1. Ndiéjunʼ gándoo maʼni Jeobá mu maʼnimbánuu rí nandoo rá.

JEOBÁ ma̱ndoo maʼni asndu dí má eyóoʼ mu maʼnimbánuu rí nandoo. Tikhu rí ikhaa niʼni nindxu̱u̱ rí maʼsngáa, nindxu̱u̱ Anu̱lú bi̱ naʼni maʼni̱i̱ a̱jkiu̱lú, ga̱jma̱a̱ bi̱ gíʼdoo ajngáa rí májánʼ (Is. 48:17; 2 Cor. 7:6; Gál. 3:8). Maski má xúʼko̱ najmiuu xa̱bu̱ numbaaʼ mu maʼnimbánuu rí nandoo (Mat. 24:14; 28:19, 20; 2 Cor. 1:3, 4). Ikhaa ma̱ndoo maxnúu asndu tsáá dí ikháanʼlu ku̱ma̱ ga̱jma̱a̱ tsiakii mu mu̱ʼni̱ rí ndayóoʼ mu mambanúu rí nandoo. Xúgíʼ rígi̱ na̱jkha̱nú nanindxu̱u̱ rí nandoo gáʼthúu̱n mbiʼyuu Jeobá, xó má eku̱mu̱ún tikhun xa̱bu̱ bi̱ nakru̱ʼu̱u̱n.

2. a) Náá numuu rí nguáná nakumulú rí Jeobá tséjmiuu ga̱jma̱á ni̱ndxu̱lú rá. b) Ndiéjunʼ gúʼyáá náa artículo rígi̱ rá.

² Xúgiáanʼ nandulú rí majmáánʼlu náa Jeobá, mbáa tikhun nakumu̱ún rí Jeobá tséjmiuu. Náá numuu rá. Numuu rí nakumu̱ún rí wanii ga̱jma̱a̱ xóo kúwi̱i̱n o rígá rí narikhún. Tikhun nakúwi̱i̱n gagi ga̱jma̱a̱ rí nuni má ga̱jma̱a̱ tséyáá náá rí gándoo muni xóó itháan. Náa artículo rígi̱ mbuʼyáá xú káʼnii Jeobá ma̱ndoo maʼniratháánʼ mu mu̱ʼni̱ mambanúu rí nandoo. Ma̱ngaa mbuʼyáá tikhu xkri̱da ndrígu̱ún xa̱bekha ga̱jma̱a̱ gu̱ʼu̱ bi̱ nikúwá nákha wajyúuʼ bi̱ Jeobá niʼni rí maʼndún muni ga̱jma̱a̱ nixnúún tsiakii. Ga̱jma̱a̱ nda̱wa̱á mbuʼyáá dí gándoo mu̱ʼni̱ mu Jeobá majmiuu ga̱jma̱á nindxulú.

3. Xó má eʼthí náa Filipenses 2:13, dí gándoo gáxnulú Jeobá rá.

³ (Atraxnuu Filipenses 2:13). * * Jeobá ma̱ndoo maʼni rí  maʼndulú muʼni ñajuunʼ. Xú káʼnii rá. Mbáa mu̱ʼgua̱nú mbuʼyáá dí rígá rí ndayóoʼ náa congregación ndrígúlú o mbáa bi̱ kayá edxu̱u̱ naguxnuu mbá carta dí nikuʼmá sucursal náa naʼthí rí ndayóoʼ mixtiembáá náa i̱ʼwáʼ xuajen. Mbáa ikhú muraximíjna̱ xú káʼnii gúʼni mu ma̱ndoo muyambáá. O mbáa nixruʼulú mbá asignación rí gakhi̱i̱ ga̱jma̱a̱ nuraximíjna̱ á mu maʼngulú muʼnimbánii, Jeobá xatsudáanlú mu̱ʼni̱. Mú á mu ndaʼyoo rí nandulú mu̱ʼni̱ itháan ikhaa gambáyulú mu maʼngulú muʼnimbánii.

4. Xú káʼnii gándoo Jeobá maxnúlú tsiakii mu mu̱ʼni̱ ñajuunʼ rá.

⁴ Jeobá ma̱ngaa ma̱ndoo maxnúlú tsiakii mú muʼni ñajuunʼ (Is. 40:29). Ga̱jma̱a̱ xi̱ʼ kaʼwu ndrígóo ma̱ndoo maʼni rí majmáánʼ mu̱ʼni̱ (Éx. 35:30-35). Ga̱jma̱a̱ náa xuajñuu ma̱ndoo maʼsngúlú mu̱ʼni̱ tikhu ñajunʼ. Á mu rí tséʼyáá xóo guʼnimbánii mbá asignación, gúnda̱ʼa̱ rí mixtambáyulú. Ga̱jma̱a̱ guʼgua̱ kanuu náa Anu̱lú bi̱ xtáa mekhuíí ga̱jma̱a̱ gúnda̱ʼa̱ rí maxnúlú “tsiakii rí itháan mba̱a̱” (2 Cor. 4:7; Luc. 11:13). Náa Biblia naʼthí xú káʼnii Jeobá niʼniratiin mbaʼin xa̱bekha ga̱jma̱a̱ gu̱ʼu̱ nixnúún tsiakii ga̱jma̱a̱ rí maʼndún muni ñajuunʼ. Guʼyáá tikhuu xkri̱da ga̱jma̱a̱ gundxaʼwamíjna̱ xú káʼnii gándoo gajmiú ga̱jma̱á nindxulú.

5. Ndiéjunʼ ejmañulú índo̱ Jeobá nijmiuu Moisés mú maʼni kríyaa xuajñu rá.

⁵ Jeobá niʼni rí Moisés maʼga̱nú maʼnikríyaaʼ xuajen Israel. Mú nguáná nijmiuu Jeobá xá. Lá índo̱ Moisés nikumuu rí xtáa xawii numuu rí “nijuiʼsngáá májánʼ náa xúgíʼ ku̱ma̱ ndrígu̱ún xa̱bu̱ egipcios” ráʼ. (Hech. 7:22-25). Na̱nguá, Jeobá nijmiuu nda̱wa̱á rí niʼsngóo rí xákiʼnáa nacha̱ ga̱jma̱a̱ rí mani̱ndxu̱u̱ xa̱bu̱ guabaaʼ (Hech. 7:30, 34-36). Ga̱jma̱a̱ nixnúu tsiakii mu maʼga gáxnajximinaʼ náa inuu Xa̱bu̱ Ñajunʼ bi̱ itháan mba̱a̱ náa Egipto (Éx. 9:13-19). Ndiéjunʼ ejmañulú índo̱ Jeobá nijmiuu Moisés ga̱jma̱a̱ rí xóo niʼni xá. Rí ikhaa najmiuu bi̱ guaʼdáá cualidad rí na̱ʼkha̱ náa Dios ga̱jma̱a̱ bi̱ nakumu̱ún kuyáá tsiakii rí ikhaa naxnún (Filip. 4:13).

6. Ndiéjunʼ ejmañuluʼ rí xóo Jeobá nijmiuu Barzilái mu mambáyúu rey David rá.

⁶ Mba̱yu̱u̱ʼ tsiguʼ nda̱wa̱á, Jeobá nijmiuu Barzilái mu mambáyúu rey David. Índo̱ rey gajmíi̱n xa̱bi̱i̱ nigájnun ragañun eʼni Absalón, a̱ʼdióo David, niʼni néʼngu̱u̱n ga̱jma̱a̱ nixkidxu̱u̱n ma̱ngaa nikandawunʼ. Maski ajndu Barzilái nikhi̱i̱ má, ikhaa gajmíi̱n eʼwíínʼ nini tsiakimijna mu magúun gumbañúún. Barzilái na̱nguá nindxa̱ʼwáminaʼ ni xájmaa náa Jeobá numuu rí nikhi̱i̱ má. Rí phú niʼni, nixnúún rí gíʼdoo ga̱jma̱a̱ nijmúu mu mambáñún xa̱bi̱i̱ Dios bi̱ ndiñúnʼ (2 Sam. 17:27-29). Ndiéjunʼ eʼsngúlúʼ rígi̱ rá. Rí tséʼniuu má nguáthá tsigulú, Jeobá ma̱ndoo majmiuu ga̱jma̱á nindxulú mu mumbáñún a̱ngiu̱lú náa xúgíʼ numbaaʼ bi̱ na̱nguá guaʼdáá rí itháan ndañúnʼ (Prov. 3:27, 28; 19:17). Maski ajndu xándoo gumbáñun mbájmbu, ma̱ndoo muxná mbújkha̱a̱ náa ñajunʼ rí narígá náa xúgíʼ numbaaʼ mu mixtambañúún a̱ngiu̱lú índo̱ gáʼyóoʼ (2 Cor. 8:14, 15; 9:11).

7. a) Xú káʼnii nijmiuu Jeobá Simeón rá. b) Náá numuu rí naxnúlú tsiakii rígi̱ rá.

⁷ Simeón ninindxu̱u̱ mbáa bi̱ kayá edxu̱u̱ náa Jerusalén bi̱ Jeobá niʼthúu̱n rí mbaʼyoo Mesías nákha xóó tsekháñuu. Rí niʼthún rígi̱ nixnúu wéñuʼ tsiakii, numuu rí mba̱yu̱u̱ʼ tsiguʼ nigi̱ʼthu̱u̱n rí ma̱ʼkha̱nú. Jeobá niʼni tsajkurámaaʼ numuu rí niʼngo̱o̱ ga̱jma̱a̱ rí nigiʼdoo fe. Ikha jngó mbóo mbiʼi, ‹xi̱ʼ nixnúu  ikha›, Simeón ni̱jkha̱ náa templo, ga̱jma̱a̱ ikhí ndiʼyoo Jesús. Ikhú, Jeobá nijmiuu mu maʼtáriyaʼ rí maʼni ada̱ bugi̱, bi̱ maʼga̱nú mani̱ndxu̱u̱ Cristo (Luc. 2:25-35). Maski ajndu Simeón mbáa táxtáa mu mbaʼyoo ñajunʼ rí niʼni Jesús, mú nixnáa núma̱aʼ ga̱jma̱a̱ numuu ñajunʼ rí nikhánáá. Ga̱jma̱a̱ numuu rí niwi̱ji̱ jmbu gíʼthu̱u̱n mbaʼyoo mbá rí itháan májánʼ náa numbaaʼ nuxi̱ʼ rí maʼtáñajuunʼ Jesús ga̱jma̱a̱ maʼni tsajkurámiinʼ xúgínʼ xa̱bu̱ numbaaʼ (Gén. 22:18). Ikháanʼlu ma̱ngaa ma̱ndoo muxnáa númaa Jeobá ga̱jma̱a̱ numuu rí naniñulú rí mu̱ʼni̱ ñajuunʼ.

8. Xú káʼnii gándoo majmiuu ga̱jma̱a̱ nindxulú Jeobá rá.

⁸ Nákha siglo timbá, mbáa xa̱bu̱ bi̱ májánʼ a̱jkiu̱u̱n bi̱ mbiʼyuu José nixnáximinaʼ mu Jeobá majmiuu ga̱jma̱á nindxu̱u̱ (Hech. 4:36, 37). Apóstoles nixná mbiʼí Bernabé, rí nandoo gáʼthúu̱n “ada̱ bi̱ naʼni a̱jkiu̱ún”, mbáa ga̱jma̱a̱ numuu rí najmaa mu maʼni̱i̱ a̱jkiu̱ún eʼwíínʼ. Mbá xkri̱da, índo̱ Saulo ninindxu̱u̱ cristiano mbaʼin a̱ngiu̱lú nimiñun guxuʼmamíjná náa ikhaa, numuu rí ndiyáá rí nixkúún xa̱bi̱i̱ Dios. Mú Bernabé nimbáñun. Saulo nixnáa wéñuʼ núma̱aʼ ga̱jma̱a̱ numuu rí májánʼ a̱jkiu̱u̱n (Hech. 9:21, 26-28). Nda̱wa̱á, bi̱ nuyégun edxu̱u̱ náa Jerusalén niguánu nidxawíín rí cristianos bi̱ kúwá náa Antioquía ndrígóo Siria, náa mbá xuajen mitsínguánʼ, ndañúnʼ tsiakii. Tsáá nixuʼmaa maʼga xá. Bernabé. Rúʼko̱ ninindxu̱u̱ mbá rí májánʼ rí nini, numuu rí náa Biblia naʼthí rí Bernabé ‹nixnúún tsiakii xúgínʼ mu makuwá jmbu náa señor ga̱jma̱a̱ rí muni mbóó a̱jkiu̱ún ma̱ngaa mu muguajún gújkhuʼ› (Hech. 11:22-24). Rí mbiʼi xúgi̱, Jeobá ma̱ngaa ma̱ndoo mambayúlú mu muʼni rí maʼni̱i̱ a̱jkiu̱ún a̱ngiu̱lú, xóo muʼthá, a̱ngiu̱lú bi̱ nikháñuu mbáa bi̱ kuyáá. O mbáa maxkajxáanʼlu rí mu̱ʼgua̱ gúʼyáá mbáa o muʼtháán mbáa bi̱ nandoo káñuu o bi̱ xtáa ngíná ga̱jma̱a̱ muʼtháán mbá rí maxnúu tsiakii. Lá nuniʼñamíjna̱ rí Jeobá majmiuu ga̱jma̱á nindxulú xó má Bernabé ráʼ. (1 Tes. 5:14.)

9. Ndiéjunʼ ejmañulú ga̱jma̱a̱ numuu rí xóo Jeobá nimbáyúu mbáa ndxájulú bi̱ mbiʼyuu Vasily rá.

⁹ Jeobá nimbáyúu mbáa ndxájulú bi̱ mbiʼyuu Vasily mu mani̱ndxu̱u̱ mbáa bi̱ mayéʼga májánʼ edxu̱u̱. Índo̱ nixnán ñajunʼ rí mani̱ndxu̱u̱ mbáa bi̱ mbayá edxu̱u̱, índo̱ nigiʼdoo 26 tsiguuʼ nikumuu rí xájmaa mu mambáyúu congregación, itháan náa a̱ngiu̱lú bi̱ kuáʼdáá xkujndu. Numa̱a̱ má ga̱jma̱a̱ numuu rí ninirathaa májánʼ a̱ngiu̱lú bi̱ najmañún ma̱ngaa rí nijmañuu náa Najuiʼsngúún ga̱jma̱a̱ numuu Reino. Niʼni tsiakimínáʼ wéñuʼ mu majmañuu. Mbá xkri̱da, niʼnirámáʼ náa mbá i̱yi̱i̱ʼ tikhu rí nigíminaʼ maʼni. Índo̱ naʼngo̱o̱ naʼnimbánuu rígi̱, ikhú nánguá míñun wéñuʼ. Naʼthí: “ Rí nákha ginii naʼnimíñuʼ xúgi̱ naʼni rí maxtáá gagi. Índo̱ Jeobá nambáyuʼ maxkamaa mbá texto rí ma̱ndoo mambáyúu ga̱jma̱a̱ mbáa ndxájulú ikhú naxtáá gagi”. A̱ngui̱nʼ, á mu ikháanʼ nunila xó má Vasily ga̱jma̱a̱ á mu nuniʼñamijnala rí majmiuu Jeobá ga̱jma̱á nindxa̱la, ikhaa maʼniratháanʼla mu munimbánii itháan ñajunʼ náa congregación.

10. Ndiéjunʼ niʼni Abigaíl, ga̱jma̱a̱ ndiéjunʼ ejmañulú náa xkri̱da ndrígóo xá.

¹⁰ Índo̱ rey Saúl nixkhoo David gajmíi̱n xa̱bi̱i̱ bi̱ jmbiin náa ikhaa, ndiyóoʼ rí mixtambáñuun. Mbóo mbiʼi xa̱bi̱i̱ David nigún gúnda̱ʼa̱a̱ mbá chíʼgíiʼ ganitsu mbáa israelita bi̱ gíʼdoo wéñuʼ bi̱ mbiʼyuu Nabal. Ikhiin nini rígi̱ numuu rí niñewu̱u̱n xujkiúu náa ku̱ba̱ʼ mijxooʼ. Mú Nabal nijmídúu ga̱jma̱a̱ na̱nguá nindoo gáxnún nditháan. Rígi̱ niʼni makiʼnáa  David, rí asndu ni̱jkha̱ mu maxíyáa Nabal gajmíi̱n mbá xúgínʼ yumbáá bi̱ kúwá náa goʼwóo (1 Sam. 25:3-13, 22). Ikhú ni̱ʼkha̱ a̱ʼgiu̱u̱ Nabal bi̱ mitsiʼyáa, bi̱ mbiʼyuu Abigaíl. A̱ʼgu̱ bi̱ májánʼ endxa̱ʼwáminaʼ bugi̱ nisngájma rí támiñuu ga̱jma̱a̱ ni̱jkha̱ gáraʼnuu David ikhú nismbátigo̱o̱ ga̱jma̱a̱ niʼthúu̱n rí xáxíyáa mu xágiʼdoo aʼkhúun ga̱jma̱a̱ numuu eʼdi. Nixprígúu ga̱jma̱a̱ ajngáa gua̱ba̱ʼ ma̱ngaa niʼthúu̱n rí maniñuʼ xkujndu náa ñawúunʼ Jeobá. Ga̱jma̱a̱ rí xóo nisngájma niʼni rí David magáwíinʼ a̱jkiu̱u̱n ga̱jma̱a̱ ndiʼyoo rí Jeobá nikuʼmaa (1 Sam. 25:23-28, 32-34). Abigaíl nigiʼdoo cualidad rí niʼni majmaa náa Jeobá. Xúʼko̱ má kayuuʼ, Jeobá ma̱ndoo majmiuu a̱ngiu̱lú gu̱ʼu̱ bi̱ nusngajma rí májánʼ a̱jkiu̱ún ga̱jma̱a̱ bi̱ nundxa̱ʼwa̱a̱ májánʼ edxu̱ún mu mumbañún bi̱ kúwá náa guʼwún ma̱ngaa náa congregación (Prov. 24:3; Tito 2:3-5).

11. Ndiéjunʼ nini waʼxiinʼ Salum, ga̱jma̱a̱ tsíín eyaridáá xkri̱da ndrígu̱ún rí mbiʼi xúgi̱ xá.

¹¹ Mba̱yu̱u̱ʼ tsiguʼ nda̱wa̱á, waʼxiinʼ Salum mangiin ninindxu̱ún bi̱ Jeobá nijmiuu mu magumaa xtátsí ndrígóo Jerusalén (Neh. 2:20; 3:12). Maski ajndu Salum ninindxu̱u̱ mbáa príncipe, waʼxiinʼ nixnaximi̱jna̱ muni ñajunʼ rí gákhii ga̱jma̱a̱ náa asndu gamíi makámbiñunʼ (Neh. 4:15-18). Rí xóo nini nisngájmaa rí ninindxu̱ún mixtiʼkuiin ki xóo xa̱bekha bi̱ tecoítas, bi̱ ‹na̱nguá nindúún gúñajuunʼ› (Neh. 3:5). Gundxaʼwamíjna̱ dí ra̱ʼkhá tháán nikúwá gagi índo̱ niguámbá ñajunʼ káaʼ mbá a̱jma̱ skiñúʼ gu̱wa̱ʼ e̱jma̱ mbiʼi (Neh. 6:15). Rí mbiʼi xúgi̱ kúwi̱i̱n a̱ngiu̱lú gu̱ʼu̱ bi̱ nuyambáá ga̱jma̱a̱ gagi náa ñajunʼ: Xó má náa naguma guʼwá ga̱jma̱a̱ náa naguma kaʼwii náa nduʼyamajkuíí Jeobá. Rí najmiin nuni, rí nanigu̱nʼ ga̱jma̱a̱ rí nuni mbóó a̱jkiu̱ún rúʼko̱ naʼni rí magajnúu májánʼ ñajunʼ rígi̱.

12. Xó má xkri̱da ndrígóo Tabita, xú káʼnii gándoo Jeobá majmiuu ga̱jma̱á nindxulú rá.

¹² Jeobá nixkaxíi Tabita rí maʼni ‹mbaʼa ñajunʼ rí májánʼ› ga̱jma̱a̱ mambáñún bi̱ ‹ndañún›, itháan nimbáñun gu̱ʼú xuáʼa̱ (Hech. 9:36). Ga̱jma̱a̱ numuu dí ra̱ʼkhá tháán májánʼ a̱jkiu̱u̱n, mbaʼin nimbiyaʼ índo̱ nikháñun. Mú ra̱ʼkhá tháán nidxún índo̱ apóstol Pedro niʼniga̱bi̱i̱ (Hech. 9:39-41). Ndiéjunʼ ejmañulú náa xkri̱da ndrígóo Tabita rá. Rí tséʼniuu má á mu ni̱ndxu̱lú jiáma, wa̱ʼxa̱ʼ, xa̱bekha, gu̱ʼu̱, tséʼniuu má á mu guaniáanʼ, xúgiáánʼ ma̱ndoo mumbáñún a̱ngiu̱lú (Heb. 13:16).

13. Xú káʼnii nijmiuu Jeobá mbáa ndxájulú bi̱ mbiʼyuu Ruth, ga̱jma̱a̱ xú káʼnii ni̱jkha̱nú niʼthí xá.

¹³ Mbáa ndxájulú mbiʼyuu Ruth bi̱ natiyuuʼ, nindoo mani̱ndxu̱u̱ misionera. Nákha chíʼgíiʼ, na̱jkha̱ raxnáraʼa tratados náa mámbá guʼwá. Ikhaa niʼthí: “niniguʼ wéñuʼ ñajunʼ rúʼko̱”. Mú niʼniuu gakhi̱i̱ maʼtámíjná gajmíi̱n xa̱bu̱ náa mámbá guʼwá ga̱jma̱a̱ numuu Reino ndrígóo Dios. Maski ajndu nitiyuuʼ, Ruth ninindxu̱u̱ precursora regular índo̱ nigiʼdoo 18 tsiguuʼ. Nákha tsiguʼ 1946, ni̱jkha̱ Náa Galaad ndrígóo Watchtower náa najuiʼsngúún ga̱jma̱a̱ numuu Biblia ga̱jma̱a̱ niya̱mbáá náa Hawái ga̱jma̱a̱ náa Japón. Jeobá nijmiuu mu maʼthúún ajngáa rí májánʼ mbaʼin xa̱bu̱ náa xuajen rúʼko̱. Rí nixtáa raʼni ñajuunʼ Dios itháan maʼni a̱jkhu̱ skiñúʼ tsiguʼ, Ruth ni̱jkha̱nú niʼthí: “Jeobá nixnúʼ tsiakii. Nimbáyuʼ mu xátiyuʼ. Nda̱yo̱o̱ gajkhun rí Jeobá ma̱ndoo majmiuu asndu tsáá má bi̱ naʼnimbo̱o̱ kaʼyoo ikhaa”.

14. Xó má naʼthí náa Colosenses 1:29, dí gáʼyóoʼ mu̱ʼni̱ mu Jeobá majmiuu ga̱jma̱á ni̱ndxu̱lú rá.

¹⁴ Náa mba̱yu̱u̱ʼ tsiguʼ, Jeobá nijmiuu xa̱bi̱i̱ mbaʼa eni. Náa ikháánʼlu, ndiéjunʼ gáʼni mu  mu̱ʼgua̱nú muʼnilú xá. Mbáa asndu nguáthá má eʼnimijnalu ikháan (atraxnuu Colosenses 1:29). * Á mu mbóó a̱jkiu̱lú, Jeobá ma̱ndoo maʼni rí muʼtáraʼa ga̱jma̱a̱ gagi, rí musngáa májánʼ ga̱jma̱a̱ rí majmáánʼ muʼni̱i̱ a̱jkiu̱ún eʼwíínʼ ga̱jma̱a̱ rí majmáánʼ muñejunʼ májánʼ, ma̱ngaa manindxu̱lúʼ mbáa bi̱ mambaxúún májánʼ gajmiún o asndu dí má gáʼyóoʼ mu̱ʼni̱ mu mambanúu rí nandoo Dios.

15. Xó má naʼthí náa 1 Timoteo 4:12, 15, ndiéjunʼ gándoo gúnda̱ʼa̱a̱ Jeobá bi̱ ni̱ndxu̱ún jiáma ga̱jma̱a̱ wa̱ʼxa̱ʼ rá.

¹⁵ Lá nindxa̱a̱ʼ mbáa dxámá o dxáʼgú bi̱ na̱jkha̱ rakhi̱i̱ má ráʼ. Ndayóoʼ xa̱bu̱ bi̱ guáʼdáá tsiakii mu mundrigú ñajunʼ mu mani̱ndxu̱ún siervos ministeriales. Náa mbaʼa congregación, kúwá itháan bi̱ kuya̱ edxu̱u̱ ki xóo siervos ministeriales. Xú káʼnii gándoo gátani mu manigua̱a̱ʼ itháán ñajuunʼ Dios náa congregación rá. Nguáná tikhun a̱ngiu̱lú nuthi: “Nadxuʼ má rí i̱ndó publicador ni̱ndxu̱ʼ”. Á mu xúʼko̱ ku̱ma̱a̱ʼ atanda̱ʼa̱a̱ Jeobá rí mambáyáaʼ manigua̱a̱ʼ ma̱nindxa̱a̱ʼ siervo ministerial ga̱jma̱a̱ rí maxnáaʼ tsiakii mu maʼngaaʼ matani xúgíʼ náa ñajuunʼ (Ecl. 12:1). Ndayúxuʼ rí ikháán matiembáá (atraxnuu 1 Timoteo 4:12, 15). *

16. Ndiéjunʼ gíʼmáánʼ munda̱ʼa̱a̱ Jeobá ga̱jma̱a̱ náá numuu rá.

¹⁶ Jeobá ma̱ndoo maʼni rí mu̱ʼgua̱nú mu̱ʼni̱ rí ndayóoʼ mu mambanúu rí nandoo. Ikha jngó, gunda̱ʼa̱a̱ rí maʼni rí manigulúʼ muñajuunʼ náa ikhaa ga̱jma̱a̱ gunda̱ʼa̱a̱ rí maxnúlúʼ tsiakii mu mu̱ʼni̱. Tséʼniuu á mu ni̱ndxu̱lú jiámáá, guaniáanʼ, gajmulú mbiʼi ndrígúlú, tsiakii, rí najmáánʼ nu̱ʼni̱ ga̱jma̱a̱ xúgíʼ rí kuaʼdáá mu muxnáá gamajkhu Jeobá xúgi̱ (Ecl. 9:10). Xúniʼñáanʼ nditháan manújngoo rí mu̱ʼni̱ ñajuunʼ Dios, ga̱jma̱a̱ numuu rí namíñulú o rí nakumulú rí xájmáánʼ. Tséʼniuu á mu naʼngulú o tséʼngulú mu̱ʼni̱ wéñuʼ, xúgiáánʼ kuaʼdáá ñajunʼ dí ra̱ʼkhá tháán mitsaanʼ dí muxnáá gamajkhu rí kaʼyoo Jeobá bi̱ nindxu̱u̱ Anu̱lú.