1, 2. a) Ndiéjunʼ rí inuu muthi Xa̱bu̱ Ñajunʼ mbaʼwi̱i̱n rá. b) Xkáʼnii graxe̱ dí gúriʼña̱a̱ rá.

GUNDXAʼWAMÍJNA̱ rí Xa̱bu̱ Ñajunʼ mbaʼwi̱i̱n ndiʼkhún niguámbu̱u̱n nithi: “¡Gakuwaanʼ tsímáá ga̱jma̱a̱ nda̱a̱ rí gugíʼníín!”. Mbáa asndu muni mbaʼumíjna̱ numuu rí nimbá miʼtsú tárígá rí tsímáá náa numbaaʼ. Ga̱jma̱a̱ maʼndún muni rí mundxaʼwamíjna̱ rí ikhiin majmiin muni xúgíʼ. Mú nimbáa rí ikhiin xáʼngo̱o̱ gáʼyoo rí wíji̱ marigá. Ndíjkha rá, numuu rí náa Biblia naʼthí “ikhú nda̱a̱ tsu̱ma̱ gaguma gámbíin, [...] ga̱jma̱a̱ nimbáa xakríyaaʼ”. (1 Tes. 5:3).

² Ga̱jma̱a̱ numuu rígi̱, rígá tikhu graxe̱ rí gíʼdoo numuu muriʼña̱a̱: Dí gárígá índo̱ gákuwáánʼ náa majphú mbáa gaʼkhu rá. Dí gíʼthúu̱n Jeobá mu̱ʼni̱ rá. Ga̱jma̱a̱ xú káʼnii gúʼni ratamijnalú rí mbiʼi xúgi̱ mu muguajún jmbu índo̱ gákuwáánʼ náa majphú mbáa gaʼkhu rá. (Mat. 24:21.)

3. Xó má naʼthí náa Apocalipsis 17:5, 15-18, xú káʼnii gáʼni gámbáa Dios “Babilonia xuajin Mba̱a̱” rá.

³ (Atraxnuu Apocalipsis 17:5, * 15-18). * “Babilonia xuajin Mba̱a̱” maʼga̱nú mambáa. Xó má niʼthá, Xa̱bu̱ Ñajunʼ bi̱ mbaʼwi̱i̱n nimbá nda̱a̱ rí gáʼngu̱u̱n gúni índo̱ gáʼga̱nú mbiʼi rúʼko̱. Ndíjkha rá. Numuu rí Dios magiwa̱nʼ “náa a̱jkiu̱ún rí muni rí nandoo  maguma”. Ndiéjunʼ nindxu̱u̱ ikhaa rá. Rí maguma gámbaa xúgíʼ religión rí nindxu̱u̱ nduwaʼ, ga̱jma̱a̱ bi̱ nuthíí rí ni̱ndxu̱ún cristianos. * Dios gágíwánʼ náa ku̱ma̱ ndrígu̱ún ga̱jma̱a̱ náa a̱jkiu̱ún bi̱ “gu̱wa̱ʼ chi̱jyu̱ʼ” “xujkhú xáná maña̱ʼ”. Rí guwaʼ chijiʼ nandoo gáʼthúu̱n xúgínʼ Xa̱bu̱ Ñajunʼ bi̱ ni̱ndxu̱ún político bi̱ numbayíí “xujkhú xáná”, bi̱ nindxu̱u̱ Naciones Unidas (Apoc. 17:3, 11-13; 18:8). Índo̱ Xa̱bu̱ Ñajunʼ gúni gámbáa religión rí minduwaʼ, rúʼko̱ gasngájma rí xtáa ragi̱ʼdu̱u̱ majphú mba̱a̱ gaʼkhu. Mani̱ndxu̱u̱ mbá rí makujmaa mbá nacha̱ náa xúgíʼ numbaaʼ ga̱jma̱a̱ phú migamíi gáʼni.

4. a) Náá numuu rí Xa̱bu̱ Ñajunʼ mbaʼwi̱i̱n maʼndún muni gámbáa Babilonia xuajin Mba̱a̱ rá. b) Ndiéjunʼ rí mbáa muni bi̱ nikúwá náa religión rúʼko̱ rá.

⁴ Tséʼyáá náá numuu rí Xa̱bu̱ Ñajunʼ mbaʼwi̱i̱n muni gámbáa Babilonia xuajin Mba̱a̱. Mbáa muthi dí religión tséniñaaʼ marigá rí tsímáá ga̱jma̱a̱ rí nuxudamíjna̱ náa política o muthi rí ni̱ʼphu̱ wéñuʼ mbújkha̱a̱ ga̱jma̱a̱ rí ndijoo wéñuʼ rí guáʼdáá (Apoc. 18:3, 7). Nandoo nduʼyáá kaʼwu rí índo̱ gárígá rígi̱, xúradiin xúgínʼ bi̱ kúwá náa religión rúʼko̱. Ikhiin muni gámbáa xúgíʼ rí kaʼyoo náa religión rí minduwaʼ. Índo̱ gámbáa xúgíʼ, bi̱ nikúwá ikhí maguánu mbuyáá rí bi̱ kuya̱ edxu̱u̱ náa religión rúʼko̱ nininduwiinʼ ga̱jma̱a̱ mbáa ikhiin maʼndún muni tsíngumíjná náa religión rúʼko̱.

5. Ndiéjunʼ rí nikudaminaʼ maʼni Jeobá índo̱ gárígá majphú mba̱a̱ gaʼkhu, ga̱jma̱a̱ náá numuu rá.

⁵ Náa Biblia tséʼthi nguáthá mba̱yu̱u̱ʼ gájyúuʼ mu maguma gámbáa Babilonia xuajin Mba̱a̱, mú nduʼyáá gajkhun rí xájyúuʼ má (Apoc. 18:10, 21). Jeobá nikudaminaʼ ‹matsijithu̱u̱n› rí majphú mba̱a̱ gaʼkhu mu xúʼko̱ makáwíin bi̱ ‹kaxtaʼwíin› ga̱jma̱a̱ religión rí gajkhun (Mar. 13:19, 20). Mú, ndiéjunʼ gíʼthúu̱n Jeobá rí muʼnilú índo̱ gági̱ʼdu̱u̱ majphú mba̱a̱ gaʼkhu ga̱jma̱a̱ náa guerra rí nagumbiʼyuu Armagedón rá.

6. Ndiéjunʼ gíʼthúu̱n Jeobá rí mu̱ʼni̱ bi̱ ni̱ndxu̱lú xa̱bi̱i̱ rá.

⁶ Xó má ndiʼyáá náa artículo rí niʼnigajmaa̱  ginii, Jeobá gíʼthúu̱n rí xa̱bi̱i̱ muniñaaʼ xúgíʼ rí kuajtuminaʼ ga̱jma̱a̱ Babilonia xuajin Mba̱a̱. Mú rígá xóó rí ndayóoʼ mu̱ʼni̱. Gíʼmáánʼ makuwáánʼ má xúʼko̱ xawii mu mu̱ʼni̱ ñajuunʼ Dios. Guʼyáá a̱jma̱ enii rí muʼnilú.

7. a) Xú káʼnii esngajmá rí nuʼnimbulúʼ kuduun xtángoo ndrígóo Jeobá rá. b) Xó má eʼthí náa Hebreos 10:24, 25, ndíjkha rí gíʼdoo wéñuʼ numuu magimbáánʼ má xúʼko̱, mú itháan rí mbiʼi xúgi̱ rá.

⁷ Timbá, gíʼmaa muʼnimbulúʼ kuduun ikha ndrígóo Jeobá. Ragíʼmaa mundrígú ikha ga̱jma̱a̱ xtángoo rí gúxna xa̱bu̱ numbaaʼ. Mbá xkri̱da, tséniʼñáaʼ marigá nimbá rí tsaga, xóo rí mudamijná kanikhiin xa̱bekha o kanikhiín gu̱ʼu̱ ga̱jma̱a̱ i̱ʼwáʼ aʼkhá rí mbiiʼ (Mat. 19:4, 5; Rom. 1:26, 27). Rí maʼni a̱jma̱, gíʼmáánʼ mbuʼyamajkuíí má xúʼko̱ Dios gajmiúlú a̱ngiu̱lú. Nuʼnilú asndu xó má eʼngo̱o̱, náa Guʼwá nagimbáanʼ ga̱jma̱a̱ náa guʼwá xúʼkhi̱ínʼ o nguáná asndu ngu̱ʼwa̱á. Garigá má dí gárígá, xúniʼñáanʼ ragimbáánʼ mu mbuʼyamajkuíí Dios. Numuu rí “nduʼyáá dí na̱ʼkha̱ rajngiyuu mbiʼi” (atraxnuu Hebreos 10:24, 25). *

8. Ndiéjunʼ rí mbáa maxtiʼkhuu náa ajngáa rí na̱jkua̱ kuʼyúlú rá.

⁸ Mbáa índo̱ garigá majphú mba̱a̱ gaʼkhu mbaʼyóoʼ maxtiʼkhuu ajngáa rí na̱jkua̱ kuʼyúlú. Rí xúgi̱ nuʼtáraʼa ajngáa rí májánʼ ndrígóo Reino ga̱jma̱a̱ nuʼnimíjna̱ nduʼñíinʼ xa̱bu̱ mu mani̱ndxu̱ún discípulo. Mbáa ikhú mbaʼyóoʼ mu̱ʼgua̱ kuʼyúlú ajngáa rí gakhi̱i̱ rí náa Biblia niʼnimbríguii ga̱jma̱a̱ xóo eʼtsí (Apoc. 16:21). Mbáa muʼthá rí numbaaʼ ndrígóo Gixa̱a̱ gíiʼ mijngii maguma gámbáa. Mbuʼyáá má májánʼ xóo phú gánindxu̱u̱ ajngáa rúʼko̱ ga̱jma̱a̱ xú káʼnii gúʼthá. Lá muʼtáraʼa ikháá má xóo ni̱ʼni̱ náa mbá cien tsiguʼ rí kuwáánʼlu xúgi̱ o maxtiʼkhuu dxe̱ʼ. Ndayóoʼ muguaʼthíin mu mbuʼyáá. Asndu xkáʼníí má, nakujmaa rí muguaʼdáá mbóo ñajunʼ mitsaanʼ náa rí xámiñulu mu muʼthá ajngáa náa naʼthí rí wíji̱ maʼni Jeobá (Ezeq. 2:3-5).

9. Ndiéjunʼ rí gáʼndún muniulúʼ Xa̱bu̱ Ñajunʼ ga̱jma̱a̱ numuu ajngáa rí gúʼgua̱ kuʼyúlú rá. Mú, ndiéjunʼ rí nduʼyáálu gajkhun rá.

⁹ Mbáa ga̱jma̱a̱ numuu ajngáa rí gúʼgua̱ kuʼyúlú maʼni rí Xa̱bu̱ Ñajunʼ muthulú rí muniʼñáánʼ mbá kayuuʼ ruʼtáraʼa. Xó má rí mbiʼi xúgi̱ nakumulú kuʼyáá Jeobá índo̱ na̱jkua̱ gúʼtaraʼa, xúʼko̱ má gáʼyóoʼ mu̱ʼni̱ ikhú ma̱ngaa, guʼyáá gajkhun rí Jeobá má gáxnulú tsiakii rí gáʼyóoʼ mu mu̱ʼni̱ ñajuunʼ (Miq. 3:8).

10. Xó má kiʼtáriyaʼ náa Lucas 21:25-28, xú káʼnii gúni mbaʼin xa̱bu̱ índo̱ gúyáá marigá majphú mba̱a̱ gaʼkhu rá.

¹⁰ (Atraxnuu Lucas 21:25-28). * Índo̱ gárígá majphú mba̱a̱ gaʼkhu, xa̱bu̱ mamiñún wéñuʼ índo̱ gúyáá dí nándáa rí eyambáá náa nikumu̱ún rí mumbayumíjná. Makuwi̱i̱n ‹ngíná› ga̱jma̱a̱ mamiñún rí makhañún índo̱ guyáá timbá miʼtsú rí nditháan túyáá (Sof. 1:14, 15). Mbáa ikhú maʼni itháan gakhi̱i̱ makuwáánʼ, asndu bi̱ ni̱ndxu̱lú xa̱bi̱i̱ Dios. Mbáa maʼni gakhi̱i̱ xóo makuwáánʼ numuu rí na̱nguá ni̱ndxu̱lú náa numbaaʼ rígi̱. Mbáa asndu xáguaʼdáá rí itháan ndayúlú mu makuwáánʼ ga̱jma̱a̱.

11. a) Náá numuu rí i̱ndó ikháánʼ gaguanáti̱gu̱lú rá. b) Ndíjkha rí xáʼyóoʼ mamiñúlú índo̱ gákuwáánʼ náa majphú mba̱a̱ gaʼkhu rá.

¹¹ Maʼga̱nú mbiʼi rí bi̱ ndiyáá xóo niguma gámbáa  religión ndrígu̱ún makásngañúnʼ índo̱ gúyáá rí bi̱ ni̱ndxu̱lú xa̱bi̱i̱ Jeobá rígá má xúʼko̱ náa religión ndrígúlú. Rúʼko̱ gáʼni rí asndu náá gútha wéñúúnʼ xa̱bi̱i̱ Dios, ma̱ngaa asndu náa internet. Gixa̱a̱ bi̱ naʼtáñajúúnʼ ga̱jma̱a̱ Xa̱bu̱ Ñajunʼ, maguiñunʼ kuyulúʼ numuu rí i̱ndó religión ndrígúlú xóó gárígá. Na̱nguá niʼngu̱u̱n gúni gámbáa xúgíʼ religión dí rígá náa xúgíʼ tsu̱du̱u̱ numbaaʼ. Ga̱jma̱a̱ i̱ndó bi̱ ni̱ndxu̱lú xa̱bi̱i̱ Jeobá gaguanáti̱gu̱lú. Ikhú Gog ndrígóo Magog. * Muwi̱i̱n mu muni gínáa me̱ndaʼkhu xuajñuu Jeobá (Ezeq. 38:2, 14-16). Numuu rí tséʼyáá xúgíʼ kayuuʼ xóo phú gárígá, mbáa maxmiéjunlú ga̱jma̱a̱ mundxaʼwamíjna̱ xúgíʼ rí ma̱ndoo marigá. Mú rígá mbá rí nduʼyáá kaʼwu: Xáʼyóoʼ mamiñúlúʼ índo̱ gárígá majphú mba̱a̱ gaʼkhu numuu rí Jeobá má gáʼtúlú dí gáʼyóoʼ mu̱ʼni̱ mu makáwáánʼ (Sal. 34:19). Matujxulú ga̱jma̱a̱ muxuxí edxu̱lúʼ numuu rí mbuʼyáá rí ‹najngiyuu rí makáwáánʼ›. *

12. Xú kaʼnii xtáá raʼni rataánʼlú “ñumba tsi jmbi, tsi majan indxa’huamina’” ga̱jma̱a̱ numuu rí marigá nda̱wa̱á rá.

¹² “Ñumba tsi jmbi, tsi majan indxa’huamina’” xtáa raʼni ratáánʼlu mu muguajún jmbu índo̱ gárígá majphú mba̱a̱ gaʼkhu (Mat. 24:45). Mbaʼa xóo niʼni, mú gundxaʼwamíjna̱ náa tikhu dí ikhaa: Náa asamblea regional dí nirígá tsiguʼ 2016 asndu 2018. Nixnulu wéñuʼ tsiakii rí mambayúlú numuu rí na̱ʼkha̱ rajngiyuu mbiʼi ndrígóo Jeobá. Gutangáánʼlú mbuʼyáá mbá chíʼgíiʼ.

13. Xú káʼnii gándoo maʼni mbóó a̱jkiu̱lú náa Jeobá, ga̱jma̱a̱ náá numuu rí gíʼmaa mu̱ʼni̱ asndu nákha mbiʼi xúgi̱ rá.

¹³ Rí maʼni mbóó a̱jkiu̱lú. Náa asamblea rí nirígá tsiguʼ 2016 nigumbiʼyuu “Gaʼni mbóó a̱jkiu̱lú náa Jeobá”. Niʼsngúlúʼ rí maʼni mbóó a̱jkiu̱lú á mu nambáxulúʼ májánʼ gajmiúlú Jeobá. Ma̱ngaa niʼni marmáʼáan a̱jkiu̱lú rí na̱jkua̱ kanuu mijngii náa Dios índo̱ nuʼtákáñii ga̱jma̱a̱ xúgíʼ a̱jkiu̱lú ma̱ngaa á mu nuʼnigajmaa tsumáá Ajngá rawunʼ. Rígi̱ gáxnulú tsiakii mu maʼngulú muraʼníí xkujndu rí gakhi̱i̱, numuu rí na̱jkha̱ rajngiyuu rí mambáa numbaaʼ ndrígóo Gixa̱a̱, muraʼníí mbaʼa tsáʼkhá asndu xóo nimbá miʼtsú túʼyáá, náa mbaʼyóoʼ musngajmá á mu nu̱ʼni̱ mbóó a̱jkiu̱lú náa Dios ga̱jma̱a̱ náa Reino ndrígóo. Mbáa mutsijmáánʼ má xúʼko̱ xa̱bu̱ (2 Ped. 3:3, 4). Mbá numuu nindxu̱u̱ dí naguajunʼlú jmbu. Ndayóoʼ rí mu̱ʼni̱ mbá tsiakii rí maʼni mbóó a̱jkiu̱lú rí mbiʼi xúgi̱ mu xúʼko̱ maguajún jmbu índo̱ gárígá majphú mba̱a̱ gaʼkhu.

14. a) Ndiéjunʼ rí gáxtiʼkhuu náa a̱ngiu̱lú bi̱ nuyegun edxu̱u̱ náa ñajunʼ rí narígá náa tsu̱du̱u̱ Ku̱ba̱ʼ rá. b) Náá numuu rí mbaʼyóoʼ muʼnimbulúʼ ikhú rá.

¹⁴ Índo̱ gárígá majphú mba̱a̱ gaʼkhu, marigá rí maxtiʼkhuu náa a̱ngiu̱lú bi̱ nuyegun edxu̱u̱ náa ñajunʼ rí narígá náa tsu̱du̱u̱ Ku̱ba̱ʼ. Numuu rí ikhú bi̱ kaxtaʼwíin bi̱ xóó naguanún náa tsu̱du̱u̱ Ku̱ba̱ʼ magúun mekhuíí mu muxmijná náa Armagedón (Mat. 24:31; Apoc. 2:26, 27). Rígi̱ eyoo gáʼthúu̱n rí naxákúwá ga̱jma̱á ni̱ndxu̱lú Cuerpo Gobernante. Mú maski má xúʼko̱, bi̱ ra̱ʼkhá tháán mbaʼin xa̱bu̱ makuwíin jnduʼ. Mbu̱ya̱ edxu̱u̱ a̱ngiu̱lú bi̱ najmañún bi̱ kaʼñúún náa eʼwíínʼ mugu̱. Mbaʼyóoʼ musngajmá rí mbóó a̱jkiu̱lú náa a̱ngiu̱lú bugi̱ índo̱ gumbáñunlu ga̱jma̱a̱ rí muʼnimbulúʼ ikha dí gúxnulú rí na̱ʼkha̱ náa Dios. Á mu nuʼnimbulúʼ kuʼñúún, makáwáánʼ.

15. Xú káʼnii gándoo gúʼni mu maʼngulú ga̱jma̱a̱ náá numuu rí gíʼmaa maʼngulú asndu nákha xúgi̱ rá.

 ¹⁵ Rí maʼngulú. Rí ndiyá edxu̱u̱ náa asamblea tsiguʼ 2017 “¡Xakanajkaʼ!”. Nixnulu tsiakii mu maʼngulú índo̱ nuraʼníí mbaʼa gamiéjunʼ. Nijmañulúʼ rí muguaʼdáá cualidad rígi̱ tséʼniuu má asndu xkáʼníí má kuwáánʼ ga̱jma̱a̱ rí makumulúʼ kuʼyáá Jeobá maʼni rí xákanajkulú (Rom. 12:12). Xámbumulú nditháan ajngáa rí niʼthí Jesús: “I̱ndó bi̱ maʼngo̱o̱ asndu gátumuu mbiʼi, makríyaaʼ” (Mat. 24:13). Rígi̱ eyoo gáʼthúu̱n rí ndayóoʼ muguajún jmbu náa asndu xkáʼníí má xkujndu. Rí maʼngulú mbiʼi xúgi̱ mambayúlú mu maʼngulú índo̱ gárígá majphú mba̱a̱ gaʼkhu.

16. Dí gáʼni rí xámiñulu ga̱jma̱a̱ ndiéjunʼ gándoo gúʼni asndu nákha xúgi̱ rá.

¹⁶ Rí xámiñulu. Rí ndiyá edxu̱u̱ náa asamblea nákha tsiguʼ 2018, nindxu̱u̱ “¡Xámiñaʼ!”. Niʼni marmáʼáan a̱jkiu̱lú dí raʼkháa ga̱jma̱a̱ numuu rí naʼngulú nu̱ʼni̱ gáʼni dí xámiñulu, xámiñulu á mu dí nakumulú kuʼyáá Jeobá, ikhaa rúʼko̱ gáʼni dí maʼngulú. Mú, dí gáʼyóoʼ mu̱ʼni̱ mu muʼnimbulúʼ kuʼyáá itháán ikhaa xá. Muraxnulu Biblia xúgíʼ mbiʼi ga̱jma̱a̱ gundxaʼwamíjna̱ xú káʼnii Dios niʼni káwíin xa̱bi̱i̱ nákha wajyúuʼ (Sal. 68:20; 2 Ped. 2:9). Índo̱ Xa̱bu̱ Ñajunʼ gúni gínáanʼlú náa majphú mba̱a̱ gaʼkhu, maxamiñunlú ga̱jma̱a̱ muʼnimbulúʼ kuʼyáá itháán Jeobá (Sal. 112:7, 8; Heb. 13:6). Á mu nakumulú kuʼyáá rí mbiʼi xúgi̱, maxamiñulú índo̱ gáʼni xkujndu Gog. *

17. Náá numuu dí ragíʼmaa mamiñúlúʼ nditháan índo̱ gáʼkha̱ Armagedón rá. (Atayáá xtiʼkhuu dí na̱ʼkha̱ náa timbá ináa.)

¹⁷ Xó má nijmañulúʼ náa artículo rí ninújngoo, mbaʼánʼ dí ikháanʼlu nikuwáánʼ náa iwáá mbiʼi. Mú ma̱ngaa kuáʼti̱i̱n rí makáwáánʼ índo̱ gárígá majphú mba̱a̱ gaʼkhu. Guerra dí mbiʼyuu Armagedón maʼni gámbóo xúgíʼ kayuuʼ dí rígá náa numbaaʼ ndrígóo Gixa̱a̱. Mú nda̱a̱ numuu rí mamiñúlúʼ numuu rí mani̱ndxu̱u̱ guerra rí maʼni Dios (Prov. 1:33; Ezeq. 38:18-20; Zac. 14:3). Índo̱ Jeobá gáʼthi, ikhú Jesucristo mbayá edxu̱u̱ náa guerra rúʼko̱. Náa nijniun muguajún bi̱ kaxtaʼwíin bi̱ magabiín ga̱jma̱a̱ ra̱ʼkhá tháán mbaʼin wéñuʼ ángeles. Mbá kambájxu̱u̱n muxmijná gajmiún Gixa̱a̱, xa̱bu̱ wéñiʼ ndrígio̱o̱, xúʼko̱ má ma̱ngaa soldados bi̱  kúwá náa tsu̱du̱u̱ ku̱ba̱ʼ (Dan. 12:1; Apoc. 6:2; 17:14).

18. a) Ndiéjunʼ rí naʼthúlúʼ Jeobá rá. b) Xú káʼnii nambáyulúʼ Apocalipsis 7:9, 13-17 mu xámiñulu dí marigá nda̱wa̱á rá.

¹⁸ Jeobá naʼthúlúʼ ajngáa rígi̱: “Tséʼniuu má ndiéjunʼ nindxu̱u̱ rí gátuxuu ga̱jma̱a̱ numaʼ, xaʼga̱nú marigá” (Is. 54:17). “Bi̱ ra̱ʼkhá tháán mbaʼin xa̱bu̱” bi̱ niguájun jmbu magajníín náa “majphú mba̱a̱ gaʼkhu” ga̱jma̱a̱ muni má xúʼko̱ ñajuunʼ Dios (atraxnuu Apocalipsis 7:9, * 13-17). * Lá ragájkhun dí náa Biblia naʼthúlú mbaʼa wéñuʼ rí maʼni mu xámiñulu ga̱jma̱a̱ numuu dí marigá nda̱wa̱á rá. Nduʼyáá rí ‹Jeobá nañewu̱u̱n bi̱ nawi̱ji̱ jmbu› (Sal. 31:23). Xúgiáánʼ bi̱ nandulú kuʼyáá ga̱jma̱a̱ bi̱ nduʼyamajkuíí Jeobá makuwáanʼlu gagi índo̱ gáʼni kaʼwii mbiʼyuu (Ezeq. 38:23).

19. Ndiéjunʼ nindxu̱u̱ mbá rí mitsaanʼ wéñuʼ rí nánguá má mba̱yu̱u̱ʼ marigá rá.

¹⁹ Gundxaʼwamíjna̱ xú káʼnii eʼthí náa 2 Timoteo 3:2-5 rí xa̱bu̱ bi̱ makuwíin náa numbaaʼ nuxi̱ʼ, náa nixáxtáa raʼtáñajuunʼ Gixa̱a̱ (atayáá náa kúguamáʼáan “ Xú káʼnii gánindxu̱ún xa̱bu̱ nda̱wa̱á”). Ndxájulú George Gangas, * bi̱ niyéjkha̱ edxu̱u̱ náa Cuerpo Gobernante, niʼthí xígi̱: “¡Ra̱ʼkhá tháán mitsaanʼ gánindxu̱u̱ numbaaʼ índo̱ xúgíinʼ gúni ñajuunʼ Dios! Nánguá má mba̱yu̱u̱ʼ rí mundrígu̱ú mbá rí mitsaanʼ dí makuwá náa numbaaʼ nuxi̱ʼ. Makuwíin mba̱yu̱u̱ʼ xó má Jeobá. Makuwáánʼ kámuu mbiʼi”. Lá ragájkhun dí rígi̱ nindxu̱u̱ mbá rí mitsaanʼ wéñuʼ rí kuaʼti̱i̱n ráʼ.