1. Ndiéjunʼ eʼni mbuʼyáá rí kuwáánʼ náa “iwáá mbiʼi” rá.

Á MU nigumáanʼlú nda̱wa̱á rí tsiguʼ 1914, nikuwáánʼ náa “iwáá mbiʼi” ndrígóo numbaaʼ rígi̱ (2 Tim. 3:1). Xúgiáánʼ ni̱jkua̱nú niʼdxawíin dí niʼtáriyaʼ Jesús rí wíji̱ marigá náa iwáá mbiʼi rí kuwáánʼlu xúgi̱ o niʼdxawíín dí nirígá: Guerra, ewiʼ, gaʼxma, nandii, rí ni̱jkha̱ rajoo rí tséjmaa ga̱jma̱a̱ rí najuixkúún xa̱bi̱i̱ Dios ga̱jma̱a̱ i̱ʼwáʼ dí narígá (Mat. 24:3, 7-9, 12; Luc. 21:10-12). Ma̱ngaa ndiʼyáá rí nuni xa̱bu̱ numbaaʼ xó má niʼthí apóstol Pablo (Atayáá kugumaʼá “ Xóo ni̱ndxu̱ún xa̱bu̱ numbaaʼ rí mbiʼi xúgi̱”). Bi̱ ni̱ndxu̱lú xa̱bi̱i̱ Jeobá nduʼyáá kaʼwu rí kuwáánʼ náa “natumuu mbiʼi” (Miq. 4:1).

2. Xú káʼnii graxe̱ rí gíʼdoo wéñuʼ numuu mbuʼyáá xóo extiʼña̱a̱ rá.

² Numuu rí ninújngoo má mba̱yu̱u̱ʼ wéñuʼ tsiguʼ rí asndu nakha 1914, ikha jngó, nandoo nduʼyáá kaʼwu rí kuwáánʼ náa na̱jkha̱ ratumuu “iwáá mbiʼi”. Mijngii kayuuʼ gíʼ rí mambáa rí xtáa rarígá náa numbaaʼ rígi̱, ikha jngó, gíʼmaa mbuʼyáá xóo extiʼña̱a̱ graxe̱ rígi̱ rí phú gíʼdoo wéñuʼ numuu: Dí gárígá náa “iwáá mbiʼi” rá. Ga̱jma̱a̱ dí gíʼthu̱u̱n Jeobá rí mu̱ʼni̱ rá.

3. Xó má naʼthí rí kiʼtáriyaʼ náa 1 Tesalonicenses 5:1-3, dí gúthi Xa̱bu̱ Ñajunʼ mbaʼwi̱i̱n rá.

³ (Atraxnuu 1 Tesalonicenses 5:1-3). * Pablo naʼthí ga̱jma̱a̱  numuu “mbiʼi ndrígóo Jeobá”. Náa ajngáa rígi̱ nandoo gáʼthúu̱n rí gárígá índo̱ gagíʼdu̱u̱ rí maguma gámbáa “Babilonia xuajin Mba̱a̱” —rí nindxu̱u̱ xúgíʼ religión rí minduwaʼ dí rígá náa numbaaʼ— ga̱jma̱a̱ maguma gámbáa náa Armagedón (Apoc. 16:14, 16; 17:5). Índo̱ nachoo maʼganú “mbiʼi” rúʼko̱, Xa̱bu̱ Ñajunʼ mbaʼwi̱i̱n mbuyáá rí niʼngu̱u̱n mugíiʼ rí tsímáá ga̱jma̱a̱ muthi rí “gakuwaanʼ tsímáá ga̱jma̱a̱ nda̱a̱ rí gugíʼníín”. Xa̱bu̱ Ñajunʼ mbaʼwi̱i̱n nguáná najmún ikháá má ajngáa xóo rígi̱ mu muthi rí nandún makuwiin mbá kambájxu̱u̱n mbá xúgínʼ Xa̱bu̱ Ñajunʼ náa numbaaʼ. * Mú rí naʼthí náa Biblia mixtiʼkhu kayuuʼ nindxu̱u̱. Ndíjkha rá. Numuu rí índo̱ gúthi xúʼko̱, mbaʼin xa̱bu̱ makumu̱ún rí Xa̱bu̱ Ñajunʼ mbaʼwi̱i̱n náa mbájndi numbaaʼ niʼngu̱u̱n nígíiʼ rí naxárígá rí migamii náa numbaaʼ. Mú ragájkhun, numuu rí ikhú gágíʼdu̱u̱ marigá “majphú mba̱a̱ gaʼkhu” (Mat. 24:21).

4. a) Ndiéjunʼ rí tséʼyáá ga̱jma̱a̱ numuu índo̱ gúthi “¡Gakuwaanʼ tsímáá ga̱jma̱a̱ nda̱a̱ rí gugíʼníín!” xá. b) Ndiéjunʼ rí nduʼyáá má rá.

⁴ Nduʼyáá kaʼwu tikhu rí garígá índo gúthi: “¡Gakuwaanʼ tsímáá ga̱jma̱a̱ nda̱a̱ rí gugíʼníín!”. Mú rígá tikhu rí tséʼyáá, xóo dí gaxkajxi̱i̱n mu muthi ga̱jma̱a̱ xú káʼnii gúni. Ma̱ngaa tséʼyáá á mu káaʼ mbóó mitsú gúthi o mbaʼa xóo gúthi. Tséʼniu asndu xkáʼníí má, ikháanʼlú rígá mbá rí nduʼyáá kaʼwu: Rí xúniʼñámíjná maguma nduwáánʼ ga̱jma̱a̱ rí xúʼnimbulú rí Xa̱bu̱ Ñajunʼ maʼngu̱u̱n muni rí marigá tsímáá náa tsu̱du̱u̱ numbaaʼ. Numuu rí nduʼyáá má rí xígi̱ gúthi, ga̱jma̱a̱ rí nindxu̱u̱ mbá tsinaʼ rí nasngájma rí “mbiʼi ndrígóo Jeobá” inu má magi̱ʼdu̱u̱.  

5. Xkáʼnii embáyulú rí naʼthí náa 1 Tesalonicenses 5:4-6 mu makuwáánʼ xawii índo̱ gáʼkha “mbiʼi ndrígóo Jeobá” rá.

⁵ (Atraxnuu 1 Tesalonicenses 5:4-6). * Pablo naʼthúlu rí gíʼmaa mu̱ʼni̱ mu makuwáanʼ xawii índo̱ gáʼkha “mbiʼi ndrígóo Jeobá”. Ragíʼmáánʼ muʼnuʼ “xó má eni eʼwíínʼ”, gakuwáánʼlu xawii. Xóo muʼthá, ndayóoʼ muñewumijna mu xúndawamíjnalu náa rí nuni político mu xúʼningawamijnalú náa iduu Dios. Á mu nu̱ʼni̱, mundawamijnalu náa numbaaʼ rígi̱ (Juan 15:19). Nduʼyáá kaʼwu rí i̱ndó Reino ndrígóo Dios maʼngo̱o̱ magíiʼ rí tsímáá náa numbaaʼ.

6. Ndiéjunʼ rí nandulú mumbáñún mbuyáá xa̱bu̱ ga̱jma̱a̱ náá numuu rá.

⁶ Raʼkháa káaʼ ndayóoʼ makuwáánʼ xawii, ma̱ngaa nandulú rí mumbaʼñún xa̱bu̱ mu makuwiin “xawii” mangiin, xóo muʼthá, rí mumbaʼñún mu mbuyáá rí naʼthí náa Biblia rí wíji̱ magíʼnuu numbaaʼ rígi̱. Garmáʼáan a̱jkiu̱lú rí  índo̱ gágiʼdu̱u̱ marigá majphú mba̱a̱ gaʼkhu, naxárígá mbiʼi rí mbuyáaʼ Jeobá. Ikha jngó, gaʼchulú rí muʼtáraʼa. *

7. Dí gíʼthúu̱n Jeobá rí mu̱ʼni̱ rá.

⁷ Náa imbá chíʼgííʼ mbiʼi rí xóó naguanúu nákha xóó tséʼkha “mbiʼi ndrígóo Jeobá”, ikhaa gíʼthúu̱n rí xúniʼñáánʼ ruʼtáraʼa. “Gaguaʼdáá má xúʼko̱ rí muni náa ñajunʼ ndrígóo Señor” (1 Cor. 15:58). Índo̱ Jesús niʼthí ga̱jma̱a̱ numuu rí gíʼdoo wéñuʼ numuu rí wíji̱ marigá náa iwáá mbiʼi, niʼthí dí gíʼmaa muni xa̱bi̱i̱ Dios. Niʼthí: “Ma̱ngaa, náa xúgíʼ xuajen, ginii gíʼmaa miʼtáraʼa ajngáa rí májánʼ” (Mar. 13:4, 8, 10; Mat. 24:14). Gundxaʼwamíjna ga̱jma̱a̱ numu rígi̱: Mámbá rí nagájnulú gúʼtáraʼa, nuyambáá mu mambanúu rí kiʼtáriyaʼ náa Biblia.

8. Ndiéjunʼ esngájma nduʼyáá dí ñajunʼ rí najuiʼtáraʼa na̱jkha̱ rajo̱o̱ itháan rá.

⁸ Tsigu tsiguʼ, mbaʼin xa̱bu̱ nudxawíín ajngáa májánʼ ndrígóo Reino. Guʼyáá xú káʼnii ni̱jkha̱ raʼni mbaʼin bi̱ nutaraʼa numuu Reino náa iwáá mbiʼi rí kuwáanʼlu. nákha tsiguʼ 1914 nikúwá mbá 5,155 publicadores náa 43 países. Rí mbiʼi xúgi̱ naʼni mbá 8,500,000 publicadores náa 240 países ga̱jma̱a̱ xuajen rí kaʼyoo. Mú ñajunʼ ndrígúlú xóó tseguámbá. Ragíʼmaa muniʼñáaʼ ruʼthá rí i̱ndó Reino ndrígóo Dios maʼngo̱o̱ maʼnimbánuu xkujndu ndrígu̱ún xa̱bu̱ numbaaʼ (Sal. 145:11-13).

9. Ndíjkha rí gíʼmáánʼ muʼtáraʼa má xúʼko̱ ga̱jma̱a̱ numuu Reino rá.

⁹ Muʼtáraʼa má xúʼko̱ asndu índo̱ Jeobá gáʼthi rí muniʼñáaʼ ru̱ʼni̱. Nguáthá xóó mba̱yu̱u̱ʼ mbiʼi eguanúu rí xa̱bu̱ ma̱ndoo muninuwiinʼ Jeobá ga̱jma̱a̱ Jesús rá. (Juan 17:3.) Tséʼyáálu. I̱ndó rí nduʼyáá nindxu̱u̱ rí nákha xóó tsérígá majphú mba̱a̱ gaʼkhu, “xúgínʼ bi̱ nandún makuwá kámuu” marigá mbiʼi mu mudxawíín ajngáa rí májánʼ (Hech. 13:48). Xú káʼnii gumbáñun xa̱bu̱ bugi̱ nákha xóó rígáá mbiʼi rá.

10. Dí exnúlú Jeobá mu mambáyulúʼ muʼsngúún rí gajkhun xa̱bu̱ rá.

¹⁰ Jeobá najmuu xuajñuu mu maxnúlú xúgíʼ rí ndayúlú mu muʼsngúún rí gajkhun xa̱bu̱. Xó má eʼyáá, mámbá xmáná naʼsngúlú náa reunión dí narígá tapha xmáná, náa najmañulúʼ xú káʼnii gúʼthúún xa̱bu̱ rí timbá miʼtsú ga̱jma̱a̱ índo̱ gagutangáanʼ gúʼñúún, ma̱ngaa xú káʼnii guʼsngáa ga̱jma̱a̱ numuu Biblia. Xuajñuu  Jeobá naxnúlú dí rígá náa caja ndrígóo herramientas mu muʼsngáa. Guʼyáá xú káʼnii gándoo, mambáyulúʼ:

• Mu matagíʼdi̱i̱ maratamíjná ga̱jma̱a̱ʼ xa̱bu̱,

• mu mataxkajxi̱i̱ a̱jkiu̱ún xa̱bu̱ mu mudxawíín,

• mu mataxkajxi̱i̱ a̱jkiu̱ún maʼndún mudxawíín itháan,

• mu marasngáa rí gajkhun índo̱ narasngáa ga̱jma̱a̱ numuu Biblia,

• mu marathu̱u̱n bi̱ nanigu̱nʼ mu matu̱ʼu̱u̱n náa ináa ndrígóo Internet ga̱jma̱a̱ mu magún náa Guʼwá nagimbáanʼ.

Ndayóoʼ majmañulúʼ majmulúʼ májánʼ herramientas rígi̱. * Mbá xkri̱da, á mu nutamijná májánʼ gajmiúlú mbáa bi̱ nasngájma rí na̱ndoo mbaʼyoo itháan ga̱jma̱a̱ numuu tema rúʼko̱, ikhú nuniʼñáanʼ mbá tratado o mbá i̱yi̱i̱ʼ Bi̱ Nayenjgoo, xa̱bu̱ ma̱ndoo maguxnúu itháan nakha xóo tsegutángáan muʼtamíjná gajmiúlú mbu̱júu̱ʼ. Mámbáa rí ikháanʼlu kajkuáa ñawúunʼ rí maʼtáraʼa má xúʼko̱.

11. Náá numuu rí niguma májáánʼ náa Internet mu miʼsngáa ga̱jma̱a̱ numuu Biblia rá.

¹¹ Guʼyáá i̱mba̱ xóo embáñun Jeobá xa̱bu̱ mu muniʼnuuʼ rí gajkhun. Náa jw.org^® ikhí ma̱ndoo miʼsngáa ga̱jma̱a̱ numuu Biblia náa Internet. * Náa xúgíʼ igu̱nʼ, mbaʼin xa̱bu̱ náa mbájndi numbaaʼ nduyáʼ rí miʼsngúún ga̱jma̱a̱ numuu Biblia náa Internet. Ikhaa rúʼko̱ naʼni rí xa̱bu̱ mbuyáá rí gajkhun dí naʼthí náa Ajngá rawunʼ Dios. Tikhuun xa̱bu̱ bi̱ nuʼthúún mbáa nuni a̱jma̱ rí maʼndún mundrigú rí muʼsngúún ga̱jma̱a̱ numuu Biblia. Á mu xúʼko̱, gusngajmún rí na̱ʼkha̱ náa sección dí rígá náa ináa ndrígóo Internet o guxuʼmá mbá enlace inún náa ajngáa rí itháan nakru̱ʼu̱u̱n.

12. Dí gándoo majmañaaʼ náa rí najuiʼsngáa ga̱jma̱a̱ numuu Biblia náa Internet rá.

¹² Rí miʼsngáa náa Internet ikhí ma̱ndoo miʼsngááʼ ga̱jma̱a̱ numuu Biblia, tsáá ajngóo rí naʼthí ikhí, ma̱ngaa numún xa̱bi̱i̱ Dios bi̱ nikúwá nakha wajyúuʼ ga̱jma̱a̱ ndiéjunʼ rí kuáʼti̱i̱n nda̱wa̱á, xa̱bu̱ bi̱ nandoo maʼnigajmaa ma̱ndoo majmañuu rígi̱:

• Xú káʼnii embáyulú Biblia,

• tsáá nindxu̱u̱ Jeobá, Jesús ga̱jma̱a̱ tsíín ni̱ndxu̱ún ángeles,

• náá numuu rí Dios niʼnii xa̱bu̱ numbaaʼ ga̱jma̱a̱

• ndíjkha dí rígá gamiéjunʼ ga̱jma̱a̱ rí tséjmaa.

Náa curso rígi̱ ma̱ngaa ma̱ndoo majmañaaʼ rígi̱:

• Dí gáʼni Jeobá mu maʼni gámbóo rí naʼni mumíniiʼ ga̱jma̱a̱ rí nakháñulú,

• xú káʼnii gáʼnigabi̱ín bi̱ nikháñun ga̱jma̱a̱

• xú káʼnii gáriʼkuwíín Xa̱bu̱ Ñajunʼ bi̱ nda̱a̱ rí e̱jmi̱i̱n bi̱ kúwá náa tsu̱du̱u̱ Ku̱ba̱ʼ ga̱jma̱a̱ Reino ndrígóo Dios.

13. Arathá á mu rí miʼsngáa ga̱jma̱a̱ numuu Biblia nariʼkuriyaaʼ rí nuʼsngúún xa̱bu̱ náa guʼwún.

¹³ Curso rígi̱ tsériʼkuriyaaʼ ga̱jma̱a̱ rí nuʼsngúún xa̱bu̱ náa guʼwún. Jesús nixnulú ñajunʼ rí ma̱ndoo muʼsngúún xa̱bu̱. Nandulú rí xa̱bu̱ bi̱ nandún majmañún ma̱ndoo munda̱ʼa̱ miʼsngúún náa Internet, gangajuun kuyáá rí ejmañún ga̱jma̱a̱ gaʼndún majmañún itháan. Á mu xúʼko̱ rígá, mbáa maʼndún rí mbáa publicador maʼsngúún ga̱jma̱a̱ numuu Biblia. Índo̱ gámbóo mámbá kíxnuu, najuiʼtháán bi̱ naguxnuu rí ganda̱ʼa̱ rí mbáa maʼga gáʼyoo mu mambáyúu majmañuu itháan. Tsejtsi mbiʼi, naʼni mbá 230 xa̱bu̱ bi̱ nunda̱ʼa̱ rí miʼsngúún ga̱jma̱a̱ numuu Biblia náa Internet. Gajkhun rí ndayóoʼ rí mámbáa xa̱bu̱ miʼsngáá ga̱jma̱a̱ numuu Biblia.

14. Ga̱jma̱a̱ numuu rí niʼthí Jesús náa Mateo 28:19, 20, ndiéjunʼ rí nuʼnimíjna̱ mu̱ʼni̱ ga̱jma̱a̱ náá numuu rá.

¹⁴ (Atraxnuu Mateo 28:19, 20). * Índo̱ nuʼsngáa ga̱jma̱a̱ numuu Biblia, gíʼmaa muʼnimíjna̱ rí mbuʼñíinʼ xa̱bu̱ majmañún ga̱jma̱a̱ muʼsngúún munimbu̱u̱n xúgíʼ rí Jesús niʼthí. Gíʼmaa mumbáñún makru̱ʼu̱u̱n rí gíʼdoo wéñuʼ numuu muguajún náa nijniun Jeobá ga̱jma̱a̱ Reino ndrígóo. Rígi̱ eyoo gáʼthúu̱n rí muxkajxi̱i̱n rí munimbáníí rí kúwá rajmañún, muxnaximíjna náa Jeobá ga̱jma̱a̱ majngún iyááʼ. Á mu nuni rígi̱, makáwíin índo̱ gáʼkha̱ mbiʼi ndrígóo Jeobá (1 Ped. 3:21).

15. Ndiéjunʼ rí nándáa mbiʼi mu mu̱ʼni̱ ga̱jma̱a̱ náá numuu rá.

¹⁵ Xó má ndiʼyáá, chíʼgííʼ kayuuʼ tígo̱o̱ rí mambáa dí xtáa rarígá náa numbaaʼ rígi̱. Ikha jngó, nándáa mbiʼi mu muʼsngúún bi̱ tsíñún maguánu mani̱ndxu̱ún xa̱bi̱i̱ Jesús (1 Cor. 9:26). Nacha̱ eyóoʼ maguma ñajunʼ rígi̱, numuu rí káʼníí kúwáá xóó xa̱bu̱ bi̱ ndayóoʼ mudxawíín ajngóo Reino nákha xóó tséʼka̱nú fin.

16. Xó má naʼthí náa Apocalipsis 18:2, 4, 5, 8, ndiéjunʼ rí gíʼmáánʼ mu̱ʼni̱ xúgiáánʼ rá. (Ma̱ngaa atayáá nota.)

¹⁶ (Atraxnuu Apocalipsis 18:2, 4, 5, 8). * Náa versículos rígi̱ na̱ʼkha̱ raʼthí raʼkháa káaʼ rí gíʼthu̱u̱n Jeobá rí mu̱ʼni̱. Xúgiáánʼ bi̱ nindxulú cristianos gajkhun gíʼmáánʼ rí matsíngulú mbá kayuuʼ náa Babilonia xuajin Mba̱a̱. Gajkhun má rí bi̱ kúwá runigajmaa Biblia nikúwá náa religión rí minduwaʼ nákha xóó tséyáá rí gajkhun. Mbáa nigún náa guʼwá ndxájkiún, nini ñajunʼ rí narígá ikhí o nixná mbújkha̱a̱. Nákha xóó tsénindxu̱ún publicador bi̱ xóó tséjngúún iyááʼ, gíʼmaa rí muniñaaʼ mbá kayuuʼ rí kaʼyoo náa religión rí minduwaʼ. Gíʼmaa muxnaxi̱ mbá i̱yi̱i̱ʼ náa naʼthí rí nuniñanʼ mbá kayuuʼ xúgíʼ rí kuajtuminaʼ ga̱jma̱a̱ Babilonia xuajin Mba̱a̱. *

17. Xú káʼnii ñajunʼ dí ragíʼmaa mu̱ʼni̱ bi̱ ni̱ndxu̱lú cristianos ga̱jma̱a̱ náá numuu rá.

¹⁷ Cristianos bi̱ gajkhun gíʼmáánʼ mbuʼyáá rí ñajunʼ rí nu̱ʼni̱ tséguájtuminaʼ nditháan ga̱jma̱a̱ Babilonia xuajin Mba̱a̱ (2 Cor. 6:14-17). Mbáa xkri̱da, xuñajunʼ nditháan náa guʼwá ndxájkun. Ma̱ngaa, náa nuñajuunʼ, nditháan ragíʼmaa  maguajtuminaʼ ga̱jma̱a̱ religión rí minduwaʼ. Ma̱ngaa á mú ikháanʼ má kuaʼdáá mbá rí nugujua̱, xundrígú ñajunʼ rí kuajtuminaʼ ga̱jma̱a̱ Babilonia xuajin Mba̱a̱. Náá numuu rí naguájunlú jmbu rá. Ndíjkha rí nda̱a̱ kayuuʼ náa eyóoʼ mundawamíjna̱ rá. Numuu rí tsíyulú muñambáá mangáanʼ náa ñajunʼ rúʼko̱ ga̱jma̱a̱ náa aʼkhá ndrígóo religión rí tsaga náa iduu Dios (Is. 52:11). *

18. Xú káʼnii niʼni mbáa ndxájulú índo̱ nitháán mañajunʼ náa mbá guʼwá ndxájkun rá.

¹⁸ Niʼni má tsiguʼ rí mbáa bi̱ naraji̱i̱n xa̱bu̱ nindo̱ʼo̱o̱ mbáa bi̱ kayá edxu̱u̱ náa nagimbáanʼ bi̱ naʼtóo ixi̱ mu mañajunʼ mbá xngaa náa guʼwá ndxájkun náa xuajin rí xtáa. Bi̱ naraji̱i̱n xa̱bu̱ ndaʼyoo má rí ndxájulú nditháan xáñajunʼ náa guʼwá ndxájkun. Mú mbiʼi rúʼko̱ nda̱wa̱a̱ kayuuʼ tsáa mañajuunʼ ga̱jma̱a̱ ndayóoʼ rí mixtiejuunʼ nacha̱. Maski má xúʼko̱, ndxájulú ndiʼyamajkuu ikha rí na̱ʼkha̱ náa Biblia ga̱jma̱a̱ tágruigú ñajunʼ rúʼko̱. Índo̱ niʼni mbá xmáná nigájnuu mbá periodico náa kama xtiʼkhuu imba̱a̱ xa̱bu̱ bi̱ naʼtóo ixi̱ rí natsrigu mbá cruziʼ náa guʼwá ndxájkun. Á mu ndxájulú nigruigú ñajunʼ rúʼko̱, mbáa ikha nigájnuu xtiʼkhuu náa periódico. Gundxaʼwamíjna̱ xú káʼnii gáʼni gachúu mbiʼyuu náa congregación ga̱jma̱a̱ xú káʼnii gákumu̱u̱ Jeobá.

19, 20. a) Ndiéjunʼ rí nijmañulú má rá. b) Ndiéjunʼ rí gíʼmaa majmañulú xóo itháan rá.

¹⁹ Xó má rí kiʼtáriyaʼ náa Biblia rí marigá, rí inuu marigá náa mbiʼi rí kuwáánʼlu nindxu̱u̱ rí muthi “gakuwaanʼ tsímáá ga̱jma̱a̱ nda̱a̱ rí gugíʼníín”. Mú Jeobá naʼsngúlú rí nimbáa Xa̱bu̱ Ñajunʼ numbaaʼ xáʼngo̱o̱ gáʼni marigá tsímáá rí gajkhun ga̱jma̱a̱ rí mbajyúuʼ kámuu. Dí gáʼyóoʼ mu̱ʼni̱ nákha xóó tsérígá ga̱jma̱a̱ nákha xóo tséʼkha̱nú rí nda̱a̱ tsu̱ma̱ gaguma gámbáa rá. Dios gíʼthúu̱n rí xúniʼñáanʼ ruʼtáraʼa ga̱jma̱a̱ rí muʼsngúún xa̱bu̱. Ga̱jma̱a̱ mbaʼyóoʼ mutsíngumijná náa religión rí minduwaʼ. Rúʼko̱ eyoo gáʼthúu̱n rí muniʼñáaʼ xúgíʼ ñajunʼ rí kuajtuminaʼ ga̱jma̱a̱ religión rí minduwaʼ.

²⁰ Rígá itháan rí marigá náa “iwáá mbiʼi” ga̱jma̱a̱ rígá itháan rí Jeobá gíʼthu̱u̱n rí mu̱ʼni̱. Ndiéjunʼ nindxu̱u̱ rá. Ga̱jma̱a̱ xú káʼnii gíʼmaa muʼniratamijná mu mbuʼyáá xúgíʼ rí inuu marigá rá. Rígi̱ mbuʼyáá náa i̱mba̱ artículo.