1. Xú káʼnii ekujmaa náa xúgíʼ rí Jeobá niʼni rí ikhaa naxná rí gíʼdoo xá.

ÍNDO̱ Jeobá nigíʼdu̱u̱ niʼni numbaaʼ, mbáwíi xtáa. Na̱nguá xtáa randxa̱ʼwáminaʼ i̱ndó ga̱jma̱a̱ numuu ikhaa, mbaʼin xa̱bu̱ bi̱ najmañún nixnúún vida makuwa, xó má bi̱ ni̱ndxu̱ún espíritu ga̱jma̱a̱ xa̱bu̱ numbaaʼ. Ikhaa nindxu̱u̱ mbáa “Dios gagi”, ga̱jma̱a̱ naniguʼ maxná rí májánʼ (1 Tim. 1:11; Sant. 1:17). Ga̱jma̱a̱ numuu rí nandoo dí mangáanʼ makuwáanʼ gagi, naʼsngúlú muxná rí kuaʼdáá (Rom. 1:20).

2, 3. a) Náa numuu rí kuwaanʼlú gagi índo̱ nuxná rí kuaʼdáá rá. b) Ndiéjunʼ gúʼyáá náa artículo rígi̱ rá.

² Dios niʼnii xa̱bu̱ numbaaʼ xó má kaʼnii ikhaa (Gén. 1:27). Xóo muʼthá, niʼniáanʼlu mu manindxu̱lúʼ xó má ikhaa. Ikha jngó, á mu nandulúʼ rí makuwáanʼ gagi, ndaʼyulú rí mbuʼyaridáá xkri̱da ndrígóo rí maxmiéjunʼlú kuʼñúún a̱ngiu̱lú ga̱jma̱a̱ rí muxná rí kuaʼdáá (Filip. 2:3, 4; Sant. 1:5). Náa numuu rá. Numuu rí xúʼko̱ niʼniáanʼlú Dios. Maski ajndu ni̱ndxu̱lú xa̱bu̱ aʼkhá, ma̱ndoo muxnáálú rí kuaʼdáá xó má eʼni ikhaa.

³ Náa Biblia naʼsngúlú rí gíʼmaa muxná rí kuaʼdáá ga̱jma̱a̱ xúgíʼ a̱jkiu̱lú. Náa artículo rígi̱, mbuʼyáá tikhu rí naʼtulúʼ muʼni  Ajngá rawunʼ Dios ga̱jma̱a̱ numuu rí muxná rí kuaʼdáá. Majmañulúʼ rí muxná rí kuaʼdáá nambáyulúʼ mambáxulu májánʼ gajmiúlú Jeobá, ga̱jma̱a̱ rí muʼnimbánii ñajunʼ rí nixnúlú muʼni. Ma̱ngaa mbuʼyáá xóo embánii cualidad rígi̱ ga̱jma̱a̱ rí makuwáanʼ gagi, ga̱jma̱a̱ náa numuu dí ragíʼmaa maʼgáanʼ rí muxná má xúʼko̱.

4, 5. Xú káʼnii xkri̱da rí xóo muxná rí kuaʼdáá niniñuʼ Jeobá ga̱jma̱a̱ Jesús rá.

⁴ Jeobá nandoo rí mbuʼyaridáá, ikha jngó nadxuu wéñuʼ índo̱ nuxná rí kuaʼdáá (Efes. 5:1). Nakujmaa kaʼwu rí Dios nandoo rí makuwáanʼ gagi. Nakujmaa rí xóo niʼniáanʼ ga̱jma̱a̱ mbaʼa enii rí naʼgui̱i̱ rí xóo niʼni xúgíʼ (Sal. 104:24; 139:13-16). Xúʼko̱ nduʼyamajkuíí índo̱ nuʼnimi̱jna̱ muʼni rí makuwa gagi eʼwíínʼ.

⁵ Bi̱ ni̱ndxu̱lú cristianos gajkhun nduʼyaridáá Jesús, bi̱ nisngájmulú kaʼwu asndu náa gándoo muxná rí kuaʼdáá. Ikhaa má niʼthí: “A̱ʼdióo xa̱biya̱ táʼkha̱ mu maguma mbaʼwi̱i̱, ikhaa ni̱ʼkha̱ gáʼni mbaʼwu̱u̱n xa̱bu̱, ga̱jma̱a̱ maxná vida ndrígóo mu maʼtsiwíin mbaʼin xa̱bu̱” (Mat. 20:28). Ikha jngó, apóstol Pablo niʼthún cristianos: “Gundxaʼwa̱a̱ e̱dxa̱laʼ mangáanʼ xó má nindxa̱ʼóo edxu̱u̱ Cristo Jesús”, bi̱ “niniñuʼ xúgíʼ rí gíʼdoo ga̱jma̱a̱ ni̱jkha̱nú ninindxu̱u̱ xóo mbáa esclavo” (Filip. 2:5, 7). Ikha jngó májánʼ eʼni rí muraximíjna̱: “Lá ma̱ndoo mbayarídoo itháan májánʼ Jesús ki xóo rí xtáá rani ráʼ.” (Atraxnuu 1 Pedro 2:21.) *

6. Ndiéjunʼ ikha niʼsngáa Jesús náa xkri̱da ndrígóo samaritano rá. (Atayáá timbá xtiʼkhu.)

⁶ Ma̱ndoo muʼni rí naniguʼ Jeobá á mu nduʼyaridáá xkri̱da májánʼ rí ikhaa niniñuʼ ga̱jma̱a̱ A̱ʼdióo. Mu ma̱ndoo muʼni xúʼko̱ gíʼmaa maxmiéjunʼlú kuʼñúún eʼwíínʼ ga̱jma̱a̱ mbuʼyáaʼ xóo mumbáñuun náa rí nda̱ñúnʼ. Náa xkri̱da ndrígóo samaritano bi̱ májánʼ a̱jkiu̱u̱n, Jesús niniñuʼ kaʼwu rí gíʼthu̱u̱n muʼni bi̱ ni̱ndxu̱lú xa̱bi̱i̱, muʼni xúgíʼ rí gándoo mu mumbáñuun eʼwíínʼ tséʼniuu náa eguwáʼ (atraxnuu Lucas 10:29-37). * Garmáʼáan a̱jkiu̱lú rí Jesús nixná xkri̱da rígi̱ numuu rí mbáa judío niraxu̱u̱: “Tsáa phú nindxu̱u̱ xa̱bu̱ numbaa ga̱jmu̱ʼ rá.” Rí niriʼña̱a̱ nasngájma rí gíʼmaa maʼndulú muxná rí kuaʼdáá xó má niʼni samaritano mu Dios ma̱ndoo kaʼyulú.

7. Xú káʼnii kagujtuminaʼ rí muxná rí kuaʼdáá ga̱jma̱a̱ rí niʼthí Satanás náa ixi̱ ri̱ʼi̱ Edén rá.

⁷ Bi̱ ni̱ndxu̱lú cristianos kuaʼdáá mbaʼa enii xóo ma̱ndoo muxná rí kuaʼdáá. Mbá nindxu̱u̱ rí muxná rí kuaʼdáá kagujtuminaʼ ga̱jma̱a̱ rí niʼthí Satanás náa ixi̱ ri̱ʼi̱ Edén. Náa numuu eʼthá rígi̱ rá. Ikhaa niʼthí rí Adán ga̱jma̱a̱ Eva, ga̱jma̱a̱ xúgínʼ xa̱bu̱ numbaaʼ, makuwa itháan májánʼ á mu naxmiéjunʼ kuyamijná i̱ndó ikhiin ga̱jma̱a̱ á mu nuni rí nandún ikhiin ki xóo munimbu̱ún kuyáá Dios. Adán ga̱jma̱a̱ Eva i̱ndó nindxa̱ʼwa̱míjna̱  ga̱jma̱a̱ numún ikhiin. Eva nindoo mani̱ndxu̱u̱ xóo Dios, rígáa Adán nindoo maʼni rí naniguʼ a̱ʼgiu̱u̱ ki xóo rí naniguʼ Jeobá (Gén. 3:4-6). Nduʼyáá kaʼwu rí narígá ga̱jma̱a̱ numuu rí nini ikhiin. Rí mundxaʼwamíjna̱ i̱ndó ga̱jma̱a̱ numulúʼ xáʼni makuwáanʼ gagi, maʼni makuwáanʼ gíná. Á mu nuxná rí kuaʼdáá, nusngajmá rí nindxu̱u̱ itháan májánʼ muʼni rí e̱nda̱ʼa̱ Jeobá.

8. Náa numuu rí Adán ga̱jma̱a̱ Eva ndiyóoʼ mundxaʼwamíjna̱ ga̱jma̱a̱ numún eʼwíínʼ rá.

⁸ Maski ajndu Adán ga̱jma̱a̱ Eva nikuwa ndajkuíin náa ixi̱ ri̱ʼi̱ Edén, ikha rí nixnúún Jeobá ndiyóoʼ mundxaʼwamíjna̱ xú káʼnii gakuwa eʼwíínʼ xa̱bu̱. Dios niʼni tsajkurámiinʼ ga̱jma̱a̱ niʼthún rí gaʼni mbaʼin, rí gakuwa náa xúgíʼ tsu̱du̱u̱ Ku̱ba̱ʼ ga̱jma̱a̱ rí mutañajunʼ (Gén. 1:28). Xó má bi̱ Niʼniáanʼ naxmiéjunʼ ga̱jma̱a̱ numuu xúgíʼ rí niʼni, mangiin ndiyóoʼ maxmiéjunʼ kuñún e̱jñún. Mu xúgínʼ ikhiin makuwa tsímáá náa ku̱ba̱ʼ mitsaan, ndiyóoʼ muñajunʼ náa xúgíʼ numbaaʼ. Náa ñajunʼ rígi̱ mbaʼyóoʼ muñambáá xúgínʼ bi̱ kuwa náa mbá guʼwá.

9. Náa numuu rí maʼni makuwa gagi xa̱bu̱ numbaaʼ á mu nini itháan mba̱a̱ ku̱ba̱ʼ mitsaan rá.

⁹ Mu muni̱i̱ itháan mba̱a̱ Ku̱ba̱ʼ mitsaan ndiyóoʼ rí xa̱bu̱ bi̱ jmbiin muñambáá ga̱jma̱a̱ rí nindoo maʼni Jeobá. I̱ndó nundxa̱ʼwa̱míjna̱ xú káʼnii tsímáá gakuwa ikhiin. Ma̱ngaa, Jeobá gáʼni tsajkurámiinʼ wéñuʼ á mu nixna rí guáʼdáá ga̱jma̱a̱ á mu nixmiéjunʼ kuñún eʼwíínʼ.

10, 11. Xú káʼnii gándoo guʼnimbánii rí muʼtáraʼa ma̱ngaa rí muʼsngúún xa̱bu̱ rá.

¹⁰ Rí mbiʼi xúgi̱, Jeobá nixnúún mbá ñajunʼ muni xa̱bi̱i̱: Mutaraʼa ga̱jma̱a̱ musngúún xa̱bu̱. Mu muʼnimbánii, gíʼmaa maxmiéjunʼlú kuʼñúún eʼwíínʼ. Muʼni má xúʼko̱ ñajunʼ rígi̱ á mu nandulúʼ kuʼyáá Dios ga̱jma̱a̱ xa̱bu̱ numbaaʼ gajmiúlú.

¹¹ Nákha siglo timbá, apóstol Pablo niʼthí rí ikhaa gajmíi̱n eʼwíínʼ cristianos “numbáyii Dios” numuu rí nudu ga̱jma̱a̱ nurngujyááʼ tsígáʼ rí gajkhun ga̱jma̱a̱ numuu Reino (1 Cor. 3:6, 9). Ikháanʼ mangáanʼ ma̱ndoo ‹mumbáyii Dios›. Xú káʼnii rá. Rí muxnún rí kuaʼdáá eʼwíínʼ, xóo mbiʼi ndrígúlú, mbújkhu̱lú ga̱jma̱a̱ tsiakii ndrígúlú mu muʼnimbánii ñajunʼ rí Dios nixnúlú. ¡Phú májánʼ nindxu̱u̱ ñajunʼ rí kuaʼdáá!

12, 13. Náa biʼyaa gárata ikháánʼ rí matrígúu á mu narasngúún xa̱bu̱ rá.

¹² Naʼni makuwáanʼ gagi rí muríyaʼ mbiʼi ga̱jma̱a̱ tsiakii ndrígúlú mu muʼtáraʼa. Mbaʼin a̱ngiu̱lú bi̱ nusngáa ga̱jma̱a̱ numuu Biblia nduyáá dí rígi̱ naʼni makuwíin itháan gagi. Ra̱ʼkhá tháán májánʼ nindxu̱u̱ índo̱ nduʼyáá xú káʼnii eʼni inuu mbáa xa̱bu̱ índo̱ nakro̱ʼo̱o̱ rí e̱ʼkha̱ raʼthí náa Biblia, xú káʼnii eʼni itháan mba̱a̱ fe ndrígóo, xú káʼnii eriʼkhuu vida ndrígóo ga̱jma̱a̱ xú káʼnii egíʼdu̱u̱ eʼthúún eʼwíínʼ ga̱jma̱a̱ numuu rí xtáa  rajmañuu. Jesús nixtáa gagi wéñuʼ índo̱ 70 xa̱bi̱i̱ bi̱ nikunguinʼ mutaraʼa “nitangi̱i̱n ga̱jma̱a̱ gagi” numuu rí májánʼ nigájnuu ñajunʼ rí nigún gúni (Luc. 10:17-21).

¹³ Náa xúgíʼ numbaaʼ, bi̱ nutaraʼa nadxún índo̱ nduyáá xú káʼnii embáñun xa̱bu̱ ajngáa ndrígóo Reino. Gundxaʼwamíjna̱ ga̱jma̱a̱ numuu Anna, mbáa wáxá bi̱ xóo tsenújúnʼ bi̱ ni̱jkha̱ gáxtáa náa Europa náa nda̱ñúnʼ itháan bi̱ mutaraʼa. * Ikhaa naʼnirámáʼ: “Ra̱ʼkhá tháán edxuuʼ índo̱ nda̱yo̱o̱ rí mbaʼin xa̱bu̱ nandún majuiʼsngúún ga̱jma̱a̱ numuu Biblia. Naʼni maxtáá gagi wéñuʼ rí mataraʼa. Índo̱ na̱jkhánúʼ goʼwóoʼ, nda̱a̱ mbiʼi mu mandxa̱ʼo̱o̱ edxu̱ʼ ga̱jma̱a̱ numuu xkujndu rí gúʼdoo. Nandxa̱ʼo̱o̱ edxu̱ʼ ga̱jma̱a̱ numún bi̱ nasngúún, xkujndu ndrígu̱ún ga̱jma̱a̱ rí naʼni maxmiéjunʼ. Ndaʼyáaʼ xóo ma̱ndoo maxnu̱u̱n tsiakii ga̱jma̱a̱ mambáñun. Nda̱yo̱o̱ májánʼ rí ‹kuwáanʼ itháan gagi á mu nuxna ki xóo rí mundrígú›” (Hech. 20:35).

14. Maski ajndu nguáthi̱i̱n xa̱bu̱ gudxawíín ajngáa rígi̱, xú káʼnii gándoo gúʼni mu makuwáanʼ gagi índo̱ gúʼtaraʼa rá.

¹⁴ Maski ajndu xa̱bu̱ xudxawunlú, naʼni makuwáanʼ májánʼ índo̱ numbáñuun mundrígú ajngáa rí gajkhun. Rí xúgi̱ ñajunʼ ndrígúlú naʼni mbríguminaʼ ga̱jma̱a̱ ñajunʼ rí nikhánúu gaʼyee Ezequiel. Jeobá niʼthúu̱n: “Ga̱jma̱a̱ gíʼmaa marathu̱u̱n ajngóʼ, tséʼniuu á mu nudxuun o tsédxuun” (Ezeq. 2:7; Is. 43:10). Maski ajndu tikhun xa̱bu̱ na̱nguá enigu̱nʼ rí nuʼtáruʼun, Dios nangajo̱o̱ tsiakii rí nuʼni (atraxnuu Hebreos 6:10). * Mbáa bi̱ naʼtáraʼa niʼthí: “Niʼdu, nirngújyaʼ ga̱jma̱a̱ niʼtájkáan mu Jeobá maʼni rí xa̱bu̱ maʼndún mbuyáá itháan” (1 Cor. 3:6).

15. Xú káʼnii eriʼña mbaʼin xa̱bu̱ índo̱ nuxnún rí kuaʼdáá, ga̱jma̱a̱ lá rúʼko̱ gáʼni rí muriʼkhu̱u̱ rí gúʼni ráʼ.

¹⁵ Jesús nandoo rí makuwáanʼ gagi. Ikha jngó niʼthúluʼ: “Xúniʼñáʼ ruxna, ga̱jma̱a̱ xa̱bu̱ muxnala mangáanʼ. Ikhiin mugrigu náa ragomiala mbá awan májánʼ, rí xa̱ʼ ga̱jma̱a̱ asndu magadirígúu. Numuu rí xó má egiéwanla, xúʼko̱ má gugiewa̱a̱n rí  muda̱a̱la” (Luc. 6:38). Mbaʼin xa̱bu̱ nanigu̱nʼ índo̱ nuxnún rí kuaʼdáá. Gajkhun má dí raʼkháa xúgínʼ gundrigú rí nuxnún, mú bi̱ nundrigú nuxna̱a̱ núma̱aʼ ga̱jma̱a̱ rígi̱ maxkajxi̱i̱n rí mangiin muxna, ma̱ngaa muni rí eʼwíínʼ muni xúʼko̱ kaʼnii. Mú gíʼmáanʼ muxná má xúʼko̱ rí kuaʼdáá maski ajndu nguáná nakujmaa rí xa̱bu̱ tséyamajkuíí. Tséʼyáá rí gáʼngo̱o̱ gárígá á mu nuxná rí kuaʼdáá.

16. Tsíin gíʼmaa muxnún rí kuaʼdáá ga̱jma̱a̱ náa numuu rá.

¹⁶ Bi̱ phú naxná rí gíʼdoo tsegiʼthu̱u̱n magruigú nimbá. Jesús ndiʼyoo rígi̱ índo̱ niʼthí: “Mú índo̱ gátani ndxa̱a̱, arathún maguwáʼ xa̱bu̱ gíníi, bi̱ xa̱ʼ rajkúún, bi̱ gúʼxúʼ, bi̱ tsíkruigu̱u̱n; ga̱jma̱a̱ maraxtaa gagi, numuu rí ikhiin nda̱a̱ rí guáʼdáá muxnaʼla” (Luc. 14:13, 14). Náa Biblia naʼthí rí bi̱ naxná rí gíʼdoo maguma tsajkurámááʼ ga̱jma̱a̱ “xa̱bu̱ bi̱ naʼniu rí májánʼ xa̱bu̱ gínáa” naxtáa gagi (Prov. 22:9; Sal. 41:1). Ikha jngó, nuxnún rí kuaʼdáá eʼwíínʼ numuu rí mumbáñuun mitsaan nindxu̱u̱.

17. Ndiéjunʼ gándoo muxná mu makuwáanʼ gagi rá.

¹⁷ Índo̱ Pablo nijmuu ajngáa rí niʼthí Jesús rí “kuwáanʼ itháan gagi á mu nuxná ki xóo rí mundrígú”, tándoo gáʼthi i̱ndó rí muxná mbújkha̱a̱, ma̱ngaa rí muxnún tsiakii, ikha ga̱jma̱a̱ mumbáñuun bi̱ nda̱ñúnʼ (Hech. 20:31-35). Apóstol bugi̱ niʼsngúlúʼ ga̱jma̱a̱ rí niʼthí ma̱ngaa rí niʼni rí gíʼmaa muxná rí kuaʼdáá xóo mbiʼi ndrígúlú, tsiakii ndrígúlú, maxmiéjunʼlú kuʼñúún ga̱jma̱a̱ rí musngajmúún ngajua.

18. Ndiéjunʼ ethi tikhun xa̱bu̱ bi̱ nduyáá rá.

¹⁸ Xa̱bu̱ bi̱ najmañún ga̱jma̱a̱ numuu xóo kuwa xa̱bu̱ numbaaʼ nduyáá rí á mu nuxná naʼni makuwáanʼ gagi. Náa mbá i̱yi̱i̱ʼ naʼthí rí xa̱bu̱ nuthi rí nakuwa itháan gagi índo̱ nuniu̱u̱n rí májánʼ eʼwíínʼ. Tikhun xa̱bu̱ bi̱ nduyáá nuthi rí índo̱ numbáñuun xa̱bu̱ numbaaʼ naʼni rí makuwáanʼ tsímáá numuu rí nuxnún rí nda̱ñúnʼ. Tikhun xa̱bu̱ nuthi rí májánʼ muxnaxímíjná mumbáñuun eʼwíínʼ numuu dí rúʼko̱ naʼni makuwáanʼ májánʼ rí xáʼniulu nandii ga̱jma̱a̱ makuwáanʼ itháan gagi. Rígi̱ tséʼniulú tsiánguá bi̱ nduʼyáá rí Biblia nindxu̱u̱ Ajngá rawunʼ Jeobá, bi̱ Niʼniáanʼ bi̱ nandoo kaʼyulú wéñuʼ (2 Tim. 3:16, 17).

19, 20. Náa numuu ndayúlú muxná rí kuaʼdáá rá.

¹⁹ Rí makuwáanʼ gajmiúlú xa̱bu̱ bi̱ i̱ndó naxmiéjunʼ kuyamijná maʼniulú mingíjyúuʼ muxná rí kuaʼdáá. Mú Jesús niʼthí rí a̱jma̱ xtángoo rí itháan gíʼdoo numuu nindxu̱u̱ rí maʼndulú kuʼyáá Jeobá ga̱jma̱a̱ xúgíʼ a̱jkiu̱lú, ku̱ma̱ ndrígúlú, tsiakii rí kuaʼdáá, ga̱jma̱a̱ maʼndulú kuʼñúún xa̱bu̱ numbaaʼ gajmiúlú xó má eyulú kuʼyamijná ikháanʼ (Mar. 12:28-31). Xó má ndiʼyáá náa artículo rígi̱, bi̱ nandún kuyáá Dios nugíʼ nduyaridáá. Xó má ikhaa ga̱jma̱a̱ A̱ʼdióo nuxna rí guáʼdáá, ga̱jma̱a̱ nájmi̱i̱n nuthulú muʼni xúʼko̱ mangáanʼ numuu dí rígi̱ maʼni makuwáanʼ gagi. Rí muʼni tsiakimíjna̱ muxnáá Dios rí kuaʼdáá ga̱jma̱a̱ xa̱bu̱ numbaaʼ maʼni rí maʼga̱ gamajkhu náa Jeobá ma̱ngaa mambáyulúʼ mangáanʼ ga̱jma̱a̱ eʼwíínʼ xa̱bu̱.

²⁰ Mbáa ikháanʼ nuʼgíʼ numbáñuun xa̱bu̱, mu itháan bi̱ ni̱ndxu̱ún a̱ngiu̱lú (Gál. 6:10). Á mu tséʼgáanʼlu, mbáa xa̱bu̱ muxna̱a̱ núma̱aʼ ga̱jma̱a̱ maʼndún kuyulúʼ, ga̱jma̱a̱ ikháanʼ makuwáanʼ gagi. Proverbios 11:25 naʼthí: “Xa̱bu̱ bi̱ naxná rí gíʼdoo magiʼdoo itháan, ga̱jma̱a̱ bi̱ narngujñúnʼ eʼwíínʼ ikhaa ma̱ngaa murngujyááʼ”. Xó má eʼyáá, rígá mbaʼa enii náa ma̱ndoo muxná rí kuaʼdáá, náa vida ndrígúlú ga̱jma̱a̱ náa nuʼtáraʼa náa rí manindxu̱lúʼ májánʼ a̱jkiu̱lú ga̱jma̱a̱ maxmiéjunʼlú kuʼñúún eʼwíínʼ. Náa imbo̱o̱ artículo gúʼyáá tikhuu.