BI̱ NAʼTÁRAʼA náa radio ndaʼyoo xú káʼnii kri̱ga̱ mbiʼi rí maxnúu ruʼwa. Ikha ndaʼyoo índo̱ na̱ʼkha̱ maxnúu mbá ruʼwa o giñán mbiʼ náa xuajin rí kúwá xa̱bu̱. Numuu rí naxmiéjuunʼ kaʼñún xa̱bu̱, ikha jngó, nángi eʼni eʼtáraʼa náa radio. Mu xúʼko̱ xa̱bu̱ muñeumíjna̱.

Ikháá má kayuuʼ eʼni Jeobá ma̱ngaa, naʼtámuʼún xa̱bu̱ bi̱ kúwá náa tsu̱du̱u̱ Ku̱ba̱ʼ rí na̱ʼkha̱ mbá “giñán mbiʼ” rí gakhi̱i̱ wéñuʼ rí nimbá miʼtsú túyáá xa̱bu̱. Xkáʼnii eʼni xá. Ga̱jma̱a̱ ndíjkha rí nduʼyáá gajkhun rí naxnúún mbiʼi xa̱bu̱ mu muni káwumíjná xá. Mu maxtiʼña̱a̱ graxe̱ rígi̱, mbuʼyáá xú káʼnii Jeobá niʼtámuʼún xa̱bu̱ nákha wajyúuʼ.

Nákha wajyúuʼ, Jeobá niʼthí mbaʼa nuthu rí maʼni mumíniiʼ bi̱ nduyáá ikha ndrígóo, mú tsénimbu̱u̱n (Prov. 10:25; Jer. 30:23). Náa xúgíʼ rí niʼni, wapháá niʼtámáʼan nákha xóó tséʼkha̱ “giñán mbiʼ” ga̱jma̱a̱ niʼthún xa̱bu̱ dí gáʼyóoʼ muni mu mbuyamajkuíí Dios (2 Rey. 17:12-15; Neh. 9:29, 30). Mu maxkajxi̱i̱n muni xóo phú gíʼmaa maguma, nángi eʼni nijmiuu xa̱bi̱i̱ bi̱ niguájun jmbu bi̱ nikúwá náa tsu̱du̱u̱ Ku̱ba̱ʼ mu muthi rí wíji̱ maguáʼníin ga̱jma̱a̱ mu muthún xa̱bu̱ rí ndayóoʼ muni nacha̱ (Amós 3:7).

Mbáa dí ikhaa ninindxu̱u̱ Noé. Mba̱yu̱u̱ʼ tsiguʼ, niʼtámuʼún xa̱bu̱, támiñun maʼthúún xa̱bu̱ bi̱ nuni rí tséjmaa ga̱jma̱a̱ bi̱ najmangúunʼ rí na̱ʼkha̱ mijngii mbá ruʼwa mbiʼ (Gén. 6:9-13, 17). Ma̱ngaa niʼthún dí gáʼyoo muni mu makáwíin. Ra̱ʼkhá tháán nixmiéjuunʼ maʼni ñajunʼ rúʼko̱ rí asndu ni̱jkha̱nú nijmaʼniiʼ xóo “bi̱ naʼtáraʼa rí jmbu” (2 Ped. 2:5).

Náa mba̱yu̱u̱ʼ tsiguʼ rí niʼtáraʼa Noé, bi̱ nikúwá nákha ikhú nditháan táguáʼdáá fe ga̱jma̱a̱ túnimbu̱u̱n ajngá máʼan rí ni̱ʼkha̱ náa Dios. Ikha jngó, niguámbíin índo̱ “nixnúu ruʼwa mbiʼ ga̱jma̱a̱ ni̱jkha̱ kagu̱u̱n xúgínʼ” (Mat. 24:39; Heb. 11:7). Nda̱a̱ xóo muthi rí Dios táʼtamúʼun.

Náa i̱ʼwáʼ nuthu, Jeobá niʼtámuʼún xa̱bu̱ nákha xóó tséʼkha̱ “giñán mbiʼ” rí maʼni mumíniiʼ. Ikhaa niniñuuʼ mba̱yu̱u̱ʼ mu xa̱bu̱ ma̱ndoo muni mbá rí maʼnikáwíin. Xúʼko̱ má niʼni índo̱ nikuʼma gu̱wa̱ʼ gamiéjunʼ náa Egipto. Guʼyáá mbá xkri̱da, rí nirígá índo̱ ni̱ʼkha̱ gamiéjunʼ rí maʼni juwan, nixnúu gakhi̱i̱ eʼtsí rí niʼni gámbóo xúgíʼ. Jeobá nikuʼmaa Moisés ga̱jma̱a̱ Aarón mu mutámaʼán faraón gajmíi̱n xa̱bi̱i̱ rí wíji̱ marigá. Numuu rí i̱mba̱ néjtsú maxnúu gakhi̱i̱ eʼtsí, lá niguáʼdáá mba̱yu̱u̱ʼ mbiʼi mu mbuyáá náa makáwíin xáʼ. Náa Biblia naʼthí: “Xúgínʼ xa̱bi̱i̱ faraón bi̱ nimiñun kuyáá Ajngá rawunʼ Jeobá, nánguá niniñuuʼ yumbáá ndrígu̱ún rí magún xanáá ga̱jma̱a̱ niruguriʼíínʼ xujkiún. Mú bi̱ túnimbu̱u̱n Ajngá rawunʼ Jeobá niniñuuʼ xanáá yumbáá ndrígu̱ún ga̱jma̱a̱ xujkiún” (Éx. 9:18-21). Nduʼyáá kaʼwu rí Dios wapháá niʼtámuʼún. Númaa má rígi̱, xa̱bu̱ bi̱ nidxawíín mbá nacháá, nikáwíin náa gamiéjunʼ dí nirígá.

Dios ma̱ngaa niʼthúu̱n faraón gajmíi̱n xa̱bi̱i̱ índo̱ inúu makuʼma rí maʼni gu̱wa̱ʼ gamiéjunʼ. Mú ikhiin na̱nguá ninimbu̱ún ga̱jma̱a̱ nda̱a̱ rí nini (Éx. 4:22, 23). Ga̱jma̱a̱ numuu rúʼko̱, asndu ndiyáá xú káʼnii nikháñun e̱jín giʼniún. ¡Ra̱ʼkhá tháán gíná! (Éx. 11:4-10; 12:29). Lá nirígá mbiʼi mu ma̱ndoo muni mbá rí maʼni mu xákhañun xáʼ. Xúʼko̱. Ndíjkha rí nuʼthá rígi̱ rá. Numuu rí Moisés wapháá  niʼtámuʼún israelitas rí inuu marigá mbá gamiéjunʼ, ikhaa niʼthún dí gúni mu xákhañun bi̱ kúwi̱i̱n náa guʼwún (Éx. 12:21-28). Nguáthi̱i̱n nidxawíín rí niʼthí xá. Tikhuun nuthí rí bi̱ nikáwíin náa Egipto naʼni mbá ajtsú millón xa̱bu̱, raʼkhíin i̱ndó israelitas mangiin “bi̱ asndu xkáʼníí má xa̱bu̱” xóo bi̱ naguwááʼ, ga̱jma̱a̱ egipcios ma̱ngaa (Éx. 12:38; nota).

Xó má eʼyáá náa xkri̱da rígi̱, Jeobá niniñuuʼ mba̱yu̱u̱ʼ mu xa̱bu̱ mudxawíín rí ikhaa naʼtámaʼan (Deut. 32:4). Náá numuu rá. Apóstol Pedro niʼthí rí Jeobá “nimbáa tsíyoo mandáti̱ga̱a̱; ikhaa nandoo rí xúgínʼ maguanu mata̱nga̱a̱ a̱jkiu̱ún” (2 Ped. 3:9). Xúʼko̱, Dios naxmiéjuunʼ kaʼñún xa̱bu̱. Nandoo rí mata̱nga̱a̱ a̱jkiu̱ún ga̱jma̱a̱ rí munimbu̱u̱n kuyáá xtágabu ndrígóo nákha xóó tséʼkha̱ kayóo rí maʼni mumíniiʼ (Is. 48:17, 18; Rom. 2:4).

Ma̱ngaa rí mbiʼi xúgi̱ xúgínʼ xa̱bu̱ gíʼmaa mudxawíín ajngáa rí najuiʼtáraʼa náa mbájndi numbaaʼ. Índo̱ Jesús nixtáa náa tsu̱du̱u̱ Ku̱ba̱ʼ, niʼthí rí numbaaʼ dí rígá xúgi̱ mambáa índo̱ gárígá “majphú mba̱a̱ gaʼkhu” (Mat. 24:21). Niʼtáriyaʼ kaʼwu xú káʼnii xa̱bi̱i̱ mbuyáá ga̱jma̱a̱ rí maguáʼníí índo̱ gáʼga ratumuu mbiʼi rúʼko̱. Niʼthí mbaʼa rí marigá náa mbájndi numbaaʼ rí nduʼyáá nambánuu mbiʼi rí kuwáanʼ (Mat. 24:3-12; Luc. 21:10-13).

Xó má náa kiʼtáriyaʼ rígi̱, Jeobá naʼthúún xúgínʼ xa̱bu̱ rí munimbu̱u̱n kuyáá ga̱jma̱a̱ rí muni ñajuunʼ ikhaa. Ikhaa nandoo rí xúgínʼ bi̱ nunimbu̱u̱n makuwá májánʼ ga̱jma̱a̱ rí maguma tsajkurámiinʼ náa Ku̱ba̱ʼ nuxi̱ʼ (2 Ped. 3:13). Mú xa̱bu̱ maguaʼdáá fe náa rí nikudaminaʼ maʼni, Jeobá nixná “ajngáa rí májánʼ ndrígóo Reino”, mbá ajngáa rí ma̱ndoo maʼnikáwíin xa̱bu̱. Jesús niʼtáriyaʼ rí miʼtáraʼa “náa xúgíʼ numbaaʼ mu mudxawíín xúgínʼ xa̱bu̱” (Mat. 24:14). Dios nigíʼ awan náa xa̱bi̱i̱ mutaraʼa ajngáa rígi̱ náa itháan rí 240 xuajin mba̱ʼu̱ ga̱jma̱a̱ náa kaʼyoo. Ikhaa nandoo rí mbaʼin xa̱bu̱ maguánu mudxawíín rí ikhaa naʼtámuʼún mu makáwíin náa “giñán mbiʼ” rí marigá índo̱ gáʼkha̱ kayóo rí maʼni mumíniiʼ xa̱bu̱ (Sof. 1:14, 15; 2:2, 3).

Jeobá naxnún mba̱yu̱u̱ʼ mbiʼi xa̱bu̱ mu mudxawíín. Ikháanʼlu bi̱ na̱jkua̱ kuʼyúlú Ajngóo Dios, xúniʼñáanʼ rumbáñún xa̱bu̱ asndu xó má eʼngo̱o̱ mu makáwíin índo̱ maguma gámbáa dí xtáa rarígá náa numbaaʼ rígi̱. Ikha jngó, graxe̱ rí itháan nu̱ʼni̱ nindxu̱u̱, lá mudxawíín nákha xóó rígá mbiʼi xáʼ.