Nixnaximi̱jna̱ ga̱jma̱a̱ xúgíʼ a̱jkiu̱ún mu mutaraʼanáa Turquía
CRISTIANOS bi̱ nikuwa nákha siglo timbá ninimi̱jna̱ wéñuʼ mu mutaraʼa “ajnga ri majan” náa mbaʼin wéñuʼ xa̱bu̱ xó má eʼngo̱o̱ (Mat. 24:14). Tikhun nigún náa eʼwáʼ xuajen mba̱ʼu̱. Mbá xkri̱da, apóstol Pablo ni̱jkha̱, náa rí mbiʼi xúgi̱ nindxu̱u̱ Turquía ga̱jma̱a̱ ikhí niʼtáraʼa índo̱ nijnguʼwúun xóo misionero. * Mbá a̱jma̱ mil tsiguʼ nda̱wa̱á, nákha 2014, náa Turquía nirígá mbá campaña kiejunʼ dí miʼtáraʼa. Tsáa niʼni ga̱jma̱a̱ náa numuu rá.
“NDIÉJUNʼ XTÁA RARÍGÁ RÁ.”
Náa Turquía kuwa itháan rí 2,800 publicadores, mú náa xuajen rúʼko̱ kuwa mbá 79 millones xa̱bu̱. Rígi̱ eyoo gáʼthúu̱n rí xtáa mbáa publicador náa mbá 28,000 xa̱bu̱. Xó má nandoo nundxa̱ʼwa̱míjna̱, publicadores i̱ndó nutaruʼun nguéjmi̱i̱n xa̱bu̱. Náa campaña kiejunʼ rígi̱ nindúún mutarúʼuun mbaʼin wéñuʼ xa̱bu̱ ga̱jma̱a̱ nguáthá mbiʼi. Índo̱ nirígá campaña, 550 a̱ngiu̱lú bi̱ nuthi ajngáa turco bi̱ naguwáʼ náa i̱ʼwáʼ xuajen nigún náa Turquía mu mutaraʼa gajmiún a̱ngiu̱lú bi̱ kuwa ikhí. Ndiéjunʼ niʼngo̱o̱ nirígá ga̱jma̱a̱ numuu campaña rá.
Najuiʼthún mbaʼin xa̱bu̱. Náa mbá congregación ndrígóo Estambul niʼnirámáʼ: “Índo̱ xa̱bu̱ nduñún asndu náa xa̱bi̱i̱ Jeobá, ikhú nuraxi á mu rígá mbá asamblea kiejunʼ”. Náa xuajen Izmir, mbá congregación niʼnirámáʼ: “Mbáa xa̱biya̱ bi̱ nañajunʼ náa naguajun taxis ni̱jkha̱ kanuu náa mbáa ndxájulú bi̱ kayaʼ edxu̱u̱ ga̱jma̱a̱ niraxu̱u̱: ‹Ndiéjunʼ lá rígá rá. Lá ndi̱jo̱o̱ ñajunʼ dí kuáʼdáá ráʼ.›”. Campaña rígi̱ niʼniuu tsiánguá xa̱bu̱.
Steffen
A̱ngiu̱lú bi̱ naguwáʼ i̱mba̱ níʼkhá ninigu̱u̱ʼ wéñuʼ xóo nitaraʼa. Steffen, bi̱ na̱ʼkha̱ náa Dinamarca, niʼthí: “Xúgíʼ mbiʼi, nindoo nitaruʼuun xa̱bu̱ bi̱ nditháan túdxawíín ajngóo Jeobá. Ndi̱yo̱o̱ gajkhun rí xtáá rasngajmá mbiʼyuu Jeobá”. Mbáa ndxájulú bi̱ na̱ʼkha̱ náa Francia mbiʼyuu Jean-David niʼnirámáʼ: “Mbaʼa horas nutaraʼaxu náa mbóo calle. ¡Nindxu̱u̱ mitsaan wéñuʼ! Mbaʼin xa̱bu̱ tsiniʼniúnʼ xa̱bi̱i̱ Jeobá. Náa xúgíʼ guʼwá, nandoo nutamijnaxu gajmiúxu̱ xa̱bu̱, nusngajmúúnxu mbá video ga̱jma̱a̱ nuniʼñáʼxu mbá i̱yi̱i̱ʼ”.
Jean-David (tapho̱o̱)
Bi̱ 550 a̱ngiu̱lú niniñaaʼ mbá 60,000 i̱yi̱i̱ʼ káaʼ a̱jma̱ xmáná. Xó má ndiʼyáá, campaña rígi̱ niʼni rí ma̱ndoo miʼtáruʼun mbaʼin wéñuʼ xa̱bu̱.
Itháan nidxún mu mutaraʼa. Campaña niʼni rí maxkajxi̱i̱n a̱ngiu̱lú bi̱ kuwa ikhí. Mbaʼin nindxa̱ʼwa̱míjna̱ rí muni ñajunʼ káxi̱. Ma̱ngaa, náa Turquía niʼni mbá 82 precursores regulares dí mbá 12 igu̱nʼ dí nirígá campaña.
Şirin
A̱ngiu̱lú bi̱ nigún náa i̱ʼwáʼ xuajen nithi rí májánʼ niguáʼníí náa campaña ma̱ngaa índo̱ nitangi̱i̱n náa xuajñún. Mbáa ndxájulú bi̱ na̱ʼkha̱ náa Alemania bi̱ mbiʼyuu Şirin niʼnirámáʼ: “A̱ngiu̱lú bi̱ kuwa náa Turquía tséʼniún mingíjyúuʼ mutaraʼa asndu náa. Ikhúúnʼ naʼniu mingíjyúuʼ mani numuu rí nati̱yu̱ʼ. Mú niʼngo̱ʼ nini índo̱ ni̱jkhá campaña, nimbáyuʼ xkri̱da ndrígu̱ún a̱ngiu̱lú ga̱jma̱a̱ rí nitajkháan. ¡Asndu niʼngo̱ʼ nitaraʼa náa metro ga̱jma̱a̱ niniʼñúʼ i̱yi̱i̱ʼ! Nánguá ti̱yu̱ʼ wéñuʼ xóo nákha ginii”.
Johannes
Johannes, mbáa ndxájulú bi̱ na̱ʼkha̱ náa Alemania, niʼthí: “Nijmañuʼ mbaʼa rí ma̱ndoo mani náa mataraʼa. A̱ngiu̱lú bi̱ kuwa náa Turquía nandún mutaruʼun xa̱bu̱ asndu xó má eʼngo̱o̱ ga̱jma̱a̱ nutaraʼa asndu náa índo̱ nandoo. Nigíminaʼ mani xúʼko̱ índo̱ nitangu̱u̱n náa Alemania. Ga̱jma̱a̱, rí xúgi̱ natarúʼún itháan xa̱bu̱ ki xóo nákha ginii”.
Zeynep
Mbáa ndxájulú a̱ʼgu̱ bi̱ na̱ʼkha̱ náa Francia bi̱ mbiʼyuu Zeynep niʼthí: “Campaña nimbáyuʼ náa mataraʼa. Nimbáyuʼ mu xamiñuʼ mú mataraʼa ga̱jma̱a̱ maku̱mu̱ʼ ka̱yo̱o̱ itháan Jeobá”.
A̱ngiu̱lú nikumu̱ún rí nikuwa itháan kambáxu̱u̱n. Rí nindúún kuyamíjna̱ ga̱jma̱a̱ rí nikuwa mbá kambáxu̱u̱n a̱ngiu̱lú bi̱ naguwaʼ mixtiʼkhu xuajin rígi̱ niʼni rí maguanúu xóo tsinaʼ. Jean-David, bi̱ nitha ga̱jma̱a̱ numuu nákha ginii, nithi: “Ndiya̱a̱xu rí a̱ngiu̱lú nindriguáanʼxu májánʼ. Ndiyuxuʼ xóo bi̱ nambáxu̱u̱n gajmiún ga̱jma̱a̱ xóo bi̱ kuwa náa guʼwún. Ikhúúnʼ nda̱yo̱o̱ rí mbá kambáxulú náa xúgíʼ numbaaʼ, numuu rí xúʼko̱ nigúxnuu náa mbaʼa i̱yi̱i̱ʼ ndrígúlú. Mú rí xúgi̱ ikhúúnʼ mínuʼ ni̱jkhánú ndi̱yo̱o̱. Nidxuʼ wéñuʼ rí ni̱ndxu̱ʼ xa̱bi̱i̱ Jeobá. Naxna̱a̱ wéñuʼ núma̱a̱ ga̱jma̱a̱ numuu rígi̱”.
Claire (tapho̱o̱)
Mbáa ndxájulú bi̱ xtáa náa Francia bi̱ nagumbiʼyuu Claire niʼthí: “Xúgiáanʼ ni̱ndxu̱xu̱ʼ mbá guʼwáanʼ, tséʼniuu á mu nagúwaʼxu náa Alemania, Dinamarca, Francia o Turquía. Ninindxu̱u̱ xóo rí Dios niʼnijngudi̱i̱ ndawaa ga̱jma̱a̱ mbá borrador mba̱a̱ wéñuʼ”.
Stéphanie (tapho̱o̱)
Stéphanie, bi̱ na̱ʼkha̱ náa Francia, niʼthí xóó: “Campaña rígi̱ niʼsngúxu rí nandulúʼ kuʼyáá Jeobá naʼni makuwáanʼ mbá kambáxulú raʼkháa cultura o ajngáa”.
NIYAMBÁÁ WÉÑUʼ NDA̱WA̱Á
Mbaʼin a̱ngiu̱lú bi̱ niyambáá náa campaña nindxa̱ʼwa̱míjna̱ rí magún gákuwá náa Turquía mu muyambáá ga̱jma̱a̱ ñajunʼ rí xóó niguanúu maguma. Tikhun nigún má gákuwá ga̱jma̱a̱ nuxníin wéñuʼ núma̱aʼ ga̱jma̱a̱ numuu ñajunʼ rí nuni.
Mbá xkri̱da, náa mbá xuajen kuwa mbá 25 publicadores. Mba̱yu̱ʼ tsiguʼ, nixtáa mbáwíi bi̱ kayá edxu̱u̱. Mú nákha tsiguʼ 2015, majun a̱ngiu̱lú bi̱ kuwa náa Alemania ga̱jma̱a̱ Países Bajos nigún guruguambáá. ¡Nidxún wéñuʼ publicadores!
NUÑAJUNʼ NÁA NDAYÓOʼ ITHÁAN
Xú káʼnii kumún a̱ngiu̱lú bi̱ kuwa ruyambáá náa Turquía rá. Nguáná má naʼni miʼskhaa, mú ma̱ngaa naguma tsajkurámiinʼ. Guʼyáá rí nuthi tikhun.
Federico
Mbáa ndxájulú bi̱ ninigúnʼ bi̱ nagumbiʼyuu Federico, bi̱ gíʼdoo 40 tsiguʼ, bi̱ nigájnuu náa España mu maʼga̱ gáxtáa ikhí. Ikhaa naʼthí: “Rí xáguʼdoo wéñuʼ nambáyuʼ maxtáá májánʼ ga̱jma̱a̱ maʼgíiʼ mani rí itháan gíʼdoo numuu”. Lá naʼthí ikhaa rí májánʼ nindxu̱u̱ rígi̱ xáʼ. Ikhaa nariʼña̱a̱: “¡Xúʼko̱! Índo̱ nadxuʼ gáraxtaa náa i̱mba̱ xuajen mu mi̱dxu̱ʼ gátambáñun xa̱bu̱ muniʼniiʼ Jeobá, natatsíñáʼ vida ndrígáʼ náa ñawúunʼ ikhaa. Ga̱jma̱a̱ naku̱ma̱ʼ itháan xú káʼnii nañewanʼ”.
Rudy
Rudy, mbáa ndxájulú bi̱ ninigúnʼ bi̱ na̱ʼkha̱ náa Países Bajos bi̱ itháan maʼni 60 tsiguʼ, naʼthí: “Ra̱ʼkhá tháán tsímáá kumuxuʼ rí nuñajunʼxu ‹náa ndayóoʼ itháan› ga̱jma̱a̱ rí mutarúʼunxu mbaʼin wéñuʼ xa̱bu̱ bi̱ túdxawíín nditháan ajngáa rígi̱. Rí ma̱ta̱ya̱a̱ xú kaʼnii kuwa gagi xa̱bu̱ índo̱ nundrigú rí gajkhun naʼni rí mangáán maraxtaa gagi”.
Sascha
Sascha nindxu̱u̱ mbáa ndxájulú bi̱ ninigúnʼ bi̱ naʼni itháan rí 40 tsiguʼ bi̱ nigájnuu náa Alemania mu maʼga̱ gáxtáa ikhí. Ikhaa naʼthí: “Índo̱ nagájnuʼ gátaráʼa naxkamiin má xúʼko̱ xa̱bu̱ bi̱ timbá miʼtsú edxuun ajngáa rígi̱. Xtáá tsímáá rí mambáñun muniʼniiʼ Jeobá”.
Atsuko
Mbáa ndxájulú bi̱ ndiyáa má xa̱bu̱ bi̱ na̱ʼkha̱ náa Japón bi̱ gíʼdoo mbá 35 tsiguʼ ga̱jma̱a̱ ikhaa mbiʼyuu Atsuko naʼthí: “Nákha ginii nandoʼ rí Armagedón ma̱ʼkha̱ nacha̱. Mú, nda̱wa̱á rí ni̱ʼkhá gáxtáá náa Turquía, naxnáa núma̱aʼ Jeobá rí nagiʼthu̱u̱n xóó. Índo̱ nda̱yo̱o̱ itháan xú káʼnii Jeobá naxná ikha náa najuiʼtaraʼa, itháan nandoʼ makuʼmáminaʼ náa ikhaa”.
Alisa, mbáa ndxájulú bi̱ na̱ʼkha̱ náa Rusia bi̱ gíʼdoo itháan rí 30 tsiguʼ, naʼthí: “Rí mani ñajunʼ Jeobá gi̱jyooʼ nambáyuʼ wéñuʼ mu mba̱yo̱o̱ rí Jeobá ra̱ʼkhá tháán májánʼ nindxu̱u̱” (Sal. 34:8). Ga̱jma̱a̱ xóó naʼthí: “Jeobá raʼkháa i̱ndó nindxu̱u̱ Anu̱ʼ, ma̱ngaa nindxu̱u̱ mbáa bi̱ nambáxuʼ itháan ga̱jmu̱ʼ bi̱ na̱jkhánú naniʼnííʼ náa mbaʼa gamiéjunʼ. Ra̱ʼkhá tháán mbaʼa rí eʼni maxtáá tsímáá ga̱jma̱a̱ naguma tsajkurámuʼ wéñuʼ”.
“GUYAXILA XAXTU”
Ga̱jma̱a̱ numuu campaña rígi̱ rí nirígá náa Turquía, ajngáa májánʼ ndrígóo Reino nudxawíín itháan xa̱bu̱. Mú xóó rígá náa ndayóoʼ majuiʼtaraʼa. A̱ngiu̱lú bi̱ nigún gákuwá náa Turquía xúgíʼ mbiʼi nuxkamin xa̱bu̱ bi̱ xóó tsedxawíín nditháan ga̱jma̱a̱ numuu Jeobá. Lá manigua̱ʼ mi̱dxu̱ʼ gatiámbáá náa mbá xuajen xóo rígi̱ ráʼ. Á mu xúʼko̱, garmáʼáan a̱jkia̱nʼ rí naʼthí náa Juan 4:35: “Guyaxila xaxtu mbuya, nixta-ma maxtiʼi ya-ra”. Lá ma̱ndoo matiambáá náa ndayóoʼ náa “nixta-ma maxtiʼi ya” ráʼ. Á mu xúʼko̱ kaʼnii, atagíminaʼ matanimbaníí rúʼko̱. Ma̱ta̱ya̱a̱ gajkhun rí marataráʼa itháan “asndu náa wámbari̱go̱o̱ ku̱ba̱ʼ” maguma tsajkurámáánʼ itháan rí asndu tsitatsaʼwáá edxa̱ʼ (Hech. 1:8).
^ párr. 2 Atayáá folleto “Mambáyulúʼ muʼnigajmaa Ajngá rawunʼ Dios”, sección 17.