1, 2. a) Ndiéjunʼ esngájma rí xa̱bu̱ nandún maguma káwíin rá. b) Ndiéjunʼ erígá rá.

RÍ MBIʼI xúgi̱, najuiʼthá wéñuʼ ga̱jma̱a̱ numuu rí maʼni mbríguáanʼ ga̱jma̱a̱ rí maguma káwáanʼ. Náa mbaʼa xuajen, kuwa xa̱bu̱ bi̱ nduyááʼ makáwíin náa rí naguma gíníi, náa rí xúni̱ wájínʼ ga̱jma̱a̱ náa tsingíná. Eʼwíínʼ nandún muthi rí endxa̱ʼwa̱a̱ edxu̱ún o makuwá xó má enigu̱nʼ. Xúgínʼ xa̱bu̱ nandún maguma káwíin.

² Mu muni rí nandún, xa̱bu̱ nuxieʼkhá, nuruguáá kamba̱a̱ ga̱jma̱a̱ asndu nuxuximi̱jna̱ náa Xa̱bu̱ Ñajunʼ ga̱jma̱a̱ nuradímíjná. Mú, na̱nguá erígá rí nandún, i̱ndó narígá tsingíná o nakháñun xa̱bu̱. Nakujma rí gajkhun nindxu̱u̱ rí niʼthí rey Salomón: “Xa̱biya̱ naʼtañajunʼ xa̱biya̱ mu maʼniu dí raʼkhí” (Ecl. 8:9).

3. Ndiéjunʼ gándoo muʼni mu makuwáanʼ májánʼ ga̱jma̱a̱ gagi rá.

³ Discípulo Santiago niʼthí ndiéjunʼ rí gíʼmáanʼ muʼni mu makuwáanʼ májánʼ ga̱jma̱a̱ gagi. Niʼthí rí xa̱bu̱ bi̱ xtáa gagi nindxu̱u̱ bi̱ “ndaʼyoo tsumáá xtángoo rí jmbu náa xúgíʼ rí  na̱ʼkha̱, náa na̱nguá kaxtuʼwájmáanʼ ga̱jma̱a̱ naʼnimbánuu” (Sant. 1:25). Jeobá nixná xtángoo jmbu rúʼko̱, ikha jngó ikhaa ndaʼyoo itháan májánʼ rí ndayúlú mu makuwáanʼ májánʼ ga̱jma̱a̱ gagi. Nixnúu Adán ga̱jma̱a̱ Eva xúgíʼ rí nda̱ñúnʼ mu makuwá gagi.

4. Xú káʼnii nikuwa Adán ga̱jma̱a̱ Eva rá. (Atayáá timbá xtiʼkhu.)

⁴ Náa timbá ga̱jma̱a̱ náa raga̱jma̱ capítulo ndrígóo Génesis nasngájmulu kaʼwu rí náa Ku̱ba̱ʼ mitsaan na̱nguá nirígá tsingíná, gamíi ga̱jma̱a̱ na̱nguá niguma gíníi. Adán ga̱jma̱a̱ Eva nikuwa mixtiʼkhu wéñuʼ raʼkháa xóo kuwáanʼ ikháanʼ xúgi̱. Na̱nguá nixmiéjúúnʼ nditháan ga̱jma̱a̱ numuu ganitsu, ñajunʼ, nandii o rí makhañún (Gén. 1:27-29; 2:8, 9, 15). Lá nindoo gáʼthi rí ma̱ndoo muni xúgíʼ xáʼ. Guʼyáá.

5. Ndiéjunʼ ekumún tikhun, mú ndiéjunʼ eyóoʼ mu makáwáanʼ rá.

⁵ Mbaʼin xa̱bu̱ nakumu̱ún rí ma̱ndoo makuwa tsímáá á mu nandoo nuni xúgíʼ rí nandún, rí asndu xaxmiéjunʼ káʼnii gáʼkha̱nú inún. Rí maguma káwáanʼ nindxu̱u̱ rí majmañulúʼ muraʼwíí rí muʼni ga̱jma̱a̱ muʼnimbánii. Mú náa mbá enciclopedia naʼthí ga̱jma̱a̱ numuu rígi̱: “Náa inuu xtángoo, xa̱bekha bi̱ phú niguma káwíin nandoo gáʼthúu̱n índo̱ xa̱bu̱ tséniu̱u̱n dí ra̱májánʼ, rí tséyóoʼ o rí na̱nguá kaʼyoo” (The World Book Encyclopedia). Rígi̱ nasngájma rí ndayóoʼ náa martumuu mu xúgínʼ xa̱bu̱ ma̱ndoo makuwa gagi. Mú tsáa kaʼyoo maʼthí asndu náa ertumuu rí jmbu, rí ndayóoʼ ga̱jma̱a̱ rí kaʼyoo rá.

6. a) Náa numuu rí i̱ndó Jeobá ma̱ndoo maʼni xúgíʼ rí eyoo xá. b) Náa numuu rí xa̱bu̱ numbaaʼ xándoo muni xúgíʼ ga̱jma̱a̱ náa numuu rá.

⁶ I̱ndó Jeobá Dios ma̱ndoo maʼni xúgíʼ rí ikhaa eyoo mariʼkhu̱u̱. Rígi̱ nindxu̱u̱ xúʼko̱ numuu rí ikhaa Niʼni xúgíʼ, bi̱ gíʼdoo xúgíʼ tsiakii ga̱jma̱a̱ naʼtáñajunʼ náa xúgíʼ tsu̱du̱u̱ numbaaʼ (1 Tim. 1:17; Rev. 4:11). Garmáʼáan a̱jkiu̱lú ajngáa mitsaan rí niʼthí rey David náa 1 Crónicas 29:11, 12 (atraxnuu). * Ikhí naʼthí rí kaʼyoo maʼni Jeobá. Mú, eʼwíínʼ xándoo muni xúgíʼ. Gíʼmaa mbuʼyáá rí Jeobá gíʼdoo xúgíʼ tsiakii mu maʼthí náa gartumuu rí jmbu, rí ndayóoʼ ga̱jma̱a̱ rí kaʼyoo. Ga̱jma̱a̱ rúʼko̱ rí niʼni asndu nákha niʼni ku̱ba̱ʼ.

7. Arathá tikhuu rí kaʼyoo muʼni ga̱jma̱a̱ naʼni makuwáanʼ gagi.

⁷ Maski ajndu Adán ga̱jma̱a̱ Eva mbaʼa rí nindoo muni, mú nirígá tikhuu rí na̱nguá nindoo muraʼwi̱i̱ muni. Tikhuu ninindxu̱u̱ rí kaʼyoo, mu rígá náa nirtumuu. Mbá xkri̱da, mu makuwíin ndiyóoʼ mbuya xúnʼ, muphiʼtsu ga̱jma̱a̱ munuʼ ga̱jma̱a̱ i̱ʼwáʼ. Mú tundxaʼwamíjna̱ dí rúʼko̱ nariya kaʼñúnʼ libertad ndrígu̱ún. Jeobá niʼni rí makuwá gagi índo̱ guni rí kaʼyoo tsejtsí mbiʼi (Sal. 104:14, 15; Ecl. 3:12, 13). Lá ragájkhun rí xúgiáanʼ nandulúʼ mbuʼyáxulú ga̱jma̱a̱ giñánʼ kaʼwu, mu̱ʼphu̱ rí itháan nanigulúʼ o matuxulúʼ nda̱wa̱á rí ndiʼyáa májánʼ xulúʼ ráʼ. Na̱nguá kumulúʼ rí kaxtuʼwájmáanʼ o rí kuʼda índo̱ nuʼni rígi̱. Nakumulú rí ndayúlú muʼni rígi̱, mbáa Adán ga̱jma̱a̱ Eva mangiin nikumu̱ún xúʼko̱.

8. Ndiéjunʼ xtángoo nixnúún Jeobá Adán ga̱jma̱a̱ Eva, ga̱jma̱a̱ náa numuu rá.

⁸ Jeobá niʼtáñajúúnʼ Adán ga̱jma̱a̱ Eva rí  muguaʼdíin e̱jñún ga̱jma̱a̱ muñewa̱a̱n Ku̱ba̱ʼ (Gén. 1:28). Lá rúʼko̱ nindoo gáʼthúu̱n rí xándoo muni nimbá kayuʼ xáʼ. Na̱nguá. Niniñuʼ rí xúgínʼ xa̱bu̱ numbaaʼ muyambáá náa rí nakudaminaʼ bi̱ Niʼniáanʼ rí maʼni̱i̱ mitsaan Ku̱ba̱ʼ náa rí xa̱bu̱ numbaaʼ makuwá kámuu (Is. 45:18). Rí mbiʼi xúgi̱, xa̱bu̱ bi̱ tseraʼwi̱i̱ munigu̱nʼ o bi̱ ninigu̱nʼ bi̱ na̱nguá eñún muguaʼdíin e̱ji̱n na̱nguá enújngorámuunʼ rí eyoo Dios. Mbaʼin xa̱bu̱ nudamijna̱ ga̱jma̱a̱ naguáʼdiin e̱jñún maski ajndu narígá xkujndu (1 Cor. 7:36-38). Náa numuu eni xá. Numuu rí xóo rígi̱ naʼni makuwá tsímáá xa̱bu̱ ga̱jma̱a̱ gagi (Sal. 127:3). Xó má eʼyáá Adán ga̱jma̱a̱ Eva ma̱ndoo makuwa gagi mbóó gajmiún e̱jñún asndu kámuu mbiʼi.

9. Náa numuu rí nindxu̱u̱ jmbu, ndayóoʼ ga̱jma̱a̱ kaʼyoo xtángoo ndrígóo Dios náa Génesis 2:17 rá.

⁹ Jeobá nixnúu Adán ga̱jma̱a̱ Eva imbo̱o̱ xtángoo, ga̱jma̱a̱ ikhú niʼthún májánʼ náa biʼyaa ganindxu̱u̱ castigo á mu tsenimbánii: “Ixi̱ ku̱ma̱ dí májánʼ ga̱jma̱a̱ dí ra̱májánʼ, xándoo miʼtsu, numuu rí índo̱ gíʼtsu xndúu ixi̱ rúʼko̱, gajkhun makañáʼ” (Gén. 2:17). Lá ninindxu̱u̱ mbá kiʼtáñajunʼ ra̱májánʼ, rí tséyóoʼ ga̱jma̱a̱ rakáʼyoo ráʼ. Lá rígi̱ niʼni rí xándoo muni nimbá xáʼ. Na̱nguá. Mbaʼin xa̱bu̱ bi̱ nduyáá itháan ga̱jma̱a̱ numuu Biblia nuthi rí xtángoo rígi̱ kaʼyoo munimbánii. Mbá xkri̱da, mbáa rí ikhiin niʼthí rí Génesis 2:16, 17 naʼsngúlú rí “i̱ndó Dios ndaʼyoo rí nindxu̱u̱ májánʼ [...] muni xa̱bu̱ ga̱jma̱a̱ dí ra̱májánʼ [...] náa ikhiin. Mu maguaʼdáá ‹rí máján›, gíʼdoo rí makumún kuyáá Dios ga̱jma̱a̱ munimbu̱ún kuyáá. Á mu tséni, gíʼmaa muraʼwíí ikhiin rí nindxu̱u̱ májánʼ [...] ga̱jma̱a̱ dí ra̱májánʼ”. Ga̱jma̱a̱ rígi̱ xáʼngu̱u̱n gúní ikhiin.

10. Xú káʼnii mixtiʼkhu nindxu̱u̱ rí matraʼwíí matani ga̱jma̱a̱ índo̱ kaʼyaʼ matraʼwi̱i̱ rí májánʼ ga̱jma̱a̱ dí ra̱májánʼ rá.

¹⁰ Mbaʼin xa̱bu̱ nakumu̱ún rí Jeobá tániñuʼ rí Adán maʼni rí nandoo. Mú ragájkhun rúʼko̱. Raʼkháa ikháá eyoo gáʼthi rí matraʼwíí rí nandaʼ matani ki xóo rí kaʼyaʼ matraʼwíí rí nindxu̱u̱ májánʼ ga̱jma̱a̱ dí ra̱májánʼ. Adán ga̱jma̱a̱ Eva ma̱ndoo muraʼwi̱i̱ á mu munimbu̱ún kuyáá Dios o na̱nguá. Mú, i̱ndó Jeobá kaʼyoo maraʼwíí rí nindxu̱u̱ májánʼ ga̱jma̱a̱ dí ra̱májánʼ. Rígi̱ nindoo gáʼthi “ixi̱ ku̱ma̱ dí májánʼ ga̱jma̱a̱ dí ra̱májánʼ” rí juaʼan náa ixi̱ ri̱ʼi̱ Edén (Gén. 2:9). Gíʼmaa mbuʼyáá rí nguáná tséʼyáá ndiéjunʼ gagiʼnulú ga̱jma̱a̱ rí niraʼwíí muʼni ni tséʼyáá á mu mambáyulúʼ má xúʼko̱. Ikha jngó nguáná rí nuraʼwíí májánʼ muʼni naʼni makuwáanʼ tsingíná, gamiéjunʼ o asndu nakháñulú (Prov. 14:12). Xúgíʼ rígi̱ narígá numuu rí xa̱bu̱ numbaaʼ na̱nguá kaʼyoo maʼni xúgíʼ. Xó má Jeobá niʼtáñajunʼ Adán ga̱jma̱a̱ Eva, niʼsngúún rí gíʼmaa munimbu̱ún kuyáá mu makuwa tsímáá. Mú ndiéjunʼ niraʼwi̱i̱ muni xá.

11, 12. Náa numuu niʼni rí marigá dí ra̱májánʼ rí niraʼwíí maʼni Adán ga̱jma̱a̱ Eva rá. Araxná mbá xkri̱da.

¹¹ Mú Adán ga̱jma̱a̱ Eva niraʼwíí rí xúnimbu̱ún náa Dios. Eva táʼngo̱o̱ gáʼni gaʼduunʼ tsáʼkhá rí nigíʼ Satanás náa inuu: “Mambaʼto idala ga̱jma̱a̱ manindxala xóo Dios, muniʼnuʼ dí májánʼ ga̱jma̱a̱ dí ra̱májánʼ” (Gén. 3:5). Mú, lá niguánu nikuwa xóo nindúún ikhiin xáʼ. Na̱nguá. Rí niraʼwi̱i̱ muni táʼni marigá rí Satanás nikudaminaʼ náa ikhiin. Nacha̱ niguánu ndiyáá rí muni gaʼduunʼ ikha ndrígóo Dios ga̱jma̱a̱ magún náa kambu̱ún maʼga̱ kagu̱u̱n náa gamiéjunʼ (Gén. 3:16-19). Náa numuu rá. Numuu rí Jeobá tániñúnʼ rí xa̱bu̱ numbaaʼ muraʼwíí i̱ndó ikhiin rí nindxu̱u̱ májánʼ ga̱jma̱a̱ dí  ra̱májánʼ (atraxnuu Proverbios 20:24; * Jeremías 10:23). *

¹² Rígi̱ nindxu̱u̱ ikhaa kayúʼ xóo eʼni bi̱ na̱jkha̱ kayóo avión. Mú maʼga̱nú májánʼ náa ejkha̱, na̱jkha̱ náa kamba̱a̱ rí gíʼmaa maʼga̱, mu maʼni rígi̱ najmuu herramientas rí na̱jkha̱ ga̱jma̱a̱ avión. Ma̱ngaa naʼtímíjná gajmíi̱n xa̱bu̱ bi̱ nutháán náa gáʼga ga̱jma̱a̱ nguáná gatuxu̱u̱ ga̱jma̱a̱ nguáná gáʼgi̱ʼi̱i̱, nutháán mu xanújngoo ragu̱u̱n eʼwíínʼ avión. Mú á mu xa̱bu̱ bi̱ na̱jkha̱ kayóo avión tséʼni rí nutháán ga̱jma̱a̱ na̱jkha̱ kayóo náa eyoo ikhaa, maʼni marigá mbá gamiéjunʼ. Xúgi̱ kaʼnii nindxu̱u̱ rí niʼni Adán ga̱jma̱a̱ Eva. Nini gaʼduunʼ ikha rí nixnúún Dios, ga̱jma̱a̱ niraʼníí dí ra̱májánʼ wéñuʼ. Ninindxu̱u̱ aʼkhá ga̱jma̱a̱ rí nakháñulú (Rom. 5:12). Numuu rí nindúún makuwá xóo eñún ikhiin, nánguá nikuwa tsímáá.

13, 14. Xú káʼnii gándoo gaguma káwáanʼ rá.

¹³ Mbaʼin xa̱bu̱ nundxaʼwamíjná rí ma̱ndoo muni rí nandún. Mú á mu libertad nda̱a̱ náa martumuu mitsáʼkháan wéñuʼ xóo mbá chílú dí ra̱ʼkhá tháán maxíníʼ. Gajkhun má rí libertad mbaʼa náa rí ma̱ndoo mambáyulúʼ. Mú xú káʼnii ganindxu̱u̱ numbaaʼ á mu nda̱a̱ náa martumuu rá. Ikha jngó náa enciclopedia rí na̱ʼkha̱ náa kutriga̱ 5 naʼthí: “Náa xtángoo dí rígá náa xuajen, awáán rígá libertad ga̱jma̱a̱ rí xándoo matani”. Miʼskhoo nindxu̱u̱ rígi̱. Gundxaʼwamíjna̱ náa mbaʼa xtángoo rí niniraʼmáʼ xa̱bu̱, xó má mbaʼin abogados ga̱jma̱a̱ jueces bi̱ nda̱ñúnʼ mutajuíi ga̱jma̱a̱ munimbánii.

¹⁴ Mú Jesucristo niʼthí xóo gándoo gaguma káwáanʼ ga̱jma̱a̱ makuwáanʼ gagi. Niʼthí: “Á mu nunimbala ajngóoʼ, phú gajkhun rí nindxa̱la xa̱bi̱ʼ, ga̱jma̱a̱ muniʼnúʼ rí gajkhun, ga̱jma̱a̱ rí gajkhun gáʼni káwáanʼ” (Juan 8:31, 32). Rígá a̱jma̱ rí ndayóoʼ muʼni. Timbá, mundrígú rí gajkhun rí ikhaa niʼsngáa. Raga̱jma̱ dí manindxu̱lúʼ xa̱bi̱i̱.  Á mu nuʼni maguma káwáanʼ. Xú káʼnii rá. Jesús niʼthí má xúʼko̱: “Xúgínʼ bi̱ naguʼwún nuni aʼkhá ni̱ndxu̱ún ñumbáá náa aʼkhá”. Ga̱jma̱a̱ xóó niʼthí: “Á mu Ada̱ gáʼni káwáanʼ, phú gajkhun rí maguma káwáanʼ” (Juan 8:34, 36).

15. Náa numuu ma̱ndoo “maguma káwáanʼ” náa libertad rí Jesús nikudaminaʼ rá.

¹⁵ Nakujmaa kaʼwu rí libertad rí Jesús nikudaminaʼ náa xa̱bi̱i̱ nindxu̱u̱ itháan mba̱a̱ ki xóo libertad rí kaʼñún xa̱bu̱ o náa política rí mbaʼin xa̱bu̱ nandún muguaʼdáá. Índo̱ ikhaa niʼthí “á mu Ada̱ gáʼni káwáanʼ, phú gajkhun rí maguma káwáanʼ”, nindoo gáʼthúu̱n náa makáwíin mbaʼin xa̱bu̱ numbaaʼ bi̱ kuwa rumíniʼ: Rí manindxu̱lúʼ ñumbáá náa aʼkhá. Rí aʼkhá raʼkháa i̱ndó na̱jkha̱ kaguáanʼ muʼni rí xkawiʼ, ma̱ngaa tséniñulú muʼni rí nduʼyáá rí nindxu̱u̱ májánʼ o muʼni xúgíʼ rí eyulú. Rígi̱ eyoo gáʼthi rí ni̱ndxu̱lú ñumbáá ndrígóo aʼkhá. Rígi̱ naʼni rí makiʼnáanʼ, mumíniiʼ ga̱jma̱a̱ nda̱wa̱á kayuʼ nakháñulú (Rom. 6:23). Apóstol Pablo ndiʼyoo májánʼ ndiéjunʼ nindxu̱u̱ rí manindxa̱ʼ ñumbáá (atraxnuu Romanos 7:21-25). * Mú índo̱ gakáwáanʼ náa cadena ndrígóo aʼkhá muguaʼdáá libertad rí phú ikhaa rí ninimbáti̱ga̱ Adán ga̱jma̱a̱ Eva.

16. Xú kaʼnii gándoo “maguma káwáanʼ” rá.

¹⁶ Índo̱ Jesús niʼthí rí gíʼmaa makuwáanʼ náa ajngóo, nindoo gáʼthúu̱n rí gíʼmáanʼ muʼnimbánii rí extandu̱ʼu̱lú mu maguma káwáanʼ. Cristianos bi̱ nixnáximi̱jnálu nánguá eʼni rí nandulúʼ ikháanʼ ga̱jma̱a̱ nundrígú awan rí Jesús nigíʼ muni xa̱bi̱i̱ (Mat. 16:24). Xó má nikudaminaʼ, phú gajkhun maguma káwáanʼ índo̱ gambáyulú tsigijñaʼ ndrígóo.

17. a) Ndiéjunʼ rí phú maʼni makuwáanʼ tsímáá rá. b) Ndiéjunʼ gúʼyáá náa imbo̱o̱ artículo rá.

¹⁷ Ndiéjunʼ rí phú maʼni makuwáanʼ tsímáá rá. Rí makru̱ʼu̱lú ndiéjunʼ nindxu̱u̱ rí phú maguma káwáanʼ muʼgíʼ muʼni rí kaʼyoo rí xóo majmulúʼ libertad rí nartumuu ga̱jma̱a̱ muʼnimbulúʼ kiʼsngáa ndrígóo Jesús. Rígi̱ maʼni makáwáanʼ mbá kayuʼ náa kaxtuʼwájmáanʼ náa aʼkhá ga̱jma̱a̱ rí nakháñulú (atraxnuu Romanos 8:1, 2, 20, 21). * Náa imbo̱o̱ artículo gúʼyáá xú káʼnii gándoo gájmulúʼ májánʼ libertad rí kuaʼdáá xúgi̱ mu mbuʼyamajkuíí kámuu Jeobá, Dios bi̱ náa na̱ʼkha̱ libertad rí phú ikhaa.