1-3. a) Xú káʼnii xkujndu eraʼníí xúgínʼ jiáma ga̱jma̱a̱ wa̱ʼxa̱ʼ, ga̱jma̱a̱ xú káʼnii xkri̱da embánii ga̱jma̱a̱ rá. (Atayáá timbá xtiʼkhu.) b) Ndiéjunʼ gándoo gúni jiáma ga̱jma̱a̱ wa̱ʼxa̱ʼ bi̱ ni̱ndxu̱ún cristianos mu muraʼníí xkujndu rígi̱ xá.

ATATSAʼWÁMINAʼ rí mi̱dxu̱ʼ mitsínguánʼ ga̱jma̱a̱ autobús náa marigá mbá rí gíʼdoo wéñuʼ numuu. Índo̱ nadxuʼnú náa naguajun autobús, naʼniaʼ tsiánguá índo̱ natayáá rí mbaʼin wéñuʼ xa̱bu̱ kuwa ga̱jma̱a̱ wájun mbaʼa autobús. Mú natayáá májánʼ náa eyaʼ gídxúʼ, nadxuʼ náa autobús rí maʼga̱ kañán ikhí. Ikháánʼ xátsimaʼ náa mbá autobús rí maʼga̱ kañán i̱mba̱ níʼkhá.

² Vida nindxu̱u̱ xóo rí mi̱dxu̱ʼ mitsínguánʼ, ga̱jma̱a̱ jiáma ga̱jma̱a̱ wa̱ʼxa̱ʼ ni̱ndxu̱ún xóo xa̱bu̱ bi̱ kuwa náa guáʼthi̱i̱n autobús. Numuu rí guáʼdáá mbaʼa rí muraʼwíí muni náa vida ndrígu̱ún, mbáa nguáná naʼni mingíjyúuʼ mbuyáá rí muni. Mú á mu nduyáá májánʼ náa nandún magún, xáʼniun mingíjyúuʼ muraʼwi̱i̱ náa magún.

³ Náa artículo rígi̱ naxkaxi̱i̱n jiáma ga̱jma̱a̱ wa̱ʼxa̱ʼ mu mugíʼ muni rí naniguʼ Jeobá. Rígi̱ nandoo gáʼthúu̱n rí mugíʼ ginii Jeobá náa xúgíʼ rí muni xóo rí munigajmaa, náa muñajunʼ ga̱jma̱a̱ náa  guʼwún. Ma̱ngaa nandoo gáʼthúu̱n rí mugímijna muni itháan ñajunʼ Jeobá. Jiáma ga̱jma̱a̱ wa̱ʼxa̱ʼ bi̱ nugíʼ muni itháan ñajunʼ Jeobá mbuyáá májánʼ rí ikhaa maʼni tsajkurámiinʼ ga̱jma̱a̱ makuwá májánʼ (atraxnuu Proverbios 16:3). *

4. Ndiéjunʼ gúʼyáá náa artículo rígi̱ rá.

⁴ Rí mataʼgíʼ matani ñajunʼ Dios nindxu̱u̱ mbá májánʼ awan rí natraʼwíí matani. Náa numuu rá. Náa artículo rígi̱ mbuʼyáá ajtsú numuu. Rí a̱jma̱ rí na̱ʼkha̱ ginii masngájmáʼ rí mataʼgíʼ matani ñajunʼ Dios mambáyaʼ mambaxáʼ itháan májánʼ ga̱jma̱ʼ Jeobá. Ga̱jma̱a̱ dí ragajtsú masngájmaaʼ xú káʼnii gambáyaʼ rí mataʼgíʼ matani nákha xóó dxámá ni̱ndxa̱ʼ.

5. Náa biʼyaa nindxu̱u̱ timbá numuu rí gíʼmaa mataʼgíʼ matani itháan ñajunʼ Jeobá rá.

⁵ Timbá numuu rí mataʼgíʼ matani ñajunʼ Jeobá nindxu̱u̱ rí matasnga̱jmáá rí naraxnáa núma̱aʼ numuu rí nandoo kaʼyaʼ ga̱jma̱a̱ xúgíʼ rí niʼni ga̱jma̱á numaaʼ. Mbáa xa̱bi̱i̱ Dios niʼnirámáʼ: “Májánʼ rí muxnáa núma̱aʼ Jeobá”. Ga̱jma̱a̱ xóó niʼthí: “Numuu rí nitani̱ maʼdxuʼ, oh Jeobá, ga̱jma̱a̱ numuu ñajunʼ ndrígáʼ; rí nitani̱ ga̱jma̱a̱ ñawáanʼ naʼni mandxa̱ʼwa̱ ga̱jma̱a̱ gagi” (Sal. 92:1, 4). Dxámá, atatsaʼwáminaʼ náa xúgíʼ rí Jeobá nixnáʼ: Vida, rí matatsiʼnííʼ ikhaa ga̱jma̱a̱ rí gajkhun, Biblia, congregación ga̱jma̱a̱ mbá rí májánʼ rí muguaʼthi̱i̱n nda̱wa̱á. Á mu natagíʼ ginii ñajunʼ Jeobá matasngajmáá rí naraxnáa núma̱aʼ, ga̱jma̱a̱ mambaxáʼ itháan májánʼ ga̱jma̱ʼ.

6. a) Xú káʼnii eñambáá rí matani itháan ñajunʼ Jeobá rí nambáxaʼ ga̱jma̱ʼ xá. b) Ndiéjunʼ meta rí gándoo gátaʼgíʼ matani índo̱ ni̱ndxa̱ʼ itháan chíʼgínʼ rá.

⁶ Raga̱jma̱ numuu nindxu̱u̱ rí índo̱ nataniminaʼ matani itháan ñajunʼ Jeobá, natani rí májánʼ rí Jeobá ndaʼyoo. Ga̱jma̱a̱ rúʼko̱ naʼni rí mambaxáʼ itháan májánʼ ga̱jma̱ʼ. Ga̱jma̱a̱ apóstol Pablo niʼthí rígi̱: “Dios na̱nguá ni̱ndxu̱u̱ ra̱májáánʼ mu mambumuu ñajunʼ rí nunila ga̱jma̱a̱ rí nisngajmá rí nanga̱jua̱la ku̱ya̱a̱ mbiʼyuu índo̱ nini ñajunʼ” (Heb. 6:10). Asndu bi̱ itháan majkhinʼ ma̱ndoo maguaʼdaa metas. Atayáá tikhuu xkri̱da rígi̱: Christine nigiʼdoo 10 tsiguʼ índo̱ nigíʼ niguxnuu má xúʼko̱ historia ndrígu̱ún xa̱bi̱i̱ Jeobá bi̱ nikuwa jmbu. Toby nigiʼdoo 12 tsiguʼ índo̱ nigíʼ meta mu maguxnuu xúgíʼ Biblia nákha xóó tséjngúun iyááʼ. Maxim nigiʼdoo 11 tsiguʼ ga̱jma̱a̱ ndxájuu Noemí nigiʼdoo 10 tsiguʼ índo̱ nijngún iyááʼ. Ikhú nigíʼdi̱i̱ muñajunʼ mu muxkamaa meta rí magún guñajunʼ náa Betel. Mu xagumún rúʼko̱ nigiʼma náa pared ndrígóo guʼwún mbá solicitud ndrígóo Betel. Rígáa ikháánʼ rá. Ndíjkha jngó tsitatsaʼwáminaʼ ga̱jma̱a̱ mbá meta rí gíʼdoo numuu ga̱jma̱a̱ nda̱wa̱á mataʼgíʼ matanimbánii rá. (Atraxnuu Filipenses 1:10, 11.) *

7, 8. a) Náa numuu rí ma̱ndoo muʼthá rí maraʼdáá metas xáʼniaʼ mingíjyúuʼ matraʼwíí rí matani rá. b) Náa numuu rí mbáa dxáʼgú táraʼwíí maʼnigajmaa náa universidad rá.

⁷ Guʼyáá ragajtsú numuu rí gíʼmaa maraʼdáá metas. Índo̱ nindxaʼ dxámá mbaʼyóoʼ matraʼwi̱i̱ ndiéjunʼ gátanigajmaa, náa gatiejunʼ ga̱jma̱a̱ i̱ʼwáʼ. Rí matraʼwi̱i̱ matani nindxu̱u̱ xóo mbá kamba̱a̱ rí naguiʼtóo. Á mu natayáá májánʼ náa eyaʼ gídxúʼ xáʼniaʼ mingíjyúuʼ matraʼwi̱i̱ náa gídxúʼ. Ikháá kayúʼ nindxu̱u̱ rí ma̱ta̱ya̱a̱ májánʼ metas ndrígáʼ, xáʼniaʼ mingíjyúuʼ rí gátraʼwíí matani. Proverbios 21:5 naʼthí: “Awan rí nagájnuu tsumáá magajnúu májánʼ”. Á mu itháan nacha̱ gatríyaʼ awan ga̱jma̱a̱ natraʼwíí májánʼ metas, itháan nacha̱ gambáyaʼ. Rígi̱ nindxu̱u̱ rí nigíʼnuu mbáa dxáʼgú bi̱ mbiʼyuu  Damaris índo̱ ndiyóoʼ maraʼwíí mbá rí gíʼdoo wéñuʼ numuu maʼni.

⁸ Damaris niguámbóo niʼnigajmaa preparatoria ga̱jma̱a̱ niríyaʼ májánʼ calificación. Ikhaa ma̱ndoo magruigú mbá beca mu maʼnigajmaa Derecho náa universidad mú niraʼwíí mañajunʼ náa tsédaʼ mba̱a̱ mbújkha̱a̱. Náa numuu rá. Ikhaa naʼthí: “Ikhúúnʼ nindoʼ mani̱ndxu̱ʼ precursora. Ikha jngó ndiyóóʼ mbaʼyááʼ mbá ñajunʼ náa xáñajunʼ kañiʼ mbiʼi. Á mu ninigajmaa Derecho, mbáa ma̱ndoo madaʼ mba̱a̱ mbújkha̱a̱, mú xándoo mañajunʼ tapa mbiʼi”. Rí mbiʼi xúgi̱ Damaris naʼni mbá skíñúʼ tsiguʼ rí nindxu̱u̱ precursora. Lá nagáwiinʼ a̱jkiu̱u̱n rí niraʼwíí maʼni nákha ninindxu̱u̱ dxáʼgú xáʼ. Na̱nguá. Ikhaa naʼthí: “Náa ñajunʼ rí gúʼdoo, naniʼnúnʼ májánʼ abogados bi̱ kuwa runi ñajunʼ rí ikhúúnʼ gáni á mu ninigajmaa Derecho. Mú mbaʼin na̱nguá kuwa tsímáá ga̱jma̱a̱ ñajunʼ rí nuni. Ga̱jma̱a̱ numuu rí ikhúúnʼ niraʼwi̱i̱ mani̱ndxu̱ʼ precursora na̱nguá xtáá xúʼko̱ ga̱jma̱a̱ xtáá tsímáá náa xúgíʼ tsiguʼ rí xtáá rani ñajunʼ Jeobá”.

9. Náa numuu rí ndayóoʼ muʼthúún jiáma ga̱jma̱a̱ wa̱ʼxa̱ʼ rí májánʼ eni xá.

⁹ Náa congregación dí rígá náa xúgíʼ numbaaʼ, kuwa mbaʼin jiáma ga̱jma̱a̱ wa̱ʼxa̱ʼ bi̱ nda̱ñúnʼ rí muʼthúún rí májánʼ eni numuu rí nuni ñajunʼ Jeobá ga̱jma̱a̱ xúgíʼ a̱jkiu̱ún. Nakuwa tsímáá, mú ma̱ngaa nuniñami̱jna̱ maxnún ikha ndrígóo Jeobá náa xúgíʼ rí gúni, náa nunigajmaa, náa ñajunʼ ga̱jma̱a̱ náa guʼwún. Rey Salomón nixná xtágabu rí gíʼmaa makumulú kuʼyáá Jeobá ga̱jma̱a̱ xúgíʼ a̱jkiu̱lú. Ma̱ngaa niʼthí: “Xúgíʼ dí gátani garmáʼáan a̱jkia̱nʼ gáʼni Jeobá, ikhaa má gáʼni jmbu kamba̱a̱ʼ” (Prov. 3:5, 6). Jeobá ndaʼñún rí jiáma ga̱jma̱a̱ wa̱ʼxa̱ʼ bi̱ ni̱ndxu̱ún cristianos guáʼdáá wéñuʼ numún. Ikhaa nandoo kaʼñún wéñuʼ ga̱jma̱a̱ nañewu̱u̱n, naxnún ikha ga̱jma̱a̱ naʼni tsajkurámiinʼ.

10. a) Náa numuu rí gíʼmaa magiʼdoo itháan numuu rí marataráʼa rá. b) Ndiéjunʼ gambáyaʼ marataráʼa itháan májánʼ rá.

¹⁰ Á mu mbáa dxámá nandoo maʼni rí naniguʼ Jeobá, gíʼmaa mbaʼyoo rí gíʼdoo numuu maʼtáraʼa. Jesucristo niʼsngáa rí ñajunʼ rígi̱ gíʼmaa miʼtáraʼa nacha̱ índo̱ niʼthí: “Ndaʼyo ri huapa miʼtaraʼa apa ajnga ri majan” (Mar. 13:10). Xó má tayáá rí marataráʼa gíʼmaa magiʼdoo itháan numuu náa ikháánʼ. Ikha jngó, lá nitatsaʼwáminaʼ rí gíʼmaa mataʼgíʼ meta rí marataráʼa má xúʼko̱ o manindxa̱ʼ precursor ráʼ. Ndiéjunʼ gátani á mu tsínigua̱ʼ wéñuʼ marataráʼa rá. Ga̱jma̱a̱ ndiéjunʼ gambáyaʼ mu marata̱ rí májánʼ ga̱jma̱a̱ numuu Jeobá rá. Atagíʼ matani a̱jma̱ eni rígi̱: Atani̱rataminaʼ májánʼ, ga̱jma̱a̱ xátatsiʼñáʼ raratún eʼwíínʼ rí najmañaʼ. Maʼniaʼ tsiánguá índo̱ gáta̱ya̱a̱ xú káʼnii eʼni maraxtaa tsímáá rí natani rígi̱.

11, 12. a) Ndiéjunʼ gándoo gúni jiáma ga̱jma̱a̱ wa̱ʼxa̱ʼ mu makuwá xawii mu mutaraʼa xá. b) Xú káʼnii awan niríyaʼ mbáa dxámá mu maʼthí ga̱jma̱a̱ numuu Jeobá náa escuela rá.

¹¹ Ma̱ndoo matatsaʼwa̱a̱ edxa̱a̱ʼ xú káʼnii gátriʼña̱a̱ mbá graxe̱ rí gúniaʼ bi̱ natanigajmaa gajmiáanʼ. Náa ináa ndrígúlú jw.org ga̱jma̱a̱ náa i̱ʼwáʼ i̱yi̱i̱ʼ na̱ʼkha̱ artículo rí nambáñun jiáma muxkamaa rí naxtiʼña̱a̱ náa graxe̱ ndrígu̱ún. Mbá xkri̱da, xóo graxe̱ rígi̱: Náa numuu rí natanimbaaʼ náa Dios rá. Náa folleto rí nagumbiʼyuu Najuixtiʼña̱a̱ 10 graxe̱ rí nuni jiáma jma̱a̱ wa̱ʼxa̱ʼ náa artículo Ndiéjunʼ gáni á mu nutsudún mabo̱ʼ gajmíi̱nʼ xá. Rígi̱ mambáyaʼ matanirataminaʼ mu ma̱ta̱ya̱a̱ ndiéjunʼ gátriʼña̱a̱.

¹² Índo̱ gáʼndoo, arathún bi̱ natanigajmaa gajmiáanʼ rí magún náa ináa jw.org. Ikhaa rúʼko̱ rí niʼni Lucas * mbá mbiʼi rí náa clase ndrígóo kuwa ruti ga̱jma̱a̱ numuu mbaʼa religión. Ikhaa ndiʼyoo rí náa libro rí kuwa ruyáá  naʼthí mbaʼa dí ragájkhun ga̱jma̱a̱ numún xa̱bi̱i̱ Jeobá. Maski ajndu ikhaa namiñuu, nindo̱ʼo̱o̱ maestra ndrígóo mu maniñuʼ maʼthí náa numuu rí libro rúʼko̱ naʼthí dí ragájkhun. Ikhaa niʼthí rí najmañuu náa inún xúgínʼ ga̱jma̱a̱ nisngájmun ináa ndrígóo Internet. Maestra niniñuʼ tarea rí mbuyáá video Xú gátambáyuminaʼ rí asndu xátanigawíínʼ nimbáa. Lucas nidxuu wéñuʼ numuu rí nindoo niʼthí ga̱jma̱a̱ numuu Jeobá.

13. Náa numuu dí ragíʼmaa makáguabáanʼ índo̱ natraʼníí xkujndu rá.

¹³ Xakaguabáanʼ á mu náa vida ndrígáʼ natraʼníí xkujndu rí maʼni mingíjyúuʼ mataxkamaa metas ndrígáʼ. Ataniminaʼ má xúʼko̱ mu mataxkamaa rí nandaʼ (2 Tim. 4:2). Ikhaa rúʼko̱ rí niʼni Katharina. Índo̱ nigiʼdoo 17 tsiguʼ, nigíʼ niʼtáruʼun xúgínʼ bi̱ nañajunʼ gajmíi̱n. Mbáa rí ikhiin niʼthá wéñuʼ mbaʼa nuthu, mú ikhaa támiñuu. Hans bi̱ nañajunʼ ga̱jma̱a̱, niguanúu tsiánguá índo̱ ndiʼyoo rí májánʼ xa̱bu̱ nindxu̱u̱. Nda̱wa̱á nigíʼdu̱u̱ niguxnuu i̱yu̱lú, nigíʼdi̱i̱ nisngáá ga̱jma̱a̱ numuu Biblia ga̱jma̱a̱ nijngúun iyááʼ. Katharina táʼyoo nditháan ga̱jma̱a̱ numuu rígi̱ numuu rí ni̱jkha̱ gáxtáa i̱mba̱ níʼkhá. Gu̱wa̱ʼ i̱jtsu̱ tsiguʼ nda̱wa̱á, índo̱ xtáa náa Guʼwá nagimbáanʼ gajmíi̱n bi̱ kuwa náa goʼwóo, niʼniuu tsiánguá índo̱ ndiʼyoo rí Hans nindxu̱u̱ bi̱ maxná discurso público. Rígi̱ nirígá ga̱jma̱a̱ numuu rí ikhaa tániñuʼ raʼtáruʼun bi̱ nañajunʼ gajmíi̱n.

14, 15. a) Ndiéjunʼ gáʼyóoʼ ma̱ta̱ya̱a̱ májánʼ índo̱ eʼwíínʼ gutsudáán rá. b) Ndiéjunʼ gándoo gátani á mu eʼwíínʼ xa̱bu̱ nutsudáán rá.

¹⁴ Asndu xúgi̱, náa artículo rígi̱ nixnáʼ tsiakii mu mataʼgíʼ matani itháan ñajunʼ Jeobá ga̱jma̱a̱ rí naniguʼ. Mbáa eʼwíínʼ jiáma bi̱ mbóó tsiguaʼ gajmiáanʼ nuni gagimijná má xúʼko̱ ga̱jma̱a̱ nutha̱nʼ matani xóo eni ikhiin. Xúgi̱ o nda̱wa̱á, mbaʼyóoʼ matasnga̱jmá á mu gajkhun nandaʼ matani itháan ñajunʼ Jeobá. Xátatsiʼñáʼ rí eʼwíínʼ muni jngaríga̱a̱n. Atatsaʼwáminaʼ ga̱jma̱a̱ numuu xkri̱da ndrígóo náa naguanu autobús. Mbáa gajkhun rí nimbáa xatsimuu náa mbá autobús i̱ndó numuu rí nakujmaa rí xa̱bu̱ bi̱ nagún ikhí kuwa gagi.

¹⁵ Rígá mbaʼa rí ma̱ndoo matani mu matraʼníí rí nutsudán matani jiáma bi̱ mbánii tsiguaʼ gajmiáanʼ. Mbá xkri̱da, atani gaʼduunʼ rí natayáá  rí maʼniaʼ majpátriguiin náa tsáʼkhá (Prov. 22:3). Ga̱jma̱a̱ atatsaʼwáminaʼ dí ra̱májánʼ kayuʼ rí gatraʼníí á mu natani dí raʼkhí (Gál. 6:7). Ma̱ngaa mambáyaʼ ma̱ta̱ya̱a̱ rí ndayóoʼ mumbayááʼ eʼwíínʼ xa̱bu̱. Á mu ni̱ndxa̱ʼ mbáa xa̱bu̱ guabaaʼ, matrigú ga̱jma̱a̱ májánʼ xtágabu rí gáxnáʼ ana̱ʼ ga̱jma̱a̱ rudáaʼ ga̱jma̱a̱ eʼwíínʼ cristianos bi̱ najmañún wéñuʼ (atraxnuu 1 Pedro 5:5, 6). *

16. Arathá mbá xkri̱da náa nasngájma ndíjkha jngó gíʼdoo wéñuʼ numuu manindxa̱ʼ xa̱bu̱ guabaaʼ.

¹⁶ Guʼyáá ga̱jma̱a̱ numuu mbáa dxámá bi̱ mbiʼyuu Christoph, bi̱ ninindxu̱u̱ xa̱bu̱ guabaaʼ, bi̱ nigruigú xtágabu rí nixnáá. Nguáthá mbiʼi nda̱wa̱á rí nijngúun iyááʼ ni̱jkha̱ náa mbá gimnasio. Ikhí, eʼwíínʼ jiáma nitháán marígu mbiʼyuu mu maʼtsíin. Ikhaa niʼthúu̱n mbáa bi̱ kayá edxu̱u̱, ga̱jma̱a̱ ndxájulú bugi̱ niʼthúu̱n rí ginii mbaʼyóoʼ mandxaʼwáminaʼ ndiéjunʼ gamíi rí gáraʼnuu, xóo rí mbayáaʼ maʼngo̱o̱. Maski ajndu xúʼko̱, Christoph niríguminaʼ. Nda̱wa̱á ni̱jkha̱nú ndiʼyoo rí gitsíin nindxu̱u̱ ra̱májánʼ wéñuʼ. Niʼthún rígi̱ mbaʼin a̱ngiu̱lú bi̱ kuya̱ edxu̱u̱ ga̱jma̱a̱ xúgínʼ nixnáá xtágabu rí na̱ʼkha̱ náa Biblia. Ikhaa naʼthí: “Jeobá nikunguinʼ a̱ngiu̱lú mu muxnuʼ mbá májánʼ xtágabu, maski ajndu niʼníí nithu̱nʼ, nda̱wa̱á ninimbánuu”. Lá ni̱ndxa̱ʼ mbáa xa̱bu̱ guabaaʼ mu matrigú xtágabu ráʼ.

17, 18. a) Xóo eyoo Jeobá makuwa jiáma ga̱jma̱a̱ wa̱ʼxa̱ʼ rá. b) Ndiéjunʼ gándoo gátani mu xagáwiinʼ a̱jkia̱nʼ rí gátraʼwi̱i̱ xúgi̱ rí ni̱ndxa̱ʼ dxámá o dxáʼgú rá. Arathá mbá xkri̱da.

¹⁷ Jeobá naʼtháanʼ: “Dxámá, dxáʼgú araxtaa gagi, ga̱jma̱a̱ gaʼdxuu a̱jkia̱nʼ nákha xóó ñajuanʼ mbáa dxámá o mbáa dxáʼgú” (Ecl. 11:9). Ikhaa nandoo rí maraxtaa tsímáá. Náa artículo rígi̱ ndiʼyáá mbá rí xóo ma̱ndoo mataʼgíʼ matani itháan ñajunʼ Jeobá ga̱jma̱a̱ mataʼgíʼ ikhaa ginii náa xúgíʼ awan rí gatríyaʼ matani. Á mu nacha̱ gátani rígi̱ náa vida ndrígáʼ, nacha̱ gáta̱ya̱a̱ xú káʼnii Jeobá exnáʼ ikha, nañe̱wa̱nʼ ga̱jma̱a̱ naʼni tsajkurámáánʼ. Atatsaʼwáminaʼ xúgíʼ xtágabu májánʼ rí naxnáʼ náa Biblia ga̱jma̱a̱ atanimbaaʼ ajngáa rígi̱: “Garmáʼáan a̱jkia̱nʼ xtayáá Dios bi̱ Niʼnín nákha xóó nindxa̱ʼ dxámá o dxáʼgú” (Ecl. 12:1).

¹⁸ Xáni̱ndxa̱ʼ kámuu dxámá ga̱jma̱a̱ dxáʼgú. Índo̱ gáta̱ya̱a̱, xa̱bu̱ nikhi̱i̱ má ni̱ndxa̱ʼ. Phú gíná nindxu̱u̱ rí mbaʼin xa̱bu̱ guanii nagáwiinʼ a̱jkiu̱ún numuu rí metas ndrígu̱ún ninindxu̱u̱ ra̱májánʼ o túyaʼ muni nimbá rí nindxu̱u̱ májánʼ. Mú jiáma ga̱jma̱a̱ wa̱ʼxa̱ʼ bi̱ nugíʼ muni itháan ñajunʼ Jeobá makuwá itháan gagi índo̱ gáʼni xa̱bu̱ guanii. Xúʼko̱ ekumu̱u̱ Mirjana. Índo̱ ninindxu̱u̱ dxáʼgú, nijmañuu niʼtsíin májánʼ rí asndu nitháán maʼtsíin náa nawi̱i̱n bi̱ naguwáʼ mixtiʼkhu xuajen mu mutsíin. Mú ikhaa nindoo maʼni ñajunʼ Dios káxi̱. Ninújngoo itháan rí mbá skíñúʼ gu̱wa̱ʼ tsiguʼ, ga̱jma̱a̱ xóó xtáa rañajunʼ káxi̱ ga̱jma̱a̱ ajmbio̱o̱. Ikhaa naʼthí: “Rí majmaʼniún itháan, rí magúʼdoo tsiakii ga̱jma̱a̱ rí magúʼdoo wéñuʼ mbújkha̱a̱ nindxu̱u̱ metas rí na̱nguá ejyúúʼ nditháan ga̱jma̱a̱ nindxu̱u̱ ndíí. Rí phú itháan gíʼdoo numuu nindxu̱u̱ rí muʼni ñajunʼ Dios ga̱jma̱a̱ mumbáñuun xa̱bu̱ muniʼniiʼ”.

19. Ndiéjunʼ gambáyaʼ rí mataʼgíʼ matani ñajunʼ Jeobá rá.

¹⁹ Jiáma ga̱jma̱a̱ wa̱ʼxa̱ʼ bi̱ nugími̱jna̱ muni ñajunʼ Jeobá ndayóoʼ muʼthúún rí májánʼ eni maski ajndu nuraʼníí xkujndu náa vida ndrígu̱ún. Nuni tsiakimíjna̱ muni itháan ñajunʼ Jeobá, ga̱jma̱a̱ nuxnáá itháan numuu náa nutaraʼa ga̱jma̱a̱ tsíniñaʼ rí numbaaʼ rígi̱ maʼni jngi̱i̱n. Dxámá ga̱jma̱a̱ dxáʼgú, ma̱ndoo ma̱ta̱ya̱a̱ májánʼ rí tsiakii rí natani xánindxu̱u̱ ndíí ga̱jma̱a̱ rí nandún kuyaaʼ a̱ngiu̱lú ga̱jma̱a̱ mumbayáʼ. Á mu natagíʼ ginii Jeobá náa awan rí natríyaʼ matani, maraxtaa májánʼ.