NÁKHA tsiguʼ rí ninújngoo, mbaʼin xa̱bi̱i̱ Jeobá náa xúgíʼ numbaaʼ nindrigi̱i̱n mu muyégun edxu̱u̱ ga̱jma̱a̱ siervos ministeriales. Á mu ikháánʼ mangáán ni̱ndxa̱ʼ mbáa rí ikhiin, mbáa nadxaʼ wéñuʼ ga̱jma̱a̱ numuu nuxi̱ʼ ñajunʼ rí nijuixnáʼ.

Mú mbáa namíñaʼ, mú xúʼko̱ má ga̱ku̱ma̱ʼ. Mbáa ndxájulú dxámá bi̱ kayá edxu̱u̱ bi̱ mbiʼyuu Jason niʼthí: “Índo̱ nigiúnʼ mu mayéʼga edxu̱u̱ nikumuʼ rí xáʼngo̱ʼ gánimbánuu rí nijuixnúʼ”. Asndu Moisés ga̱jma̱a̱ Jeremías nikumu̱ún rí xáʼngu̱u̱n gunimbánii ñajunʼ rí Jeobá nixnúún muni (Éx. 4:10; Jer. 1:6). Lá niku̱ma̱ʼ ikháánʼ xúʼko̱ ráʼ. Ndiéjunʼ gándoo gátani mu xáku̱ma̱ʼ xúʼko̱ ga̱jma̱a̱ matanimbánii májánʼ ñajunʼ rí nijuixnáʼ rá. Guʼyáá mbá xkri̱da ndrígóo mbáa cristiano bi̱ nixtáa nákha siglo timbá bi̱ nigumbiʼyuu Timoteo (Hech. 16:1-3).

Mbáa Timoteo gíʼdoo 20 tsiguʼ índo̱ Pablo niʼthúu̱n maʼga̱ ga̱jma̱a̱ náa i̱ʼwáʼ xuajen. Numuu rí xóó dxámá, mbáa namíñuu ga̱jma̱a̱ naʼniuu mingíjyúuʼ maʼni imbo̱o̱ nuxi̱ʼ ñajunʼ náa congregación (1 Tim. 4:11, 12; 2 Tim. 1:1, 2, 7). Mú tsiguʼ nda̱wa̱á, Pablo niʼthún a̱ngiu̱lú bi̱ kuwa náa congregación ndrígóo Filipos: “Nagúʼthu̱u̱n náa Señor Jesús rí imbá chíʼgíʼ tígo̱o̱ rí makuʼmáa Timoteo [...]. Numuu rí na̱nguá gúʼdaa imba̱a̱ xóo ikhaa” (Filip. 2:19, 20).

Xú káʼnii ni̱jkha̱nú ninindxu̱u̱ Timoteo mbáa májaanʼ bi̱ kayá edxu̱u̱ rá. Mbuʼyáá majun enii náa rí Timoteo nigíʼ májánʼ xkri̱da.

1. Nixmiéjunʼ gajkhun kaʼñún eʼwíínʼ. Pablo niʼthún a̱ngiu̱lú bi̱ kuwa Filipos rí Timoteo gajkhun nixmiéjunʼ kaʼñún (Filip. 2:20). Xúʼko̱, Timoteo phú gajkhun nixmiéjunʼ kaʼñún xa̱bu̱. Nindoo maxnún tsiakii eʼwíínʼ ga̱jma̱a̱ numuu Ajngá rawunʼ Dios ga̱jma̱a̱ nindoo maʼni gínaminaʼ ga̱jma̱a̱ numún ikhiin.

Xáni̱ndxa̱ʼ xóo bi̱ na̱jkha̱ kayóo autobús bi̱ naxmiéjunʼ itháan mu maʼga̱nú nacha̱ ki xóo rí maguxi̱i̱n xa̱bu̱. William, mbáa bi̱ kayá edxu̱u̱ bi̱ naʼni má mbá skíñúʼ tsiguʼ rí xtáa raʼni ñajunʼ rígi̱, naʼthúún bi̱ nundrigú mbá ñajunʼ: “Ataniu̱u̱n rí májánʼ a̱ngiu̱lú. Atayáá rí nda̱ñúnʼ ki xóo rí matríyaʼ májánʼ awan o ma̱ta̱ya̱a̱ xóo eguma ñajunʼ náa congregación”.

2. Nigíʼ ginii ñajunʼ Dios. Pablo niʼthí rí Timoteo ninindxu̱u̱ mixtiʼkuii: “Numuu rí eʼwíínʼ i̱ndó nduyááʼ rí nandún ikhiin, raʼkháa rí nandoo Cristo Jesús” (Filip. 2:21). Pablo ndiʼyoo rí a̱ngiu̱lú bi̱ kuwa náa Roma, náa rí ikhaa niʼnirámáʼ ajngáa rígi̱, i̱ndó nindxa̱ʼwa̱míjna̱ ga̱jma̱a̱ numún ikhiin. Asndu túni tsiakimijna muni ñajunʼ Dios. Mú Timoteo táʼni rúʼko̱. Índo̱ nirígá i̱ʼwáʼ ñajunʼ náa miʼtáraʼa, ikhaa niʼthí xóo Isaías: “¡Gi̱jyooʼ xtáá ikhúúnʼ! Ataxúʼmún ikhúúnʼ” (Is. 6:8).

Xú káʼnii gándoo gátani xó má kaʼyoo ñajunʼ ndrígáʼ ga̱jma̱a̱ rí xtaʼdáá náa congregación rá. Ginii atayáá májánʼ ndiéjunʼ rí itháan gíʼdoo numuu. Pablo niʼthí rí ndayóoʼ mbuʼyáá ndiéjunʼ nindxu̱u̱ “rí itháan gíʼdoo numuu” (Filip. 1:10). Atagíʼ matani má xúʼko̱ rí Dios ndaʼyoo rí gíʼdoo itháan numuu. Raga̱jma̱, atriʼkhu̱u̱ xóo maraxtaa.  Atani gaʼduunʼ xúgíʼ rí naríya kaʼyaʼ mbiʼi ga̱jma̱a̱ tsiakii. Pablo nixnúu xtágabu Timoteo: “Atani gaʼduunʼ rí nagua̱ʼa̱ muni jiáma ga̱jma̱a̱ wa̱ʼxa̱ʼ, ayuʼ kidxuuʼ rí jmbu, náa fe, náa ngajua, náa tsímáá” (2 Tim. 2:22).

3. Niñajunʼ gakhi̱i̱ mu maʼni ñajunʼ Jeobá. Pablo niʼni marmáʼáan a̱jkiu̱ún filipenses: “Mú ikháanʼla ndu̱ya̱a̱ má rí ikhaa [Timoteo] nixnáximinaʼ, xó má mbáa ada̱ ga̱jma̱a̱ anu̱u̱ niñajunʼ ga̱jma̱á ni̱ndxu̱ʼ mu maʼga̱ rajoo ajngáa rí májánʼ” (Filip. 2:22). Timoteo na̱nguá niskhoo. Ikhaa ga̱jma̱a̱ Pablo niñajunʼ gakhi̱i̱ ga̱jma̱a̱ rígi̱ niʼni rí mambaxúún itháan májánʼ.

Rígá mbaʼa ñajunʼ rí ikháánʼ ma̱ndoo matani náa xuajñu Dios, ñajunʼ rí maʼni maraxtaa tsímáá ga̱jma̱a̱ mambaxáʼ gajmiáanʼ a̱ngiu̱lú. Ikha jngó, ataniminaʼ matani má xúʼko̱ “ñajunʼ ndrígóo Señor” (1 Cor. 15:58).

4. Nigíʼ niʼni rí nijmañuu. Pablo niʼnirámáʼ náa Timoteo: “Ikháánʼ na̱dxu̱ʼ ratani̱ xóo esngáa ikhúúnʼ, xóo xtáá, rí nandoʼ mani, fe ndrígóʼ, rí naʼngo̱o̱ a̱jkiu̱nʼ, ngajua ndrígóʼ, rí naʼngoʼ” (2 Tim. 3:10). Numuu rí Timoteo nigíʼ niʼni rí nijmañuu, niʼnimbánuu xúgíʼ mu magruigú itháan ñajunʼ (1 Cor. 4:17).

Lá xtáa mbáa ndxájulú bi̱ itháan najmañuu bi̱ ma̱ndoo maxnáʼ xtágabu ráʼ. Á mu na̱nguá, náa numuu rí tsetayááʼ mbáa rá. Tom, bi̱ kayá edxu̱u̱ mba̱yu̱ʼ tsiguʼ, narmáʼáan a̱jkiu̱u̱n: “Mbáa bi̱ kayá edxu̱u̱ bi̱ najmañuu wéñuʼ nixmiéjunʼ kaʼyoʼ ga̱jma̱a̱ ikhaa niʼsngóʼ. Nando̱ʼo̱o̱ má xúʼko̱ xtágabu ga̱jma̱a̱ naʼgíʼ nani má xúʼko̱. Rúʼko̱ nimbáyuʼ mú xamínuʼ”.

5. Ni̱jkha̱ rajmañuu má xúʼko̱ ga̱jma̱a̱ numuu Dios. Pablo nixnúu tsiakii Timoteo rí maʼnirataminaʼ mu mbaʼyamajkuu “má xúʼko̱ Dios” (1 Tim. 4:7). Mbáa bi̱ nagáyúu ma̱ndoo magiʼdaa mbáa bi̱ naʼsngóo, mú ma̱ngaa mbaʼyóoʼ maʼnirataminaʼ mbáwíi. Pablo niʼthúu̱n Timoteo: “Atraxnuu má xúʼko̱ náa kuwa mbaʼin xa̱bu̱, araxnún tsiakii, arasngúún [...]. Atatsaʼwáminaʼ ga̱jma̱a̱ numuu rígi̱; atagíminaʼ matanimbánii, mú xúgínʼ gúyáá rí natani itháan májánʼ” (1 Tim. 4:13-15).

Ikháánʼ mangáán ndayóoʼ majmañaaʼ itháan. Xátatsiʼñáʼ rajmañaʼ má xúʼko̱ ga̱jma̱a̱ numuu Dios. Ataniminaʼ mu majmañaaʼ xú káʼnii nindxu̱u̱ xuajñu Jeobá. Atiewumínaʼ rí xáku̱ma̱ʼ rí najmañaʼ wéñuʼ. Xáku̱ma̱ʼ rí numuu rí najmañaʼ wéñuʼ ma̱ndoo matanimbánii asndu xú káʼnii má xkujndu rí asndu xátriyaʼ mbiʼi mu matanigajmaa májánʼ. Xó má Timoteo, atagíʼ edxa̱ʼ majmañaaʼ má xúʼko̱ rí najuiʼsngáʼ (1 Tim. 4:16).

6. Nikumu̱u̱ kaʼyoo ikha rí na̱ʼkha̱ náa xi̱ʼ ndrígóo Jeobá. Rí mundxaʼwamíjna̱ náa ñajunʼ rí niʼni Timoteo, Pablo niʼni marmáʼáan a̱jkiu̱u̱n: “Atie̱wa̱a̱n rígi̱ rí gíʼdoo numuu rí nixnangawaaʼ, atiéxi̱ ngajua̱a̱ ga̱jma̱a̱ xi̱ʼ kaʼwu dí rígá náa ikháanʼlu” (2 Tim. 1:14). Mu “mixtagixi̱i̱” ñajunʼ ndrígóo o mañawu̱u̱n, Timoteo ndiyóoʼ maku̱mu̱u̱ kaʼyoo ikha rí na̱ʼkha̱ náa xi̱ʼ kaʼwu.

Donald, bi̱ mba̱yu̱ʼ tsiguʼ má nindxu̱u̱ bi̱ kayá edxu̱u̱, naʼthí: “A̱ngiu̱lú bi̱ kuya̱ edxu̱u̱ gíʼmaa muxnáá numuu ga̱jma̱a̱ muñewa̱a̱n rí nambáxu̱u̱n gajmiún Dios, xúʼko̱ gáʼga raʼni itháan gujkhunʼ. Á mu nunda̱ʼa̱ ikha rí na̱ʼkha̱ náa xi̱ʼ ndrígóo Dios ga̱jma̱a̱ á mu nugíʼ nuni rí naxná xi̱ʼ kaʼwu, rígi̱ mambáñun a̱ngiu̱lú” (Sal. 84:7; 1 Ped. 4:11).

Naʼgui̱i̱ índo̱ nduʼyáá rí mbaʼin a̱ngiu̱lú nundrígú mbá ñajunʼ ga̱jma̱a̱ kuwa rajmañún má xúʼko̱ muni ñajunʼ Dios, xó má ikháánʼ. Jason, bi̱ niʼthá ga̱jma̱a̱ numuu nákha ginii náa artículo má rígi̱, naʼthí: “Xúgíʼ tsiguʼ rí xtáá rañajunʼ xóo bi̱ kayá edxu̱u̱ nijmañuʼ wéñuʼ ga̱jma̱a̱ xúgi̱ nánguá miñuʼ. Nanigu̱ʼ wéñuʼ ñajunʼ rí gúʼdoo ga̱jma̱a̱ nda̱yo̱o̱ xóo mbá ñajunʼ rí gíʼdoo numuu”.

Ikháánʼ rá. Lá mi̱dxu̱ʼ rajmañaʼ má xúʼko̱ ga̱jma̱a̱ numuu Dios ráʼ. Atagíminaʼ matani xóo xkri̱da rí nigíʼ Timoteo. Xúʼko̱ gándoo gátayambáá náa xuajñu Jeobá.