1. Xú káʼnii gándoo gumbáyii Jeobá rá.

ÍNDO̱ Jeobá niʼniáanʼ, nindoo rí mumbáyii náa rí naʼthí maʼni. Maski ajndu xúgi̱ ni̱ndxu̱lú xa̱bu̱ aʼkhá, xa̱bi̱i̱ Dios bi̱ kuwáanʼlu jmbu ma̱ndoo muñajunʼ gajmiúlú xúgíʼ mbiʼi. Mbá xkri̱da, náa Biblia naʼthí rí “numbáyii Dios” índo̱ nuʼtáraʼa ga̱jma̱a̱ índo̱ nuʼsngúún xa̱bu̱ (1 Cor. 3:5-9). Ra̱ʼkhá tháán mba̱a̱ gamajkhu rí bi̱ Niʼniáanʼ bi̱ gíʼdoo xúgíʼ tsiakii nandoo mumbáyii náa mbá ñajunʼ rí gíʼdoo wéñuʼ numuu. Rí xúgi̱, rígá i̱ʼwáʼ xóo ma̱ndoo muñajunʼ gajmiúlú Jeobá. Náa artículo rígi̱ mbuʼyáá tikhuu: Rí xóo mumbáñuun bi̱ kuwa náa guʼwúlú ga̱jma̱a̱ a̱ngiu̱lú, rí mundrígúunlú, rí muxnáximi̱jna̱ muñajunʼ náa xuajñu ga̱jma̱a̱ rí muʼni itháan ñajunʼ Dios (Col. 3: 23).

2. Náa numuu dí ragíʼmaa muʼni mbríguii rí nuʼni náa Jeobá ga̱jma̱a̱ rí nuni eʼwíínʼ rá.

² Índo̱ kuwáanʼ ruʼnigajmaa artículo rígi̱, xúʼni̱ mbrígruii rí najmáanʼ nuʼnilú náa Jeobá ga̱jma̱a̱ rí nuni eʼwíínʼ. Garmáʼáan a̱jkiu̱lú rí mixtiʼkhu nindxu̱u̱ tsigulú, nandii rí kuaʼdáá, rí xóo kuwáanʼ ga̱jma̱a̱ rí najmañulúʼ nuʼni. Apóstol Pablo niʼthí rí niʼtámúʼúun Dios: “Mú mámbáa gáʼyoo rí naʼni, ga̱jma̱a̱ xúʼko̱ maʼdxuu ga̱jma̱a̱ numuu rí naʼni ikhaa, ga̱jma̱a̱ xambríguminaʼ gajmíi̱n eʼwíínʼ” (Gál. 6:4).

3. Náa numuu ma̱ndoo muʼthá rí bi̱ nuñewu̱u̱n bi̱ kuwa náa guʼwún numbayíí Jeobá rá.

³ Jeobá gíʼthu̱u̱n rí xa̱bi̱i̱ muñewu̱u̱n bi̱ kuwa náa guʼwún. Rígá tikhuu rí ndayóoʼ. Mbá xkri̱da, kuwa bi̱ ndayóoʼ muñajunʼ mu muguaʼdáá rí nda̱ñúnʼ. Mbaʼin gu̱ʼu̱ naguanún guʼwún mu muñewu̱u̱n e̱jñún bi̱ majkhinʼ. Ga̱jma̱a̱ tikhun cristianos gíʼmiin muñewu̱u̱n anu̱ún bi̱ guanuu. Rígi̱ gíʼmaa munimbánii. Náa Biblia naʼthí: “Á mu mbáa tséxnún rí nda̱ñúnʼ bi̱ kaʼñún, mu itháan bi̱ kuwa náa goʼwóo, nasngájma rí naʼni gaʼduunʼ fe rí gíʼdoo, ga̱jma̱a̱ nindxu̱u̱ itháan ra̱májánʼ ki xóo mbáa bi̱ na̱nguá gíʼdoo fe” (1 Tim. 5:8). Á mu ikháanʼ ndayóoʼ muʼni rígi̱, mbáa xándoo muʼni itháan ñajunʼ Dios xó má eyulú. Mú xúʼni̱ guabamijná. Dios naniguʼ rí muñewu̱u̱n bi̱ kuwa náa guʼwúlú (1 Cor. 10:31).

4. Xú gándoo gúgíʼ ginii Reino xa̱bu̱ guanii ki xóo rí nandún ikhiin, ga̱jma̱a̱ ndiéjunʼ gárígá rá.

⁴ Xa̱bu̱ bi̱ guáʼdiin e̱jñún nuñajunʼ gajmiún Jeobá índo̱ numbañún muni itháan ñajunʼ ndrígóo. Índo̱ nanújngoo tsiguʼ, mbaʼin e̱ji̱n buʼko̱ nuni káxi̱ ñajunʼ Jeobá ga̱jma̱a̱ kuwa ruñajunʼ mitsínguánʼ. Tikhun ni̱ndxu̱ún misioneros, eʼwíínʼ ni̱ndxu̱ún precursores náa xuajen rí ndayóoʼ bi̱ mutaraʼa ga̱jma̱a̱ tikhun kuwa ruñajunʼ náa Betel. Numuu rí kuwa mitsínguánʼ, bi̱ kuwa náa guʼwún nánguá xóo mbuñún xó má ikhiin enigu̱nʼ. Maski ajndu xúʼko̱, xa̱bu̱ guanii nuxnún tsiakii e̱jñún mu xúniñaʼ ñajunʼ rí kuwa runi maski ajndu ikhiin nduñínʼ wéñuʼ. Náa numuu rá. Numuu rí naʼni makuwa gagi índo̱ nduyáá rí e̱jñún nugíʼ ginii Reino (3 Juan 4). Mbaʼin rí ikhiin nakumu̱ún xóo Ana, bi̱ niʼthí rí nixnátiʼñaa a̱ʼdióo Samuel náa Jeobá. Májánʼ eni xa̱bu̱ guanii buʼko̱ índo̱ nduyáá dí ra̱ʼkhá tháán gíʼdoo numuu rí numbayíí Dios. Ga̱jma̱a̱ tsíñún dí rígi̱ maxtiʼkhuu nditháan (1 Sam. 1:28).

5. Xú káʼnii gándoo gúyambáá náa congregación rá. (Atayáá timbá xtiʼkhu.)

⁵ Ndiéjunʼ gándoo gúʼni á mu na̱nguá kuaʼdiin bi̱ muñewu̱u̱n náa guʼwúlú rá. Mbáa ma̱ndoo mumbáñuun a̱ngiu̱lú guanuu, bi̱ naʼniún nandii o náa i̱ʼwáʼ rí nda̱ñúnʼ. Ma̱ngaa ma̱ndoo mumbáñuun a̱ngiu̱lú bi̱ nuñewu̱u̱n a̱ngiu̱lú bugi̱. Ndíjkha jngó tséʼyáá náa congregación ndrígúlú á mu kuwa bi̱ ndayóoʼ mumbáñuun rá. Guʼthá rí mbáa ndxájulú nañewu̱u̱n anu̱u̱ nikhi̱i̱. Náa numuu rí tsiñewa̱a̱n anu̱u̱ mu ikhaa maʼni i̱ʼwáʼ rí ndayóoʼ xá. O ma̱ndoo muʼthán mbáa mu̱ʼgua̱ kuʼyáa náa reunión, mu̱ʼgua̱ gúʼyáá mbáa bi̱ xtáa náa hospital, mu̱ʼgua̱ gúʼtsi o muʼni i̱ʼwáʼ rí ndayóoʼ. Xúʼko̱ gándoo gumbáyii Jeobá rí ikhaa nariʼña̱a̱ índo̱ nutajkháan a̱ngiu̱lú bugi̱ (atraxnuu 1 Corintios 10:24). *

6. Xú káʼnii ejmaʼnunʼ bi̱ numbayíí Dios rá.

⁶ Bi̱ numbayíí Dios najmaʼnunʼ numuu rí nundrigúun eʼwíínʼ (Heb. 13:2). Náa Biblia naʼsngúlú rí gíʼmaa mundrígúun eʼwíínʼ (Gén. 18:1-5). Májánʼ eʼni rí naguʼwunlú muʼni rígi̱ índo̱ nandoo mumbáñuun bi̱ na̱nguá guáʼdáá ga̱jma̱a̱ “bi̱ guáʼdáá ikháá má fe xóo ikháanʼ” (Gál. 6:10).

7. Ndíjkha jngó gíʼmaa mundrígúun a̱ngiu̱lú bi̱ nuñajunʼ káxi̱ índo̱ naguwáʼ náa congregación ndrígúlú rá.

⁷ Ma̱ndoo mumbáyii Dios índo̱ nundrígúun xa̱bi̱i̱ bi̱ nuñajunʼ káxi̱ índo̱ naguwáʼ náa congregación ndrígúlú (atraxnuu 3 Juan 5, 8). * Índo̱ naguwáʼ guraxáanʼlu, ikhú ‹nuxnámíjná tsiakii› (Rom. 1:11, 12).  Guʼyáá rí niʼni mbáa ndxájulú bi̱ mbiʼyuu Olaf. Niʼníí má tsiguʼ nákha ikhaa nindxu̱u̱ dxámá, mbáa superintendente de circuito bi̱ xóó mbáwíi ni̱jkha̱ náa congregación ndrígóo, ga̱jma̱a̱ nda̱wa̱a̱ tsáa magruiguíi. Olaf niraxu̱u̱n anu̱u̱ bi̱ na̱nguá ni̱ndxu̱ún xa̱bi̱i̱ Jeobá á mu ma̱ndoo maguanúu náa goʼwóo. Nitháán rí ma̱ndoo, mú nitháán rí ikhaa migu náa sillón. Rígi̱ tánindxu̱u̱ ndíí. Olaf narmáʼáan a̱jkiu̱u̱n rí mitsaan nirígá xmáná rúʼko̱. Ikhaa naʼthí: “Superintendente de circuito ga̱jma̱a̱ ikhúúnʼ nuguaxunʼxu miʼcha̱ xúgíʼ mbiʼi ga̱jma̱a̱ nutamíjnaxu ajngáa rí gíʼdoo numuu índo̱ nuphiʼtsuxu. Tsiakii rí nigruígú nixkaxu̱u̱n mani ñajunʼ káxi̱”. Olaf ninindxu̱u̱ misionero náa mbaʼa xuajen mba̱ʼu̱ mbá a̱jma̱ skiñúʼ tsiguʼ rí ninújngoo.

8. Náa numuu rí gíʼmaa musngajmá rí májánʼ a̱jkiu̱lú maski ajndu xúxnaʼlú núma̱aʼ xá. Araxná mbá xkri̱da.

⁸ Mbaʼa náa ma̱ndoo musngajmá rí májánʼ a̱jkiu̱lú náa xa̱bu̱ bi̱ tsíniʼnunʼ, maski ajndu nakujmaa rí ikhiin tséxna̱a̱ núma̱aʼ ga̱jma̱a̱ numuu rí nuʼni. Guʼyáá mbá xkri̱da. Náa España, mbáa publicadora naʼsngóo Yésica ga̱jma̱a̱ numuu Biblia bi̱ na̱ʼkha̱ náa Ecuador, índo̱ ikhaa nimbiyaʼ wéñuʼ, ndxájulú niraxu̱u̱ káʼnii gíʼdoo. Yésica niʼthúu̱n rí nákha xóó tséjkha̱ España migínáa wéñuʼ rí asndu mbóo mbiʼi nándáa rí mikhu. I̱ndó iyaʼ exnúu maga̱a̱n a̱ʼdióo. Índo̱ ndayáraʼaa migu, niʼtájkáan. Tájyúuʼ índo̱ a̱jmi̱i̱n xa̱bi̱i̱ Jeobá nidi̱i̱ xkrugoo. Yésica niríñun ga̱jma̱a̱ asndu nixkuʼtu revista rí nixnáá. Nindxaʼwájmiin: “Lá rígi̱ gáxnu̱u̱ mikhu a̱ʼdióoʼ ráʼ.” A̱ngiu̱lú bugi̱ nigíʼ muni̱i̱ a̱jkiu̱u̱n, mú tándoo. Táʼni má mba̱yu̱ʼ índo̱ niniñaʼ náa xkrugoo mbá xtu̱ʼ náa gajti ganitsu. Rí xúgi̱ nadxuu índo̱ narmáʼáan a̱jkiu̱u̱n rí a̱ngiu̱lú májánʼ nini̱i̱, maski ajndu nagawúnʼ índo̱ narmáʼáan a̱jkiu̱u̱n rí Dios niriʼña̱a̱ índo̱ niʼtájkáan ga̱jma̱a̱ ikhaa tamajkhuu kaʼyoo. Mú xúgi̱ nandoo maʼni ñajunʼ Jeobá. Ga̱jma̱a̱ nirígá xúgíʼ rígi̱ numuu rí a̱ngiu̱lú nini̱i̱ rí májánʼ (Ecl. 11:1, 6).

9, 10. a) Nákha wajyúúʼ náa xuajen Israel, náá ndiyóoʼ rí mundi̱ʼi̱i̱n bi̱ nandún muñajunʼ xá. b) Náa biʼyaa nindxu̱u̱ tikhuu ñajunʼ rí ndayóoʼ muʼni rí mbiʼi xúgi̱ náa congregación rá.

⁹ Nákha wajyúúʼ náa xuajen Israel, mbaʼa nuthu ndiyóoʼ mundi̱ʼi̱i̱n bi̱ nandún muñajunʼ (Éx. 36:2; 1 Crón. 29:5; Neh. 11:2). Rí mbiʼi xúgi̱ ma̱ngaa rígá mbaʼa náa ma̱ndoo muyambáá, ga̱jma̱a̱ mbújkha̱a̱ ma̱ngaa ga̱jma̱a̱ rí najmañulúʼ muʼni mu mumbáñuun a̱ngiu̱lú. Á mu nuʼni, makuwáanʼ gagi ga̱jma̱a̱ mbaʼa xóo gaguma tsajkurámáanʼ.

¹⁰ Ajngá rawunʼ Dios naxnún tsiakii bi̱ ni̱ndxu̱ún xa̱bekha mumbayíí Jeobá dí muni tsiakimíjna̱ mani̱ndxu̱ún siervos ministeriales ga̱jma̱a̱ bi̱ mbu̱ya̱ edxu̱u̱ (1 Tim. 3:1, 8, 9; 1 Ped. 5:2, 3). Bi̱ nuni nandún mumbañún a̱ngiu̱ún ga̱jma̱a̱ numuu Dios (Hech. 6:1-4). Lá niraxulú a̱ngiu̱lú bi̱ kuya̱ edxu̱u̱ á mu kuwáanʼ xawii mu muʼni acomodador, mu muxná i̱yi̱i̱ʼ o náa mu̱ʼgua̱ guʼtáraʼa, muyambáá náa mantenimiento o i̱ʼwáʼ ñajunʼ ikháá kayúʼ xóo rígi̱ ráʼ. Bi̱ guáʼdáá ñajunʼ rígi̱ mbáa mutulú dí ra̱ʼkhá tháán gagi gáraxtaa rí matambáñun xúgi̱ kaʼnii eʼwíínʼ.

11. Xú káʼnii nimbayíí mbáa ndxájulú bi̱ nimbáxu̱u̱ gajmíi̱n índo̱ niñajunʼ náa niguma Guʼwá nagimbáanʼ rá.

¹¹ Bi̱ nuyambáá náa ñajunʼ rí naguma náa xuajñu Dios nuxkamin eʼwíínʼ bi̱ mambaxúún gajmiún. Guʼyáá rí nigíʼnuu mbáa ndxájulú a̱ʼgu̱ bi̱ mbiʼyuu Margie, bi̱ xtáa rañajunʼ mbá gu̱wa̱ʼ migiñuʼ tsiguʼ náa naguma Guʼwá nagimbáanʼ. Mba̱yu̱ʼ tsiguʼ niʼsngúún a̱ngiu̱lú wa̱ʼxa̱ʼ. Ikhaa ndiʼyoo rí ikhí nindxu̱u̱ náa ma̱ndoo maxnún má  xúʼko̱ tsiakii ga̱jma̱a̱ numuu Dios (Rom. 1:12). Ga̱jma̱a̱ índo̱ niraʼnuu mbaʼa gamiéjunʼ rí mingíjyúuʼ náa vida ndrígóo, xúgínʼ a̱ngiu̱lú buʼko̱ bi̱ nambáxu̱u̱ gajmíi̱n nini̱i̱ a̱jkiu̱u̱n. Lá nixnaxímíjná mbá miʼtsú mu muñajunʼ náa naguma guʼwá ráʼ. Ma̱ndoo muʼni maski asndu tséjmañulu muʼni mbá ñajunʼ.

12. Xú káʼnii gándoo gumbayíí Jeobá índo̱ narígá mbá gamiéjunʼ rá.

¹² Índo̱ narígá gamiéjunʼ ikhú xa̱bi̱i̱ Jeobá nandoo nusngajma rí numbayíí Jeobá, índo̱ numbañún a̱ngiu̱lú bi̱ naguaʼnii gamiéjunʼ. Mbá xkri̱da, ma̱ndoo muxná mbújkha̱a̱ mu mixtambáñuun ga̱jma̱a̱ a̱ngiu̱lú (Juan 13:34, 35; Hech. 11:27-30). Ma̱ngaa ma̱ndoo muñajunʼ náa naguma kaʼwii guʼwá ga̱jma̱a̱ náa maguma̱a̱ guʼwá. Mbáa ndxájulú a̱ʼgu̱ bi̱ xuajñu náa Polonia bi̱ mbiʼyuu Gabriela ikhaa niguámbáa mbá kayuʼ goʼwóo índo̱ nixnúu ruʼwa mbiʼ. Mú ikhaa niʼni̱i̱ a̱jkiu̱u̱n índo̱ a̱ngiu̱lú bi̱ kuwa náa congregación dí rígá mijngii náa xtáa nigún gumbayíí. Ikhú ikhaa niʼthí: “Tsíyóóʼ gáthá rí nindáti̱go̱ʼ, numuu rí i̱ndó nindxu̱u̱ dí rígá náa numbaaʼ. Itháan nandoʼ mata numuu rí niʼngo̱ʼ nidaʼ. Náa xúgíʼ rí nigíʼnuu niʼniuʼ mba̱yo̱o̱ dí maxtáá náa xuajñu Dios naʼni rí maxtáá gagi”. Mbaʼin a̱ngiu̱lú bi̱ nixtambáñun índo̱ niguaʼnii gamiéjunʼ ikhiin nuthi dí rúʼko̱ nimbáñun mu maʼni gujkhunʼ. Ga̱jma̱a̱ a̱ngiu̱lú bi̱ nuyambáá ikhí nuthi dí ra̱ʼkhá tháán kuwa gagi índo̱ numbayíí Jeobá (atraxnuu Hechos 20:35; * 2 Corintios 9:6, 7). *

13. Xú káʼnii eʼni maguaʼdáá itháan ngajua náa Jeobá rí muxnaxímíjná muʼni ñajunʼ xá. Araxná mbá xkri̱da.

¹³ Mbáa ndxájulú a̱ʼgu̱ bi̱ mbiʼyuu Stephanie ga̱jma̱a̱ eʼwíínʼ publicadores nikuwa  gagi índo̱ niñajunʼ gajmiún Dios rí mumbáñún xa̱bi̱i̱ Jeobá bi̱ nigún i̱mba̱ níʼkhá xuajen ga̱jma̱a̱ numuu guerra ga̱jma̱a̱ nigún gumbáyumíjná náa Estados Unidos. Niñambáá índo̱ ndiyáaʼ guʼwá náa makuwa a̱ngiu̱lú bugi̱. Ikhaa naʼthí: “Niʼni makuwáanʼxu gagi ga̱jma̱a̱ rí a̱ngiu̱lú nixna̱ʼxu núma̱aʼ, ga̱jma̱a̱ numuu ngajua rí guáʼdáá a̱ngiu̱lú náa xúgíʼ numbaaʼ. Ikhiin nikumu̱ún rí ikháanʼxu nimbáñun, mú ikhiin nimbayúxu itháan. Ngajua, rí kambáxu̱u̱n, fe ndrígu̱ún ga̱jma̱a̱ rí nakumu̱ún kuyáá Jeobá rúʼko̱ niʼni rí mangáanʼxu maʼnduxu ku̱ya̱a̱ Dios. Ga̱jma̱a̱ rígi̱ niʼni mbu̱ya̱a̱xu dí gíʼdoo wéñuʼ numuu rí Jeobá naxnúlú náa xuajñu”.

14, 15. a) Ndiéjunʼ niʼthí gaʼyee Isaías rá. b) Xú káʼnii gándoo gúʼyaridáá rí xóo niriʼña xá.

¹⁴ Lá maʼndulú muñajunʼ itháan gajmiúlú Jeobá ráʼ. Lá kuwáanʼ xawii mu mu̱ʼgua̱ náa ndayóoʼ itháan bi̱ muñajunʼ ráʼ. Gajkhun má rí xa̱bi̱i̱ Dios na̱nguá katsudáanʼ mu mu̱ʼgua̱ mitsínguánʼ mu musngajmá rí nuxná rí kuaʼdáá. Mú tikhun a̱ngiu̱lú nandoo nagún mitsínguánʼ mu muni ñajunʼ Jeobá. Nithi ikhaa kayúʼ xóo gaʼyee Isaías. Jeobá niraxi̱: “Tsáa gakuʼmáa, ga̱jma̱a̱ tsáa gaʼga ga̱jma̱á numulúʼ rá.” Ikhú ikhaa niriʼña̱a̱: “¡Gi̱jyooʼ xtáá ikhúúnʼ! Ataxúʼmún ikhúúnʼ” (Is. 6:8). Lá nandulúʼ muriʼña̱a̱ xúʼko̱ mangáanʼ índo̱ nandoo muʼnilú ráʼ. Ndiéjunʼ eyóoʼ maguma rí mbiʼi xúgi̱ rá.

¹⁵ Ga̱jma̱a̱ numuu rí muʼtáraʼa ga̱jma̱a̱ rí muʼsngúún xa̱bu̱, Jesús niʼthí: “Mba̱a̱ wéñuʼ tsígáʼ, mú bi̱ nuñejunʼ ni̱ndxu̱ún nguéjmi̱i̱n. Ikha jngó, guʼtá káñii bi̱ Kaʼyoo tsígáʼ rí makunguiinʼ xa̱bu̱ mugimbóó” (Mat. 9:37, 38). Lá ma̱ndoo manindxu̱lúʼ precursores náa ndayóoʼ miʼtáraʼa itháan ráʼ. O lá ma̱ndoo mumbáyii mbáa xa̱bu̱ mu maʼni rígi̱ ráʼ. Mbaʼin a̱ngiu̱lú nusngajma rí nandún kuyáá Dios ga̱jma̱a̱ xa̱bu̱ numbaaʼ gajmiún índo̱ nanindxu̱ún precursores náa nda̱ñúnʼ itháan bi̱ muñajunʼ. Lá nundxa̱ʼwa̱míjna̱ náa gándoo muʼni itháan ñajunʼ Dios ráʼ. Á mu nuʼni makuwáanʼ gagi.

16, 17. Xú káʼnii i̱ʼwáʼ ñajunʼ rígá muni bi̱ nandún muni itháan ñajunʼ Jeobá rá.

¹⁶ Lá maʼndulú muñajunʼ náa Betel o náa mbá construcción, xóo bi̱ nuñajunʼ nguáthá mbiʼi o xóo bi̱ nagún ruñajunʼ ráʼ. Ndayóoʼ mbaʼin a̱ngiu̱lú bi̱ maʼndún makuwa i̱mba̱ níʼkhá ga̱jma̱a̱ asndu náa biʼyaa má ñajunʼ rí gúxnulú muʼni. Mbáa rígi̱ maʼni rí mu̱ʼgua̱ guñajunʼ náa ndayóoʼ itháan maski ajndu ikháanʼ najmañulúʼ muʼni imbo̱o̱ ñajunʼ. Mú Jeobá nangajo̱o̱ kaʼñún bi̱ nuxnaximi̱jna̱ muni rí ndayóoʼ (Sal. 110:3).

¹⁷ Á mu nandulúʼ majmañulúʼ itháan mu muʼni ñajunʼ Jeobá, mbáa nuʼnimbánii rí ndayóoʼ mu mu̱ʼgua̱ Náa Najuiʼsngúún bi̱ Nutaraʼa numuu Reino. Ikhí nagumaratiin xa̱bekha ga̱jma̱a̱ gu̱ʼu̱ bi̱ nambáxu̱u̱n májánʼ gajmiún Dios bi̱ nuñajunʼ káxi̱, mu xuajñu Jeobá majmiuu náa gáʼyóoʼ. Bi̱ nandún makuwa náa curso rígi̱ gíʼmaa maʼndún muni asndu xú káʼnii má ñajunʼ rí gúxnún muni nda̱wa̱á rí garámunʼ curso rígi̱. Lá maʼndulú mu̱ʼgua̱ náa escuela rígi̱ mu mundrígú itháan ñajunʼ ráʼ. (1 Cor. 9:23.)

18. Ndiéjunʼ gambáyulú á mu nuñajunʼ gajmiúlú Jeobá xúgíʼ mbiʼi rá.

¹⁸ Bi̱ ni̱ndxu̱lú xa̱bi̱i̱ Jeobá nandulúʼ muxná rí kuaʼdáá, musngajmá ngajua ga̱jma̱a̱ manindxu̱lúʼ májaanʼ xa̱bu̱, maxmiéjunʼlú kuʼñúún eʼwíínʼ xúgíʼ mbiʼi. Rígi̱ naʼni makuwáanʼ gagi, tsímáá ga̱jma̱a̱ maʼdxulú (Gál. 5:22, 23). Tséʼniuu asndu xó má káʼnii kuwaanʼ, ma̱ndoo makuwaanʼ gagi numuu rí nduʼyaridáá Jeobá bi̱ naxná rí gíʼdoo ga̱jma̱a̱ dí makuwáanʼ gajmiúlú bi̱ numbayíí (Prov. 3:9, 10).