maski ajndu xúʼko̱, ñajunʼ rígi̱ maʼni rí maraxtaa tsímáá. Náa numuu rá. Numuu rí xúgiáanʼ bi̱ kuwáanʼ náa congregación nuruguambáá mu muxkamiin xa̱bu̱ bi̱ májánʼ a̱jkiu̱ún. Maski ajndu mbáwíi ndxájulú bi̱ gaxkamaa mbáa bi̱ nagruigú rí gajkhun, xúgiáanʼ nduʼñíínʼ xa̱bu̱ ga̱jma̱a̱ xúgiáanʼ nadxulú. Mbá xkri̱da, mbáa ndxájulú bi̱ mbiʼyuu Brandon nixtáa mbá míjna gu̱wa̱ʼ tsiguʼ náa nguéjmi̱i̱n xa̱bu̱ edxawíín ajngáa ndrígóo Reino. Ikhaa naʼthí: “Naniguʼ mataráʼa ajngáa rí gajkhun numuu dí rúʼko̱ endu̱ʼu̱lúʼ muʼni Jeobá. Nigíʼdu̱u̱ ninindxu̱ʼ precursor índo̱ guámbóʼ ninigajmaa mbá gu̱wa̱ʼ ijma̱ tsiguʼ náa guʼwá nisngáá. Naniguʼ mambáñun jiáma bi̱ kuwa náa congregación ga̱jma̱a̱ índo̱ nda̱yo̱o̱ xú káʼnii egún rajmañún itháan. Nda̱wa̱á rí ni̱jkhá Náa Najuiʼsngúún ga̱jma̱a̱ Biblia Xa̱bekha bi̱ xóó Tsínigunʼ, nixuʼmún maʼgá gáni ñajunʼ xóo precursor i̱mba̱ níʼkhá. Gajkhun má rí xóó tsimbáyúu nimbáa mu majngúun iyááʼ, mú eʼwíínʼ a̱ngiu̱lú nuni. Xtáá gagi numuu rí nigíiʼ mani káxi̱ ñajunʼ rígi̱ rí masngúún xa̱bu̱” (Ecl. 11:6).

11. Xú káʼnii ñajunʼ kiejunʼ rí nuni mbaʼin jiáma rá.

¹¹ Rígá mbaʼa enii xóo ma̱ndoo matani ñajunʼ Jeobá káxi̱. Mbá xkri̱da, mbaʼin jiáma nuñajunʼ náa naguma guʼwá. Ndayóoʼ maguma  mbaʼa Guʼwá náa nagimbáanʼ. Rí matiejunʼ náa naguma guʼwá nindxu̱u̱ mbá ñajunʼ kiejunʼ rí naʼni mba̱a̱ Dios ga̱jma̱a̱ maʼniaʼ maraxtaa gagi. Xó má eʼni ga̱jma̱a̱ i̱ʼwáʼ ñajunʼ dí narígá, rí maraxtaa gajmiáanʼ a̱ngiu̱lú naʼni rí ma̱ʼdxa̱ʼ. Rí matani guʼwá náa maguma mba̱a̱ Dios mbaʼa rí gájmañaaʼ, xóo rí matiejunʼ tsumáá, rí matiejunʼ májánʼ ga̱jma̱a̱ rí majmañaaʼ matiejunʼ gajmiáanʼ bi̱ kuya̱ edxu̱u̱ náa ñajunʼ.

12. Ndiéjunʼ gakhánáʼ á mu nanindxa̱ʼ precursor rá.

¹² Mbáa ndxájulú bi̱ mbiʼyuu Kevin naʼthí: “Índo̱ ikhúúnʼ nákha chíʼgiúnʼ nindoʼ rí mbóo mbiʼi mani ñajunʼ Jeobá mbá káxi̱. Índo̱ nigúʼdoo 10 tsiguuʼ niʼngo̱ʼ ninindxu̱ʼ precursor. Mu makhánúʼ mbújkha̱a̱ niñajunʼ mbá nguáthá hora rí mbá mbiʼi. Niñajunʼ ga̱jmu̱ʼ mbáa ndxájulú bi̱ najmañuu naʼni guʼwá. Nijmañuʼ magruaʼmáʼ láminaʼ náa tsu̱du̱u̱ guʼwá, magruáʼa ventanas ga̱jma̱a̱ xkrugua. Nda̱wa̱á, nixtáá a̱jma̱ tsiguʼ mu mani̱i̱ Guʼwá náa nagimbáanʼ ga̱jma̱a̱ guʼwún tikhun a̱ngiu̱lú índo̱ nixnúu giñán mbiiʼ. Índo̱ nidxuun rí náa Sudáfrica ndayóoʼ wéñuʼ mixtiambáá, nikuʼmá i̱yu̱ʼ ga̱jma̱a̱ nithu̱nʼ maʼgá. Náa África, xtáá nguáthá xmáná náa naguma Guʼwá náa nagimbáanʼ nda̱wa̱á na̱jkhá i̱mba̱ níʼkhá mu mañajunʼ náa imbo̱o̱ Guʼwá nagimbáanʼ. Bi̱ nuñajunʼ ikhí ni̱ndxu̱xu̱ʼ asndu xóo mbá guʼwáanʼ. Kuwáanʼxu mbóó, nunigajmaa Biblia mbóó ga̱jma̱a̱ nuñajunʼxu mbóó. Ma̱ngaa naniguʼ maʼgá gátaráʼa gajmíi̱nʼ a̱ngiu̱lú bi̱ kuwa ikhí xúgíʼ xmáná. Awan rí niríyaʼ nákhi chíʼgiúnʼ naʼniuʼ maxtáá gagi asndu xóo na̱nguá nikumuʼ rí maxtáá”.

13. Náa numuu rí naʼni makuwa gagi jiáma bi̱ kuwa náa Betel rá.

¹³ Mbaʼin a̱ngiu̱lú bi̱ ninimbánii awan rí niriyaʼ dí mani̱ndxu̱ún precursores dí xúgi̱ kuwa náa Betel. Rí matiejunʼ náa Betel naʼni dí maraxtaa gagi, numuu rí xúgíʼ rí nuni ikhí naguma ga̱jma̱a̱ numuu Jeobá. Ma̱ngaa, bi̱ kuwa náa Betel nuruguambáá mu xúgiáanʼ muguaʼdáá ganitsu rí na̱ʼkha̱ náa Dios. Mbáa  ndxájulú bi̱ xtáa náa Betel bi̱ nagumbiʼyuu Dustin naʼthí: “Índo̱ nigúʼdoo míjna gu̱wa̱ʼ tsiguʼ, niríya awan rí mani káxi̱ ñajunʼ Jeobá. Nigíʼdu̱u̱ ninindxu̱ʼ precursor índo̱ guámbóʼ ninigajmaa mbá gu̱wa̱ʼ ijma̱ tsiguʼ náa guʼwá nisngáá. Mbá tsiguʼ tikhu nda̱wa̱á nithu̱nʼ maʼgá náa Betel. Gi̱jyooʼ nijmañuʼ mañajunʼ ga̱jma̱a̱ prensas rotativas ga̱jma̱a̱ maniu̱u̱ programar computadoras. Mbóo rí naniguʼ rí xtáá náa Betel nindxu̱u̱ rí gináanʼxu edxáwíín xú káʼnii ejkha̱ rajoo ñajunʼ rígi̱ náa xúgíʼ numbaaʼ. Naniguʼ wéñuʼ rí maxtáá gi̱jyooʼ numuu rí ñajunʼ rí nunixu nambáñun mbaʼin wéñuʼ xa̱bu̱ mambaxúún gajmiún Jeobá”.

14. Xú káʼnii gándoo gatanirataminaʼ mu matani káxi̱ ñajunʼ Jeobá rá.

¹⁴ Xú káʼnii gándoo gátanirataminaʼ mu ma̱ndoo matani ñajunʼ Jeobá káxi̱ rá. Rí gíʼmaa matani, rí manindxa̱ʼ mbáa xa̱bu̱ xóo eniguʼ Jeobá. Rígi̱ nambáyaʼ matani ñajunʼ Jeobá itháan májánʼ. Ikha jngó, atanigajmaa má xúʼko̱ Ajngá rawunʼ Dios, atatsaʼwáminaʼ ga̱jma̱a̱ tsu̱ma̱ rí naʼthí ga̱jma̱a̱ atani tsiakiminaʼ matasnga̱jmá fe ndrígáʼ índo̱ naraxná comentario náa reunión. Índo̱ xtaa náa escuela, ma̱ndoo majmañaaʼ itháan ga̱jma̱a̱ majmañaaʼ marataráʼa itháan májánʼ. Gajmañaaʼ maxmiéjuanʼ xtañún xa̱bu̱ índo̱ natraxu̱u̱n xú káʼnii kumún ga̱jma̱a̱ gamajkhu ga̱jma̱a̱ índo̱ natadxawíín rí nuthi. Ma̱ngaa ma̱ndoo maraxnaxíminaʼ mu matani kaʼwi̱i̱ ga̱jma̱a̱ matani̱i̱ Guʼwá náa nagimbáanʼ. Jeobá naniguʼ majmiuu xa̱bu̱ gua̱bi̱nʼ ga̱jma̱a̱ bi̱ nanigu̱nʼ muyambáá (atraxnuu Salmo 110:3; * Hech. 6:1-3). Apóstol Pablo niʼthúu̱n Timoteo rí mani̱ndxu̱u̱ misionero numuu rí a̱ngiu̱lú ‹nithi rí májánʼ ga̱jma̱a̱ numuu› (Hech. 16:1-5).

15. Ndiéjunʼ gándoo gátani mu makhánáʼ mbújkha̱a̱ rá.

¹⁵ Bi̱ nuni káxi̱ ñajunʼ Jeobá ndayóoʼ rí muñajunʼ mu makhánun mbújkha̱a̱ (Hech. 18:2, 3). Mbáa májánʼ gáʼni rí majmañaaʼ mbóo ñajunʼ rí mambáyaʼ náa xtaa. Atraxi̱i̱ superintendente de circuito náa xtaa ga̱jma̱a̱ eʼwíínʼ precursores xú káʼnii ñajunʼ rí ma̱ndoo matani. Ga̱jma̱a̱ xó má eʼthí náa Biblia, “araxnáá Jeobá xúgíʼ rí natani, ga̱jma̱a̱ awan rí natríyaʼ magajnúu májánʼ” (Prov. 16:3; 20:18).

16. Ndiéjunʼ gambayaaʼ dí matani ñajunʼ Jeobá káxi̱ nákha xóó ni̱ndxa̱ʼ dxámá rá.

¹⁶ Ma̱ndoo ma̱ta̱ya̱a̱ gajkhun rí Jeobá nandoo rí maraxtaa gagi nda̱wa̱á (atraxnuu 1 Timoteo 6:18, 19). * Índo̱ xtaa ratani̱ káxi̱ ñajunʼ Jeobá, xtaa gajmiáanʼ eʼwíínʼ bi̱ nuni ñajunʼ Jeobá káxi̱. Rígi̱ mambáyaʼ manindxa̱ʼ itháan májánʼ cristiano. Mbaʼin niguánu ndiyáá rí muni ñajunʼ Jeobá káxi̱ nákha xóó ni̱ndxu̱ún jiáma nambáñun índo̱ nunigu̱nʼ. Nguáná, bi̱ ni̱ndxu̱ún precursores nákha xóó tsínigu̱nʼ ma̱ndoo mani̱ndxu̱ún precursores nda̱wa̱á gajmiún bi̱ ndi̱ya̱a̱ (Rom. 16:3, 4).

17, 18. Ndiéjunʼ gáʼyoo matani mu Jeobá maxnáʼ rí na̱nda̱ʼa̱ a̱jkia̱nʼ rá.

¹⁷ Awan rí nuríyaʼ nasngájma rí rígá náa a̱jkiu̱lú. Salmo 20:4 naʼthí ga̱jma̱a̱ numuu Jeobá: “Gaxnáʼ rí na̱nda̱ʼa̱ a̱jkia̱nʼ, ga̱jma̱a̱ maʼni rí magajnúu májánʼ xúgíʼ rí natríyaʼ awan”. Ikha jngó atatsaʼwáminaʼ ndiéjunʼ eyaaʼ matani ga̱jma̱a̱ vida ndrígáʼ, rí Dios xtáa raʼni xúgi̱ ga̱jma̱a̱ rí gándoo matani náa ñajunʼ ndrígóo. Nda̱wa̱á atríyaʼ awan matani rí naniguʼ Jeobá.

¹⁸ Rí matani káxi̱ ñajunʼ Jeobá maʼni rí maraxtaa gagi, numuu rí majmaʼ vida ndrígáʼ mu matani mba̱a̱. Xúʼko̱ kaʼnii, “araxtaa tsímáá índo̱ natanimbaaʼ xtayáá Jeobá, ga̱jma̱a̱ ikhaa maxnáʼ rí na̱nda̱ʼa̱ a̱jkia̱nʼ” (Sal. 37:4).