1. Náá numuu rí mbáwíi Jeobá kaʼyoo rí mbuʼyamajkuíí rá.

MBÁWÍI Jeobá kaʼyoo rí mbuʼyamajkuíí numuu rí ikhaa niʼniáanʼ ga̱jma̱a̱ ikhaa naʼni rí mbuʼya (Apoc. 4:11). Mú, maski ajndu nandulúʼ kuʼyáá ga̱jma̱a̱ nduʼyamajkuíí Jeobá, rígá tikhu rí narikhulú mu xuʼyamajkuíí xóo phú gíʼmaa mbuʼyamajkuíí. Mu xárígá rígi̱, ndayóoʼ makru̱ʼu̱lú xkáʼnii gándoo marigá. Mú, ginii guʼyáá xú káʼnii gándoo mbuʼyamajkuíí mbáwíi ikhaa.

2. Xó má naʼthí náa Éxodo 34:14, ndiéjunʼ rí xúniʼñáánʼ rí marigá náa a̱jkiu̱lú á mu mbáwíi Jeobá nduʼyamajkuíí rá.

² Náa Biblia naʼnimbrígui̱i̱ rí nandulú kuʼyáá Jeobá ga̱jma̱a̱ rí mbuʼyamajkuíí mbáwíi ikhaa. Rí mbuʼyamajkuíí mbáwíi ikhaa nandoo gáʼthúu̱n rí i̱ndó ikhaa exnáá gamajkhu. Xúniʼñáanʼ rí nimbá ga̱jma̱a̱ nimbáa maʼni rí xámbáxulú gamiúlú Jeobá (atraxnuu Éxodo 34:14). *

3. Náá numuu rí mbáwíi Jeobá eʼyamajkuíí rá.

³ Rí nijmañulú ga̱jma̱a̱ Jeobá niʼni rí mbuyamajkuíí mbáwíi ikhaa. Ni̱jkua̱nú ninigulú cualidad mitsaanʼ rí gíʼdoo. Nduʼyáá rí nanigu̱u̱ʼ ga̱jma̱a̱ rí tsénigu̱u̱ʼ, ga̱jma̱a̱ xúʼko̱ má eʼyáá mangáánʼlu. Nduʼyáá xú káʼnii eyoo rí makuwáánʼlu ga̱jma̱a̱ numbáyíí índo̱ nakuwáánʼ xó má eyoo ikhaa. Ra̱ʼkhá tháán edxulú rí ikhaa naniñuuʼ rí mambáxulu gajmiúlú (Sal. 25:14). Xúgíʼ rí najmañulúʼ ga̱jma̱a̱ numuu bi̱ Niʼniáánʼ naʼni rí mu̱ʼgua̱ kanuu itháan náa ikhaa (Sant. 4:8).

4. a) Ndiéjunʼ ejmuu Gixa̱a̱ mu xuʼyamajkuíí mbáwíi Jeobá rá. b) Ndiéjunʼ gúʼyáá náa artículo rígi̱ rá.

⁴ Gixa̱a̱ naʼtáñajuunʼ náa numbaaʼ rígi̱, ga̱jma̱a̱ najmuu dí  rígá náa numbaaʼ mu maʼni magua̱ʼa̱ mu̱ʼni̱ ga̱jma̱a̱ mu makáguabáanʼ (Efes. 2:1-3; 1 Juan 5:19). Nandoo rí mu̱ʼgua̱nú manigulúʼ i̱ʼwáʼ dí rígá ki xóo rí mbuʼyamajkuíí mbáwíi Jeobá. Guʼyáá a̱jma̱ enii náa ikhaa ma̱ndoo maʼni. Timbá, naʼniulú rí maʼndulú mbuʼyáaʼ riqueza, dí maʼni a̱jma̱, naʼniulú rí manigulúʼ muraʼwíi gitsíin rí xkawiʼ.

5. Náá numuu rí gíʼmaa muñeumíjna̱ mu xáʼndulú muguaʼdáá wéñuʼ mbújkha̱a̱ rá.

⁵ Xúgiáánʼ nandulú muguaʼdáá ganitsu, xtíin ga̱jma̱a̱ náa ma̱ndoo makuwáánʼ. Mú gíʼmaa mu̱ʼni̱ tsumáá numuu rí migamíi manigulú mbújkha̱a̱. Mbaʼin xa̱bu̱ rí mbiʼi xúgi̱ ‹nanigu̱u̱nʼ wéñuʼ mbújkha̱a̱› ga̱jma̱a̱ rí mutsi xúgíʼ rí nandúún (2 Tim. 3:2). Jesús ndiʼyoo rí xa̱bi̱i̱ gámiin majngutíguíin náa tsáʼkhá rígi̱, ikha jngó niʼthí: “Nimbáa xándoo mani̱ndxu̱u̱ ñumbáá náa inún a̱jmi̱i̱n patrón; numuu rí mbáa mawiyuʼ kaʼyoo ga̱jma̱a̱ imba̱a̱ ma̱ndoo kaʼyoo, o maxtáa ga̱jma̱a̱ mbáa ga̱jma̱a̱ maniñuʼ mbáa. Xándoo ikháanʼ mani̱ndxa̱la ñumbáá náa inuu Dios ga̱jma̱a̱ náa Riquezas” (Mat. 6:24). Bi̱ ndaʼyamajkuu Dios ga̱jma̱a̱ ikhú má najmuu mbiʼi ga̱jma̱a̱ tsiakii ndrígóo mu mbayáaʼ magiʼdoo wéñuʼ mbújkha̱a̱ xtáa rasngájma rí naʼni ñajúúnʼ a̱jmi̱i̱n patrón. Raʼkháa mbáwíi Jeobá xtáa raʼyamajkhuu.

6. Dí gándoo gajmañulú ga̱jma̱a̱ numuu rí Jesús niʼthún bi̱ nikúwá náa congregación Laodicea rá.

⁶ Índo̱ na̱jkha̱ rámbáa siglo timbá, cristianos bi̱ nikúwá náa congregación náa xuajen Laodicea nunimbaʼumíjna̱ rí guaʼdáá wéñuʼ mbujkha̱a̱, niguáʼdáá wéñuʼ rí asndu nándáa rí ndiñúunʼ. Mú náa iduu Jeobá ga̱jma̱a̱ Jesús nindxu̱ún xa̱bu̱ ngíníi, na̱nguá edxuu a̱jkiu̱ún, kúgoo idún ga̱jma̱a̱ asndu nda̱a̱ xtíñún. Jesús táxprigún numuu rí guáʼdáá  wéñuʼ, niʼni numuu dí rúʼko̱ naʼni gachúu rí mambaxúún gajmiún Jeobá (Apoc. 3:14-17). Á mu nduʼyáá rí náa awúu̱n a̱jkiu̱lú na̱jkha̱ ragiwanʼ rí nandulú maguaʼdáá, mbá nacha̱ gúriʼyáaʼ ku̱ma̱ rúʼko̱ (1 Tim. 6:7, 8). Á mu rí tséʼni̱lú, a̱jkiu̱lú markuájiminaʼ ga̱jma̱a̱ Jeobá xagruigú rí nu̱ʼni̱, numuu rí ikhaa na̱nda̱ʼa̱ ‹mbuʼyamajkuíí mbáwíi ikhaa› (Deut. 4:24). Dí gándoo maʼni mbuʼyáá rí gíʼdoo wéñuʼ numuu mbújkha̱a̱ rá.

7-9. Ndiéjunʼ ejmañulú náa rí niʼni ndxájulú bi̱ kayá edxu̱u̱ bi̱ mbiʼyuu David rá.

⁷ Guʼyáá ga̱jma̱a̱ numuu mbáa ndxájulú bi̱ mbiʼyuu David bi̱ ka̱ya̱ edxu̱u̱ náa Guʼwá náa nagimbáanʼ náa Estados Unidos. Ikhaa ndiʼyoo rí nindxu̱u̱ mbáa bi̱ nañajunʼ májánʼ. Náa xtáa rañajunʼ ni̱jkha̱nú nigiʼdoo i̱mba̱ ñajunʼ rí itháan gíʼdoo numuu, ma̱ngaa asndu ni̱jkha̱nú nijmaʼniiʼ rí najmañuu nañajunʼ májánʼ. Ikhaa niʼthí: “xúgíʼ rí niʼngo̱o̱ nini nindxu̱u̱ numuu rí Jeobá niʼni tsájkurámúúʼ”. Mú, lá xúʼko̱ nindxu̱u̱ ráʼ.

⁸ David ni̱jkha̱nú ndiʼyoo rí ñajunʼ ndrígóo naʼni gachúu rí nambájxu̱u̱ ga̱jma̱a̱ Jeobá. Ikhaa naʼthí: “Índo̱ na̱jkhá reunión ga̱jma̱a̱ náa nataráʼa nandxa̱ʼwa̱mínáʼ má xúʼko̱ ga̱jma̱a̱ numuu xkujndu dí narígá náa nañajunʼ. Nadáaʼ mba̱a̱ mbújkha̱a̱ mú mámbá mbiʼi rí nanújngoo i̱ndó naʼni maxmiéjunʼ, ma̱ngaa nigúʼdoo xkujndu gajmuʼ a̱ʼgiu̱ʼ”.

⁹ Ikhú, David ni̱jkha̱nú ndiʼyoo rí ndayóoʼ mariʼkuminaʼ mu magíʼ maʼni ginii rí gíʼdoo itháan numuu. Ikhaa xóó naʼthí: “Niʼgíʼ mariʼkuminaʼ”. Ikha jngó niríyaʼ awan mu xáñajunʼ mba̱yu̱u̱ʼ ga̱jma̱a̱ niʼthúu̱n patrón ndrígóo. Ikhú nigajta káyuuʼ ñajunʼ ndrígóo. Mú ndiéjunʼ niʼni xá. Ikhaa naʼthí: “Rí i̱mba̱ néjtsu̱ú, nixnajxí solicitud rí mani̱ndxu̱ʼ precursor auxiliar”.  Mu ma̱ndoo maxtáa ga̱jma̱a̱ a̱ʼgiu̱u̱ niguáʼdi̱i̱ niñejunʼ náa naguma kaʼwii. Nda̱wa̱á, David nigiʼdu̱u̱ ninindxu̱u̱ precursor regular ga̱jma̱a̱ nda̱wa̱á a̱ʼgiu̱u̱ ninindxu̱u̱ ma̱ngaa. Niraʼwíi muni ñajunʼ rí mbaʼin tsínigu̱nʼ muni, mú raʼkháa rúʼko̱ rí gíʼdoo itháan numuu náa ikhiin. Maski ajndu rí nu̱da̱ʼ nindxu̱u̱ imbá chíʼgíʼ kayuuʼ ki xóo rí nu̱da̱ʼ nákha ginii, mú náa xúgíʼ igu̱nʼ rí nikúwi̱i̱n, niguaʼdáá xúgíʼ rí ndiñúnʼ. Nandún muni itháan ñajuunʼ Jeobá ki xóo eʼwáʼ ga̱jma̱a̱ niguánu ndiyáá rí Jeobá nañewu̱u̱n bi̱ nugíʼ nuni ginii ñajuunʼ ikhaa (Mat. 6:31-33).

10. Xú kaʼnii gándoo gúñewa̱a̱n a̱jkiu̱lú rá.

¹⁰ Tséniuu á mu guaʼdáá o raguáʼdáá mbújkha̱a̱, gíʼmaa má rí muñewa̱a̱n a̱jkiu̱lú. Xú káʼnii rá. Rí xánigulú maguaʼdáá wéñuʼ mbújkha̱a̱ ga̱jma̱a̱ xúniʼñáanʼ rí ñajunʼ ndrígúlú magiʼdoo itháan numuu ki xóo rí mu̱ʼni̱ ñajuunʼ Jeobá. Mu mbuʼyáá á mu rígi̱ xtáa ragíʼnulú, guraximíjna̱: “Lá nángi eʼni endxa̱ʼwa̱mínáʼ ga̱jma̱a̱ numuu ñajunʼ índo̱ xtáá náa reunión o náa nataráʼa ráʼ. Lá naxmiéjunʼ nángi eʼni ga̱jma̱a̱ xú káʼnii gakánúʼ mbújkha̱a̱ mu maxtáa ga̱jma̱a̱ nda̱wa̱á ráʼ. Lá gúʼdoo xkujndu gajmúʼ bi̱ ndi̱ya̱a̱ ga̱jma̱a̱ numuu mbújkha̱a̱ ráʼ. Lá magruígú mbá ñajunʼ rí eʼwíínʼ tsíñún gúni mu mani itháan ñajuunʼ Jeobá ráʼ.” (1 Tim. 6:9-12). Índo̱ gúraximíjnalú rígi̱, garmáʼáan a̱jkiu̱lú rí Jeobá nandoo kaʼyulú ga̱jma̱a̱ naʼthúún rígi̱ bi̱ nuni ga̱jma̱a̱ xúgíʼ a̱jkiu̱ún ñajuunʼ: “Nimbá miʼtsú xániʼñáʼ ga̱jma̱a̱ xániʼñátiga̱a̱n”. Ikha jngó apóstol Pablo nixnáa xtágabu rígi̱: “Xóo kuwáanʼ gasngájma rí tsiniguala wéñuʼ mbújkha̱a̱” (Heb. 13:5, 6).

11. Xú káʼnii gándoo maʼni gacháánʼ náa rí mu̱ʼni̱ gagimijnálú rá.

¹¹ Jeobá nandoo rí makuwáánʼ gagi, ga̱jma̱a̱ ikhaa rúʼko̱ e̱ʼni̱ índo̱ nu̱ʼni̱ gagimijná. Náa Biblia naʼthí rí “nda̱a̱ imbo̱ʼ rí itháan májánʼ rí makuiʼtsu ga̱jma̱a̱ maga̱a̱n ma̱ngaa mbaʼyoo rí májánʼ ga̱jma̱a̱ numuu ñajunʼ ndrígóo” xa̱bu̱ (Ecl. 2:24). Mú itháán mbaʼa rí xkawiʼ rígá náa rí ma̱ndoo mu̱ʼni̱ gagimijná náa dí naxnáraʼa numbaaʼ, numuu rí naʼni gachúu ku̱ma̱ ndrígu̱ún xa̱bu̱ ga̱jma̱a̱ naxkajxi̱i̱n muni rí náa Ajngáa rawunʼ Dios naʼthí dí ragíʼmaa muni.

12. Xó má eʼthí náa 1 Corintios 10:21, 22, náá numuu rí gíʼmaa muraʼwíí májánʼ náa mu̱ʼni̱ gagimijná rá.

¹² Ikháánʼ nandulúʼ rí mbáwíi Jeobá gúʼyamajkuíí, ikha jngó xándoo muphiʼtsulú náa  “mésóo Jeobá” ga̱jma̱a̱ náa “mésuún xa̱bu̱ wéñiʼ” (atraxnuu 1 Corintios 10:21, 22). * Índo̱ nuphiʼtsulú gajmiúlú mbáa nusngajmá rí nambáxu gajmiúlú. Rí muraʼwíi mbuʼyáá náa nuxmijná, náa nuni xawan, náa nubu̱únʼ xa̱bu̱ o i̱ʼwáʼ rí nagua̱ʼa̱ mu̱ʼni̱ ga̱jma̱a̱ rí mbuʼyáá xóo rígi̱ nindxu̱u̱ ikháá má xóo rí mutrigáánʼ muphiʼtsu ga̱jma̱a̱ muʼwa̱a̱n gajmiúlú bi̱ sia̱nʼ gajmíi̱n Dios. Á mu nu̱ʼni̱ xúʼko̱ mu̱ʼni̱ gachíí ku̱ma̱ ndrígúlú ga̱jma̱a̱ rí nambáxulúʼ gajmiúlú Jeobá.

13, 14. a) Xú káʼnii embríguii ganitsu ga̱jma̱a̱ gitsíin rá. b) Xó má eʼthí náa Santiago 1:14, 15, náá numuu dí ragíʼmaa mu̱ʼphu̱ rí xambáyulú rá.

¹³ Xú káʼnii gándoo gámbríguíi rí mu̱ʼni̱ gagimijná ga̱jma̱a̱ ganitsu rá. Índo̱ nuphiʼtsulú, nuñewa̱a̱n rí naphulu. Mú índo̱ ni̱ʼphu má. Nagi̱ʼdu̱u̱ má nañejunʼ ikháá náa awúnlú ga̱jma̱a̱ nda̱wa̱á nandao̱ʼ náa xúgíʼ xuyulúʼ. Rí muʼphu ganitsu rí májánʼ nambáyulú mu xáʼniulu nandii, mú á mu rí naʼphu ganitsu rí xambáyulú, maʼniulú nandii. Xáʼniulu má núkhu, magajyúuʼ índo̱ maʼniuluʼ.

¹⁴ Xúʼko̱ má kayuuʼ nindxu̱u̱ índo̱ nuraʼwíi rí nu̱ʼni̱ gagimijná ga̱jma̱a̱, nuñewa̱a̱n rí nudriʼyáʼ náa ku̱ma̱ ndrígúlú. Mú nda̱wa̱á nagi̱ʼdu̱u̱ nañejunʼ ikháá xóo endxaʼwáá edxu̱lúʼ ga̱jma̱a̱ rí nakumulú. Rí mu̱ʼni̱ gagimijnálú náa rí májánʼ naʼni rí makuwáánʼ májánʼ, mú rí mu̱ʼni̱ gagimijná ga̱jma̱a̱ rí tséjmaa maʼni gínáanʼlú (atraxnuu Santiago 1:14, 15). * Gajkhun má xákujmaa núkhu xóo eʼni gacháánʼlú, mañu mañúú gáʼga rakujmaa. Ikha jngó náa Biblia naʼthúlú: “Xájngawáanʼ: Xándoo matatsijmá náa inuu Dios. Numuu rí asndu ndiéjunʼ má rí xtáa raʼdu mbáa xa̱bu̱; rúʼko̱ má gáguxi̱i̱; bi̱ naʼni xó má eguaʼa maʼni xuyuuʼ, maʼganú magíʼnuu dí ra̱májánʼ xuyuuʼ” (Gál. 6:7, 8). Ikha jngó gíʼdoo wéñuʼ numuu rí mu̱ʼni̱ gaʼduunʼ mu̱ʼni̱ gagimijná náa rí Jeobá tsíyoo gáʼyoo (Sal. 97:10).

15. Ndiéjunʼ rí nimínáanʼlú Jeobá rá.

¹⁵ Mbaʼin xa̱bi̱i̱ Jeobá nanigu̱u̱nʼ wéñuʼ mbuyáá JW Broadcasting^®, náa canal ndrígóo televisión rí nagájnuu náa Internet. Mbáa ndxájulú bi̱ mbiʼyuu Marilyn niʼthí: “Rí nda̱yo̱o̱ Broadcasting nambáyuʼ wéñuʼ ga̱jma̱a̱ tséyóoʼ má mañewu̱u̱n rí nda̱yo̱o̱ ikhí. Índo̱ nakumuʼ rí xtáá mbáwun o índo̱ najmúʼ, naxkamaa má xúʼko̱ mbá discurso o rí nanújngoo náa adoración matutina naxnúʼ tsiakii. Rúʼko̱ nambáyuʼ mu maxtáa itháán mijngii náa Jeobá ga̱jma̱a̱ náa xuajñuu. JW Broadcasting niriʼkhuu mbá kayuuʼ xóo xtáá”. Lá kuwáánʼ rajmulú májánʼ rí namínáanʼ Jeobá ráʼ. Raʼkháa índo̱ rí nagájnuu mámbá igu̱nʼ ma̱ngaa ma̱ndoo mbuʼyáá asndu náá má mbi̱ʼi̱i̱ mbaʼa wéñuʼ videos, rí muʼdxawíín aʼwá ga̱jma̱a̱ ajmúú rí naxnúlú tsiakii.

16, 17. Náá numuu rí gíʼmaa muñewa̱a̱n wéñuʼ hora índo̱ nuʼni gagimijná ga̱jma̱a̱ xóo gándoo mu̱ʼni̱ rá.

¹⁶ Raʼkháa i̱ndó rí xóo mu̱ʼni̱ gagimijná gáʼyóoʼ muñewa̱a̱n. Ma̱ngaa ndayóoʼ muñewa̱a̱n nguáthá mba̱yu̱u̱ʼ mbiʼi ejmulú, numuu rí gámiin majmulúʼ itháan mbiʼi náa mu̱ʼni̱ gagimijná ki xóo rí mu̱ʼni̱ ñajuunʼ Jeobá. Mbaʼin naʼniún gakhi̱i̱ muriyaʼ májánʼ awan. Mbá xkri̱da, mbáa ndxájulú bi̱ gíʼdoo 18 tsiguuʼ mbiʼyuu Abigail naʼthí: “Nda̱wa̱á rí naguámboʼ niñejuunʼ, naʼni̱i̱ a̱jkiu̱ún índo̱ naʼgúnʼ nda̱yo̱o̱  tele. Mú á mu tsíñewunʼ rí nani ma̱ndoo manújngóó mba̱yu̱u̱ʼ hora mba̱yo̱o̱ tele”. Ga̱jma̱a̱ mbáa dxámá bi̱ mbiʼyuu Samuel naʼthí: “Nguáná nda̱yo̱o̱ má xúʼko̱ videos ma̱jkha̱ʼ dí rígá náa Internet, nagíʼdu̱u̱ ra̱yo̱o̱ mbóó asndu tséyóo xóo ejkha̱ ranújngoo hora índo̱ nda̱yo̱o̱ rí ndijyúʼ má mbá ajtsú o a̱jkhu̱ hora”.

¹⁷ Xú káʼnii gándoo gúñewa̱a̱n nguáthá mba̱yu̱u̱ʼ e̱ʼni̱ gagimijnálú rá. Ginii guʼyáá nguáthá mba̱yu̱u̱ʼ egajyúlú. Mbá rí mambáyulu nindxu̱u̱ rí muʼnirámáʼ náa calendario nguáthá hora ejyúlú rí mbá xmáná mu mbuʼyáá tele ga̱jma̱a̱ rí majmulúʼ internet ma̱ngaa rí nutsíin náa celular. Á mu nduʼyáá rí ndajyúlú mba̱yu̱u̱ʼ wéñuʼ, gu̱ʼni̱ míjna muriʼyáʼ mbá májánʼ awan. Ginii guʼnirámáʼ rí itháan gíʼdoo numuu ga̱jma̱a̱ nda̱wa̱á guʼyáá rí mu̱ʼni̱ gagimijná. Nda̱wa̱á, gunda̱ʼa̱a̱ Jeobá rí mambáyulúʼ muʼnimbánii awan rí niriʼyáʼ. I̱ndó xúʼko̱ muguaʼdáá mbiʼi ga̱jma̱a̱ tsiakii mu muʼnigajmaa Biblia, rí muʼnigajmaa mbá guʼwáánʼ, náa reunión ma̱ngaa rí muʼtáraʼa. Mu xúʼko̱ xáʼni gawúnlú ku̱ma̱ ndrígúlú índo̱ gúʼgua̱ gútsíin mbégu̱ʼ.

18, 19. Xú káʼnii gándoo gusngajmá rí mbáwíi Jeobá eʼyamajkuíí rá.

¹⁸ Nda̱wa̱á rí niʼthá xóo gámbáa numbaaʼ ndrígóo Satanás ga̱jma̱a̱ rí marigá náa numbaaʼ nuxi̱ʼ nda̱wa̱á, apóstol Pedro niʼthí: “A̱ngui̱nʼ bi̱ nandoʼ ka̱ya̱la, numuu rí kuwa ruguaʼti̱i̱n xúgíʼ rígi̱, guni mbá tsiakii mu ikhaa maxkamáanʼ mikaʼwáanʼ ga̱jma̱a̱ nda̱a̱ aʼkhála ga̱jma̱a̱ makuwáanʼ tsímáá” (2 Ped. 3:14). Índo̱ nuʼnimbánii xtágabu rígi̱ ga̱jma̱a̱ nuʼnimíjna̱ xó má eʼngo̱o̱ mu makuwáánʼ kaʼwu ga̱jma̱a̱ rí nu̱ʼni̱ ñajuunʼ Dios, xúʼko̱ nusngajmá rí mbáwíi Jeobá eʼyamajkuíí.

¹⁹ Gixa̱a̱ ga̱jma̱a̱ numbaaʼ ndrígóo muni má xúʼko̱ rí maʼndulú muriʼkui̱i̱ rí mbuʼyáá rí itháán gíʼdoo (Luc. 4:13). Tséʼniuu asndu xkáʼníí má xkujndu gúraʼníí, xúniʼñáanʼ rí nimbá ga̱jma̱a̱ nimbáa maʼni rí xámbáxulú gajmiúlú Jeobá. Nandulú muxnáá rí ikhaa kaʼyoo: Rí mbuʼyamajkuíí mbáwíi ikhaa.