1, 2. a) Náa numuu rí nixmiéjunʼ xa̱bu̱ bi̱ nikuwa nákha nixtáa Pablo ga̱jma̱a̱ numuu rí ni̱ndxu̱ún esclavos ma̱ngaa rí nindúún maguma káwíin rá. b) Xó má niʼthí Pablo, náa phú e̱ʼkha̱ libertad rí gajkhun rá.

XA̱BU̱ bi̱ kuwa náa Imperio romano nini mbaʼumíjna̱ wéñuʼ numuu rí nagún majñu̱ʼ xtángoo, rí jmbu ga̱jma̱a̱ rí maguma káwíin. Mú tsiakii ga̱jma̱a̱ gloria ndrígóo imperio rígi̱ nirígá numuu rí niñajunʼ wéñuʼ esclavos. Ni̱jkha̱nú mbá mbiʼi rí itháan rí 30% xa̱bu̱ ninindxu̱ún esclavos. Xa̱bu̱ nákha ikhú nixmiéjunʼ wéñuʼ ga̱jma̱a̱ numuu rí ni̱ndxu̱ún esclavos ga̱jma̱a̱ rí maguma káwíin, asndu cristianos bi̱ nikuwa ikhí.

² Apóstol Pablo niʼnirámáʼ mbaʼa nuthu ga̱jma̱a̱ numuu libertad. Mú táʼndoo maʼni ikháá xóo xa̱bu̱ bi̱ nikuwa nákha ikhú, bi̱ nindúún muriʼkhui̱i̱ Xa̱bu̱ Ñajunʼ. Pablo ga̱jma̱a̱ eʼwíínʼ cristianos nini tsiakimijna mu mumbañún xa̱bu̱ muniʼnuʼ ajngáa ndrígóo Reino ga̱jma̱a̱ rí gíʼdoo wéñuʼ numuu rí niʼtsiwáanʼ Jesús. Apóstol niʼthún a̱ngui̱i̱n ndiéjunʼ nindxu̱u̱ libertad rí gajkhun. Mbá xkri̱da, náa raga̱jma̱ carta rí niʼnirámáʼ náa cristianos ndrígóo Corinto, niʼthí kaʼwu: “Jeobá nindxu̱u̱ Espíritu; ga̱jma̱a̱ náa rígá espíritu ndrígóo Jeobá,  na̱nguá kaxtuʼwájmáanʼ” (2 Cor. 3:17).

3, 4. a) Ndiéjunʼ niʼthí Pablo náa versículo rí na̱ʼkha̱ ginii náa 2 Corintios 3:17 rá. b) Ndiéjunʼ gíʼmaa muʼni mu mambáyulúʼ libertad rí naxnúlú Jeobá rá.

³ Náa carta má rígi̱ rí ni̱jkha̱ inún corintios, Pablo niʼthí ginii rí nigíʼnuu Moisés índo̱ nagajta̱a̱ náa kúbá Sinaí nda̱wa̱á rí nixtáa náa inuu Jeobá. Inuu naxpíbiʼ. Índo̱ israelitas ndiyáá, nimiñun, ikha jngó ikhaa nirugoo inuu ga̱jma̱a̱ mbá xtíin (Éx. 34:29, 30, 33; 2 Cor. 3:7, 13). Pablo niʼthí rí índo̱ mbáa natanga̱a̱ náa Jeobá, “nagajtaa xtíin náa inuu” (2 Cor. 3:16). Ndiéjunʼ nindoo gáʼthi xá.

⁴ Xó má nijmañulúʼ náa artículo ginii, bi̱ gíʼdoo libertad rí na̱nguá ertumuu nindxu̱u̱ Jeobá, bi̱ Niʼni xúgíʼ dí rígá. Náa xtáa rígá libertad ga̱jma̱a̱ náa rígá xi̱ʼ ndrígóo. Mú Pablo niʼthí rí á mu nandulúʼ muguaʼdáá libertad rúʼko̱ gíʼmaa magutrígáanʼ náa Jeobá. Rígi̱ eyoo gáʼthi rí ndayóoʼ mambaxúlúʼ májánʼ gajmiúlú. Israelitas bi̱ nikuwa náa ku̱ba̱ʼ mixooʼ ndiyáá rígi̱ xóo ekumún ikhiin raʼkháa xóo eʼyoo Jeobá. Ninindxu̱u̱ asndu xóo mbá xtíin rí nirugoo ku̱ma̱ ndrígu̱ún ga̱jma̱a̱ a̱jkiu̱ún. I̱ndó nindúún majmúún libertad ndrígu̱ún mu muni rí nandún ikhiin (Heb. 3:8-10).

5. a) Xú káʼnii nindxu̱u̱ libertad rí naxnúlú xi̱ʼ ndrígóo Jeobá rá. b) Xú káʼnii eʼyáá rí ma̱ndoo mambáyulúʼ libertad rí naxná Jeobá asndu bi̱ nindxu̱u̱ esclavo ga̱jma̱a̱ bi̱ xtáa náa guʼwá e̱jua̱nʼ rá. c) Ndiéjunʼ graxe̱ gíʼmaa mbuʼyáá rá.

⁵ Mú, libertad rí naxná náa xi̱ʼ ndrígóo Jeobá nindxu̱u̱ itháan mba̱a̱ ki xóo rí kuaʼdáá ikháanʼ. Xi̱ʼ ndrígóo Jeobá naʼni káwáanʼ náa aʼkhá ga̱jma̱a̱ náa rí nakháñulú, xóo rí manindxu̱lúʼ esclavos ndrígóo náa religión rí minduwaʼ ga̱jma̱a̱ rí naguʼwún nuni xa̱bu̱. Rígi̱ nindxu̱u̱ itháan rí xáʼngu̱u̱n muni xa̱bu̱ (Rom. 6:23; 8:2). Rí nindxu̱u̱ mbá libertad mitsaan wéñuʼ. Ma̱ndoo mambáyúu asndu mbáa bi̱ nindxu̱u̱ esclavo o bi̱ xtáa guʼwá e̱jua̱nʼ (Gén. 39:20-23). Rígi̱ nigíʼnuu ndxájulú Nancy Yuen ga̱jma̱a̱ ndxájulú Harold King. Nájmi̱i̱n nixudiinʼ mba̱yu̱ʼ tsiguʼ náa guʼwá e̱jua̱nʼ ga̱jma̱a̱ numuu rí nunimbu̱ún. Ma̱ndoo mbuʼñún ga̱jma̱a̱ muʼdxawíín rí nigíʼnun náa canal JW Broadcasting (VIDEOS > ENTREVISTAS Y EXPERIENCIAS > SE ENFRENTAN A PRUEBAS). Mú xúgi̱ guʼyáá graxe̱ rígi̱: Xú káʼnii gándoo gusngajmá rí muxnáá numuu libertad ndrígúlú ga̱jma̱a̱ ndiéjunʼ gándoo gúʼni mu majmulúʼ májánʼ rá.

6. Xú káʼnii nisngajma israelitas rí tángaju̱u̱n libertad rí Jeobá nixnúún xá.

⁶ Índo̱ mbáa namínáanʼ mbá rí gíʼdoo wéñuʼ numuu, nuxnáa núma̱aʼ. Xúʼko̱ má Jeobá nixnúún libertad israelitas índo̱ niguwíin náa Egipto. Xú káʼnii nini xá. Nguáthá igu̱nʼ nda̱wa̱á rí niguma káwíin nindúún mu̱phu̱ ganitsu rí niguáʼdáá náa Egipto, ma̱ngaa nixieʼkhá ga̱jma̱a̱ numuu rí nixnúún Jeobá. Asndu nithi rí nindúún matangi̱i̱n náa Egipto. Ikhiin ndiyáá rí itháan gíʼdoo numuu e̱gi̱ʼ, pepinos, sandías, mágá mbi̱jua̱, mágá ga̱jma̱a̱ áxu ki xóo libertad rí guáʼdáá mu mbuyamajkuíí Jeobá. Tséʼniulú tsiánguá rí ikhaa nikiʼnáa kaʼñún wéñuʼ (Núm. 11:5, 6, 10; 14:3, 4). Gi̱i̱ najmañulúʼ mbá ikha rí gíʼdoo wéñuʼ numuu.

7. a) Xú káʼnii nigíʼ niʼnimbánuu Pablo xtágabu rí ikháá má nixná náa 2 Corintios 6:1 rá. b) Xú káʼnii gándoo gúʼni mangáanʼ xúʼko̱ rá.

⁷ Apóstol Pablo nixnúún tsiakii  cristianos rí mbuyamajkuíí libertad rí Jeobá nixná ga̱jma̱a̱ numuu A̱ʼdióo, Jesucristo (atraxnuu 2 Corintios 6:1). * Garmáʼáan a̱jkiu̱lú rí Pablo nigawúunʼ numuu rí ninindxu̱u̱ ñumbáá ndrígóo aʼkhá ga̱jma̱a̱ rí nakháñulú. Mú nigíʼ niʼnimbánuu xtágabu ndrígóo ga̱jma̱a̱ niʼthí: “¡Núma̱a̱ Dios ga̱jma̱a̱ numuu Jesucristo!”. Náa numuu rá. Niʼthí: “Numuu rí xtángoo ndrígóo espíritu rúʼko̱ rí naʼni makuwáanʼ náa Cristo Jesús bi̱ naʼni kríñanʼ náa xtángoo ndrígóo aʼkhá ga̱jma̱a̱ náa rí nakháñulú” (Rom. 7:24, 25; 8:2). Mangáanʼ gíʼmaa muxnáá numuu rí Jeobá niʼni káwáanʼ náa aʼkhá ga̱jma̱a̱ rí nakháñulú. Ga̱jma̱a̱ numuu rí nijuiʼtsiwáanʼ, ma̱ndoo muʼni ñajunʼ Jeobá ga̱jma̱a̱ mbá ku̱ma̱ kaʼwu (Sal. 40:8).

8, 9. a) Ndiéjunʼ xtágabu nixná apóstol Pedro rí xú káʼnii gajmulú libertad ndrígúlú rá. b) Ndiéjunʼ tsáʼkhá eraʼníí xúgi̱ rá.

⁸ Ginii gíʼmaa muxnáa núma̱aʼ, ma̱ngaa mbaʼyóoʼ muñewa̱a̱n májánʼ libertad ndrígúlú. Apóstol Pedro niʼthúluʼ dí ragíʼmaa majmulúʼ libertad ndrígúlú mu muʼni dí ra̱májánʼ rí nandulúʼ ikháanʼ (atraxnuu 1 Pedro 2:16). * Ajngáa rígi̱ naʼni marmáʼáan a̱jkiu̱lú rí nini israelitas náa ku̱ba̱ʼ mixooʼ. Rí mbiʼi xúgi̱ xóó nambáyulúʼ itháan ki xóo nákha ginii. Satanás ga̱jma̱a̱ numbaaʼ ndrígóo naxnáraʼa itháan rí naʼgui̱i̱ xóo xtíin, ganitsu, iya najnga̱a̱, rí xóo muʼni gagimijná ga̱jma̱a̱ i̱ʼwáʼ. Náa i̱yi̱i̱ʼ rí nuxnaraʼa timii xa̱bu̱ mitsiʼñíin mu muni makumulúʼ rí ndayúlú mu̱ʼtsi̱ rí tséyulú nditháan. Xáʼni mingíjyúuʼ majpátriguáanʼ náa tsáʼkhá rúʼko̱ ga̱jma̱a̱ majmulúʼ libertad ndrígúlú náa dí ra̱májánʼ.

⁹ Náa xtágabu ndrígóo Pedro ma̱ngaa nambáyulúʼ wéñuʼ náa mbiʼi rí kuwáanʼ xóo náa matanigajmaa o náa ñajunʼ. Mbá xkri̱da, jiáma ga̱jma̱a̱ wa̱ʼxa̱ʼ nutsudiin munigajmaa itháan. Nuni makumún rí munigajmaa itháan maʼni maguaʼdáá mbá ñajunʼ náa mudaʼ wéñuʼ mbújkha̱a̱. Ga̱jma̱a̱ nusngajmún i̱yi̱i̱ʼ náa nasngájma rí miʼxtikhu edaʼ bi̱ ninigajmaa ga̱jma̱a̱ bi̱ na̱nguá ninigajmaa. Xúgíʼ rígi̱ nindxu̱u̱ mbá tsáʼkhá náa jiáma ga̱jma̱a̱ wa̱ʼxa̱ʼ, bi̱ gíʼmaa muraʼwíí rí májánʼ mu xúni̱ gachíí vida ndrígu̱ún. Ndiéjunʼ gíʼmaa marmáʼáan a̱jkiu̱ún ikhiin gajmiún anu̱ún xá.

10. Ndiéjunʼ gíʼmaa mbuʼyáá índo̱ guraʼwíí rí muʼni rá.

¹⁰ Tikhun xa̱bu̱ nakumu̱ún rí ikhiin gíʼmaa muraʼwíí rí muni, gíʼmaa muraʼwíí rí eñún muni, á mu tséʼni gawúunʼ ku̱ma̱ ndrígu̱ún. Mbáa nundxa̱ʼwa̱míjna̱ rí niʼthún Pablo bi̱ corintios ga̱jma̱a̱ numuu ganitsu: “Náa numuu rí libertad ndrígóʼ gíʼmaa mixtugua̱a̱ ga̱jma̱a̱ numuu ku̱ma̱ ndrígóo imba̱a̱ xa̱bu̱ rá.” (1 Cor. 10:29.) Gajkhun má rí ikháanʼ kaʼyulú muraʼwíí káʼnii gúʼnigajmaa ga̱jma̱a̱ káʼnii gúʼni náa vida ndrígúlú. Mú gíʼmaa marmáʼáan a̱jkiu̱lú rí libertad ndrígúlú nartumuu ga̱jma̱a̱ xúgíʼ rí nuraʼwíí muʼni marigá rí mundrígúu. Ikha jngó Pablo niʼthí: “Xúgíʼ ma̱ndoo matani; mú raxúgíʼ nindxu̱u̱ májánʼ. Xúgíʼ ma̱ndoo matani; mu raxúgíʼ gambáyaʼ” (1 Cor. 10:23). Rígi̱ nambáyulúʼ makru̱ʼu̱lú rí xúgíʼ rí nandulúʼ ikháanʼ na̱nguá gíʼdoo wéñuʼ numuu índo̱ guraʼwíí rí muʼni.

11. Náa numuu rí niʼni káwáanʼ Dios rá.

¹¹ Índo̱ Pedro niʼthúluʼ dí ragíʼmaa majmulúʼ libertad ndrígúlú náa dí ra̱májánʼ, ma̱ngaa niʼthí rí ma̱ndoo majmulúʼ xóo kaʼyoo mu manindxu̱lúʼ “ñumbáá ndrígóo Dios”. Ikha jngó Jeobá niʼni káwáanʼ ga̱jma̱a̱ numuu Jesús náa xtángoo ndrígóo aʼkhá ga̱jma̱a̱ rí nakháñulú numuu rí muxnaxími̱jna̱ xúgíʼ mbiʼi rí kuwáanʼ mu muʼni ñajunʼ.

12. Xú káʼnii xkri̱da nigíʼ Noé ga̱jma̱a̱ bi̱ kuwa náa goʼwóo rá.

¹² Xú káʼnii gándoo gajmulú májánʼ libertad ndrígúlú mu xátangaán manindxu̱lúʼ ñumbáá ndrígóo rí nagua̱ʼa̱ muʼni ga̱jma̱a̱ rí maʼndulú muguaʼdáá wéñuʼ náa numbaaʼ rígi̱ rá. Rí muʼgíʼ muʼni ginii ñajunʼ Dios (Gál. 5:16). Guʼyáá xóo niʼni Noé gajmíi̱n bi̱ kuwa náa goʼwóo. Maski ajndu nikuwa náa numbaaʼ náa nuni rí xkawiiʼ ga̱jma̱a̱ náa nuxmijná wéñuʼ xa̱bu̱. Xú káʼnii niʼngu̱u̱n nini xá. Nikuwa runi má xúʼko̱ ñajunʼ rí Jeobá nixnúún muni: Muni arca, mugimbóo ganitsu rí mu̱phu̱ ga̱jma̱a̱ rí mu̱phu̱ xujkhúʼ, ga̱jma̱a̱ rí mutaruʼun xa̱bu̱ ga̱jma̱a̱ numuu fin. Náa Biblia naʼthí: “Noé niʼni xúgíʼ xó má niʼtáñajunʼ Dios. Xúʼko̱ kayuʼ niʼni” (Gén. 6:22). Rí nirígá, rí Noé gajmíi̱n bi̱ kuwa náa goʼwóo nikáwíin (Heb. 11:7).

13. Ndiéjunʼ eʼtáñajunlú Jeobá muʼni rá.

¹³ Ndiéjunʼ niʼtáñajunʼlú Jeobá muʼni rá. Bi̱ ni̱ndxu̱lú cristianos nduʼyáá májánʼ rí niʼtáñajunlú muʼtáraʼa (atraxnuu Lucas 4:18, 19). Rí mbiʼi xúgi̱, mbaʼin wéñuʼ xa̱bu̱ tsikruigu̱u̱n ga̱jma̱a̱ numuu dios bi̱ naʼtáñajunʼ náa numbaaʼ rígi̱ ga̱jma̱a̱ ni̱ndxu̱ún ñumbáá náa religión rí minduwaʼ, náa mbújkha̱a̱ ga̱jma̱a̱ náa xkujndu ndrígóo numbaaʼ (2 Cor. 4:4). Ikháanʼ kaʼyulú mu̱ʼgua̱ kidxuuʼ xkridoo Jesús ga̱jma̱a̱ mumbáñuun muniʼniiʼ Jeobá ga̱jma̱a̱ muni ñajunʼ ndrígóo, Dios bi̱ naʼni káwáanʼ (Mat. 28:19, 20). Mingíjyúuʼ nindxu̱u̱ rígi̱ ga̱jma̱a̱  rígá wéñuʼ xkujndu. Náa tikhuu xuajen mba̱ʼu̱, xa̱bu̱ na̱jkha̱ raʼni itháan mixtiʼkuiin asndu tsíñún gúyulú. Graxe̱ rí ma̱ndoo muʼnimíjna̱ á mu ma̱ndoo majmulúʼ libertad ndrígúlú mu muyambáá itháan náa Reino ndrígóo.

14, 15. Ndiéjunʼ niraʼwi̱i̱ mbaʼin xa̱bi̱i̱ Jeobá rá. (Atayáá timbá xtiʼkhu).

¹⁴ Naxnúlú tsiakii índo̱ nduʼyáá rí mbaʼin xa̱bi̱i̱ Jeobá nuriʼkhu̱u̱ vida ndrígu̱ún mu muni káxi̱ ñajunʼ Jeobá índo̱ nduyáá rí gíʼ mijngii fin ndrígóo numbaaʼ (1 Cor. 9:19, 23). Tikhun kuwa náa congregación ndrígu̱ún, eʼwíínʼ nagún i̱mba̱ níʼkhá náa ndayóoʼ miʼtáraʼa. Náa informe nasngájma rí witsu tsiguʼ kidíʼ itháan rí 250,000 a̱ngiu̱lú nixnaximijna mu muyambáá káxi̱. Rí mbiʼi xúgi̱, rí mbá xúgínʼ a̱ngiu̱lú naʼni itháan rí 1,100,000. ¡Ra̱ʼkhá tháán májánʼ nindxu̱u̱ rí majmulúʼ májánʼ libertad ndrígúlú mu muʼni ñajunʼ Jeobá! (Sal. 110:3).

¹⁵ Ndiéjunʼ nimbáñun a̱ngiu̱lú mu muni xúʼko̱ kaʼnii rá. Guʼyáá ga̱jma̱a̱ numuu John ma̱ngaa Judith. Mbá ajtsú skíñúʼ tsiguʼ kidíiʼ niyambáá náa mbaʼa xuajen mba̱ʼu̱. Narmáʼáan a̱jkiu̱ún rí índo̱ nigi̱ʼdu̱u̱ Náa Nawaʼsngúún xú káʼnii gíʼmaa muni ñajunʼ ndrígu̱ún Precursor, nákha 1977, nixnúún tsiakii bi̱ ninigajmaa mu magún i̱mba̱ níʼkhá náa ndayóoʼ itháan bi̱ mutaraʼa. John naʼthí rí ndiyóoʼ mariʼkhu̱u̱ ñajunʼ mbaʼa nuthu mu xágiʼdoo wéñuʼ ga̱jma̱a̱ magiʼdoo ikháá má meta ndrígóo. Nda̱wa̱á nigún gutaraʼa náa imba̱a̱ xuajen mba̱a̱. Ikhí ndiyáá rí índo̱ nitajkháan náa Jeobá ga̱jma̱a̱ nikumu̱ún kuyáá ikhaa nimbáñun muraʼníí xkujndu, xóo rí majmañún i̱mba̱ ajngáa o maguʼwún xóo kuwa ikhí o náa naʼni wéñuʼ mijkha o miguwan. Ndiéjunʼ endxaʼwamíjna̱ náa xúgíʼ tsiguʼ rúʼko̱ náa ñajunʼ Jeobá xá. John naʼthí: “Nakumuʼ rí nixtáá rani ñajunʼ rí itháan májánʼ. Jeobá ni̱jkha̱nú ninindxu̱u̱ gajkhun náa ikhúúnʼ, xóo mbáa anu̱lú bi̱ nandoo kaʼyulú. Rí xúgi̱ nakro̱ʼo̱ʼ májánʼ ndiéjunʼ eyoo gáʼthúu̱n Santiago 4:8, rí naʼthí: ‹Guxu̱ʼmámíjná náa Dios ga̱jma̱a̱ ikhaa makuʼmaminaʼ náa ikháanʼ›. Ndi̱yo̱o̱ rí nixkamaa rí xtáá raʼyáʼ, mbá vida tsímáá rí maʼni maxtáá gagi”.

16. Xú káʼnii nijmún libertad ndrígu̱ún mbaʼin a̱ngiu̱lú rá.

¹⁶ Rí xóo kuwa eʼwíínʼ a̱ngiu̱lú i̱ndó naniñúnʼ muni káxi̱ ñajunʼ Jeobá mbá xngaa. Mú mbaʼin a̱ngiu̱lú nuxnaximi̱jna̱ muñambáá náa naguma guʼwá rí nduyamajkuíí Jeobá náa xúgíʼ numbaaʼ. Mbá xkri̱da, mbá 27,000 a̱ngiu̱lú niñajunʼ náa niguma nuxi̱ʼ central mundial, náa Warwick (Nueva York). Tikhun a̱ngiu̱lú niyambáá ikhí a̱jma̱ xmáná, eʼwíínʼ mbaʼa igu̱nʼ ga̱jma̱a̱ tikhun mbá tsiguʼ o asndu itháan. Mbaʼin rí ikhiin niniñaaʼ rí kuwa runi mu magún guñajunʼ ikhí. Xúgínʼ nixna mbá májánʼ xkri̱da rí xú káʼnii gajmulú libertad rí Jeobá nixnulú mu muʼni mba̱a̱ ga̱jma̱a̱ mbuʼyamajkuíí.

17. Ndiéjunʼ eguáʼthi̱i̱n nda̱wa̱á bi̱ najmún májánʼ libertad rí Dios exná rá.

¹⁷ Nuxnáa núma̱aʼ Jeobá numuu rí nuniʼnííʼ ga̱jma̱a̱ rí kuaʼdáá libertad mu mbuʼyamajkuíí. Rí xúgíʼ rí guraʼwíí muʼni masngájma rí nangajulú libertad rúʼko̱. Gajmulú májánʼ mu muʼni ñajunʼ Dios asndu xóo má eʼngulú ki xóo muʼni dí ra̱májánʼ. Á mu nuʼnilú, mundrígú rí májánʼ rí ikhaa niʼthí náa ajngáa rígi̱: “Xa̱bu̱ numbaaʼ maguma káwíin náa rí kaxtuʼwájmiin ga̱jma̱a̱ náa rí mitsaga ma̱ngaa maguma káwíin xóo e̱ji̱i̱n Dios” (Rom. 8:21).